Extra stökkar vöfflur

apríl 14, 2013apríl 14, 2013 ~ Svava ~ 3 athugasemd

Ég held að það séu liðnar tvær vikur síðan ég bakaði þessar vöfflur og ástæðan fyrir því að ég hef ekki sett þær inn er sú að mér fannst þær of stökkar. Þær eru stökkar eins og ég veit ekki hvað. Kannski kartöfluflögur? En Ögga þóttu þær svo æðislega góðar og vill ólmur að ég setji þær á bloggið svo í dag ætla ég að gera það. Fyrir hann.

Mér þykja vöfflur með sultu og rjóma æðislega góðar og eftir að ég keypti mér nýtt vöfflujárn síðasta sumar voru vöfflur hér á borðum annan hvern dag. Við fengum ekki nóg! Við prufuðum hinar og þessar uppskriftir og settum allt sem hugurinn girntist ofan á þær. Ís, ber, rjóma, sultur, súkkulaði, Nutella… allt var prófað og okkur þótti allt gott. Þegar leið á haustið fækkaði vöfflukaffinu og í vetur hefur vöfflujárnið meira og minna fengið að liggja inn í skáp. Nú þegar fer að vora finnum við vöfflulöngunina koma til baka og erum aftur byrjuð að prófa nýjar uppskriftir.

Ég vil hafa vöfflurnar stökkar að utan og mjúkar að innan. Ögga þóttu þessar súperstökku vöfflur frábærar og gestirnir sem voru hjá okkur sögðust vera stórhrifin, en myndu þau kunna við að segja annað? Eitt er víst að vöfflurnar kláruðust upp til agna áður en ég áttaði mig á að ég hafði gleymt að taka almennilegar myndir.

Extra stökkar vöfflur (uppskrift úr Rutiga kokboken)

100 g smjör
3 dl rjómi
1-1½ dl vatn
3½ dl hveiti
2 tsk lyftiduft
2 tsk vanillusykur (má sleppa)

Bræðið smjörið og látið það kólna. Hrærið saman rjóma, vatni, hveiti, lyftidufti og vanillusykri. Hrærið þar til deigið verður slétt. Hrærið smjörinu saman við.

Hitið vöfflujárn og smyrjið með smá smjöri. Bakið vöfflurnar þar til þær eru fallega gylltar á litinn. Berið fram með t.d. rjóma, sultu, ís, berjum…

Gulllans kaka

apríl 13, 2013apríl 13, 2013 ~ Svava ~ 4 athugasemd

Þessi dásamlega mynd náðist af frænkunum um páskana þegar Hrönn hvíslaði leyndarmáli að Malínu. Neglurnar voru lakkaðar og sparidressið á, enda páskadagur þegar myndin var tekin. Í dag blæs Hrönn til afmælisveislu og við hlökkum til að mæta, gefa henni afmælisgjöf og fá knús. Hún er yndisleg.

Ég er að reyna að mana mig í að fara út í göngutúr áður en við förum í afmælið en það er svo hræðilega kuldalegt úti og vindkviðurnar fá mig til að vilja sitja hér inni í hlýjunni fram á sumar. Mig langar mikið meira til að dóla hér í náttsloppnum, fá mér aðra kökusneið og byrja á næsta prjónaverkefni. Eftir langvarandi prjónapásu er ég nú búin að draga fram misheppnaða lopapeysu sem ég ætla að reyna að bjarga. Ég ætti auðvitað að byrja á að troða eigandanum í peysuna og taka fyrir og eftir myndir fyrir bloggið, ef verkefnið skyldi heppnast. Nú rifast líka upp fyrir mér að ég átti eftir að mynda vetlingana sem ég sýndi hér á byrjunarstigi fyrir áramót…

Þegar ég kom heim úr vinnunni í gær ákvað ég að baka köku sem ég hef lengi verið á leiðinni að prufa. Kakan reyndist dásamlega góð og krakkarnir voru alsælir með hana. Kakan fyllir út í heila ofnskúffu og ætti því að duga með kaffinu alla helgina. Og góð er hún. Hættulega góð.

