Mexíkó pizza

~ Svava ~ 16 athugasemd

Fyrir tæpum 10 árum pantaði ég mér pizzaofn frá Ítalíu. Ofninn pantaði ég á netinu og beið svo lengi eftir honum að ég var nánast búin að gefa upp vonina þegar það loksins kom tilkynning frá póstinum. Síðan ég eignaðist ofninn hef ég gert pizzur nánast í hverri viku. Ég nota alltaf þessa uppskrift að pizzabotninum og geri oftast eina og hálfa uppskrift. Það dugar í fjórar til fimm 12″ pizzur.

Þetta er núna uppáhalds pizzan okkar Ögga. Krakkarnir vilja alltaf sama áleggið á pizzurnar sínar en við hjúin erum alltaf að prófa eitthvað nýtt. Lengi vel settum við hráskinku og sveppi á pizzuna og þegar hún kom úr ofninum þá settum við ruccola salat yfir hana. Á tímabili var humarpizza málið og einhverntímann settum við hefbundið álegg og brutum svo egg yfir pizzuna áður en hún fór í ofninn og þá spældist eggið í ofninum. En núna hefur mexíkó pizzan skotið hinum ref fyrir rass og við lítum ekki við öðrum. Ég held að þessi sé komin til að vera. Hún er algjört æði og við fáum ekki nóg af henni. Þið bara verðið að prófa.

Pizzabotn

  • 1 tsk sykur
  • 2 msk matarolía
  • 2 dl vatn (37°heitt)
  • 1 tsk ger
  • 1/2 tsk salt
  • 400 gr hveiti

Hráefnið er sett í skál í þessari röð og hnoðað vel saman. Farið varlega í hveitið, ég mæli það aldrei heldur set það smá saman út í þar til deigið sleppir skálinni. Leyfið deiginu að hefast á meðan áleggið er tekið til og ofninn hitaður.

Álegg

  • salsasósa
  • mexíkóostur, rifinn
  • pepperóní (kjarnafæði)
  • rauðlaukur
  • maísbaunir
  • rjómaostur
  • mozzarellaostur, rifinn
  • sýrður rjómi
  • nachos (okkur finnst svart Doritos best)

Hitið ofninn í 220°. Þegar deigið hefur fengið að hefast aðeins þá er því skipt niður í eins marga bita og þú ætlar að hafa pizzurnar.  Fletjið deigið út, setjið salsasósu yfir botnin og rífið mexíkóostinn yfir. Leggið pepperóni, rauðlauk og maísbaunir yfir. Setjið smá klípur af rjómaosti vítt og dreift yfir pizzuna og endið á að setja rifinn mozzarellaost yfir herlegheitin. Bakið í ofninum þar til osturinn er bráðinn og komin fallegur litur á pizzuna. Takið pizzuna úr ofninum, setjið sýrðan rjóma og gróft mulið nachos yfir pizzuna.

Marengsterta með sítrónukremi og bláberjum

~ Svava ~ 11 athugasemd

Marengsterta hlýtur að vera það léttasta sem hægt er að baka. Það þarf einfaldlega að hræra eggjahvítur og sykur nógu lengi saman. Það má síðan alltaf bæta sítrónusafa eða kakói út í, skipta hvítum sykri út fyrir púðursykur eða af hverju ekki að strá möndluflögum yfir botninn áður en hann fer í ofninn.

Um síðustu helgi átti ég afgang af lemoncurd og nokkrar eggjahvítur og fannst kjörið að nýta það í marengs. Ég átti líka Rice crispies og úr varð einföld en dásamlega góð og sumarleg terta.

Marensbotnar

  • 4 eggjahvítur
  • 2 dl sykur
  • 3 dl rice crispsies

Hitið ofninn í 125° og klæðið tvö bökunarform með bökunarpappír í botninn og smyrjið hliðarnar. Hrærið eggjahvíturnar þar til þær verða hvítar og léttar. Bætið sykri út í og hrærið þar til blandan myndar stífa toppa. Hrærið Rice crispies varlega út í og skiptið deginu í formin. Bakið í 80 mínútur. Látið botnana kólna áður en sett er á þá.

