Orange Chicken

~ Svava ~ 20 athugasemd

Þegar við fórum til Boston í fyrsta skipti féllum við fyrir rétt sem heitir Bourbon Chicken. Við fengum ekki nóg af honum og þegar við komum heim byrjaði ég strax að gúggla uppskriftir að réttinum og prófa mig áfram. Við borðuðum þennan rétt reglulega næstu árin og okkur fannst hann alltaf jafn góður.

Þegar við fórum aftur til Boston, þremur árum síðar, vorum við mjög spennt að fara og fá okkur Bourbon Chicken. Við fórum strax fyrsta kvöldið á veitingastaðinn en þegar við komum þangað bauð afgreiðslukonan okkur að smakka annan rétt, Orange Chicken. Við féllum í stafi, hann var æðislegur. Við pöntuðum okkur bæði Bourbon Chicken og Orange Chicken og vorum alveg sammála um að Orange Chicken hefði vinninginn. Það var síðan sama saga þegar við komum heim, ég fór á netið að leita að uppskriftum og fann helling. Gallinn var að þær voru allar svo ólíkar að ég vissi ekki hvar ég átti að byrja.

Stuttu síðar átti ég leið í Kost og mikið varð ég glöð þegar ég sá að þeir voru að selja tilbúnu Orange Chicken sósuna frá Panda Express. Ég keypti strax tvær flöskur og eldaði réttinn nokkrum sinnum handa okkur og vinum okkar. Rétturinn vakti alltaf lukku og þótti alveg stórgóður. Þegar ég ætlaði að fara að kaupa fleiri flöskur kom ég hins vegar að tómum kofanum því sósurnar voru búnar. Það virðist ekki hægt að ganga að sósunni vísri en af og til birtist hún í hillunum og síðast núna um daginn.

Þar sem mér finnst fátt eins ergilegt og að standa í verlsun leitandi að hráefni sem ég veit ekki hvernig lítur út þá ákvað ég að taka mynd af flöskunni og maísmjölinu ef einhvern skyldi langa að prófa.

Orange Chicken

  • 900 gr kjúklingabringur
  • 2 eggjahvítur
  • 2 tsk salt
  • 2 tsk sykur
  • 2 bollar maísmjöl
  • 5 bollar olía (vegetable oil) til að steikja í

Skerið kjúklingabringurnar í ca 1,5 cm bita og leggið til hliðar. Hrærið vel saman eggjahvítum, salti og sykri í skál og bætið kjúklingabitunum í skálina.  Hitið olíuna í potti upp í 175-190 gráður (eða hitið olíuna bara vel við hæðsta hita). Setjið maísmjölið í hreinan plastpoka og bætið marineruðu kjúklingabitunum út í. Hristið vel þannig að maísmjölið þekji kjúklingabitana.  Djúpsteikið kjúklingabitana í smáum skömmtum í einu þar til þeir verða gylltir á lit. Það tekur um 2-3 mínútur. Þegar kjúlingabitarnir eru tilbúnir eru þeir veiddir upp úr pottinum og lagðir á disk klæddan eldhúspappír. Endurtakið með restina af bitunum.

Hitið sósuna (tæplega hálf flaska fyrir þessa uppskrift) í víðum potti og leyfið henni að sjóða við vægan hita í nokkrar mínútur. Hrærið reglulega í pottinum. Bætið djúpsteiktu kjúklingabitunum út í og hrærið vel þannig að þeir hjúpist af sósunni.  Berið fram með hrísgrjónum og salati.

Uppáhalds bananabrauðið

~ Svava ~ 29 athugasemd

Þetta bananabrauð hefur lengi verið í uppáhaldi og óhætt að segja að það er uppáhalds brauð strákanna. Þeir biðja mig oft um að baka það og ef ég á banana sem hafa séð betri daga þá nýti ég þá alltaf í þetta brauð. Brauðið klikkar aldrei, er alltaf mjúkt, verður aldrei þurrt og er alltaf jafn ljúffengt.

