Appelsínuformkaka með súkkulaðibitum

janúar 12, 2013janúar 12, 2013 ~ Svava ~ 1 athugasemd

Ég tók forskot á helgarbaksturinn í gær og bakaði þessa appelsínuformköku með súkkulaðibitum til að eiga með kaffinu. Uppskriftina sá ég hjá Joy the Baker og hugsaði strax með mér að Malín ætti eftir að verða hrifin af henni. Hún elskar appelsínur og súkkulaði og velur sér oftast appelsínusúkkulaði sem laugardagsnammi. Það lék því ekki nokkur vafi á því að þessi kaka ætti eftir að skora hátt hjá henni.

Það er helst frá því að segja að það mun engin fá sneið af kökunni með kaffibollanum þessa helgina því kakan er búin. Hún kláraðist strax í gær og skyldi engan sem smakkaði hana furða. Hún var dásamlega góð og við erum ákveðin í að baka hana fljótlega aftur.

Eins og með aðra sítrusávexti þá þykir mér svo mikilvægt þegar verið er að rífa hýðið af að taka bara þunnt lag. Haldið á ávextinum í annarri hendi og rennið mjúklega með rifjárninu yfir hann með hinni hendinni. Þið finnið um leið hvað það kemur góð lykt við þetta, allt önnur en þegar hvíta skorpan kemur með. Í þessa uppskrift notaði ég hýði af tveimur appelsínum.

Appelsínuformkaka með súkkulaðibitum

2 bollar hveiti
1 ½ tsk lyftiduft
½ tsk salt
1 ½ bolli sykur
2 msk appelsínuhýði (passið að taka bara efsta lagið svo það komi ekki beiskt bragð)
225 g rjómaostur
3/4 bolli smjör við stofuhita
4 stór egg
2 tsk vanilludropar
1 bolli grófhakkað dökkt súkkulaði

Hitið ofninn í 165°. Hrærið saman hveiti, lyftidufti og salti og setjið til hliðar.

Setjið sykur í skál. Rífið appelsínuhýðið (bara efsta lagið) og blandið því saman við sykurinn. Hrærið vel saman svo sykurinn fái bragð af appelsínuhýðinu. Setjið til hliðar.

Hrærið saman smjör og rjómaost. Skrapið reglulega niður með hliðum skálarinnar og passið að allt blandist vel. Bætið appelsínusykrinum saman við og hrærið á miðlungshraða í um 3 mínútur. Bætið eggjum saman við, einu í einu, og hrærið í 1 mínútu á milli. Hrærið vanilludropum saman við.

Bætið öllum þurrefnunum saman við og hrærið saman á hægum hraða þar til allt hefur blandast vel. Hrærið súkkulaðibitunum varlega saman við með sleif.

Setjið deigið í smurt formkökuform (mér þykir best að nota PAM-sprey). Bakið í 50-65 mínútur, eða þar til prjóni stungið í kökuna kemur hreinn upp. (Joy bendir á að sumir lesenda hennar hafi þurft að baka kökuna í allt að 75 mínútur og bendir þá á að leggja álpappír yfir hana í lokin til að kakan verði ekki of dökk. Ég lenti þó ekki í vandræðum með þetta heldur dugði mér að baka hana í 65 mínútur með engum álpappír).

Sveppapasta

janúar 11, 2013janúar 12, 2013 ~ Svava ~ 12 athugasemd

Mér stóð fullur vilji til að blogga í gær en þegar til kastanna kom þá neitaði tölvan allri samvinnu. Nú er hún komin í viðgerð hjá Apple og ég vonast til að fá hana sem fyrst aftur því hennar er sárlega saknað.

Það varð því hálfgerður vandræðagangur á mér í gær og ég vissi ekki hvernig ég ætti að snúa mér í tölvuleysinu. Vissulega gæti ég bloggað úr símanum eða ipadnum en ég veit ekki hvernig ég set myndirnar þá inn. Ég ákvað því að leggjast undir feld og sofa á vandamálinu. Í morgun þegar ég vaknaði var lausnin svo augljós að ég skil ekki af hverju ég sá hana ekki strax. Til að gera langa sögu stutta þá hef ég núna komið mér fyrir í meyjarskemmunni í borðtölvunni sem Malín fékk að taka yfir um árið. Ég gæti vel vanist því að blogga héðan, umvafin bleikum veggjum með myndum eftir Lovisu Burfitt, ilmvatnsglösum og pjattrófubókum, og það er ekkert víst að ég fari þegar ég fæ tölvuna mína aftur.