Sítrónucurd

  • 1,5 dl. sykur
  • 2 stór egg
  • hýði af 2 stórum sítrónum og ca 3/4 dl. af ferskum sítrónusafa
  • 50 gr. smjör við stofuhita

Setjið sykur, egg, fínrifið sítrónuhýði og sítrónusafann í hitaþolna skál og setjið yfir sjóðandi vatn. Hrærið stöðugt með handþeytara (ekki rafmagns) svo að eggin hlaupi ekki í kekki. Blandan á að ná svipaðri þykkt og hollandaissósa. Þegar blandan hefur náð réttri þykkt er hún tekinn af hitanum og smjörinu hrært saman við. Þegar smjörið er bráðnað er sítrónucurdið sett í lokaða krukku, það geymist í rúma viku í ískáp.

  • 1/2 l rjómi, þeyttur.

Ég átti smá afgang af sítrónucurdi en ekki nógu mikið til að setja á heila tertu. Ég tók því af þeytta rjómanum og blandaði saman við sítronucurdið. Úr varð létt og sumarlegt sítrónukrem, æðislega gott.

Setjið annan marengsbotninn á kökudisk. Það er gott að setja smá af þeytta rjómanum undir botninn svo hann renni ekki til á kökudiskinum. Smyrjið þunnu lagi af sítrónukreminu á botninn og síðan þeytta rjómanum yfir sítrónukremið. Leggið seinni botninn ofan á, annað lag af sítrónukremi og þeytta rjómann efst. Leggið vel af berjum ofan á kökuna og njótið.

Pasta Alfredo

~ Svava ~ 8 athugasemd

Í kvöld eldaði ég pasta með Alfredo sósu og pönnusteiktu grænmeti. Mér finnst Alfredo sósan svo mild og góð og hún fer dásamlega vel með pasta, kjúklingi og grænmeti. Börnin mín myndu seint kvarta ef þau fengju bara pastað með sósunni en mér finnst kjörið að plokka fram það grænmeti sem ég á í ískápnum og leyfa því að fljóta með. Það getur verið allt frá sveppum, papriku, kúrbít, spergilkáli, rauðlauk og sætri kartöflu. Ég nota bara það sem ég á, sker það niður, baka í ofni eða steiki á pönnu við miðlungsháan hita og krydda með salti og pipar og jafnvel einhverju góðu kryddi, t.d. töfrakryddinu eða kryddi lífsins frá Pottagöldrum. Ef ég á kjúklingabringu þá hika ég ekki við að bæta henni við.

  • Pasta
  • 110 gr smjör
  • 1-2 hvítlauksrif, hakkað
  • 1/2 l rjómi
  • 1 bolli ferskrifinn parmesan ostur
  • 2 msk rjómaostur
  • salt
  • pipar

Bræðið smjörið í potti við miðlungshita. Þegar smjörið er bráðið þá er hvítlauknum bætt út í og leyft að sjóða við vægan hita í 2 mínútur. Bætið rjóma og rjómaosti í pottinn og hitið að suðu. Takið pottinn af hellunni og hrærið parmesan ostinum út í. Piprið og saltið og smakkið til.

Sjóðið pastað eftir leiðbeiningum á pakningu. Það er auðvitað best að hafa ferkst pasta en ég á það sjaldnast til. Blandið pönnusteiktu eða ofnbökuðu grænmeti við og hellið ljúffengri Alfredo sósunni yfir. Endið á nokkrum snúningum með piparkvörninn og rífið ferskan parmesan ost yfir diskinn. Ef það verður afgangur af Alfredo sósunni þá er kjörið að setja hana í lekkera krukku og geyma í ískápnum.

Sveppasúpa

~ Svava ~ 16 athugasemd

Mér finnst eitthvað notalegt við súpur og hef yfirleitt súpu einu sinni í viku. Krakkarnir eru hrifin af þeim og þessi sveppasúpa er ein af þeirra uppáhalds. Áður en ég ber súpuna fram leyfi ég töfrasprotanum að mauka sveppina niður.  Það gerir súpuna ekki bara barnvænni heldur gefur henni dásamlegt sveppabragð og skemmtilega áferð.

