Hryðjuverkaárásin í Stokkhólmi á föstudaginn hefur verið ofarlega í huga mínum yfir helgina. Mér þykir hún svo hræðilega nálægt mér. Ég bjó í Stokkhólmi, á vini þar og fer reglulega þangað. Ég hef svo margoft staðið þar sem árásin átti sér stað, síðast núna í ársbyrjun.

Ég get ekki hætt að hugsa um 11 ára stelpuna sem var að koma úr skólanum og ætlaði að hitta mömmu sína við neðanjarðarlestina, en komst aldrei til hennar. Hvernig mamma hennar leitaði af henni á spítölum borgarinnar í örvæntingu áður en lögreglan bankaði upp á hjá henni. Vörubílsstjórann sem skildi lyklana eftir í bílnum á meðan hann skaust frá og mun eflaust seint jafna sig á því. Myndir af lögreglumönnum sem hikuðu aldrei, heldur hlupu beint að hættunni.

Þegar Viktoría prinsessa var spurð af blaðamanni „hvernig höldum við áfram eftir þetta?“ svaraði hún „í sameiningu“. Það er svo fallegt að sjá samheildina sem myndast við svona aðstæður. Þegar fólk staldrar við og sér hvað það er sem raunverulega skiptir máli í lífinu.

Ég hef verið á leiðinni að setja hingað inn uppskrift af svo góðri klessuköku sem ég bakaði um daginn og það er kannski sérlega viðeigandi að setja hana inn núna. Að baka köku og setjast niður með ástvinum gerir maður aldrei of oft. Njótum stundarinnar og veljum vandlega hvernig við eyðum tímanum.

Sænsk súkkulaðikaka deluxe

• 3 egg
• 3,5 dl sykur
• 1 tsk vanillusykur
• 4-5 msk kakó
• 2 dl hveiti
• 150 g brætt smjör

Krem:

• 50 g smjör við stofuhita
• 2 msk kalt kaffi
• 2,5 dl flórsykur
• 1 msk kakó
• 1 tsk vanillusykur

Yfir kökuna:

• kókosmjöl

Hitið ofninn í 175°.

Bræðið smjörið og látið það kólna aðeins. Hrærið saman egg og sykur. Blandið þurrefnunum saman og hrærið þeim saman við eggjablönduna. Hrærið að lokum smjörinu í deigið. Athugið að þeyta aldrei deigið heldur bara að hræra það saman því ef það myndast of mikið loft í deiginu er hætta á að það verði þurrt. Smyrjið lausbotna form og setjið deigið í það. Bakið kökuna í miðjum ofni í 20-30 mínútur. Kakan á að vera blaut í miðjunni þegar hún er tekin úr ofninum. Látið kökuna standa í ísskáp í nokkra tíma áður en kremið er sett á hana.

Hrærið öllum hráefnunum í kremið saman og setjið yfir kökuna. Stráið kókosmjöli yfir. Geymið kökuna í ísskáp.

Um síðustu helgi bakaði ég köku til að hafa með kaffinu hér heima. Ég bakaði súkkulaðiköku sem við gæddum okkur á alla helgina. Kakan var dásamlega mjúk, með smá kaffikeim og örlítið blaut í sér. Kremið var hvergi sparað og úr varð súkkulaðibomba sem var erfitt að láta í friði.

Núna um helgina, þegar jólaundirbúningurinn fer af stað, þykir mér ósköp huggulegt að vera með köku á eldhúsbekknum til að geta nælt mér í sneið og sneið á milli þess sem aðventuljósunum er stungið í samband og kerti verða sett í aðventukransinn. Það er bara svo notalegt, rétt eins og desembermánuður á að vera. Með jólatónlist í hátölurum, jólaljós í gluggunum og bökunarlykt í húsinu.

