Vikumatseðill

Vikumatseðill

Á morgun er bolludagur og eflaust margir sem taka forskot á daginn og baka bollur til að eiga með kaffinu í dag. Ég setti inn uppskrift af vatnsdeigsbollum fyrr í vikunni og fékk svo margar æðislegar tillögur af fyllingum á Facebook í kjölfarið að ég má til með að benda ykkur á að kíkja þangað.  Ég hef ekki getað hætt að hugsa um kókosbollu- og jarðaberjafyllinguna eða að fylla bolluna með Baileys frómas og rjóma og setja síðan karmellusósu ofan á… það hlýtur að vera himneskt. Að setja marsípan og rjóma á milli verð ég líka að prófa sem og Royal karamellubúðing sem ég veit að á eftir að slá í gegn hjá strákunum mínum. Það var svo mikið af góðum hugmyndum sem komu fram þarna að ég verð eflaust borðandi bollur fram yfir páska því mig langar að smakka þær flestar. Ég mæli með að kíkja á þetta!

Vikumatseðill

Ofnbakaðar kjötbollur

Mánudagur: Ofnbakaðar kjötbollur

Fiskur með eggjasósu og beikoni

Þriðjudagur: Fiskur með beikoni og eggjasósu

Ofnbökuð svínalund með rótargrænmeti - allt í einni skúffu!

Miðvikudagur: Ofnbökuð svínalund með rótargrænmeti

Tælensk núðlusúpa með kjúklingi og sætum kartöflum

Fimmtudagur: Tælensk núðlusúpa með kjúklingi og sætum kartöflum

Tortellini í brúnuðu salvíusmjöri

Föstudagur: Tortellini í brúnuðu salvíusmjöri

Snickersbitar

Með helgarkaffinu: Snickersbitar

Öll hráefni í þessar uppskriftir fást í

HAGKAUP

Nutellaídýfa

NutelladýfaNutelladýfa

Gunnar ákvað skyndilega á gamlárskvöldi að hafa árið 2017 sælgætislaust. Hann hefur enn sem komið er ekki fengið sér svo mikið sem nammibita, nokkuð sem ég dáist að og gæti eflaust aldrei leikið eftir. Hann er þó svo staðfastur í því sem hann tekur sér fyrir hendi að ég hef fulla trú á því að hann klári þetta með glans.

Sælgætisbindindið gerir það að verkum að ég kaupi síður nammi og set í skál fyrir framan sjónvarpið á laugardagskvöldum, heldur reyni að finna annað góðgæti til að bjóða upp á. Eðla stendur auðvitað alltaf fyrir sínu en Nutellaídýfa er þó vinsælasta helgargóðgætið.  Það er hægt að dýfa hvaða ávöxtum sem er í hana en við mælum sérstaklega með berjum og bönunum. Einfalt og vinsælt!

Nutelladýfa

Nutellaídýfa – uppskrift frá Mitt Kök

  • 2,25 dl rjómi
  • 2,25 dl rjómaostur (ég var með frá Philadelphia)
  • 1,5 – 2 dl Nutella
  • 3 msk flórsykur

Þeytið rjómann loftkenndan og léttann. Setjið rjómaost og flórsykur í aðra skál og hrærið saman. Hrærið Nutella saman við rjómaostinn. Hrærið að lokum þeytta rjómanum varlega saman við.

Setjið í skál og berið fram með ávöxtum, berjum og/eða banana.

Allt hráefni í þessa uppskrift fæst í

HAGKAUP

Kjúklingatacos undir ostabræðingi

 

Kjúklingatacos undir ostabræðingi

Ég var búin að lofa að sýna nýja ljósið sem prýðir orðið eldhúsið mitt. Sarfatti frá Flos hefur lengi staðið á óskalistanum mínum og hangir nú loksins yfir borðstofuborðinu. Mér þykir það svo fallegt að það nær engri átt.

Kjúklingatacos undir ostabræðingi

Um síðustu helgi eldaði ég kjúklingatacos sem sló í gegn hér heima. Tacokryddaður kjúklingur, paprikur og rauðlaukur undir blöndu af rjómaosti, sýrðum rjóma og cheddarosti. Þið heyrið bara hvað þetta er gott! Það er hægt að bera réttinn fram með í stökkum tacoskeljum, mjúkum tortilla eða bara með salati og nachos. Við settum blönduna í mjúkar tortillur ásamt fínskornu iceberg, salsa sósu, sýrðum rjóma og toppuðum með muldu svörtu Doritos. Súpergott!!

