Gúllassúpa með nautahakki

Gúllassúpa með nautahakkiÉg veit að ég hef verið súpuglöð upp á síðkastið og gefið hér hverja súpuuppskriftina á fætur annarri en ég ræð ekki við mig. Þetta er sá árstími sem ég gæti lifað á súpum og brauði. Um daginn gerði ég tvo fulla súpupotta sem ég frysti og hef verið að gæða mér á nánast daglega síðan. Súpur hljóta að vera notalegasti matur sem til er í vetrarkuldanum!

Þessi gúllassúpa er sérlega ljúffeng og upplagt að frysta hana til að eiga þegar enginn nennir að elda eða allir koma seint heim. Ég borða hana ýmist með góðu brauði eða nachos og þykir bæði betra. Sýrður rjómi fer yfirleitt í súpuskálarnar mínar en auðvitað má sleppa honum. Eins má leika sér með hráefnið, skipta kartöflum út fyrir gulrætur eða sætar kartöflur, nautahakkinu fyrir gúllasbita… það eru engar reglur, bara að dekra við súpuna og hún verður dásamleg.

Gúllassúpa með nautahakki

Gúllassúpa með nautahakki (uppskrift fyrir 5-6)

  • 500 g nautahakk
  • 3 msk tómatpúrra
  • salt og pipar
  • 1 hvítlauksrif
  • 1 rauð paprika
  • smjör
  • 1 laukur
  • 2 dósir Hunt´s niðursoðnir hakkaðir tómatar, samtals 800 g (mér þykir gott að blanda Roasted Garlic og Basil, Garlic & Oregano)
  • 7 litlar kartöflur, skornar í bita
  • 1/2 tsk tabasco
  • 8 dl vatn
  • 3 nautateningar
  • 2 msk soja
  • 2 tsk paprikukrydd

Steikið nautahakk á pönnu. Kryddið með salti og pipar og hrærið tómatpúrru saman við. Leggið til hliðar.

Hakkið papriku og lauk. Bræðið smjör á pönnu og bætið prpriku, lauk og hvítlauk á pönnuna. Látið mýkjast við vægan hita.

Setjið allt í pott og látið sjóða saman í 15-20 mínútur. Berið fram með sýrðum rjóma og góðu brauði.

Gúllassúpa með nautahakkiGúllassúpa með nautahakkiGúllassúpa með nautahakki

Allt hráefni í þessa uppskrift fæst í

HAGKAUP

Vikumatseðill

Hægeldað nauta innra læri, kartöflugratín, heimagerð bernaise sósa og piparostasveppasósaNú er stutt vinnuvika og páskafrí framundan. Við ætlum að vera heima yfir páskana en bindum miklar vonir við gott skíðafæri í Bláfjöllum. Fyrir utan skíðin langar mig mest til að eyða fríinu í rólegheitum, fara í göngutúra, kíkja í matreiðslubækur og borða góðan mat. Ég elda alltaf lamb á páskadag en annars er lítið um matarhefðir yfir páskana hjá okkur. Mér datt þó í hug að það gæti verið sniðugt að smakka páskabjórinn á föstudagskvöldinu og þá fer pizza með karamelluseruðum lauk og beikoni stórvel með. Ég mæli með að þið prófið hana!

Gratineraður fiskur á hrísgrjónabeði

Mánudagur: Gratineraður fiskur á hrísgrjónabeði

Milljón dollara spaghetti

Þriðjudagur: Milljón dollara spaghetti

Rjómalöguð kjúklingasúpa

Miðvikudagur: Rjómalögðu kjúklingasúpa

Ómótstæðilegur pastaréttur í einum hvelli

Fimmtudagur: Ómótstæðilegur pastaréttur 

Pizza með karamelluseruðum lauki og pipruðu beikoni

Föstudagur: Pizza með karamelluseruðum lauk og pipruðu beikoni

Kotasælupönnukökur

Morgunverður yfir páskana: Kotasælupönnukökur

Öll hráefni í þessar uppskriftir fást í

HAGKAUP

Kaldhefað hunangsbrauð í ofnskúffu

Kaldhefað hunangsbrauð í ofnskúffuÞar sem það styttist í helgina þá ætla ég að setja inn uppskrift sem gerir helgarmorgnana enn notalegri en áður. Mér þykir nýbakað brauð vera með því besta á morgunverðarborðinu en þar sem það getur tekið sinn tíma að baka brauð þá er ekki alltaf stemmning fyrir brauðbakstir í morgunsárið.

