Saffransnúðar með marsípani

desember 10, 2012desember 28, 2012 ~ Svava ~ 14 athugasemd

Í gær tendruðum við annað aðventuljós, Betlehemljósið, og í dag eru bara tvær vikur til jóla. Ótrúlegt hvað þessar vikur líða hratt. Mér finnst ég ekki enn hafa náð að skreyta almennilega en það stendur þó til bóta í vikunni.

Ég man varla eftir jafn annasamri og skemmtilegri viku eins og þeirri sem leið. Eftir saumaklúbba og gönguhóp fyrripart vikunnar fór ég á jólahlaðborð á Kolabrautinni á föstudagskvöldinu og á Frostrósartónleikana á laugardagskvöldinu. Við Öggi vorum sérlega spennt fyrir tónleikunum því við buðum Malínu með okkur en það hefur lengi verið draumur hjá henni að fara á Frostrósartónleika. Hún var að vonum glöð þegar við sögðum henni að við værum að fara og það var ekki annað hægt en að smitast af upplifun hennar á tónleikunum. Í vikunni ætlum við Öggi enn og aftur í Hörpu og þá á jólatónleika KK og Ellenar. Þau hafa lengi verið í uppáhaldi og jóladiskurinn þeirra hljómar hér allan desembermánuð. Ég get því varla beðið.

Öggi kom mér á óvart með annarri aðventugjöf. Núna gaf hann mér æðislega bók, stútfulla af girnilegum súkkulaðiuppskriftum. Við Malín erum búnar að liggja yfir bókinni, flett síðunum fram og til baka og okkur langar í allt sem í henni er. Kannski jólagjafahugmynd fyrir sælkera?

Ég endaði vikuna á því að baka jólasnúðana okkar og hef aldrei áður verið jafn sein í því. Ég hef bakað þessa snúða í mörg ár og hef þá alltaf tilbúna fyrir aðventuna. Þeir eru með því besta sem við fáum og það var því mikil gleði á heimilinu þegar ilmurinn af þeim fór að berast um húsið.

Uppskriftin hefur verið í fórum mínum síðan á Svíþjóðarárum okkar. Ég man að það var engin önnur en Charlotte Perelli, sænska söngkonan sem sigraði Eurovision 1999 við lítinn fögnuð íslendinga, sem gaf þessa uppskrift. Ég er eflaust ein af fáum íslenskum aðdáendum hennar og þykir jólaplatan hennar, Rimfrostjul, með þeim fallegri sem ég veit um.

Uppskriftin er mjög stór og ég frysti snúðana alltaf um leið og þeir koma úr ofninum. Það jafnast fátt við að hita sér snúð með kaffinu á aðventunni og þó uppskriftin sé stór þá klárast snúðarnir alltaf fyrir jól.

Saffransnúðar með marsípani

300 g smjör
1 líter mjólk
2 pokar þurrger
2 dl sykur
1 tsk salt
2,2-2,5 lítrar hveiti (ég mæli það aldrei heldur nota bara eins mikið og mér þykir þurfa)
1 g saffran

Fylling

brætt smjör
rifið marsípan
kanilsykur
vanillusykur (má sleppa)

Bræðið smjörið í potti og bætið mjólkinni saman við. Hitið blönduna í 37°.

Setjið gerið í skál og hellið mjólkurblöndunni yfir. Bætið saffran saman við og hrærið aðeins í blöndunni. Bætið sykri og salti saman við.

Hellið hveitinu í lítramál beint úr pokanum (þessu hef ég alltaf sleppt) og bætið saman við mjólkurblönduna. Farið varlega af stað með hveitið og ekki setja allt í einu. Vinnið deigið vel saman og hafið það eins blautt og þið komist upp með til að snúðarnir verði ekki þurrir.

Látið deigið hefast undir viskastykki í 30 mínútur (ég læt það oft hefast aðeins lengur). Hnoðið deigið þá á hveitistráðu borði. Skiptið deiginu í þrjá hluta og fletjið hvern hluta út í aflanga köku.

