Hafrakökur með rúsínum

apríl 7, 2013apríl 7, 2013 ~ Svava ~ 3 athugasemd

Yfir páskanna heyrðist lítið frá mér þar sem við nutum góðs af því að vera boðin í mat flest kvöldin í páskafríinu. Eftir alla matarveisluna var vikan tekin á léttu nótunum og ég bauð fjölskyldunni upp á hvern óspennandi réttinn á fætur öðrum. Soðinn fiskur, grjónagrautur… matur sem krakkarnir elska en við Öggi ekki.

Ég hef þó verið flott á því þess á milli, bæði yfir páskana og í vikunni sem leið, því ég hef boðið gestum og gangandi upp á nýbakaða hafrakökur með kaffinu eins og enginn sé morgundagurinn. Það gerði ég án þess að hafa nokkuð fyrir því.

Þessi uppskrift að hafrakökum er frábær því deigið er útbúið og síðan geymt upprúllað í frysti. Þegar gesti ber að garði eða kökulöngunin kemur svífandi þá eru einfaldlega skornar sneiðar af deigrúllunni og þeim stungið inn í ofninn. Ég hef meira að segja bara skorið tvær sneiðar og bakað fyrir mig eina þegar ég hef komið heim úr vinnunni. Einfalt og svo ótrúlega gott.

Hafrakökur með rúsínum (uppskrift frá Bon Appétit)

1¼ bolli hveiti
3/4 bolli heilhveiti
½ tsk lyftiduft
½ tsk matarsódi
½ tsk gróft salt
1/8 tsk múskat
1 bolli ósaltað smjör
1 bolli ljós púðursykur
½ bolli sykur
2 stór egg
1 tsk vanilludropar
2 bollar haframjöl
2 bollar rúsínur

Hrærið saman hveiti, heilhveiti, lyftidufti, matarsóda, salti og múskati í skál og leggið til hliðar.

Hrærið saman í hrærivél smjöri, ljósum púðursykri og sykri á hröðum hraða þar til blandan er létt og kremkennd, 2-3 mínútur. Bætið eggjum saman við, einu í einu, og skafið niður með hliðunum á skálinni á milli. Hrærið vanilludropum saman við.

Lækkið hraðann á hrærivélinni í hægan hraða og bætið þurrefnunum saman við í smáum skömmtum. Hrærið þar til hráefnin eru unnin saman en ofhrærið ekki deigið. Hrærið haframjöli og rúsínum varlega saman við.

Skiptið deiginu á tvo bökunarpappíra. Mótið deigin í ílangar rúllur sem eru ca 4 cm í þvermál. Rúllið bökunarpappírnum utan um deigrúllurnar og pakkið þeim svo inn í plast. Frystið deigið í a.m.k. 4 klst. eða upp í 3 vikur.

Þegar á að baka kökurnar er ofninn hitaður í 175°. Takið deigið úr plastinu og rúllið bökunarpappírnum frá. Skerið deigið í ca 1 cm þykkar sneiðar og raðið á bökunarpappírsklædda ofnplötu. Ef það á ekki að baka úr öllu deiginu þá er afganginum pakkað aftur inn og settur í frysti. Bakið kökurnar þar til kanntarnir eru gylltir á lit, 15-18 mínútur.

Brownies með saltri karamellusósu

mars 30, 2013mars 30, 2013 ~ Svava ~ 15 athugasemd

Í lok janúar pantaði ég mér áskrift að Bon Appétit blaðinu. Síðan þá hef ég brunað spennt heim úr vinnunni í von um að blaðið biði mín og það var ekki fyrr en í síðustu viku sem það loksins datt inn um lúguna hjá okkur. Ég var eiginlega búin að gefa upp vonina.

Blaðið reyndist biðarinnar virði og ég hef nú þegar prófað tvær uppskriftir sem hafa báðar slegið í gegn hjá okkur. Þessar brownies með saltri karamellusósu er önnur uppskriftanna og hamingjan hjálpi mér hvað þær voru góðar. Ég bar þær fram í matarboði sem eftirrétt á skírdag og þær einfaldlega fullkomnuðu máltíðina. Klárlega bestu brownies sem ég hef á ævi minni smakkað og ég get ekki beðið eftir tækifæri til að bjóða upp á þær aftur.

