Month: september 2012

Appelsínu- og karrýkjúklingur

~ Svava ~ 1 athugasemd

Ég er búin að vera í vafa um hvort ég eigi að gefa uppskriftina að þessum kjúklingarétti sem ég gerði á sunnudagskvöldinu. Fjölskyldan var stórhrifin af honum og hældi honum mikið. Öggi og Malín hrósuðu matnum við hvern bita og Jakob ætlaði ekki að geta hætt að borða. Mér sjálfri þótti rétturinn hins vegar ekki nógu góður, fjölskyldunni til mikillar furðu.

Ég eldaði stóran skammt af matnum og hafði hugsað mér að eiga afgang í nesti daginn eftir en það var ekki svo mikið sem munnbiti eftir. Þar sem rétturinn vakti svo mikla lukku viðstaddra þá ákvað ég að gefa uppskriftina og leyfa öðrum að dæma.

Appelsínu- og karrýkjúklingur

  • 900 gr kjúklingabringur
  • 1 laukur
  • ca 2 tsk karrý
  • sveppir
  • lítil dós tómatpuré (70 gr)
  • hýði af 1 appelsínu
  • 1 kjúklingateningur
  • 5 dl rjómi
  • ca 2 msk rjómaostur
  • salt og pipar

Skerið kjúklingabringurnar í bita, hakkið laukinn og sneiðið sveppina. Bræðið smjör á pönnu og steikið kjúklingabitana. Bætið sveppum, lauk og karrý á pönnuna og steikið áfram um stund. Bætið rjóma, tómatpuré, rifnu appelsínuhýði, rjómaosti og kjúklingateningi á pönnuna. Látið sjóða um stund og smakkið til með salti og pipar.

Ég bar réttinn fram með hrísgrjónum, salati og kasjúhnetum sem við stráðum yfir kjúklinginn.

Mexíkóskt lasagna með avókadó-salsa

~ Svava ~ 5 athugasemd

Ég get ekki annað en glaðst yfir því hvað vikan byrjar skemmtilega. Ég byrjaði daginn á að lesa óvænta en mjög skemmtilega umfjöllun um bloggið mitt í Morgunblaðinu sem gladdi mig meira en orð fá lýst. Gleðin hélt áfram þegar ég keypti mér tæki í eldhúsið sem mig hefur lengi langað í og við enduðum daginn á því að fá góða vini í mat.

Ég ákvað að bjóða upp á mexíkóskt lasagna með avókadó-salsa, salati og nachos. Í eftirrétt gerði ég svo rabarbarapæ sem ég bar fram með vanilluís. Uppskriftin að matnum kemur úr smiðju Nigellu Lawson en mér þykir alltaf gaman að elda uppskriftir frá henni. Þetta lasagna var engin undantekning, það var bæði einfalt og fljótlegt en best af öllu var hvað það var æðislega gott.

Ég má til með að benda á að þessi réttur er kjörin fyrir saumaklúbba og veislur því það er alveg hægt að undirbúa hann deginum áður og jafnvel enn fyrr og geyma í frysti. Avókadó-salsað skal þó gera samdægurs.

Mexíkóskt lasagna (lítillega breytt uppskrift frá Nigella Kitchen)

  • 1 msk hvítlauksolía (ég notaði ólívuolíu og hvítlauksrif)
  • 1 laukur, skorinn smátt
  • 1 rauð paprika, skorin smátt
  • 2 græn chili, skorin smátt með fræjunum
  • 1 tsk maldon salt eða ½ tsk borðsalt
  • 2 msk fínhakkaðir stilkar af fersku kóriander
  • 2 dósir hakkaðir niðursoðnir tómatar
  • 1 msk tómatssósa
  • 1 bakki nautahakk (ca 500 gr.)

Fylling

  • 1 stór (430 gr) og 1 lítil (300 gr) dósir maís
  • 2 ½ bolli rifinn cheddar
  • 6-8 mjúkar tortilla kökur

Skerið lauk, papriku og chili smátt (fræin úr chiliunum eiga að vera með). Hitið hvítlauksolíu á pönnu og steikið grænmetið ásamt nautahakkinu. Saltið og steikið við vægan hita í 15 mínútur. Í lokin er söxuðum kórianderstilkum bætt á pönnuna. Bætið niðursoðnum tómötum og tómatsósu á pönnuna og látið suðuna koma upp. Sjóðið við vægan hita í ca 10 mínútur.

