Ég kíki örstutt inn í kvöld eftir frábæra helgi. Á laugardagsmorgninum vöknuðum við Gunnar og ákváðum að kíkja saman í bæinn. Við röltum um Laugarvegin og Skólavörðustíg, keyptum ullarsokka í Geysi og glugguðum í bækur í Eymundsson. Þegar við komum heim beið mín óvissuferð sem Öggi og Óli, maður Ernu vinkonu minnar, höfðu skipulagt. Þegar þeir tveir taka sig saman er útkoman alltaf ævintýraleg og í þetta sinn enduðum við á hóteli í Borgarfirði, með viðkomu á kaffihúsi í Borgarnesi og kvöldverði á Landnámssetrinu. Ferðin var æðisleg, það var mikið hlegið, allt of mikið borðað og allir komu endurnærðir heim.
Ég hef því lítið verið í eldhúsinu yfir helgina og þegar við komum heim gerði ég kjúklingasúpu sem mig er búið að langa í síðustu dagana. Á föstudagskvöldinu fengum við okkur hins vegar osta og ég gerði fræhrökkbrauð sem við borðuðum með. Æðislega gott, bæði eitt og sér (eins og sumir völdu að borða það) og á ostabakkann.
Fræhrökkbrauð
- ½ dl sólblómafræ
- ½ dl sesamfræ
- 3/4 dl hörfræ
- ½ dl graskersfræ
- ½ tsk salt
- 1 dl maizenamjöl
- ½ dl rapsolía (repjuolía)
- 1 ½ dl sjóðandi vatn
Blandið saman sólblómafræjum, sesamfræjum, hörfræjum, graskersfræjum, salti og maizenamjöli í skál. Hellið rapsolíu og sjóðandi vatni yfir og hrærið saman. Hellið grautnum á bökunarpappírsklædda ofnskúffu. Breiðið þunnt út og stráið maldonsalti (eða öðru grófu salti) yfir. Bakið við 150° í 1 klst. Slökkvið á ofninum og látið fræhrökkbrauðið standa áfram í ofninum í 15 mínútur. Takið út úr ofninum og látið kólna. Brjótið í passlega stóra bita.
Ljúfmeti og lekkerheit 
Má ekki nota venjulega ólifolíu? Líst vel á þessa uppskrift, langar að prófa hana.
Ég hef ekki prófað að nota ólífuolíu en get ekki ímyndað mér annað en að það komi vel út. Endilega segðu mér hvernig það heppnast ef þú prófar 🙂
Rosalega gott, eins og snakk, en bara hollt.
Má ekki setja aðra olíu enn Raspolíu?
Ég hef bara notað rapsolíu en er viss um að aðrar olíur gangi jafn vel.
Takk fyrir skemmtilega matarsíðu, ég fylgist alltaf grannt með og hef prófað ýmislegt gott! Geturðu sagt mér hvar maður fær raspolíu? Ég var í Hagkaupum í Skeifunni í gær og fann hana ekki þar.
Sæl Þóra og takk fyrir kommentið. Rapsolíu (eða Repjuolíu eins og hún heitir víst á íslensku) hef ég verið að kaupa í Bónus. Ég hefði þó verið viss um að hún ætti að fást í Hagkaup líka. Ég hef aldrei verið í vandræðum með að fá hana þannig að prófaðu að athuga í olíuhillunni næst þegar þú ferð út í búð 🙂
Bestu kveðjur, Svava.
Kærar þakkir fyrir svarið! Ég hef greinilega ekki haft augun hjá mér í olíuhillunni í Hagkaup! 😉
Er búin að prófa þessa uppskrift margoft, þetta er sjúklega gott!!Ég reyndar sleppi að setja salt í uppskriftina (finnst hún verða of sölt)strái bara smá grófu salti yfir. Er farin að margfalda þessa þegar að ég geri hana 🙂
Rosa gott! en hvað eru margar kaloríur í sirka 100gr af svona hrökkbrauði??
Ég hef því miður ekki hugmynd.
>