Við vorum með einfaldan og fljótgerðan pastarétt í gær sem var mjög góður. Jakob hjálpaði til en hann er sá sem sýnir eldamennskunni mestan áhuga af börnunum og skottast iðulega í kringum mig í eldhúsinu. Í gær skar hann sveppina og laukinn, hrærði í pönnunni og smakkaði sósuna til. Við vorum sammála um að það hefði vel til tekist og borðuðum af bestu lyst. Með pastanu bárum við fram nýbakað New York-Times brauð sem ég hef svo oft talað um á hér á blogginu. Í gær bragðbættum við það með parmesan- og basilikusaltinu frá Nicolas Vahé sem fór vel með pastaréttinum.

Sveppapasta (uppskrift úr Sweet Paul magazine)

250 g sveppir
1 laukur
2 hvítlauksrif
2 msk ólívuolía
½ bolli vatn
1 ½ bolli rjómi
1 kjúklingateningur
gott salt og nýmalaður pipar

Sjóðið spaghetti fyrir 4-5 samkvæmt leiðbeiningum á pakkningu.

Skerið sveppina í tvennt, saxið laukinn og hvítlaukinn. Hitið 2 msk ólívuolíu á pönnu og látið sveppina og laukana steikjast við miðlungsháan hita (ég notaði stilligu 7 af 9) þar til laukurinn er orðinn mjúkur. Hellið vatni og rjóma yfir og setjið kjúklingatening út í. Látið sjóða við vægan hita í 5 mínútur. Smakkið til með salti og pipari.

Hellið vatninu af spaghettíinu (geymið ca ½ bolla af vatninu) og blandið spaghettíinu saman við sveppasósuna. Setjið smá af spaghettívatninu saman við og hrærið vel saman.

Berið fram með ferskrifnum parmesan osti og brauði.

Papriku- og kartöflusúpa með fetaostmulningi

janúar 9, 2013janúar 9, 2013 ~ Svava ~ 2 athugasemd

Eftir allan hátíðarmatinn var okkur farið að dreyma um létta máltíð og súpa og brauð var efst á óskalistanum. Það vildi mér til happs að ég rakst á uppskrift að papriku- og kartöflusúpu með fetaostmulningi þegar ég var að skoða myndir í símanum mínum. Ég tek oft myndir á símann þegar ég rekst á spennandi uppskriftir og þessa uppskrift hafði ég séð í dönsku blaði (sem ég þori eiginlega að veðja á að hafi verið Spis Bedre). Ég ákvað að prófa að elda súpuna og hún vakti stormandi lukku. Með súpunni bar ég fram New York Times-brauðið sem er alltaf jafn gott og svo ótrúlega einfalt að baka.

Þeir sem fylgjast með mér á Instagram eru þegar búnir að sjá mynd af herlegheitunum en hér kemur uppskriftin fyrir þá sem vilja prófa.

Papriku- og kartöflusúpa

1 laukur
4 miðlungsstórar kartöflur
4 rauðar paprikur
2 kjúklingateningar (ég notaði 1 kjúklinga- og 1 grænmetistening)
ólífuolía
1 tsk salt
nýmalaður pipar

Til skrauts

150 g fetaostur (fetakubbur sem er mulinn niður)
1 msk ólífuolía
fersk steinselja eða mynta (eða 2 tsk þurrkuð mynta)

Hitið 1 líter að vatni að suðu. Hakkið laukinn, skrælið kartöflurnar og skerið í þunnar sneiðar. Hreinsið paprikuna og skerið þær í strimla.

Stekið laukinn í 2 msk af ólívuolíu í stórum potti í 3 mínútur. Bætið kartöflum í pottinn og steikið áfram í 3 mínútur. Bætið papriku í pottinn og steikið áfram í aðrar 3 mínútur. Myljið teninga yfir og hellið helmingnum af soðna vatninu yfir. Látið sjóða við vægan hita í 10 mínútur.

Takið pottinn af hitanum og maukið súpuna með töfrasprota. Þynnið súpuna með því sem eftir var af soðna vatninu þar til óskaðri þykkt er náð. Kryddið með salti og pipar.

