Gamlárskveðja og vinsælustu uppskriftirnar á árinu 2016

Gamlárskveðja og vinsælustu uppskriftirnar á árinu 2016

Þá er síðasti dagur ársins runninn upp. 2016 var skítaár víða í heiminum og góð áminning um hversu gott það er að búa á Íslandi, langt frá stríðsástandi og þeirri hræðilegu eymd sem margir búa við. Hvað snýr að mér, get ég ekki sagt annað en að ég átti frábært ár! Veðrið lék við okkur og við nýttum það heilmikið í útivist, bæði í göngutúra og á skíðum á meðan opið var í fjallinu. Það fór lítið fyrir innanlandsferðalögum þetta árið, bara ein sumarbústaðarferð, en hins vegar ferðuðumst við til Brussel, Stokkhólms, Spánar, Kaupmannahafnar og Parísar. Strákarnir fermdust og lesendahópur Ljúfmetis stækkaði enn frekar. Ég kveð árið full af þakklæti ♥

Gamlárskveðja og vinsælustu uppskriftirnar á árinu 2016

Gamlárskveðja og vinsælustu uppskriftirnar á árinu 2016

Í kvöld verða hér níu manns í mat og mig grunar að ég sé með mat fyrir helmingi fleiri. Ég mun eyða deginum í eldhúsinu, að dekra við kalkúninn og undirbúa meðlætið. Eftirréttirnir eru tilbúnir og forréttinn á bara eftir að setja í ofninn rétt áður en hann verður borinn fram.

Gamlárskveðja og vinsælustu uppskriftirnar á árinu 2016

Flugeldarnar eru komnar í hús og eru að sjálfsögðu keyptar af björgunarsveit. Ég ætla í tilefni dagsins að birta lista yfir 10 vinsælustu uppskriftir ársins á blogginu, eins og ég hef gert undanfarin ár. Mig langar þó fyrst að þakka ykkur fyrir árið sem er að líða. Takk fyrir lesturinn, kommentin og kveðjurnar. Takk fyrir að vera með mér hér ♥

10 vinsælustu uppskriftirnar á árinu 2016

Kjúklingur með sætum kartöflum, spínati og fetaosti

Vinsælasta uppskrift ársins er kjúklingur með sætum kartöflum, spínati og fetaosti, en sú uppskrift var skoðuð tæplega 300.000 sinnum á árinu og henni hefur verið deilt yfir 10.000 sinnum. Skál fyrir því!

Einföld og góð skúffukaka

Einföld og góð skúffukaka er önnur vinsælasta uppskrift ársins. Það þurfa allir að eiga sína go-to uppskrift af skúffuköku. Þessi er fullkomin sem slík! Hráefnin eru yfirleitt til í skápunum og því lítið mál að baka þessa dásemd þegar skúffukökulöngunin dembist yfir mannskapinn. Sem gerist auðvitað oft.

Bananabrauð

Þriðja vinsælasta uppskriftin er uppáhalds bananabrauðið. Ég hef heyrt að þetta brauð sé orðið uppáhalds á fleiri heimilum en mínu og mér þykir vænt það. Þetta brauð er bara svo gott að það hálfa væri nóg.

Pizza sem klikkar aldrei

Pizza sem klikkar aldrei situr í fjórða sæti. Skiljanlega, því það nennir enginn að gera pizzu sem gæti klikkað. Þessi er líka ávísun á gott föstudagskvöld því hún er algjört æði.

Mexíkósk kjúklingasúpa

Í fimmta sæti er þykk og góð mexíkósk kjúklingasúpa. Svo góð!

Mexíkósúpa

Mexíkósku kjúklingasúpurnar viðrast heilla lesendur því í sjötta sæti er önnur mexíkósk súpa, sú sem ég elda hvað oftast. Ef Gunnar fengi að ráð væri þessi súpa í matinn í hverri viku. Ég elda hana að minnsta kosti tvisvar í mánuði, alltaf við mikinn fögnuð heimilismanna!