Það má gera brownie-kökuna deginum áður. Setjið þá plast yfir hana og geymið við stofuhita. Karamellusósuna má gera með viku fyrirvara. Setjið hana í lokaðar umbúðir og kælið. Hitið hana upp áður en hún er borin fram.

Brownies með saltri karamellusósu (uppskrift úr Bon Appétit)

1 msk kakó
½ bolli (115 g) ósaltað smjör
85 g ósætt súkkulaði (með sem hæsta kakóinnihaldi, helst yfir 80%), hakkað
55 g suðusúkkulaði, hakkað
2/3 bolli hveiti
1 msk instant espresso kaffiduft
1/4 tsk gróft salt
2 stór egg
1 bolli sykur
1 tsk vanilludropar
1/3 bolli grófhakkað suðusúkkulaði

Hitið ofninn í 175°. Smyrjið kökuform sem er 20×20 cm og stráið kakó yfir það. Hellið því kakói frá sem ekki festist.

Bræðið smjör, ósætt súkkulaði og suðusúkkulaði saman í örbylgjuofni eða yfir vatnsbaði og hrærið blöndunni saman í slétt krem. Leggið til hliðar.

Hrærið hveiti, espressó dufti, grófu salti og 1 msk kakó saman í skál. Leggið til hliðar.

Hrærið egg og sykur saman í hrærivél (eða með handþeytara) á hröðustu stillingu þar til blandan verður ljós og þykk, um 2 mínútur. Hrærið vanilludropunum saman við. Hrærið súkkulaðiblöndunni varlega saman við og þar á eftir þurrefnunum. Passið að ofhræra ekki deigið heldur einungis hræra það saman þar til blandan er kekkjalaus. Hrærið 1/3 bolla af grófhökkuðu suðusúkkulaði saman við og setjið deigið í kökuformið.

Bakið þar til prjóni stungið í deigið kemur með mjúkri mylsnu upp, eða í 20-25 mínútur. Takið kökuna úr ofninum og látið kólna í forminu.

Sölt karamellusósa

1/2 bolli sykur
2 msk vatn
2 msk ósaltað smjör, skorið í litla bita
2 msk rjómi
sjávarsalt

Setjið sykur og vatn í lítinn pott og hitið á miðlungsháum hita (ég var með stillingu 5 af 9) þar til byrjar að sjóða. Hrærið í pottinum þar til sykurinn leysist upp. Þegar byrjar að sjóða í pottinum þá er hitinn hækkaður örlítið (ég hækkaði hann í stillingu 6) og hætt að hræra í pottinum. Veltið pottinum annað slagið og burstið niður með hliðunum með blautum pensli. Látið sjóða þar til sykurinn er orðinn fallega gylltur á litinn, það tekur 5-8 mínútur. Takið pottinn af hitanum og hrærið smjöri og rjóma saman við (blandan mun bullsjóða við þetta). Hrærið í pottinum þar til blandan er slétt. Látið karamellusósuna kólna aðeins í pottinum.

Skerið brownies-kökuna í bita, hellið volgri karamellusósunni yfir og stráið sjávarsalti yfir karamellusósuna.

Starbucks sítrónukaka

mars 18, 2013mars 18, 2013 ~ Svava ~ 22 athugasemd

Ég veit að ég ætti að vera snjöll og byrja vikuna á færslu með einhverri æðislegri hollustu en ég bara ræð ekki við mig. Ég get ekki hætt að hugsa um þessa fersku, mjúku sítrónuköku sem ég bakaði um daginn. Hún var himnesk og mig er búið að langa í hana á hverjum degi síðan. Ég set samt hendina á hjartað og lofa að hún var ekki í kvöldmat hjá okkur í kvöld. Það var fiskur og þið viljið ekki fá uppskriftina að honum. Ég lofa. Það sem þið eigið frekar eftir að vilja er uppskriftina að þessari dásamlegu köku því hún gerir lífið aðeins betra.

Þegar ég er erlendis þá má ég ekki sjá Starbucks stað án þess að vilja rjúka þangað inn. Ég lít þó ekki við kaffinu heldur er það sítrónuformkakan þeirra sem hrópar á mig. Ég man eftir því eins og það hafi gerst í gær þegar ég smakkaði hana fyrst. Mér fannst hún svo stórkostlega góð. Síðan þá hef ég verið veik fyrir henni og næ mér í sneið við hvert tækifæri sem gefst.