Mjúk súkkulaðikaka með kaffikeim og mjúku súkkulaðikremi

Botnar:

• 2 bollar sykur (450 g)
• 1 ¾ bollar hveiti (200 g)
• ¾ bolli kakó (75 g)
• 1 ½ tsk matarsódi
• 1 tsk salt
• 2 egg
• 1 bolli mjólk
• ½ bolli bragðdauf olía
• 2 tsk vanilludropar
• 1 bolli sjóðandi heitt kaffi

Krem:

• 115 g smjör
• 2/3 bolli kakó (70 g)
• 3 bollar flórsykur (450 g)
• 1/3 bolli mjólk
• 1 tsk vanilludropar

Hitið ofninn í 175° og smyrjið tvö 22 cm bökunarform með lausum botni.

Setjið öll þurrefnin í skál. Bætið mjólk, olíu og vanilludropum saman við og hrærið þar til hráefnin hafa blandast vel. Bætið heitu kaffi saman við og hrærið þar til deigið er orðið slétt. Skiptið deiginu jafnt í formin og bakið í 30-35 mínútur. Látið botnana kólna alveg áður en kremið er sett á.

Krem:

Bræðið smjör í potti og hrærið kakó saman við þar til blandan er slétt. Hellið súkkulaði- og smjörblöndunni yfir í skál og bætið vanilludropum og flórsykri saman við. Hrærið að lokum mjólkinni saman við í smáum skömmtum þar til réttri áferð er náð.

Ef þetta veður er ekki kjörið til þess að dunda sér í eldhúsinu þá veit ég ekki hvað. Síðan er jú líka svo brjálæðislega notalegt að setjast niður með nýbakað kvöldkaffi þegar rigningin ber rúðurnar. Ég bakaði um daginn hafrastykki sem strákarnir mínir elskuðu og mig grunar að þeir hafi borðað þau í öll mál daginn eftir því þau voru búin þegar ég kom heim úr vinnunni.

Uppskriftin kemur frá Ree Drummond sem er kannski betur þekkt sem The Pioneer Woman. Ég á nokkrar af matreiðslubókunum hennar og get lofað að uppskriftirnar klikka aldrei! Þessi uppskrift var engin undantekning. Hafrastykkin minna óneytanlega á hjónabandssælu og kannski helsti munurinn sá að það er jarðaberjasulta í þeim. Skemmtileg tilbreyting sem vert er að prófa!

Hafrastykki með jarðaberjasultu – uppskrift frá The pioneer woman

• 200 g smjör
• 250 g hveiti
• 140 g haframjöl
• 200 g púðursykur
• 1 tsk lyftiduft
• ¼ salt
• 1 krukka St. Dalfour jarðaberjasulta (284 g)

Hitið ofninn í 175° og smyrjið (eða klæðið með smjörpappír) form sem er um 22 x 33 cm að stærð.

Blandið saman hveiti, haframjöli, púðursykri, lyftidufti og salti. Skerið smjörið í bita og blandið saman við þurrefnin þannig að úr verði gróf mylsna. Setjið helminginn af mylsnunni í formið og þrýstið henni í botninn á því. Setjið sultuna yfir. Setjið seinni helminginn af mylsnunni yfir og þrýstið aðeins yfir hana.

Bakið í 35-40 mínútur. Látið kólna í forminu og skerið síðan í bita.

Eftir annasömustu viku í langann tíma og alveg svakalega byrjun á helginni þá langar mig að gera alveg ofboðslega lítið í dag. Nýta þetta fallega veður í góðann göngutúr, baka köku með kaffinu og eyða kvöldinu í náttfötum í sjónvarpssófanum horfandi á The Good Wife.

Ef það eru fleiri en ég í bökunarhugleiðingum þá er ég með uppskrift af æðislegri appelssínuköku sem allir kunnu að meta hér á bæ. Yfir kökuna bræddi ég einfaldlega suðusúkkulaði sem fór vel með appelsínubragðinu en það má líka bara sigta flórsykur yfir hana eða gera glassúr úr flórsykri og ferskum appelsínusafa.