Smyrjið bræddu smjöri yfir deigið, stráið kanilsykri síðan yfir smjörið, þar næst rifnu marsípani og að lokum smá vanillusykri. Rúllið deiginu upp í rúllu, skerið í sneiðar og setjið í stór muffinsform.

Látið snúðana hefast undir viskastykki í 30 mínútur.

Penslið snúðana með upphrærðu eggi og stráið perlusykri yfir þá.

Bakið við 250° í 5-8 mínútur.

Spaghetti í rjómalagaðri tómatsósu

desember 7, 2012desember 28, 2012 ~ Svava ~ 3 athugasemd

Ég hef lítið stússast í eldhúsinu þessa vikuna þar sem það hefur verið ótrúlegt útstáelsi á mér á kvöldin. Á meðan ég hef setið með vinkonum mínum yfir dýrindis kræsingum hef ég lítið skipt mér af því sem fjölskyldan hefur borðað hér heima. Í gær tók ég þó aftur yfir eldhúsinu og eldaði mjög einfaldan en góðan pastarétt sem tók ekki nokkra stund að gera.

Þessi réttur uppfyllti allar mínar kröfur í gær, það tók enga stund að útbúa hann og öllum þótti hann góður. Krakkarnir fengu sér aftur á diskinn og sumir meira að segja fjórum sinnum. Þau voru öll á einu máli um að rétturinn yrði að fara á bloggið og ég tók undir með þeim. Svona uppskriftir getur verið svo gott að eiga í handraðanum, sérstaklega þegar jólastressið er handan við hornið og enginn tími til að standa við eldavélina.

Spaghetti í rjómalagaðri tómatsósu

2 msk ólívuolía
6 stórir plómutómatar
1 laukur
3 hvítlauksrif
1 grænmetisteningur (mér þykja þeir bestir frá Knorr)
2 tsk hunang
1 tsk balsamik edik
svartur pipar úr kvörn
1½ dl rjómi
2-3 dl vatn sem spaghettíið var soðið í
salt

Sjóðið spaghetti eftir leiðbeiningum á pakkningu.

Skerið tómatana í litla bita og fínhakkið lauk og hvítlauk. Hitið ólívuolíu á pönnu og steikið tómata, lauk og hvítlauk. Bætið grænmetisteningi, hunangi og balsamik ediki á pönnuna og kryddið með pipar. Látið sjóða saman þar til laukurinn er orðinn mjúkur. Lækkið hitann, bætið rjóma saman við og látið sjóða saman um stund. Þegar spaghettíið er tilbúið er 2-3 dl af spaghettivatninu bætt á pönnuna og rétt látið sjóða saman. Að lokum er spaghettíinu bætt á pönnuna og öllu blandað vel saman.

Einföld súkkulaðimús með karamelluhúðuðum hnetumulningi

desember 5, 2012desember 5, 2012 ~ Svava ~ 107 athugasemd

Ég veit að það hefur verið mikið um sætindi hér á síðunni upp á síðkastið en ég hreinlega ræð ekki við mig. Desember er sá mánuður sem ég vil hafa skápana fulla af freistingum og þær eiga huga minn allan.

Þessi súkkulaðimús er í algjöru uppáhaldi hjá okkur og krakkarnir vita fátt betra. Þegar ég býð upp á hana þá eru skálarnar sleiktar og ekkert skilið eftir. Það er mjög einfalt að útbúa hana en þó þýðir lítið að ætla að henda í hana í einhverju fáti þar sem súkkulaðiblandan þarf að kólna vel áður en hægt er að þeyta hana upp.

Því verður ekki neitað að þessi súkkulaðimús er vel sæt og því þykir mér hnetukurlið fara vel með henni. Það væri líka sniðugt að nota hana sem fyllingu í tertu og þá jafnvel með jarðaberjum eða hindberjum.

Einföld súkkulaðimús með karamelluhúðuðum hnetumulningi

1 poki Dumle-karamellur
3 dl rjómi

Karamelluhúðaðar hnetur

4 msk sykur
2 msk smjör
2 dl blandaðar hnetur (t.d. heslihnetur, pekanhnetur og möndlur)

Skerið Dumle-karamellurnar í bita og leggið í skál. Hitið rjómann í potti að suðu og hellið yfir karamellurnar. Hrærið í blöndunni þar til karamellurnar hafa bráðnað og blandan er orðin slétt. Geymið í ískáp yfir nóttu.