Gullans kaka (uppskrift frá Koka ihop)

Botn:

2 egg
3 dl sykur
150 g smjör, brætt
1,5 dl mjólk
4 dl hveiti
4 msk kakó
1 msk vanillusykur
1 msk lyftiduft

Glassúr

112,5 g smjör
3,75 dl flórsykur
2,25 msk rjómi
1,5 tsk vanillusykur

Skraut

50 g suðusúkkulaði

Botn: Hitið ofninn í 225°. Bræðið smjörið. Hrærið egg og sykur saman. Hrærið hveiti, kakói, vanillusykri og lyftidufti saman við. Bætið bræddu smjörinu og mjólk saman við og hrærið þar til deigið er kekkjalaust. Setjið deigið á bökunarpappírsklædda ofnskúffu (ca. 30×40 cm) og bakið í 12-15 mínútur. Prófið að stinga prjóni í kökuna til að sjá hvort hún sé tilbúin og passið að baka hana ekki of lengi. Látið kökuna kólna alveg áður en glassúrinn er settur á.

Glassúr: Bræðið smjörið og bætið flórsykri, rjóma og vanillusykri saman við. Hrærið þar til blandan er slétt. Breiðið heitan glassúrinn yfir kalda kökuna og látið harðna.

Skraut: Bræðið súkkulaðið og setjið í mjórri bunu yfir kökuna. Látið harðna.

Tortillakaka

apríl 11, 2013apríl 11, 2013 ~ Svava ~ 11 athugasemd

Á mánudaginn eldaði ég fiskinn góða en síðan þá hef ég varla stigið fæti inn í eldhúsið. Á þriðjudagskvöldinu fórum við Öggi með vinahjónum okkar út að borða og í gærkvöldi fór ég í saumaklúbb. Vikan hefur því verið ein allsherjar veisla og mér dettur ekki í hug að enda hana.

Um síðustu helgi vorum við með tortillaköku í matinn sem vakti mikla lukku á heimilinu. Það tók stutta stund að útbúa matinn og hann var dásamlega góður. Mér þykir þetta vera frábær föstudagsmatur. Þegar allir eru þreyttir eftir vikuna en langar samt í eitthvað gott að borða þá geta svona uppskriftir reynst mikill fjársjóður. Tortillukakan er útbúin á 10 mínútum og á meðan hún er í ofninum er salat útbúið, nacos sett í skál og sósurnar opnaðar. Einfaldara getur það varla verið.

Tortillakaka

1 bakki nautahakk (ca 500 g)
1 bréf taco krydd
1 dl vatn
3 tortillakökur
½ bolli ostasósa (er í sömu hillum og mexíkóvörurnar í matvörubúðum)
1½ bolli rifinn ostur

Hitið ofninn í 175°. Steikið nautahakkið á pönnu, kryddið með tacokryddinu og hrærið vatni saman við. Látið malla á pönnunni í nokkrar mínútur eða þar til vatnið er að mestu horfið. Hrærið ostasósu saman við og takið af hitanum.

Setið tortillaköku á bakpappírsklædda ofnskúffu. Það getur verið gott að nota bontlaust springform (þ.e. bara hliðarnar) til að halda utan um kökurnar. Smyrjið 1/3 af nautahakkinu yfir tortillakökuna, setjið 1/3 af rifna ostinum yfir og leggið næstu tortillaköku ofan á. Endurtakið og endið á rifnum osti. Setjið tortillakökuna í ofninn og bakið þar til osturinn er bráðnaður, 15-20 mínútur.

Berið tortillakökuna fram með góðu salati, nachos og sósum eins og sýrðum rjóma, avókadóhræru (avókadó, pressað hvítlauskrif, smá sítrónusafi, cayennepipar og smá sýrðum rjóma hrært saman), salsasósu og ostasósu.

