Flokkur: Hakkréttir

Chili con carne

~ Svava ~ 22 athugasemd

Chili con carne

Síðasta vika var annasöm og til að létta á heimilisstörfunum tók ég á það ráð að elda stóran skammt af chili con carne. Það tekur enga stund að elda þennan rétt, hráefnið er ódýrt og maturinn æðislega góður. Það er því mesta furða að ég skuli ekki elda hann oftar.

Uppskriftin er stór og dugði okkur fjölskyldunni vel í þrjár mismunandi máltíðir, hver annarri betri. Ef tíminn er með ykkur þá er ekki verra að láta réttinn sjóða við vægan hita í lengri tíma en uppskriftin segir til um. Smakkið síðan til og hann verður stórgóður.

Fyrsta kvöldið bar ég réttinn fram með sýrðum rjóma, New York times-brauði og heimagerðu hummus.

Chili con carne

Kvöldið eftir hitaði ég réttinn upp og setti hann í tortillabrauð ásamt sýrðum rjóma, avokadó, rauðlauk, papriku, káli og fetaosti.

Chili con carne

Þriðja kvöldið var afgangurinn settur á pizzur.

Chili con carne

Chili con carne

  • 1200 g nautahakk (2 bakkar)
  • 3 msk olía
  • 2½ tsk salt
  • ½ tsk svartur pipar
  • 1-2 tsk chilipipar
  • 2 rauðlaukar
  • 3 hvítlauskrif
  • 3 dósir hakkaðir tómatar
  • 1 box ferskir kirsuberjatómatar
  • 1 dl chilisósa
  • 2 tsk paprikukrydd
  • 1 tsk sambal oelek (eða 2 tsk tabasco)
  • ½ tsk kanil
  • 1 tsk cummin
  • 2 msk balsamik edik
  • chili explosion
  • 2-3 dósir baunir (ég notaði blöndu af nýrnabaunum, pintobaunum og cannellinibaunum)

Steikið nautahakkið og kryddið með salti, pipar og chilipipar. Setjið yfir í stóran pott.

Afhýðið og hakkið lauk og hvítlauk og steikið í olíu. Setjið í pottinn með nautahakkinu. Setjið hakkaða tómata, heila kirsuberjatómata og chilisósu í pottinn og hrærið öllu saman. Kryddið með paprikukryddi, kanil, cummin, chili explosion, balsamikediki og sambal oelek. Látið sjóða í 10 mínútur.

Hellið vökvanum af baununum og skolið þær í köldu vatni. Bætið baununum í pottinn og látið allt sjóða saman þar til baunirnar eru orðnar heitar.

Pestó- og fetafylltur kjöthleifur

~ Svava ~ 9 athugasemd

Pestó- og fetafylltur kjöthleifur

Ég hef oft hugsað um það hvað ég er heppin með lesendur hér á síðunni. Ég fæ svo ótrúlega fallega tölvupósta frá lesendum sem hlýja mér meira en ég mun nokkurn tímann getað lýst og í dag fékk ég svo fallega gjöf að ég fór næstum því að gráta. Ég get með sönnu sagt að væri ekki eins að blogga án ykkar.

Pestó- og fetafylltur kjöthleifur

Gjöfin sem ég fékk var þessi dásamlega bók og inn í hana var búið að skrifa fallega kveðju til mín. Bókina ætla ég að geyma á náttborðinu mínu, stúdera makkarónubakstur fyrir svefninn og dreyma þær á nóttinni. Þúsund milljón þakkir Kristín, þú veist ekki hvað þú gladdir mig mikið.

Færslurnar eru að koma seint inn hjá mér þessa dagana og það er allt Ögga að kenna. Hann er með tölvuna OG myndavélina með sér á júróvisjónæfingum eftir vinnu og ég get því ekki bloggað á meðan. Á móti kemur að tölvan er full af myndum og myndböndum frá æfingum sem ég er spennt að hlusta á þegar Öggi kemur heim. Látið vita ef ykkur langar að sjá og ég skal athuga hvort ég geti sett eitthvað hingað inn.

