Flokkur: Kökur og tertur

Silvíukaka

~ Svava ~ 48 athugasemd

Þetta er uppáhaldskaka Ögga og sænsku drottningunar, Silvíu. Ég skil það vel því kakan er æðislega góð. Hún er mjög fljótleg í bakstri og hráefnið það einfalt að ég á það alltaf til og hef ég því stundum bakað þessa köku í snatri þegar við höfum fengið gesti óvænt í kaffi.

Í dag byrjaði Öggi loksins í sumarfríi og mér fannst við verða að halda upp á það. Það var því alveg kjörið að baka Silvíuköku og þegar hann kom heim settumst við út á pall og fengum okkur kaffi.

Silvíukaka

  • 2 egg
  • 2 dl sykur
  • 1 dl vatn
  • 2 dl hveiti
  • 2 tsk lyftiduft

Glassúr

  • 75 gr smjör
  • 1 dl sykur (eða flórsykur)
  • 2 tsk vanillusykur
  • 1 eggjarauða
  • kókosmjöl

Hitið ofninn í 175°. Hrærið egg og sykur saman þar til létt og ljóst. Bætið vatninu saman við og hrærið snögglega. Bætið hveiti og lyftidufti út í og hrærið þar til deigið verður slétt. Setjið deigið í smurt bökunarform og bakið í ca 30 mínútur.

Á meðan kakan er í ofninum er glassúrinn gerður. Bræðið smjörið í litlum potti við vægan hita og hrærið sykri, vanillusykri og eggjarauðu saman við.

Þegar kakan er tilbúin er glassúrinn breiddur yfir kökuna og kókosmjöli stráð yfir.

Ljúffeng möndlukaka

~ Svava ~ 26 athugasemd

Það eru ekki mörg ár síðan ég féll fyrir möndluköku en núna þykir mér hún svo góð og alveg ekta kaka til að hafa með kaffinu. Það tekur enga stund að baka hana og ekki skemmir fyrir hvað hún er falleg á borði.

Í gær bakaði ég möndluköku til að hafa með kaffinu. Í sumar hefur deginum seinkað hægt og sígandi hjá okkur og kaffitíminn í gær var ekki fyrr en um fimmleytið. Það var svo hlýtt á pallinum að við ákváðum að borða kökuna þar. Að drekka kaffið á pallinum slær öllu við í notalegheitum á sumrin og við borðum þar eins oft og við getum.  Ég veit þó ekki hvað nágranninn hefur haldið í gær því þegar við sátum og gæddum okkur á nýbakaðri möndlukökunni þá stóð hann og var að grilla kvöldmatinn. Við ákváðum því í snatri að við værum að borða mjög smart og lekkeran forrétt.

Uppskriftina fann ég í nýja veftímaritinu, Home & Delicius. Okkur fannst kakan æðislega góð og ég ætla ekki að segja ykkur hvað það er lítið eftir af henni.

Möndlukaka

  • 75 gr smjör
  • 1 dl sykur
  • 2 egg
  • 2 1/2 dl hveiti
  • 2 tsk lyftiduft
  • 1/2 tsk salt
  • 1 tsk möndludropar
  • 1 dl mjólk

Hitið ofninn í 180°. Hrærið saman smjöri og sykri þar til létt og ljóst. Bætið eggjum saman við einu í einu og hrærið vel. Bætið þurrefnum saman við ásamt möndludropum og mjólk. Hrærið þar til deigið verður slétt og kekkjalaust. Setjið deigið í smurt bökunarform (ég notaði 22 cm form til að fá kökuna aðeins hærri) og bakið í 20 mínútur (ég hafði kökuna í 25 mínútur). Passið að baka hana ekki of lengi svo hún verði ekki þurr.

Glassúr

  • 3 dl flórsykur
  • 1 msk heitt vatn
  • 1 msk Ribena sólberjasafi

Blandið vatni og Ribena sólberjasafanum saman. Hrærið flórsykur og djúsblöndu saman þar til kekkjalaust. Mér fannst kremið of þykkt og bætti því smá meira af vatni saman við. Hellið kreminu yfir kökuna og berið fram.