Hellið vökvanum frá maísbaununum og blandið þeim saman við rifinn cheddar ostinn (geymið smá af ostinum til að setja yfir réttinn).

Byrjið á að setja lasagnað saman með því að setja um þriðjung af kjötsósunni í botninn á eldföstu móti. Leggið 2 tortillakökur yfir þannig að þær hylji sósuna. Setjið næst þriðjung af fyllingunni yfir og fjórðung af því sem eftir er af kjötsósunni yfir fyllinguna. Leggið 2 tortillur yfir. Endurtakið með þriðjungi af fyllingunni og kjötsósu og öðru lagi af tortilla kökum. Endið á að setja restina af fyllingunni og kjötsósunni og að lokum rifinn cheddar ost yfir.

Bakið við 200° í ca 30 mínútur. Berið fram með avókadó-salsa, salati og nachos.

  • Það er hægt að undirbúa þetta lasagna deginum áður. Þá er kjötsósan kæld áður en lasagnað er sett saman. Leggið plastfilmu yfir og geymið í ískáp þar til það fer í ofninn. Bætið 5-10 mínútum við bökunartímann.
  • Það er hægt að frysta óeldað lasagnað í allt að 3 mánuði. Setjið tvöfalt lag af plastfilmu yfir og lag af álpappír. Afþýðið yfir nóttu í ískáp og bætið 5-10 mínútum við bökunartímann.

Avókadó-salsa

  • 2 avókadó
  • 1 skalottlaukur
  • 3 msk hakkað grænt jalepenos úr krukku (ég notaði 1 grænt chili án fræja)
  • salt
  • 1 msk limesafi
  • 1/4 bolli grófhakkað kóriander

Skerið avókadó í bita, hakkið lauk, jalepenos og grófhakkið kóriander. Setjið í skál ásamt salti og limesafa. Blandið öllu vel saman og smakkið til hvort þurfi meira salt áður en restinni af kóriander er bætt við.  Ég setti allt nema kóriander í skál og lét töfrasprotan mauka allt saman – fljótlegt og gott.

Mjúk kanilsnúðakaka

~ Svava ~ 28 athugasemd

Mér þykja sænskir kanilsnúðar æðislega góðir og frábært að eiga þá í frystinum til að geta hitað upp með kaffinu. Vandamálið við þá er að þeir staldra yfirleitt stutt við í frystinum og það virðist sama hvað ég vanda mig við að fela þá, þeir hverfa alltaf.

Sem betur fer þá luma ég á uppskrift að þessari dásamlegu kanilsnúðaköku. Það tekur enga stund að gera hana og hún er jafnvel betri með kaffinu en snúðarnir, lungamjúk og ljúffeng.

Í morgun hringdi mamma og sagðist ætla að fá sér göngutúr til okkar. Ég ákvað að baka kanilsnúðakökuna og hafa með kaffinu þegar hún kæmi.  Það kom sér vel því þegar ég var nýbúin að taka kökuna úr ofninum fylltist húsið af gestum. Kakan vakti mikla lukku og voru allir á einu málu um að hún væri stórgóð. Ekki þótti verra að hún brosti til okkar, ótrúlegt en satt.

Mjúk kanilsnúðakaka

  • 175 gr smjör
  • 2 ½  dl sykur
  • 2 egg
  • 3 dl sýrður rjómi eða súrmjólk (ég nota bara það sem ég á, í morgun blandaði ég saman sýrðum rjóma og létt ab-mjólk)
  • 4 ½  dl hveiti
  • 2 tsk vanillusykur
  • 1 msk lyftiduft
  • smá salt

Fylling

  • 1 dl sykur
  • 3 msk kanil

Yfir kökuna

  • 2 msk smjör

Hitið ofninn í 175°. Hrærið smjör og sykur mjúkt og ljóst. Bætið eggjunum saman við, einu í einu, og þar á eftir sýrða rjómanum. Bætið þurrefnunum saman við og hrærið vel saman.

