Grænmetisbaka með piparosti

Ég er að reyna að fjölga kjötlausu dögunum hér heima, bæði vegna þess að mér þykja grænmetisréttir vera svo léttir og góðir í maga en líka vegna þess að það er til svo mikið af spennandi grænmetisuppskriftum sem mér þykir gaman að prófa. Þetta framtak mitt fellur síður en svo í kramið hjá öllum fjölskyldumeðlimum en ég mun ekki gefa mig. Ég bara neita að trúa að það sé ekki hægt að verða saddur af grænmetisréttum eins og hörðustu mótmælendur reyna að halda fram.

Ég má samt til með að taka það fram að meirihlutinn við matarborðið dásamaði matinn og það varð sneið eftir sem ég tók með mér í nesti í dag. Ég bar bökuna fram með einföldu salati sem samanstóð af spínati, rauðlauki, kokteiltómötum, fetaosti og ristuðum kasjúhnetum. Síðan setti ég smá balsamikgljáa yfir. Súpergott!

Ég keypti tilbúið bökudeig úr heilhveiti sem var mjög þægilegt en ég linka hér fyrir neðan á uppskriftina sem ég er vön að nota þegar ég geri deigið sjálf.

Grænmetisbaka með piparosti (uppskrift fyrir 4-5)

  • bökubotn (hér er uppskrift en einnig er hægt að kaupa tilbúið deig)
  • 1 rauð paprika
  • 1 græn paprika
  • 1/2 púrrulaukur
  • 1 lítill spergilkálshaus
  • krydd, t.d. ítalskt salatskrydd
  • 5 kokteiltómatar
  • 3 egg
  • 2,5 dl rjómi
  • 1 box rifinn piparostur (100 g)
  • paprikukrydd
  • salt
  • pipar
  • rifinn ostur

Hitið ofn í 175°. Setjið bökudeigið í bökuform (eða smelluform), stingið aðeins yfir botninn með gaffli og forbakið í 10 mínútur.

Skerið paprikur, púrrulauk og spergilkál smátt og steikið á pönnu þar til hefur fengið fallegan lit og farið að mýkjast. Kryddið eftir smekk (ég notaði ítalskt salatskrydd). Setjið grænmetið yfir forbakaða bökuskelina. Skerið tómatana í tvennt og setjið yfir grænmetið.

Hrærið saman egg og rjóma. Bætið piparostinum saman við og kryddið með paprikukryddi, salti og pipar. Hellið blöndunni yfir grænmetið og setjið vel af rifnum osti yfir. Bakið við 175° í 35 mínútur.

Allt hráefni í þessa uppskrift fæst í

Súkkulaðibaka með sætum rjóma og berjum

Laugardagur og kosningar! Mér þykja kosningadagar alltaf vera hátíðlegir og hlakka til að fylgjast með kosningasjónvarpinu í kvöld. Þetta er í fyrsta sinn sem öll börnin mín hafa áhuga á kosningunum og það er því mikil tilhlökkun fyrir kvöldinu. Ég þarf að fara í búðina í dag og versla inn fyrir kvöldið (svo mikilvægt að vera með gott snarl í kvöld) en leiðin liggur einnig í Ikea og að sjálfsögðu á kjörstað.

Ég bakaði þessa köku um daginn og var með í eftirrétt og má til með að mæla með henni. Hún var dásamlega góð og gæti verið sniðugur eftirréttur fyrir kvöldið. Stingið íslenskum fánapinnum í hana til að fá réttu stemninguna áður en þið berið hana fram í kvöld. Súpergóð!