Fiskur með beikoni og eggjasósu

apríl 9, 2013apríl 9, 2013 ~ Svava ~ 12 athugasemd

Ég er alltaf á höttunum eftir einföldum og góðum fiskréttum og í gær hitti ég í mark þegar ég bauð upp á fisk með eggjasósu og beikoni. Þessi réttur var svo mikið betri en ég þorði að vona og féll vel í kramið hjá fjölskyldunni. Þau satt að segja kolféllu fyrir honum og það var í alvöru barist um síðustu bitana. Svo góður var hann.

Ef þú ætlar að elda réttinn þá skaltu alls ekki sleppa beikoninu. Passaðu frekar að hafa nóg beikon því það fer æðislega vel með fiskinum og sósunni. Beikonið kláraðist á undan fiskinum hjá okkur svo næst mun ég hafa meira af því. Svo æðislega gott.

Fiskur:

þorsk- eða ýsubitar
fiskikraftur (teningur)
salt
pipar

Eggjasósa:

2 harðsoðin egg
3 msk smjör
1½ msk hveiti
3 dl mjólk
1 dl rjómi
salt
pipar
steinselja eða dill (má sleppa)

beikon

Skolið og þurrkið fiskbitana og leggið þá á fat. Saltið og piprið vel og leyfið að standa um stund.

Harðsjóðið eggin og hakkið þau fínt (mér þykir gott að skera þau bæði langsum og þversum í eggjaskera). Bræðið smjör í potti og hrærið hveitinu saman við. Hrærið mjólk saman við í smáum skömmtum og þar á eftir rjóma. Látið sósuna sjóða við vægan hita um stund og smakkið til með salti og pipar. Setjið hökkuðu eggin út í sósuna.

Setjið vatn og fisktening í pott og hitið þar til fer að sjóða. Setjið fiskbitana út í sjóðandi vatnið og setjið lokið strax á pottinn. Takið pottinn af hitanum og látið fiskinn liggja í heitu vatninu í ca 10 mínútur.

Steikið beikon og berið það fram með fiskinum, sósunni og kartöflum.

Hafrakökur með rúsínum

apríl 7, 2013apríl 7, 2013 ~ Svava ~ 3 athugasemd

Yfir páskanna heyrðist lítið frá mér þar sem við nutum góðs af því að vera boðin í mat flest kvöldin í páskafríinu. Eftir alla matarveisluna var vikan tekin á léttu nótunum og ég bauð fjölskyldunni upp á hvern óspennandi réttinn á fætur öðrum. Soðinn fiskur, grjónagrautur… matur sem krakkarnir elska en við Öggi ekki.

Ég hef þó verið flott á því þess á milli, bæði yfir páskana og í vikunni sem leið, því ég hef boðið gestum og gangandi upp á nýbakaða hafrakökur með kaffinu eins og enginn sé morgundagurinn. Það gerði ég án þess að hafa nokkuð fyrir því.

Þessi uppskrift að hafrakökum er frábær því deigið er útbúið og síðan geymt upprúllað í frysti. Þegar gesti ber að garði eða kökulöngunin kemur svífandi þá eru einfaldlega skornar sneiðar af deigrúllunni og þeim stungið inn í ofninn. Ég hef meira að segja bara skorið tvær sneiðar og bakað fyrir mig eina þegar ég hef komið heim úr vinnunni. Einfalt og svo ótrúlega gott.

Hafrakökur með rúsínum (uppskrift frá Bon Appétit)

1¼ bolli hveiti
3/4 bolli heilhveiti
½ tsk lyftiduft
½ tsk matarsódi
½ tsk gróft salt
1/8 tsk múskat
1 bolli ósaltað smjör
1 bolli ljós púðursykur
½ bolli sykur
2 stór egg
1 tsk vanilludropar
2 bollar haframjöl
2 bollar rúsínur

Hrærið saman hveiti, heilhveiti, lyftidufti, matarsóda, salti og múskati í skál og leggið til hliðar.

Hrærið saman í hrærivél smjöri, ljósum púðursykri og sykri á hröðum hraða þar til blandan er létt og kremkennd, 2-3 mínútur. Bætið eggjum saman við, einu í einu, og skafið niður með hliðunum á skálinni á milli. Hrærið vanilludropum saman við.

