Gamlárskveðja og vinsælustu uppskriftirnar á árinu 2016

Þá er síðasti dagur ársins runninn upp. 2016 var skítaár víða í heiminum og góð áminning um hversu gott það er að búa á Íslandi, langt frá stríðsástandi og þeirri hræðilegu eymd sem margir búa við. Hvað snýr að mér, get ég ekki sagt annað en að ég átti frábært ár! Veðrið lék við okkur og við nýttum það heilmikið í útivist, bæði í göngutúra og á skíðum á meðan opið var í fjallinu. Það fór lítið fyrir innanlandsferðalögum þetta árið, bara ein sumarbústaðarferð, en hins vegar ferðuðumst við til Brussel, Stokkhólms, Spánar, Kaupmannahafnar og Parísar. Strákarnir fermdust og lesendahópur Ljúfmetis stækkaði enn frekar. Ég kveð árið full af þakklæti ♥

Í kvöld verða hér níu manns í mat og mig grunar að ég sé með mat fyrir helmingi fleiri. Ég mun eyða deginum í eldhúsinu, að dekra við kalkúninn og undirbúa meðlætið. Eftirréttirnir eru tilbúnir og forréttinn á bara eftir að setja í ofninn rétt áður en hann verður borinn fram.

Flugeldarnar eru komnar í hús og eru að sjálfsögðu keyptar af björgunarsveit. Ég ætla í tilefni dagsins að birta lista yfir 10 vinsælustu uppskriftir ársins á blogginu, eins og ég hef gert undanfarin ár. Mig langar þó fyrst að þakka ykkur fyrir árið sem er að líða. Takk fyrir lesturinn, kommentin og kveðjurnar. Takk fyrir að vera með mér hér ♥

10 vinsælustu uppskriftirnar á árinu 2016

Vinsælasta uppskrift ársins er kjúklingur með sætum kartöflum, spínati og fetaosti, en sú uppskrift var skoðuð tæplega 300.000 sinnum á árinu og henni hefur verið deilt yfir 10.000 sinnum. Skál fyrir því!

Einföld og góð skúffukaka er önnur vinsælasta uppskrift ársins. Það þurfa allir að eiga sína go-to uppskrift af skúffuköku. Þessi er fullkomin sem slík! Hráefnin eru yfirleitt til í skápunum og því lítið mál að baka þessa dásemd þegar skúffukökulöngunin dembist yfir mannskapinn. Sem gerist auðvitað oft.

Þriðja vinsælasta uppskriftin er uppáhalds bananabrauðið. Ég hef heyrt að þetta brauð sé orðið uppáhalds á fleiri heimilum en mínu og mér þykir vænt það. Þetta brauð er bara svo gott að það hálfa væri nóg.

Pizza sem klikkar aldrei situr í fjórða sæti. Skiljanlega, því það nennir enginn að gera pizzu sem gæti klikkað. Þessi er líka ávísun á gott föstudagskvöld því hún er algjört æði.

Í fimmta sæti er þykk og góð mexíkósk kjúklingasúpa. Svo góð!

Mexíkósku kjúklingasúpurnar viðrast heilla lesendur því í sjötta sæti er önnur mexíkósk súpa, sú sem ég elda hvað oftast. Ef Gunnar fengi að ráð væri þessi súpa í matinn í hverri viku. Ég elda hana að minnsta kosti tvisvar í mánuði, alltaf við mikinn fögnuð heimilismanna!

Ofnbakaðar kjötbollur eru sjöunda vinsælasta uppskriftin. Það er ekki annað hægt en að elska kjötbollur! Með kartöflumús, góðri rjómasósu og sultu væri skammlaust hægt að bjóða kóngi í mat.

Í áttunda sæti eru heimsins bestu súkkulaðibitakökur. Skiljanlega, því þær eru heimsins bestu í alvöru.

Mexíkóskt kjúklingalasagna er níunda vinsælasta uppskrift ársins. Ef einhver hefur ekki prófað þessa uppskrift þá mæli ég með að það verði áramótaheiti hjá viðkomandi. Klikkgott!

Síðast en ekki síst er hakkabuff með fetaosti í tíunda sæti yfir vinsælustu uppskriftirnar á árinu sem er að líða.