Þessa vikuna byrjuðum við Öggi að vinna aftur eftir sumarfrí og Malín er enn í Svíþjóð. Strákarnir hafa því verið einir heima á daginn. Eftir fyrsta daginn sá ég að þeir höfðu ekki haft mikið fyrir að fá sér að borða. Þar sem ég átti banana á síðasta snúningi þá ákvað ég að baka bananabrauðið fyrir þá. Þeir voru búnir að vera úti í garði að tjalda með Gumma vini sínum allt kvöldið og þegar þeir komu inn fengu þeir sér nýbakað brauð og mjólk. Þegar Gummi fór heim kvaddi hann með þeim orðum að hann ætlaði að biðja mömmu sína um að baka þetta brauð (Erna, hér er uppskriftin 🙂 ). Ég skar síðan restina af brauðinu í sneiðar og setti í plastpoka. Það var ekki að spyrja að því, brauðið var búið þegar ég kom úr vinnunni daginn eftir.

Uppskriftin hefur verið svo lengi í fórum mínum að ég man ómöglega hvaðan hún kemur en ég hef skrifað við hana að brauðið eigi að geymast vel. Það hefur þó aldrei reynt á það og ég held að ég hafi í lengst átt það í hálfan sólarhring.

Mér finnst gott að baka brauð á kvöldin því það tekur enga stund að hræra í þau og síðan er hægt að slappa af yfir sjónvarpinu á meðan brauðið bakast í ofninum. Það er líka fátt eins notalegt og nýbakað brauð með kvöldkaffinu.

Bananabrauð

  • 2 stórir þroskaðir bananar
  • 50 gr smjör
  • 2 egg
  • 2 dl sykur
  • 3 dl hveiti
  • 1/2 dl mjólk
  • 2 tsk lyftiduft
  • 2 tsk vanillusykur
  • 1 tsk kanill

Hitið ofinn í 175°. Bræðið smjörið og látið kólna aðeins. Hrærið egg og sykur þar til létt og ljóst. Bætið hveiti, lyftidufti, vanillusykri og kanil í deigið og blandið vel.  Bætið smjöri og stöppuðum banönum og mjólk í deigið og blandið vel.  Setjið deigið í smurt brauðform (ég smyr oft formið og velti síðan haframjöli um það) og bakið í 40-50 mínútur.

Spaghetti bolognese

~ Svava ~ 13 athugasemd

Þá er hversdagsleikinn tekinn aftur við og viðeigandi að bjóða upp á hversdagslegan rétt, spaghetti bolognese. Þetta er einn af þeim réttum sem ég elda hvað oftast og við fáum ekki leið á honum. Rétturinn breytist reglulega en þessi útgáfa hefur fengið að hanga með lengi og er sú sem ég nota oftast. Hér áður fyrr setti ég alltaf sveppi, zuccini, papriku og lauk út í hakkið og hellti síðan pastasósu yfir en krökkunum fannst ekki gott að hafa allt þetta grænmeti í sósunni. Ég ákvað því að hætta því og byrjaði að breyta aðeins uppskriftinni. Við erum öll sammála um að finnast rétturinn bara betri fyrir vikið.

Mér finnst lykilatriðið við góða bolognese sósu vera að bæta sýrðum rjóma út í hana ásamt smá hunangi. Síðan þykir mér Chili Explosion kryddið frá Santa Maria ómissandi. Þó að það hljómi sem hræðilega strerkt krydd þá er það frekar milt og það er ekki hægt að nota of mikið af því. Rjómasletta finnst mér alltaf til bóta og hika ekki við að nota ef ég á til.

Ég geri bolognese sósuna aldrei eftir nákvæmum málum (gerir það einhver?) en svona er hún nokkurn veginn.

Spaghetti bolognese

  • ca 500 gr nautahakk (einn bakki)
  • 1 laukur
  • 1 rauð paprika
  • 1 krukka Dolmio pastasósa með extra hvítlauk (fæst m.a. í Bónus og Nettó)
  • 1 dós sýrður rjómi (ef ég á venjulegan rjóma þá nota ég hálfa dós af sýrðum rjóma og rjóma á móti)
  • 1/2 – 1 grænmetisteningur
  • ca 2-3 msk fljótandi hunang
  • smá sinnep (má sleppa)
  • chili explosion krydd frá Santa Maria
  • salt, pipar og paprikukrydd