Kjúklingatacos undir ostabræðingi

Kjúklingatacos undir ostabræðingi

  • 900 g kjúklingabringur
  • 2 pokar tacokrydd
  • gul, rauð og græn paprika (1 í hverjum lit)
  • stór rauðlaukur (eða tveir litlir)
  • 200 g rjómaostur
  • 1 dl sýrður rjómi
  • 2 dl rifinn cheddarostur + smá til að setja yfir
  • jalapenos
  • nachos

Hitið ofninn í 225°. Skerið kjúklingabringurnar í strimla, fínhakkið paprikurnar og skerið laukinn í báta. Steikið kjúklinginn og kryddið með tacokryddinu. Bætið paprikum og rauðlauk á pönnuna og steikið í 1 mínútu. Setjið blönduna yfir í eldfast mót. Hrærið saman rjómaosti, sýrðum rjóma og rifnum cheddar osti. Dreifið úr ostablöndunni yfir kjúklingablönduna. Stráið smá cheddar osti yfir ásamt fínhökkuðu jalapeno. Setjið í ofninn í um 15 mínútur, eða þar til osturinn er bráðnaður. Takið út og skreytið með nachos.

Allt hráefni í þessa uppskrift fæst í

HAGKAUP

Vatnsdeigsbollur sem klikka aldrei!

Vatnsdeigsbollur sem klikka aldrei!

Þegar ég var 14 ára byrjaði ég að sanka að mér uppskriftum sem ég skrifaði niður í stílabók. Ég var þá lítið fyrir eldamennsku en bakstur átti hug minn allan og uppskriftasafnið var eftir því. Ég á ennþá stílabókina sem ég skrifaði uppskriftirnar mínar í en í henni má einnig finna mikilvægar upplýsingar á borð við heimilisföng aðdáðendaklúbba Jason Donovan og Roxett sem og teikningar af mismunandi uppröðun húsgagna í herberginu mínu.

Vatnsdeigsbollur sem klikka aldrei!Vatnsdeigsbollur sem klikka aldrei!

Það er langt síðan ég notaði bókina síðast en það er aðallega ein uppskrift sem ég nota í hvert einasta skipti þegar ég baka bollur, nefnilega vatnsdeigsbolluuppskrift sem ég komst yfir á þessum tíma. Sú uppskrift hefur aldrei nokkurn tímann klikkað, ekki einu sinni þegar ég var 14 ára og að stíga mín fyrstu skref í eldhúsinu.

Vatnsdeigsbollur sem klikka aldrei!

Í upprunalegu uppskriftinni eru bökunarleiðbeiningarnar svo flóknar að það nær engri átt. Í dag baka ég bollurnar bara í 180° heitum ofni í 18-20 mínútur og þær hafa aldrei klikkað. Ég hef meira að segja brotið allar reglur, eins og að opna ofninn áður en bollurnar eru tilbúnar, en það hefur þó ekki komið að sök. Það virðist ekki hægt að klúðra þessu, þó vel sé reynt!

Vatnsdeigsbollur sem klikka aldrei!

Bollurnar má auðvitað fylla með hverju því sem hugurinn girnist en sjálf er ég hrifnust af hefðbundum bollum með sultu, rjóma og súkkulaðiglassúr. Ég geri bollurnar frekar litlar en ef þið viljið hafa þær stærri þá passið þið að lengja bökunartímann um nokkrar mínútur. Ég hef aldrei fryst þær en sé að ég hef skrifað að svo megi gera. Það er því upplagt að nýta einhvern daginn í vikunni til að undirbúa bolludaginn sem er strax í byrjun næstu viku.

Vatnsdeigsbollur sem klikka aldrei!

Vatnsdeigsbollur  (18-20 litlar bollur)

  • 2,5 dl vatn
  • 125 g smjör
  • 125 g hveiti
  • 4 egg

Setjið vatn og smjör í pott og látið suðuna koma upp. Takið pottinn af hitanum og hrærið hveitinu saman við þar til massinn losnar frá pottinum. Kælið blönduna örlítið. Bætið eggjunum út í, einu í einu, og hrærið vel á milli. Notið tvær teskeiðar eða setjið deigið í sprautupoka og sprautið bollur á smjörpappírsklædda plötu. Bakið við 180° á blæstri í 18-20 mínútur.  Ef bollurnar eru hafðar stærri er bökunartíminn lengdur.