Ofnbakaðar kjötbollur

Ofnbakaðar kjötbollur eru sjöunda vinsælasta uppskriftin. Það er ekki annað hægt en að elska kjötbollur! Með kartöflumús, góðri rjómasósu og sultu væri skammlaust hægt að bjóða kóngi í mat.

Heimsins bestu súkkulaðibitakökur

Í áttunda sæti eru heimsins bestu súkkulaðibitakökur. Skiljanlega, því þær eru heimsins bestu í alvöru.

Mexíókskt kújklingalasagna

Mexíkóskt kjúklingalasagna er níunda vinsælasta uppskrift ársins. Ef einhver hefur ekki prófað þessa uppskrift þá mæli ég með að það verði áramótaheiti hjá viðkomandi. Klikkgott!

Hakkbuff með fetaosti

Síðast en ekki síst er hakkabuff með fetaosti í tíunda sæti yfir vinsælustu uppskriftirnar á árinu sem er að líða.

Öll hráefni í þessar uppskriftir fást í

HAGKAUP

10 góðar tillögur að áramótaeftirréttum

Það hljóta fleiri en ég að sitja yfir uppskriftum þessa dagana, að reyna að fá innblástur fyrir áramótin. Við fórum í gær og keyptum kalkún og meðlæti en ég er enn að gæla við forrétti og eftirrétti. Ég spurði strákana hvort þeir væru með óskir um eftirrétti og það stóð ekki á svarinu, súkkulaðimús! Ég gerði þrefalda uppskrift af súkkulaðimúsinni fyrir aðfangadagskvöld og hún kláraðist upp til agna. Ég mun því gera hana aftur á gamlárskvöld en ætla að finna annan eftirrétt til að hafa með. Oreo-ostakakan kemur sterklega til greina, hún er vinsæl hjá krökkunum og það hentar mér vel að geta útbúið hana strax í kvöld.

Ég hef áður listað upp hugmyndir af eftirréttum fyrir áramót og datt í hug að endurtaka leikinn. Hér koma því 10 góðar tillögur að eftirréttum fyrir áramótin.

Súkkulaðimús

Súkkulaðimús

Pannacotta með hvítu súkkulaði og ástaraldin
Pannacotta með hvítu súkkulaði og ástaraldin

Karamelluperur og ís

Karamelluperur

Karamelludraumur með daimrjóma og jarðaberjum

Karamelludraumur með daimrjóma og jarðaberjum

Ísbaka með bourbon karamellu

Ísbaka með bourbon karamellu

Litlar marengskökur

marange

Pannacotta með hindberjasýrópi

Pannacotta með hindberjasýrópi

Oreo-ostakaka
Oreo-ostakakaOreo-ostakaka

Nutellaís

Heimsins besti og einfaldasti ís - Nutellaís!

Súkkulaðipavlova með mascarponerjómakremi, Maltesers, Daim, ristuðum pekanhnetum og súkkulaðisósuSúkkulaðipavlova með maltesers, daim, ristuðum pekanhnetum og súkkulaðisósu

Öll hráefni í þessar uppskriftir fást í

HAGKAUP

Jólakveðja

Jólakveðja

Gleðileg jól kæru lesendur. Ég vona að jóladagarnir hafi staðið undir væntingum og allir geti tekið undir með Baggalúti og sagt að jólin eru æði! Við höfum átt æðisleg jól, svo góð að krakkarnir segja þetta bestu jól sögunnar. Ekki skemmir hvað veðrið er búið að vera jólalegt og fallegt. Ég var að tæma myndavélina og sá að hún hefur greinilega ekki verið mikið á lofti undanfarna daga en einhverjum myndum náðist að safna saman úr símunum hjá mannskapnum. Myndagæðin eru eftir því en fá að duga í þetta sinn.

