Í dag var fyrsti vinnudagurinn minn eftir sumarfrí og lífið því dottið aftur í sína eðlilegu rútínu. Eins og mér þykir æðislegt að vera í fríi þá finnst mér alltaf jafn gaman þegar allt hefst að nýju eftir sumarið. Hversdagsrútínan er notaleg!
Mér þykir svona heimilismatur alveg hreint dásamlega góður og sérstaklega núna þegar það eru nýjar kartöflur í búðunum. Við létum okkur nægja að bera hann bara fram með nýjum kartöflum og sultu en bæði hrásalat og ferskt salat fer auðvitað stórvel með.
Hakkabuff með karamelluseruðum lauki og rjómasósu (uppskrift fyrir 4)
- 600 g nautahakk
- 1/2 dl brauðrasp
- 1/2 dl rjómi
- 1 dl mjólk
- 1 egg
- 1 laukur
- 2 tsk salt
- svartur pipar
- 1 tsk sykur
Blandið rjóma, mjólk og brauðraspi saman í skál og látið standa í 5 mínútur. Setjið hakkaðan lauk, egg, salt, sykur og pipar saman við og notið töfrastaf til að blanda öllu saman. Setjið að lokum nautahakkið saman við og blandið öllu vel saman. Mótið buff og steikið upp úr vel af smjöri.
Karamelluseraður laukur
- 3 gulir laukar
- salt
- sykur
- pipar
- smjör
Skerið laukinn þunnt niður. Bræðið smjör á pönnu og setjið laukinn á. Steikið við miðlungshita (passið að hafa hitann ekki of háann), laukurinn á að mýkjast og fá smá lit. Hrærið annað slagið í lauknum. Setjið salt, sykur og pipar eftir smek undir lokin og látið laukinn karamelluserast.
Rjómasósa
- steikingakraftur frá hakkabuffinu
- 2 dl rjómi
- 2 dl sýrður rjómi
- 1-2 grænmetisteningar
- salt og pipar
- sojasósa
- maizena til að þykkja.
Blandið öllu saman í pott og látið sjóða saman. Smakkið til! Endið á að þykkja með maizena eftir smekk.
Ljúfmeti og lekkerheit 
hæhæ hvað ertu að elda bollurnar leingi og ertu með þær í sósuni á pönnuni 🙂 ein alveg út á túni 🙂