  • 400 gr sveppir
  • 1 laukur (ég átti ekki lauk og notaði 4 skarlottulauka í staðinn)
  • 2 hvítlauksrif
  • olía
  • 2 dl rjómi
  • 6 dl vatn
  • 1 kjúklingatengingur
  • 1 grænmetisteningur
  • 3 dl mjólk

Sneiðið sveppina, afhýðið laukinn og hvítlauksrifin og hakkið smátt. Steikið sveppina og hökkuðu laukana í nokkrar mínútur í stórum potti í smá olíu. Bætið vatni, mjólk, rjóma og teningum í pottinn og látið sjóða við vægan hita í ca 15 mínútur. Smakkið til og bætið ef til vill smá salti út í eða hálfum grænmetisteningi. Setjið í lokin töfrasprota í pottinn og maukið sveppina niður þannig að súpan verður slétt. Það er líka hægt að nota matvinnsluvél ef töfrasprotinn er ekki fyrir hendi.

Með súpunni borðuðum við síðustu sneiðarnar af brauðinu góða sem ég skar í sneiðar, smurði með smjörva og Dijon sinnepi og reif Gouda og Cheddar ost yfir. Stakk svo í 200° heitan ofninn þar til osturinn var bráðnaður.

Hakkabuff í rjómasósu

~ Svava ~ 3 athugasemd

Í kvöld ákváðum við að fara í bíó að sjá frönsku myndina, Intouchables, og var því hálfgerður skyndibiti hér á borðum. Það kom þó ekki að sök því hér eru allir sáttir við hakkabuff og mér finnst þetta vera fínasti hversdagsmatur. Uppskriftin er ekki heilög og breytist eftir veðri og vindum. Það sama á við um meðlætið. Hvort sem það er sulta, tómatsósa, sinnep, grænar baunir, rauðkál, ferskt salat eða hrásalat, það breytir engu. Þetta er alltaf gott.

Hakkabuff

  • 800 gr. blandað hakk (ég nota yfirleitt einn bakka af nautahakki og einn af svínahakki sem ég blanda saman)
  • 1 dl vatn
  • 1 egg
  • 1 msk kartöflumjöl
  • 2 tsk þurrkað timjan
  • 1 tsk þurrkað rósmarín
  • salt
  • pipar
Rjómasósa
  • 3 dl kjötkraftur (vatn og teningur eða fljótandi kraftur)
  • 3 dl rjómi
  • 1 msk rifsberjahlaup
  • sojasósa
  • salt
  • pipar
  • Maizena-sósuþykkir

Blandið hráefninu í hakkabuffið vel saman og mótið stóran bolta úr buffinu. Hitið olíu á pönnu, setjið buffið á pönnuna og fletjið það út. Skiptið buffinu í sneiðar og steikið á báðum hliðum. Buffið þarf ekki að vera steikt í gegn því það mun sjóða í sósunni. Blandið hráefninu í sósuna og bætið því á pönnuna. Leyfið að sjóða við vægan hita í 10 mínútur. Smakkið sósuna til, bætið ef til vill meiri sojasósu, sultu eða setjið smá kraft út í. Þykkið sósuna með Maizena.

Sítrónuformkaka Nigellu Lawson

~ Svava ~ 6 athugasemd

„How to eat“ og „How to be a domestic goddess“ voru fyrstu bækurnar sem ég pantaði mér á Netinu. Það eru 12 ár síðan og mér fannst þetta svo ótrúlega spennandi. „How to eat“ hafði komið út tveimur árum áður og þegar ég sá að „How to be a domestic goddess“  væri væntanleg þá beið ég eftir henni til að getað pantað þær saman. Ég hef skoðað þær svo oft og þær eru allar í litlum post-it miðum við uppskriftir sem ég ætla að prófa og búið að skrifa við þær uppskriftir sem ég hef gert. Post-it miðarnir eru þó fleiri og ég virðist lesa bækurnar oftar en ég elda og baka upp úr þeim.