Vatnsdeigsbollur sem klikka aldrei!

Glassúr

  • 100 g suðusúkkulaði
  • 2 msk sýróp
  • 2 msk rjómi

Bræðið allt saman í potti. Látið kólna aðeins og setjið yfir bollurnar.

Allt hráefni í þessa uppskrift fæst í

HAGKAUP

Vikumatseðill

VikumatseðillValentínusarblómin hafa staðið falleg alla vikuna og glatt mig á hverjum degi. Nýtt ljós sem sést glitta í yfir borðstofuborðinu gleður mig líka, enda hefur það staðið lengi á óskalistanum. Þau ljósakaup áttu eftir að vinda verulega upp á sig, sem varð til þess að það tók nánast vikuna að koma því upp. Eftir að við keyptum ljósið fannst okkur nefnilega ekki hægt að setja það upp án þess að renna málningu yfir loftið. Síðan ákváðum við að setja dimmer á ljósið. Það þurfti því að bíða þar til verslanir opnuðu daginn eftir til að kaupa það sem þurfti fyrir dimmerinn. Þá datt okkur í hug að skipta líka vinnuljósinu út í eldhúsinu, þannig að það var aftur farið af stað. Þetta reyndist því fimm daga verkefni í það heila. En núna er ljósið komið upp og það er bara svo fallegt að það nær engri átt. Ég skal mynda það fljótlega og sýna ykkur betur. Mig grunar nefnilega að margir sem kíkja hingað inn í dag séu að bíða eftir vikumatseðlinum!

Vikumatseðill

Gratíneraður fiskur með púrrlauk og blómkáli

Mánudagur: Gratineraður fiskur með púrrulauk og blómkáli

Grænmetisréttur með kínoa og sætum kartöflumGló-brauðið sívinsæla

Þriðjudagur: Grænmetisréttur með kínóa og sætum kartöflum og Gló-brauðið sívinsæla

Kjúklingasúpa með tómötum, karrý og epli

Miðvikudagur: Kjúklingasúpa með tómötum, karrý og epli

Hakk og spaghettí

Fimmtudagur: Hakk og spaghetti

Kjúklinganaggar

Föstudagur: Kjúklinganaggar

Mjúk súkkulaðikaka með vanillukremi og kókos

 

Með helgarkaffinu: Mjúk súkkulaðikaka með vanillukremi og kókos

Öll hráefni í þessar uppskriftir fást í

HAGKAUP

Súkkulaðibitalengjur

Súkkulaðibitalengjur

Gleðilegan Valentínusardag! Ég veit að það eru skiptar skoðanir varðandi Valentínusardaginn en sjálf tek ég öllum dögum til að gera sér dagamun fagnandi. Í kvöld ætlum við Hannes út að borða, hann bókaði staðinn og ég hef ekki hugmynd um hvert við erum að fara. Hlakka til!

Súkkulaðibitalengjur

Ég ætlaði að setja þessar súkkulaðibitalengjur inn um helgina en það gafst ekki færi á því þar sem helgin fór í að mála loftið hér heima og stúss í kringum það. Núna er þó allt komið á sinn stað, loftið nýmálað og allt orðið fínt aftur. Ég get því loksins sett inn þessa uppskrift af einföldustu súkkulaðibitakökum í heimi. Ég elska kökulengjur því það er svo fljótlegt að baka þær og dásamlegt að eiga þær í frystinum. Síðan fara þær svakalega vel með kaffibollanum. Þessar urðu seigar og svo góðar!

Súkkulaðibitalengjur

Súkkulaðibitalengjur

  • 100 g smjör við stofuhita
  • 2 msk sýróp
  • 2,5 dl hveiti
  • 1 dl sykur
  • 1 tsk lyftiduft
  • 2 tsk vanillusykur
  • 100 g gott súkkulaði (ég var með frá Marabou)

Hitið ofn í 200°. Hrærið saman smjör, sykur og sýróp. Blandið þurrefnunum saman og hrærið þeim í smjörblönduna. Hrærið að lokum hökkuðu súkkulaði í deigið.