Blandið saman í sér skál sykri og kanil í fyllinguna.

Smyrjið formkökuform. Látið helminginn af deiginu í formið, stráið helmingnum af fyllingunni yfir, látið seinni helminginn af deiginu yfir og endið á að strá restinni af fyllingunni yfir kökuna. Leggið smjörklípur yfir kökuna og bakið í 45-60 mínútur (eftir stærð á formi).

Mexíkóskur mangókjúklingur

~ Svava ~ 15 athugasemd

Mér þykir svo gaman að vera með góðan mat á föstudögum og notalegt að byrja helgarfríið á að sitja lengi saman yfir kvöldmatnum. Helst á maturinn að vera þannig að það sé ekki hægt að hætta að borða og að það sé verið að narta allt kvöldið. Ef ég er t.d. með pizzur þá er gengið frá eftir matinn en afgangurinn af pizzunni látinn standa áfram á borðinu. Það er síðan verið að skera sér bita allt kvöldið. Það finnst mér notalegt.

Ég er með mjög ákveðnar hugmyndir um hvernig mat ég vil hafa á föstudagskvöldum og suma rétti myndi ég alls ekki hafa. Mér þykir t.d. mexíkóskur matur, pizzur og kjúklingur vera ekta föstudagsmatur á meðan t.d. lambalæri, fiskur og grjónagrautur eru það alls ekki. Ég get ekki útskýrt af hverju, svona er þetta bara, en sitt sýnist hverjum.

Í gærkvöldi var ég með ekta föstudagsmat, kjúklingabringur í mexíkóskri mangósósu með hrísgrjónum og góðu salati, sem var að mínu mati fullkomin byrjun á helgarfríinu.

Mexíkóskur mangókjúklingur

  • 4 kjúklingabringur
  • 2-3 tsk tacokrydd
  • 250 gr frosið niðurskorið mangó
  • 4 dl sýrður rjómi
  • 1,5 msk fljótandi kjúklingakraftur eða 1 ½ teningur
  • 2 rauðar paprikur

Hitið ofninn í 200°. Kljúfið kjúklingabringurnar á lengdina. Saltið og piprið og veltið þeim upp úr tacokryddinu. Leggið í smurt eldfast mót.

Blandið mangó, sýrðum rjóma og kjúklingakrafti saman með töfrasprota. Hellið blöndunni yfir kjúklinginn. Skerið paprikuna smátt og stráið yfir. Bakið í ofninum í ca 25 mínútur.

Berið réttin fram með hrísgrjónum og góðu salati með t.d. tómötum, rauðlauk, papriku, avokadó, fetaosti og muldum nachosflögum með kjúklingnum.

Rabarbarapæ i uppáhaldi

~ Svava ~ 1 athugasemd

Ég get ekki sleppt því að setja inn uppskriftina af rabarbarapæinu sem ég er svo hrifin af. Ég gaf uppskriftina í Fréttablaðinu um helgina og er ekki að ýkja þegar ég segi að þetta rabarabarapæ er í algjöru uppáhaldi hjá mér.

Ég hef verið svo heppin að hafa fengið rabarbara síðustu ár frá vinkonu minni. Rabarbarann hef ég skorið niður og fryst í 500 gr. einingum. Þetta hefur verið mér mikill fjársjóður í frystinum og ég veit ekki hversu oft ég hef skellt í þetta rabarbarapæ þegar gesti ber að garði.

Mér þykir pæið best heitt og ef ég býð upp á það í eftirrétt þá hef ég úbúið það áður en gestirnir koma en baka það ekki fyrr en rétt áður en ég ætla að bera það fram. Ég ber pæið oftast fram með vanilluís og þykir kaldur ísinn fara æðislega vel með heitu rabarbarapæinu.

