Flokkur: uncategorized

Ljúfmeti og lekkerheit í fjölmiðlum

~ Svava ~ 2 athugasemd

 

 

Bloggið hefur verið í fjölmiðlum þessa helgina og fékk hvorki meira né minna en heilsíður bæði í Fréttablaðinu og Morgunblaðinu. Ég þakka af öllum hug og hjarta þessar umfjallanir og allar heimsóknirnar sem bloggið hefur fengið í kjölfarið.

Nú vill svo til að við Öggi fórum til Berlínar yfir helgina og ég hef því enga uppskrift til að bjóða upp á. Við búum á 29. hæð á Park Inn hótelinu með þetta stórbrotna útsýni yfir austur-Berlín. Mér þykir myndin hér að ofan minna á póstkort en hún er tekin út um gluggann hjá okkur. Þetta hefur verið mikil menningar- og matarferð og erum við meðal annars búin að borða gæsalifur, humar, hjört, tælenskan og víetnamskan mat á milli þess sem við höfum raðað í okkur sætindum. Á morgun ætla ég að eyða deginum í búðunum og um kvöldið fljúgum við heim aftur. Okkur er farið að hlakka til að fara heim til krakkanna sem eru búin að vera í góðu yfirlæti með tengdó í fjarveru okkar.

Facebook og nýjung á síðunni

~ Svava ~ Skrifa athugasemd

Eins og skarpir lesendur hafa kannski tekið eftir þá eru komnar tvær nýjungar á síðuna. Fyrst ber að nefna að Ljúfmeti og lekkerheit er komin á Facebook og mér þætti mjög vænt um ef þið vilduð like-a síðuna þar. Eins og staðan er núna eru þrír búnir að like-a hana, ég, Öggi og Malín. Hin breytingin er að efst á síðunni er nú kominn flipi sem heitir „Gott að vita“. Þar hef ég sett inn lista yfir hráefni sem hægt er að nota þegar það er skortur í eldhússkápunum og lista yfir mælieiningar. Þessi dálkur er enn í vinnslu og á vonandi eftir að vaxa og dafna þegar fram líða stundir.

Gordon Ramsay – Maze Grill

~ Svava ~ 4 athugasemd

Í gær áttum við Öggi 10 ára brúðkaupsafmæli og héldum upp á það á Gordon Ramsay veitingastaðnum Maze Grill. Ég held að við hefðum ekki getað valið betri stað. Maturinn var æðislegur og staðurinn svo flottur í alla staði.

Við byrjuðum á að fá okkur kampavín í fordrykk. Vínseðillinn kemur á Ipad, ótrúlega smart.

Í forrétt fékk Öggi sér ólívur og hnetur en ég fékk mér þá albestu sveppasúpu sem ég hef smakkað.

Þjónninn kom með kjötbitana og sýndi okkur þegar við vorum að panta aðalréttinn.

Það var ekki einfalt val því bæði þarf að velja á milli tegunda á nautum, hvernig nautið var fóðrað, hversu gamalt kjötið var og á endanum hvaða hluta af nautinu. Við enduðum á T-bone steik af 28 daga Aberdeen Angus sem var alinn á grasi. Með þessu fengum við okkur þykkar franskar kartöflur, salat, béarnaise og piparsósu.

Í eftirrétt fengum við okkur vanillu-ostaköku með ástaraldinkrumbli.

Þetta var ein sú besta máltíð sem við höfum borðað og þjónustan var frábær. Það var fyllt á glösin áður en þau tæmdust, þurrkað af borðinu á milli rétta og séð til þess að ekkert vantaði. Þetta var frábært kvöld í alla staði og Maze Grill er staður sem við getum ekki beðið eftir að fara aftur á.

London

~ Svava ~ 2 athugasemd

Eldsnemma í morgun flutti mamma inn til krakkana og við Öggi stungum af til London. Við erum búin að eiga frábæran dag hér og ná að borða á tveimur veitingastöðum sem við vorum búin að spotta út áður en við lögðum af stað.

Eftir að við vorum búin að koma okkur fyrir á hótelherberginu gengum við upp Oxford street og á ítalskan veitingastað sem heitir Carluccio´s. Við fengum okkur bruschetta og „baby chicken“ með ruccola, sítrónu og ferskum parmesan osti. Þetta var góður matur en ekkert sem heillaði okkur upp úr skónum. Það breytti því þó ekki að staðurinn var skemmtilegur og það var gaman að borða þar. Það sem stóð upp úr voru þær albestu ólívur sem við höfum smakkað og við stefnum á að fara og kaupa meira af þeim áður en við förum heim.

Eftir að hafa rölt um Oxford street og verslað aðeins tók við smá afslöppun á hótelinu áður en við héldum á næsta veitingastað, Gourmet Burger Kitchen. Það var mjög skemmtilegur staður með æðislegum mat. Ég fékk mér hamborgara með beikoni og avokado og Öggi klassískan borgara. Með þessu fengum við þær bestu franskar sem við höfum smakkað, bæði venjulegar og rósmarín franskar, og hvítlauksmajónes. Þetta var æðislega gott og okkur langar báðum að fara þangað aftur.

Dagurinn endaði á að það var bankað á herbergishurðina okkar og komið inn með rauðvínsflösku í boði hússins. Þetta kom okkur svo á óvart að við héldum að það hefði verið ruglast á herbergi en svo var víst ekki.  Flaskan var til okkar og við þökkuðum vel fyrir.

Ég ætlaði að setja inn uppskrift sem ég eldaði um daginn en er orðin stjörf af þreytu. Hún fær því að bíða betri tíma.

Ljúffengt sinnep

~ Svava ~ 8 athugasemd

Ég átti leið niður Laugaveginn fyrir helgi og skaust í leiðinni inn í Púkó & Smart. Hera sagði mér frá sinnepi sem þau hjónin höfðu smakkað og kolfallið fyrir og ég mátti til með að prófa líka. Daginn eftir grilluðum við hamborgara og þá fannst mér kjörið tækifæri að draga sinnepið fram. Það var himneskt. Ég mæli með að þið prófið.

Laugardagsnammi og síðan opnar!

~ Svava ~ 5 athugasemd

Þvílíkur dásemdardagur – sólin skein og síðan fór loksins í loftið. Núna er laugardagsnammið komið í skál og ég ætla að eyða kvöldinu í að læra á síðuna. Það verður spennandi að sjá hvort að þessi færsla birtist og ef myndin kemur líka þá verð ég alsæl.