Súkkulaðibaka með sætum rjóma og berjum (uppskrift úr Joy the Baker Cookbook)

Bökuskelin:

  • 1 ½ bolli hveiti
  • ½ bolli flórsykur
  • ½ tsk salt
  • ½ tsk kanil
  • 1/8 tsk engifer (krydd)
  • ½ bolli ósaltað smjör, kalt
  • 1 stórt egg

Setjið hveiti, sykur, salt og krydd í skál og blandið saman. Skerið smjörið í bita og bætið í skálina. Blandið öllu vel saman með höndunum þar til deigið hefur myndað litla kekki. Bætið eggi saman við og hrærið deiginu saman með gaffli (hafið ekki áhyggjur ef deigið verður eins og mylsna, það er allt í lagi). Setjið deigið í lausbotna bökuform og notið puttana til að þrýsta því í formið og upp með hliðum þess. Kælið í frysti í klukkustund. Hitið þar eftir ofn í 175°. Smyrjið álpappír með smjöri og leggið með smjörhliðina niður yfir bökuskelina. Bakið í 20 mínútur, takið þá álpappírinn af og bakið í aðrar 15 mínútur, eða þar til bökuskelin er fallega gyllt. Látið skelina kólna alveg áður en fyllingin er sett í.

Fyllingin:

  • 225 g dökkt súkkulaði, fínhakkað
  • 1 ¼ bolli rjómi
  • ¼  bolli ósaltað smjör, við stofuhita, skorið í bita

Á meðan bökuskelin er í frystinum er gott að gera fyllinguna. Setjið fínhakkað súkkulaðið í skál og leggið til hliðar. Setjið rjómann í pott og hitið varlega að suðu. Hellið helmingnum af heitum rjómanum yfir súkkulaðið og látið standaí 1 mínútur (súkkulaðið mun bráðna). Hrærið súkkulaðinu og rjómanum saman og bætið því sem eftir var af rjómanum varlega saman við. Hrærið þar til blandan er slétt. Bætið þá smjörbitum út í og hrærið saman með sleikju þar til smjörið hefur bráðnað. Blandan verður dökk og glansandi. Setjið til hliðar og látið kólna (blandan þykkist þegar hún kólnar. Mér fannst hún þó þykkjast svo hægt að ég endaði á að kæla hana í ísskápnum).

Yfir bökuna:

  • 1 bolli rjómi
  • 3 msk flórsykur
  • 1 bolli hindber
  • ¼ bolli brómber (ég var bara með hindber)

Þeytið saman rjóma og flórsykri þar til rjóminn er léttþeyttur.

Samsetning: Setjið fyllinguna í bökuskelina. Setjið berin yfir og endið á að setja rjómann yfir miðjuna (látið hann ekki ná yfir alla bökuna, það er svo fallegt að sjá súkkulaðifyllinguna og berin meðfram kantinum). Berið strax fram. Kakan er best á fyrsta degi en geymist þó vel í allt að 3 daga í ísskáp.

Allt hráefni í þessa uppskrift fæst í

 

Rabbabarabaka með vanillu

Ég er loksins komin í frí og ætla að eyða næstu vikum í afslöppun hér á Balí. Við komum hingað í hádeginu á föstudaginn og ég hef nánast verið sofandi síðan við lögðum af stað frá Keflavík. Ég svaf öll flugin, var sofnuð kl. 20 á föstudagskvöldinu og svaf alla nóttina án þess að rumska. Eftir morgunverðinn fórum við niður á strönd (hótelið okkar er á ströndinni) og þar sofnaði ég aftur. Seinni partinn settumst við í setustofuna við móttökuna og það var svo notalegt að sitja þar í sófanum í skugganum að ég sofnaði aftur. Nú er ég hins vegar að súpa seyðið af öllum þessum svefni og sit hér glaðvakandi við tölvuna kl. 3 um nóttu, með svalahurðina opna upp á gátt og hlusta á fuglasönginn sem berst inn til okkar. Á milli þess sem ég hef sofið hef ég náð að klára tvær bækur síðan ég kom hingað og hlakka til að byrja á þeirri þriðju þegar sólin kemur upp.

