Flokkur: Hakkréttir

Ragù með pasta

~ Svava ~ 1 athugasemd

Eftir góðan endasprett í Berlín komum við heim klukkan þrjú í nótt. Við ætluðum ekki að trúa því þegar vekjaraklukkan hringdi í morgun og það var mikið þrekvirki að komast á fætur eftir allt of lítinn svefn. Dagurinn leið þó hratt og áður en ég vissi af var vinnudeginum lokið og ég farin að huga að kvöldmat.

Við Öggi vorum farin að þrá heimaeldaðan mat og ég ákvað að hafa hann einfaldan í kvöld. Það voru skiptar skoðanir um ágæti þessa rétts, við Malín voru ekkert yfir okkur hrifnar á meðan Ögga og strákunum þótti maturinn stórgóður og borðuðu á sig gat.

Kvöldinu ætlum við að eyða fyrir framan sjónvarpið í langþráðri afslöppun. Við keyptum okkur uppáhalds súkkulaðið okkar í Berlín og ætlum að gæða okkur á því. Ég get ekki hugsað mér neitt betra þessa stundina en sjónvarpssófann og súkkulaðið.

Ragù með pasta

  • 500 gr pasta (ég var með lífrænt heilhveiti penne)
  • 400 gr nautahakk
  • 2 msk ólivuolía
  • 1 laukur
  • 4 dl grænmetiskraftur
  • 120 gr Philadelphia vitlök & örter
  • rifinn parmesan
  • salt og pipar

Sjóðið pastað eftir leiðbeiningum á pakkningu. Fínhakkið lauk og steikið í olíu þar til hann hefur fengið fallegan lit. Bætið nautahakkinu á pönnuna og steikið það vel. Hellið grænmetiskraftinum yfir og látið sjóða í 30 mínútur. Hrærið reglulega í pönnunni.

Blandið Philadelphia ostinum á pönnuna og smakkið til með pipar og salti.  Blandið saman við pastað og hrærið vel saman. Berið fram með ferskrifnum parmesan osti.

Hakkpanna með hvítkáli

~ Svava ~ 2 athugasemd

Ég kíki stutt inn í kvöld þar sem ég er með saumaklúbb og stelpurnar eru væntanlegar á hverri stundu. Ég ætla að bjóða upp á gríska ofnréttinn og hvítlauksbrauð. Ég er síðan búin að gera tvær kökur í eftirrétt.

Í gær var í mörgu að snúast hér á heimilinu og ég náði aldrei að setja inn færslu. Ég eldaði kvöldmat sem krökkunum þótti svo góður að ég má til með að setja hann inn. Ég átti hvítkál sem var fyrir mér í ískápnum og ég vildi fara að losna við. Ég átti líka tæplega hálfa krukku af tómatþykkni  og rúmlega botnfylli af rifsberjasultu. Allt fékk þetta að fara á pönnuna ásamt kjötkrafti, soyasósu, salti  og pipar og úr varð stórfínn réttur.

Hakkpanna með hvítkáli

  • 1 bakki nautahakk
  • 1 bakki svínahakk
  • 1-2 laukar, skorinn fínt
  • ½ hvítkálshaus, skorinn nokkuð smátt
  • 4-5 msk tómatpuré
  • 3-4 msk rifsberjahlaup
  • 2 teningar kjötkraftur
  • soyasósa
  • salt og pipar

Steikið hvítkál og lauk við miðlungsháan hita upp úr vænni klípu af smjöri þar til það er orðið mjúkt og byrjað að glansa. Takið af pönnunni og leggið til hliðar.

Setjið olíu á pönnuna og steikið hakkið. Bætið hvítkálinu og lauknum ásamt restinni af hráefnunum á pönnuna og látið malla um stund. Smakkið til með salti og pipar og bætið við tómatpuré, rifsberjahlaupi eða soyasósu eftir þörfum.

Það þarf enga sósu með þessu því það myndast sósa af soðinu. Ég sauð kartöflur og dró fram hrásalat og sultu til að hafa með. Krakkarnir elskuðu þetta.

Mexíkóskt lasagna með avókadó-salsa

~ Svava ~ 5 athugasemd

Ég get ekki annað en glaðst yfir því hvað vikan byrjar skemmtilega. Ég byrjaði daginn á að lesa óvænta en mjög skemmtilega umfjöllun um bloggið mitt í Morgunblaðinu sem gladdi mig meira en orð fá lýst. Gleðin hélt áfram þegar ég keypti mér tæki í eldhúsið sem mig hefur lengi langað í og við enduðum daginn á því að fá góða vini í mat.

