Dásamlegar súkkulaðimöffins með rjómaostakremi

nóvember 4, 2013nóvember 4, 2013 ~ Svava ~ 5 athugasemd

Þá er ný vika tekin við og frábær helgi að baki. Ég lét verða að því að baka möffins með krökkunum og áttum við stórskemmtilega stund saman.

Möffinsin heppnuðust æðislega vel og runnu vel ofan í mannskapinn. Þær voru mjúkar, ríkar af súkkulaðibragði og með góðum vanillukeim. Ég hef alltaf verið svolítið veik fyrir vanillu, hef keypt mér góðar vanillustangir þegar ég hef dottið niður á þær og gert minn eigin vanillusykur. Núna datt ég þó niður á vanillustangir í kvörn sem ég má til með að benda ykkur á. Þær gefa æðislegt vanillubragð og kvörnina er þægilegt að nota.

Það var mikill metnaður lagður í kökuskreytingarnar og mér sýndist ekki minna af skrauti enda í munni bræðrana en á kökunum. Það tilheyrir jú að smakka þegar verið er að baka 🙂

Malín var líka með þó hún hafi ekki verið fest á filmu. Við vorum meðal annars með svo fallegar skrautkúlur frá Dr. Oetker í silfri, gylltu og perluhvítu sem mér þóttu svo jólalegar. Þegar Malín var búin að skreyta möffins með þeim og skrautblómi þótti henni kökurnar vera eins og fallegar skírnarkökur. Ég er alveg sammála henni, þetta væri fallegt að bjóða upp á í skírnarveislu.

Möffinsuppskriftin kemur frá Leilu Lindholm en kremið frá Butter me up, Brooklyn! Þetta er góð blanda sem fer sérlega vel saman og ég hvet ykkur til að prófa.

Möffins:

3 egg
2½ dl sykur
1 tsk vanillusykur (ég tók nokkra hringi með vanillukvörninni)
50 g smjör
1 dl súrmjólk
2 msk kallt kaffi
3½ dl hveiti
2 tsk lyftiduft
4 msk kakó
smá salt
100 g gott 70% súkkulaði (ég var með suðusúkkulaði)

Hitið ofninn í 175°. Hrærið egg, sykur og vanillusykur þar til blandan verður mjög ljós og létt (tekur nokkrar mínútur með hrærivél). Bræðið smjör og blandið því saman við súrmjólk og kaffi. Hrærið blöndunni saman við eggjaþeytinguna. Blandið hveiti, lyftidufti, kakó og salti saman og hrærið varlega út í deigið. Bræðið súkkulaðið yfir vatnsbaði eða í örbylgjuofni og hrærið út í deigið.

Setjið möffinsform á ofnplötu og fyllið 2/3 af þeim með deigi. Bakið í miðjum ofni í um 15 mínútur. Látið möffinsin kólna alveg áður en kremið er sett á.

Rjómaostakrem:

1 dós (200 g) Philadelphia rjómaostur, við stofuhita
60 g smjör, við stofuhita
1 tsk vanilludropar
Nokkrir hringir með vanillukvörninni (eða fræ úr tæplega ½ vanillustöng)
smá salt
3-4 dl flórsykur

Hrærið saman rjómaost, smjör, vanilludropa, vanillufræjum og salti þar til blandan er mjúk og slétt. Hrærið flórsykrinum saman við, 1 dl í einu, og skafið niður með hliðum skálarinnar á milli. Þegar allur flórsykurinn er komin út í þá er hrært aðeins áfram til að kremið verði slétt og gott verði að breiða það á kökurnar.

Bananakaka með súkkulaði og hnetusmjöri

ágúst 17, 2013ágúst 17, 2013 ~ Svava ~ 3 athugasemd

Síðasta helgin fyrir skólasetningu er runnin upp og haustið framundan. Mér þykir þetta einn af bestu tímum ársins, hálfgerð áramót þegar allt byrjar upp á nýtt. Best þykir mér þó að allt fer í rútínu á ný. Ég er svo mikil rútínumanneskja að það nær engri átt.