Steikið hakkið á pönnu og þegar það byrjar að brúnast er lauknum bætt á pönnuna. Steikið áfram þar til laukurinn verður mjúkur og ef ég á papriku þá sker ég hana smátt og bæti á pönnuna í lokin. Kryddið aðeins með Kød og grill kryddi eða Lawrey´s seasoned salt og piprið. Bætið Dolmio pastasósunni á pönnuna ásamt sýrða rjómanum og rjómanum (ef þið eigið hann), 1/2 grænmetisteningi, hunangi, smá sinnepi og vel af chilli explosion kryddinu (ekki vera hrædd við það).  Leyfið að sjóða um stund og smakkið til, bætið jafnvel meiri krafti út í eða meira af chilli explosion kryddinu. Mér þykir líka gott að krydda aðeins með paprikukryddi. Ef sósan er of sterk bæti ég meiri rjóma eða sýrðum rjóma út í.

Sjóðið spaghetti samkvæmt leiðbeiningum á pakka. Þegar það er soðið er vatninu hellt af, spaghettiið sett í skál og væn smjörklípa látin bráðna yfir það.

Berið bolognes sósuna fram með spaghetti, ferskum parmesan osti og hvítlauksbrauði. Okkur finnst líka æðislega gott að hafa kartöflumús með en ætli ítalskar ömmur myndu ekki snúa sér við í gröfinni ef þær fréttu það.

Súkkulaði- og bananabaka með rjóma

~ Svava ~ 13 athugasemd

Í dag er síðasti dagurinn í sumarfríi og á morgun tekur vinnan við. Ég get ekki annað en farið sátt og glöð til vinnu eftir frábært sumarfrí. Við erum búin að fara til London, þræða alla Vestfirðina, hitta vini, halda og fara í nokkur matarboð, fara margar ferðir í núðlusúpur á Skólavörðustíginn, prjóna, lesa Hungurleikana með strákunum og gera svo margt skemmtilegt. Ég var búin að gera lista fyrir sumarfrí yfir hluti sem ég ætlaði að gera, m.a. að baka Franskar makkarónukökur og fara út að hlaupa að minnsta kosti annan hvern dag, en það gleymdist alveg.

Í gær fengum við Ernu, Óla og fjölskyldu í mat. Það telst varla til tíðinda því það líður varla sá dagur að við hittumst ekki, enda nágrannar og við Erna búnar að vera það síðan við vorum fimm ára. Við buðum þeim upp á Orange Chicken í aðalrétt en í eftirrétt gerði ég þessa dásamlegu súkkulaði- og bananaböku með rjóma.

Ég keypti mér nýlega bökuform með lausum botni og var spennt að nota það. Það var því engin spurning um að gera böku í eftirrétt. Þegar kom að því að velja uppskrift mundi ég eftir að hafa séð uppskrift að þessari böku og langað að prófa hana. Vandamálið var hins vegar að ég gat ekki fyrir mitt litla líf munað hvar ég hefði séð hana. En þrjóskan getur launað sig og eftir hálftíma leit fann ég uppskriftina. Því verður ekki neitað að leitin var vel þess virði því bakan var æðislega góð, svo gott að ég laumaðist í síðustu sneiðina um miðnætti því ég gat ekki hætt að hugsa um hana. Ég ætla að baka bökuna aftur við allra fyrsta tækifæri og hlakka til að leyfa fleirum að njóta.

Uppskriftin kemur frá Love & olive oil og eina breytingin sem ég gerði var að skipta vanilludropum út fyrir vanillusykur. Ég geri það nánast alltaf þegar ég baka því ég er ekki hrifin af dropabragði og finnst vanillusykurinn gefa svo mikið betra bragð.

Botninn

  • 1 bolli hveiti
  • 115 gr ósaltað kallt smjör
  • 1/4 tsk salt
  • 1/4 bolli kakó
  • 1/4 bolli sykur
  • 1/4 bolli vatn

Skerið smjörið í litla teninga og setjið í skál ásamt hveiti, salti, kakaói og sykri. Hnoðið saman í mulning og bætið þá vatninu við í smáum skömmtum. Notið bara eins mikið af vatni og þarf til að deigið haldist saman. Fletjið deigið út og leggði í bökuform (mitt form er 22 cm).  Þrýstið deiginu vel í botninn og upp á kantinn og leggið síðan álpappír yfir (þrýstið honum að deiginu). Setjið deigið í ískápinn í 10 mínútur eða á meðan þið hitið ofninn í 175°.  Til að deigið lyfti sér ekki í ofninum er gott að leggja baunir eða hrísgrjón ofan á álpappírinn. Bakið í 20 mínútur, takið þá álpappírinn af (og baunirnar eða grjónin) og bakið áfram í 10-15 mínútur. Takið úr ofninum og látið kólna alveg.