Pestó- og fetafylltur kjöthleifur

Ég eldaði ljúffengan kjöthleif sem var kannski ekki mikið fyrir augað en bætti það svo sannarlega upp með bragðinu. Ég fyllti hann með fetaosti og pestói með sólþurrkuðum tómötum sem kom æðislega vel út. Fjölskylduvænt og stórgott.

Pestó- og fetafylltur kjöthleifur

  • 600 g bland- eða nautahakk
  • 0,5 dl brauðrasp
  • 1 dl vatn
  • 1,5-2 tsk salt
  • svartur pipar
  • 1 tsk timjan
  • 1/2 tsk rósmarín
  • 1 laukur
  • 1 egg
  • fetaostur
  • pestó með sólþurrkuðum tómötum

Pestó- og fetafylltur kjöthleifur

Hitið ofninn í 175°. Skerið laukinn í grófa bita. Blandið lauk, vatni, brauðraspi, eggi, salti, pipar, timjan og rósmarín saman og maukið með töfrasprota eða í matvinnsluvél. Blandið maukinu og hakkinu vel saman. Smyrjið eldfast mót, formið hleif úr hakkblöndunni og leggið hann í mótið. Gerið skurð í kjöthleifinn. Myljið fetaost í skurðinn og setjið pestó yfir. Lokið skurðinum vel og setjið í ofninn í 40 mínútur.

Pestó- og fetafylltur kjöthleifur

Fylltar tortillaskálar

~ Svava ~ 30 athugasemd

Fylltar tortillaskálar

Um síðustu helgi eldaði ég einfaldan mexíkóskan mat sem vakti rífandi lukku hér á heimilinu. Ég setti mynd af matnum inn á Instagram og hef fengið þónokkrar fyrirspurnir um hvað þetta sé og hvernig það sé gert. Ég ákvað því að setja uppskriftina inn núna ef einhver er á höttunum eftir hugmynd að föstudagsmatnum.

Fylltar tortillaskálar

Mér þykja þessar fylltu tortillaskálar vera ekta föstudagsmatur. Það tekur enga stund að útbúa þær og á meðan maturinn er í ofninum er salatið skorið niður og nachos sett í skál. Áður en maður veit af er matur á borðinu sem allir elska. Ég mæli með að þið prófið.

Fylltar tortillaskálar

  • Mjúkar tortillakökur (minni tegundin)
  • 1 bakki nautahakk
  • 1 poki taco-krydd
  • ca 1 dl vatn
  • ca 1/2 krús tacosósa
  • 1 dós refried beans
  • rifinn cheddar ostur

Steikið nautahakkið á pönnu, kryddið með tacokryddi og hellið ca 1 dl af köldu vatni yfir. Látið sjóða saman í nokkrar mínútur á pönnunni. Hrærið tacosósu og refried beans saman við og setjið til hliðar.

Spreyjið olíu (ég nota PAM) í möffinsform og setjið tortillakökur í þau (það er allt í lagi þó þær standi upp úr), fyllið þær með nautahakksblöndunni og stráið rifnum cheddar osti yfir. Setjið í 200° heitan ofn í 10-15 mínútur, eða þar til osturinn er bráðnaður. Berið fram með góðu salati, nachos og sýrðum rjóma,guacamole og salsa sósu.

Fylltar tortillaskálar

Hakkabuff með parmesan í raspi

~ Svava ~ 10 athugasemd

Hakkabuff með parmesan í raspi

Ég er búin að vera með pannerað hakkabuff á heilanum síðan ég las komment hér á síðunni frá Halldóri Tjörva. Til að fá hugarró kom ég við í búð á leiðinni heim í gær og keypti nautahakk. Þegar heim var komið reyndist lítið til af meðlæti á heimilinu, enda kom hakkabuff alveg óvænt inn á vikumatseðilinn, en það má alltaf tína eitthvað til. Það kom á daginn að kartöflur, hrásalat, sveppasósa og sulta fór ljómandi vel með buffinu, þó að rauðbeður og lauksósa hefðu eflaust ekki skemmt fyrir.

Það er langt síðan ég komst að því að mér þykir allt í raspi gott en hamingjan hjálpi mér hvað mér þótti þetta góður matur. Ég sendi Halldóri Tjörva mínar bestu þakkir fyrir kommentið sem varð til þess að þessi ljúffengu buff enduðu á diskunum okkar.