Við ætlum að njóta þessarar síðustu helgar sumarfrísins hjá krökkunum. Við fórum út að borða saman í gærkvöldi og í dag liggur leiðin í bókabúðirnar að kaupa skóladót. Öggi mun þeyta skífum í brúðkaupi í kvöld og við Malín ætlum að nýta kvöldið í að merkja skólabækurnar og horfa á stelpumynd.

Áður en dagurinn fer í gang hér á heimilinu nýti ég tímann í að blogga því mig langar svo að gefa ykkur uppskriftina af þessari ljúffengu bananaköku með súkkulaðibitum sem ég baka reglulega og fer afskaplega vel með helgarkaffinu. Kakan er fjölskylduvæn og fellur í kramið hjá öllum aldurshópum. Hún endist ekki lengi á borðinu, enda svo sem ekki ætluð upp á punt.

Bananakaka með súkkulaði og hnetusmjöri

5 dl hveiti
3/4 tsk matarsódi
½ tsk salt
3 þroskaðir bananar
1 dl hnetusmjör
1 ¼ dl sykur
1 dl púðursykur
3/4 dl súrmjólk
75 g brætt smjör
2 egg
100 g hakkað suðusúkkulaði (eða það súkkulaði sem þú velur)

Hitið ofninn í 175°. Smyrjið formkökuform og klæðið með bökunarpappír.

Blandið hveiti, matarsóda og salti saman í skál. Stappið bananana í annarri skál og blandið hnetusmjöri, sykri , súrmjólk, smjöri og eggjum saman við þá. Hrærið blöndunni saman í kekkjalaust deig. Bætið þurrefnunum saman við og hrærið saman þar til deigið er slétt. Hrærið að lokum súkkulaðibitunum í deigið.

Setjið deigið í formið og bakið í miðjum ofni í um 60 mínútur, eða þar til prjóni stungið í kökuna kemur þurr upp.

Súkkulaðipavlova með mascarponerjómakremi, Maltesers, Daim, ristuðum pekanhnetum, og súkkulaðisósu

ágúst 15, 2013ágúst 15, 2013 ~ Svava ~ 26 athugasemd

Ég hef fengið fyrirspurnir um uppskriftina að þessari dásemd sem ég birti mynd af hér á blogginu í júní. Það er tvennt sem ég bara skil ekki, hvernig gat ég gleymt að setja inn uppskriftina og hvernig gat sumarið liðið svona fljótt? Mér finnst eins og ég hafi bakað kökuna síðast í gær.

Mér þykir þessi pavlova hafa allt og vera draumi líkast. Hún er svo góð og hráefnin passa svo fullkomlega saman. Það er varla hægt að lýsa því en kakan er svo mikil súkkulaðisæla að hún gerir alla glaða og lífið örlítið betra.

Til að flýta fyrir er kjörið að baka botnana kvöldið áður en það á að bera kökuna fram. Setjið hana síðan saman samdægurs og geymið í ískáp þar til veislan hefst. Það eiga allir eftir að falla í stafi við fyrsta bita – ég lofa!

Súkkulaðipavlova með mascarponerjómakremi, Maltesers, Daim, ristuðum pekanhnetum og súkkulaðisósu (uppskrift frá Lindu Lomelino)

Súkkulaðimarensbottnar:

50 g dökkt súkkulaði (70%)
6 stórar eggjahvítur
3 dl sykur
3 msk kakó
1 msk maizena mjöl
1 tsk hvítvínsedik

Mascarponekrem:

250 g mascarpone ostur
2-3 msk sykur
5 dl rjómi
2 msk espresso

Fylling:

Maltesers
Daimkúlur
Ristaðar pekanhnetur (ristaðar í 175° heitum ofni í 5 mínútur)

Súkkulaðisósa:

3/4 dl sykur
1 dl sterkt kaffi
3 msk kakó

Súkkulaðimarensbottnar

Brjótið súkkulaðið í bita og bræðið það varlega yfir vatnsbaði eða í örbylgjuofni. Látið kólna.