Vanillu- og súkkulaðikrem

  • 3/4 bolli sykur
  • 1/3 bolli hveiti
  • 1/4 tsk salt
  • 2 bollar nýmjólk
  • 3 eggjarauður
  • 1 msk ósaltað smjör
  • 2 tsk vanillusykur
  • 1/4 bolli suðusúkkulaði, saxað

Blandið saman sykri, hveiti, salti og 1 bolla af nýmjólkinni í potti. Hrærið vel saman og látið suðuna koma upp yfir miðlungs hita. Hrærið stöðugt þar til blandan verður slétt og þykk, það tekur um 2 mínútur, og takið þá pottinn af hitanum og látið kólna aðeins.

Hrærið saman eggjarauðum og 1 bolla af nýmjólk í skál. Bætið þykkri mjólkurblöndunni úr pottinum saman við í 4 skömmtum og hrærið vel á milli. Setjið blönduna aftur í pottinn og látið suðuna koma aftur upp. Hrærið stöðugt í pottinum. Þegar suðan kemur upp er hitinn lækkaður og látið sjóða í ca 1 mínútur eða þar til blandan minnir á þykkan búðing. Takið pottinn af hitanum og hrærið strax smjöri og vanillusykri saman við. Setjið helminginn af blöndunni í skál og leggið til hliðar. Bætið söxuðu suðusúkkulaði saman við þann helming sem eftir er í pottinum og hrærið þar til súkkulaðið er bráðnað og blandan orðin slétt. Látið báðar fyllingarnar kólna aðeins.

Ofanálag og samsetning

  • 2 bananar, skornir í sneiðar
  • 1 bolli rjómi
  • 3 msk sykur
  • 1/2 tsk vanillusykur

Breiðið vanillufyllingunni yfir bökubotninn. Raðið einu lagi af niðurskornum banönum yfir og breiðið súkkulaðifyllingunni yfir bananana. Setjið í ískáp og leyfið að kólna alveg. Rétt áður en bakan er borin fram er rjóminn léttþeyttur, sykri og vanillusykri bætt út í og þeytt áfram þar til rjóminn er tilbúinn. Alls ekki þeyta hann of mikið. Breiðið rjómann yfir bökuna og skreytið með dökku súkulaði.

Fylltar brauðskálar með eggjum og beikoni

~ Svava ~ 2 athugasemd

Eitt það besta við helgarnar er að geta byrjað daginn rólega og setið lengi saman yfir morgunmatnum. Mér finnst svo gaman að hafa aðeins fyrir morgunmatnum og vekja fjölskylduna með uppdúkuðu borði fyllt af góðgæti. Á borðinu finnst mér síðan verða að vera góður appelsínusafi eða Floridana heilsusafi sem ég helli í könnu fulla af klökum. Mér þykir safinn verða svo mikið betri við það, hann verður svo ískaldur og svalandi.

Við byrjuðum daginn í dag á þessum fylltu brauðskálum. Þær eru einfaldar og nokkuð fljótgerðar og því alveg tilvaldar á morgunverðarborðið. Ég átti heimilisbrauð og notaði það en eftir á að hyggja held ég að franskbrauð hafi verið enn betra og ætla að prófa það næst.

Þetta er engin heilög uppskrift og alveg kjörið að nota það sem er til að hverju sinni. Aðalmálið er að eiga brauð og egg, síðan má fylla það með hverju sem er. Það er t.d. hægt að nota chorizo-pylsu í staðin fyrir beikon eða að sleppa alveg kjötinu og setja t.d. smjörsteikt spínat, papriku og parmesan ost í brauðið.