Jólakveðja

Ég er búin að vera í fríi síðan á miðvikudaginn. Á fimmtudeginum varð ég fertug! Við Hannes fórum í göngu um snjóþakta Heiðmörk um morguninn og þar dró hann upp kampavín og franskar makkarónur í tilefni dagsins. Þegar við komum heim um hádegi beið mín óvæntur afmælisbröns með allri fjölskyldunni. Það sem ég var hissa! Þegar leið á daginn fórum við í  Bláa lónið, síðan út að borða og um kvöldið komu vinir hingað heim í léttar veitingar. Æðislegur dagur í alla staði!

Jólakveðja

Jólakveðja

img_0315

Seinnipart þorláksmessu fórum við í skötu á Þrjá Frakka. Mamma var búin að bíða spennt allan mánuðinn og strákarnir voru hugaðir og smökkuðu bæði skötu og hákarl, en pöntuðu sér þó saltfisk. Sjálf gæti ég vel lifað án skötunnar og er enn að berjast við að ná lyktinni úr úlpunni minni. Eftir matinn röltum við um bæinn og enduðum kvöldið á Geira smart.




Aðfangadagur rann síðan loksins upp, hvítur og fallegur. Kertasníkir hafði litið við um nóttina og skilið eftir sig gjafir sem féllu í kramið. Hinn hefðbundni möndlugrautur var í hádeginu og venjunni samkvæmt fékk Gunnar möndluna (hvernig er þetta hægt!!). Eftir að Gunnar hafði opnað möndlugjöfina dró Hannes fram auka möndlugjöf til mín, skó! Hann hafði hugsað fyrir öllu og fengið skóna í tveimur stærðum svo þeir myndu örugglega passa. Yndislegur ♥

JólakveðjaJólakveðja

Við erum mjög föst í venjum yfir hátíðirnar og hér er alltaf hamborgarahryggur og sama meðlætið, ár eftir ár. Og ár eftir ár borðum við yfir okkur. Þegar búin var að opna allar gjafirnar og gestirnir voru farnir heim gengum við frá og lögðumst svo í sófann og horfðum á jólamynd saman. Þegar klukkan var lang gengin þrjú fengum við okkur annan disk af jólamatnum áður en við skriðum upp í rúm. Dásamlegt.

Jólakveðja

Jólakveðja

Í gær var hefðbundið jólaboð hjá mömmu þar sem við fengum hangikjöt. Seinna um kvöldið fór ég svo og hitti vinkonur mínar, þar sem var boðið upp á heitreykta gæsabringu, osta, smákökur og freyðivín. Það er því hver veislan á fætur annari þessa dagana.

JólakveðjaJólakveðjaJólakveðja

Í kvöld erum við Hannes þó bara tvö og ætlum að elda okkur humar og opna hvítvínsflösku. Það verður notalegt. Á morgun hefst svo fjörið á ný því strákarnir verða 14 ára! Tíminn flýgur…

 

HAGKAUP

Sultukökur

Sultukökur

Í dag er vika í aðfangadag. Mér þykir aðventan hafa liðið svo brjálæðislega hratt og man varla eftir jafn skemmtilegum desembermánuði. Tveir saumaklúbbar, vinkonuhittingar, matarboð, jólaboð, jólahlaðborð, Baggalútstónleikar og kampavínshittingur er þegar afstaðið og stuðið heldur áfram því í næstu viku bíður annað jólahlaðborð, skötuveisla og síðast en ekki síst – ég verð fertug!

Sultukökur

Ég hef ekki verið nógu dugleg í smákökubakstrinum þessa aðventuna og það litla sem ég hef bakað hefur klárast samstundis. Hér eru því engin smákökubox á borðum en ég á sörur í frystinum og konfekt í skápnum þannig að það væsir ekki um okkur.  Mig grunar að þetta verði síðasta smákökuuppskriftin sem ég set inn fyrir þessi jól en hún er ekki af verri endanum. Klassískar sænskar sultukökur sem eru svo góðar að það hálfa væri nóg. Uppskriftin er ekkert brjálæðislega stór og því snjallt að tvöfalda hana.