Við ætlum að eyða fyrstu nóttunum hér í Nusa Dua en förum síðan á þriðjudaginn til Ubud. Hér er sláandi fallegt, herbergið okkar er með einu besta rúmi sem við höfum sofið í og maturinn er svo góður að það nær engri átt. Morgunverðarhlaðborðið á hótelinu okkar er svakalegt, með öllu því sem hugurinn girnist. Ég hef aldrei séð annað eins. Nýbökuð brauð, álegg, eggjahrærur gerðar eftir óskum, beikon, pylsur, núðlur, steikt kínversk hrísgrjón, núðlusúpur, sushi, pönnukökur með súkkulaðisósu, belgískar vöfflur með sýrópi og berjum, ávaxtabar… úrvalið er endalaust! Ég get varla beðið eftir að klukkan slái sjö og mun eflaust hanga á húninum þegar þeir opna.

 

Í gærkvöldi borðuðum við á veitingastað hér í Nusa Dua sem heitir Kayiputi. Þar fengum við rækjuforrétt, æðislega nautasteik með grænmeti og kartöflumús með truffluolíu í aðalrétt og súkkulaðiköku sem var hjúpuð með súkkulaðimús og toppuð með súkkulaðiís í eftirrétt. Hrein dásemd! Ég setti myndir á Insta stories og ætla að reyna að vera dugleg að uppfæra þar á þessu ferðalagi mínu.

Þetta er í fyrsta sinn sem ég tek tölvuna með mér í frí og hef hugsað mér að blogga á meðan ég er hérna. Ég er nefnilega með svo mikið af uppskriftum sem eiga eftir að rata hingað inn að mér fannst upplagt að nýta tækifærið á meðan ég er hér að dunda mér við bloggið. Fyrsta uppskriftin héðan er svo sannarlega ekki framandi heldur ljúffeng rababarabaka sem passar vel núna þegar allir garðar eru að springa úr rababörum. Ég bauð upp á bökuna kvöldið áður en við lögðum af stað hingað út, í tilefni af afmæli mömmu. Með bökunni bar ég fram heimagerða vanillusósu (skal setja uppskriftina inn fljótlega) en vanilluís eða rjómi fara líka vel með henni.

Rabbabarabaka með vanillu

  • 3 rababarar (ca 30 cm að lengd)
  • 1 dl sykur
  • 2 tsk vanillusykur
  • 1 tsk kartöflumjöl

Deig

  • 2 dl hveiti
  • 1 dl haframjöl
  • 4 tsk sykur
  • 150 g smjör
  • 1 tsk vanillusykur
  • sýróp (ég notaði ljóst sýróp sem kemur í brúsum, mjög þægilegt að sprauta beint úr flöskunni yfir bökuna)

Hitið ofninn í 200°. Skerið rababarann í ca 1 cm stóra bita. Smyrjið eldfast mót með smjöri og setjið rababarann í botninn á mótinu. Blandið sykri, vanillusykri og kartöflumjöli saman og stráið yfir rababarann.

Degið: Setjið hveiti, haframjöl, sykur, vanillusykur og smjör í skál og vinni saman þar til það myndast gróf mylsna. Dreifið henni yfir rababarana og endið á að láta sýróp í mjórri bunu yfir bökuna (það á ekki að þekja hana alla). Bakið í um 25 mínútur, eða þar til bakan hefur fengið gylltan lit og rababarinn er orðinn mjúkur.

Allt hráefni í þessa uppskrift fæst í

 

SaveSave

SaveSave

SaveSave

SaveSave

SaveSave

SaveSave

SaveSave

SaveSave

SaveSave

SaveSave

SaveSave

SaveSave

Baka með sætri kartöflu, spínati og fetaosti

Ég var greinilega ekki með fulle femm þegar ég skrifaði fyrir viku síðan að það væru tveir þriðjudagar eftir af mánuðinum. Mánuðurinn hefur liðið svo hratt að ég var viku á eftir! Í dag er vissulega síðasti þriðjudagur maímánaðar og þar með síðasta græna þriðjudagsfærslan. Í bili alla vega. Ég mun vonandi í framhaldinu vera duglegri í að setja grænmetisuppskriftir hingað inn.

