Vikumatseðill

Þá er annar í aðventu runninn upp og í dag ætla ég að halda í hefðina og vera með aðventukaffi. Nýsteiktar eplaskífur með flórsykri, rjóma og sultu bornar fram með heitu súkkulaði (uppskrift af besta heita súkkulaðinu finnur þú hér) er orðin okkar kærasta aðventuhefð og tilhlökkunin hefst strax á haustin.

Til að halda í aðra hefð kemur hér tillaga að vikumatseðli fyrir komandi viku. Ef það er einhvern tímann gott að vera skipulagður í matarinnkaupum og gera stórinnkaup fyrir vikuna þá er það í desemberamstrinu, þegar það er svo margt skemmtilegra á dagskránni en að ráfa andlaus um búðina eftir vinnu.

Vikumatseðill

Mánudagur: Smjörsteiktur þorskur

Þriðjudagur: Hakkabuff með karamelluseruðum lauki og rjómasósu

Miðvikudagur: Grænmetisbaka með piparosti

Fimmtudagur: Kjúklingur í ostrusósu

Föstudagur: Tortillakaka

Með helgarkaffinu: Dumlekökur í ofnskúffu

Öll hráefni í þessar uppskriftir fást í

Svínalund í rjómalagaðri balsamiksósu

Þá er einn skemmtilegasti mánuður ársins runninn upp. Ég hef alltaf verið svo mikið jólabarn og elska þennan árstíma. Jólahlaðborð, jólatónleikar, jólasaumaklúbbar og hittingar með vinahópum. Síðan eigum við strákarnir öll afmæli í desember. Það er því sjaldan dauð stund.

Í ár er ég óvenju sein í jólabakstrinum. Malín hefur bakað nokkrar sortir en þær hafa allar klárast jafn óðum. Hún fyllti þó frystinn af jólasnúðunum sem okkur þykja ómissandi á aðventunni og bakaði sörur, en þær kláruðust áður en aðventan rann upp og það þarf því að baka annan umgang sem fyrst. Þær verða að vera til með kaffinu yfir aðventuna.

Ég nýtti tækifærið í gær og eldaði góðan mat í tilefni af fyrstu aðventunni, svínalund í sósu sem er svo góð að það er nánast hægt að borða hana sem súpu. Við erum hrifin af kartöflumús með en hrísgrjón og salat passar auðvitað líka vel. Aðalmálið er að ná sem mestri sósu með hverjum bita!

Svínalund í rjómalagaðri balsamiksósu (uppskrift fyrir 4-5)

  • um 900 g svínalund
  • smjör
  • salt og pipar

Sósa

  • 2 dl vatn
  • 5 dl rjómi
  • 1-1½ msk sojasósa
  • 2-3 msk fljótandi nautakraftur frá Oscar
  • 200 g Philadelphia rjómaostur (1 askja)
  • ½-1 msk balsamik gljái
  • salt og pipar

Hreinsið svínalundina og skerið í sneiðar. Bræðið smjör á pönnu og brúnið kjötið. Takið kjötið af pönnunni og leggið á disk á meðan sósan er útbúin (ekki þvo pönnuna!).

Setjið vatn á pönnuna og látið sjóða upp með steikingarsmjörinu. Látið soðið renna í gegnum sigti ef þörf er á en setjið það síðan aftur á pönnuna. Hrærið rjóma, sojasósu og nautakrafti saman við og látið suðuna koma upp. Bætið Philadelphia rjómaosti út í og látið sjóða saman í slétta sósu. Hrærið reglulega í pönnunni. Smakkið til með balsamik gljáa, salti og pipar. Bætið  kjötinu í sósuna og látið sjóða saman þar til kjötið er fulleldað.

*Færslan er unnin í samstarfi við Innnes

Banana-Dumle súkkulaðimús

Ég hef sagt frá því áður hér á blogginu að ég er búin að vera með algjört æði fyrir banana Dumle karamellunum sem hafa fengist síðan í sumar. Ég vil ekki vita hvað ég hef keypt marga poka af þeim og þeir eru alltaf fljótir að tæmast hér heima.