Kaldhefað hunangsbrauð í ofnskúffu

Mér þykir þetta brauð vera himnasending um helgar þar sem deigið er gert klárt kvöldið áður og látið hefast í ofnskúffu í ísskápnum yfir nóttina. Um morguninn er ofnskúffunni bara skellt í heitan ofninn á meðan lagt er á borð og hellt upp á kaffi. Dagurinn getur varla byrjað betur!

Kaldhefað hunangsbrauð í ofnskúffu

Kaldhefað hunangsbrauð í ofnskúffu – 16 stykki

  • 50 g ferskt ger
  • 6 dl köld mjólk
  • 3 dl haframjöl
  • 50 g smjör, brætt
  • 2 msk hunang
  • 2 tsk salt
  • 2 dl heilhveiti
  • 11-12 dl hveiti

Um kvöldið:

Myljið gerið í skál og hrærið mjólkinni saman við þar til gerið hefur leyst upp.  Hrærið haframjölinu saman við og látið blönduna standa í nokkrar mínútur. Bætið bræddu smjöri, hunangi, salti, heilhveiti og hveiti í smáum skömmtum saman við og hnoðið saman í deig. Látið hefast undir viskastykki í um 30 mínútur.  Klæðið ofnskúffu með bökunarpappír og notið hendurnar til að fletja deigið út í ofnskúffuna. Skerið deigið í 4 x 4 stykki og sigtið smá hveiti yfir. Setjið plastfilmu yfir og látið standa í ísskáp yfir nóttu.

Um morguninn:

Takið ofnskúffuna úr ísskápnum og látið hana standa við stofuhita í um 20 mínútur. Hitið ofninn í 230°. Bakið brauðið í miðjum ofni í 20-24 mínútur. Látið brauðið kólna undir viskastykki.

Kaldhefað hunangsbrauð í ofnskúffu

Allt hráefni í þessa uppskrif fæst í

HAGKAUP

Heimsins bestu súkkulaðibitakökur

Heimsins bestu súkkulaðibitakökurUndanfarnir dagar hafa verið nokkuð viðburðaríkir því við fengum skiptinema frá Frakklandi til okkar síðasta föstudag sem mun dvelja hjá okkur í viku. Í haust munu hlutskiptin síðan snúast við þegar Malín fer Frakklands sem skiptinemi í viku. Þetta ævintýri er á vegum Versló og er bæði stórsniðugt og skemmtilegt. Við vorum sérlega heppin með skiptinema, fengum yndislega stelpu til okkar sem er jákvæð og þakklát fyrir allt sem er gert fyrir hana og segist vera farin að kvíða því að kveðja og halda heim. Hún fer vonandi með góða upplifun héðan á föstudaginn og Malín hefur eflaust eignast vinkonu fyrir lífstíð.

Heimsins bestu súkkulaðibitakökurHeimsins bestu súkkulaðibitakökur

En úr einu í annað, ég les annað slagið amerískt blogg sem heitir Love Taza. Bloggið er ekki matarblogg en af og til læðast þangað inn mataruppskriftir og þegar þar birtist uppskrift sem hét „The world´s best chocolate chip cookie“ þá gat ég ómöglega staðist að prófa þær. Skiljanlega! Kökurnar eru æðislegar og ekki skemmir fyrir hvað það er einfalt að gera þær. Þessar mun ég baka aftur og aftur…

Heimsins bestu súkkulaðibitakökur

Heimsins bestu súkkulaðibitakökur (uppskrift frá Love Taza)

  • 1 bolli smjör
  • 1 bolli sykur
  • 1 bolli púðursykur
  • 2 egg
  • 1 tsk. vanilludropar
  • 1 tsk. matarsódi
  • 2 tsk lyftiduft
  • ½ tsk salt
  • 3¼  bollar hveiti
  • 1 bolli (eða meira) súkkulaðibitar

Hrærið smjörið mjúkt og kremkennt. Hrærið sykri og púðursykri saman við. Hrærið eggjum og vanilludropum saman við. Blandið þurrefnunum saman og hrærið þeim smátt og smátt saman við smjör/sykur blönduna. Hrærið súkkulaðibitum að lokum í deigið.