Setjið sykur, smjör og hnetur á miðlungsheita pönnu. Hrærið annað slagið varlega í blöndunni. Þegar sykurinn er bráðnaður og byrjaður að brúnast er blöndunni hellt á bökunarpappír og látin kólna. Þegar hnetublandan hefur kólnað er hún grófhökkuð með hníf.

Takið karamellurjómann úr ískápnum og hrærið í hrærivél þar til óskaðri áferð er náð. Setjið í skálar og stráið hnetumulingnum yfir.

Bismarkbrownies með hvítu súkkulaði

desember 4, 2012desember 28, 2012 ~ Svava ~ 13 athugasemd

Ég vil meina að þessi súkkulaðibrownieskaka sé í raun jólaleg kaka, að minnsta kosti jólaleg súkkulaðikaka. Ástæðan fyrir því að mér þykir þetta er að hún er með bismark brjóstsykri og hvítu súkkulaði, sem mér þykir vera svo jólalegt. Hvað sem öðrum finnst þá get ég lofað að hún mun fara vel á hvaða jólaborði sem er og með þeyttum rjóma mun enginn geta staðist hana.

Ég bakaði þessa bismarkbrownies með hvítu súkkulaði fyrir saumaklúbbinn í gær og við kolféllum allar fyrir henni. Þar að auki tók 11 ára sjarmör svo djúpt í árina að segja að þetta væri besta kaka sem hann hafði smakkað. Hann hefði ekki getað gefið mér betra hól og nú hefur hann mig alveg í lófa sínum.

Ef þið ætlið bara að baka eina köku fyrir jólin þá skuluð þið velja þessa. Geymið hana í ísskáp og þegar þið berið hana fram skuluð þið skera hana í bita, raða á fallegan disk og sigta flórsykri yfir. Það ætla ég alla vega að gera. Síðan má alls ekki gleyma rjómanum, hann fullkomnar dásemdina.

Uppskriftina fann ég í sænsku matreiðslublaði, Allt om mat. Ég rétt náði að mynda síðustu sneiðarnar sem enduðu klesstar saman í skál. Ekki láta þessa ógirnilegu mynd fæla ykkur frá kökunni því hún á svo mikið meira skilið.

Bismarkbrownies með hvítu súkkulaði

4 egg
4 dl sykur
200 g smjör
200 g suðusúkkulaði
smá salt
2 dl hveiti
2 msk kakó
1 poki bismarkbrjóstsykur (150 g)

Hvítt súkkulaðideig

2 egg
2 dl sykur
150 g smjör
150 g hvítt súkkulaði
smá salt
1 ½ dl hveiti

Hitið ofninn í 175°. Blandið eggi og sykri saman fyrir bæði deigin í sitthvorri skálinni. Passið að þeyta ekki blönduna heldur bara að hræra henni saman. Bræðið smjörin í sitthvorum pottinum og setjið niðurskorið súkkulaðið út í. Hrærið varlega í pottunum og látið súkkulaðið bráðna í smjörinu. Bætið saltinu saman við.Hellið súkkulaðiblöndunum í eggjablöndurnar. Siktið hveiti og kakó saman við dökka deigið og hveiti saman við hvíta súkkulaðideigið. Hrærið í blöndunum þar til þær verða sléttar.

Leggið bökunarpappír í botninn á skúffukökuformi sem er ca 20×30 cm stórt. Fínmyljið helminginn af bismarkbrjóstsykrinum og grófmyljið hinn helminginn og leggið til hliðar.

Setjið helminginn af dökka deiginu í formið og stráið fínmulda bismarkbrjóstsykrinum yfir. Setjið allt hvíta súkkulaðideigið yfir og síðan seinni helminginn af dökka deiginu. Endið á að strá grófmulda bismarkbrjóstsykrinum yfir. Bakið í miðjum ofni í ca. 30 mínútur. Kakan á að vera svolítið blaut í miðjunni. Látið kökuna kólna og geymið hana helst í ísskáp.