Hitið ofninn í 175°. Teiknið tvo eða þrjá hringi sem eru um 15 cm í þvermál á bökunarpappír. Staðsetjið þá eins langt frá hvor öðrum og mögulegt er. Snúið bökunarpappírnum við og leggið hann á ofnplötu.

Þeytið eggjahvíturnar þar til þær byrja að mynda froðu og bætið þá sykrinum smátt og smátt saman við. Þeytið áfram þar til blandan er orðin stífþeytt. Það á að vera hægt að halda skálinni á hvolfi án þess að marensdeigið renni úr henni. Sigtið kakó og maizenamjöl út í deigið, bætið hvítvínsediki saman við og blandið öllu vel saman. Hrærið að lokum bræddu súkkulaðinu gróflega í marensdeigið.

Skiptið marensdeiginu jafnt á hringina á bökunarpappírnum. Botnarnir eiga eftir að renna aðeins út þegar þeir bakast. Setjið marensinn í ofninn og lækkið hitann í 125°. Bakið marensinn í 60-75 mínútur. Botnarnir eiga að vera harðir og stökkir við kantana en seigir í miðjunni. Slökkvið á ofninum en látið botnana vera áfram á eftirhitanum í honum, með ofnhurðina hálfopna þar til ofninn er orðinn kaldur.

Mascarponekrem:

Hrærið mascarponeostinn og sykurinn saman þar til blandan verður mjúk og kremkennd. Bætið rjómanum saman við og þeytið þar til blandan þykknar. Bætið espresso saman við og þeytið áfram þar til það hefur blandast saman við kremið.

Súkkulaðisósa:

Blandið öllu saman í pott og látið suðuna koma upp. Sjóðið í 3-5 mínútur eða þar til sósan hefur tekið að þykkna aðeins. Látið kólna.

Setja kökuna saman:

Leggið fyrsta botninn varlega á kökudisk og smyrjið helmingnum af mascarponekreminu yfir. Stráið grófhökkuðu maltesers, daimkúlum og ristuðum pekanhnetum yfir. Leggið seinni botninn yfir og smyrjið því sem eftir er af mascarponekreminu yfir. Skreytið með maltesers, daimkúlum, pekanhnetum og súkkulaðisósu. Látið tertuna gjarnan standa í ískáp í að minnsta kosti klukkutíma áður en hún er borin fram.

Kaffi- og valhnetukaka

ágúst 5, 2013ágúst 5, 2013 ~ Svava ~ 4 athugasemd

Sumarfríið mitt er á enda og það vekur blendnar tilfinningar. Kvíði fyrir að þurfa að vakna aftur á morgnanna en tilhlökkun að hitta vinnufélagana á ný. Mest hlakka ég þó til að lífið falli í rútínu aftur. Ég virka best í rútínu, þegar ég hef verkefni til að takast á við og þarf að skipuleggja mig. Ég geri alltaf vikumatseðil og versla inn fyrir vikuna á laugardögum en um leið og ég fer í sumarfrí hætti ég því. Ég veit ekki af hverju, þetta bara gerist ósjálfrátt og veldur því að við eyðum meiri pening í mat og borðum oftar en ekki síðri mat en við erum vön að gera. Hlaupum í búðina rétt fyrir lokun og kaupum það sem bregður fyrst fyrir augum. Núna hlakka ég til að koma þessu í réttan farveg aftur.

Við erum búin að eiga gott sumarfrí og gerðum margt af því sem ég ætlaði mér að gera í fríinu. Þó ekki allt. Ég var til dæmis staðráðin í að hreyfa mig á hverjum degi. Ég gerði það ekki en borðaði hins vegar Lindubuff á hverjum degi. Það var ekki fyrr en um daginn þegar ég fékk Ögga með mér í bíltúr rétt fyrir miðnætti til þess eins að kaupa mér kassa af Lindubuffi að ég áttaði mig á því að þetta væri komið út í vitleysu. Ég hef ákveðið að kveðja Lindubuffið eftir helgina. Þegar lífið fer í rútínu aftur.