Fylltar brauðskálar með eggjum og beikoni

  • 1 1/2 brauðsneið fyrir hverja brauðskál
  • smjör
  • beikon
  • egg
  • maldon salt og pipar

Hitið ofninn í 185° og smyrjið möffinsform (ekki pappírsform heldur möffins-bökunarform eins og sést glitta í hér á myndinni fyrir ofan) með bræddu smjöri. Fletjið brauðsneiðarnar út með kökukefli, skerið í eins stóra hringi og þið náið og skerið síðan hringinn í tvennt. Klæðið möffinsformið með brauðhelmingunum, ég notaði 3 helminga til að fylla formið mitt. Smyrjið brauðið með bræddu smjöri.

Steikið beikonið yfir miðlungs hita þar til það er nánast stökkt, ca 4 mínútur. Leggið 1 beikonsneið í hverja brauðskál og brjótið eitt egg yfir.  Saltið og piprið og bakið í ofninum þar til eggjahvíturnar hafa stífnað, um 20-25 mínútur. Berið fram heitt.

Pizzu-ídýfa

~ Svava ~ 3 athugasemd

Í kvöld vorum við svo spennt að sjá handboltaleikinn kl. 18.30 að ég ákvað að hafa eitthvað fljótlegt sem hægt væri að borða fyrir framan sjónvarpið. Þá mundi ég eftir þessari uppskrift sem ég hafði séð á Pinterest og hef lúmskt verið að bíða eftir tækifæri til að gera.

Þessi pizzu-ídýfa er ofboðslega fljótleg að gera og okkur fannst hún alveg svakalega góð. Þetta er matur sem er ekki hægt að hætta að borða og við borðuðum þar til við sprungum. Ég bar ídýfuna fram með nýbökuðu baguette og var með þrjú niðurskorin baguette. Ég myndi segja að það passi fyrir 4-5.

Pizza-ídýfa

  • 115 gr rjómaostur við stofuhita
  • 1/4 bolli sýrður rjómi
  • 1/4 bolli majónes
  • 1/2 bolli rifinn mozzarella ostur
  • 1/4 bolli rifinn parmesan
  • 1 bolli pizza sósa
  • 1/2 bolli rifinn mozzarella
  • 1/4 bolli rifinn parmesan
  • ca 50 gr pepperóní, skorið í smáa bita
  • 2 msk græn paprika, smátt skorin
  • 2 msk svartar ólífur, sneiddar í bita

Hitið ofninn í 180°. Blandið rjómaosti, sýrðum rjóma, majónesi, mozzarella og parmesan saman og breiðið yfir botn á eldföstu móti. Breiðið pizza-sósuna yfir og dreifið mozzarella ostinum, parmesan, pepperoni, grænu paprikunni og ólívunum yfir. Hitið í ofninum í ca 20 mínútur eða þar til það sýður meðfram kanntinum og osturinn er bráðinn og kominn með fallegan lit. Berið fram með nýbökuðu baguette.

Tikka masala kjúklingur að hætti Jamie Oliver

~ Svava ~ 8 athugasemd

Ég hef oft horft á þessa uppskrift og skil ekki af hverju ég hef ekki eldað hana fyrr. Uppskriftin kemur úr bók sem heitir Jamie Oliver; Jamie´s dinners og þó það séu mörg ár síðan ég eignaðist bókna þá held ég að þetta sé fyrsta uppskriftin sem ég elda úr henni.

Ég á nokkrar uppskriftabækur eftir Jamie Oliver og hef aldrei eldað annað en góðan mat upp úr þeim. Þær eru algjör gullnáma og alltaf hægt að treysta á þær. Ég varð því fyrir miklum vonbrigðum þegar við fórum á Jamie Oliver staðinn í Covent Garden í London því maturinn þar var sá lakasti sem við borðuðum í allri ferðinni.

Þessi tikka masala kjúklingur er einn sá besti sem ég hef smakkað. Okkur fannst hann öllum alveg æðislegur og ég hefði verið alsæl hefði ég fengið hann í Covent Garden. Ég er samt fegin að ég eldaði hann bara hér heima því þá get ég gert hann aftur fljótlega.