Hvítar súkkulaðitrufflur með piparkökuhjúpi

desember 3, 2012desember 28, 2012 ~ Svava ~ 3 athugasemd

Ég vona að fyrsta aðventan hafi verið öllum góð. Hér á heimilinu var hún tekin með mikilli ró og óhætt að segja að við nutum hennar vel. Jólaskrautið var tínt upp úr kössum og komið fyrir á sínum stöðum, sörurnar voru bakaðar og jólakortin kláruð. Mér var síðan komið á óvart þegar bæði mamma og Öggi tóku upp á því, hvort upp á sitt einsdæmi, að færa mér aðventugjafir. Mamma gaf mér hvítt hreindýr sem ég er búin að koma fyrir á stofuskenknum og Öggi bók, Súpur allt árið, eftir Sigurveigu Káradóttur. Ég varð svo hissa og þótti svo ofboðslega vænt um þessi óvæntu uppátæki hjá þeim.

Það er skemmtileg vika framundan með þremur saumaklúbbum og einu jólahlaðborði. Ég tók að mér að koma með köku í kvöld og er spennt að smakka biskmarkbrownies með hvítu súkkulaði sem er í ofninum. Ilmurinn úr eldhúsinu lofar góðu og ef kakan stendur undir væntingum þá set ég uppskriftina inn.

Núna ætla ég hins vegar að gefa uppskrift af hvítum súkkulaðitrufflum með piparkökuhjúpi sem mér þykja bæði jólalegar og góðar. Malín elskar þessar trufflur og var fljót að klára þær þegar ég útbjó þær fyrir jólablað Morgunblaðsins. Þetta konfekt er til að njóta en ekki geyma því mér þykir það ekki geymast vel. Ég vil hafa piparkökuhjúpinn stökkan en hann mýkist með tímanum. Það hefur þó ekki verið vandamál hjá okkur því þær renna út eins og heitar lummur.

Hvítar súkkulaðitrufflur með piparkökuhjúpi

200 g hvítt súkkulaði
1/2 dl rjómi
25 g smjör
fínrifið hýði af 1/2 sítrónu (passið að taka bara ysta lagið og ekkert af þessu hvíta)
2 msk ferskur sítrónusafi
10-15 fínmuldar piparkökur

Hitið rjómann að suðu í potti. Takið pottinn af hitanum og hrærið smjöri og hökkuðu súkkulaði saman við. Hrærið þar til allt hefur bráðnað saman. Bætið sítrónuhýði og sítrónusafa saman við. Setjið blönduna í ísskáp í að minnsta kosti klukkutíma. Myljið piparkökurnar í matvinnsluvél. Mótið kúlur úr súkkulaðiblöndunni og veltið upp úr piparkökumylsnunni. Geymið í ísskáp.

Karamellutoppar

desember 1, 2012desember 28, 2012 ~ Svava ~ 10 athugasemd

Mér þykir desember án nokkurs vafa vera besti mánuður ársins og fæ alltaf fiðring í magann þegar hann loksins rennur upp. Núna get ég byrjað að skreyta heimilið, klárað jólakortin, hlustað á jólatónlistina og byrjað jólabaksturinn. Ég tók reyndar forskot á smákökubaksturinn þegar ég gerði jólaþáttinn fyrir jólablað Morgunblaðsins en þær kökur eru allar löngu búnar. Það breytir engu því ég er með fullt af spennandi uppskriftum og hugmyndum sem ég hlakka til að prófa mig áfram með. Það er þó ekki alveg kökulaust á heimilinu því ég kom með eitt og annað góðgæti heim af Jóla-Galdra námskeiðinu.

Fimmtudagskvöldið var góð upphitun fyrir jólin og kvöldið var jafn dásamlegt og ég átti von á. Ég mæli svo heilshugar með námskeiðunum hjá Salt Eldhúsi því þau eru svo mikið meira en bara matreiðslunámskeið. Stemmningin sem er á þeim gefur notalega kvöldstund í fallegu umhverfi sem er lærdómsrík en umfram allt skemmtileg. Ég fór á námskeiðið í frábærum félagsskap og birti hér myndir af hópnum í algjöru leyfisleysi. Þið skuluð því skoða myndirnar vel áður en ég fæ símhringingu um að taka þær út.

