Ég lofaði í gær að setja inn uppskrift að þessari dásamlegu böku sem ég bauð upp á í afmælisveislu strákanna í dag. Þetta er ein af þeim uppskriftum sem mér þykir mikill fjársjóður að eiga. Ekki bara er einfalt að útbúa bökuna og hægt að gera hana með góðum fyrirvara heldur er hún líka alveg stórkostlega góð.
Við héldum afmælisveislu strákana í dag og þeir vildu bjóða fjölskyldunni í súpu og kökur í hádeginu. Það kom mér ekki á óvart að þeir vildu hafa Mexíkóska kjúklingasúpu því hún er í miklu uppáhaldi hjá þeim. Í eftirrétt vildu þeir fá að skreyta venjulega skúffuköku og síðan bakaði ég silvíuköku, möndluköku og síðast en ekki síst þessa frosnu bismarkböku með marshmellowkremi.
Ég hef bakað þessa frosnu bismarkböku nokkrum sinnum áður og hún slær alltaf í gegn. Í fyrra vorum við með hana í eftirrétt um áramótin sem vakti mikla lukku. Bakan er sæt en jafnframt fersk og passar því vel eftir mikla máltíð. Þar að auki þykir mér frábært að vera með eftirrétt sem hægt er að útbúa með góðum fyrirvara þegar mikið stendur til í eldhúsinu, eins og svo oft vill vera um áramótin.
Ef þið eruð að leita að eftirrétti fyrir áramótin þá er þessi kaka mín tillaga. Það má gera hana strax í dag og geyma í frystinum þar til hún verður borin fram. Uppskriftin kemur úr sænskri matreiðslubók, Vinterns söta.
Frosin bismarkbaka með marshmellowkremi
Botn:
- 20 súkkulaðikexkökur, t.d. Maryland
- 2 msk kakó
- 25 g brætt smjör
Bismarkkrem
- 5 dl rjómi
- 1 dós marshmalowkrem (fæst t.d. í Hagkaup, sjá mynd)
- Nokkrir dropar af piparmintudropum
- nokkrir dropar af rauðum matarlit
- 1 dl bismarkbrjóstyskur + nokkrir til skrauts
Súkkulaðisósa:
- 125 g dökkt súkkulaði
- 75 g smjör
- ½ dl sykur
- ½ dl sýróp
- ½ dl vatn
- smá salt
Setjið kex, kakó og brætt smjör í matvinnsluvél og vinnið saman. Þrýstið blöndunni í smelluform með lausum botni (það getur verið gott að klæða það fyrst með smjörpappír) og setjið í frysti.
Þeytið rjómann og blandið marshmallowkreminu varlega saman við. Passið að hræra marshmallowkreminu ekki of vel saman við rjómann, það á að vera í litlum klessum í rjómanum. Hrærið nokkrum dropum af piparmintudropum saman við (smakkið til, mér þykir passlegt að nota ca 1 tsk.). Setjið um þriðjung af kreminu í aðra skál og leggið til hliðar.
Myljið bismarkbrjóstsykurinn í mortéli og blandið honum saman við stærri hluta kremsins. Takið kökubotninn úr frystinum og breiðið kreminu með bismarkbrjóstsykrinum yfir hann. Hrærið nokkrum dropum af rauðum matarlit saman við kremið sem var lagt til hliðar og breiðið það yfir hvíta bismarkkremið. Notið hníf til að mynda óreglulega áferð í kremið.
Frystið kökuna í að minnsta kosti 5 klukkutíma. Takið hana úr frystinum 10-15 mínútum áður en það á að bera hana fram. Skreytið með bismarkbrjóstsykri.
Setjið öll hráefnin í súkkulaðisósuna í pott. Látið suðuna koma upp við vægan hita og hrærið þar til súkkulaðið er bráðnað. Látið sjóða við vægan hita í 10 mínútur eða þar til sósan er orðin þykk og glansandi.
Berið sósuna fram heita eða kalda með kökunni.
Ljúfmeti og lekkerheit 
Er hægt að nota annað en þetta krem?? 🙂
Ég hef ekki prófað að nota annað en marshmellowkremið en það er fullt af uppskriftum á netinu af heimalöguðu marshmellowkremi ef þú ert í vandræðum með að nálgast það. Hér er til dæmis ein: http://www.bonappetit.com/recipes/2011/08/homemade-marshmallow-creme
Afskaplega girnilegt! Og fyndið að rekast á nákvæmlega eins uppskriftir settar inn á tvær mismunandi síður sama dag á bloggrúntinum 😉 Þessi kaka er greinilega málið og verður pottþétt prófuð.
Það er einnig hægt að bræða Marshmallow og smjörklípu í potti og nota í staðinn fyrir tilbúið Fluff. Bræða við vægan hita og í rólegheitum.
Vá þessa verð ég pottþétt að prófa 🙂
Ok. takk. Þetta fæst ekk hér þar sem ég bý 🙂 Prófa þetta!
Sæl – Mér var tjáð í Hagkaup að Marshmallow kremið væri þar bara til í tengslum við ameríska daga. Veistu um fleiri búðir sem þetta gæri verið til í?
Í alvöru? Ég keypti marshmallow kremið síðast fyrir jól og þá voru ekki amerískir dagar. Eins gott að fara að fylgjast með og byrgja sig upp á amerískum dögum ef þeir eru farnir að selja þetta bara þá. Annars dettur mér helst í hug að þetta fáist í Kosti.
Bestu kveðjur,
Svava.
Snilld, prófa þetta, upplagt til að losa sig við alla brotnu jólastafina af jólatrénu – hef einmitt verið að leita leiða til þess undan farið!
sæl ætla að prófa þessa en fæ ekki þetta marshmellow crem hvorki í Hagkaup eða Kosti en hvað ætli maður þurfi marga marshmellow til að búa til svona krem?
Ein svona komin í frystinn, hlakka mikið til að smakka (sleikjusmakkið lofaði góðu!). Eftir að hafa lesið athugasemdirnar varðandi fluffið lagðist ég í smá rannsóknavinnu á netinu, var ekki að nenna að búa þetta til frá grunni. Fann út að það er hægt að gera samsvarandi magn með því að bræða 40 stóra sykurpúða (1 stór poki) með 4-5 tsk af „corn syrup“. Fluffið var ekki til í Hagkaup en hins vegar var til corn síróp þar og auðvitað sykurpúðar. Bræddi í örbylgjuofni á lægri hita í nokkrar mín og sýnist það hafa lukkast 🙂
Takk fyrir uppskriftirnar, margt girnilegt hér!
Takk fyrir þetta Birna, nú fer ég í að gera mína… 😀