Skiptið deiginu í tvennt og mótið lengur úr þeim. Setjið lengurnar á bökunarplötu með bökunarpappír, þrýstið aðeins á þær og bakið síðan í 12-14 mínútur við 200° (ekki blástur). Takið úr ofninum og skáskerið á meðan kökurnar eru heitar.

Allt hráefni í þessa uppskrift fæst í

HAGKAUP

Snitsel

 

Snitsel

Það hefur verið flensa á heimilinu í viku og það virðist ekker fararsnið á henni. Jakob kom veikur heim úr skólanum síðastliðinn fimmtudag og steinlá fram á sunnudag en þá tók Gunnar við og hefur legið síðan þá. Við erum alveg búin að fá nóg af þessu ófremdarástandi og óskum þess heitt að flensan fari að láta sig hverfa.

Snitsel

Ég fékk óstjórnlega löngun í snitsel um daginn sem endaði auðvitað með að það var snitsel í kvöldmatinn skömmu síðar. Mér þykir allur matur í raspi góður en elda þannig mat þó furðu sjaldan. Ég bar snitselinn fram með kartöflumús, piparsósu og rifsberjahlaupi. Súpergott!!

Snitsel

Snitsel

  • 8 úrbeinaðar grísakótilettur
  • 2 dl hveiti
  • 2 egg
  • 2 dl brauðrasp eða Panko
  • salt og pipar
  • olía (ekki ólífuolía)

Byrjið á að berja kótiletturnar með flötu hliðinni á buffhamri til að ná þeim þunnum. Kryddið báðar hliðar síðan með pipar og salti.

Setjið hveiti í eina skál, hrærð egg í aðra skál og brauðrasp í þriðju skálina. Veltið kótilettunum fyrst upp úr hveitinu, síðan egginu og að lokum brauðraspinum.

Hitið vel af olíu á pönnu, þannig að það sé um 1 cm lag yfir pönnunni. Steikið snitselinn í um 2-3 mínútur á hvorri hlið. Takið snitselinn af pönnunni og yfir á disk klæddan eldhúspappír. Berið strax fram með kartöflumús og sósu.

Allt hráefni í þessa uppskrift fæst í

HAGKAUP

Makkarónu carbonara með aðeins 4 hráefnum!

 

Makkarónu carbonara með aðeins 4 hráefnum!

Það hefur verið mikið beikonæði hjá strákunum hér á heimilinu undanfarnar vikur og á tímabili kom ég varla heim úr vinnunni án þess að beikonlykt tæki á móti mér. Ég ákvað að lokum draga úr beikoninnkaupum því það getur bara ekki verið neinni manneskju gott að borða svona mikið beikon.

Makkarónu carbonara með aðeins 4 hráefnum!

Ég bauð þó upp á fljótlegt carbonara hér í síðustu viku við miklar vinsældir. Svo miklar að það var ekki svo mikið sem ein makkaróna eftir af matnum! Réttinn tekur örskamma stund að gera, er með fáum hráefnum og hentar því fullkomlega í amstri dagsins.

Makkarónu carbonara með aðeins 4 hráefnum!

Makkarónu carbonara – uppskrifti fyrir 5

  • 500 g makkarónur (ósoðnar)
  • 300 g beikon
  • 6 eggjarauður
  • 150 g parmesan, rifinn
  • salt og pipar

Sjóðið makkarónurnar eftir leiðbeiningum á pakkningu. Takið um 1-2 dl af pastavatninu frá áður en því er hellt af soðnum makkarónunum.

Skerið beikonið í teninga/sneiðar. Hitið ólífuolíu á pönnu og steikið beikonið þar til það er orðið stökkt. Bætið makkarónum á pönnuna ásamt parmesanostinum. Hrærið saman þannig að osturinn bráðni. Bætið pastavatni saman við þannig að blandan fái mjúka áferð. Takið pönnuna af hitanum og hrærið eggjarauðum saman við. Smakkið til með salti og vel af pipar. Berið fram með auka parmesanosti.

Makkarónu carbonara með aðeins 4 hráefnum!Makkarónu carbonara með aðeins 4 hráefnum!Makkarónu carbonara með aðeins 4 hráefnum!Makkarónu carbonara með aðeins 4 hráefnum!