Við gerðum sitt lítið af hverju á námskeiðinu og ég kom heim með sörur, smákökur, konfekt, rauðkál, paté, chutney og sítrónusmjör. Þar að auki kom ég með allar uppskriftirnar af því sem við gerðum og höfuðið stútfullt af hugmyndum.

Ég lofaði yndislegustu 10 ára stelpu í heimi að láta uppskriftina að karamellutoppunum á bloggið og það síðasta sem ég vil gera er að svíkja hana. Hún er besta vinkona strákanna og saman tókst þeim að klára heila uppskrift af karamellutoppunum á einum degi. Þau gáfu þeim bestu mögulegu einkunn og núna er beðið eftir að ég baki fleiri. Ég varð mjög glöð því þessir toppar voru tilraunastarfsemi hjá mér. Hér kemur uppskriftin fyrir Andreu og aðra sem langar að prófa.

Karamellutoppar

3 eggjahvítur
200 g ljós púðursykur
150 g karamellu kurl (frá Nóa Síríusi)
150 g rjómasúkkulaði með hrískúlum

Stífþeytið eggjahvíturnar og púðursykurinn. Skerið súkkulaðið í smáa bita og hrærið saman við eggjablönduna ásamt karamellukurlinu.

Myndið litla toppa með teskeiðum og bakið við 150°í ca 15 mínútur.

New York Times-brauð

nóvember 28, 2012desember 3, 2012 ~ Svava ~ 32 athugasemd

Það er orðið langt síðan ég setti inn uppskrift að brauði. Upp á síðkastið hefur brauðbakstur minn verið nokkuð einhæfur því ég, eflaust síðust af öllum, uppgötvaði hið margrómaða New York Times-brauð sem einnig gengur undir nafninu „No-knead bread“.

Þetta brauð er meiriháttar gott og þó það þurfi að hefast í amk 12 klst þá er vinnuframlagið í algjöru lágmarki. Ég set hráefnið í skál að kvöldi og rétt hræri því saman með sleif, set plastfilmu yfir skálina og læt hana standa á borðinu þar til daginn eftir. Oftast helli ég deginu þá, sem minnir helst á graut eftir alla þessa hefun, á hveitistráð borð og rétt set það saman í kúlu sem ég læt hefast undir viskastykki í tvo tíma til viðbótar. Ég hef sleppt þessari seinni hefun og verð að viðurkenna að ég fann engan sérstakan mun. Mikilvægast er síðan að baka brauðið í funheitum ofni í lokuðum potti sem er hitaður í ofninum áður en brauðið fer í hann.

Ég smakkaði þetta brauð fyrst á makkarónu-námskeiðinu hjá Salt Eldhúsi og varð mjög spennt að prófa að baka það. Á morgun fer ég á jólagaldra-námskeiðið og ég get ekki beðið. Ég hlakka svo til að eyða kvöldinu í jólaundirbúning og það verður frábært að eiga góðgæti til að njóta yfir aðventuna. Ég ætla að reyna að muna eftir myndavélinni og get þá sýnt ykkur myndir frá kvöldinu.

New York Times-brauð

3 bollar hveiti
¼ tsk þurrger
1 ¼ tsk salt
1 ½ bolli + 2 msk vatn (ég hef það alltaf við stofuhita)

Blandið hveiti, þurrgeri og salti saman í skál og hrærið vatni saman við. Setjið plastfilmu yfir skálina og látið hana standa við stofuhita í amk 12 klst. en helst í 18 klst.

Hellið deginu á hveitistráð borð og stráið hveiti líka yfir degið. Brjótið degið saman þannig að það myndi nokkurs konar kúlu og látið hefast undir viskastykki í 2 klst.

Setjið lokaðan ofnpott í ofn og hitið í 230°. Takið ofnpottinn út, setjið brauðið ofan í hann, lokið pottinum og setjið hann aftur í ofninn í 30 mínútur. Takið lokið af og bakið áfram í 5-10 mínútur.