Sítrónuformkökuna hef ég oft gert. Ég hef fyrir löngu skrifað við hana að hún væri mjög góð og mér finnst það ennþá. Það er gert ráð fyrir „self-raising flour“ í uppskriftinni og ég hef skrifað að það sé passlegt að bæta við hveitið rúmlega 1 1/2 tsk af lyftidufti og 1/2 tsk af salti. Ég hef fylgt því allar götur síðan og kakan heppnast alltaf þannig að það hlýtur að vera rétt.

  • 125 gr ósaltað smjör
  • 175 gr sykur
  • 2 stór egg
  • rifinn börkur af 1 sítrónu
  • 175 gr hveiti
  • rúmlega 1 1/2 tsk lyftiduft
  • 1/2 tsk salt
  • 4 msk mjólk

Hitið ofninn í 180°og smyrjið formkökumót vel. Hrærið saman smjöri og sykri. Bætið eggjum og rifnum sítrónuberki út í og hrærið vel saman. Bætið hveiti, lyftidufti og salti varlega saman við og leyfið að blandast vel saman. Að lokum er mjólkinni bætt út í og hrært þar til blandan er slétt. Setjið degið í smurt bökunarformið og bakið í ca 45 mínútur.

Sítrónusýróp

  • safi frá 1 1/2 sítrónu (ca 4 matskeiðar)
  • 100 gr flórsykur

Setjið sítrónusafann og flórsykurinn í lítinn pott og hitið varlega þar til sykurinn leysist upp.

Þegar kakan er tilbúin þá er hún tekin úr ofninum, stungið litlum götum með kökuprjóni ofan á hana alla og sítrónusýrópinu hellt yfir. Ég nota yfirleitt ekki allt sýrópið en það er auðvitað smekksatriði. Leyfið kökunni að kólna dálítið áður en hún er tekið úr forminu.

Ljúffengt sinnep

~ Svava ~ 8 athugasemd

Ég átti leið niður Laugaveginn fyrir helgi og skaust í leiðinni inn í Púkó & Smart. Hera sagði mér frá sinnepi sem þau hjónin höfðu smakkað og kolfallið fyrir og ég mátti til með að prófa líka. Daginn eftir grilluðum við hamborgara og þá fannst mér kjörið tækifæri að draga sinnepið fram. Það var himneskt. Ég mæli með að þið prófið.

Fylltar kjúklingabringur með pestó-rjómaostafyllingu og beikoni

~ Svava ~ 5 athugasemd

Það hafa engin þrekvirki verið unnin á þessu heimili í dag heldur var sofið til hádegis og aldrei farið almennilega á fætur. Við vorum ánægð með að endurheimta nágrannana frá Vestmannaeyjum og fengum þau yfir í tertuafganga og spjall.  Í kvöldmat eldaði ég síðan þennan kjúklingarétt sem okkur þykir alltaf jafn góður.

  • 5 kjúklingabringur
  • 1 fetakubbur
  • 1 pakki Philadelphilaostur með jurtum og hvítlauk
  • ca 1 msk pestó (ég nota grænt)
  • 1 hvítlauksrif
  • 1 dós léttur sýrður rjómi
  • sítróna
  • kartöflur, sætar kartöflur, gulrætur eða það rótargrænmeti sem þú kýst

Skerið kartöflurnar og rótargrænmetið í báta eða sneiðar  og setjið í eldfast mót. Hellið smá ólivuolíu yfir og kryddið með salti og pipar og þeim kryddum sem þér þykir góð. Ég notaði í kvöld gott jurtasalt með salvíu, rósmarín og timjan. Setjið í 200° heitan ofninn.

Myljið hálfan fetakubbinn í skál og blandið ca 3/4 af Philadelphiaostinum saman við. Hrærið ca 1 msk af pestói saman við og jafnvel smá pipar (það þarf ekki salt því það er næg selta í fetaostinum).