Ég ákvað að bjóða upp á mexíkóskt lasagna með avókadó-salsa, salati og nachos. Í eftirrétt gerði ég svo rabarbarapæ sem ég bar fram með vanilluís. Uppskriftin að matnum kemur úr smiðju Nigellu Lawson en mér þykir alltaf gaman að elda uppskriftir frá henni. Þetta lasagna var engin undantekning, það var bæði einfalt og fljótlegt en best af öllu var hvað það var æðislega gott.

Ég má til með að benda á að þessi réttur er kjörin fyrir saumaklúbba og veislur því það er alveg hægt að undirbúa hann deginum áður og jafnvel enn fyrr og geyma í frysti. Avókadó-salsað skal þó gera samdægurs.

Mexíkóskt lasagna (lítillega breytt uppskrift frá Nigella Kitchen)

  • 1 msk hvítlauksolía (ég notaði ólívuolíu og hvítlauksrif)
  • 1 laukur, skorinn smátt
  • 1 rauð paprika, skorin smátt
  • 2 græn chili, skorin smátt með fræjunum
  • 1 tsk maldon salt eða ½ tsk borðsalt
  • 2 msk fínhakkaðir stilkar af fersku kóriander
  • 2 dósir hakkaðir niðursoðnir tómatar
  • 1 msk tómatssósa
  • 1 bakki nautahakk (ca 500 gr.)

Fylling

  • 1 stór (430 gr) og 1 lítil (300 gr) dósir maís
  • 2 ½ bolli rifinn cheddar
  • 6-8 mjúkar tortilla kökur

Skerið lauk, papriku og chili smátt (fræin úr chiliunum eiga að vera með). Hitið hvítlauksolíu á pönnu og steikið grænmetið ásamt nautahakkinu. Saltið og steikið við vægan hita í 15 mínútur. Í lokin er söxuðum kórianderstilkum bætt á pönnuna. Bætið niðursoðnum tómötum og tómatsósu á pönnuna og látið suðuna koma upp. Sjóðið við vægan hita í ca 10 mínútur.

Hellið vökvanum frá maísbaununum og blandið þeim saman við rifinn cheddar ostinn (geymið smá af ostinum til að setja yfir réttinn).

Byrjið á að setja lasagnað saman með því að setja um þriðjung af kjötsósunni í botninn á eldföstu móti. Leggið 2 tortillakökur yfir þannig að þær hylji sósuna. Setjið næst þriðjung af fyllingunni yfir og fjórðung af því sem eftir er af kjötsósunni yfir fyllinguna. Leggið 2 tortillur yfir. Endurtakið með þriðjungi af fyllingunni og kjötsósu og öðru lagi af tortilla kökum. Endið á að setja restina af fyllingunni og kjötsósunni og að lokum rifinn cheddar ost yfir.

Bakið við 200° í ca 30 mínútur. Berið fram með avókadó-salsa, salati og nachos.

  • Það er hægt að undirbúa þetta lasagna deginum áður. Þá er kjötsósan kæld áður en lasagnað er sett saman. Leggið plastfilmu yfir og geymið í ískáp þar til það fer í ofninn. Bætið 5-10 mínútum við bökunartímann.
  • Það er hægt að frysta óeldað lasagnað í allt að 3 mánuði. Setjið tvöfalt lag af plastfilmu yfir og lag af álpappír. Afþýðið yfir nóttu í ískáp og bætið 5-10 mínútum við bökunartímann.

Avókadó-salsa

  • 2 avókadó
  • 1 skalottlaukur
  • 3 msk hakkað grænt jalepenos úr krukku (ég notaði 1 grænt chili án fræja)
  • salt
  • 1 msk limesafi
  • 1/4 bolli grófhakkað kóriander

Skerið avókadó í bita, hakkið lauk, jalepenos og grófhakkið kóriander. Setjið í skál ásamt salti og limesafa. Blandið öllu vel saman og smakkið til hvort þurfi meira salt áður en restinni af kóriander er bætt við.  Ég setti allt nema kóriander í skál og lét töfrasprotan mauka allt saman – fljótlegt og gott.

