Silvíukaka

~ Svava ~ 48 athugasemd

Þetta er uppáhaldskaka Ögga og sænsku drottningunar, Silvíu. Ég skil það vel því kakan er æðislega góð. Hún er mjög fljótleg í bakstri og hráefnið það einfalt að ég á það alltaf til og hef ég því stundum bakað þessa köku í snatri þegar við höfum fengið gesti óvænt í kaffi.

Í dag byrjaði Öggi loksins í sumarfríi og mér fannst við verða að halda upp á það. Það var því alveg kjörið að baka Silvíuköku og þegar hann kom heim settumst við út á pall og fengum okkur kaffi.

Silvíukaka

  • 2 egg
  • 2 dl sykur
  • 1 dl vatn
  • 2 dl hveiti
  • 2 tsk lyftiduft

Glassúr

  • 75 gr smjör
  • 1 dl sykur (eða flórsykur)
  • 2 tsk vanillusykur
  • 1 eggjarauða
  • kókosmjöl

Hitið ofninn í 175°. Hrærið egg og sykur saman þar til létt og ljóst. Bætið vatninu saman við og hrærið snögglega. Bætið hveiti og lyftidufti út í og hrærið þar til deigið verður slétt. Setjið deigið í smurt bökunarform og bakið í ca 30 mínútur.

Á meðan kakan er í ofninum er glassúrinn gerður. Bræðið smjörið í litlum potti við vægan hita og hrærið sykri, vanillusykri og eggjarauðu saman við.

Þegar kakan er tilbúin er glassúrinn breiddur yfir kökuna og kókosmjöli stráð yfir.

Gratinerað taco

~ Svava ~ 9 athugasemd

Mikið erum við hamingjusöm yfir veðurblíðunni. Í dag tókum við vanillusnúða úr frystinum og pökkuðum niður ásamt drykkjum og hjóluðum í Elliðarárdalinn. Þar var algjör paradís, glampandi sól og umhverfið svo fallegt. Við Malín vorum síðan búnar að ákveða að fara í bíó í kvöld þannig að ég var með fljótlegan en mjög vinsælan rétt í matinn, gratinerað taco með nachos og salati.

Gratinerað taco

  • 800 gr blandað hakk (eða nautahakk)
  • 2 öskjur Philadelfia ostar með lauk og papriku
  • 1 rauðlaukur
  • 1 stór gul paprika
  • 2,5 dl sýrður rjómi
  • 1 dós maísbaunir
  • 2 pokar taco-krydd
  • 1 poki Nachos með ostabragði

Hitið ofninn í 200°. Hakkið rauðlaukinn og skerið paprikuna smátt. Steikið hakkið á pönnu og þegar það er ekki lengur rautt þá er taco-kryddinu bætt við og blandað vel saman. Leyfið að malla um stund og takið svo pönnuna af hitanum. Bætið rauðlauk, papriku og maísbaunum á pönnuna og blandð vel saman. Ef pannan er grunn er hægt að gera þetta í stórri skál.

Smyrjið Philadelfia ostinum í botninn á eldföstu móti og smyrjið síðan sýrða rjómanum yfir Philadelfia ostinn. Breiðið hakkblönduna yfir sýrða rjómann og stingið nachos flögum í þannig að þær standi hálfar upp úr. Í dag átti ég cheddar ost sem ég reif yfir hakkið áður en ég stakk nachos flögunum í. Hitið í ofninum í 6-10 mínútur.

Sem meðlæti hef ég alltaf ferskt salat, nachos, salsa, sýrðan rjóma og guacamole. Ég var með iceberg kál í salatinu í dag og til að hafa það sem stökkast þá sker ég það niður og læt það liggja í ísköldu vatni á meðan ég geri matinn. Prófið, það verður mikið betra.