Ég held að það sé óhætt að segja að ég hafi geymt það besta fram í lokin því þessi grænmetisbaka er brjálæðislega góð. Svo góð að ég mun eflaust þreyta fjölskylduna fljótlega með henni eins og ég gerði á sínum tíma með plokkfiskinn. Ég fékk feikna mikið æði fyrir plokkfiski hér um árið og eldaði hann svo oft að á endanum sögðu krakkarnir hingað og ekki lengra. Þau fá enn hroll við tilhugsunina um plokkfisk. Þetta gæti mögulega endurtekið sig með þessa böku því ég fæ ekki nóg af henni. Þið bara verðið að prófa!

Baka með sætri kartöflu, spínati og fetaosti

Botninn

  • 3 dl hveiti
  • 100 g smjör
  • 3 msk vatn

Hitið ofninn í 225°. Blandið hráefninu í botninn saman þannig að það myndi deigklump, fletjið hann út og fyllið út í bökumót (líka hægt að nota venjulegt kökuform). Forbakið í ca 10 mínútur.

Fylling:

  • 1 sæt kartafla (meðalstór)
  • krydd eftir smekk (ég var með Best á allt, Ítalska hvítlauksblöndu, salt og pipar)
  • 1 laukur
  • 2 hvítlauksrif
  • 2 handfylli af spínati
  • 2 msk balsamik edik
  • 2 egg
  • 2 dl mjólk
  • 150 g fetakubbur, mulinn í bita
  • handfylli af cashew hnetum

Skerið sætu kartöfluna í teninga, veltið upp úr ólífuolíu og kryddið. Bakið við 180° í 20 mínútur.

Hakkið lauk og hvítlauk. Hitið pönnu yfir miðlungsháum hita, bræðið smjör á pönnunni og bætið svo lauk og hvítlauk á hana. Steikið þar til mjúkt. Bætið spínati á pönnuna og steikið áfram í um 2 mínútur. Bætið þá balsamik ediki saman við og kryddið með salti og pipar. Steikið allt saman í um 2 mínútur, takið svo af hitanum og látið standa aðeins.

Hrærið saman mjólk og egg.

Setjið helminginn af sætu kartöflunum í botnin á bökubotninn. Setjið lauk- og spínatblönduna, fetaost og cashew hneturnar yfir. Ef það er pláss, stingið þá fleiri sætum kartöflum í bökuna (ef það verður afgangur þá er um að gera að geyma restina t.d. út á salat eða til að eiga sem meðlæti). Hellið eggjablöndunni yfir. Bakið í 35-40 mínútur við 180°. Ef bakan fer að dökkna þá er gott að setja álpappír yfir hana.

Berið fram með góðu salati.

Allt hráefni í þessa uppskrift fæst í

 

SaveSave

Mjúkís ársins 2017 og dásamleg hindberjabaka

Mjúkís ársins 2017 og dásamleg hindberjabaka

Vissuð þið að Mjúkís ársins er kominn í verslanir? Í ár er ísinn með pistasíuhnetum og fær því fullt hús stiga hjá mér. Mér þykja pistasíuhnetur svo æðislega góðar og ef þið hafið ekki smakkað þær í ís þá mæli ég með að prófa. Ísinn er dásamlegur einn og sér en þegar ég bar hann fram með nýbakaðri hindberjaböku í gær ætlaði allt um koll að keyra.