Ég rakst á uppskriftina að kökunni á netráfi mínu eitt kvöldið og hjartað tók auka slag þegar ég sá hana. Ég veit ekki af hverju ég hef ekki leitað að uppskriftinni áður en þarna bara var hún, Starbucks sítrónuformkakan.

Ég þori ekki að lofa að þetta sé sama kakan en þessi var svo góð að mér er í raun alveg sama. Þessi heimabakaða Starbuckskaka uppfyllir alla mínar sítrónukökulanganir og ríflega það.

Starbucks sítrónukaka

1 ½ bolli hveiti
½ tsk lyftiduft
½ tsk matarsódi
½ tsk salt
3 egg
1 bolli sykur
2 msk mjúkt smjör
1 tsk vanilludropar
2 tsk sítrónudropar
1/3 bolli sítrónusafi
½ bolli bragðdauf olía (ekki ólívuolía)
hýði af 1 sítrónu

Glassúr

1 bolli flórsykur
2 msk nýmjólk
½ tsk sítrónudropar

Kakan:

Hitið ofninn í 175° og smyrjið formkökuform vel.

Blandið hveiti, matarsóda, lyftidufti og salti saman í skál.

Hrærið saman í annari skál eggjum, sykri, smjöri, vanilludropum, sítrónudropum og sítrónusafa þar til hefur blandast vel. Hrærið blöndunni saman við þurrefnin og hrærið þar til deigið verður mjúkt. Bætið olíu og sítrónuhýði saman við og blandið vel. Setjið deigið í smurt formkökuform og bakið í 45 mínútur eða þar til prjóni sem er stungið í kökuna kemur hreinn upp.

Glassúr:

Hrærið öllu saman og hellið yfir kökuna.

Bananakaka með súkkulaðibitum

mars 12, 2013mars 12, 2013 ~ Svava ~ 9 athugasemd

Ég get fengið svakaleg æði fyrir sætindum og það er leitun að jafn miklum sælgætiskálfi og mér. Þessa dagana er ég með æði fyrir hlaupkörlum sem fást í Iceland og Dumlekaramellunum með hnetunum sem fást í flestum verslunum. Ég gæti í alvöru lifað á þessu. Síðan er ég með æði fyrir poppi sem fæst í Kosti. Ég þarf því að rúnta milli verslana til að fullkomna veisluna en finnst það algjörlega þess virði.

Um daginn fékk ég æði fyrir 70% súkkulaðinu frá Lindt og fyllti skápinn af því. Æðið gekk hins vegar jafn snögglega yfir og það kom og eftir sat ég með súkkulaðibyrgðir sem máttu gjarnan hverfa. Hver vill 70% súkkulaði þegar til eru hnetuhúðaðar Dumlekaramellur? Ekki ég.

Systir mín var nýbúin að senda mér uppskrift að bananaköku sem þeim hjónunum þótti svo góð að þau kláruðu heila köku á einu kvöldi. Þegar ég las yfir uppskriftina sá ég strax ástæðuna, það voru súkkulaðibitar í henni. Mér þykja súkkulaði og bananar vera ómótstæðileg blanda og fannst því upplagt að nýta súkkulaðið mitt í bananakökuna.

Okkur tókst líka að klára kökuna á einu kvöldi og fórum létt með það. Namm.

Bananakaka með súkkulaðibitum

2 dl sykur
2 tsk vanillusykur
3 egg
2 dl hveiti
1 tsk lyftiduft
100 g smjör
2 bananar
100 g dökkt súkkulaði

Hitið ofninn í 175°. Hrærið sykur, vanillusykur og egg saman þar til blandan verður létt. Hrærið hveiti og lyftidufti saman við ásamt mjúku smjöri. Stappið bananana og hakkið súkkulaðið og hrærið í deigið.

Setjið deigið í smurt formkökuform og bakið neðarlega í ofninum í ca 55 mínútur.