Sultukökur

Það er upplagt að setja nokkrar kökur í poka og færa ástvinum fyrir jólin. Gjöf sem gleður!

Sultukökur – uppskrift úr tímaritinu Hembakat

  • 2,5 dl hveiti (150 g)
  • 120 g smjör við stofuhita
  • 3/4 dl flórsykur (45 g)
  • 1 tsk vanillusykur
  • St. Dalfour hindberjasulta

Hitið ofninn í 200°. Hrærið smjör, flórsykur og vanillusykur saman þar til blandan er létt. Bætið hveitinu saman við og vinnið vel saman. Setjið deigið í sprautupoka og sprautið kökurnar á bökunarpappírsklædda bökunarplötu. Gerið smá holu í miðja kökuna og setjið hindberjasultu þar í. Bakið í 12-15 mínútur.

SultukökurSultukökurSultukökurSultukökur

Allt hráefni í þessa uppskrift fæst í

HAGKAUP

 

Lampaást og dásamlegt Dumlefudge

Lampaást og dásamlegt Dumlefudge

Ég fékk mér lampa í vikunni, sem væri kannski ekki frásögu færandi nema að þegar ég kom heim með hann áttaði ég mig á því að ég hef fengið mér nýja lampa undanfarin þrjú jól. Það má því kannski segja að lampakaup séu að verða nokkurs konar furðuleg (og galin) jólahefð hjá mér.

Lampaást og dásamlegt Dumlefudge

Í fyrra keypti ég PH lampann sem mig hafði dreymt um lengi og fæ ekki nóg af. Árið þar á undan var það hvítur Flowerpot. Nýi lampinn heitir Leimu og er frá Iittala. Ég hef horft hlýjum augum á hann í nokkurn tíma og hann varð enn fínni hér heima en ég átti von á.

Lampaást og dásamlegt Dumlefudge

En að máli málanna, Dumlefudge. Hversu dásamlega gott! Krakkarnir eru að missa sig yfir þessu. Ég var með saumaklúbb í gærkvöldi og strákarnir báðu mig um að skammta stelpunum af góðgætinu svo það myndi ekki klárast. Þær áhyggjur reyndust þó óþarfar því ég gleymdi að bjóða upp á herlegheitin…

Lampaást og dásamlegt Dumlefudge

Ég mæli með að fjárfesta í hitamæli áður en farið er af stað í sælgætisgerð. Þeir kosta ekki mikið, ég keypti minn á 1.500 krónur um daginn, og eru hverrar krónu virði. Það munar svo miklu að geta fylgst vel með hitastiginu á karamellunni svo hún verði hvorki of mjúk né of hörð. Hér varð hún fullkomin!

Lampaást og dásamlegt Dumlefudge

Dumlefudge 

  • 3 dl rjómi
  • 3 dl sykur
  • 1 dl sýróp
  • 50 g smjör
  • 140 g Dumlekaramellur
  • 1 handfylli litlir sykurpúðar
  • maldonsalt

Setjið rjóma, sykur og sýróp í pott. Látið suðuna koma upp, lækkið hitann og látið sjóða þar til blanda nær 120° (það má líka nota kúluprófið, þ.e. setja smá af blöndunni í kalt vatnsglas og þegar það gengur að móta kúlu úr blöndunni þá er hún tilbúin). Takið pottinn af hitanum og hrærið smjörinu saman við þar til það hefur bráðnað. Hrærið hakkaðar Dumlekaramellur saman við þar til blandan er slétt. Hrærið að lokum sykurpúða varlega saman við (þeir eiga ekki að bráðna) og hellið blöndunni í form sem hefur verið klætt með bökunarpappír (ég var með form sem er 20 x 20 cm). Stráið maldonsalti yfir. Látið kólna áður en skorið niður í bita. Geymið í ísskáp.

