Vikan sem leið og stórgóður fiskréttur

Ég má til með að þakka fyrir allar kveðjurnar sem þið hafið sent mér í tilefni af ársafmæli bloggsins. Þær hafa yljað mér inn að hjartarótum og fegrað lífið síðustu daga.

Eitt af því sem er skemmtilegt við það að blogga er að við tökum fullt af myndum. Þegar ég skoða í gegnum myndasafnið slær það mig hins vegar að meiri hluti þeirra er af mat. Það er eins og lífið snúist um mat hjá okkur. Við gerum þó ýmislegt fleira en að elda, mynda og borða mat. Í síðustu viku tókum við til dæmis upp á því, ásamt fjölmörgum öðrum Kópavogsbúum, að skella okkur á 17. júní hátíðarhöldin á Rútstúni.

Það var napurt en félagsskapurinn var góður og við skemmtum okkur konunglega. Þegar við komum heim eldaði ég kjúklingasúpu sem við borðuðum undir sæng í sjónvarpssófanum. Notalegra gerist það varla.

Á fimmtudaginn gengum við Öggi á Móskarðshnjúka ásamt gömlum og nýjum göngufélögum. Ég var staðráðin í að ganga á Móskarðshnjúka í sumar og þegar vinnufélagi minn stakk upp á göngunni vorum við Öggi því fljót að slá til.

Það var hvasst en fallegt veður, bratt á köflum og þreytan var farin að segja til sín þegar við nálguðumst toppinn.

Fallegust og duglegust í hópnum var Katla.

Útsýnið var stórbrotið og þreytan hvarf sem dögg fyrir sólu þegar upp á topp var komið. Þegar við komum heim fór ég í heita sturtu, náttslopp og fékk mér pulsu og súkkulaðirúsínur.  Öggi segir oft að ég kunni að gera vel við mig og þar hefur hann rétt fyrir sér. Það hefði fátt getað toppað þessa máltíð og náttsloppurinn gerði stundina örlítið notalegri.

Um helgina nutum við veðurblíðunnar og fórum á flakk um bæinn. Strákarnir skemmtu sér konunglega, eins og þeim er von og vísa.

Við fórum líka á hjólabrettasvæðið en þeir eru að æfa sig á hjólabretti, mér til mikillar mæðu og taugaveiklunar.

Eftir daginn þótti okkur gott að koma heim. Ég bjó til hamborgara sem að Öggi grillaði og úr varð dýrindis máltíð. Uppskriftin er væntanleg!

Eftir þetta höfum við nánast bara myndað mat. Ég er því að hugsa um að bregða á það ráð að birta hér á blogginu svipmyndir frá hversdagslífinu oftar, jafnvel í lok hverrar viku, og vonast til að það verði til þess að við myndum það oftar. Að lokum gef ég uppskrift af stórgóðum fiski sem var á boðstólnum í vikunni. Uppskriftin kemur frá mömmu og er góð eftir því.

Fiskréttur með blaðlauk og sveppum (uppskrift frá mömmu)

• 6-800 g ýsa eða þorskur
• 1 góður blaðlaukur
• 250 g sveppir (1 box)
• 1 bolli rifinn ostur
• 2,5 dl rjómi  eða matreiðslurjómi
• 2 msk sveppasmurostur (má sleppa en ég bætti við og notaði 4-5 msk)
• ½ – 1 sítróna
• 1-1½ tsk aromat

Kreistið sítrónu yfir fiskflökin og kryddið með aromatkryddinu. Látið standa um stund.

Skerið fiskinn í bita og raðið í eldfast mót. Sneiðið blaðlaukinn og mýkið í olíu á pönnu, takið af og steikið sveppina í smá stund. Hellið þá rjómanum yfir, setjið rifna ostinn út í ásamt sveppasmurostinum og látið sjóða þar til hann er bráðinn. Bætið loks blaðlauknum á pönnuna og kryddið með aromatkryddi eftir smekk. Hellið þessu síðan yfir fiskinn og bakið við 190° í 15-20 mínútur.