Við gengum á Glym, rétt eins og undanfarin sumur. Malín fór ekki með okkur enda upptekinn unglingur í unglingavinnu. Strákunum þótti þetta einn af hápunktum sumarsins og vilja ólmir fara aðra ferð sem fyrst.

Við áttum ljúfa daga í sumarbústað og vorum heppnari með veðrið en við höfðum þorað að vona. Eins og lög gera ráð fyrir þá borðuðum við hverja dásemdina á fætur annari á milli þess sem við þvældumst um sveitirnar. Við skemmtum okkur konunglega.

Við fórum á Geysi og náðum næstum því að eyðaleggja myndavélina okkar þegar þessi mynd var tekin. Þegar Strokkur gaus var ekki annað hægt en að smella myndum af strákunum flýja vatnsgusuna úr honum. Það kostaði þó vatnsgusu yfir myndavélina sem þurfti að fara í viðgerð í kjölfarið.

Strákarnir urðu rennblautir. Öggi smellti af þessari skemmtilegu mynd og það var ekki fyrr en við komum heim sem við tókum eftir henni. Strákarnir eru að dansa bræðradans sem að þeir sömdu og það er hrein tilviljun að maðurinn í græna bolnum stendur í sömu stellingu og þeir. Okkur þótti það bráðfyndið.

Við Öggi fórum í brúðkaup og höfum sjaldan skemmt okkur jafn vel. Eyþór og Soffía voru svo fallegt brúðpar að það var ekki hægt að hætta að horfa á þau.

Við fórum út í Viðey. Ég skammast mín að segja frá því að þetta var í fyrsta sinn sem ég fer þangað. Það var svo fallegt að rölta þar um. Ævintýri líkast.

Við spiluðum kubb.

Og körfubolta í náttbuxum.

Við Öggi fórum með kærum vinum út að borða á Kopar. Við pöntuðum okkur ævintýraferð af matseðlinum og vorum hvergi svikin. Hver rétturinn var öðrum betri. Frábært kvöld í frábærum félagsskap. Við sátum á efri hæðinni og útsýnið frá borðinu okkar var engu líkt.

Ég bakaði köku sem við fórum með í nestisferð í Guðmundarlund. Við áttum æðislegan dag þar með krökkunum, spiluðum kubb og gæddum okkur á nýbakaðri kaffiköku. Ó, hvað ég elska kaffikökur. Þessi var sérlega ljúffeng. Ég læt að lokum uppskriftina fylgja ef þig langar að prófa.

Kaffi- og valhnetukaka (uppskrift úr matreiðslubók Nigellu Lawson, Kitchen)

50 g valhnetur
225 g sykur
225 g mjúkt smjör
200 g hveiti
4 tsk instant espresso duft (eða 2 tsk Nescafé leyst upp í 1 msk af sjóðandi vatni)
2 ½ tsk lyftiduft
½ tsk matarsódi
4 stór egg
1 – 2 msk mjólk

Glassúr

350 g flórsykur
175 g mjúkt smjör
2 ½ tsk instant espresso duft (leyst upp í 1 msk af sjóðandi vatni)
um 10 valhnetur til skrauts

Hitið ofninn í 180°. Klæðið botninn á tveimur 20 cm kökuformum með smjörpappír og smyrjið hliðarnar. Setjið valhnetur og sykur í matvinnsluvél og látið vélina ganga þar til hneturnar og sykurinn eru orðin að fíngerðum hnetusykri. Bætið smjöri, hveiti, espresso dufti, lyftidufti, matarsóda og eggjum í matvinnsluvélina og vinnið saman í slétt deig. Látið að lokum mjólk renna niður troðarann á meðan matvinnsluvélin gengur. Skiptið deiginu í formin og bakið í 25 mínútur. Látið kökubotnana kólna alveg áður en glassúrinn er settur á.

Glassúr: Setjið flórsykur í matvinnsluvél og látið vélina ganga þar til flórsykurinn er kekkjalaus. Bætið smjöri saman við og látið vélina ganga þar til flórsykurinn og smjörið er orðið að mjúku kremi. Leysið kaffiduftið upp í sjóðandi vatni og bætið því í matvinnsluvélina. Látið vélina vinna kaffið snöggt saman við kremið.

