Strákarnir fermast um miðjan mars og við erum aðeins byrjuð að velta fyrir okkur veitingunum í veislunni. Þeir vilja hafa kökur og brauðtertur og þannig fær það að vera. Við erum þó svo mikið fyrir osta að mér datt í hug að gera pekanhjúpaða ostakúlu sem ég bauð upp á um áramótin og hreinlega lifði á daginn eftir. Hún var svo brjálæðislega góð! Og þegar ég fékk þá frábæru hugmynd að hafa hana í fermingunni þá áttaði ég mig á því að ég á enn eftir að setja uppskriftina hingað inn. Svo hér kemur hún, ég lofa að þið eigið eftir að vera ánægð með hana!
Pekanhjúpuð ostakúla
- 500 g philadelphia rjómaostur (við stofuhita)
- 250 g maukaður ananas í dós (crushed)
- 1/2 bolli græn paprika, hökkuð fínt
- 2 msk vorlaukur, hakkaður
- 1/3 bolli pekanhnetur, hakkaðar
- 1 tsk Lawry´s seasoned salt
- 3/4 bolli pekanhnetur, hakkaðar
Blandið saman mjúkum rjómaosti, maukuðum og afrunnum ananas, papriku, vorlauki, 1/3 bolla af hökkuðum pekanhnetum og salti. Notið sleif og mótið ostablönduna í skálinni. Setjið filmu á borð og dreifið 3/4 bolla af hökkuðum pekanhnetum yfir. Setjið ostakúluna yfir og veltið upp úr hnetunum þannig þær hjúpi kúluna. Pakkið pekanhjúpaðri kúlunni inn í plastfilmuna og geymið í ísskáp þar til hún er borin fram. Berið fram með kexi.
Ljúfmeti og lekkerheit 
Takk fyrir þetta frábæra blogg, skoða það alltaf á sunnudögum og vel úr uppskriftir fyrir vikuna.
Ég er einmitt að fara að ferma soninn í apríl og þætti gaman að sjá hvaða tertur þið ætlið að bjóða uppá í ykkar veislu.
Bestu kveðjur, Thelma
Við erum ekki búin að ákveða veitingarnar en strákarnir hafa óskað eftir að hafa After eight kökuna, uppskriftin er hér: https://ljufmeti.com/2013/04/28/after-eight-kaka/
Ég hugsa að við verðum með brauðtertur, ostabakka og síðan eru ýmsar hugmyndir í gangi, eins og að gera Snickersbita (uppskriftin er hér: https://ljufmeti.com/2015/09/02/aedislegir-snickersbitar/ ). Skal setja inn meira þegar þetta hefur verið ákveðið 🙂
Þetta er rosalega góð ostakúla, hef gert hana tvisvar og allir mjög ánægðir 😊
Gleður mig að heyra ❤
>
Hvað er hægt að nota í staðinn fyrir 1 tsk Lawry´s seasoned salt finn það ekki í Svíþjóð
Úff, nú veit ég ekki. Er ekki til einhvers konar season all krydd í Svíþjóð?
Sent from my iPhone
>