París ♥

Ég átti langa helgi í París í síðustu viku, sem er ástæða fjarveru minnar hér á blogginu. Þeir sem fylgja mér á Instagram hafa eflaust áttað sig á því, en þar uppfærði ég bæði með myndum og á Insta stories. Við vorum síðast í París í lok október en núna var vor í lofti og annar bragur á borginni. Tíminn flaug frá okkur og ég hefði gjarnan viljað framlengja um nokkrar nætur. Það var þó svo að vinnan kallaði og börnin biðu, þannig að það var bara að koma sér aftur heim. Ég tók bara myndir á símann í þessari ferð og myndgæðin eru eflaust eftir því. Það verður þó að fá að duga.

Við nýttum tímann vel og fórum meðal annars í vínsmökkum hjá O´Chateu sem ég má til með að mæla með. Vínin voru dásamleg og meðlætið ekki síðra en vínið var parað með frönskum ostum og skinkum ásamt baquette. Ég var í himnaríki!

  

Við fórum í hjólaferð og náðum þannig bæði að sjá áhugverða staði og fá smá fróðleik í leiðinni. Það er gaman að hjóla um París og við vorum sérlega heppin með leiðsögumann. Við vorum fjögur saman og ferðin tók 1,5 klst. Við komumst yfir furðu mikið á svo skömmum tíma.

Það er varla hægt að fara til Parísar án þess að borða góðan mat. Við borðuðum foi gras á hverjum degi, drukkum rósarvín og nutum þess að vera til. Ég skrifaði um L´Avenue eftir síðustu Parísarferð og get ekki annað en imprað á því hversu góður staðurinn er. Núna sátum við úti í blíðskaparveðri, drukkum kalt rósarvín og borðuðum snigla, tælenskar vorrúllur, humar og önd. Það væri synd að láta þennan stað framhjá sér fara.

  

Síðan má ég til með að benda á Le Meurice Alain Ducasse en þar fékk ég einn besta mat sem ég hef á ævinni borðað. Staðurinn skartar tveim Michellin stjörnum og ekki að ástæðulausu. Við fengum foi gras í forrétt, nautalund í aðalrétt og ís með súkkulaði í eftirrétt. Umhverfið er svo fallegt og maturinn dásamlega góður. Ef maður ætlar að gera vel við sig, þá er þetta staðurinn. Ég vara þó við að hann er ansi dýr.

Það má vel eyða deginum í Galleries Lafayette og þó planið sé ekki að versla er klárlega vert að líta við. Byggingin er stórkostlega falleg og á efstu hæð eru svalir með útsýni yfir París.

Fyrir fleiri ábendingar um París er hægt að skoða fyrri færslu sem er hér. París er dásamleg borg og verður eflaust ekki heimsótt nógu oft. Mig langar strax aftur!