Mjúkís ársins 2017 og dásamleg hindberjabakaMjúkís ársins 2017 og dásamleg hindberjabaka

Það er allaf gott að eiga ís í frystinum því þá er hægt að galdra fram eftirrétt á svipstundu. Hér er mjög góð súkkulaðisósa sem fer frábærlega með ís. Eins þykir mér ís nánast ómissandi með heitum bökum. Eplabaka með vanilluís hittir alltaf í mark og þar sem mér þykja hindber og pistasíuhnetur passa svo vel saman þá langaði mig að sjálfsögðu að baka hindberjaböku til að bera fram með pistaísuísnum. Til að gera stórgott enn betra splæstum við í smá karamellusósu yfir.  Þetta verður seint toppað!

Mjúkís ársins 2017 og dásamleg hindberjabaka

Hindberjabaka

Deig

  • 125 g smjör
  • 1 dl sykur
  • 2 dl hveiti
  • 1 msk vanillusykur

Fylling

  • um 5 dl hindber, frosin eða fersk
  • 1 msk kartöflumjöl
  • 1 msk sykur

Hitið ofninn í 200°.

Setjið öll hráefnin í deigið saman í skál og vinnið saman með gaffli eða fingrunum þannig að úr verði mulningur

Blandið hindberjum, kartöflumjöli og sykri saman í annarri skál.

Smyrjið eldfast mót. Setjið hindberjablönduna í botninn og deigmulninginn yfir. Bakið við 200° í 25-35 mínútur, eða þar til bakan hefur fengið fallegan lit.

Berið bökuna fram heita með Mjúkís með pistasíuhnetum.

Mjúkís ársins 2017 og dásamleg hindberjabaka

 

Allt hráefni í þessa uppskrift fæst í

HAGKAUP

 

 

Salamibaka með fetaosti

Salamibaka með fetaosti

Ég er svo ánægð með að þriðja sería af Skam er komin inn á RÚV og get ekki beðið eftir að sjá hana. Eruð þið búin að horfa á þessa þætti, sem hafa orðið svo vinsælir að rauðir varalitir rjúka úr hillum verslana og unglingar um alla Skandinavíu eru farnir að sletta á norsku? Við horfðum á fyrstu tvær seríurnar á einu bretti og höfum síðan beðið spennt eftir þeirri þriðju. Núna er hún loksins komin inn á RÚV með íslenskum texta. Besta sem við höfum séð í langan tíma!

Salamibaka með fetaosti

Ég má til með að gefa uppskrift af æðislegri böku sem við vorum með í kvöldmat um daginn. Ég bar hana fram með salati sem ég setti bæði olíu af fetaostinum og smá balsamik gljáa yfir. Ég ætlaði ekki að geta hætt að borða. Léttur kvöldverður og ef heppnin er með þér og það verður afgangur þá passar bökusneið vel í hádeginu daginn eftir. Súpergott!

Salamibaka með fetaosti

Salamibaka með fetaosti

Botninn:

  • 3 dl hveiti (eða hveiti og heilhveiti til helminga)
  • 125 g smjör
  • 2 ½ msk kalt vatn

Skerið smjörið niður og setjið í skál ásamt hveitinu. Látið skálina standa í smá stund svo smjörið mýkist aðeins. Blandið saman með höndunum eða handþeytara. Bætið köldu vatni saman við og vinnið saman í slétt deig. Þrýstið deiginu i botn á bökuformi (eða lausbotna kökuformi) og stingið með gaffli yfir botninn. Látið standa í ísskáp í 20 mínútur, eða á meðan fyllingin er útbúin.

Salamibaka með fetaosti

Fylling:

  • 1 rauðlaukur (eða 1 lítill púrrulaukur)
  • 1 hvítlauksrif
  • um 120 g salami
  • 150 g fetaostur
  • 250 g kirsuberjatómatar
  • ½ dl fersk hökkuð basilika eða 1 msk þurrkuð
  • 2 dl rifinn ostur
  • 3 egg
  • 2 ½ dl rjómi
  • ¾ tsk salt
  • smá af svörtum pipar

Fínhakkið lauk og hvítlauk. Hitið pönnu yfir miðlungsháum hita og steikið lauk og hvítlauk í smjöri þar til mjúkt. Takið af pönnunni og leggið til hliðar.

