Um síðustu helgi eldaði ég einfaldan mexíkóskan mat sem vakti rífandi lukku hér á heimilinu. Ég setti mynd af matnum inn á Instagram og hef fengið þónokkrar fyrirspurnir um hvað þetta sé og hvernig það sé gert. Ég ákvað því að setja uppskriftina inn núna ef einhver er á höttunum eftir hugmynd að föstudagsmatnum.
Mér þykja þessar fylltu tortillaskálar vera ekta föstudagsmatur. Það tekur enga stund að útbúa þær og á meðan maturinn er í ofninum er salatið skorið niður og nachos sett í skál. Áður en maður veit af er matur á borðinu sem allir elska. Ég mæli með að þið prófið.
Fylltar tortillaskálar
- Mjúkar tortillakökur (minni tegundin)
- 1 bakki nautahakk
- 1 poki taco-krydd
- ca 1 dl vatn
- ca 1/2 krús tacosósa
- 1 dós refried beans
- rifinn cheddar ostur
Steikið nautahakkið á pönnu, kryddið með tacokryddi og hellið ca 1 dl af köldu vatni yfir. Látið sjóða saman í nokkrar mínútur á pönnunni. Hrærið tacosósu og refried beans saman við og setjið til hliðar.
Spreyjið olíu (ég nota PAM) í möffinsform og setjið tortillakökur í þau (það er allt í lagi þó þær standi upp úr), fyllið þær með nautahakksblöndunni og stráið rifnum cheddar osti yfir. Setjið í 200° heitan ofn í 10-15 mínútur, eða þar til osturinn er bráðnaður. Berið fram með góðu salati, nachos og sýrðum rjóma,guacamole og salsa sósu.
Ljúfmeti og lekkerheit 
Mun pottþétt prófa þetta! gaman að fylgjast með síðunni þinni, allt svo hrikalega girnilegt! 🙂
Snilld … ekkert smá girnilegt og flott 😉
Hæhæ, æðislegt blogg.. 🙂 en hvaða tegund af Tortilla kökum notarðu sem eru svona litlar..?
Ég er bara með venjulegar tortilla kökur (þessar sem eru 8 í pakka).
Mér leist ekkert á blikuna þegar kökurnar virkuðu svo stórar miðað við formin en svo var bara spurning um að böggla þeim ofan í og skófla kjötinu ofaní, ostinn ofaná og inn í ofn. Tók enga stund, flott á diski, gaman að borða og bragðgott. Vorum tvær mömmur og þrír unglingar með átta kökur, auka kjöt og salat, flögur og sósur. Mátti ekki vera minna. Skemmtileg kvöldstund!
Halló
Hvar kaupurðu svona litlar tortillakökur?
Tortillakökurnar eru bara í venjulegri stærð, 8 saman í pakka frá Santa María. Ég keypti mínar í Bónus 🙂
Bauð bónandum upp á þetta á bóndadaginn og þetta vakti aldeilis góða lukku.
Takk fyrir flott og skemmtilegt blogg, er búin að prófa nokkar af uppskriftunum sem þú hefur sett hér inn og þær hafa allar fallið vel í kramið og ég á sko eftir að prófa þær fleiri 😉
Hvernig er Tasco sósa ? 🙂
Þetta er bara venjuleg Taco sósa (t.d. frá Santa María) 🙂
Prufaði þennan rétt í kvöld 🙂 hann vakti mikla lukku á heimilinu. Mun klárlega elda hann aftur 🙂 búin að heita mér því að prufa einn rétt frá þér í viku 🙂
Hæhæ, þetta er ekkert smá girnilegt 🙂 En hvar fær maður refried beans og hvernig lítur það út? 🙂
Þú færð refried beans í flestum matvöruverslunum. Þær eru í dós og eru í hillunum hjá mexíkósku vörunum 🙂
Hvað eru formin stór hjá þér? Og Hvar er hægt að kaupa svona form? 🙂
Mig langar bara að vita hvernig þið borðið þetta? Með hnífapörum? Eða gúffið þið þessu bara í ykkur? 😀 Hlakka til að prófa þetta 🙂
þessi uppskrift er súpergóð, á eftir að elda þetta oft 🙂 takk fyrir æðislegt blogg 😉
Eldaði þetta í kvöld. Mjög gott og allir glaðir með matinn. Takk fyrir frábærar uppskriftir. Bestu kveðjur.
Lítur rosa vel út! var að velta fyrir mér hverskonar salat þú varst með (þetta á fyrstu myndinni) lítur sjúklega vel út! Hlakka til að prófa!
Salatið er bara iceberg ( ég sker það niður og læt það svo liggja í ísköldu vatni á meðan ég geri matinn, þá verður kálið brakandi stökkt), rauð paprika, rauðlaukur, avokadó, fetaostur og mulið nachos yfir (svart Doritos). Passar mjög vel með mexíkóskum mat 🙂
Sent from my iPhone
>
Hvar keyptiru þessi möffinsform? eru þetta ekki stærri gerðin af svona formum?
Jú, formið er stærri gerðin. Mig minnir að ég hafi keypt það í Ikea.
Sent from my iPhone
>
Salatið sem þú barst fram með þessu var það ekki með papriku, fetaosti, salati og nachos, ótrúlega girnilegt 🙂
Jú, það var líka með rauðlauki og avokadó. Iceberg salatið sker ég niður og læt það svo liggja í ísköldu vatni í smá stund áður en ég ber það fram. Þá verður það brakandi stökkt 🙂 Nachosið er síðan svart Doritos (uppáhalds!).
Daginn, eldaði þetta í gær….. „Loksins“ heyrðist í krökkunum eftir að hafa horft á uppskriftina á borðinu í nokkra daga…….. ferlega fljótlegt og snilldar gott – sló í gegn 🙂
Takk fyrir mig.
Gaman að heyra 🙂 Mér þykir alltaf extra gaman þegar maturinn slær í gegn hjá krökkunum 🙂
Og ef maður á ekki svona muffinsform, en t.d. lítil glerform eða skálar (eins og t.d fyrir créme brulee) sem þola að fara í ofn er líka hægt að bjarga sér með það. Hef prófað það með egg í brauði sem sett er í ofn og það svínvirkar. Stundum á maður hluti nefnilega sem hægt er að nota í staðinn…