Kaffikaka með valhnetum og hlynsírópsglassúr

mars 2, 2013mars 3, 2013 ~ Svava ~ 6 athugasemd

Ég er hér enn þó það hafi ekki heyrst frá mér í heila viku. Við erum búin að vera í Svíþjóð og þó ég hafði ætlað mér að blogga þaðan þá fór það svo að ég leit aldrei hingað inn. Þeir sem fylgja mér á Instagram fengu þó daglegar uppfærslur.

Við áttum yndislega viku í fyrrum heimabæ okkar Uppsölum. Það er alltaf svo góð tilfinning að koma til Svíþjóðar og það var erfitt að kveðja og halda aftur heim.

Við náðum að nýta tímann vel og fórum m.a. tvær ferðir til Stokkhólms, út að borða, í bíó, hittum gamla vini, versluðum, sýndum strákunum dómkirkjuna í Uppsölum (sem er ólýsanlega falleg og ég fæ enn gæsahúð þegar ég hugsa um Luciutónleikana sem við fórum á þar ein jólin), fórum í risastórt leikland, á Vasasafnið, á Skansinn og nutum þess að vera með Unni, Friðrik og börnum.

Ég fór næstum því að gráta þegar ég sá þetta fallega bökumót frá Höganäs í Ittala outlettinu og fór í alvöru að gráta þegar ég kom heim og sá að það hafði brotnað á leiðinni. Ég vona að ég eigi eftir að eignast það aftur. Þá mun ég baka pæ á hverju kvöldi sem ég mun bera fram með góðum ís eða rjóma.

Það er alltaf mikil stemmning fyrir bókaútsölunum í Uppsölum. Þegar við bjuggum úti þá hófust þær á miðnætti og ég man eftir að hafa sent Ögga á miðnæturútsöluna með langan lista yfir matreiðslubækur sem ég varð að eignast. Núna vorum við svo heppin að útsölurnar byrjuðu daginn áður en við fórum heim. Við náðum að gera góð kaup og ég bind miklar vonir við nokkrar matreiðslubækur sem ég vona að eigi eftir að enda hér á blogginu. Meðal annars keypti ég bók með girnilegum pæuppskriftum sem hefðu notið sín vel í nýja forminu. Ég ætla samt ekki að gráta það meira…

Ég held að ég bæti upp fyrir fjarveru mína með þessari köku sem ég er búin að vera svo spennt fyrir að setja á bloggið. Hún er svo æðislega góð að mér finnst þið verða að baka hana til að eiga með helgarkaffinu. Ég get eiginlega lofað að þið eigið eftir að falla fyrir henni. Hér kláraðist kakan upp til agna á svipstundu og verður klárlega bökuð aftur fljótlega.

Kaffikaka með valhnetum og hlynsírópsglassúr (uppskrift frá Shutterbean)

Kaka:

1 ½ bolli smjör
1 ½ bolli sykur
1 ½ tsk vanilludropar
3 egg
1 ½ bolli sýrður rjómi
3 bollar hveiti
1 ½ tsk lyftiduft
½ tsk matarsódi
¼ tsk salt
1 bolli grófhakkaðar valhnetur
1 ½ tsk kanil
¾ bolli púðursykur
2 msk vanilludropar
2 msk vatn

Glassúr:

1 ¼ bolli flórsykur
½ bolli hlynsíróp (maple syrup)
1 tsk vanilludropar

Hitið ofninn í 165°.

Hrærið smjör og sykur saman þar til blandan verður ljós og létt. Bætið 1 ½ tsk af vanilludropum saman við og eggjunum, einu í einu og hrærið vel á milli. Hrærið sýrða rjómanum saman við. Sigtið hveiti, lyftiduft, matarsóda og salt saman og blandið saman við deigið.

Hrærið saman valhnetum, kanil og púðursykri í annari skál.

Smyrjið formkökuform (passið að hafa það í stærri kanntinum) og setjið 1/3 af deiginu í botninn á því. Stráið 1/3 af hnetublöndunni yfir. Endurtakið þar til komin eru þrjú lög af deigi og hnetublöndu (endið á hnetublöndunni). Hrærið vanilludropum ov vatni saman í skál og dreifið yfir efsta lagið af hnetublöndunni.

Bakið kökuna í 80 mínútur eða þar til prjóni stungið í kökuna kemur hreinn upp. Kælið kökuna áður en glassúrið er sett á.

