Svakalega hefur kólnað hratt undanfarna daga. Ég sest ekki orðið upp í bílinn án þess að setja hitann á sætinu í botn og þegar ég fór í stutta göngu í gærkvöldi hélt ég að nefið myndi detta af mér. Það er á svona köldum dögum sem mér þykir góður heimilismatur sérlega lokkandi og þegar ég eldaði þennan dásamlega heimilismat um daginn fannst mér lífið svo ljúft, þrátt fyrir kuldann og skammdegið.

Uppskriftin fylgir mér frá Svíþjóðarárunum og er alveg hreint æðislega góð. Þennan rétt þekkja allir sem hafa dvalið í Svíþjóð þar sem hann er vinsæll hversdagsmatur. Rétturinn er svo einfaldur og góður að mér finnst að allir ættu að prófa hann. Ég ber réttinn fram með bestu rjómasósunni (ekki sleppa henni, hún passar svo vel með), kartöflum, sultu og hrásalti fyrir þá sem það vilja. Haustleg og dásamlega góð máltíð!

Kálbúðingur

• 1 lítill hvítkálshaus (um 1 kg)
• smjör til að steikja í
• 1-2 dl vatn
• 2 msk síróp
• salt
• 400 g nautahakk
• 1 egg
• ca 1 tsk Kød & Grill krydd (eða annað krydd)
• 1 dl vatn
• salt og pipar

Skerið hvítkálið í litla bita og steikið þá í smjöri. Setjið smá vatn annað slagið á pönnuna svo hvítkálið brenni ekki. Saltið og piprið. Þegar hvítkálið er orðið mjúkt þá er sírópi helt yfir og látið steikjast í nokkrar mínútur til viðbótar.

Blandið nautahakki saman við egg, vatn og krydd.

Setjið helming af hvítkálinu í botn á eldföstu móti. Setjið hakkblönduna yfir og sléttið yfirborðið. Setjið seinni helminginn af hvítkálinu yfir. Bakið við 175° í um 45 mínútur. Ef hvítkálið gerir sig líklegt til að brenna þá er álpappír settur yfir.

Rjómasósa

• 3 dl rjómi
• 1,5 dl sýrður rjómi
• 1 kjúklingakraftsteningur
• 1 msk sojasósa
• 1 msk rifsberjahlaup
• 1 msk hveiti, hrært saman við smá vatn (eða sósuþykkir)
• salt og pipar

Blandið öllu saman í pott og látið suðuna koma upp. Látið sjóða við vægan hita í 5 mínútur og smakkið til.