Skiptið deiginu í um 30-35 bita og raðið á bökunarpappírsklædda bökunarplötu (það er algjör óþarfi við að dunda sér við að rúlla kúlur úr deiginu). Bakið við 175° í 8-10 mínútur.

Allt hráefni í þessa uppskrift fæst í

HAGKAUP

Sebrakaka

SebrakakaÞað er orðið langt síðan ég gaf uppskrift af köku sem er hálf furðulegt því ég eeeeeeelska kökur. Að bjóða upp á nýbakað með kvöldkaffinu þykir mér með því notalegasta sem ég veit og að eiga heimabakaða köku á eldhúsborðinu um helgar er alltaf jafn gott.
Sebrakaka

Um daginn bakaði ég köku sem okkur þótti öllum góð. Nú man ég ómöglega hvaðan uppskriftin kom en finn kannski út úr því þegar fram líður og skal þá setja það inn. Þessi fer mjög vel með helgarkaffinu og mun eflaust ekki staldra lengi við.

Sebrakaka

Sebrakaka

  • 4 egg
  • 2  ½ dl sykur
  • 2 ½ dl mjólk
  • 250 g smjör, brætt
  • 1 msk vanillusykur
  • 1 msk lyftiduft
  • smá salt
  • 5 dl hveiti

Fyrir dökka deigið:

  • 3 msk kakó

Fyrir ljósa deigið:

  • 3 msk hveiti

Hitið ofninn í 180° og smyrjið 24 cm hringlaga kökuform.

Hrærið egg og sykur saman þar til blandan er ljós og létt. Bætið mjólk, smjöri, vanillusykri, lyftidufti, salti og hveiti saman við og hrærið þar til blandan er slétt og kekkjalaus. Setjið 5-6 dl af deiginu í aðra skál og hrærið kakói saman við. Hrærið 3 msk af hveiti saman við ljósa deigið.

Setjið um  ½ dl af ljósa deiginu í miðjuna á bökunarforminu. Setjið síðan um  ½ dl af dökka deiginu í miðjuna á ljósa deiginu í forminu. Við þetta rennur ljósa deigið út, nær köntunum. Haldið áfram að setja dökka og ljósa deigið til skiptis á þennan máta í formið og reynið að enda á ljósa deiginu.

sebrakaka sebrakaka sebrakaka

Bakið kökuna neðarlega í ofninum í 45-55 mínútur.

Allt hráefni í þessa uppskrift fæst í

HAGKAUP

Vikumatseðill


VikumatseðillEnn ein vikan að baki og tímabært að plana þá næstu. Vikumatseðill léttir mér lífið svo um munar og mér þykir alltaf jafn góð tilfinning að vita af ísskápnum fullum fyrir vikuna.

Ég vona að vikan verði öllum góð og að veðrið verði til friðs.

Vikumatseðill

Pönnusteiktur þorskur með sætum kartöflubátum og basilikumajónesi

Mánudagur: Pönnusteikur þorskur með sætum kartöflubátum og basilikumajónesi

Ofnbökuð eggjakaka með nautahakki

Þriðjudagur: Ofnbökuð eggjakaka með nautahakki

Einfalt pylsupasta

Miðvikudagur: Einfalt pylsupasta

Tælensk núðlusúpa með kjúklingi og sætum kartöflum

Fimmtudagur: Tælensk núðlusúpa með kjúklingi og sætum kartöflum

Tacopizzubaka

Föstudagur: Tacopizzubaka

Skúffukaka

Með helgarkaffinu: Skúffukaka

Öll hráefni í þessar uppskriftir fást í

HAGKAUP

Þykk og góð mexíkósk kjúklingasúpa

Mexíkósk kjúklingasúpaVið tókum okkur smá frí frá hversdagsleikanum þegar keyrðum norður á Akureyri síðasta miðvikudag og dvöldum norðan heiða það sem eftir var af vikunni. Við komum heim aðfaranótt mánudags, eftir 9 klukkustunda akstur sem endaði í bílalest yfir Laxárdalsheiði og Heydal í óveðri. Það ævintýri náði þó ekki að skyggja á yndislega ferð og þó að allir hafi verið orðnir vel þreyttir þegar við komumst heim klukkan hálf fjögur um nóttina vorum við endurnærð. Fyrir norðan náðum við að skíða bæði á Dalvík og í Hlíðarfjalli, fara þrisvar sinnum út að borða, í sund, á kaffihús, spila… já, gera allt það sem tilheyrir svona fríum og gerir lífið svo skemmtilegt.