Heimagerðir hamborgarar

~ Svava ~ 8 athugasemd

Það væsir ekki um okkur þessa dagana. Nýja vöfflujárnið er í stöðugri notkun og í dag langaði strákunum aftur í vöfflur þannig að ég skellti í deig á meðan þeir hlupu út í búð eftir rjóma. Þegar heim var komið þeyttu strákarnir rjómann undir dyggri leiðsögn Malínar á meðan hún náði í suðusúkkulaði upp í skáp og hakkaði niður. Vöfflur dagsins voru því hefðbundnar með sultu og rjóma fyrir utan þær spariklæddu sem fengu vænan skammt af súkkulaði yfir sig. Það eru allir voða glaðir með vöffluæðið þessa dagana og við skiljum ekki hvernig við gátum verið vöfflujárnslaus síðasta árið.

Ég átti leið í Kost í dag. Mér finnst alltaf svo gaman að komast í nýtt vöruúrval en í dag komst ég í það allra besta, uppáhalds Ameríska tímaritið mitt, Fine Cooking. Þegar ég hef farið til Bandaríkjana hefur það verið mitt fyrsta verk að ná mér í það blað því það hefur ekki fengist hér á landi. En núna fékkst það í Kosti og ég vona að það sé komið til að vera. Við ákváðum að prófa strax uppskrift úr blaðinu og grilluðum heimagerða hamborgara sem voru algjört æði.

Hamborgarar

  • 2 msk smjör
  • 2 miðlungsstórir laukar, hakkaðir
  • ca 850 gr nautahakk (2 bakkar)
  • 2 msk estragon (helst ferskt en ég var með þurrkað)
  • 2 msk dijon sinnep (ég notaði 1 msk af dijon sinnepi og eina af þessu)
  • 2 msk Worcestershire sauce
  • gráðostur (ég notaði mjúkan hvítmygluost sem heitir Auður)
  • hamborgarabrauð

Bræðið smjörið á pönnu við miðlungs hita og setjið laukinn á pönnuna. Látið laukinn malla í smjörinu í ca 20 mínútur og hrærið reglulega í honum. Ef ykkur finnst laukurinn vera að dökkna of hratt lækkið þá hitann.

Blandið nautahakki, estragoni, sinnepi og Worcestershire sósu vel saman í höndunum og mótið 5-6 hamborgara. Grillið hamborgarana í lokuðu grilli í ca 3 mínútur, snúið þeim og leggið gráðostasneiðar ofan á. Lokið grillinu aftur og grillið í ca 6 mínútur eða þar til hamborgarnir eru tilbúnir. Síðustu mínúturnar eru hamborgarabrauðin sett á grillið og hituð. Berið hamborgarana fram með karamelluhúðaða lauknum, káli og góðri hamborgarasósu eða hverju því sem hugurinn girnist.

Ljúffeng möndlukaka

~ Svava ~ 26 athugasemd

Það eru ekki mörg ár síðan ég féll fyrir möndluköku en núna þykir mér hún svo góð og alveg ekta kaka til að hafa með kaffinu. Það tekur enga stund að baka hana og ekki skemmir fyrir hvað hún er falleg á borði.

Í gær bakaði ég möndluköku til að hafa með kaffinu. Í sumar hefur deginum seinkað hægt og sígandi hjá okkur og kaffitíminn í gær var ekki fyrr en um fimmleytið. Það var svo hlýtt á pallinum að við ákváðum að borða kökuna þar. Að drekka kaffið á pallinum slær öllu við í notalegheitum á sumrin og við borðum þar eins oft og við getum.  Ég veit þó ekki hvað nágranninn hefur haldið í gær því þegar við sátum og gæddum okkur á nýbakaðri möndlukökunni þá stóð hann og var að grilla kvöldmatinn. Við ákváðum því í snatri að við værum að borða mjög smart og lekkeran forrétt.

Uppskriftina fann ég í nýja veftímaritinu, Home & Delicius. Okkur fannst kakan æðislega góð og ég ætla ekki að segja ykkur hvað það er lítið eftir af henni.