Tikka Masala kjúklingur

  • 6 hvítlauksrif
  • 7,5 cm engifer
  • 2-3 fersk rauð chilli, fræhreinsuð
  • 1 msk sinnepsfræ
  • 1 msk paprikuduft
  • 2 tsk cumin
  • 2 tsk kóriander
  • 3 msk garam masala
  • 200 gr jógúrt
  • 4 kjúklingabringur, skornar í grófa bita
  • 1 msk smjör
  • 2 miðlungs laukar, afhýddir og skornir í fínar sneiðar
  • 2 msk tómat purée
  • lítið handfylli af fínmöluðum cashew hnétum
  • sjávarsalt
  • 115 ml rjómi
  • handfylli af ferskum kóriander, hakkað
  • safi af 1-2 lime

Rífið hvítlauk og engifer á fínasta hlutanum á rifjárninu og setjið í skál. Skerið chilli-ið eins fínt niður og þið getið og bætið í skálina með hvítlauknum og engiferinu. Hitið góða skvettu af ólivuolíu á pönnu og setjið sinnepsfræin á pönnuna. Þegar þau byrja að skoppa eru þau tekin af pönnunni og bætt í hvítlauks- og engiferblönduna ásamt paprikudufti, cumin, kórialnder og 2 msk af garam masala. Setjið helminginn af þessari blöndu í skál og bætið jógúrtinu og kjúklingabitunum í skálina. Hrærið og leyfið að marinerast í ca 30 mínútur.

Bræðið smjörið á pönnunni sem sinnepsfræin voru á og bætið fint skornum lauknum á pönnuna ásamt seinni helmingnum af kryddblöndunni.  Leyfið þessu að eldast á pönnunni við vægan hita í 15 mínútur án þess að brúna blönduna of mikið. Á meðan kemur dásamleg lykt í eldhúsið. Bætið tómat purée, fínmöluðum hnétunum, hálfum lítra af vatni og hálfri teskeið af salti. Hrærið vel og látið sjóða við vægan hita í nokkrar mínútur. Takið af hitanum og leggið til hliðar.

Steikið kjúklinginn við háan hita á pönnu eða grillið þar til hann er eldaður í gegn.

Hitið sósuna aftur og bætið rjómanum út í ásamt einni matskeið af garam masala. Smakkið til og bætið við kryddi eftir þörfum. Um leið og suðan kemur upp er sósan tekin af hitanum og kjúklingnum bætt út í. Smakkið aftur til  og stráið ferskum kóriander yfir ásamt lime-safanum. Berið fram með basmati hrísgrjónum, nanbrauði og köldum bjór.

Pestó-pasta

~ Svava ~ 2 athugasemd

Ég held að ég hafi útbúið þetta pestópasta oftar en eðlilegt getur talist. Það er í algjöru uppáhaldi hjá Ögga og nánast undantekningalaust það sem hann stingur upp á að hafa í matinn ef ég spyr hann.

Yfirleitt geri ég mjög stóran skammt því þetta er ekki verra daginn eftir. Þá þykir mér gott að bæta aðeins meira af pestói og fetaosti saman við, setja réttinn síðan í eldfast mót, salta og pipra vel og rífa parmesan ost yfir. Ég set hann síðan í ofninn þar til hann er heitur í gegn og finnst rétturinn verða mjög góður við það.

Pestó-pastað er sniðugt að gera fyrir veislur eða útilegur og bera þá fram kallt. Mér finnst þetta alltaf gott og ég held að Öggi gæti lifað á þessu.

Pestó-pasta

  • pasta
  • gott grænt pestó
  • rauðlaukur, skorin fínt niður
  • rauð paprika, skorin í bita
  • tómatar (ég nota oftast kirsuberjatómata eða plómutómata)
  • fetaostur (ég nota fetaost í kryddolíu)
  • ferskur parmesan
  • gott jurtasalt eða venjulegt salt
  • pipar

Pastað er soðið samkvæmt leiðbeiningum á pakka. Þegar það er tilbúið er vatninu hellt af og pastað sett aftur í pottinn. Hrærið pestói saman við ásamt fetaostinum (mér þykir gott að stappa hluta af ostinum með smá af olíunni), rauðlauknum, paprikunni og tómötunum. Piprið og saltið og rífið ferskan parmesan ost yfir. Berið fram með hvítlauksbrauði.