Kjúklingapasta með spínati og hvítlauk

nóvember 27, 2012 ~ Svava ~ 5 athugasemd

Í kvöld nutum við góðs af því að eiga afgang af kvöldmatnum síðan í gær. Við byrjuðum vikuna á pasta með kjúklingi, sveppum, hvítlauk og spínati ásamt heimabökuðu brauði með pestó og hummus. Þetta var hrein dásemd sem strákarnir voru ekki síður ánægðir með en við Öggi.

Ég eldaði hins vegar allt of mikinn mat og komst síðan að því að Malín myndi borða kvöldmat á stelpukvöldi í félagsmiðstöðinni. Við sem eftir sátum borðuðum á okkur gat en samt sá varla högg á vatni. Ég pakkaði afgangnum inn í ískáp og var ósköp fegin að geta nýtt hann í kvöld. Þá setti ég réttinn í eldfast mót, pipraði og saltaði, og stráði rifnum osti yfir áður en ég setti hann í ofninn. Rétturinn vakti ekki minni lukku í kvöld og kláraðist upp til agna, kannski til að tryggja að hann verði ekki á borðum þriðja daginn í röð 🙂

Kjúklingapasta með spínati og hvítlauk

2 bakkar kjúklingalæri
ólífuolía
3 hvítlauksrif
pipar og gott salt (ég nota salt frá Jamie Oliver með sítrónu og timjan)

Hrærið saman ólífuolíu, pressuðum hvítlauskrifjum, pipar og salti og penslið á kjúklinginn. Eldið kjúklinginn í 180° heitum ofni þar til hann er eldaður í gegn.

1 bakki sveppir
½ laukur
2 hvítlauksrif
1 dós sýrður rjómi
1-2 dl rjómi
1 grænmetisteningur

Sneiðið sveppi , fínhakkið lauk og hvítlauk og steikið við miðlungsháan hita upp úr smjöri. Bætið sýrðum rjóma, rjóma og grænmetisteningi á pönnuna og látið sjóða saman við vægan hita.

Sjóðið pasta eftir leiðbeiningum á pakkningu. Þegar kjúklingurinn er tilbúinn er kjötið hreinsað af beinunum og bætt út í sósuna á pönnunni ásamt soðnu pasta og fersku spínati. Kryddið með pipari og salti og berið fram með ferskum parmesan.

Súkkulaðikaka með kókos

nóvember 25, 2012desember 28, 2012 ~ Svava ~ 14 athugasemd

Öggi hefur oft furðað sig á því hvernig hægt sé að vera jafn mikið jólabarn og ég er. Ég hreinlega ræð ekki við mig og eftir að ég eignaðist börnin náði tilhlökkunin hæðstu hæðum. Til að toppa gleðina þá á ég afmæli 22. desember og strákarnir 27. desember. Við höfum því fulla ástæðu til að fagna desembermánuði sem styttist óðum í.

Ég reyni hvað ég get að sitja á mér og byrja ekki að hlusta á jólalögin og skreyta fyrr en í desemberbyrjun. Ég ætla þó ekki að reyna að neita því að þegar ég er ein í bílnum þá er útvarpið komið á Létt-bylgjuna áður en ég veit af. Í gær fékk ég síðan alveg frábæra hugmynd um að nýta Freemover-stjakana mína sem auka aðventuljós. Þeir eru jú fjórir (og mig dauðlangar í fleiri) og það var því lítið mál að hengja tölustafi á þá til að fá smá aðventustemningu. Nú þarf ég bara að kaupa ný kerti og þá verður þetta klárt. Aðal-aðventustjakinn kemur svo upp fyrir næstu helgi og ég hlakka svo mikið til.

Við ætlum að taka forskot á jólagleðina í dag og fara á fyrsta jólahlaðborð ársins með krakkana. Við Malín lökkuðum neglurnar með uppáhalds litnum í tilefni dagsins. Síðan er ég að spá í að baka smákökur á meðan Öggi hengir upp útiseríurnar (ó, hvað hann verður glaður þegar ég segi honum frá því).