Hakkabuff með fetaosti

janúar 8, 2013janúar 16, 2013 ~ Svava ~ 23 athugasemd

Í gærkvöldi bauð mamma okkur í lambalæri sem hún bar fram með kartöflugratíni og salati. Í eftirrétt hafði hún bakað danska eplaköku sem var, að sjálfsögðu, borin fram með rjóma (því mamma elskar rjóma…. og allt danskt). Ég gæti vel vanist því að vera boðin í svona veislu á hverjum mánudegi og þótti þetta þvílíkur hversdagslúxus. Ég nýtti tækifærið og fékk uppskrift að súkkulaðimúsinni hennar mömmu sem krakkarnir elska og eru alltaf að biðja hana um að gera. Ég ætla að setja hana hingað inn við tækifæri.

Núna ætla ég hins vegar að gefa uppskrift að ljúffengu hakkabuffi. Þessi hakkabuff mega gjarnan vera oftar á disknum mínum því mér þykja þau svo bragðgóð og ljúffeng. Það er eitthvað notalegt við þau og krakkarnir borða buffin alltaf af bestu lyst. Með soðnum kartöflum og sultu verða þau að dýrindismáltíð sem er einfalt að útbúa og allir kunna að meta.

Hakkabuff með fetaosti

700 g nautahakk eða blanda af nauta- og svínahakki
2 hvítlauksrif
1 egg
2 tsk þurrkað oregano
150-200 g mulinn fetaostur
salt og pipar
smjör til að steikja upp úr

Sósa

2 msk smjör
1/2 dl vatn
3 dl rjómi
2-3 msk kalvfond (eða grænmetisteningur)
maizena
salt og pipar
smá rifsberjahlaup (má sleppa)

Blandið hráefninu í buffin vel saman (mér þykir gott að setja allt í hrærivélina) og mótið stór buff úr þeim. Steikið buffin á pönnu upp úr vel af smjöri. Á meðan er ofninn hitaður í 125°. Þegar buffin eru tilbúin eru þau sett í eldfast mót og inn í ofn til að halda þeim heitum.

Steikarsoðið af buffunum er notað í sósuna. Þegar öll buffin hafa verið steikt er væn smjörklípa sett á pönnuna. Bætið vatni og rjóma á pönnuna og smakkið til með kalvfond, salti og pipar. Mér þykir stundum gott að setja smá af rifsberjahlaupi í sósuna en því má sleppa. Að lokum er sósan þykkt með maizena . Leggið buffin í sósuna og látið þau sjóða í sósunni um stund við vægan hita.

Berið buffin fram með soðnum kartöflum og sultu.

Lambafilé, kramdar kartöflur með parmesan gremolata og sveppasósa með piparosti

janúar 7, 2013janúar 16, 2013 ~ Svava ~ 4 athugasemd

Við látum ekki tækifæri til að fagna fara til spillis hér á heimilinu og héldum þrettándan hátíðlegan með veislu sem hefði hæft kóngi og öllu hans föruneyti. Að vísu var veislan fásetin þar sem engum gestum var boðið til hennar öðrum en fjölskyldumeðlimum. Ég hefði þó ekki getað hugsað mér betri félagsskap og þykja satt að segja konungsfjölskyldur fölna í samanburði (sem ég hef þó almennt mikið dálæti á).

Á matseðlinum var lambafilé með ofnbökuðum kartöflum og sveppasósu. Þvílík veisla og ó, hvað við borðuðum yfir okkur. Lambakjötið var svo meyrt og bragðgott, enda búið að liggja í mareneringu í sólarhring. Kartöflurnar voru, eins og unglingurinn orðaði það, klikkaðar og sósuna hefði ég getað borðað eina og sér. Og matur sem ég taldi duga í tvær máltíðir kláraðist upp til agna því enginn gat hætt að borða. Restinni af kvöldinu eyddum við, gjörsamlega afvelta, í að horfa á The Holiday og vorum öll á einu máli um að þetta væri góður endir á þessari síðustu jólaveislu í bili.

Marenering fyrir lambakjöt

2 rósmarínkvistar, stöngullinn fjarlægður og nálarnar hakkaðar
4 hvítlauksrif, pressuð
4 tsk Dijonsinnep
0,5 dl ólívuolía
salt
pipar

Blandið öllu saman. Látið kjötið og marineringuna í plastpoka (nuddið marineringunni á kjötið) og látið standa í ískáp í sólarhring. Brúnið kjötið á pönnu og setjið síðan í ofn við 150°. Eldunartíminn fer eftir bita af lambinu. Ef kjötið á að vera ljósrautt er ágætt að miða við 67° á kjöthitamæli.