Möndlukaka

  • 75 gr smjör
  • 1 dl sykur
  • 2 egg
  • 2 1/2 dl hveiti
  • 2 tsk lyftiduft
  • 1/2 tsk salt
  • 1 tsk möndludropar
  • 1 dl mjólk

Hitið ofninn í 180°. Hrærið saman smjöri og sykri þar til létt og ljóst. Bætið eggjum saman við einu í einu og hrærið vel. Bætið þurrefnum saman við ásamt möndludropum og mjólk. Hrærið þar til deigið verður slétt og kekkjalaust. Setjið deigið í smurt bökunarform (ég notaði 22 cm form til að fá kökuna aðeins hærri) og bakið í 20 mínútur (ég hafði kökuna í 25 mínútur). Passið að baka hana ekki of lengi svo hún verði ekki þurr.

Glassúr

  • 3 dl flórsykur
  • 1 msk heitt vatn
  • 1 msk Ribena sólberjasafi

Blandið vatni og Ribena sólberjasafanum saman. Hrærið flórsykur og djúsblöndu saman þar til kekkjalaust. Mér fannst kremið of þykkt og bætti því smá meira af vatni saman við. Hellið kreminu yfir kökuna og berið fram.

Kjúklinganaggar með basilikusósu

~ Svava ~ 5 athugasemd

Þessir kjúklinganaggar vekja alltaf lukku hjá börnunum og okkur þykja þeir svo miklu betri heldur en keyptir naggar. Það er varla hægt að líkja þeim saman.

Mér finnst þetta vera ekta föstudagsmatur sem hægt er að borða fyrir framan sjónvarpið. Ég fylli stóran disk af nöggum, set franskar kartöflur í skál, sósur í litlar skálar og legg á sjónvarpsborðið. Með þessu hef ég síðan ískalt gos.

Það er eflaust best að gera brauðraspinn sjálfur en ef ég á að vera hreinskilin þá nota ég alltaf ströbröd frá Euroshopper. Hann er fíngerðari en íslenski raspurinn og mér finnst hann passa svo vel á naggana. Krakkarnir borða naggana með kokteilsósu, tómatsósu og frönskum en við Öggi fáum okkur salat og basilikusósu með þeim.

Kjúklinganaggar

  • 500 gr kjúklingabringur
  • 1 egg
  • 1 dl brauðraspur
  • 1/2 dl fínrifinn parmesan (má alveg vera keyptur tilbúinn)
  • 1 tsk sítrónupipar
  • smá salt
  • smjör og olía til að steikja í

Basilikusósa

  • 2 dl sýrður rjómi
  • 1 búnt fersk basilika
  • 1/2 tsk salt

Skerið kjúklingabringurnar í bita. Hrærið eggið létt með gaffli. Blandið í annari skál saman brauðraspi, parmesan, sítrónupipar og salti. Dýfið kjúklingabitunum fyrst í hrærða eggið og síðan í brauðraspblönduna. Steikið bitana í blöndu af smjöri og olíu þar til þeir fá fallegan lit. Ég hef pönnuna á miðlungsháum hita (stillingu 7 af 9) til að þeir nái að eldast í gegn án þess að brenna. Passið að kjúklingurinn sé steiktur í gegn.

Maukið basilikuna með töfrasprota í smá sýrðum rjóma. Blandið saman við restina af sýrða rjómanum og saltið.

Stökkar vöfflur

~ Svava ~ 8 athugasemd

Mér þykja vöfflur svo góðar og vil hafa þær stökkar að utan og mjúkar að innan. Hér áður fyrr gerði ég oft vöfflur en fyrir ári síðan gaf vöfflujárnið mitt upp öndina. Ég er búin að vera á leiðnni síðan þá að fá mér nýtt og lét loksins verða af því í dag. Það var því  upplagt að hafa vöfflur með kaffinu.