Skerið salami í strimla, fetaostinn í teninga (ef notaður er fetakubbur) og tómatana í tvennt. Ef notuð er fersk basilika þá er hún hökkuð.

Takið bökubotninn úr ísskápnum og setjið lauk og hvítlauk yfir hann. Setjið þar á eftir salami, fetaost, tómata og basiliku yfir. Stráið rifnum osti yfir.

Hrærið saman eggjum, rjóma, salti og pipar. Hrærið saman þar til blandan er slétt. Hellið blöndunni yfir bökuna. Bakið í neðri hluta ofnsins við 200° í um 40 mínútur eða þar til bakan hefur fengið fínan lit. Berið fram með salati.

Salamibaka með fetaosti

Allt hráefni í þessa uppskrift fæst í

HAGKAUP

Caesarbaka

Caesarbaka

Það ætti ekki að koma neinum sem lesa hér á óvart að ég bæði geri og fylgi vikumatseðlum. Það hef ég gert síðan ég eignaðist tvíburana mína fyrir tæpum 14 árum og sá hag minn í því að fækka búðarferðum eins mikið og möguleiki var á. Ég plana því alltaf matarvikuna og í gærkvöldi stóð skýrum stöfum gúllas á matseðlinum, haustlegur matur sem ég ætlaði að láta malla á meðan ég færi í langan göngutúr. Ég sá fyrir mér að ég kæmi svöng heim, myndi sitja lengi við matarborðið og njóta kvöldverðarins.

Caesarbaka

Síðan komst ég að því að strákarnir yrðu ekki í mat og skömmu síðar þegar ég opnaði ísskápinn rak ég augun í fimm tegundir af ostum sem við keyptum í ostabúðinni um daginn. Malín og Oliver eru ekki mikið fyrir osta en voru fullkomlega sátt við að hita sér lasagna sem var til í frystinum og því fengum við hin okkur osta og rauðvínskvöldverð. Svo gott! Ég tók ostana snemma út og á meðan við fórum í göngutúr náðu þeir að standa í tvo tíma á borðinu. Það þykir mér best. Kaldir ostar beint úr ísskápnum þykja mér ekki spennandi og passa því alltaf að taka þá tímalega út.

Caesarbaka

Ég ætla þó ekki að birta hér myndir af rauðvíni og ostum heldur gefa uppskrift af Caesarböku sem ég gerði um daginn og var svo góð. Ég elska Caesar salat (hver gerir það ekki!) og á enn eftir að gefa hér uppskrift af lang besta Caesar salatinu. Ég þarf bara að fá leyfi hjá vinkonu minni sem gaf mér uppskriftina til að birta hana hér, já og auðvitað að elda það (sem ég geri reglulega) og mynda. En áður en það gerist kemur hér uppskrift af Caesarbökunni góðu. Það væri eflaust mjög gott að bera hana fram með Caesar dressingu, en ég átti hana ekki til og lét bökuna því duga svona. Það kom ekki að sök, hún var stórgóð!

Caesarbaka

Caesarbaka

Botn:

  • 3 dl hveiti (180 g)
  • 100 g smjör
  • 2 msk vatn

Hitið ofninn í 225°. Blandið hveiti og smjöri saman (gott að nota matvinnsluvél ef hún er til). Bætið vatni saman við og vinnið snögglega saman í deig. Þrýstið deiginu í um 24 cm form með lausum botni. Stingið göt í botninn með gaffli og bakið í miðjum ofni í um 10 mínútur.