Ég bakaði kökulengjur úr karamellunum um daginn sem ég borðaði beint af ofnplötunni því þær voru gjörsamlega ómótstæðilegar. Síðan prófaði ég að gera súkkulaðimús úr þeim við ekki minni vinsældir. Þetta er einfaldasta súkkulaðimús sem hægt er að gera (hér er hún með hefðbundum Dumle karamellum) en það er þó best að bræða karamellurnar kvöldið áður svo blandan sé orðin vel köld þegar hún er þeytt upp. Ég setti banana og Daimkurl yfir músina sem kom mjög vel út en ég hugsa að það gæti líka komið vel út að skipta Daimkurlinu út fyrir hakkað súkkulaði. Þetta verðið þið að prófa!

Banana-Dumle súkkulaðimús

  • 1 poki banana-Dumle karamellur
  • 3 dl rjómi
  • Daimkurl og bananar sem skraut (má sleppa)

Skerið Dumle-karamellurnar í bita og leggið í skál. Hitið rjómann í potti að suðu og hellið yfir karamellurnar. Hrærið í blöndunni þar til karamellurnar hafa bráðnað og blandan er orðin slétt. Geymið í ísskáp yfir nóttu.

Takið karamellurjómann úr ísskápnum og hrærið í hrærivél þar til óskaðri áferð er náð. Setjið í skálar og skreytið með bönunum og Daimkurli.

Allt hráefni í þessa uppskrift fæst í

Skúffukaka

Ég sit við eldhúsborðið með þriðja kaffibolla dagsins og er að fara í gegnum uppskriftir sem mig langar að prófa. Krakkarnir sofa alltaf fram yfir hádegi um helgar og mér þykir svo notalegt að læðast fram, kveikja á útvarpinu og byrja daginn rólega.

Ég er að vona að veðrið lagist svo ég geti farið út og sett útiseríuna upp. Það er farið að dimma svo snemma að það verður notalegt að fá smá ljós á pallinn. Síðan langar mig að baka eitthvað gott með kaffinu. Um daginn bakaði ég þessa skúffuköku eftir uppskrift frá Mitt Kök sem var æðisleg og myndi sóma sér vel með helgarkaffinu. Ég má því til með að mæla með henni á þessum rigningardegi.

Skúffukaka

  • 225 g smjör
  • 2 dl mjólk
  • 5 egg
  • 4 ½ dl sykur
  • 1 ½ msk vanillusykur
  • 1 ¼ dl kakó
  • 3 tsk lyftiduft
  • 6 dl hveiti

Glassúr

  • 75 g smjör
  • ¾ dl sterkt kaffi
  • ½ dl kakó
  • 1 ½ msk vanillusykur
  • 5 dl flórsykur

Yfir kökuna

  • 1 dl kókosmjöl

Hitið ofninn í 175° og klæðið ofnskúffu með bökunarpappír.

Bræðið smjörið, blandið mjólkinni saman við og leggið til hliðar. Hrærið egg og sykur saman þar til blandan er ljós og létt. Sigtið vanillusykur, kakó, lyftiduft og hveiti út í eggja- og sykurblönduna. Bætið smjör- og mjólkurblöndunni saman við og hrærið saman í slétt deig. Setjið deigið í formið og bakið í miðjum ofni í um 20 mínútur.

Glassúr: Bræðið smjörið í potti og hrærið kaffi, kakó, vanillusykur og flórsykur út í. Látið mesta hitann rjúka úr kökunni áður en glassúrinn er settur yfir (best að setja hann yfir kökuna þegar hún er volg). Endið á að strá kókosmjöli yfir.

Allt hráefni í þessa uppskrift fæst í

Heil­steikt­ur kjúk­ling­ur með feta­ostasósu

Mér þykir alltaf jafn leiðinlegt þegar það líður langt á milli færslna en stundum gefst bara ekki tími fyrir meira. Það er búið að vera mikið að gera í haust og nú er smá törn í gangi sem mun halda áfram eitthvað fram í nóvember. Það sér þó fyrir endann á þessu!

Mitt í öllum látunum er kannski viðeigandi að benda á einfaldan og góðan kjúkling sem ég gerði fyrir Hraðrétti á mbl.is í sumar. Þetta er frábær aðferð til að elda góðan mat á einfaldan hátt og hentar sérlega vel þegar ekki gefst tími til að standa yfir pottunum!