Bananakaka með Nutella kremi

~ Svava ~ 14 athugasemd


Það er svo gaman að sjá hvernig hverfið fyllist af lífi í góðu veðri. Strákarnir mega varla vera að því að koma inn í kvöldmat og þegar þeir koma inn á kvöldin eru þeir með grasgrænu á hnjánum, skítugir upp fyrir haus og gleðin geislar af þeim. Það er mikið brallað, í gær var verið að smíða leynikofa og deginum áður voru þeir að veiða síli. Það er sjaldan dauð stund og þegar ég hafði orð á því einn daginn hvað þeir væru skítugir þá leit Jakob á mig og sagði; Mamma það er sumar, börn eiga þá að vera skítug. Svei mér ef það er ekki bara rétt hjá honum. Ég held að ég vilji miklu frekar fá þá heim með grasgrænu á hnjánum en eins og nýstraujað sellófan. Í gær var veðrið einmitt svo fallegt og krakkarnir voru úti að leika langt fram á kvöld. Mér fannst því alveg kjörið að dunda mér í eldhúsinu og vera með kvöldkaffi þegar þau kæmu inn.

Ég hef aldrei verið mikið fyrir Nutella en krakkarnir mínir elska það og þegar ég sá þessa uppskrift á Pinterest þá vissi ég strax að hún yrði vinsæl hjá þeim. Ég þurfti því ekki að hugsa mig tvisvar um hvað ég ætti að baka. Það er óhætt að segja að kakan hitti í mark. Ég smakkaði hana og verð að viðurkenna að banani og Nutella passa saman eins og hönd í hanska. Þessa á ég eftir að baka oftar.

Bananakaka

  • 125 gr smjör við stofuhita
  • 1 1/2 bolli sykur
  • 2 1/2 bolli hveiti
  • 1 1/2 tsk lyftiduft
  • 1 tsk matarsódi
  • 1 tsk salt
  • 1 1/2 bolli stappaðir bananar (um 3 bananar)
  • 2 egg
  • 1 1/2 tsk vanilludropar
  • 1/2 bolli nýmjólk
  • 1/2 msk sítrónusafi
Nutella krem
  • 1/2 bolli Nutella
  • 50 gr smjör
  • 3 bollar flórsykur
  • 2 góðar msk mjólk eða rjómi

Blandið saman nýmjólk og sítrónusafa og látið standa í 5 mínútur. Hrærið smjör og sykur vel saman í hrærivél. Bætið hveiti, salti, lyftidufti og matarsóda saman við smjör og sykurblönduna og hrærið þannig að allt blandist vel. Bætið næst bananastöppu, sítrónumjólk, eggjum og vanilludropum út í og hrærið áfram í tvær mínútur. Setjið deigið í smurt bökunarform (24 cm) og bakið við 180° í 60-70 mínútur eða þar til bökunarprjóni stungið í kökuna kemur hreinn upp. Látið kökuna kólna alveg áður en Nutella kremið er sett á.

Hrærið saman í hrærivél smjöri og Nutella. Bætið flórsykri saman við smátt og smátt. Endið á að setja mjólk eða rjóma út í og hrærið þar til kremið fær fallega áferð. Smyrjið kreminu á kökuna.

Berið kökuna fram með ískaldri mjólk.

Marengsterta með sítrónukremi og bláberjum

~ Svava ~ 11 athugasemd

Marengsterta hlýtur að vera það léttasta sem hægt er að baka. Það þarf einfaldlega að hræra eggjahvítur og sykur nógu lengi saman. Það má síðan alltaf bæta sítrónusafa eða kakói út í, skipta hvítum sykri út fyrir púðursykur eða af hverju ekki að strá möndluflögum yfir botninn áður en hann fer í ofninn.