Fylling:

  • 1 grillaður kjúklingur
  • 1 púrrulaukur
  • 2 hvítlauksrif
  • 1 msk smjör
  • smá salt og svartur pipar
  • 3 egg
  • 3 dl mjólk
  • 2 +2 dl parmesan ostur, rifinn

Takið húðina af kjúklingnum og skerið kjötið í bita. Hreinsið og strimlið púrrulaukinn. Afhýðið og sneiðið hvítlaukinn. Steikið hvítlauk og púrrulauk í smjöri þar til mjúkt. Bætið kjúklingnum saman við og kryddið með salti og pipar. Setjið blönduna á forbakaða bökubotninn.

Hrærið saman egg, mjólk og 2 dl af parmesan ostinum. Hellið blöndunni yfir fyllinguna. Stráið 2 dl af parmesanosti yfir. Lækkið hitann á ofninum í 200°. Bakið í neðri hluta ofnsins í um 40 mínútur.

Yfir bökuna:

  • um 150 g beikon
  • romansalat (eða annað salat)
  • 25 g parmesan ostur

Skerið beikonið í strimla og steikið þar til stökkt. Skerið salatið í strimla. Setjið beikon, salat og parmesanost í sneiðum yfir heita bökuna og berið strax fram.

Allt hráefni í þessa uppskrift fæst í

HAGKAUP

Banana- og súkkulaðibaka

Banana- og súkkulaðibaka

Ég fór í smá frí til Brussel og Stokkhólms í síðustu viku og skildi tölvuna eftir heima, sem varð til þess að bloggið fékk að sitja á hakanum. Hef ég sagt ykkur að ég E L S K A Stokkhólm? Hún er uppáhalds borgin mín í öllum heiminum og mér þykir alltaf jafn yndislegt að koma þangað. Í þetta sinn var það sérlega ljúft, því bæði lék veðrið við okkur og við fórum á bestu tónleika sem ég hef nokkurn tímann farið á, nefnilega Adele. Ég er enn að hugsa um hvað hún er stórkostleg söngkona og hefði helst viljað elta hana á næstu tónleika.

Ég var búin að lofa uppskrift af þessari böku sem hvarf á methraða ofan í mannskapinn hér heima um daginn. Bananar og súkkulaði er blanda sem getur ekki klikkað. Ég bar bökuna fram heita með vanilluís og sló algjörlega í gegn. Súpergóð!

Banana- og súkkulaðibakaBanana- og súkkulaðibakaBanana- og súkkulaðibakaBanana- og súkkulaðibaka

Banana- og súkkulaðibaka (uppskrift fyrir 4-5)

  • 3 bananar
  • 100 g suðusúkkulaði
  • 2 dl hveiti
  • 1 dl sykur
  • 1 msk vanillusykur
  • 125 g smjör, við stofuhita

Afhýðið bananana og skerið í sneiðar. Grófhakkið súkkulaðið.

Setjið hveiti, sykur, vanillusykur og smjör í skál og vinnið saman með gaffli eða fingrunum þannig að úr verði nokkurs konar mulningur.

Smyrjið eldfast mót, setjið bananana í botninn, súkkulaðið yfir og endið á að dreyfa mulningnum yfir. Bakið við 200° í 25-35 mínútur, eða þar til bakan hefur fengið fallegan lit. Berið bökuna fram heita með vanilluís eða rjóma.

Allt hráefni í þessa uppskrift fæst í

HAGKAUP

 

Brokkólí- og sveppabaka

Brokkólí- og sveppabaka

Ég er enn að reyna að vera með grænmetisrétt einu sinni í viku og það hefur gengið vonum framar. Það er svo mikið til að góðum grænmetiréttum og margir hverjir eru bæði fljótgerðir og æðislega góðir. Síðan eru þeir léttir og góðir í maga. Þessi baka er án bökubotns og það tekur því enga stund að útbúa hana. Það má síðan bera bökuna fram með góðu brauði til að gera hana að meiri máltíð.