Lampaást og dásamlegt DumlefudgeLampaást og dásamlegt DumlefudgeLampaást og dásamlegt DumlefudgeLampaást og dásamlegt DumlefudgeLampaást og dásamlegt DumlefudgeLampaást og dásamlegt DumlefudgeLampaást og dásamlegt DumlefudgeLampaást og dásamlegt Dumlefudge

Allt hráefni í þessa uppskrift fæst í

HAGKAUP

Pretzel- og hnetublanda sem erfitt er að láta í friði

Pretzel- og hnetublanda sem erfitt er að láta í friði

Í desember vil ég hafa skápana fulla af góðgæti. Hér áður fyrr bakaði ég óteljandi sortir af smákökum fyrir jólin en það er liðin tíð. Núna geri ég alls konar! Sörur, jólanammi, Rocky road, saffransnúða, smákökur… og allt klárast þetta jafn óðum (nema sörurnar, þær má enginn snerta nema ég). Nýjasta nýtt er þessi kryddaða pretzel- og hnetublanda sem ég gerði fyrr í vikunni og við höfum mumsað á undanfarin kvöld. Blandan fer stórvel með jólabjórnum en er líka þrælgóð með köldu sódavatni. Súpergott!

Pretzel- og hnetublanda sem erfitt er að láta í friði

Krydduð pretzel- og hnetublanda (uppskrift frá David Lebovitz)

  • 2 bollar (200 g) blandaðar óristaðar hnetur, t.d. kasjúhnetur, möndlur, salthnetur, pekanhnetur eða heslihnetur
  • 1 msk (15 g) ósaltað smjör, brætt
  • 3 msk (45 g) púðursykur
  • ½ tsk kanil
  • ¾ tsk cayenne pipar
  • 1½ msk hlynsíróp
  • 1 tsk sjávarsalt eða annað gróft salt
  • 2 bollar (100 g) litlar pretzel kringlur

Dreyfið úr hnetunum á bökunarplötu og bakið við 180° í 10 mínútur. Hrærið í þeim eftir helming bökunartímans.

Blandið saman bræddu smjöri, púðursykri, kanil, cayenne pipar og hlynsírópi í skál. Bætið heitum hnetunum í skálina og hrærið þar til þær eru húðaðar af blöndunni. Bætið þá salti og pretzel saman við og hrærið öllu saman þar til allt er húðað af smjörkryddblöndunni. Dreyfið úr blöndunni yfir bökunarplötu og setjið aftur í ofninn í 12-18 mínútur og hrærið tvisvar í blöndunni á meðan. Látið kólna alveg áður en borið fram.

Allt hráefni í þessa uppskrift fæst í
HAGKAUP

Pylsupasta sem rífur í

Pylsupasta sem rífur í

Í einum af dýrustu og annasömustu mánuðum ársins passar kannski vel að koma með uppskrift af pastarétti sem tekur lítið úr buddunni og örskamma stund að útbúa. Þessi pastaréttur er svo brjálæðislega góður að það hálfa væri nóg. Ég fer varlega í cayenne piparinn út af krökkunum en það má auðvitað bæta honum yfir réttinn þegar hann er kominn á diskinn og þar með velur hver og einn styrkleikann á réttinum.

Pylsupasta sem rífur í

Pulsupasta sem rífur í

  • 10 pulsur
  • 1 græn eða rauð paprika
  • 2 skarlottulaukar
  • 3 dl rjómi
  • 1 dl sýrður rjómi
  • 1/2 dl sweet chili sósa
  • 1 tsk oregano
  • salt
  • svartur pipar
  • cayenne pipar

Skerið pulsurnar niður í bita og steikið á pönnu ásamt papriku og skarlottulauk þar til aðeins mjúkt. Bætið rjóma, sýrðum rjóma, oregano og sweet chili sósu á pönnuna og látið suðuna koma upp. Smakkið til með salti, svörtum pipar og cayenne pipar. Látið sjóða saman í um 5 mínútur.

Berið fram með pasta og nýrifnum parmesan.

Allt hráefni í þessa uppskrift fæst í

HAGKAUP