Mig grunar að margir séu að taka matarræðið í gegn núna í upphafi árs, eftir að hafa lifað lífinu í desember. Sjálf sit ég hér með nýbakaða skúffuköku á meðan ég fer í gegnum uppskriftir og dáist að öllum þeim sem hamast í ræktinni þessa dagana. Ég á aldrei ræktarkort þar sem útivist hentar mér betur. Að fara í göngutúra, fjallgöngur eða á skíði yfir vetrartímann þykir mér bæði endurnærandi og skemmtilegt. Hver og einn verður að finna sitt, ekki satt?
Ég gerði svo góðan hversdagsrétt eitt kvöldið fyrir jól og þar sem ég veit að margir mikla fyrir sér bollamálin þá passaði ég upp á að mæla allt í desilítum. Nú er ég hins vegar búin að snúa öllu við og finn ekki blaðið sem ég skrifaði desilítramálin á. Það hefur örugglega endað í ruslinu fyrir mistök. Rétturinn var þó svo góður (krakkarnir hrósuðu honum í bak og fyrir!) að ég ætla að setja uppskriftina inn þrátt fyrir bollamálin. Uppskriftin er lítil en lítið mál að tvöfalda hana.
Sloppy Joe Mac n Cheese (uppskrift fyrir 2-3) – uppskrift frá Taste and tell
Sósan:
- ¾ bolli tómatsósa í dós
- 2 msk púðursykur
- 1 msk tómatpúrra
- 2 tsk Worcestershire sósa
- ½ tsk salt
- ¼ tsk mulinn svartur pipar
Hrærið öllu saman og leggið til hliðar.
- 2 bollar ósoðið pasta
- 1 msk olía
- ¾ bolli hakkaður laukur
- 1 græn paprika, skorin smátt
- 2 hvítlauksrif, pressuð eða fínhökkuð
- 225 g nautahakk
- 1 bolli rifinn cheddar ostur
Sjóðið pastað eftir leiðbeiningum á pakkningu.
Hitið olíu á pönnu við miðlungsháan hita og steikið lauk, papriku og hvítlauk þar til mjúkt. Bætið nautahakki á pönnuna og steikið þar til fulleldað. Bætið þá sósunni á pönnuna ásamt soðnu pastanu og setjið rifinn ostinn yfir. Lækkið hitann undir pönnunni og blandið varlega saman þar til osturinn hefur bráðnað og allt hefur blandast vel.
Ljúfmeti og lekkerheit 
Spennandi uppskrift, ætla að prófa hana annað kvöld. Þegar þú segir tómatsósa í dós, hvernig tómatsósu áttu þá við?
Hef prófað margar uppskriftir af blogginu þínu, hver annarri betri 🙂
Gaman að heyra 🙂 Tómatsósan er í niðursuðudós. Ég var með frá Hunt’s, dósin lítur út eins og t.d. hökkuðu tómatarnir eru í en á dósinni stendur bara sauce. Vona að þú skiljir hvað ég meina 🙂
>
Alveg sammála þér með göngutúrana, alltaf besta líkamsrætkin utandyra. Ætla að prufa þennan rétt fljótlega 🙂