Hakkabuff með parmesan í raspi

Hakkabuff með parmesan í raspi

  • 500 g nautahakk
  • 100 g rifinn parmesan ostur
  • 1 laukur, fínhakkaður (ég mauka hann með töfrasprota)
  • 1 hvítlauskrif
  • 2 egg
  • 2 msk Dijon sinnep
  • 1 tsk salt
  • 1/2 tsk pipar

Hitið ofninn í 175° og sjóðið kartöflur.

Hakkabuff með parmesan í raspi

Blandið nautahakki, parmesan osti, lauki, pressuðu hvítlauskrifi, sinnepi, eggjum, salti og pipar saman. Mótið 8 buff og leggið til hliðar.

Takið 3 skálar og setjið hveiti í eina, upphrært egg í eina og rasp í eina.

Veltið buffinu fyrst upp úr hveiti, síðan eggi og að lokum raspi. Steikið upp úr vel af smjöri og olíu og færið svo yfir í eldfast mót. Þegar öll buffin hafa verið steikt eru þau sett í ofninn í ca 10 mínútur.

Hakkabuff með parmesan í raspi

Hakkabuff með fetaosti

~ Svava ~ 23 athugasemd

Hakkbuff með fetaosti

Í gærkvöldi bauð mamma okkur í lambalæri sem hún bar fram með kartöflugratíni og salati. Í eftirrétt hafði hún bakað danska eplaköku sem var, að sjálfsögðu, borin fram með rjóma (því mamma elskar rjóma…. og allt danskt). Ég gæti vel vanist því að vera boðin í svona veislu á hverjum mánudegi og þótti þetta þvílíkur hversdagslúxus. Ég nýtti tækifærið og fékk uppskrift að súkkulaðimúsinni hennar mömmu sem krakkarnir elska og eru alltaf að biðja hana um að gera. Ég ætla að setja hana hingað inn við tækifæri.

Núna ætla ég hins vegar að gefa uppskrift að ljúffengu hakkabuffi. Þessi hakkabuff mega gjarnan vera oftar á disknum mínum því mér þykja þau svo bragðgóð og ljúffeng. Það er eitthvað notalegt við þau og krakkarnir borða buffin alltaf af bestu lyst. Með soðnum kartöflum og sultu verða þau að dýrindismáltíð sem er einfalt að útbúa og allir kunna að meta.

Hakkbuff með fetaosti

Hakkabuff með fetaosti

  • 700 g nautahakk eða blanda af nauta- og svínahakki
  • 2 hvítlauksrif
  • 1 egg
  • 2 tsk þurrkað oregano
  • 150-200 g mulinn fetaostur
  • salt og pipar
  • smjör til að steikja upp úr

Sósa

  • 2 msk smjör
  • 1/2 dl vatn
  • 3 dl rjómi
  • 2-3 msk kalvfond (eða grænmetisteningur)
  • maizena
  • salt og pipar
  • smá rifsberjahlaup (má sleppa)

Hakkbuff með fetaosti

Blandið hráefninu í buffin vel saman (mér þykir gott að setja allt í hrærivélina) og mótið stór buff úr þeim. Steikið buffin á pönnu upp úr vel af smjöri. Á meðan er ofninn hitaður í 125°. Þegar buffin eru tilbúin eru þau sett í eldfast mót og inn í ofn til að halda þeim heitum.

Steikarsoðið af buffunum er notað í sósuna. Þegar öll buffin hafa verið steikt er væn smjörklípa sett á pönnuna. Bætið vatni og rjóma á pönnuna og smakkið til með kalvfond, salti og pipar. Mér þykir stundum gott að setja smá af rifsberjahlaupi í sósuna en því má sleppa. Að lokum er sósan þykkt með maizena . Leggið buffin í sósuna og látið þau sjóða í sósunni um stund við vægan hita.

Berið buffin fram með soðnum kartöflum og sultu.

Pastagratin

~ Svava ~ 9 athugasemd

Ég er ósköp fegin því að sjá fyrir endan á „eldað úr frystinum“ vikunni og er farin að hlakka til að skipuleggja matarinnkaupin fyrir næstu viku. Í kvöld tók ég síðasta matinn úr frystinum, nautahakksbakka, og eftir eru þá bara ís og frosnir ávextir í skyrdrykki fyrir krakkana.