Glassúr: Hrærið saman flórsykri, hlynsírópi og vanilludropum þar til blandan er slétt. Setjið yfir kökuna og njótið.

Ostakökubrownies með bismarkrjóma

febrúar 19, 2013febrúar 19, 2013 ~ Svava ~ 2 athugasemd

Ég fékk tölvupóst frá Svanhvíti systur minni sem býr í Kaupmannahöfn þar sem hún sagðist vera orðin langeyg eftir uppskrift að kökunni sem ég bauð henni og manninum hennar upp á þegar þau voru stödd hér á landinu um daginn. Maðurinn hennar var svo hrifinn af kökunni að hann hefur ekki hægt að hugsa um hana. Svanhvít ætlar því að baka hana fyrir hann og ég stekk að sjálfsögðu til og birti uppskriftina hér í einum grænum.

Ég fékk uppskriftina senda eins og bréf frá himnum eftir að hafa setið og velt því fyrir mér hvað ég ætti að hafa í eftirrétt handa þeim. Unnur, mágkona mín sem er búsett í Svíþjóð, hafði keypt sér matreiðslublað þar sem þessa uppskrift var að finna. Hún veit hvað ég er veik fyrir góðum kökum og ákvað því að taka mynd af uppskriftinni og senda mér. Ég hugsaði extra hlýtt til hennar að kvöldi sama dags þegar ég bar kökuna fram, aðeins of mikið bakaða en samt svo dásamlega góða.

Ostakökubrownies

Browniesdeigið:

200 g smjör
200 g dökkt súkkulaði
4½ dl flórsykur
1 tsk vanillusykur
3 egg
2 dl hveiti

Ostakökudeigið:

200 g rjómaostur
1 tsk vanillusykur
1 dl flórsykur
1 egg

Hitið ofninn í 175°. Bræðið smjörið. Hakkið súkkulaðið og látið það bráðna í smjörinu. Hrærið saman flórsykur, vanillusykur og egg. Hellið blöndunni í súkkulaðismjörið. Hrærið hveitinu varlega saman við.

Ostakökudeigið: Hrærið rjómaost, vanillusykur, flórsykur og egg saman þar til blandan verður slétt.

Setjið smjörpappír í skúffukökuform (ca 25×35 cm). Setjið súkkulaðideigið í formið. Hellið ostakökudeiginu yfir og blandið deigunum varlega saman með skeið. Bakið í miðjum ofni í 35-40 mínútur. Látið kólna í forminu og skerið svo í bita.

Bismarkrjómi

1 dl bismarkbrjóstsykur
3 dl þeyttur rjómi

Myljið bismarkbrjóstsykurinn fínt niður. Þeytið rjómann og blandið saman við bismarkmulninginn.

Súkkulaðikaka með þykkri súkkulaðisósu

febrúar 17, 2013febrúar 17, 2013 ~ Svava ~ 1 athugasemd

Ég hef varla stigið fæti inn í eldhús þessa vikuna og hef því ekki haft frá miklu að segja hér á blogginu. Ég hefði svo sem getað litið inn oftar, látið vita af mér og birt myndir frá hversdagsleikanum, en ég efast um að það sé áhugi fyrir því nema að það fylgi uppskrift með. Því fór sem fór og ég bæti það vonandi upp á næstu dögum.

Á sprengidag fórum við í árlegt matarboð til mömmu og borðuðum, eins og vera ber, á okkur gat. Mér finnst saltkjöt og baunir svo æðislega gott og mamma gerir það best af öllum. Á miðvikudagskvöldinu fór ég í saumaklúbb til Áslaugar vinkonu minnar og fékk alveg æðislegan mat, indverskan kjúklingarétt og karamellufylltar súkkulaðikökur með sjávarsalti, bornar fram með ís og berjum. Ég vildi óska þess að Áslaug fengist til að halda úti matarbloggi, þá værum við í góðum málum. Ég var ekki lengi að sníkja uppskriftirnar og hlakka til að borða þessar dásemdir aftur. Á fimmtudagskvöldinu fórum við Öggi með vinafólki okkar, Ernu og Óla, á Grillmarkaðinn. Maturinn þar er svo ótrúlega góður og ég gæti í alvöru lifað á sætkartöflufrönskunum þar. Vikan hefur því verið frábær matarvika hjá mér án þess að ég hafi haft neitt fyrir henni.