Þó að sulta og rjómi sé æðislega gott á vöfflur getur verið gaman að breyta til. Það er til dæmis hægt að bragðbæta þær með því að setja fínrifið sítrónuhýði, vanillusykur eða kakó út í deigið. Ég hef stundum haft vöfflur í eftirrétt og er þá búin að gera deigið tilbúið þannig að ég er enga stund að baka nokkrar vöfflur eftir matinn. Ég set þá góðan vanilluís, fersk ber og heita karamellusósu á þær. Það er æðislega gott. Í dag áttum við Nutella síðan ég bakaði bananakökuna með Nutella kreminu í fyrradag. Við smurðum því vöfflurnar með Nutella, brutum þær saman og settum rjóma, sultu og rifið súkkulaði á þær. Þvílík dásemd.

Vöfflur

  • 4 egg
  • 6 dl sódavatn (án bragðefna)
  • 6 dl hveiti
  • 4 tsk lyftiduft
  • 4 msk sykur
  • 3/4 tsk salt
  • 200 gr smjör

Bræðið smjörið og látið það kólna. Hrærið eggjunum saman og bætið sódavatninu saman við. Blandið þurrefnunum saman og hrærið saman við eggjablönduna þar til bandan er kekkjalaus. Hrærið að lokum smjörinu út í deigið. Ef þið hafið tíma þá er gott að láta deigið standa í kæli í  klukkutíma áður en þið bakið vöfflurnar. Til að fá vöfflurnar vel stökkar að utan þá er gott að smyrja vöfflujárnið með smjöri áður en þær eru bakaðar.

Laksa með kjúklingi

~ Svava ~ 5 athugasemd

Ég elska núðlusúpurnar á Núðluskálinni á Skólavörðustíg og þessi súpa minnir óneitanlega á þær. Uppskriftina fann ég í sænskri matreiðslubók sem heitir Kärlek, oliver och timjan. Þetta er gullfalleg bók eftir mægður og það er vel þess virði að eignast hana þó ekki væri nema bara til að skoða myndirnar því þær eru æðislegar. Uppskriftin er fyrir þrjá en við Öggi kláruðum súpuna upp til agna. Ég myndi því segja að hún sé fyrir tvo svanga.

  • 200 gr eggnúðlur
  • 4 skarlottulaukar
  • 100 gr ferskar baunaspírur eða 50 gr ferskt spínat
  • 1/2 lime í þunnum sneiðum
  • 2 kjúklingabringur
  • 1 msk jarðhnetuolía eða önnur olía
  • 5 cm bútur af fersku engiferi
  • 2 hvítlauksrif
  • 1/2 – 1 ferskt rautt chili
  • ca 2 msk rautt curry paste
  • 4 dl kókosmjólk
  • 4 dl vatn
  • 1 kjúklingateningur
  • 1-2 msk fiskisósa
  • ferskt kóriander eða basilika

Takið hýðið af laukunum og skerið hann í þunnar sneiðar. Skolið baunaspírurnar eða spínatið vel. Skolið lime-ið og skerið í mjög þunnar sneiðar. Skrælið engiferið og skerið í örþunnar sneiðar. Takið hýðið af hvítlauknum og skerið í þunnar sneiðar. Fræhreinsið chili og skerið í þunna strimla. Skerið kjúklingabringurnar í þunnar sneiðar. Leggið þetta til hliðar á meðan súpan er undirbúin.

Leggið núðlurnar í pott með sjóðandi vatni og sjóðið þar til þær eru tilbúnar (ca 5 mínútur). Látið renna af núðlunum í sigti og skiptið þeim í 3 skálar. Setjið laukinn, baunaspírurnar eða spínatið og limesneiðarnar ofan á.

Steikið hvítlaukinn í olíu, bætið engiferi og curry paste í pottinn. Það er mikilvægt að láta curry paste-ið hitna það mikið að það sjóði því þá fyrst kemur bragðið fram og það fer að ilma dásamlega í eldhúsinu.