Setjið annann kökubotninn á hvolf á kökudisk (þannig að sú hlið sem snéri niður í kökuforminu snúi upp). Breiðið helmingnum af glassúrnum yfir og leggið síðan seinni botninn ofan á þannig að slétta hliðin á honum (sú sem séri niður í kökuforminu) leggist yfir kremið (s.s. sléttu hliðarnar mætast í miðjunni). Breiðið restina af kreminu yfir. Skreytið kökuna með valhnetum.

Torta di Pernilla

júlí 31, 2013júlí 31, 2013 ~ Svava ~ 5 athugasemd

Við Öggi áttum 11 ára brúðkaupsafmæli 20. júlí sl. Þá vorum við stödd í sveitinni og héldum upp á daginn með því að grilla ljúffengt lamba prime og í eftirrétt bakaði ég súkkulaðiköku. Ég birti mynd af kökunni á Facebook og núna eru sumir súkkulaðielskendur orðnir langeygir eftir uppskriftinni. Ó, hvað ég skil það vel.

Kakan er algjör draumur og það er nánast skylda að bera hana fram með rjóma og berjum. Hún er blaut í sér og mér þykir hún best eftir að hafa fengið að standa í ískáp. Það má segja að kakan sé eins og konfektmoli, dásamlega góð og lítil sneið dugar.

Torta di Pernilla (uppskrift úr bókinni Pernillas Praliner)

250 g dökkt súkkulaði
5 egg
1 msk hveiti
200 g brætt smjör
3 dl sykur

Glassúr

1 dl rjómi
150 g dökkt súkkulaði
25 g smjör
1 dl flórsykur

Hitið ofninn i 175°. Bræðið súkkulaðið yfir vatnsbaði. Takið bráðið súkkulaðið af hitanum og hrærið eggjum, einu í einu, saman við með skeið. Bætið hveiti, smjöri og sykur varlega saman við og hrærið saman í slétt krem. Smyrjið 24 cm kökuform með lausum botni. Hellið deiginu í formið og bakið í miðjum ofni í 25 mínútur. Kakan á að vera blaut í miðjunni en tekur sig þegar hún kólnar.

Glassúr: Setjið rjómann í pott og hitið að suðu. Takið pottinn af hitanum. Brjótið súkkulaðið og setjið ásamt smjörinu í rjómann. Hrærið þar til allt hefur bráðnað saman (það gæti þurft að hita aðeins undir pottinum). Hrærið flórsykri saman við. Setjið glassúrinn aðeins í ískáp til að hann þykkni og verði kremkenndari. Breiðið glassúrinn yfir kökuna þegar hún hefur kólnað að fullu.

Drømmekage frá danska bakaríinu Lagkagehuset

júlí 28, 2013ágúst 6, 2013 ~ Svava ~ 9 athugasemd

Mér áskotnaðist dásamlegt danskt kökublað frá vinkonu minni um daginn. Blaðið er æðislegt og ég á örugglega eftir að baka flest allt í því en það sem vakti fyrst áhuga minn voru uppskriftir sem danska bakaríið Lagkagehuset gaf. Ég hef aldrei farið í Lagkagehuset en systir mín sem býr í Kaupmannahöfn er tíður gestur þar og ég varð spennt að prófa uppskriftirnar.

Á föstudaginn bakaði ég fyrstu uppskriftina sem að bakaríið gaf, Drømkage. Í kökunni eru meðal annars 8 egg og fræ úr tveimur vanillustöngum og því kannski engin furða að hún hafi vakið lukku hjá bakariinu. Þrátt fyrir kókosmjöl í deiginu og kaffi í ofanbráðinni þá minnir kakan óneitanlega á gömlu góðu sjónvarpsköku okkar íslendinga. Þessi er bara aðeins þéttari í sér.