Þeir allra gleggstu gætu munað eftir að ég notaði hálfan beikonsmurost í skinku- og spergilkálsbökuna á þriðjudaginn. Núna notaði ég seinni helminginn í ostasósu til að setja yfir pastagratin. Rétturinn var dásamlega góður og mjög fjölskylduvænn.

Pastagratin

  • soðið pasta
  • kjötsósa (steikið 1 bakka af nautahakki, kryddið og setjið niðursoðna tómata eða pastasósu yfir og látið sjóða saman)
  • kirsuberjatómatar
  • vorlaukur
  • mozzarella ostur

Ostasósa

  • 4 dl rjómi
  • 100 g beikonsmurostur
  • 1-2 dl rifinn ostur
  • salt og pipar

Hitið ofninn í 220°. Sjóðið pasta eftir leiðbeiningum á pakkningu. Steikið nautahakk og kryddið eftir smekk. Setjið góða pastasósu eða niðursoðna tómata yfir og látið sjóða saman.

Setjið rjóma í pott ásamt beikonsmurostinum og látið suðuna koma upp. Bætið rifnum osti í pottinn og látið bráðna saman við. Saltið og piprið og takið af hitanum.

Setjið pastað í eldfast mót og hellið kjötsósunni yfir. Skerið kirsuberjatómata í tvennt og setjið yfir kjötsósuna ásamt niðurskornum vorlauki. Hellið ostasósu yfir og endið á að strá rifnum mozzarella yfir.

Setjið í ofn í um 20 mínútur eða þar til osturinn hefur bráðnað og fengið fallegan lit.

Rjómalagað lasagna

~ Svava ~ 8 athugasemd

Helgin er búin að vera ævintýraleg. Við keyrðum norður til Akureyrar á föstudeginum og eyddum helginni þar í mestu makindum. Það var svo ótrúlega fallegt á Akureyri, snjónum kyngdi niður svo trjágreinar bognuðu undan þunganum. Það var svo notalegt að vaða skaflana úr íbúðinni niður á Bláu könnuna í bænum og fá okkur heitt súkkulaði með rjóma. Svo dásamlega afslappandi og óneitanlega jólalegt.

Það er alltaf sama prógrammið í gangið þegar við förum norður og það má engu breyta. Krakkarnir vilja fara í jólahúsið og fá Brynjuís og ég vil fara í Sirku. Síðan förum við í Eymundsson og í sund, helst í Hrafnargili. Okkur þykir þetta alltaf jafn skemmtilegt og virðumst ekki hafa neina þörf fyrir að breyta út af vananum.

Þessi ferð var þó frábrugðin öðrum að því leiti að nú snérist hún um fimleikamót sem Gunnar var að keppa á. Mér þykir hann svo ótrúlega duglegur að ég tárast alltaf í byrjun en næ svo að harka af mér. Ég vil ekki verða honum til skammar og reyni hvað ég get að virðast yfirveguð yfir þessu öllu, eins og mér þyki ekkert tiltökumál að hann hangi á hvolfi í tvöfaldri hæð sinni og gæti stórslasast við það eitt að missa jafnvægið.  Hann missti þó ekki jafnvægið, frekar en áður, og nældi sér í silfurverðlaun. Ég hélt ég myndi springa úr stolti.

Þar sem ég var svo léleg í að uppfæra bloggið í síðustu viku þá luma ég núna á uppskrift af frábæru lasagna sem ég bauð tengdamömmu upp á um síðustu helgi. Mér þykir lasagna svo gott og gaman að prófa nýjar uppskriftir. Þessi þótti mér æðislega góð, þó að það hafi ekki myndast nógu vel, og verður klárlega eldað aftur.