Rabarbarapæ

  • 500 gr rabarbari (ég nota hann frosinn og læt hann ekki þiðna áður)
  • 2 msk kartöflumjöl
  • 0,5 – 0,75 dl kanilsykur

Deig

  • 3,5 dl hveiti
  • 1 dl kókosmjöl
  • 1 dl sykur
  • 150 gr smjör eða smjörlíki

Hitið ofninn í 200°. ­Skerið ­rabarbarann í 1/2 cm ­þykkar sneiðar og leggið í botninn á eldföstu móti. Stráið kartöflumjöli og kanilsykri yfir.
Blandið hveiti, sykri og kókosmjöli í skál. Skerið smjörið í litla bita og bætið í skálina. ­Blandið smjörinu saman við þurr­efnin með höndunum þar til það myndast litlir kögglar og gróf mylsna. Dreifið deiginu yfir rabarbarann og bakið í miðjum ofni í u.þ.b. 20 mínútur.

Ostafyllt buff með rjómasósu

~ Svava ~ 5 athugasemd

Ég er með móral yfir því að hafa ekki náð að svara skilaboðum og kommentum síðustu daga. Það er búið að vera mikið að gera og ég er þess að auki búin að vera í saumaklúbbum síðustu tvö kvöld. Eins og svo oft vill verða kom ég allt of seint heim úr þeim og ætlaði ekki að trúa því þegar vekjaraklukkan hringdi morgnana eftir. Ég bæti bloggleysið í gær vonandi upp með þessari uppskrift af alveg dásamlegum mat sem við borðuðum í kvöld.

Í gær var ömurlegt veður en Öggi og Gunnar létu það ekki aftra sér við að taka þátt í Atlantsolíuhlaupinu. Mér leist ekkert á blikuna þegar ég kvaddi þá og varð ekki róleg fyrr en ég fékk sms frá Ögga um að þeir væru komnir í mark. Gunnar hafði staðið sig vel, eins og alltaf, og hreppti bronsverðlaun. Við erum að springa úr stolti og Gunnar hefur enn ekki tekið medalíuna af sér.

Á meðan feðgarnir hlupu í roki og rigningu sátum við hin inni í hlýjunni við kertaljós og gæddum við okkur á ljúffengri aspassúpu. Ég ætlaði að setja inn uppskriftina af henni en áður en ég vissi af var ég orðin of sein í saumaklúbbinn og mátti því ekkert vera að því að setjast við tölvuna.

Í kvöld var fyrsta rólega kvöld vikunnar og við nutum þess að vera öll heima. Við kveiktum á kertum og sátum lengi yfir kvöldmatnum og höfðum það notalegt. Kvöldmaturinn var dásemd sem ég gef uppskriftina af með gleði og vona að ykkur þyki hann jafn góð og okkur.

Ostafyllt buff með rjómasósu

  • ca 500 gr nautahakk
  • ca 500 gr svínahakk
  • 1 egg
  • 1 dl rjómi
  • nýmalaður svartur pipar
  • 1 tsk timjan
  • 150 gr góður ostur, t.d. gráðostur eða hvítmygluostur (mér þykir gott að nota Ljúfling)

Sósa

  • 4 dl rjómi
  • 1 dl vatn
  • 1-2 grænmetisteningar
  • ca 1-2 tsk rifsberjasulta
  • hvítur pipar

Blandið vel saman nautahakki, svínahakki, eggi, rjóma, pipar og timjan (ég nota K-ið á hrærivélinni en það má vel gera þetta í höndunum).  Mótið 9 buff og gerið holu í miðjuna á þeim. Skerið ostinn í bita, stingið þeim í holurnar og lokið vel fyrir.

Hitið smjör á pönnu og steikið buffin við miðlungshita. Steikið buffin í tveimur umgöngum í 2-3 mínútur á hvorri hlið. Það á ekki að fullsteikja buffin. Hafið engar áhyggjur ef einhver ostur læðist úr þeim, það gerir sósuna bara betri. Þegar buffin hafa verið steikt eru þau lögð til hliðar og gerð sósa úr steikarsoðinu. Hellið rjóma, vatni og grænmetisteningi á pönnuna og látið suðuna koma upp. Smakkið til með rifsberjasultu, hvítum pipar og grænmetiskrafti. Setjið buffin aftur á pönnuna og látið þau sjóða við vægan hita í sósunni í nokkrar mínútur eða þar til þau eru tilbúin. Ég hræri smá Maizena út í sósuna í lokin til að þykkja hana.