En fyrst ætla ég að gefa uppskrift af slíkri dásemd að það er ekki hægt að lýsa því með orðum hvað hún er góð. Ég hef bakað þessa köku fyrir ótal tilefni, bæði fyrir mig og aðra, og alls staðar slær hún í gegn. Stundum sker ég hana niður í litla bita og þá er hún eins og konfektmoli. Ég veit ekki hversu oft ég hef gefið þessa uppskrift og ég gaf hana meira að segja í Gestgjafanum í haust, en ég hef þó aldrei fyrr gefið hana hér á blogginu.

Súkkulaðikaka með kókos

Botn

200 g smjör
4 egg
5 dl sykur
2 tsk vanillusykur
¼ tsk salt
1 dl kakó
3 dl hveiti

Ofanbráð

200 g gróft kókosmjöl
1 dl síróp
2 dl sykur
1,5 dl rjómi
75 g smjör

Hitið ofninn í 200°. Bræðið smjörið og leggið til hliðar. Hrærið egg og sykur saman. Hrærið vanillusykri, salti og kakói saman við. Bætið hveiti og bráðnu smjörinu saman við og hrærið þar til deigið verður slétt.

Klæðið skúffukökuform með bökunarpappír og setjið deigið í formið. Bakið í miðjum ofni í 15 mínútur.

Á meðan kakan er í ofninum er ofanbráðin gerð. Setjið síróp, sykur, rjóma, smjör og kókosmjöl í pott við meðalháan hita. Látið smjörið bráðna og blandið vel saman. Sjóðið í 5 mínútur.

Þegar kakan hefur verið í ofninum í 15 mínútur er hún tekin út og ofanbráðin smurð varlega yfir. Að því loknu er kakan sett aftur í ofninn og bökuð áfram í 10 mínútur eða þar til hún hefur fengið fallegan lit. Kakan geymist í frysti í allt að 6 mánuði og þá getur verið sniðugt að skera hana í sneiðar og raða í plastbox með smjörpappír milli laga áður en kökunni er stungið í frystinn.

Pastagratin

nóvember 22, 2012nóvember 26, 2012 ~ Svava ~ 9 athugasemd

Ég er ósköp fegin því að sjá fyrir endan á „eldað úr frystinum“ vikunni og er farin að hlakka til að skipuleggja matarinnkaupin fyrir næstu viku. Í kvöld tók ég síðasta matinn úr frystinum, nautahakksbakka, og eftir eru þá bara ís og frosnir ávextir í skyrdrykki fyrir krakkana.

Þeir allra gleggstu gætu munað eftir að ég notaði hálfan beikonsmurost í skinku- og spergilkálsbökuna á þriðjudaginn. Núna notaði ég seinni helminginn í ostasósu til að setja yfir pastagratin. Rétturinn var dásamlega góður og mjög fjölskylduvænn.

Pastagratin

soðið pasta
kjötsósa (steikið 1 bakka af nautahakki, kryddið og setjið niðursoðna tómata eða pastasósu yfir og látið sjóða saman)
kirsuberjatómatar
vorlaukur
mozzarella ostur

Ostasósa

4 dl rjómi
100 g beikonsmurostur
1-2 dl rifinn ostur
salt og pipar

Hitið ofninn í 220°. Sjóðið pasta eftir leiðbeiningum á pakkningu. Steikið nautahakk og kryddið eftir smekk. Setjið góða pastasósu eða niðursoðna tómata yfir og látið sjóða saman.

Setjið rjóma í pott ásamt beikonsmurostinum og látið suðuna koma upp. Bætið rifnum osti í pottinn og látið bráðna saman við. Saltið og piprið og takið af hitanum.

Setjið pastað í eldfast mót og hellið kjötsósunni yfir. Skerið kirsuberjatómata í tvennt og setjið yfir kjötsósuna ásamt niðurskornum vorlauki. Hellið ostasósu yfir og endið á að strá rifnum mozzarella yfir.

Setjið í ofn í um 20 mínútur eða þar til osturinn hefur bráðnað og fengið fallegan lit.