Um síðustu helgi átti ég afgang af lemoncurd og nokkrar eggjahvítur og fannst kjörið að nýta það í marengs. Ég átti líka Rice crispies og úr varð einföld en dásamlega góð og sumarleg terta.

Marensbotnar

  • 4 eggjahvítur
  • 2 dl sykur
  • 3 dl rice crispsies

Hitið ofninn í 125° og klæðið tvö bökunarform með bökunarpappír í botninn og smyrjið hliðarnar. Hrærið eggjahvíturnar þar til þær verða hvítar og léttar. Bætið sykri út í og hrærið þar til blandan myndar stífa toppa. Hrærið Rice crispies varlega út í og skiptið deginu í formin. Bakið í 80 mínútur. Látið botnana kólna áður en sett er á þá.

Sítrónucurd

  • 1,5 dl. sykur
  • 2 stór egg
  • hýði af 2 stórum sítrónum og ca 3/4 dl. af ferskum sítrónusafa
  • 50 gr. smjör við stofuhita

Setjið sykur, egg, fínrifið sítrónuhýði og sítrónusafann í hitaþolna skál og setjið yfir sjóðandi vatn. Hrærið stöðugt með handþeytara (ekki rafmagns) svo að eggin hlaupi ekki í kekki. Blandan á að ná svipaðri þykkt og hollandaissósa. Þegar blandan hefur náð réttri þykkt er hún tekinn af hitanum og smjörinu hrært saman við. Þegar smjörið er bráðnað er sítrónucurdið sett í lokaða krukku, það geymist í rúma viku í ískáp.

  • 1/2 l rjómi, þeyttur.

Ég átti smá afgang af sítrónucurdi en ekki nógu mikið til að setja á heila tertu. Ég tók því af þeytta rjómanum og blandaði saman við sítronucurdið. Úr varð létt og sumarlegt sítrónukrem, æðislega gott.

Setjið annan marengsbotninn á kökudisk. Það er gott að setja smá af þeytta rjómanum undir botninn svo hann renni ekki til á kökudiskinum. Smyrjið þunnu lagi af sítrónukreminu á botninn og síðan þeytta rjómanum yfir sítrónukremið. Leggið seinni botninn ofan á, annað lag af sítrónukremi og þeytta rjómann efst. Leggið vel af berjum ofan á kökuna og njótið.

Sítrónuformkaka Nigellu Lawson

~ Svava ~ 6 athugasemd

„How to eat“ og „How to be a domestic goddess“ voru fyrstu bækurnar sem ég pantaði mér á Netinu. Það eru 12 ár síðan og mér fannst þetta svo ótrúlega spennandi. „How to eat“ hafði komið út tveimur árum áður og þegar ég sá að „How to be a domestic goddess“  væri væntanleg þá beið ég eftir henni til að getað pantað þær saman. Ég hef skoðað þær svo oft og þær eru allar í litlum post-it miðum við uppskriftir sem ég ætla að prófa og búið að skrifa við þær uppskriftir sem ég hef gert. Post-it miðarnir eru þó fleiri og ég virðist lesa bækurnar oftar en ég elda og baka upp úr þeim.

Sítrónuformkökuna hef ég oft gert. Ég hef fyrir löngu skrifað við hana að hún væri mjög góð og mér finnst það ennþá. Það er gert ráð fyrir „self-raising flour“ í uppskriftinni og ég hef skrifað að það sé passlegt að bæta við hveitið rúmlega 1 1/2 tsk af lyftidufti og 1/2 tsk af salti. Ég hef fylgt því allar götur síðan og kakan heppnast alltaf þannig að það hlýtur að vera rétt.

  • 125 gr ósaltað smjör
  • 175 gr sykur
  • 2 stór egg
  • rifinn börkur af 1 sítrónu
  • 175 gr hveiti
  • rúmlega 1 1/2 tsk lyftiduft
  • 1/2 tsk salt
  • 4 msk mjólk

Hitið ofninn í 180°og smyrjið formkökumót vel. Hrærið saman smjöri og sykri. Bætið eggjum og rifnum sítrónuberki út í og hrærið vel saman. Bætið hveiti, lyftidufti og salti varlega saman við og leyfið að blandast vel saman. Að lokum er mjólkinni bætt út í og hrært þar til blandan er slétt. Setjið degið í smurt bökunarformið og bakið í ca 45 mínútur.