Mexíkósk kjúklingasúpa

Eins yndislegt og það er að fara í frí þá mun ég þó seint vanmeta hversdagsleikann. Hann hefur sko sinn sjarma. Mér þykir ósköp notalegt að dunda mér í eldhúsinu þegar veðrið lætur svona illa og finnst þá sérlega viðeigandi að bjóða upp á heita, matarmikila súpu.  Þessi súpa er matarmikil, þykk og dásamleg. Ég ber hana fram með rifnum osti, sýrðum rjóma, fersku kóriander, avókadó, lime og nachos. Síðan setur hver og einn það í sína súpu sem hann hefur smekk fyrir (ég tek þetta alla leið, húrra öllu ofan í og kreysti lime yfir). Súpergott!

Mexíkósk kjúklingasúpa

Mexíkósk kjúklingasúpa (uppskrift fyrir 5)

  • 500 g kjúklingalundir (ég nota frá Rose Poultry og set jafnvel allan pokann, 700 g)
  • 1 skarlottulaukur
  • 1 rauð paprika
  • 1 líter vatn
  • 1 dós Hunt´s Diced Roasted Garlic (sjá mynd neðst)
  • 2 kjúklingateningar
  • ½ – 1 tsk chili
  • ½ – 1 tsk cumin
  • 1½ tsk paprikukrydd
  • 4 msk tómatpúrra
  • 1 dós philadelphia rjómaostur með sweet chili
  • 1 dl rjómi

Hakkið skarlottulauk og papriku og steikið við vægan hita þar til mjúkt. Takið af pönnunni og leggið til hliðar. Skerið kjúklingalundirnar í bita og steikið í nokkrar mínútur (þarf ekki að fullelda á þessu stigi). Setjið skarlottulauk, papriku, kjúklingalundir, vatn, tómata, kjúklingateninga, chili, cumin, paprikukrydd og tómatpúrru í pott og látið suðuna koma upp. Lækkið hitann og látið sjóða við vægan hita í 15 mínútur. Bætið rjómaostinum og rjómanum út í og sjóðið áfram í 5 mínútur.

Mexíkósk kjúklingasúpa

Allt hráefni í þessa uppskrift fæst í

HAGKAUP

Heitt súkkulaði

Heitt súkkulaðiÉg elska heitt súkkulaði með rjóma og sérstaklega yfir vetrartímann. Það hlýtur að vera notalegasti drykkur sem til er! Eftir útiveru eða með vöfflukaffinu, heitt súkkulaði með rjóma er alltaf jafn dásamlega gott.

Heitt súkkulaði

Það hefur tekið mig rúmt ár að setja þessa uppskrift hingað inn og ég er ekki að grínast með það. Ég hef enga skýringu á hvers vegna það tók þennan fráleita tíma en get í fullri hreinskilni sagt að þetta er besta heita súkkulaði sem ég veit um. Ég skrifaði uppskriftina í glósubók á sínum tíma og hef passað bókina eins og gull síðan þá, eingögnu út af þessari uppskrift. Það er því löngu tímabært að birta uppskriftina hér og leyfa fleirum að njóta dásemdinnar, áður en veturinn líður undir lok.

Uppskriftin miðast við fyrir einn og ber að margfalda eftir fjölda gesta. Hún er þó drjúg og fyrir 4 dugar að gera þrefalda uppskrift.

Heitt súkkulaði (uppskrift fyrir 1)

  • 3 dl nýmjólk
  • 1 msk kakómalt (t.d. Nesquick)
  • 1 ½ msk flórsykur
  • smá salt
  • 4 bitar suðusúkkulaði (4 molar af suðusúkkulaðiplötu)

Setjið allt í pott og hitið að suðu. Hellið í bolla og setjið vel af þeyttum rjóma og súkkulaðispæni yfir.

Allt hráefni í þessa uppskrift fæst í

HAGKAUP