Bætið núna kókosmjólkinni saman við í smáum skömmtum. Hrærið vel á milli þannig að curry paste-ið nái að blandast vel með kókosmjólkinni í hvert skipti. Bætið síðan vatninu út í og kjúklingakraftinum. Látið suðuna koma upp og bragðbætið með fiskisósunni. Leggið kjúklingabitana í og látið sjóða í 5-7 mínútur eða þar til kjúlingabitarnir eru soðnir í gegn. Smakkið súpuna til og bætið ef til vill meiri fiskisósu út í og jafnvel smá sykri.

Bætið súpunni í skálarnar (ofan á núðlurnar, baunaspírurnar og limesneiðarnar) og látið hana standa í 2 mínútur til að brögðin nái að blandast. Skreytið með fersku kóriander eða basiliku  og leggið rauðu chilistrimlana yfir.

Bananakaka með Nutella kremi

~ Svava ~ 14 athugasemd


Það er svo gaman að sjá hvernig hverfið fyllist af lífi í góðu veðri. Strákarnir mega varla vera að því að koma inn í kvöldmat og þegar þeir koma inn á kvöldin eru þeir með grasgrænu á hnjánum, skítugir upp fyrir haus og gleðin geislar af þeim. Það er mikið brallað, í gær var verið að smíða leynikofa og deginum áður voru þeir að veiða síli. Það er sjaldan dauð stund og þegar ég hafði orð á því einn daginn hvað þeir væru skítugir þá leit Jakob á mig og sagði; Mamma það er sumar, börn eiga þá að vera skítug. Svei mér ef það er ekki bara rétt hjá honum. Ég held að ég vilji miklu frekar fá þá heim með grasgrænu á hnjánum en eins og nýstraujað sellófan. Í gær var veðrið einmitt svo fallegt og krakkarnir voru úti að leika langt fram á kvöld. Mér fannst því alveg kjörið að dunda mér í eldhúsinu og vera með kvöldkaffi þegar þau kæmu inn.

Ég hef aldrei verið mikið fyrir Nutella en krakkarnir mínir elska það og þegar ég sá þessa uppskrift á Pinterest þá vissi ég strax að hún yrði vinsæl hjá þeim. Ég þurfti því ekki að hugsa mig tvisvar um hvað ég ætti að baka. Það er óhætt að segja að kakan hitti í mark. Ég smakkaði hana og verð að viðurkenna að banani og Nutella passa saman eins og hönd í hanska. Þessa á ég eftir að baka oftar.

Bananakaka

  • 125 gr smjör við stofuhita
  • 1 1/2 bolli sykur
  • 2 1/2 bolli hveiti
  • 1 1/2 tsk lyftiduft
  • 1 tsk matarsódi
  • 1 tsk salt
  • 1 1/2 bolli stappaðir bananar (um 3 bananar)
  • 2 egg
  • 1 1/2 tsk vanilludropar
  • 1/2 bolli nýmjólk
  • 1/2 msk sítrónusafi
Nutella krem
  • 1/2 bolli Nutella
  • 50 gr smjör
  • 3 bollar flórsykur
  • 2 góðar msk mjólk eða rjómi

Blandið saman nýmjólk og sítrónusafa og látið standa í 5 mínútur. Hrærið smjör og sykur vel saman í hrærivél. Bætið hveiti, salti, lyftidufti og matarsóda saman við smjör og sykurblönduna og hrærið þannig að allt blandist vel. Bætið næst bananastöppu, sítrónumjólk, eggjum og vanilludropum út í og hrærið áfram í tvær mínútur. Setjið deigið í smurt bökunarform (24 cm) og bakið við 180° í 60-70 mínútur eða þar til bökunarprjóni stungið í kökuna kemur hreinn upp. Látið kökuna kólna alveg áður en Nutella kremið er sett á.

Hrærið saman í hrærivél smjöri og Nutella. Bætið flórsykri saman við smátt og smátt. Endið á að setja mjólk eða rjóma út í og hrærið þar til kremið fær fallega áferð. Smyrjið kreminu á kökuna.