Mjúk appelsínukaka

• 1 ½ bolli hveiti
• 1 ½ tsk lyftiduft
• ½ bolli sykur
• 2 egg
• 3 msk mjólk
• ¾ bolli nýkreistur appelsínusafi (u.þ.b. 3 appelsínur)
• ½ bolli olía (ekki ólífuolía)
• 1 tsk vanilludropar
• 5-6 msk fínrifið appelsínuhýði (u.þ.b. 3 appelsínur)
• Smá salt

Hitið ofninn í 175° og smyrjið formkökuform vel.

Sigtið saman þurrefnin í skál og blandið þeim saman.

Hrærið egg, mjólk, appelsínusafa, olíu, appelsínuhýði og vanilludropa saman í annari skál. Blandið þurrefnunum varlega saman við í skömmtum og hrærið þar til allt hefur blandast vel. Passið að hræra ekki deigið of lengi. Setjið deigið í smurt kökuformið og bakið í 30-40 mínútur, eða þar til prjóni sem stungið er í kökuna kemur hreinn upp.

• 130 g brætt smjör
• 2 dl sykur
• 2 egg
• 2 tsk vanillusykur
• 5 dl hveiti
• 2 tsk lyftiduft
• 1 tsk matarsódi
• smá salt
• 1 ½ dl kakó
• 1 ¾ dl súrmjólk
• 75 g grófhakkað dökkt súkkulaði
• 75 g grófhakkað rjómasúkkulaði
• 20 Dumle karamellur, grófhakkaðar

Hitið ofninn í 200° og raðið 12 möffinsformum á ofnplötu (best er þó að setja þau í möffinskökuform sé það til).

Blandið saman hveiti, lyftidufti, matarsóda, vanillusykri, kakói og salti í skál.

Hrærið brædda smjörið, súrmjólk, sykur og egg saman í annari skál. Bætið þurrefnunum saman við og hrærið saman í slétt deig. Hrærið ¾ af hakkaða súkkulaðinu og helmingnum af Dumle karamellunum í deigið. Setjið deigið í möffinsformin og stráið því sem eftir var af súkkulaðinu og Dumle karamellunum yfir. Bakið í miðjum ofni í 15-18 mínútur.

Mikið tekur september vel á móti okkur, með fallegasta haustveðri sem hugsast getur. Haustið hefur alltaf heillað mig, með sínum fallegu litum í náttúrunni og haustloftinu sem er svo brakandi ferskt. Síðan er það rútínan sem á svo vel við mig, þegar skólarnir byrja hjá krökkunum og allt fer í gang. Grillkvöldum er skipt út fyrir súpur og hægeldaða pottrétti og ég tek þessu öllu fagnandi.

Um helgina mun ég ekki bjóða upp á hægeldaðan haustmat heldur hafa strákarnir óskað eftir mexíkóskri kjúklingasúpu annað kvöld á laugardagskvöldinu er ég að fara á árshátíð. Þá munu krakkarnir eflaust borða lasagna sem ég á í frystinum. Ég bauð þó upp á dásamlega hindberjaköku í eftirrétt um daginn sem ég ætla að baka aftur núna um helgina. Kakan er súpereinföld, með bara 5 hráefnum og tekur enga stund að gera. Stundum er það einfalda bara best. Kakan á að vera aðeins blaut í sér og kanturinn seigur, passið því að ofbaka hana ekki. Ég bar kökuna fram heita með vanilluís sem var svakalega gott, en léttþeyttur rjómi fer eflaust líka stórvel með.

Hindberjakaka (uppskrift frá Hembakat)

• 2 egg
• 3 dl sykur
• 3 dl hveiti
• 100 g smjör, brætt
• 2-3 dl hindber, fersk eða frosin

Hitið ofninn í 180°. Hrærið egg og sykur ljóst og létt. Bætið hveiti og bræddu smjöri saman við og hrærið blöndunni varlega saman í deig. Setjið deigið í smelluform (23-24 cm) sem hefur verið smurt eða klætt með bökunarpappír. Setjið hindberin yfir deigið og stráið smá sykri yfir. Bakið í miðjum ofni í 45 mínútur.