Lækkið hraðann á hrærivélinni í hægan hraða og bætið þurrefnunum saman við í smáum skömmtum. Hrærið þar til hráefnin eru unnin saman en ofhrærið ekki deigið. Hrærið haframjöli og rúsínum varlega saman við.

Skiptið deiginu á tvo bökunarpappíra. Mótið deigin í ílangar rúllur sem eru ca 4 cm í þvermál. Rúllið bökunarpappírnum utan um deigrúllurnar og pakkið þeim svo inn í plast. Frystið deigið í a.m.k. 4 klst. eða upp í 3 vikur.

Þegar á að baka kökurnar er ofninn hitaður í 175°. Takið deigið úr plastinu og rúllið bökunarpappírnum frá. Skerið deigið í ca 1 cm þykkar sneiðar og raðið á bökunarpappírsklædda ofnplötu. Ef það á ekki að baka úr öllu deiginu þá er afganginum pakkað aftur inn og settur í frysti. Bakið kökurnar þar til kanntarnir eru gylltir á lit, 15-18 mínútur.

Brownies með saltri karamellusósu

mars 30, 2013mars 30, 2013 ~ Svava ~ 15 athugasemd

Í lok janúar pantaði ég mér áskrift að Bon Appétit blaðinu. Síðan þá hef ég brunað spennt heim úr vinnunni í von um að blaðið biði mín og það var ekki fyrr en í síðustu viku sem það loksins datt inn um lúguna hjá okkur. Ég var eiginlega búin að gefa upp vonina.

Blaðið reyndist biðarinnar virði og ég hef nú þegar prófað tvær uppskriftir sem hafa báðar slegið í gegn hjá okkur. Þessar brownies með saltri karamellusósu er önnur uppskriftanna og hamingjan hjálpi mér hvað þær voru góðar. Ég bar þær fram í matarboði sem eftirrétt á skírdag og þær einfaldlega fullkomnuðu máltíðina. Klárlega bestu brownies sem ég hef á ævi minni smakkað og ég get ekki beðið eftir tækifæri til að bjóða upp á þær aftur.

Það má gera brownie-kökuna deginum áður. Setjið þá plast yfir hana og geymið við stofuhita. Karamellusósuna má gera með viku fyrirvara. Setjið hana í lokaðar umbúðir og kælið. Hitið hana upp áður en hún er borin fram.

Brownies með saltri karamellusósu (uppskrift úr Bon Appétit)

1 msk kakó
½ bolli (115 g) ósaltað smjör
85 g ósætt súkkulaði (með sem hæsta kakóinnihaldi, helst yfir 80%), hakkað
55 g suðusúkkulaði, hakkað
2/3 bolli hveiti
1 msk instant espresso kaffiduft
1/4 tsk gróft salt
2 stór egg
1 bolli sykur
1 tsk vanilludropar
1/3 bolli grófhakkað suðusúkkulaði

Hitið ofninn í 175°. Smyrjið kökuform sem er 20×20 cm og stráið kakó yfir það. Hellið því kakói frá sem ekki festist.

Bræðið smjör, ósætt súkkulaði og suðusúkkulaði saman í örbylgjuofni eða yfir vatnsbaði og hrærið blöndunni saman í slétt krem. Leggið til hliðar.

Hrærið hveiti, espressó dufti, grófu salti og 1 msk kakó saman í skál. Leggið til hliðar.

Hrærið egg og sykur saman í hrærivél (eða með handþeytara) á hröðustu stillingu þar til blandan verður ljós og þykk, um 2 mínútur. Hrærið vanilludropunum saman við. Hrærið súkkulaðiblöndunni varlega saman við og þar á eftir þurrefnunum. Passið að ofhræra ekki deigið heldur einungis hræra það saman þar til blandan er kekkjalaus. Hrærið 1/3 bolla af grófhökkuðu suðusúkkulaði saman við og setjið deigið í kökuformið.