Rjómalagað lasagna

Kjötsósa

  • 600-700 g nautahakk
  • smjör
  • 1 hvítlauksrif, pressað
  • 1 laukur, fínhakkaður
  • 1/2 dl chilisósa
  • grænmetis- eða nautateningur
  • 1 dós niðursoðnir hakkaðir tómatar
  • salt og pipar

Ostasósa

  • 5 dl rjómi
  • 5 dl mjólk
  • 1 dl hveiti
  • 100 g smjör
  • 3 dl rifinn ostur
  • smá múskat
  • salt og pipar
  • ferskar lasagnaplötur
  • 2 pokar af ferskum mozzarella osti

Hitið ofninn í 180°. Steikið hakkið, laukinn og hvítlaukinn á pönnu upp úr smjörinu. Bætið niðursoðnu tómötunum, chilisósunni, teningi, salti og pipar á pönnuna og látið sjóða við vægan hita á meðan ostasósan er gerð.

Bræðið smjörið og hrærið hveitinu saman við. Hellið mjólkinni og rjómanum saman við í nokkrum skömmtum og hrærið vel á milli. Passið að hafa ekki of háan hita undir svo sósan brenni ekki. Kryddið með smá múskati, salti og pipar. Látið sjóða í nokkrar mínútur og takið svo af hitanum. Bætið rifna ostinum saman við og látið bráðna í sósunni.

Setjið smá ólífuolíu í botninn á eldföstu móti og þekið hann með ostasósu. Leggið lasagnaplötur yfir, þar næst kjötsósu, síðan ostasósu. Endurtakið eins oft og formið leyfir og endið á sósunni. Sneiðið mozzarellaostinn og leggið yfir ostasósuna. Setjið í ofninn í 20-25 mínútur eða þar til osturinn er kominn með fallegan lit.

Milljón dollara spaghetti

~ Svava ~ 41 athugasemd

Ég get ekki á mér setið og hreinlega verð að þakka allar heimsóknirnar sem matarbloggið mitt hefur fengið. Síðan ég byrjaði að blogga í sumar hafa þær aukist jafnt og þétt og í síðasta mánuði voru heimsóknirnar rétt um 95.000! Mér þykir svo ofboðslega vænt um að svona margir skuli hafa áhuga á að fylgjast með litla blogginu mínu. Öll kommentin, like-in á Facebooksíðunni og tölvupóstarnir sem ég hef fengið, ég á ekki orð til að lýsa því hvað þetta gleður mig mikið. Kveðjurnar hlýja mér út veturinn og vel það. Þúsund þakkir og knús til ykkar allra.

Ég eldaði um daginn rétt sem allir elska, milljón dollara spaghetti. Uppskriftin er amerísk og er góð eftir því. Ég veit ekki hvaðan rétturinn fékk þetta stórfenglega nafn en hann er bæði fjölskylduvænn og góður.

Milljón dollara spaghetti

  • 450 gr nautahakk (eða 1 bakki)
  • 1 dós pastasósa
  • 225 gr rjómaostur
  • 1/4 bolli sýrður rjómi
  • 225 gr kotasæla
  • 110 gr smjör
  • 225 gr spaghetti
  • rifinn cheddar ostur

Hitið ofninn í 180°. Sjóðið spaghetti eftir leiðbeiningum á pakkningu. Hrærið saman rjómaosti, sýrðum rjóma og kotasælu þar til það hefur blandast mjög vel. Steikið nautahakkið á pönnu og kryddið eftir smekk. Hellið vökvanum frá og brúnið hakkið vel. Hellið pastasósu yfir og látið sjóða við vægan hita í smá stund.

Leggið smjörklípur í botninn á eldföstu móti (ef smjörið er kallt er gott að nota ostaskera í verkið). Setjið helminginn af spaghettíinu í botninn á eldfasta mótinu. Hellið rjómaostablöndunni yfir spaghettíið og dreifið vel úr henni. Setjið afganginn af spaghettíinu yfir rjómaostablönduna, leggið nokkrar smjörklípur yfir og endið á að hella hakksósunni yfir spaghettíið.  Dreifið vel úr hakksósunni og bakið í 30 mínútur. Eftir 30 mínútur er rétturinn tekinn úr ofninum og rifnum cheddar osti dreift yfir. Setjið réttinn aftur í ofninn í 15 mínútur.