Ostafyllt buff með rjómasósu

~ Svava ~ 5 athugasemd

Ég er með móral yfir því að hafa ekki náð að svara skilaboðum og kommentum síðustu daga. Það er búið að vera mikið að gera og ég er þess að auki búin að vera í saumaklúbbum síðustu tvö kvöld. Eins og svo oft vill verða kom ég allt of seint heim úr þeim og ætlaði ekki að trúa því þegar vekjaraklukkan hringdi morgnana eftir. Ég bæti bloggleysið í gær vonandi upp með þessari uppskrift af alveg dásamlegum mat sem við borðuðum í kvöld.

Í gær var ömurlegt veður en Öggi og Gunnar létu það ekki aftra sér við að taka þátt í Atlantsolíuhlaupinu. Mér leist ekkert á blikuna þegar ég kvaddi þá og varð ekki róleg fyrr en ég fékk sms frá Ögga um að þeir væru komnir í mark. Gunnar hafði staðið sig vel, eins og alltaf, og hreppti bronsverðlaun. Við erum að springa úr stolti og Gunnar hefur enn ekki tekið medalíuna af sér.

Á meðan feðgarnir hlupu í roki og rigningu sátum við hin inni í hlýjunni við kertaljós og gæddum við okkur á ljúffengri aspassúpu. Ég ætlaði að setja inn uppskriftina af henni en áður en ég vissi af var ég orðin of sein í saumaklúbbinn og mátti því ekkert vera að því að setjast við tölvuna.

Í kvöld var fyrsta rólega kvöld vikunnar og við nutum þess að vera öll heima. Við kveiktum á kertum og sátum lengi yfir kvöldmatnum og höfðum það notalegt. Kvöldmaturinn var dásemd sem ég gef uppskriftina af með gleði og vona að ykkur þyki hann jafn góð og okkur.

Ostafyllt buff með rjómasósu

  • ca 500 gr nautahakk
  • ca 500 gr svínahakk
  • 1 egg
  • 1 dl rjómi
  • nýmalaður svartur pipar
  • 1 tsk timjan
  • 150 gr góður ostur, t.d. gráðostur eða hvítmygluostur (mér þykir gott að nota Ljúfling)

Sósa

  • 4 dl rjómi
  • 1 dl vatn
  • 1-2 grænmetisteningar
  • ca 1-2 tsk rifsberjasulta
  • hvítur pipar

Blandið vel saman nautahakki, svínahakki, eggi, rjóma, pipar og timjan (ég nota K-ið á hrærivélinni en það má vel gera þetta í höndunum).  Mótið 9 buff og gerið holu í miðjuna á þeim. Skerið ostinn í bita, stingið þeim í holurnar og lokið vel fyrir.

Hitið smjör á pönnu og steikið buffin við miðlungshita. Steikið buffin í tveimur umgöngum í 2-3 mínútur á hvorri hlið. Það á ekki að fullsteikja buffin. Hafið engar áhyggjur ef einhver ostur læðist úr þeim, það gerir sósuna bara betri. Þegar buffin hafa verið steikt eru þau lögð til hliðar og gerð sósa úr steikarsoðinu. Hellið rjóma, vatni og grænmetisteningi á pönnuna og látið suðuna koma upp. Smakkið til með rifsberjasultu, hvítum pipar og grænmetiskrafti. Setjið buffin aftur á pönnuna og látið þau sjóða við vægan hita í sósunni í nokkrar mínútur eða þar til þau eru tilbúin. Ég hræri smá Maizena út í sósuna í lokin til að þykkja hana.

Við bárum réttinn fram með soðnum kartöflum, salati og rifsberjasultu sem okkur þótti æðislega góð með.

Makkarónuskúffa Markoolio

~ Svava ~ 11 athugasemd

Þegar við bjuggum í Svíþjóð var ég áskrifandi af sænska Séð og heyrt. Ég þóttist læra heilmikla sænsku af því að lesa blaðið og taldi áskriftina því nauðsynlega fyrir mig. Ég þakka blaðinu enn þann dag í dag fyrir sænskukunnáttu mína, mikið frekar en háskólanáminu sem ég stundaði, enda las ég blaðið bæði oftar og betur en námsbækurnar.