Heil­steikt­ur kjúk­ling­ur með feta­ostasósu

  • 1 kjúk­ling­ur
  • 6 stór­ar kart­öfl­ur
  • 2 stór­ar gul­ræt­ur
  • 1 sæt kart­afla
  • 4 skarlottu­lauk­ar
  • ½ dl ólífu­olía
  • 2 pressuð hvít­lauksrif
  • maldonsalt
  • pip­ar
  • timj­an
  • 1 msk. bal­sa­mik-edik
  • 1 msk. sojasósa
  • 1 msk. ólífu­olía
  • 2 pressuð hvít­lauksrif

Aðferð:

  1. Skerið kart­öfl­ur og gul­ræt­ur í fernt á lengd­ina og sæta kart­öflu í bita.
  2. Afhýðið skarlottu­lauka og skerið í tvennt.
  3. Setjið græn­metið í eld­fast mót og hellið ólífu­olíu, pressuðum hvít­lauki, salti og pip­ar yfir.
  4. Blandið öllu vel sam­an og ýtið græn­met­inu til hliðar í mót­inu.
  5. Skolið og þerrið kjúk­ling­inn.

Kljúfið kjúk­ling­inn á milli bring­anna og leggið hann flat­ann í miðju eld­fasta móts­ins

  1. Hrærið bal­sa­miked­iki, sojasósu, ólífu­olíu og pressuðum hvít­lauksrifj­um sam­an og penslið blönd­unni yfir kjúk­ling­inn
  2. Stráið salti og pip­ar yfir allt
  3. Setjið í 200° heit­an ofn í 60 mín­út­ur

Köld sósa:

  • 1 dós sýrður rjómi
  • 150 g mul­inn feta­ost­ur
  • 1 hvít­lauksrif
  • sítr­óna
  • salt
  • pip­ar
  • timj­an sett yfir

Hrærið sýrðum rjóma, feta­osti og pressuðu hvít­lauksrifi sam­an. Smakkið til með sítr­ónusafa, salti og pip­ar. Stráið fersku timj­an yfir áður en sós­an er bor­in fram.

Öll hráefni í þessa uppskrift fást í

Súkkulaði- og bananakökulengjur

Mér finnst svo æðislega notalegt að eiga heimabakað með helgarkaffinu. Í gær tók Malín sig til og bakaði sörur sem ég nýt góðs af í dag með kaffibollanum. Ég keypti líka jólaköku á föstudaginn sem við höfum verið að fá okkur af yfir helgina. Um síðustu helgi bakaði ég hins vegar súkkulaði- og bananakökulengjur sem voru svo góðar að ég borðaði þær beint úr ofninum og ætlaði ekki að geta hætt. Þessar verðið þið að prófa!

Súkkulaði- og bananakökulengjur

  • 150 g smjör við stofuhita
  • 3,75 dl hveiti
  • 1,5 dl sykur
  • 3 msk kakó
  • 3 msk sýróp
  • 1,5 tsk vanillusykur
  • 1,5 tsk lyftiduft
  • 15 stk. Dumle bananakaramellur

Hitið ofninn í 175° og klæðið bökunarplötu með bökunarpappír.

Hnoðið öllum hráefnunum (fyrir utan karamellurnar) saman í deig. Skiptið deiginu í þrennt og rúllið út í lengjur. Leggið lengjurnar á bökunarpappírinn.

Skerið dumlekaramellurnar í tvennt (á lengdina) og þrýstið þeim í lengjurnar (sjá mynd). Bakið í miðjum ofni í 8-10 mínútur. Takið úr ofninum og látið kólna aðeins áður en lengjurnar eru skornar niður.

Allt hráefni í þessar uppskriftir fæst í

 

Cava Sangria

Um síðustu helgi hittumst við SSSskutlurnar hjá mér, en eins og ég hef áður sagt frá þá kynntist ég þeim í gegnum fótboltann hjá Gunnari. Synir okkar æfa saman hjá Breiðablik og við búum hér í sama hverfi í Kópavoginum. Eftir að við byrjuðum að skiptast á að skutla strákunum á æfingar festist þetta SSSskutlunafn við okkur (öll S-in koma til vegna þess að við heitum Sigrún, Sunna og Svava).

Það er aldrei dauð stund þegar við hittumst og kvöld með þeim er ávísun á hlátursköst og stuð. Ég bauð upp á kjúklingasalat og var síðan búin að gera tvo eftirrétti en í öllu fjörinu gleymdi ég að bera annan þeirra fram!

Fyrir matinn var ég með fordrykk sem ég má til með að gefa uppskrift af fyrir helgina. Hann ætti að koma öllum í helgargírinn!

Cava Sangria

  • 1 flaska freyðivín
  • 1 dl af líkjörnum 43
  • 2 dl appelsínusafi
  • klaki
  • appelsínusneiðar

Blandið öllu saman í könnu og njótið!