Um helgar er ég vön að baka köku til að eiga með kaffinu. Uppskriftina að þessari súkkulaðiköku fékk ég úr bók frá sænska kaffihúsinu Rosendals Trädgårdscafé. Þetta er ein af fjölmörgum matreiðslubókum sem ég keypti mér þegar við bjuggum í Svíþjóð og mér þykir alltaf jafn gaman að skoða hana. Uppskriftirnar eru girnilegar og hafa reynst vel. Þessi kaka var engin undantekning og það var barist um síðustu sneiðina. Ísköld mjólk er ómissandi með.

Súkkulaðikaka með þykkri súkkuklaðisósu

Kakan:

100 g smjör
1 ½ dl mjólk
2 egg
3 dl sykur
3 dl hveiti
2 tsk lyftiduft
2 ½ msk kakó
1 msk vanillusykur

Bræðið smjörið og blandið saman við mjólkina. Látið blönduna verða volga. Hrærið egg og sykur þar til blandan verður ljós og létt. Blandið saman hveiti, lyftidufti, kakói og vanillusykri og blandið saman við eggjablönduna á víxl með mjólkurblöndunni. Setjið deigið í smurt hringform (ca 23 cm). Bakið í 175° heitum ofni í ca 30 mínútur.

Súkkulaðisósan:

50 g smjör
1 dl mjólk
1½ tsk hveiti
2 msk sykur
1 msk kakó
kókos til að strá yfir kökuna

Bræðið smjörið í potti og hellið mjólkinni saman við. Blandið hveiti og sykri saman við kakóið. Setjið blönduna í pottinn og hrærið vel saman. Látið blönduna sjóða þar til hún er orðin að þykkri sósu. Hrærið stöðugt í pottinum og passið að sósan brenni ekki við botninn. Breiðið sósuna yfir kökuna þegar hún hefur aðeins kólnað og stráið kókos yfir.

Nutellaformkaka

febrúar 11, 2013febrúar 11, 2013 ~ Svava ~ 14 athugasemd

Gleðilegan bolludag! Ég vona svo sannarlega að bolludagurinn hafi verið ykkur ljúffengari en mér. Í gærkvöldi bakaði ég 10 stórar vatnsdeigsbollur og í morgun fór ég á fætur fyrir allar aldir til að setja á þær svo að krakkarnir gætu tekið með sér bollu í nesti í skólann. Ég hugsaði með mér að mikið yrði notalegt að koma heim úr vinnunni í dag og fá rjómabollu. Þegar ég kom heim mætti ég þó alsælum börnum með rjóma út á kinnar og galtómu kökufati.

Þar sem ég náði ekki að mynda eina einustu rjómabollu áður en þær kláruðust þá ætla ég að gefa uppskrift að annari dásemd, mjúkri Nutellaformköku, sem ég var með í kvöldkaffi í vikunni sem leið. Kökuna bakaði ég aðallega vegna þess að ég keypti mér nýtt kökuform sem mér þótti svo fallegt og langaði að prófa að baka í því. Krakkarnir voru að vonum ánægð með nýbakaða köku og kalda mjólk fyrir svefninn og voru á einu máli um að kakan væri stórgóð.

Nutellaformkaka

2 + 3/4 bolli hveiti (420 g)
2 ½ tsk lyftiduft
¼ tsk salt
1 bolli smjör við stofuhita (135 g)
2 bollar sykur (465 g)
4 stór egg
1 bolli Nutella (300 g)
1 bolli nýmjólk

Hitið ofninn í 175° og smyrjið formkökuform. Hrærið saman hveiti, lyftidufti og salti og leggið til hliðar. Hrærið saman í annarri skál smjör og sykur þar til blandan verður ljós og létt, það tekur um 3 mínútur. Hrærið einu eggi í einu saman við og þar á eftir Nutella. Setjið helminginn af þurrefnunum í deigið og helminginn af mjólkinni. Hrærið saman og endurtakið með afganginum af þurrefnunum og mjólkinni. Hrærið þar til allt hefur blandast en varist að hræra deigið of lengi.