Berið kökuna fram með ískaldri mjólk.

Beikonvafin pylsubrauð með rækjuostafyllingu

~ Svava ~ 8 athugasemd

Ég sá þessa uppskrift fyrst nýlega á erlendu matarbloggi og fannst hún alveg galin. Síðan fór ég að sjá hana á fleiri matarbloggum og allir virtust sammála um að þetta væri galið gott. Ég mátti því til með að prófa. Og þetta er galið gott. Það fannst okkur öllum.

  • pylsubrauð
  • rækjusmurostur
  • beikon

Hitið ofninn i 225°. Smyrjið pylsubrauðið með rækjusmurosti og vefjið beikoni utan um það. Reiknið með 3-4 beikonstrimlum á hvert pylsubrauð. Ég var með 10 pylsubrauð og notaði nánast heilt box af rækjusmurostinum. Raðið fylltu pylsubrauðunum á ofnplötu og bakið í ca 15-20 mínútur eða þar til beikonið er tilbúið. Berið fram með góðu salati.

Sænskir vanillusnúðar

~ Svava ~ 5 athugasemd

Mér finnst svo notalegt að eiga heimabakaða snúða í frystinum sem hægt er að laumast í og hita með kaffinu. Ég á þá samt sjaldnast lengi því hér klárast þeir alltaf eins og skot. Ég baka oft sænska kanelsnúða en þegar ég sá uppskriftina að þessum vanillusnúðum þá bara varð ég að prófa. Þeir voru æðislega góðir og hurfu allt of fljótt.

Uppskriftina fann ég á sænsku matarbloggi. Hún er mjög stór, ca 60-70 snúðar, en mér finnst alveg eins gott að gera vel af þeim fyrst ég er að þessu á annað borð. Ef þið ætlið að frysta snúðana þá er best að setja þá í plastpoka á meðan þeir eru heitir, loka vel fyrir og frysta strax. Það má síðan taka þá út eftir behag og hita í stutta stund í örbylgjuofninum.

Snúðar

  • 2 pakkar þurrger
  • 350 gr smjör
  • 10 dl nýmjólk
  • 4 dl sykur
  • 2 tsk góður vanillusykur
  • smá salt
  • 2,5 – 3 lítrar hveiti

Fylling

  • 5 eggjarauður
  • 2-3 dl sykur
  • 300 gr smjör við stofuhita
  • 4 tsk góður vanillusykur

Bræðið smjör og bætið síðan mjólkinni í pottinn og hitið að 37°. Setjið gerið í skál og hellið hluta af mjólkurblöndunni yfir og leyfið gerinu að taka við sér.  Bætið restinni af mjólkurblöndunni saman við ásamt hveiti, sykri, salti og vanillusykri. Passið að setja ekki of mikið hveiti því þá verða snúðarnir þurrir.  Leyfið deiginu að hefast á hlýjum stað í ca 1 klst. Ef þú gerir hálfa uppskrift dugar að leyfa því að hefast í 30 mínútur.

Á meðan deigið er að hefast getur þú gert fyllinguna. Hrærið saman eggjarauðum, sykri, vanillusykri og smjöri við stofuhita. Það má líka byrja að raða formum á ofnplötu.

Þegar deigið hefur hefast er því skipt í 4-6 hluta. Fletjið einn hluta út í einu, smyrjið á hann vanillukreminu og alls ekki spara það, snúðarnir verða bara gómsætari með vel af fyllingunni. Rúllið deiginu upp, skerið í sneiðar og leggið í fomin. Leyfið snúðunum að hefast í ca 30-40 mínútur. Það er mikilvægt að leyfa þeim að hefast þennan tíma til að þeir verði léttir í sér.

Rétt áður en snúðarnir fara í ofninn eru þeir penslaðir með hrærðu eggi og stráð perlusykri yfir. Bakið í 200-225° heitum ofni í ca 10-12 mínútur.