Öggi vill meina að þessi danska útgáfa sé með betri kökum sem hann hafi smakkað og dásamar hana við hvern bita. Ég tek ekki svo djúpt í árina en á þó líkt og hann erfitt með að standast kökuna því hún er stórgóð. Hér kemur uppskriftin ef ykkur langar að prófa.

Drømmekage

375 g mjúkt smjör
375 g sykur
8 egg
475 g hveiti
2 tsk lyftiduft
fræ úr tveimur vanillustöngum
1,5 dl mjólk
100 g kókosmjöl

Ofanbráð

3/4 dl vatn
1 ½ tsk Nescafé
150 g smjör
150 g kókosmjöl
300 g púðursykur
75 g sýróp

Hitið ofninn í 180°. Hrærið smjör og sykur vel saman. Bætið eggjunum, einu í einu, saman við og hrærið í deiginu á meðan. Blandið hveiti, lyftidufti og fræjum úr vanillustöngum saman og hrærið í deigið. Hrærið að lokum mjólk og kókosmjöli í deigið.

Setjið deigið í bökunarpappírsklætt bökunarform sem er um 25 x 35 cm að stærð. Bakið kökuna í 35-40 mínútur.

Ofanbráð: Hitið vatnið í potti og leysið neskaffið upp í því. Bætið smjörinu saman við og látið það bráðna í blöndunni. Setjið restina af hráefnunum saman við og hrærið vel saman yfir lágum hita. Breiðið blöndunni yfir kökuna og bakið hana í 8 mínútur til viðbótar.

Texas Sheet Cake

júlí 6, 2013júlí 6, 2013 ~ Svava ~ 6 athugasemd

Ég hef lengi staðið í þeirri trú að amerískur matur sé betri en allt gott og komi hann frá suðurríkjunum sé allt toppað. Það var því engin furða að ég hafi verið spennt að baka köku sem kennd er við Texas.

Kakan skaut stoðum undir suðurríkjakenninguna því hún var stórgóð, svo góð að Malín segir hana eina bestu köku sem hún hafi smakkað. Ég hef lesið að kakan sé á stærð við Texas og að þaðan komin nafnið. Ég sel þá skýringu ekki dýrar en ég keypti hana en kakan er vissulega stór, þó ekki nógu stór að okkar mati og kláraðist allt of fljótt.

Texas Sheet Cake

1 bolli mjólk
1 bolli smjör, skorið í teninga
2 bollar hveiti
2 bollar sykur
2 egg
½ bolli sýrður rjómi
1 tsk salt
1 tsk lyftiduft
¼ tsk matarsódi
1 tsk möndludropar (ef þú ert ekki hrifin af þeim getur þú skipt þeim út fyrir vanilludropa)

Krem

1 bolli sykur
½ bolli kakó
½ bolli mjólk
4 msk smjör
2 msk sýróp
4 bollar flórsykur
2 tsk vanilludropar

Hitið ofninn í 190°og smyrjið kökuform í stærðinni 38 x 25 cm.

Setjið mjólk í pott og hitið við miðlungsháan hita þar til mjólkin er komin að suðu. Bætð smjöri í teningum út í og hrærið í þar til smjörið hefur bráðnað. Takið af hitanum og leggið til hliðar.

Setjið hveiti, sykur og egg í stóra skál og hrærið saman. Hellið heitri mjólkurblöndunni varlega saman við í mjórri bunu og hrærið í deiginu á meðan. Hrærið áfram þar til deigið er kekkjalaust. Hrærið sýrðum rjóma, salti, lyftidufti, möndludropum og matarsóda saman við.

Setjið deigið í kökuformið og jafnið úr því. Bakið í miðjum ofni í 18-22 mínútur. Byrjið strax á kreminu því það er sett yfir kökuna um leið og hún kemur úr ofninum.

Krem: Setjið sykur og kakó í pott og hrærið saman. Setjið pottin yfir miðlungshita og bætið mjólk, smjöri og sýrópi út í. Hrærið í pottinum þar til smjörið er bráðnað og öll hráefnin hafa blandast vel saman. Takið pottinn af hitanum og hrærið sigtuðum flórsykri saman við, einum bolla í einu. Að lokum er vanilludropum hrært í kremið.