Kramdar kartöflur með parmesan og steinselju

1 kg kartöflur
1/2 bolli ólívuolía
1 tsk sjávarsalt
3 hvítlauksrif, afhýdd, kramin og söxuð
1/2 bolli fersk steinselja, hökkuð (er um 1/4 bolli eftir að hún hefur verið hökkuð)
rifið hýði af 1 sítrónu (passið að raspa léttilega á sítrónuna þannig að það komi ekkert hvítt með)
1/4 bolli rifinn parmesanostur

Hitið ofninn í 200°. Skolið kartöflurnar og sjóðið þar til þær eru tilbúnar, um 20 mínútur. Hellið af kartöflunum og látið þær þorna í sigti eða á viskastykki.

Sáldrið ólívuolíu yfir bökunarplötu og leggið kartöfurnar í einföldu lagi á plötuna. Passið að þær liggi allar á ólívuolíunni. Þrýstið botni á skál eða glasi ofan á kartöflurnar þannig að þær kremjist. Sáldrið ólívuolíu yfir og bakið í 30 mínútur, eftir 15 mínútur í ofninum er þeim snúið við.

Blandið saman söxuðum hvítlauk, hakkaðri steinselju, fínrifnu sítrónuhýði og parmesanosti í skál. Þegar kartöflurnar eru tilbúnar eru þær settar í skál og velt upp úr blöndunni. Berið strax fram.

Sveppasósa með piparosti

250 g sveppir, skornir í sneiðar
1/2 l rjómi
1/2-1 piparostur, skorin í smáa bita
grænmetisteningur
smá cayenne pipar
smjör
ólívuolía

Bræðið smjör og ólívuolíu saman í potti. Látið sveppina malla í smjörblöndunn í um 5 mínútur (ekki hafa of háan hita). Hellið rjóma yfir og bætið piparosti saman við. Látið sjóða saman við vægan hita um stund. Bætið grænmetisteningi í pottinn og kryddið með örlitlu af cayenne pipar.

Kaffikaka með súkkulaði

janúar 6, 2013janúar 7, 2013 ~ Svava ~ 5 athugasemd

Við nýttum gærdaginn til dundurs hér heima við. Öggi og Pétur unnu í júróvisjónlaginu þeirra og ég týndi niður jólaskrautið. Eins og mér þykir alltaf gaman að skreyta á aðventunni þá get ekki ekki beðið eftir að losna við skrautið eftir áramót. Núna liggur það á sínum stað í geymslunni og heimilið hefur fengið upplyftingu með nýjum blómum á stofuborðinu.

Í þessum rólegheitum þótti mér ekki annað hægt en að baka köku til að eiga með kaffinu. Ég hef ekki getað hætt að hugsa um kaffiköku sem ég sá á íslensku matarbloggi um daginn sem Kristín Gróa heldur úti, Lúxusgrísir í Florida. Bloggið fann ég fyrir tilviljun í gegnum Instagram, hvar ég fer hamförum þessa dagana, og reyndist mikill fundur. Vorum við og Pétur, sem lenti hér óvænt í kökuboði, öll á einu máli um að kakan væri stórgóð, svo góð að ég stóðst ekki mátið að fá mér aftur sneið af henni eftir morgunverðinn í morgun. Namm!

Kaffikaka með súkkulaði

Botninn:

1 ¼ bolli heitt kaffi
1 bolli kakó
2 ½ bolli hveiti
1¼ tsk salt
2 ½ tsk matarsódi
2 bollar sykur
3 stór egg
1¼ bolli sýrður rjómi
1 bolli + 2 msk grænmetisolía

Kremið:

170 g smjör (helst ósaltað)
170 g suðusúkkulaði
4 msk kaffi
1/3 bolli sýrður rjómi

Hitið ofninn í 175°.

Setjið kaffi og kakó saman í skál og hrærið saman þar til blandan er orðin kekkjalaus. Setjið til hliðar.

Sigtið hveiti, salt og matarsóda saman í aðra skál og setjið til hliðar.

Hrærið sykur og egg saman þar til blandan verður þykk og ljós. Bætið sýrðum rjóma og olíu saman við og hrærið varlega saman. Hrærið þurrefnunum varlega saman við og að lokum er kaffiblandan hrærð varlega út í.