Bakið þar til prjóni stungið í deigið kemur með mjúkri mylsnu upp, eða í 20-25 mínútur. Takið kökuna úr ofninum og látið kólna í forminu.

Sölt karamellusósa

1/2 bolli sykur
2 msk vatn
2 msk ósaltað smjör, skorið í litla bita
2 msk rjómi
sjávarsalt

Setjið sykur og vatn í lítinn pott og hitið á miðlungsháum hita (ég var með stillingu 5 af 9) þar til byrjar að sjóða. Hrærið í pottinum þar til sykurinn leysist upp. Þegar byrjar að sjóða í pottinum þá er hitinn hækkaður örlítið (ég hækkaði hann í stillingu 6) og hætt að hræra í pottinum. Veltið pottinum annað slagið og burstið niður með hliðunum með blautum pensli. Látið sjóða þar til sykurinn er orðinn fallega gylltur á litinn, það tekur 5-8 mínútur. Takið pottinn af hitanum og hrærið smjöri og rjóma saman við (blandan mun bullsjóða við þetta). Hrærið í pottinum þar til blandan er slétt. Látið karamellusósuna kólna aðeins í pottinum.

Skerið brownies-kökuna í bita, hellið volgri karamellusósunni yfir og stráið sjávarsalti yfir karamellusósuna.

Marineraðar eplasneiðar

mars 28, 2013apríl 1, 2013 ~ Svava ~ 3 athugasemd

Ég hef aldrei verið mikið fyrir epli, ja nema þau séu í kökum. Þá elska ég þau. Ég elska eplakökur svo ég tali nú ekki um heit eplapæ með vanilluís. Oh, hvað ég væri til í svoleiðis núna…

Það gerðist hins vegar um daginn að ég sá spennandi mareningu fyrir epli á Pinterest. Það sem vakti áhuga minn var sítrónusafinn í marineringunni því ég hef alltaf verið veik fyrir sítrónum. Ég ákvað því að prófa, skar eplin niður og setti í mareneringu fyrir kvöldmat og yfir sjónvarpinu um kvöldið dró ég þau svo fram. Það var ekki aftur snúið, fjölskyldan kolféll fyrir þessum marineruðu eplum og meira að segja ég líka. Hver hefði trúað því?

Ég hef varla gert annað síðan en að skera niður og marinera epli. Krakkarnir eru vitlausir í þetta. Ég nota Fuji eplin sem eru seld tvö saman í plastöskjum (hræðilega óumhverfisvænt allt saman en það er nú önnur saga). Þau eru safarík og fersk eins og þau koma af kúnni en eftir að hafa legið í marineringunni í ískápnum verða þau ómótstæðileg. Nánast eins og sælgæti. Prófið!

Marineraðar eplasneiðar

2 fuji epli
1 sítróna
1 appelsína

Skerið eplin í þunnar sneiðar. Kreistið safana úr sítrónunni og appelsínunni og blandið þeim saman í skál. Leggjið eplasneiðarnar í skálina og reynið að láta þær allar liggja í safanum. Geymið í ísskáp í 30 mínútur til 2 klst.

Beikon- og cheddarvöfflur

mars 24, 2013mars 24, 2013 ~ Svava ~ 4 athugasemd

Ég furða mig oft á því hvað ég á morgunþreytta fjölskyldu því það virðist sama hvað ég sef lengi um helgar, ég er alltaf fyrst á fætur. Og ég elska það.

Það er eitthvað við það að koma fram í þögnina á morgnana, sjá morgunsólina skína inn um eldhúsgluggann, kveikja á útvarpinu og dunda sér við að gera morgunmat á meðan fjölskyldan sefur. Þegar þau koma fram er ég yfirleitt búin að ná að leggja á borð og við getum sest niður saman.

Þegar ég gerði þessar cheddar- og beikonvöfflur þá var ég svo spennt að smakka þær að ég beið ekki eftir að neinn kæmi fram. Ég réði ekki við mig og áður en ég vissi af var ég búin að borða tvær vöfflur með pönnukökusýrópi án þess að átta mig á því að ég hafði gleymt hrærðu eggjunum sem ég ætlaði að hafa með þeim.