Pylsu-stroganoff

~ Svava ~ 6 athugasemd

Þegar við bjuggum í Svíþjóð þá var pylsu-stroganoff uppáhaldsmatur krakkana. Ég hef ekki eldað það síðan við fluttum heim en í vikunni fékk ég svo ótrúlega löngun í þennan mat að ég varð ekki róleg fyrr en ég var búin að elda hann. Það er einhver sjarmi yfir þessu og ég á erfitt með að setja fingurinn á það hver hann er. Kannski eru það bara minningarnar frá því þegar við bjuggum úti og borðuðum þetta nánast vikulega, enda bæði ódýrt og fljótlegt og hentaði okkur því mjög vel á þeim tíma.

Ég ætla ekki að reyna að halda því fram að þetta sé það besta sem þið eigið eftir að smakka en það geta ekki alltaf verið jól. Mér finnst þetta góður hversdagsmatur og krakkarnir elska hann. Ég verð alltaf svo glöð þegar þau borða vel og Jakob borðaði fjóra diska af matnum og spurði síðan hvort ég geti eldað þetta í hverri viku. Mér finnst varla hægt að fá betri einkunn fyrir kvöldmatinn.

Pylsu-stroganoff

  • 500 gr pylsur (t.d. 1 tvöfaldur pakki af SS-pylsum)
  • 1 laukur
  • 1 msk paprikukrydd
  • 2 msk hveiti
  • 3 dl mjólk
  • 2 dl rjómi
  • 2 msk tómatpuré
  • 3 msk tómatsósa
  • salt og pipar

Skerið pylsurnar í bita og skerið laukinn fínt niður. Steikið þetta í smjöri á pönnu þar til laukurinn og pylsurnar hafa fengið fallegan lit. Stráið paprikukryddi og hveiti yfir og leyfið að hitna vel áður en þið hellið 2 dl af mjólkinni yfir. Leyfið þessu að sjóða þar til sósan verður þykk. Bætið rjómanum saman við og restinni af mjólkinni ef sósan er of þykk. Bragðbætið með tómatpuré, tómatsósu, salt og pipar. Látið sjóða í 5 mínútur.

Ef þú átt steinselju eða graslauk þá er um að gera að dreifa því yfir réttinn áður en hann er borinn fram. Berið fram með hrísgrjónum eða kartöflumús.

Hafra- og speltbrauð með kúmeni

~ Svava ~ 9 athugasemd

Það er langt síðan ég byrjaði að baka brauðin okkar og mér finnst vera himinn og haf á milli heimabakaðs og aðkeypts brauðs. Heimabökuðu brauðin eru stútfull af kornum og góðgæti og standa með mér allan morguninn. Þegar ég á ekki heimabakað brauð er algjör vandræðagangur á mér og ég veit ekkert hvað ég á að fá mér í morgunmat. Ég enda oftast á einhverju morgunkorni og er síðan orðin svöng aftur áður en ég næ að ganga frá diskinum.

Það tekur enga stund að baka gott brauð og auðvelt að breyta uppskriftunum eftir því sem er til í skápunum. Ég á mér tvenn uppáhalds brauð sem ég skiptist á að baka, þetta brauð og þetta hafra- og speltbrauð. Þau eru mjög ólík en mér þykja þau bæði svo góð. Þessa uppskrift fékk ég hjá Svanhvíti systur minni. Þegar hún sendi mér uppskriftina sagði hún að brauðið væri svo ljúft og gott á bragðið og ég gæti ekki verið meira sammála henni. Þess að auki er það ótrúlega fljótlegt og fullt af hollustu.

Hafra- og speltbrauð

  • 4 dl spelt (ég nota fínmalað)
  • 1 dl graskersfræ
  • 1 dl hörfræ
  • 1 dl sólblómafræ
  • 1 dl tröllahafrar eða haframjöl
  • 1 msk vínsteinslyftiduft
  • 1 1/2 tsk kúmen
  • 1/2 tsk salt
  • 2-3 msk hunang
  • 2 1/2 dl vatn
  • 1 msk sítrónusafi

Hitið ofninn í 180°. Blandið þurrefnum saman í skál ásamt hunangi, hellið vatni og sítrónusafa yfir og hrærið öllu rólega saman. Setjið í smurt brauðform og bakið í 35-40 mínútur.