 

Allt hráefni í þessa uppskrift fæst í

HAGKAUP

Mjúkís ársins 2017 og dásamleg hindberjabaka

Mjúkís ársins 2017 og dásamleg hindberjabaka

Vissuð þið að Mjúkís ársins er kominn í verslanir? Í ár er ísinn með pistasíuhnetum og fær því fullt hús stiga hjá mér. Mér þykja pistasíuhnetur svo æðislega góðar og ef þið hafið ekki smakkað þær í ís þá mæli ég með að prófa. Ísinn er dásamlegur einn og sér en þegar ég bar hann fram með nýbakaðri hindberjaböku í gær ætlaði allt um koll að keyra.

Mjúkís ársins 2017 og dásamleg hindberjabakaMjúkís ársins 2017 og dásamleg hindberjabaka

Það er allaf gott að eiga ís í frystinum því þá er hægt að galdra fram eftirrétt á svipstundu. Hér er mjög góð súkkulaðisósa sem fer frábærlega með ís. Eins þykir mér ís nánast ómissandi með heitum bökum. Eplabaka með vanilluís hittir alltaf í mark og þar sem mér þykja hindber og pistasíuhnetur passa svo vel saman þá langaði mig að sjálfsögðu að baka hindberjaböku til að bera fram með pistaísuísnum. Til að gera stórgott enn betra splæstum við í smá karamellusósu yfir.  Þetta verður seint toppað!

Mjúkís ársins 2017 og dásamleg hindberjabaka

Hindberjabaka

Deig

  • 125 g smjör
  • 1 dl sykur
  • 2 dl hveiti
  • 1 msk vanillusykur

Fylling

  • um 5 dl hindber, frosin eða fersk
  • 1 msk kartöflumjöl
  • 1 msk sykur

Hitið ofninn í 200°.

Setjið öll hráefnin í deigið saman í skál og vinnið saman með gaffli eða fingrunum þannig að úr verði mulningur

Blandið hindberjum, kartöflumjöli og sykri saman í annarri skál.

Smyrjið eldfast mót. Setjið hindberjablönduna í botninn og deigmulninginn yfir. Bakið við 200° í 25-35 mínútur, eða þar til bakan hefur fengið fallegan lit.

Berið bökuna fram heita með Mjúkís með pistasíuhnetum.

Mjúkís ársins 2017 og dásamleg hindberjabaka

 

Allt hráefni í þessa uppskrift fæst í

HAGKAUP

 

 

Sítrónumús með lakkrísskífu

Sítrónumús með lakkrísskífu

Þegar við vorum með plankasteikina um síðustu helgi útbjó ég í fljótlegan eftirrétt handa okkur. Eftir eins þungan mat og nautasteik er þykir mér passa sérlega vel að hafa eftirréttinn léttan og ferskan. Við Hannes erum bæði hrifin af flest öllu með sítrónu í og því var nokkuð öruggt að þessi sítrónumús myndi hrífa okkur, sem hún svo sannarlega gerði. Stökkar lakkrísskífurnar fara stórkostlega vel með sítrónumúsinni og ég mæli því með að gera ráð fyrir fleiri en einni lakkrísskífu á mann.

Sítrónumús með lakkrísskífu

Sítrónumús með lakkrísskífu – uppskrift fyrir 5-6

  • 250 g mascarpone ostur
  • 2 dl sýrður rjómi
  • 1 dl lemon curd
  • hýði og safi úr 1 sítrónu
  • lakkrískaramellur (ég keypti þær í stykkjatali á nammibarnum í Hagkaup, þar eru þær með bréfi utan um)

Hrærið saman mascarpone, sýrðum rjóma og lemon curd þar til blandan verður létt í sér. Smakkið til með sítrónusafa og fínrifnu sítrónuhýði (passið að rífa bara efsta hlutann). Setjið sítrónumúsina í skálar og geymið í ísskáp þar til hún er borin fram.

Setjið lakkrískaramellurnar á bökunarplötu klædda smjörpappír. Passið að hafa gott bil á milli þeirra því þær renna út í ofninum. Setjið í 225° heitan ofn í um 5 mínútur eða þar til þær hafa runnið út í þunnar skífur. Passið að þær brenni ekki. Látið kólna.

Stingið lakkrísskífu í sítrónumúsina og berið fram.

Sítrónumús með lakkrísskífuSítrónumús með lakkrísskífu

Allt hráefni í þessa uppskrift fæst í

 

HAGKAUP