Þegar ég var búin gekk ég frá disknum mínum, lagði hreinan á borðið og lét sem þetta hafði aldrei gerst. Hver ætti svo sem að sjá að það vantaði tvær vöfflur á diskinn? Enginn.

Beikon- og cheddarvöfflur (uppskrift frá Shutterbean)

2 bollar hveiti
2 tsk lyftiduft
1 tsk matarsódi
½ tsk salt
nýmalaður pipar
1 bolli rifinn cheddar ostur
½ bolli steikt beikonkurl
2 stór egg
1 ½ bolli mjólk
2 msk grænmetisolía (vegetable oil)
hlynsíróp/pönnukökusíróp til að bera fram með vöfflunum

Hitið vöfflujárn. Hrærið saman hveiti, lyftidufti, matarsóda og salti. Setjið ost og beikon saman við og blandið vel.

Hrærið saman í annari skál eggjum, mjólk og olíu. Setjið þurrefnin saman við og hrærið þar til allt hefur blandast. Passið að ofhræra ekki deigið.

Setjið feiti á heitt vöffujárnið. Setjið um ½ bolla af deigi á vöffujárnið og bakið í 3-5 mínútur eða þar til vafflan er gyllt á litinn og osturinn er bráðnaður. Endurtakið þar til deigið er búið. Berið vöfflurnar fram heitar með hlynsírópi.

Tælenskt kjúklingaenchiladas

mars 21, 2013mars 21, 2013 ~ Svava ~ 5 athugasemd

Ég er ekki með neinn móral yfir að hafa boðið upp á sítrónukökuna á mánudaginn en ef einhverjum hefur blöskrað óhollustan þá bæti ég upp fyrir það núna með þessum súperhollu en jafnframt stórkostlega góðu enchiladas.

Það er gerist ekki oft að ég fæ æði fyrir heilsuréttum (sem þessi er svo sannarlega á minn mælikvarða) en þessar kjúklingavefjur hafa átt hug minn allan síðan ég eldaði þær. Mér þóttu þær stórkostlega góðar og ég var í skýjunum yfir að ná að lauma einni vefju frá til þess að eiga í nesti daginn eftir. Og þar var ég sniðug því það var barist um síðustu bitana.

Þessar vefjur eru klárlega nýtt uppáhald hjá okkur og verða eldaðar aftur við fyrsta tækifæri. Ég mæli með að þið prófið þær strax um helgina. Þið eigið ekki eftir að sjá eftir því!

Tælensk kjúklingaenchiladas (uppskrift frá How Sweet It Is)

8 mjúkar tortillukökur
2 kjúklingabringur, soðnar og tættar
1 msk olía
1/2 laukur, hakkaður
1/3 bolli rifnar gulrætur
1/2 bolli rifið hvítkál
4 pressuð hvítlauksrif
1/2 tsk salt
1/2 tsk pipar
4 vorlaukar
1/3 bolli hakkaðar salthnetur + meira sem skraut
1/4 bolli hakkað ferskt kóriander + meira sem skraut
2 ½ bolli létt kókosmjólk
1/3 bolli + 1/2 bolli sweet chili sauce

Hitið ofninn í 175°.

Hitið olíu á pönnu yfir miðlungshita og setjið lauk, hvítkál, gulrætur, hvítlauk og 1/4 tsk salt á pönnuna. Hrærið annað slagið í pönnunni og látið malla þar til grænmetið er orðið mjúkt, 6-8 mínútur. Passið að hafa ekki of háan hita.

Bætið kjúklingnum (það er gott að tæta hann með því að skera soðnar bringurnar í grófa bita, setja þær í skál og hræra þær með handþeytara), vorlaukum, salthnetum, kóriander, salti og pipar á pönnuna. Blandið öllu vel sama og látið malla saman í 1-2 mínútur. Bætið 3/4 bolla af kókosmjólk og 1/3 bolla af sweet chili sósu á pönnuna og látið allt blandast vel saman. Takið pönnuna af hitanum og leggið til hliðar.