Við bárum réttinn fram með soðnum kartöflum, salati og rifsberjasultu sem okkur þótti æðislega góð með.

Makkarónuskúffa Markoolio

~ Svava ~ 11 athugasemd

Þegar við bjuggum í Svíþjóð var ég áskrifandi af sænska Séð og heyrt. Ég þóttist læra heilmikla sænsku af því að lesa blaðið og taldi áskriftina því nauðsynlega fyrir mig. Ég þakka blaðinu enn þann dag í dag fyrir sænskukunnáttu mína, mikið frekar en háskólanáminu sem ég stundaði, enda las ég blaðið bæði oftar og betur en námsbækurnar.

Á þessum tíma var söngvari og leikari að nafni Markoolio í miklu uppáhaldi hjá Malínu. Við fengum að hlusta á lögin hans daginn út og inn og þegar leikritið Kalli á þakinu var sett upp með Markoolio í aðalhlutverki þá kom ekkert annað til greina en að æða í leikhús til að bera goðið augum. Ég held að ég hafi aldrei séð jafn skemmtilega leiksýningu, enda smituð af gleðinni frá Malínu.

Á þessu Markoolio-tímabili Malínar var þáttur í Séð og heyrt þar sem fræga fólkið gaf uppáhalds uppskriftina sína. Þetta átti nú heldur betur við mig og það fyrsta sem ég gerði þegar blaðið kom í hús var að kíkja á uppskrift vikunnar. Það vildi síðan svo skemmtilega til að eina vikuna gaf Markoolio uppáhalds uppskriftina sína í Séð og heyrt, Makkarónuskúffu Markoolio. Þetta varð strax uppáhalds matur Malínar og ég eldaði hann lengi vel í hverri viku.

Þegar við fluttum aftur heim til Íslands féll þessi réttur í gleymsku og þegar ég ætlaði að fara að gera hann aftur þá var ég búin að gleyma uppskriftinni. Ég hef reglulega leitað að henni á netinu án árangurs en um daginn fann ég hana á gömlu bloggi sem Markoolio hafði haldið úti.

Malín varð svo ánægð þegar ég sagði henni að uppskriftin að makkarónuskúffu Markoolio væri fundin og beið spennt eftir að ég eldaði réttinn. Í kvöld lét ég verða af því og vakti rétturinn ekki minni lukku hjá börnunum í kvöld en á árum áður.

Uppskriftin er ofureinföld og um að gera að bæta t.d. beikoni eða lauk í hana og krydda nautahakkið með spennandi kryddum. Eins þykir okkur gott að hafa kartöflumús með réttinum en í kvöld létum við salat nægja.

Markoolios makkarónuskúffa

  • 4 dl makkarónur
  • 500 gr nautahakk
  • 2 egg
  • 5 dl mjólk
  • 2 teningar kjötkraftur
  • rifinn ostur

Hitið ofninn í 180° og smyrjið eldfast mót með smjöri. Sjóðið makkarónurnar þar til þær eru hálfsoðnar. Steikið nautahakk og kryddið með salti og pipar. Blandið nautahakkinu og makkarónunum saman og leggið í eldfasta mótið. Hrærið saman eggjunum og mjólkinni og hellið yfir eldfasta mótið. Sjóðið 2-3 dl af vatni og setjið teningana í. Látið sjóða þar til teningarnir hafa leysts upp og hellið þá vatninu í eldfasta mótið. Blandið öllu vel saman í eldfasta mótinu og stráið síðan ostinum yfir. Setjið réttinn í ofninn og bakið þar til osturinn er kominn með fallegan lit.

Berið réttinn fram með tómatsósu og salati.

Makkarónuskúffan er ekki síðri daginn eftir, að hita hana upp í ofni eða á pönnu og krydda með smá aromati.