Hamrið kjúklingabringurnar í þunnar sneiðar og leggið gott lag af fetaostahrærunni ofan á hverja bringu. Leggið beikonsneiðarnar á fat og rúllið utan um kjúklingabringurnar þar til kjúklingurinn er þakin af beikoni. Steikið kjúklingabringurnar í smjöri eða ólivuolíu þar til þær hafa fengið fallegan lit. Leggið kjúklingabringurnar í eldfast mót og setjið það sem eftir var af fetaosthrærunni í kringum kjúklinginn í forminu. Það er líka alveg hægt að sleppa því að steikja kjúklingabringurnar á pönnunni og setja þær bara beint í ofninn. Færið kartöflurnar og rótargrænmetið neðst í ofninn og setjið kjúklingabringurnar í miðjan ofninn í ca 20 mínútur eða þar til kjúklingurinn er gegnum steiktur.

Blandið restina af fetaostinum með heilli dós af létt sýrðum rjóma, pressið hvítlauksrif út í, kreistið smá sítrónusafa og kryddið með góðu jurtasalti. Mixið saman með töfrasprota.

Berið fram með góðu salati.

Endið máltíðina í sjónvarpssófanum með smá nammi, það gerðum við alla vega.

 

 

Oreo ostakaka

~ Svava ~ 10 athugasemd

Í gær var aldeilis ástæða til að fagna; bloggið varð vikugamalt og eiginmaðurinn átti afmæli. Við buðum gestum í mat og ég gerði tvær kökur til að hafa í eftirrétt, þessa ostaköku og marenstertu (uppskriftin kemur síðar). Ég hafði séð uppskriftina að þessari köku á pinterest og var spennt að prófa hana. Dóttir mín, Malín, kolféll fyrir ostakökum þegar við vorum í Bandaríkjunum í fyrra þannig að ég var nokkuð viss um að þessi myndi hitta í mark hjá henni, sem hún svo sannarlega gerði bæði hjá henni og öðrum veislugestum.

Kakan virðist kannski í fyrstu flókin en hún er það alls ekki og það er mjög skemmtilegt að baka hana. Það er best að gera hana deginum áður og leyfa henni að taka sig í ískápnum yfir nótt. Takið hana þó úr ískápnum svolítið áður en þið ætlið að bera hana fram svo að ostakakan nái að mýkjast.

Ostakaka

  • 550 gr rjómaostur við stofuhita (mér finnst Philadelphia rjómaosturinn bestur)
  • 3/4 bollar sykur
  • 1/2 msk vanilludropar
  • 1/4 tsk salt
  • 2 stór egg
  • 1/2 bolli sýrður rjómi
  • 6 grófhakkaðar Oreo-kexkökur

Hitið ofninn í 165°. Hitið vatn í hraðsuðukatli. Hrærið rjómaostinn á miðlungshraða í hrærivél þar til hann verður léttur, skrapið niður með hliðunum á skálinni. Bætið sykri saman við í smáum skömtum og hrærið vel saman þannig að blandan verði létt. Bætið vanilludropum og salti saman við. Bætið eggjunum út í, einu í einu, skrapið niður með hliðunum á skálinni á milli og látið blandast vel. Bætið sýrða rjómanum út í og að lokum grófhökkuðum Oreo-kexkökum.

Setjið bökunarpappír í botninn á smelluformi. Pakkið ytri hluta formsins í álpappír. Hellið fyllingunni í formið og setjið formið í ofnskúffu (eða eldfast mót sem er stærra en smelluformið). Hellið sjóðandi vatni í ofnskúffuna þar til það nær upp hálft smelluformið. Bakið í ca 45 mínútur. Takið smelluformið upp úr vatninu og látið standa í 20 mínútur. Rennið beittum hnífi meðfram forminu og látið kökuna síðan kólna alveg. Fjarlægið hringinn af smelluforminu en skiljið botninn eftir. Setjið plastfilmu yfir og frystið.