Brokkolí- og sveppabaka

  • 250 g brokkoli
  • 150 g sveppir
  • 3 egg
  • 2 dl rjómi
  • 100 g philadelphia rjómaostur
  • 100 g kotasæla
  • 150 g fetaostur
  • basilika og pipar (gott að krydda líka með kryddi lífsins frá Pottagöldrum og paprikukryddi)
  • 2 dl rifinn ostur

Hitið ofninn í 200° og smyrjið eldfast form. Setjið brokkólí og sveppi í botninn á forminu. Hrærið eggin með rjómanum, kryddið og bætið kotasælu og fetaosti saman við. Hellið blöndunni yfir og stráið rifnum osti yfir. Bakið í 20-25 mínútur.

Brokkólí- og sveppabakaBrokkólí- og sveppabakaBrokkólí- og sveppabaka

Allt hráefni í þessa uppskrift fæst í

HAGKAUP

 

Quiche Lorraine

Quiche LorraineMatarlöngunin á það til að sveiflast eftir veðrinu og þegar sólin skín vil ég helst vera með eitthvað létt í matinn. Í dag er sólin vissulega fjarri góðu gamni en hún lætur vonandi sjá sig áður en sumarið er allt og þá er gott að muna eftir þessari böku, sem passar reyndar í öllum veðrum og er líka frábær sem hádegisverður.

Quiche Lorraine

Mér þykir alltaf gaman að bera bökur fram því þær eru svo fallegar á borði. Þessa uppskrift sá ég fyrir þónokkru hjá Smitten kitchen og beið eftir tækifæri til að prófa hana. Okkur þótti hún dásamleg! Ég bar bökuna fram með salati með fetaosti og balsamik creme, sem okkur þótti passa stóvel með.

Quiche Lorraine – uppskrift frá Smitten kitchen

  • 1 ¾  bolli púrrulaukur, skorinn í bita (notið bara hvíta og ljósgræna hlutann, þið þurfið um tvo stóra lauka)
  • ¾ bolli laukur, skorinn í bita
  • 2 ½  tsk ólífuolía
  • 1  1/4 bolli hveiti
  • 1 msk + 2 tsk kornsterkja
  • salt
  • 6 msk smjör, skorið í teninga
  • 4 egg
  • ½ bolli + 1 msk rjómi
  • 1 bolli + 2 msk sýrður rjómi
  • smá múskat
  • smá pipar
  • 1½ bolli skinka, skorin í bita (ég keypti tilbúna skinkustrimla)
  • ¾ bolli ostur, t.d. gouda eða gouda sterkur

Setjið stóra pönnu yfir lágan hita og steikið lauk og púrrulauk í ólívuolíu í 30-40 mínútur, eða þar til þeir eru karamelluseraðir. Hrærið annað slagið í. Takið af hitanum og kælið.Quiche Lorraine

Setjið hveiti, kornsterkju, 1/4 tsk salt, smjör og 1 egg í matvinnsluvél og vinnið saman í deig (ef þið eruð ekki með matvinnsluvél notið þá handþeytara, gaffal eða heldurnar, allt virkar!).

Quiche Lorraine

Fletjið deigið út á hveitistráðu borði og setjið síðan yfir í bökuform (eða kökuform). Þrýstið deiginu vel í formið og kælið í ísskáp í 30 mínútur.

Á meðan bökuskelin er að kólna er rjóma og sýrðum rjóma blandað saman í skál. Hrærið eggjunum 3 sem eftir eru saman við ásamt smá múskati, salti og pipar. Hitið ofninn í 175°.

Takið bökuskelina úr ísskápnum og dreifið laukblöndunni yfir botninn á henni. Setjið þar á eftir skinkubita og rifinn ost yfir. Hellið rjóma- og eggjablöndunni yfir og setjið bökuna í ofninn. Bakið í um 25-30 mínútur, eða þar til bakan hefur fengið fallegan lit.

Quiche LorraineQuiche LorraineQuiche LorraineQuiche Lorraine

Berið bökuna fram heita eða við stofuhita, með góðu salati.

Allt hráefni í þessa uppskrift fæst í

HAGKAUP