Ofnbakaðar kjötbollur

~ Svava ~ 25 athugasemd

Ég held að það sé óhætt að segja að við höfum smitast af kjötbolludálætinu þegar við bjuggum í Svíþjóð. Okkur þykja þær svo góðar og sérstaklega heimagerðar með alvöru kartöflumús, rjómasósu og sultu.  Við erum þó alls ekki fín með okkur í þessum málum og kjötfarsbollur eru alltaf velkomnar á diskana okkar. Því verður þó ekki neitað að alvöru heimagerðar kjötbollur eru í algjöru uppáhaldi.

Ef ég ætla að slá í gegn hjá fjölskyldunni þá elda ég þessar kjötbollur. Þær eru svo dásamlega góðar og það er lygilega einfalt að búa þær til. Mér þykir gott að gera tvöfalda uppskrift og frysta helminginn. Það er svo góð tilfinning af vita af svona fjársjóði í frystinum sem hægt er að grípa til þegar lítill tími gefst fyrir eldamennsku. Þá læt ég þær frosnar í 175° heitan ofn og leyfi þeim að dvelja þar á meðan kartöflurnar sjóða.

Ég gaf uppskriftina í Fréttablaðinu 6. október sl. en hún þolir vel að vera líka birt hér.

Ofnbakaðar kjötbollur

  • 450 g nautahakk
  • 2 egg
  • 1/2 bolli mjólk
  • 1/2 bolli rifinn parmesanostur
  • 1 bolli brauðmylsna
  • 1 lítill laukur, hakkaður smátt eða maukaður með töfrasprota
  • 2 pressuð hvítlauksrif
  • 1/2 tsk oreganó
  • 1 tsk salt
  • nýmalaður pipar
  • 1/4 bolli hökkuð fersk basilika eða 1/2 msk þurrkuð

Hrærið eggjum og mjólk saman og setjið brauðmylsnuna út í. Setjið öll hráefnin saman í skál og bætið eggjablöndunni við. Blandið öllu vel saman með höndunum eða með hnoðaranum á hrærivél. Mótið bollur og raðið á smjörpappírsklædda bökunarplötu.

Bakið við 180° í ca 30 mínútur eða þar til bollurnar eru eldaðar í gegn og komnar með fallega húð.

BBQ-kjöthleifur

~ Svava ~ 6 athugasemd

Ég kíki stutt inn í morgunsárið þar sem ég náði því aldrei í gær. Við buðum mömmu í mat og eftir matinn fór ég í kvöldgöngu með vinkonum úr hverfinu. Við erum byrjaðar að hittast alltaf á þriðjudagskvöldum og fá okkur göngutúr saman. Þegar ég kom heim í gærkvöldi var ég einfaldlega orðin of þreytt til að setjast niður við tölvuna.

Ég get þó ekki farið í vinnuna án þess að setja inn uppskriftina af bbq-kjöthleifnum sem ég bauð upp á í gærkvöldi. Einfaldur og góður hversdagsmatur.

BBQ-kjöthleifur

  • ca 500 gr nautahakk (1 bakki)
  • 1 franskbrauðssneið, mulin í matvinnsluvél
  • 2 msk + 2 tsk worcestershire sósa
  • 1 msk  dijon sinnep eða annað sterkt sinnep
  • 3/4 bolli bbq-sósa
  • 2 msk hunang
  • 1 tsk salt
  • 1 tsk svartur pipar

Blandið saman í skál nautahakki, brauðmylsnu, 2 msk worcestershire sósu, sinnepi, 1/2 bolla af bbq-sósu, 1 msk hunang, salti og pipar. Blandið vel saman með höndunum. Mótið hleif og setjið á smurða ofnskúffu.

Blandið saman 1/4 bolla af bbq-sósu, 1 msk hunangi og 2 tsk af worcestershire sósu. Smyrjið helmingnum af blöndunni yfir kjöthleifinn og geymið afganginn fyrir sósuna. Setjið kjöthleifinn í 175° heitan ofn í 45 mínútur.

Setjið afganginn af bbq-blöndunni í pott ásamt rjóma (smakkið til hversu mikinn rjóma). Látið sjóða saman við vægan hita. Þegar kjöthleifurinn er tilbúinn er soðinu hellt í gegnum sigti og bætt í sósuna. Bætið ef til vill grænmetisteningi út í og meiri rjóma.