Smyrjið stórt hringlaga bökunarform vel (ég spreyjaði vel af PAM í formið) og hellið deiginu í. Bakið í 45-60 mínútur eða þar til prjóni stungið í kökuna kemur þurr upp.

Látið kökuna kólna í forminu í 20 mínútur. Hvolfið kökunni þá á grind og látið hana kólna alveg áður en kremið er sett á.

Kremið:

Bræðið saman smjör og súkkulaði í skál yfir vatnsbaði. Takið skálina af hitanum og leyfið að kólna aðeins. Hrærið 2 msk af kaffi saman við, þá sýrða rjómanum og að lokum seinni 2 msk af kaffinu. Ég lenti í sömu vandræðum og Kristín Gróa, þ.e. að kremið varð mjög þunnt á þessu stigi og fylgdi hennar ráði um að setja það inn í ískáp og hræra reglulega í því svo það stífni jafnt.

Smyrjið kreminu á kökuna. Ég hafði ekki þolinmæði í að láta kökuna kólna alveg og kremið bráðnaði því aðeins á henni. Það kom þó ekki að sök, kakan var stórgóð og kremið líka.

Pretzelvafðar pylsur

janúar 5, 2013janúar 5, 2013 ~ Svava ~ 13 athugasemd

Um daginn þegar ég var að skoða matarblogg þá rakst ég á þessa uppskrift að pretzelvöfðum pylsum hjá Joy the baker. Hún sagði uppskriftina vera eina af sínum uppáhalds frá árinu sem leið og almáttugur hvað ég varð spennt að prófa hana. Við ákváðum að þetta væri kjörin laugardagsmatur og til að kóróna herlegheitin skellti ég kartöfluhelmingum í ofn og bar fram með. Hamingjan var fullkomin, jafnt hjá okkur Ögga sem og börnunum. Þetta verða allir að prófa.

Pretzelvafðar pylsur

1 ½ bolli heitt vatn (um 40°)
1 msk sykur
2 ¼ teskeið ger
620 g hveiti (um 4 ½ bolli)
2 tsk salt
2 msk smjör, brætt og kælt
um 14 bollar vatn
1 bolli matarsódi
1 stórt ekk, hrært með smá skvettu af vatni
gróft salt og pipar

Setjið vatn og sykur í skál og stráið gerinu yfir. Látið standa í 5 mínútur. Blandan byrjar að freyða, ef það gerist ekki skuluð þið henda henni og byrja upp á nýtt.

Þegar blandan hefur staðið í 5 mínútur og er byrjuð að freyða er hveiti, salti og bræddu smjöri bætt saman við. Notið deigkrók á hrærivél og hrærið hægt þar til allt hefur blandast saman. Aukið hraðan í miðlungshraða og hnoðið deigið þar til það er orðið mjúkt og losnar frá hliðum skálarinnar og myndar bolta um deigkrókinn. Hnoðið á miðlungshraða í um 4 mínútur.

Takið deigið úr skálinni (það ætti að vera mjúkt og örlítið klístrað), smyrjið hana með grænmetisolíu og setjið deigið aftur í hana. Setjið plastfilmu yfir skálina og látið deigið hefast á hlýjum stað þar til það hefur tvöfaldað stærð sína (um klukkustund).

Hitið ofninn í 220°. Klæðið tvær ofnskúffur með bökunarpappír og smyrjið þær með grænmetisolíu. Þetta er mikilvægt til að pretzelpylsurnar festist ekki við hann.

Setjið vatn og matarsóda í stóran pott og látið suðu koma upp. Á meðan suðan er að koma upp er degið sett á olíuborið borð. Skiptið deiginu í 8-16 bita (eftir því hvort þið ætlið að hafa pylsurnar 8 heilar eða 16 hálfar). Rúllið deigbútunum út í renninga, ca 30 cm langa fyrir hálfar pylsur og 60 cm fyrir heilar. Snúið deiginu utan um pylsurnar og passið að loka endunum vel.

Þegar vatnið er byrjað að sjóða eru deigpylsurnar settar varlega út í og soðnar í 30 sekúndur. Takið varlega upp úr með spaða og setjið á bökunarpappírinn. Burstið með upphrærðu eggi og stráið grófu salti og nýmöluðum pipar yfir.

Setjið í ofninn og bakið þar til deigið verður fallega gyllt, um 12-14 mínútur. Berið heitt fram.