Sítrónusýróp

  • safi frá 1 1/2 sítrónu (ca 4 matskeiðar)
  • 100 gr flórsykur

Setjið sítrónusafann og flórsykurinn í lítinn pott og hitið varlega þar til sykurinn leysist upp.

Þegar kakan er tilbúin þá er hún tekin úr ofninum, stungið litlum götum með kökuprjóni ofan á hana alla og sítrónusýrópinu hellt yfir. Ég nota yfirleitt ekki allt sýrópið en það er auðvitað smekksatriði. Leyfið kökunni að kólna dálítið áður en hún er tekið úr forminu.

Oreo ostakaka

~ Svava ~ 10 athugasemd

Í gær var aldeilis ástæða til að fagna; bloggið varð vikugamalt og eiginmaðurinn átti afmæli. Við buðum gestum í mat og ég gerði tvær kökur til að hafa í eftirrétt, þessa ostaköku og marenstertu (uppskriftin kemur síðar). Ég hafði séð uppskriftina að þessari köku á pinterest og var spennt að prófa hana. Dóttir mín, Malín, kolféll fyrir ostakökum þegar við vorum í Bandaríkjunum í fyrra þannig að ég var nokkuð viss um að þessi myndi hitta í mark hjá henni, sem hún svo sannarlega gerði bæði hjá henni og öðrum veislugestum.

Kakan virðist kannski í fyrstu flókin en hún er það alls ekki og það er mjög skemmtilegt að baka hana. Það er best að gera hana deginum áður og leyfa henni að taka sig í ískápnum yfir nótt. Takið hana þó úr ískápnum svolítið áður en þið ætlið að bera hana fram svo að ostakakan nái að mýkjast.

Ostakaka

  • 550 gr rjómaostur við stofuhita (mér finnst Philadelphia rjómaosturinn bestur)
  • 3/4 bollar sykur
  • 1/2 msk vanilludropar
  • 1/4 tsk salt
  • 2 stór egg
  • 1/2 bolli sýrður rjómi
  • 6 grófhakkaðar Oreo-kexkökur

Hitið ofninn í 165°. Hitið vatn í hraðsuðukatli. Hrærið rjómaostinn á miðlungshraða í hrærivél þar til hann verður léttur, skrapið niður með hliðunum á skálinni. Bætið sykri saman við í smáum skömtum og hrærið vel saman þannig að blandan verði létt. Bætið vanilludropum og salti saman við. Bætið eggjunum út í, einu í einu, skrapið niður með hliðunum á skálinni á milli og látið blandast vel. Bætið sýrða rjómanum út í og að lokum grófhökkuðum Oreo-kexkökum.

Setjið bökunarpappír í botninn á smelluformi. Pakkið ytri hluta formsins í álpappír. Hellið fyllingunni í formið og setjið formið í ofnskúffu (eða eldfast mót sem er stærra en smelluformið). Hellið sjóðandi vatni í ofnskúffuna þar til það nær upp hálft smelluformið. Bakið í ca 45 mínútur. Takið smelluformið upp úr vatninu og látið standa í 20 mínútur. Rennið beittum hnífi meðfram forminu og látið kökuna síðan kólna alveg. Fjarlægið hringinn af smelluforminu en skiljið botninn eftir. Setjið plastfilmu yfir og frystið.

