Þorskur undir krydduðum osta- og rasphjúp

Fiskur undir krydduðum osta- og rasphjúpMér finnst ég allt of sjaldan setja fiskuppskriftir hingað inn. Það er ekki það að ég eldi sjaldan fisk heldur frekar að hann er svo óspennandi hjá okkur. Krakkarnir fá ekki leið á soðnum fiski og ég læt það allt of oft eftir þeim að hafa soðinn fisk með kartöflum, smjöri og tómatsósu í matinn. Síðan erum við öll mjög hrifin af bleikju og með henni höfum við ýmist kartöflubáta í ofni, salat og hvítlaukssósu eða soðnar kartöflur, gulrætur eða brokkólí og brætt smjör. Þess á milli höfum við plokkfisk, steiktan fisk eða fiskibollur og ef ég fæ að ráða reyktan fisk með soðnum kartöflum og bræddu smjöri. Mér þykir það æðislega gott en er því miður ein um það hér á heimilinu.Fiskur undir krydduðum osta- og rasphjúpFiskur undir krydduðum osta- og rasphjúp

Það gerist síðan inn á milli að ég hristi upp í hlutunum og geri fiskrétt og þá þykir mér upplagt að setja uppskriftina hingað inn. Eins og þennan þorskrétt sem allir voru hæstánægðir með. Þetta er nokkurs konar uppskrift af fiski í raspi, nema án vesenisins við að velta fiskinum upp úr eggi og raspi og steikja á pönnu. Einfalt, fljótlegt og stórgott! Fiskur undir krydduðum osta- og rasphjúpFiskur undir krydduðum osta- og rasphjúp

Þorskur undir krydduðum osta- og rasphjúp (uppskrift frá Familjekassen)

  • um 600 g þorskur (eða ýsa)
  • 1 dl raspur
  • 100 g rifinn ostur
  • 1 hvítlauksrif
  • 2 msk fínhökkuð steinselja
  • salt og pipar
  • smjör

Hitið ofninn í 150°. Leggið fiskinn í smurt eldfast mót. Saltið og piprið. Blandið raspi, rifnum osti, steinselju og pressuðu hvítlauksrifi saman og setjið yfir fiskinn. Setjið smjör yfir, annað hvort brætt smjör sem er dreift yfir eða skerið sneiðar (t.d. með ostaskera) og leggið víðs vegar yfir rasphjúpinn. Bakið í um 10 mínútur, hækkið þá hitann í 200° og bakið áfram í 5 mínútur til að rasphjúpurinn fái fallegan lit.

Allt hráefni í þessa uppskrift fæst í

HAGKAUP

Ítalskur lax með fetaostasósu

Ítalskur lax með fetaostasósuÍtalskur lax með fetaostasósu

Eins og eflaust á mörgum heimilum landsins þá eru mánudagar oftar en ekki fiskidagar hér heima. Eftir matarveislu helgarinnar er svo gott að fá fiskinn. Við gerðum vel við okkur þessa helgina, borðuðum gott og keyrðum bæinn þveran eftir ís bæði á laugardag og sunnudag. Það var því sérlega gott að fá mánudagsfiskinn í dag.

Þessi laxréttur er dásamlegur í alla staði og fellur vel í kramið hjá öllum fjölskyldumeðlimum. Ég blanda oftast laxi og þorski þar sem krökkunum þykir gott að hafa valið en hér má leika sér með þær fisktegundir sem lokka að hverju sinni. Sósan setur síðan punktinn yfir i-ið á þessum stórgóða rétti.

Ítalskur lax með fetaostasósu

Ítalskur lax með fetaostasósu

  • 600 g lax (eða blanda af laxi og þorski)
  • sólþurrkaðir tómatar í olíu, magn eftir smekk
  • 1 hvítlauksrif
  • gróft salt
  • 10 kartöflur
  • klettasalat

Hitið ofninn í 225°.  Afhýðið kartöflurnar, skerið þær í bita og dreifið úr þeim á ofnplötu sem hefur verið klædd með bökunarpappír. Setjið hálfan dl af olíunni frá sólþurrkuðu tómötunum í skál og pressið hvítlauksrifið í olíuna. Hellið olíunni yfir kartöflurnar og setjið í ofninn í um 20 mínútur.

Skerið laxinn (og þorskinn sé hann notaður) í bita sem eru um 2×2 cm að stærð. Þegar kartöflurnar hafa verið í ofninum í 20 mínútur er laxinum bætt á ofnplötuna, nokkrar matskeiðar af olíunni frá sólþurrkuðu tómötunum sáldrað yfir ásamt grófu salti og sett aftur í ofninn í 10 mínútur til viðbótar. Þegar laxinn og kartöflurnar koma úr ofninum er hökkuðum sólþurrkuðum tómötum stráð yfir ásamt klettasalati. Setjið réttinn á fallegt fat og berið fram með fetaostasósu.

Fetaostasósa

  • 1 dl sýrður rjómi
  • 100 g fetakubbur
  • 1/2 hvítlauksrif, pressað
  • salt
  • ítalskt salatkrydd

Myljið fetaostinn og hrærið saman við sýrða rjómann. Pressið hvítlaukinn saman við og smakkið til með salti og ítölsku salatkryddi. Geymið í ísskáp þar til sósan er borin fram.

Allt hráefni í þessa uppskrift fæst í

HAGKAUP