Súkkulaðibotnar

  • 2 bollar sykur
  • 1 3/4 bollar hveiti
  • 3/4 bolli kakó
  • 1 1/2 tsk lyftiduft
  • 1 1/2 tsk matarsódi
  • 1 tsk salt
  • 2 egg
  • 1 bolli mjólk
  • 1/2 bolli bragðlítil olía (ekki ólivuolía)
  • 2 tsk vanilludropar
  • 1 bolli sjóðandi vatn

Hitið ofninn í 175° og smyrjið 2 bökunarform. Hrærið saman sykri, hveiti, kakói, lyftidufti, matarsóda og salti. Bætið eggjum, mjólk, olíu og vanillu út í og hrærið á miðlungs hraða á hrærivél í 2 mínútur. Hrærið sama við sjóðandi vatni (degið verður þunnt við þetta). Hellið deginu í bökunarformin og bakið í 30-35 mínútur. Látið kökuna kólna.

Krem

  • 225 gr hvítt súkkulaði
  • 225 gr smjör
  • 2 tsk vanillusykur (eða vanilludropar)
  • 4-6 bollar flórsykur
  • 1/4 – 1/3 bolli mjólk

Bræðið súkkulaðið varlega yfir vatnsbaði eða í örbylgjuofni og látið kólna dálítið. Mýkið smjörið í hrærivélinni og hrærið súkkulaðinu út í ásamt vanillunni. Stillið hrærivélina á lágan hraða og bætið flórsykrinum og mjólkinni saman við í smáum skömmtum.

Setjið súkkulaðikökubotn á kökudisk, smyrjið þunnu lagi af kremi á hann og myljið Oreo-kexkökur yfir. Takið ostakökuna úr frystinum, fjarlægið kökuformsbotninn ásamt bökunarpappírnum og leggið ostakökuna ofan á. Ef að ostakakan er stærri en súkkulaðikökubotninn leyfið honum þá að standa í 5-10 mínútur svo að ostakakan nái að mýkjast aðeins, síðan er hún skorin til með beittum hníf. Smyrjið þunnu lagi af kremi ofan á ostakökuna og myljið Oreo-kexkökur yfir. Setjið seinni súkkulaðikökubotninn yfir og smyrjið alla kökuna með kreminu. Kælið kökuna í ískáp í ca 30 mínútur og smyjrið hana síðan aftur með kremi sé þess óskað.

Mexíkósk kjúklingabaka

~ Svava ~ 37 athugasemd

Ég ákvað fyrir viku að gera þessa böku í kvöld og er búin að hlakka til í allan dag.  Okkur finnst hún æðislega góð og það er ekki hægt annað en að elska hana. Hún er einföld, fljótgerð og fullkominn endir á vinnuvikunni.  Þið bara verðið að prófa.

Botn

  • 3 dl hveiti
  • 100 gr smjör
  • 2 msk vatn

Fylling

  • 3 kjúklingabringur
  • 1 laukur, hakkaður
  • nokkrir niðurskornir sveppir
  • 1 rauð paprika, skorin smátt
  • 150 gr. rjómaostur
  • 1/2 dós chunky salsa
  • 3 dl rifinn ostur

Hitið ofninn í 225°. Blandið hráefninu í botninn saman þannig að það myndi deigklump, fletjið hann út og fyllið út í bökumót (ég nota oft bara venjulegt kökuform). Forbakið í ca 10 mínútur.

Bræðið smjör á pönnu og mýkið laukinn, sveppina og paprikuna við miðlungsháan hita. Á meðan passar vel að skera kjúklingabringurnar í lekkera bita. Þegar grænmetið er tilbúið er það tekið af pönnunni og kjúklingabitarnir steiktir upp úr smjöri. Bætið grænmetinu aftur á pönnuna ásamt rjómaostinum og salsasósunni og leyfið að malla saman um stund.

Setjið fyllinguna í forbakaðan botninn og stráið rifnum osti yfir. Bakið þar til osturinn er bráðnaður og kominn með fallegan lit.

Berið fram með góðu salati, nachos, sýrðum rjóma og guacamole.