Súkkulaðibotnar

  • 2 bollar sykur
  • 1 3/4 bollar hveiti
  • 3/4 bolli kakó
  • 1 1/2 tsk lyftiduft
  • 1 1/2 tsk matarsódi
  • 1 tsk salt
  • 2 egg
  • 1 bolli mjólk
  • 1/2 bolli bragðlítil olía (ekki ólivuolía)
  • 2 tsk vanilludropar
  • 1 bolli sjóðandi vatn

Hitið ofninn í 175° og smyrjið 2 bökunarform. Hrærið saman sykri, hveiti, kakói, lyftidufti, matarsóda og salti. Bætið eggjum, mjólk, olíu og vanillu út í og hrærið á miðlungs hraða á hrærivél í 2 mínútur. Hrærið sama við sjóðandi vatni (degið verður þunnt við þetta). Hellið deginu í bökunarformin og bakið í 30-35 mínútur. Látið kökuna kólna.

Krem

  • 225 gr hvítt súkkulaði
  • 225 gr smjör
  • 2 tsk vanillusykur (eða vanilludropar)
  • 4-6 bollar flórsykur
  • 1/4 – 1/3 bolli mjólk

Bræðið súkkulaðið varlega yfir vatnsbaði eða í örbylgjuofni og látið kólna dálítið. Mýkið smjörið í hrærivélinni og hrærið súkkulaðinu út í ásamt vanillunni. Stillið hrærivélina á lágan hraða og bætið flórsykrinum og mjólkinni saman við í smáum skömmtum.

Setjið súkkulaðikökubotn á kökudisk, smyrjið þunnu lagi af kremi á hann og myljið Oreo-kexkökur yfir. Takið ostakökuna úr frystinum, fjarlægið kökuformsbotninn ásamt bökunarpappírnum og leggið ostakökuna ofan á. Ef að ostakakan er stærri en súkkulaðikökubotninn leyfið honum þá að standa í 5-10 mínútur svo að ostakakan nái að mýkjast aðeins, síðan er hún skorin til með beittum hníf. Smyrjið þunnu lagi af kremi ofan á ostakökuna og myljið Oreo-kexkökur yfir. Setjið seinni súkkulaðikökubotninn yfir og smyrjið alla kökuna með kreminu. Kælið kökuna í ískáp í ca 30 mínútur og smyjrið hana síðan aftur með kremi sé þess óskað.

Skúffukaka

~ Svava ~ 12 athugasemd

Það eiga flestir sína uppáhalds uppskrift af skúffuköku og ég held að þetta sé mín. Ég gerði hana fyrst fyrir mörgum árum þegar ég eignaðist hina ein sönnu Bonniers Kokbok. Bókin er algjör biblía, hnausþykk og stútfull af uppskriftum. Mér þykir mjög vænt um hana og man enn hvað ég varð hissa þegar Kristín vinkona mín gaf mér hana í afmælisgjöf. Ég skil ekki hvernig hún nennti að burðast með hana á milli landa fyrir mig og hugsa alltaf hlýlega til hennar þegar ég dreg bókina fram.

Ég get svarið það að bókin opnast sjálfkrafa á þessari uppskrift, svo oft hef ég bakað hana. Blaðsiðan ber þess líka merki og er öll í blettum. Ef eitthvað þá gera þeir hana bara meira sjarmerandi.

Botninn

  • 200 gr smjör
  • 5 egg
  • 4 dl sykur
  • 4 dl hveiti
  • 1 dl kakó
  • 2 tsk lyftiduft
  • 2 tsk vanillusykur
  • 2 dl mjólk

Hitið ofninn í 200 gráður og smyrjið skúffukökuform. Bræðið smjörið og látið það kólna. Hrærið egg og sykur þar til það verður ljóst og létt. Blandið hveiti, kakói, lyftidufti og vanillusykri saman og siktið það út í degið. Setjið smjör og mjólk út í og hrærið þar til degið verður slétt. Hellið deginu í bökunarformið og bakið í miðjum ofni í 20-25 mínútur.

Glassúr

  • 75 gr smjör
  • 1/2 dl sterkt kaffi
  • 4 dl flórsykur
  • 2 msk kakó
  • 2 tsk vanillusykur

Bræðið smjörið. Setjið þurrefnin í skál og hrærið saman við brætt smjörið og kaffið.