Ef það verður afgangur af pretzelpylsunum þá eru þær settar í plastfilmu og geymdar í ískáp. Þegar það á að bera þær aftur fram eru þær færðar yfir í álpappír, lokað fyrir og hitað í 175° heitum ofni í 12 mínútur, eða þar til þær eru heitar í gegn.

Spaghettí með ofnbökuðu beikoni í hvítlauksolíu

janúar 4, 2013janúar 4, 2013 ~ Svava ~ 5 athugasemd

Við erum ósköp löt eftir þessa stuttu vinnuviku. Það er alltaf jafn erfitt að þurfa að vakna aftur og gera eitthvað af viti eftir svona góð frí. Í kvöld nennti ég ómöglega að standa í eldhúsinu en eins og svo oft áður langaði okkur samt í eitthvað gott.

Ég leitaði í smiðju Nigellu og fann þessa einföldu uppskrift sem reyndist bjargvættur okkar í kvöld. Og þvílík dásemd sem þessi réttur var. Með svona fáum hráefnum og lítilli fyrirhöfn voru væntingarnar ekki miklar og því kom skemmtilega á óvart hvað rétturinn reyndist góður. Strákarnir voru yfir sig hrifnir og eftir matinn báðu þeir mig um að elda réttinn fljótlega aftur. Það þarf ekki að vera flókið til að vera gott.

Spaghettí með ofnbökuðu beikoni í hvítlauksolíu

2 msk hvítlauksólívuolía
250 g beikon
250 g spaghetti
steinselja (má sleppa)
ferskur parmesanostur (má sleppa)

Hitið ofninn í 240°. Fyllið stóran pott af vatni og látið suðuna koma upp.

Setjið hvítlauksólívuolíu í botn á ofnskúffu eða eldföstu móti. Skerið beikon í bita og blandið saman við olíuna, reynið að láta hana þekja allt beikonið.

Þegar vatnið byrjar að sjóða er spaghettíið sett í pottinn og beikonið sett í ofninn. Spaghettíið og beikonið þurfa svipaðan eldunartíma, ca 10 mínútur.

Þegar spaghettíið er fullsoðið er 1 bolli af spaghettívatninu lagður til hliðar og restinni hellt af. Takið beikonið úr ofninum og bætið spaghettíinu í ofnskúffuna. Blandið vel saman og bætið spaghettívatninu sem var lagt til hliðar varlega saman við. Byrjið smeð smá og bætið við eftir þörfum.

Það er gott að bera réttinn fram með ferskri steinselju og ferskrifnum parmesan og mér þykir nauðsynlegt að mylja svartan pipar yfir hann.

Marensrúlla með ástaraldin

janúar 3, 2013apríl 30, 2013 ~ Svava ~ 19 athugasemd

Við byrjum nýja árið með brakandi ferska túlípana á stofuborðinu. Eftir áramótin vil ég alltaf fríska upp á heimilið og mér þykja skjannahvítir túlípanar svo sannarlega gera það. Þó að þessir túlípanar hafa staðið á stofuborðinu í heila viku eru þeir enn ferskir og fallegir. Ég held að galdurinn við að láta þá standa lengi sé að hafa alltaf lítið og kalt vatn á þeim og lauma klökum reglulega í vatnið. Það hefur í það minnsta reynst mér vel.

Þó það séu eflaust allir komnir með nóg af sætindum í bili þá get ég ekki staðist að setja inn uppskriftina að hinum eftirréttinum frá áramótunum, marensrúllunni með ástaraldin. Mér finnst bara ekki hægt að kveðja áramótin án þess að deila þessari uppskrift með ykkur. Þar að auki óskaði blogglesandi eftir uppskriftinni og ég gef því uppskriftina með sérlega mikilli gleði.

Þessi marensrúlla er í miklu uppáhaldi hjá okkur og þegar Malín fermdist síðasta vor þá óskaði hún eftir henni á veisluborðið. Ég byrjaði að dunda mér við að baka þær tveimur vikum fyrir ferminguna og fannst góð tilfinning að eiga marensrúllurnar tilbúnar í frystinum á lokaspretti fermingarundirbúningsins.

Marensrúllan er fastur liður á eftirréttaborðinu um áramót hjá okkur og það má alls ekki sleppa henni. Bæði börn og fullorðnir elska hana enda er hún bæði sæt og fersk á sama tíma. Yfirleitt skreyti ég hana með jarðaberjum eða hindberjum en við gleymdum að kaupa berin um þessi áramót. Það breytti engu því kakan er hreinn draumur og þarf engin ber, nema þá helst til skrauts.