Setjið deigið (sem er frekar þykkt) í smurða formkökuformið og bakið í 45-55 mínútur.

Mjúk amerísk súkkulaðikaka

febrúar 4, 2013febrúar 4, 2013 ~ Svava ~ 18 athugasemd

Það fjölgar jafnt og þétt í lesendahópnum hér á blogginu og í janúar voru heimsóknirnar rúmlega 200 þúsund. Ég býð nýja lesendur velkomna og þakka gömlum tryggðina. Ég get ekki þakkað nógu vel fyrir mig og mun seint geta lýst því hvað þið bæði gleðjið mig og gefið mér mikið. Takk og aftur takk ♥

Laugardagurinn var viðburðamikill og þeir sem fylgja mér á Instagram gátu fylgst með reglulegum uppfærslum frá júróvisjónkvöldinu okkar. Við byrjuðum daginn eldsnemma á fimleikamóti þar sem Gunnar nældi sér í gullverðlaun og enduðum daginn á sigri í söngvakeppninni. Eftir keppnina fögnuðum við með hópnum á Tapasbarnum og þegar leið á nóttina sóttum við Malínu og sofandi englakroppa úr pössun og bárum heim.

Gærdagurinn fór í það að slappa af og njóta þess að gera ekki neitt. Við vorum uppgefin og hvíldin var kærkomin. Við gerðum vel við okkur og fengum okkur súkkulaðiköku sem okkur þykir betri en allt gott. Hún er mjúk, með miklu súkkulaðibragði og dásamleg í alla staði. Kakan geymist vel og helst mjúk þar alveg þar til hún er búin.

Mjúk amerísk súkkulaðikaka

3 bollar hveiti
2½ bolli sykur
1 msk + 1 tsk matarsódi
½ tsk salt
1 bolli kakó
1 + 1/3 bolli canola olía (eða önnur bragðdauf olía)
1 ½ bolli buttermilk (ég set 1 msk af sítrónusafa í bolla, fyllti hann svo af mjólk og læt blönduna standa í 10 mínútur (geri 1 ½ porsjón fyrir þessa uppskrift). Það má þó líka nota súrmjólk í staðinn fyrir buttermilk)
3 stór egg
1 ½ bolli nýuppáhellt sterkt kaffi
1 tsk vanilludropar

Hitið ofninn í 175°. Smyrjið 2 bökunarform og setjið bökunarpappír í botninn á þeim.

Setjið hveiti, sykur, matarsóda, salt og kakó í hrærivélaskál og hrærið saman. Með hrærivélina stillta á hægan hraða er olíu og buttermilk hrært saman við þurrefnin og þar á eftir eggjunum, einu í einu. Hrærið heitu kaffi í mjórri bunu saman við og að lokum vanilludropum. Hrærið saman þar til blandan er slétt og kekkjalaus. Skiptið deiginu í bökunarformin og bakið í 30-35 mínútur eða þar til prjóni stungið í kökurnar kemur með mjúkri mylsnu upp.

Súkkulaðikrem

680 g suðusúkkulaði
1 ½ bolli rjómi

Grófhakkið súkkulaðið og setjið ásamt rjómanum í skál yfir vatnsbaði. Leyfið súkkulaðinu að bráðna og hrærið síðan í blöndunni með píski. Látið kremið kólna áður en það er sett á kökuna (kremið þykkist við það).

Súkkulaðikaka með söltu karamellufrosting

janúar 27, 2013janúar 27, 2013 ~ Svava ~ 17 athugasemd

Það eru margar vikur síðan ég rakst á uppskriftina að þessari köku og hún hefur átt hug minn allan síðan. Ég held í hreinskilni sagt að það hafi varla liðið sá dagur síðan ég sá uppskriftina að ég hafi ekki hugsað um hana og látið mig dreyma um sneið. Ég hefði auðvitað átt að vera búin að baka kökuna löngu fyrr en mig hefur hreinlega vantað tilefni til þess.

Þegar ég sat um daginn og lét mig dreyma um kökuna tók ég ákvörðum. Ef lagið hans Ögga færi áfram í söngvakeppninni þá myndum við fagna með þessari köku. Ef lagið færi ekki áfram myndum við hressa okkur við með þessari köku. Það var því nokkuð ljóst að ég væri loksins að fara að fá kökuna og ég hef hlakkað til alla vikuna.