Leyfið kökunni að kólna aðeins áður en glassúrið er sett á. Setjið kókosmjöið yfir kökuna og njótið.

Midsommar

~ Svava ~ 4 athugasemd

Á föstudaginn héldu Svíar upp á Midsommar. Það er æðislega gaman að vera í Svíþjóð á Midsommar, að dansa í kringum Midsommar-stöngina og að borða góðan mat. Við fáum alltaf Svíþjóðarþrá á þessum árstíma og ákváðum í ár að halda okkar eigin Midsommar hátíð. Reyndar ætluðum við hvorki að syngja né dansa heldur að elda góðan mat og horfa á sænska mynd. Það kom síðan á daginn að það voru Justin Bieber tónleikar í sjónvarpinu sem að unglingurinn mátti alls ekki missa af þannig að þetta fór nú fyrir lítið hjá okkur og það eina sem minnti mögulega á Midsommar var jarðaberjatertan sem ég gerði til að hafa í eftirrétt.

Það kom á dögunum út sænsk tertubók eftir Lindu Lomelino, Lomelinos Tårtor. Ég er alveg staðráðin í að eignast þessa bók enda búin að fylgjast með bloggi sem höfundurinn heldur í góðan tíma. Ég var svo heppin að finna uppskrift að jarðaberjatertu úr bókinni á Netinu og fannst kjörið að baka hana fyrir Midsommar hátíðina okkar. Ég breytti uppskriftinni örlítið, gerði sítrónucurd í staðin fyrir limecurd, og notaði þrjú 20 cm form í staðin fyrir tvö 15 cm. Tertan var æðislega góð og ég er spennt að prófa fleiri uppskriftir úr bókinni.

Botnar

  • 50 gr. smjör
  • 2 stór egg
  • 2,5 dl. sykur
  • 1 tsk. vanillusykur
  • 1 dl. mjólk
  • 3 dl. hveiti
  • 1,5 tsk. lyftiduft

Hitið ofninn í 175 gráður og smyrjið tvö 15 cm bökunarform. Bræðið smjörið og látið það kólna. Hrærið egg, sykur og vanillusykur saman þar til það verður ljóst og loftkennt. Hitið mjólkina og blandið hægt út í degið. Hrærið smjörinu út í og að lokum þurrefnunum. Skiptið deginu jafnt í bökunarformin og bakið í ca 30 mínútur.

Sítrónucurd

  • 1,5 dl. sykur
  • 2 stór egg
  • hýði af 2 stórum sítrónum og ca 3/4 dl. af ferskum sítrónusafa
  • 50 gr. smjör við stofuhita

Setjið sykur, egg, fínrifið sítrónuhýði og sítrónusafann í hitaþolna skál og setjið yfir sjóðandi vatn. Hrærið stöðugt með handþeytara (ekki rafmagns) svo að eggin hlaupi ekki í kekki. Blandan á að ná svipaðri þykkt og hollandaissósa. Þegar blandan hefur náð réttri þykkt er hún tekinn af hitanum og smjörinu hrært saman við. Þegar smjörið er bráðnað er sítrónucurdið sett í lokaða krukku, það geymist í rúma viku í ískáp.

Fylling

  • 6 dl. rjómi
  • 2 msk. sykur
  • 500 gr. jarðaber
  • 1 dl. sítrónucurd

Þeytið rjómann með sykrinum. Hreinsið jarðaberin og skerið í sneiðar.

Kljúfið botnana í tvennt með góðum hníf (þá verða botnarnir fjórir). Setjið fyrsta botninn á kökudisk, breiðið jöfnu lagi af sítrónucurdinu á botninn, síðan rjóma og að lokum skífuðum jarðaberjunum. Leggið næsta botn ofan á og endurtakið þar til einn botn er eftir. Að lokum er síðasti botninn lagður efst með skornu hliðina niður, breiðið þykku lagi af rjóma yfir alla tertuna og skreytið með jarðaberjum.