Marensrúlla með ástaraldin

4 stórar eggjahvítur
3 dl sykur
hjartarsalt á hnífsoddi
1 ½ bolli Rice krispies

Þeytið eggjahvítur, sykur og hjartarsalt saman í drjúga stund. Hrærið Rice krispies varlega saman við með sleif. Setjið á bökunarplötu sem hefur verið klædd með bökunarpappír og látið deigið mynda eins stóran ferhyrning og platan ber. Bakið við 135° (ekki blástur) í 50 mínútur. Takið úr ofninum og látið kólna.

½ líter rjómi
5 ástaraldin

Takið marensinn af smjörpappírnum og snúið á hvolf. Smyrjið rjómanum yfir og innihaldinu úr ástaraldinum er dreift yfir rjómann. Marensinum er rúllað upp frá langhliðinni. Fallegt að skreyta rúlluna með ástaraldin eða jafnvel jarða- eða hindberjum.

Ísbaka með bourbon karamellu.

janúar 1, 2013desember 31, 2013 ~ Svava ~ 18 athugasemd

Við höfum undanfarin ár boðið gestum hingað til okkar um áramót í kalkún. Ég geri alltaf tvenna eftirrétti fyrir þetta síðasta kvöld ársins. Annar eftirrétturinn er alltaf marensrúlla með ástaraldin, sem allir elska og má alls ekki sleppa, en hinn eftirrétturinn er breytilegur og mér þykir alltaf gaman að velja hann og prófa nýtt.

Í ár varð þessi ísbaka með bourbon karamellukremi fyrir valinu. Uppskriftin kemur frá engri annarri en Nigellu og eins og flestar uppskriftir sem ég hef gert frá henni var hún óendanlega góð. Börnin litu ekki við henni eftir að þau heyrðu að það væri kaffi í ísnum og whiskey í karamellusósunni en við fullorðna fólkið gátum ekki hætt að borða hana og fögnuðum því að hafa bökuna fyrir okkur.

Það er ekki vínbragð af karamellunni heldur gefur bourbonið henni einungis góðan keim. Ísinn er keyptur og ég valdi að nota cappucino-karamelluís Fabrikkunnar (fæst m.a. í Bónus) sem okkur fannst mjög góður.

Þessi ísbaka var stórkostlega góð og við höfum ekki getað hætt að hugsa um hana. Ég mun klárlega endurtaka leikinn við fyrsta mögulega tækifæri. Eins og svo oft áður fannst mér mikill kostur að geta útbúið hana með góðum fyrirvara og því er hún frábær eftirréttur fyrir matarboð.

Ísbaka með bourbon karamellu

Skel:

375 g digestive kex
75 g mjúkt smjör
50 g dökkt súkkulaði
50 g rjómasúkkulaði

Fylling:

1 líter kaffiís

Toppur:

300 g síróp (Lyle´s golden syrup)
100 g ljós muscovado sykur (ég notaði 35 g ljósan púðursykur og 65 g venjulegan púðursykur)
75 g smjör
1/4 tsk maldon salt
2 msk bourbon (ég notaði 1 msk)
125 ml rjómi

Setjið hráefnin í skelina í matvinnsluvél og vinnið saman. Þrýstið deginu í botn og meðfram hliðum á bökumóti. Reynið að hafa hliðarnar háar, helst aðeins upp fyrir kanntinn á mótinu. Frystið í um klukkutíma til að botninn verði alveg harður.

Látið ísinn mýkjast í ískáp þar til hægt er að breiða honum í skelina. Passið að mýkja hann ekki of mikið, hann á ekki að bráðna. Breiðið ísnum í harða skelina. Setjið plastfilmu yfir og frystið.

Setjið smjör, síróp, salt og sykur í pott og látið bráðna yfir miðlungshita. Hækkið hitann og sjóðið í 5 mínútur. Takið pottinn af hitanum, bætið bourbon í hann (það mun krauma í blöndunni við þetta). Bætið rjómanum í pottinn og hrærið öllu vel saman.

Látið karamelluna kólna áður en hún er sett yfir ísinn. Þegar karamellan hefur kólnað er henni hellt yfir ísinn þannig að hún hylji hann og að því loknu er bakan sett aftur í frystinn. Þegar karamellan er frosin er plastfilma sett yfir og geymt þannig í frystinum þar til bakan er borin fram.