Ég er sjúk í salta karamellu og það er ekki annað hægt en að elska súkkulaði. Það liggur því í augum uppi að þessi kaka er ekkert annað en dásamleg. Það væri þó hrein lygi að halda því fram að kakan sé hrist fram úr erminni því það liðu rúmir tveir tímar frá því að ég hóf baksturinn þar til hún stóð á borðinu. Æ, mér var svo sem alveg sama. Deigið var svo gott og það er alltaf gaman að gera karamellu. Það er því óhætt að segja að mér leiddist ekki verkið og ég uppskar hreinan draum að því loknu.

Súkkulaðikaka með söltu karamellufrosting (uppskrift frá Inu Garten)

180 g ósaltað smjör við stofuhita
2/3 bolli sykur
2/3 bolli ljós púðursykur
2 extra stór egg (ég var með 3 meðalstór)
2 tsk vanilludropar
1 bolli buttermilk (ég setti 1 msk af sítrónu í bolla og fyllti hann svo af mjólk. Lét blönduna síðan standa í 10 mínútur. Það má líka nota súrmjólk í staðinn fyrir buttermilk)
½ bolli sýrður rjómi
2 msk kaffi (uppáhellt)
1 og 3/4 bolli hveiti
1 bolli kakó
1 ½ tsk matarsódi
½ tsk gróft salt

Hitið ofninn í 175° og smyrjið þrenn 20 cm bökunarform.

Hrærið smjör, sykur og ljósan púðursykur saman í hrærivél á hröðum hraða í 5 mínútur. Blandan á þá að vera orðin ljós og létt. Lækkið hraðann í miðlungshraða og bætið eggjunum út í, einu í einu. Hrærið vanilludropum saman við.

Hrærið saman, í annarri skál, buttermilk, sýrðum rjóma og kaffi.

Sigtið saman í þriðju skálinni hveiti, kakói, matarsóda og salti.

Hrærið vökvablöndunni og þurrefnablöndunni á víxl saman við smjör og sykurblönduna með hrærivélina stillta á hægan hraða. Byrjið á að hræra vökvablöndunni og endið á þurrefnablöndunni. Hrærið þar til allt hefur blandast. Skiptið deiginu á milli bökunarformanna og bakið í 20-25 mínútur, eða þar til prjóni stungið í miðjar kökurnar kemur hreinn upp. Látið kökurnar kólna alveg áður en kremið er sett á.

Söltuð karamella

1 bolli sykur
4 msk vatn
2 tsk síróp
½ bolli rjómi
2 msk smjör
½ tsk sítrónusafi
½ tsk gróft salt eða sjávarsalt

Setjið sykur, vatn og síróp í pott og hitið við miðlungshita. Hrærið þar til sykurinn er uppleystur, setjið lok á pottinn og látið hitna í 3 mínútur. Takið lokið af pottinum og hækkið hitann í miðlungsháan og látið suðuna koma upp. Ekki hræra í pottinum en veltið karamellunni reglulega um hann svo að hún brenni ekki. Látið karamelluna sjóða þar til hún fær fallegan gylltan lit (það tekur nokkrar mínútur). Takið af hitanum og látið standa í 30 sekúndur. Hellið rjómanum saman við karamelluna og passið vel að brenna ykkur ekki. Blandan mun krauma og er brennandi heit. Hrærið rjómanum og karamellunni saman og bætið smjöri, sítrónusafa og salti saman við. Hrærið allt vel saman. Takið 1 bolla af karamellunni frá (ath. að karamellan er þunn) og látið standa í um 20 mínútur. Hún þykknar aðeins þegar hún kólnar.

Salt karamellufrosting

225 g smjör við stofuhita
225 g rjómaostur
3-4 bollar flórsykur
1 bolli sölt karamella (uppskriftin hér að ofan)

Hrærið smjör og rjómaost saman þar til blandan er mjúk. Bætið 2 bollum af flórsykri saman við og hrærið saman. Setið söltu karamelluna saman við og hrærið saman. Bætið við því sem eftir er af flórsykrinum þar til óskaðri áferð er náð.