Á þessum tíma var söngvari og leikari að nafni Markoolio í miklu uppáhaldi hjá Malínu. Við fengum að hlusta á lögin hans daginn út og inn og þegar leikritið Kalli á þakinu var sett upp með Markoolio í aðalhlutverki þá kom ekkert annað til greina en að æða í leikhús til að bera goðið augum. Ég held að ég hafi aldrei séð jafn skemmtilega leiksýningu, enda smituð af gleðinni frá Malínu.

Á þessu Markoolio-tímabili Malínar var þáttur í Séð og heyrt þar sem fræga fólkið gaf uppáhalds uppskriftina sína. Þetta átti nú heldur betur við mig og það fyrsta sem ég gerði þegar blaðið kom í hús var að kíkja á uppskrift vikunnar. Það vildi síðan svo skemmtilega til að eina vikuna gaf Markoolio uppáhalds uppskriftina sína í Séð og heyrt, Makkarónuskúffu Markoolio. Þetta varð strax uppáhalds matur Malínar og ég eldaði hann lengi vel í hverri viku.

Þegar við fluttum aftur heim til Íslands féll þessi réttur í gleymsku og þegar ég ætlaði að fara að gera hann aftur þá var ég búin að gleyma uppskriftinni. Ég hef reglulega leitað að henni á netinu án árangurs en um daginn fann ég hana á gömlu bloggi sem Markoolio hafði haldið úti.

Malín varð svo ánægð þegar ég sagði henni að uppskriftin að makkarónuskúffu Markoolio væri fundin og beið spennt eftir að ég eldaði réttinn. Í kvöld lét ég verða af því og vakti rétturinn ekki minni lukku hjá börnunum í kvöld en á árum áður.

Uppskriftin er ofureinföld og um að gera að bæta t.d. beikoni eða lauk í hana og krydda nautahakkið með spennandi kryddum. Eins þykir okkur gott að hafa kartöflumús með réttinum en í kvöld létum við salat nægja.

Markoolios makkarónuskúffa

  • 4 dl makkarónur
  • 500 gr nautahakk
  • 2 egg
  • 5 dl mjólk
  • 2 teningar kjötkraftur
  • rifinn ostur

Hitið ofninn í 180° og smyrjið eldfast mót með smjöri. Sjóðið makkarónurnar þar til þær eru hálfsoðnar. Steikið nautahakk og kryddið með salti og pipar. Blandið nautahakkinu og makkarónunum saman og leggið í eldfasta mótið. Hrærið saman eggjunum og mjólkinni og hellið yfir eldfasta mótið. Sjóðið 2-3 dl af vatni og setjið teningana í. Látið sjóða þar til teningarnir hafa leysts upp og hellið þá vatninu í eldfasta mótið. Blandið öllu vel saman í eldfasta mótinu og stráið síðan ostinum yfir. Setjið réttinn í ofninn og bakið þar til osturinn er kominn með fallegan lit.

Berið réttinn fram með tómatsósu og salati.

Makkarónuskúffan er ekki síðri daginn eftir, að hita hana upp í ofni eða á pönnu og krydda með smá aromati.

Lasagna

~ Svava ~ 6 athugasemd

Ég fæ reglulega löngun í lasagna og þykir gaman að breyta til og prófa nýjar lasagna uppskriftir. Þó ég sé mjög hrifin af lasagna með rjómakremi þá er þetta sú uppskrift sem hefur hangið lengst með mér og er sú sem ég elda oftast. Hún er í algjöri uppáhaldi hjá krökkunum og ég skil það vel því hún er stórgóð.

Þetta lasagna er mikill og góður fjölskyldumatur og ég hef enn ekki hitt það barn sem þykir það ekki gott. Mér þykir mikill kostur hvað uppskriftin er einföld og flest hráefnin á ég oftast til í skápnum. Hér er engum óþarfa bætt við og eflaust þess vegna sem börnin eru svona hrifin af því. Þetta er góður réttur sem passar bæði til hvunndags og betri tilefna.

Það hafa margir spurt mig út í Chili Explosion kryddið frá Santa Maria sem ég nota mikið og mér þykir nánast ómissandi í hakkrétti. Það virðist vera að valda ruglingi að kryddin frá Santa Maria eru yfirleitt með bláu loki en Chili Explosion kryddið er það ekki. Ég ákvað því að taka mynd af kryddinu ef fleiri eru spenntir fyrir að prófa það. Ég held að það fáist í flestum búðum en ég hef keypt mitt í Bónus.