Smyrjið eldfast mót sem er 22 x 33 cm. Hrærið saman það sem eftir var af kókosmjólkinni og sweet chili sósunni. Hellið um 1/2 bolla af sósublöndunni í botninn á eldfasta mótinu. Skiptið fyllingunni (sem er á pönnunni) jafnt á tortillukökurnar, rúllið þeim þétt upp og leggið í eldfasta mótið. Hellið afgangnum af sósublöndunni yfir og passið að láta blönduna fara yfir allar tortilluvefjurnar.

Bakið í 20 mínútur. Takið úr ofninum og stráið fersku kóriander og hökkuðum salthnetum yfir. Sósan í botninum á mótinu er of góð til að láta fara til spillis, setjið skeið í mótið og ausið sósunni yfir vefjurnar. Namm!

Starbucks sítrónukaka

mars 18, 2013mars 18, 2013 ~ Svava ~ 22 athugasemd

Ég veit að ég ætti að vera snjöll og byrja vikuna á færslu með einhverri æðislegri hollustu en ég bara ræð ekki við mig. Ég get ekki hætt að hugsa um þessa fersku, mjúku sítrónuköku sem ég bakaði um daginn. Hún var himnesk og mig er búið að langa í hana á hverjum degi síðan. Ég set samt hendina á hjartað og lofa að hún var ekki í kvöldmat hjá okkur í kvöld. Það var fiskur og þið viljið ekki fá uppskriftina að honum. Ég lofa. Það sem þið eigið frekar eftir að vilja er uppskriftina að þessari dásamlegu köku því hún gerir lífið aðeins betra.

Þegar ég er erlendis þá má ég ekki sjá Starbucks stað án þess að vilja rjúka þangað inn. Ég lít þó ekki við kaffinu heldur er það sítrónuformkakan þeirra sem hrópar á mig. Ég man eftir því eins og það hafi gerst í gær þegar ég smakkaði hana fyrst. Mér fannst hún svo stórkostlega góð. Síðan þá hef ég verið veik fyrir henni og næ mér í sneið við hvert tækifæri sem gefst.

Ég rakst á uppskriftina að kökunni á netráfi mínu eitt kvöldið og hjartað tók auka slag þegar ég sá hana. Ég veit ekki af hverju ég hef ekki leitað að uppskriftinni áður en þarna bara var hún, Starbucks sítrónuformkakan.

Ég þori ekki að lofa að þetta sé sama kakan en þessi var svo góð að mér er í raun alveg sama. Þessi heimabakaða Starbuckskaka uppfyllir alla mínar sítrónukökulanganir og ríflega það.

Starbucks sítrónukaka

1 ½ bolli hveiti
½ tsk lyftiduft
½ tsk matarsódi
½ tsk salt
3 egg
1 bolli sykur
2 msk mjúkt smjör
1 tsk vanilludropar
2 tsk sítrónudropar
1/3 bolli sítrónusafi
½ bolli bragðdauf olía (ekki ólívuolía)
hýði af 1 sítrónu

Glassúr

1 bolli flórsykur
2 msk nýmjólk
½ tsk sítrónudropar

Kakan:

Hitið ofninn í 175° og smyrjið formkökuform vel.

Blandið hveiti, matarsóda, lyftidufti og salti saman í skál.

Hrærið saman í annari skál eggjum, sykri, smjöri, vanilludropum, sítrónudropum og sítrónusafa þar til hefur blandast vel. Hrærið blöndunni saman við þurrefnin og hrærið þar til deigið verður mjúkt. Bætið olíu og sítrónuhýði saman við og blandið vel. Setjið deigið í smurt formkökuform og bakið í 45 mínútur eða þar til prjóni sem er stungið í kökuna kemur hreinn upp.

Glassúr:

Hrærið öllu saman og hellið yfir kökuna.