Brownies

~ Svava ~ 7 athugasemd

 

Ég hélt því fram í gær að ég hefði varla stigið fæti inn í eldhúsið um helgina en ég var þá búin að steingleyma að ég bakaði brownies á laugardeginum og tók með í matarboðið um kvöldið. Ég bakaði þær bara af forvitni því ég hafði séð uppskriftina á Smitten Kitchen þar sem Deb, sem heldur úti Smitten Kitchen, sagði að þetta væru hennar uppáhalds brownies.

Ég held að það sé ekki annað hægt en að elska Smitten Kitchen. Það eru svo girnilegar uppskriftir þar og þegar Deb segir að eitthvað sé í uppáhaldi hjá henni þá hreinlega verð ég að prófa það. Það er nákvæmlega það sem gerðist með þessar brownies, ég hef aldrei smakkað vondar brownies en ef þessar voru í uppáhaldi þá hlytu þær að vera guðdómlegar. Ég gat því ekki annað en bakað þær.

Þessar brownies voru auðvitað góðar, það vissi ég áður en ég bakaði þær. Græðgin var svo mikil að ég hugsaði ekki einu sinni út í það að hafa ís, rjóma eða ber með en það hefði verið enn betra. Það er örugglega líka gott að skera þær í litla bita og geyma inni í ískáp og geta fengið sér eins og súkkulaðimola. Ég hefði gert það ef ég hefði átt afgang.

Brownies

  • 85 gr dökkt súkkulaði (ég notaði síríus suðusúkkulaði en súkkulaði með meira kakóinnihaldi er jafnvel betra)
  • 115 gr ósaltað smjör
  • 265 gr sykur
  • 2 egg
  • 1 tsk vanillusykur
  • 1/2 tsk maldon salt (eða 1/4 tsk borðsalt)
  • 85 gr hveiti

Hitið ofninn í 175°. Klæðið 20×20 cm form með bökunarpappír og smyrjið bökunarpappírinn.

Bræðið súkkulaði og smjör saman í potti. Takið pottinn af hitanum og hrærið sykri, eggjum (einu í einu), vanillusykri og salti saman við.  Blandið hveiti saman við með skeið eða sleikju og skrapið vel niður með hliðunum. Hellið deiginu í bökunarformið og dreifið úr deiginu um formið. Bakið í 25-30 mínútur eða þar til prjóni stungið í kökuna kemur hreinn upp.

Látið kökuna kólna og skerið í bita.

 

Cajun-kjúklingapasta

~ Svava ~ 3 athugasemd

Við erum búin að vera í góðu yfirlæti um helgina og ég hef varla stigið fæti inn í eldhúsið. Á föstudagskvöldinu vorum við í mat hjá mömmu og í gærkvöldi hjá tengdó. Algjört lúxuslíf á okkur.

Í kvöld var þó engin sem bauð okkur í mat og ég eldaði cajun-kjúklingapasta að beiðni Jakobs. Hann er mesti matgæðingurinn af börnunum og hefur frábæran matarsmekk. Hann myndi seint sætta sig við ristað brauð með osti eða skinku í morgunmat heldur smyr brauðið sitt með pestó eða dijon sinnepi. Hann elskar mygluosta og mesta dekur sem hann getur hugsað sér er að fara á Noodle station á Skólavörðustígnum þar sem hann pantar sér sterka núðlusúpu. Jakob er alltaf mættur í eldhúsið til mín til að smakka á sósum þegar ég er að elda og það er frábært að fylgjast með honum á meðan hann smakkar þær til.

Og það var engin annar en Jakob sem fann uppskriftina að þessu cajun kjúklingapasta og bað mig um að elda það. Ég hafði verið að skoða skinnytaste síðuna á netinu og þegar ég hætti í tölvunni fór Jakob að skoða síðuna. Hann sá þá uppskriftina sem honum fannst við verða að prófa. Ég breytti uppskriftinni lítillega og notaði það sem ég átti í skápunum.

Cajun kjúklingapasta

  • 225 gr tagliatelle
  • 700 gr kjúklingabringur
  • 1-2 tsk cajun krydd
  • 1 msk ólívuolía
  • 1 rauð paprika, skorin í þunnar sneiðar
  • 1 gul paprika, skorin í þunnar sneiðar
  • 1 rauðlaukur
  • 3 hvítlauksrif
  • 2 tómatar, skornir í bita
  • 1 bolli kjúklingasoð (vatn og kjúklingateningur)
  • 1/3 bolli mjólk
  • 1 msk hveiti
  • 3 msk rjómaostur
  • nýmalaður pipar
  • salt

Blandið saman hveiti, rjómaosti og mjólk í matvinnsluvél eða með töfrasprota og leggið til hliðar.

