Borðstofuborðið hefur verið undirlagt af jólapappír, skrautmiðum og borðum um helgina og hefur einna helst minnt á verkstæði jólasveinsins. Á bak við aðventustjakann má sjá glitta í hluta af jólagjöfum sem var pakkað inn og bíða nú eftir að rata í réttar hendur.

Eins og ég vona að einhverjir hafi tekið eftir þá er komin ný forsíðumynd hér efst á blogginu. Fjölskyldan hefur síðustu mánuðina verið að benda mér á að sumarlega myndin af skúffukökunni og kaffibollanum í grasinu hafi sungið sitt síðasta og núna fór ég loksins í það að skipta henni út. Ég er mjög ánægð með útkomuna og vona að þið séuð það líka. Eina af myndunum tók ég einmitt í gær þegar ég gerði botninn í bökuna sem við vorum með í kvöldmat.

Þessi baka er æðislega góð og með góðu salati er hún fullkomin máltíð. Ekta helgarmatur sem passaði vel á laugardagskvöldi. Klárlega ein af uppáhalds bökunum.

Bökuskel:

• 5 dl hveiti
• 250 g kalt smjör, skorið í teninga
• 1 tsk salt
• 3-4 msk kalt vatn

Fylling:

• 3 kjúklingabringur
• 5 dl sýrður rjómi
• 3 tsk sambal oelek
• 1/2 appelsínugul paprika
• 2 skarlottulaukar
• 1 dl sweet chili sósa
• salt
• 2-3 msk maizena
• mozzarella ostur

Vinnið hráefnin í skelina saman í deig og þrýstið í botninn og upp kantana á bökuformi. Setjið í ískáp á meðan fyllingin er gerð.

Skerið kjúklingabringurnar í smáa bita og steikið á pönnu. Þegar kjúklingurinn er steiktur er hökkuðum lauk og papriku bætt á pönnuna og steikt þar til orðið mjúkt. Hrærið sýrðum rjóma, chilisósu og sambal oelek saman við og látið suðuna koma upp. Látið sjóða við vægan hita í 10-15 mínútur og smakkið til með salti. Þykkið með maizena.

Setjið fyllinguna í bökuskelina og bakið við 200° í 30 mínútur. Takið þá bökuna úr ofninum, stráið rifnum mozzarella yfir og setjið aftur í ofninn í 10 mínútur til viðbótar.