Lasagna

  • 1-2 laukar
  • 1 msk smjör eða olía
  • 400 gr nautahakk
  • 1 dós hakkaðir tómatar
  • 2 msk tómatpuré
  • 1 grænmetisteningur
  • 1 tsk basilika (þurrkuð)
  • 1 tsk salt
  • nýmalaður svartur pipar
  • chili explosion

Ostasósa

  • 4 msk hveiti
  • 7 dl mjólk
  • 2 dl (ca 70 gr) rifinn ostur
  • salt

Ofanálag

  • Rifinn ostur

Kjötsósan: Skalið og hakkið laukinn. Hitið olíu eða smjör á pönnu og steikið laukinn og nautahakkið. Bætið niðursoðnum tómötum, tómatpuré, basiliku, chili explosion og grænmetistening saman við og leyfið að sjóða við vægan hita undir loki í ca 20 mínútur.  Smakkið til með salti og pipar og jafnvel meira af chili explosion eða basiliku.

Ostasósan: Hrærið hveitið saman við smá af mjólkinni í potti. Bætið restinni af mjólkinni út í og hrærið í pottinum á meðan suðan er að koma upp. Látið sjóða við vægan hita í 3 mínútur. Takið pottinn af hellunni og hrærið rifna ostinum út í ásamt smá salti. Athugið að sósan á ekki að sjóða eftir að osturinn er kominn í hana.

Setjið helminginn af ostasósunni í botninn á eldföstu móti og leggið lasagnaplötur yfir. Setjið helminginn af kjötsósunni yfir lasagnaplöturnar og leggið síðan annað lag af lasagnaplötum yfir. Setjið hinn helminginn af kjötsósunni yfir og leggið þriðja lagið af lasagnaplötum yfir. Endið á að setja seinni helminginn af ostasósunni yfir og stráið rifnum osti yfir ostasósuna.

Bakið lasagnað í 15-20 mínútur við 220°.

Kjöthleifur með rjómasósu

~ Svava ~ 11 athugasemd

Það fer lítið fyrir myndarskapnum þetta föstudagskvöldið en mikið höfum við það samt gott. Krakkarnir fengu okkur til að kaupa pizzur og við ákváðum að fara alla leið í notalegheitum og fylltum síðan skálar af sætindum og leigðum okkur mynd.

Í gær eldaði ég hins vegar góðan hversdagsrétt, kjöthleif með kartöflum og soðnu haustgrænmeti. Mér finnst það vera notalegur matur sem passar vel á haustkvöldum.

Kjöthleifur með rjómasósu

  • 1 kg nautahakk eða blanda af nautahakki og svínahakki
  • 1,5 msk kartöflumjöl
  • 0,75 dl brauðrasp
  • 1,5 dl mjólk
  • 1 msk tómatsósa
  • salt
  • pipar
  • 25 gr smjör
  • 2 laukar
  • 2,5 msk kalvfond
  • 1 dl vatn

Hitið ofninn í 175°. Skerið laukinn í bita og steikið á pönnu í smjörinu. Leyfið lauknum að malla við vægan hita í smjörinu þar til hann er orðinn mjúkur. Hellið kalvfond og vatni yfir og sjóðið saman í stutta stund. Takið af pönnunni og mixið með töfrasprota þannig að laukbitarnir hverfi.

Blandið brauðrasp og kartöflumjöli saman og hellið mjólkinni yfir. Leyfið blöndunni að standa um stund og þykkna. Blandið saman við laukmaukið og bætið síðan hakkinu og tómatsósunni við, ásamt salti og pipar. Mér finnst gott að nota hrærivélina en það er léttilega hægt að gera þetta í höndunum.

Smyrjið ofnskúffu eða eldfast mót og látið hakkblönduna á. Mótið hleif  úr hakkblöndunni og bakið í miðjum ofni í klukkutíma.

Mér þykir gott að nota soðið sem kemur af kjöthleifnum í sósu. Þegar kjöthleifurinn er tilbúinn tek ég hann úr forminu og sigta soðið úr því í pott. Ég bæti síðan ca 2 dl af vatni, 1-2 dl af rjóma, sojasósu, rifsberjahlaupi og grænmetisteningi í pottinn og læt sjóða um stund. Ég smakka síðan sósuna til með hvítum pipar og salti. Stundum bæti ég meiri vökva saman við eða jafnvel smá rjómaosti. Sósan er að lokum þykkt með maizena-mjöli.