Skerið grænmetið niður og leggið til hliðar. Skerið kjúklingabringurnar í strimla og kryddið með cajun-kryddi. Hitið ólívuolíu á pönnun og steikið kjúklingabringurnar. Kryddið með hvítlaukskryddi, salti og cajun-kryddi. Leggið til hliðar.

Bætið meiri ólívuolíu á pönnuna og mýkjið paprikurnar og rauðlaukinn við miðlungsháan hita, ca 3-4 mínútur. Bætið tómötunum og hvítlauknum á pönnuna og steikið áfram í 2-3 mínútur. Bætið mjólkurblöndunni, kjúklingasoðinu og kjúklingabringunum á pönnuna og látið allt sjóða saman um stund. Smakkið til með salti og pipar.

Sjóðið tagliatelle samkvæmt leiðbeiningum á pasta. Berið réttinn fram með pasta og hvítlauksbrauði.

Himnesk hnetusmjörskaka

~ Svava ~ 12 athugasemd

Þessi kaka er himnasendig fyrir þá sem elska hnetusmjör og hún er í algjöru uppáhaldi hjá Ögga. Hann er ekki þó einn um að þykja kakan góð og ég held að það sé ekki annað hægt en að falla fyrir henni.

Mér þykir mjög gaman að bjóða upp á þessa köku því hún vekur alltaf lukku. Um síðustu helgi fengum við vini okkar í kaffi og ég var byrjuð að baka möndluköku þegar Öggi fékk akút löngun í hnetusmjörskökuna. Þar sem ég er ósköp bóngóð í eldhússtörfunum þá ákvað ég að baka hana líka, öllum til mikillar gleði.

Ég hef mjög gaman af því að skoða amerískar uppskriftasíður og þar er oftast, ef ekki alltaf, notað bollamál. Það er lítið mál að breyta bollamáli yfir í desilítra (t.d. er tafla hér á síðunni) en ég mæli þó með því að fjárfesta í bollamáli. Þau kosta ekki mikið og ég sá t.d. bollamál frá Wilton í Kosti um daginn á um þúsund krónur.

Hnetusmjörskaka (uppskrift frá The Girl Who Ate Everything)

Botn:

  • ¼ bolli slétt hnetusmjör (þ.e. ekki með bitum í)
  • 1 bolli vatn
  • ½  bolli smjör
  • 1 bolli sykur
  • 1 bolli púðursykur
  • 2 bollar hveiti
  • 1 tsk salt
  • 1 tsk matarsódi
  • 2 egg
  • ½  bolli buttermilk (setjið 1 msk af sítrónusafa í bolla og fyllið hann síðan af mjólk. Látið standa í 5 mínútur)
  • 1 tsk vanillusykur

Krem:

  • ¾ bolli smjör
  • 6 msk buttemilk
  • ½  bolli slétt hnetusmjör
  • 3½ bolli flórsykur
  • 1 tsk vanillusykur

Hitið ofninn í 190°. Blandið saman hnetusmjöri, vatni og smjöri í potti og hitið að suðu. Bætið sykri, púðursykri, hveiti, salti og matarsóda saman við. Blandið eggjum, buttermilk (gerið 1 bolla af buttermilk, þ.e. blandið sítrónu og mjólk skv. skýringu hér fyrir ofan, notið hálfan bolla núna og geymið hinn helminginn til að nota í kremið) og vanillusykri saman og hrærið saman við. Klæðið skúffukökuform með bökunarpappír og bakið í ca 25 mínútur, eða þar til prjóni stungið í kökuna kemur hreinn upp.

Krem: Blandið saman smjöri, buttermilk og hnetusmjöri í potti og hitið að suðu. Takið af hellunni og hrærið flórsykri og vanillusykri saman við. Setjið kremið yfir kökuna.