Það eru ekki mörg ár síðan ég féll fyrir möndluköku en núna þykir mér hún svo góð og alveg ekta kaka til að hafa með kaffinu. Það tekur enga stund að baka hana og ekki skemmir fyrir hvað hún er falleg á borði.
Í gær bakaði ég möndluköku til að hafa með kaffinu. Í sumar hefur deginum seinkað hægt og sígandi hjá okkur og kaffitíminn í gær var ekki fyrr en um fimmleytið. Það var svo hlýtt á pallinum að við ákváðum að borða kökuna þar. Að drekka kaffið á pallinum slær öllu við í notalegheitum á sumrin og við borðum þar eins oft og við getum. Ég veit þó ekki hvað nágranninn hefur haldið í gær því þegar við sátum og gæddum okkur á nýbakaðri möndlukökunni þá stóð hann og var að grilla kvöldmatinn. Við ákváðum því í snatri að við værum að borða mjög smart og lekkeran forrétt.
Uppskriftina fann ég í nýja veftímaritinu, Home & Delicius. Okkur fannst kakan æðislega góð og ég ætla ekki að segja ykkur hvað það er lítið eftir af henni.
Möndlukaka
- 75 gr smjör
- 1 dl sykur
- 2 egg
- 2 1/2 dl hveiti
- 2 tsk lyftiduft
- 1/2 tsk salt
- 1 tsk möndludropar
- 1 dl mjólk
Hitið ofninn í 180°. Hrærið saman smjöri og sykri þar til létt og ljóst. Bætið eggjum saman við einu í einu og hrærið vel. Bætið þurrefnum saman við ásamt möndludropum og mjólk. Hrærið þar til deigið verður slétt og kekkjalaust. Setjið deigið í smurt bökunarform (ég notaði 22 cm form til að fá kökuna aðeins hærri) og bakið í 20 mínútur (ég hafði kökuna í 25 mínútur). Passið að baka hana ekki of lengi svo hún verði ekki þurr.
Glassúr
- 3 dl flórsykur
- 1 msk heitt vatn
- 1 msk Ribena sólberjasafi
Blandið vatni og Ribena sólberjasafanum saman. Hrærið flórsykur og djúsblöndu saman þar til kekkjalaust. Mér fannst kremið of þykkt og bætti því smá meira af vatni saman við. Hellið kreminu yfir kökuna og berið fram.
Ljúfmeti og lekkerheit 
Þessi er mjög ljúfeng.. Ég bakaði hana í gær fyrir babyshowerið mitt og hún var borðuð upp til agna. Er núna á fullu að deila uppskriftinni á dönsku 🙂
Ætla að gera þessa fyrir síðasta dag dótturinnar hjá dagmömmunni á morgun 🙂
Bakaði þessa í gær og hún er virkilega góð.. Takk fyrir
Gaman að heyra Rakel. Ég bakaði hana einmitt líka í gær og bauð upp á með kaffinu : )
Bestu kveðjur,
Svava.
Þessi er æði eins og allt annað á þessari síðu 😀 Takk kærlega fyrir mig.
Jeminn þessi stoppar aldrei lengi hjá mér, allir elska þessa fallegu bleiku köku. 🙂
frábærar uppskriftir, kærar þakkir
Prófaði þessa í dag og hún er algjört æði.
Ég notaði reyndar jarðaberjasaft í stað sólberja í glassúrinn og það kom bara vel út.
Ég á pottþétt eftir að prófa fleiri uppskriftir á þessari flottu síðu 🙂
Svava: eg skal nu bara segja ter nu ad eg let serstaklega senda mer möndludropa fra islandi til ad geta bakad tessa köku. Vid urdum sko ekki f vonbrigdum og Bjarni sagdist fa flashback .. Tetta er svona kaka eins og var bökud i gamla daga.
Bragðast jafn vel og hún lítur út 🙂 kláraðist upp til agna hér á bæ.
Er að baka þessa í annað sinn. Karlarnir á heimilinu eru nú ekki ósattir með það, þessi kaka er frábær!
Þessi kaka er frábær! Ég notaði bara matarlit þar sem ég fann ekki svona djús hér í útlandinu.
Ég gerði þessa áður en ég fór í útilegu um verlunarmannahelgina – gerði 4 kökur úr 3 uppskriftum (notaði formkökuform) og hún var alveg himnesk 🙂 Takk fyrir mig
Gaman að heyra Ingibjörg 🙂
Gerði þessa kl7 í morgun, afmæliskaka mannsins og VÁ hún sló sko rækilega í gegn hjá fjölskyldunni 😉
Þessi er í algjöru uppáhaldi! Klikkar aldrei þegar von er á gestum 🙂
Takk fyrir allar frábæru uppskriftirnar og fallegu myndirnar.
Við hvaða hitastig á ég að baka þegar ég er ekki með blástursofn? Ætla sko að baka þessa strax à morgun! 🙂
Þessi kaka er æðisleg og hef bakað hana oft. Prufaði núna að setja appelsínudropa í staðinn fyrir möndludropanna og það er ekki verra.
Góð ábending! Takk fyrir að segja frá, ætla að prófa appelsínudropana næst 🙂