Tacobaka

~ Svava ~ 19 athugasemd

Þessi vika hefur verið fullbókuð og mikið púsl að láta allt ganga upp. Það hefur gefist lítill tími í eldhúsinu og ég er búin að vera með hvern hraðréttinn á fætur öðrum alla vikuna. Ég er því búin að hlakka mikið til þess að eiga rólegt föstudagskvöld með fjölskyldunni og góðum mat.

Þessi tacobaka hefur verið reglulega á borðum hjá okkur í gegnum tíðina. Ég hef gert hana bæði fyrir matarboð og saumaklúbba og hef gefið mörgum uppskriftina að henni. Okkur þykir hún mjög góð og passa vel á föstudagskvöldum.

Mér þykir gott að bera bökuna fram með salati, nachos, salsa, sýrðum rjóma og guacamole eða avókadóhræru. Avókadóhræran er einföld og fljótleg og verður því oftar en ekki fyrir valinu. Ég einfaldlega stappa avókadó og blanda saman við pressað hvítlauksrif, sítrónusafa, cayanne pipar og smá sýrðum rjóma.

Botn

  • 4 dl hveiti
  • 2 tsk lyftiduft
  • 1/2 tsk salt
  • 50 gr smjör
  • 1 1/2 dl mjólk

Fylling

  • 500 gr nautahakk
  • 1 laukur
  • 2 hvítlauksrif
  • 3 msk tómatpuré
  • 2 msk chillisósa
  • 1 msk sojasósa
  • 2 tsk chilipipar (krydd)
  • 2 tsk cummin
  • 2 tsk kóriander (krydd)
  • 2 tsk karrý
  • 1-2 tsk salt
  • 2 dl vatn

Ofanlag

  • 3 tómatar
  • 2 dl sýrður rjómi
  • 4 msk majónes
  • 150 gr rifinn ostur

Hitið ofninn í 200°. Blandið saman hveiti, lyftidufti og salti í skál. Látið smjörið ná stofuhita, skerið það í bita og blandið því við þurrefnin. Bætið mjólkinni saman við og hrærið öllu saman í deig. Þrýstið deiginu í bökuform eða smelluform. Það þarf ekki að forbaka botninn.

Hakkið lauk og steikið ásamt nautahakki og fínt hökkuðum hvítlauk. Steikið þar til nautahakkið er ekki lengur rautt. Bætið tómatpuré, chilisósu og sojasósu á pönnuna ásamt kryddunum og vatni. Látið sjóða við vægan hita þar til vatnið er næstum horfið, ca 10-15 mínútur. Smakkið til og kryddið meira ef þarf. Setjið nautahakkið yfir botninn.

Skerið tómatana í bita og dreifið yfir nautahakkið.

Hrærið saman sýrðum rjóma, majónesi og rifnum osti og breiðið yfir tómatana.

Bakið í miðjum ofni í ca 15 mínútur eða þar til osturinn er bráðinn og fengið fallegan lit.

Berið fram með góðu salati, nachos, sýrðum rjóma, salsa eða guacamole.

 

 

 

Ofnbökuð eggjakaka með nautahakki

~ Svava ~ 6 athugasemd

Það er búið að vera nóg að gera á heimilinu í kvöld og enginn tími verið til að sinna blogginu. Ég má þó til með að líta stutt inn og deila með ykkur uppskrift að kvöldmatnum hjá okkur.

Það er langt síðan ég sá þessa uppskrift en hún hefur ekki ratað inn á matseðilinn fyrr en núna. Hún verður þó án efa elduð oftar því þessi ofnbakaða eggjakaka sló í gegn og kláraðist upp til agna. Hún er einföld og fljótleg og hentar því vel í dagsins amstri.

Ofnbökuð eggjakaka með nautahakki (uppskrift frá Tasteline).

Fyllingin

  • 400 gr nautahakk
  • 2 hvítlauksrif
  • 1 laukur
  • 3 msk vatn
  • 1,5 msk tómatpuré
  • timjan
  • chili explosion krydd frá Santa Maria

Botninn

  • 4 egg
  • 1 dl rjómi
  • 2 msk smjör
  • 1 tsk oregano

Ofanlag

  • 3 dl rifinn ostur
  • 1,5 dl rjómi
  • 3/4 dl sýrður rjómi
  • kokteiltómatar

Hitið ofninn í 200°. Skerið lauk og hvítlauk smátt niður. Steikið nautahakkið ásamt laukunum þar til nautahakkið er full steikt. Saltið og piprið. Bætið vatni á pönnuna ásamt tómatpuré og hökkuðu fersku timjan (eða þurrkuðu ef þið eigið ekki ferskt) og látið sjóða við vægan hita þar til vökvinn hefur að mestu gufað upp.

Hrærið eggin með rjóma og oregano og hellið blöndunni í smurt eldfast mót. Bakið í ofni í ca 8-10 mínútur. Takið úr ofninum og leggið hakkfyllinguna yfir.

Hrærið saman rifnum osti, rjóma og sýrðum rjóma og hellið yfir nautahakkið. Dreifið sneiddum kokteiltómötum yfir. Setjið aftur í ofninn og bakið í ca 10 mínútur eða þar til osturinn hefur bráðnað og fengið fallegan lit.

Berið fram heitt með góðu salati (og tómatsósu að mati strákanna).

Spaghetti bolognese

~ Svava ~ 13 athugasemd

Þá er hversdagsleikinn tekinn aftur við og viðeigandi að bjóða upp á hversdagslegan rétt, spaghetti bolognese. Þetta er einn af þeim réttum sem ég elda hvað oftast og við fáum ekki leið á honum. Rétturinn breytist reglulega en þessi útgáfa hefur fengið að hanga með lengi og er sú sem ég nota oftast. Hér áður fyrr setti ég alltaf sveppi, zuccini, papriku og lauk út í hakkið og hellti síðan pastasósu yfir en krökkunum fannst ekki gott að hafa allt þetta grænmeti í sósunni. Ég ákvað því að hætta því og byrjaði að breyta aðeins uppskriftinni. Við erum öll sammála um að finnast rétturinn bara betri fyrir vikið.

Mér finnst lykilatriðið við góða bolognese sósu vera að bæta sýrðum rjóma út í hana ásamt smá hunangi. Síðan þykir mér Chili Explosion kryddið frá Santa Maria ómissandi. Þó að það hljómi sem hræðilega strerkt krydd þá er það frekar milt og það er ekki hægt að nota of mikið af því. Rjómasletta finnst mér alltaf til bóta og hika ekki við að nota ef ég á til.

Ég geri bolognese sósuna aldrei eftir nákvæmum málum (gerir það einhver?) en svona er hún nokkurn veginn.

Spaghetti bolognese

  • ca 500 gr nautahakk (einn bakki)
  • 1 laukur
  • 1 rauð paprika
  • 1 krukka Dolmio pastasósa með extra hvítlauk (fæst m.a. í Bónus og Nettó)
  • 1 dós sýrður rjómi (ef ég á venjulegan rjóma þá nota ég hálfa dós af sýrðum rjóma og rjóma á móti)
  • 1/2 – 1 grænmetisteningur
  • ca 2-3 msk fljótandi hunang
  • smá sinnep (má sleppa)
  • chili explosion krydd frá Santa Maria
  • salt, pipar og paprikukrydd

Steikið hakkið á pönnu og þegar það byrjar að brúnast er lauknum bætt á pönnuna. Steikið áfram þar til laukurinn verður mjúkur og ef ég á papriku þá sker ég hana smátt og bæti á pönnuna í lokin. Kryddið aðeins með Kød og grill kryddi eða Lawrey´s seasoned salt og piprið. Bætið Dolmio pastasósunni á pönnuna ásamt sýrða rjómanum og rjómanum (ef þið eigið hann), 1/2 grænmetisteningi, hunangi, smá sinnepi og vel af chilli explosion kryddinu (ekki vera hrædd við það).  Leyfið að sjóða um stund og smakkið til, bætið jafnvel meiri krafti út í eða meira af chilli explosion kryddinu. Mér þykir líka gott að krydda aðeins með paprikukryddi. Ef sósan er of sterk bæti ég meiri rjóma eða sýrðum rjóma út í.

Sjóðið spaghetti samkvæmt leiðbeiningum á pakka. Þegar það er soðið er vatninu hellt af, spaghettiið sett í skál og væn smjörklípa látin bráðna yfir það.

Berið bolognes sósuna fram með spaghetti, ferskum parmesan osti og hvítlauksbrauði. Okkur finnst líka æðislega gott að hafa kartöflumús með en ætli ítalskar ömmur myndu ekki snúa sér við í gröfinni ef þær fréttu það.