Þegar kakan er tilbúin er hún tekin úr ofninum og kreminu hellt strax yfir hana. Látið kökuna kólna og kremið stífna áður en kakan er borin fram.

Vikan sem leið og frábær sumarkaka

júní 30, 2013júní 30, 2013 ~ Svava ~ 4 athugasemd

Vikan sem leið var viðburðarík þrátt fyrir að ég hafi legið í flensu meira eða minna alla vikuna. Öggi og krakkarnir voru hress og skelltu sér í miðnæturhlaupið á mánudagskvöldinu. Á meðan sat ég heima, horfði á sjónvarpið og borðaði kassa af litlum Lindubuffum. Það sem ég naut mín. Hlaupagarparnir nutu sín líka og komu alsælir heim. Með á myndinni er Auður Hrönn, vinkona Malínar.

Tengdó hafa verið í fríi á Ítaliu og komu heim í vikunni. Við vorum spennt að hitta þau og buðum þeim í lasagna, án þess að átta okkur á því að þau væru eflaust komin með nóg af ítölskum mat. Þau þvertóku fyrir að hafa fengið lasagna í ferðinni og gerðu sér matinn að góðu.

Tengdamamma hugsar alltaf svo vel um mig og gaf mér matreiðslublöð sem hún náði að kaupa þegar hún millilenti í Kaupmannahöfn. Það væri ekki amalegt að gæða sér á kökunum á forsíðunum.

Ég bakaði köku sem lofaði góðu en misheppnaðist. Krakkarnir voru þó ekki á sama máli og sögðu hana stórgóða.

Þau fóru langt með að klára hana.

Það fjölgaði í fjölskyldunni þegar tengdó fengu loksins hvolpinn sinn. Hvolpurinn fékk nafnið Sunna og hefur heillað okkur öll upp úr skónum.

Föndur fyrir útskriftarköku. Eyþór bróðir útskriftaðist sem hagfræðingur frá Copenhagen Business School á dögunum og blés til veislu í gær.

Ég bakaði köku – uppskriftin er væntanleg!

Í dag átti Öggi síðan afmæli og við buðum fjölskyldunni í kaffi og kruðerí. Ég gerði köku sem vakti rífandi lukku og það er óhætt að segja að hún sé komin í uppáhald. Kakan er einföld, falleg og dásamlega góð.

Karamelludraumur með daimrjóma og jarðaberjum (uppskrift úr Buffé nr. 6, 2012)

1 dós sæt niðursoðin mjólk (400 g) eða tilbúin dulce de leche í krukku (fæst t.d. í Hagkaup)
150 g smjör
300 g digestivekex
1 l. jarðaber
1 poki (100 g) daimkúlur eða 3 fínhökkuð daim
3 dl rjómi

Karamellan (ef notuð er tilbúin Dulce de leche er hoppað yfir þetta skref): Leggið óopnaða dós með sætri niðursoðinni mjólk í stóran pott. Hellið vatni yfir svo það nái vel yfir dósina. Látið sjóða við vægan hita í 2½ klst. án þess að vera með lok á pottinum. Passið að vatnið sé alltaf yfir dósinni, það gæti þurft að bæta vatni í pottinn þegar líður á tímann.

Takið heita dósina úr pottinum og kælið undir köldu vatni. Látið dósina kólna alveg áður en hún er opnuð. Núna er niðursoðna mjólkin orðin að karamellu.

-> það er hægt að kaupa karamelluna tilbúna í krukkum. Þá heitir hún Dulce de leche sauce.

Smyrjið 24 cm form með lausum botni eða klæðið botninn með smjörpappír. Bræðið smjörið. Myljið digestivekexið í matvinnsluvél. Hellið smjörinu saman við og vinnið saman við kexmylsnuna. Þrýstið kexblöndunni í botninn á forminu og látið svo harðna í ísskáp í um klukkustund.

Hellið karamellunni yfir kexbotninn. Þeytið rjómann og blandið 2/3 af daimpokanum saman við. Breiðið rjómann yfir karamelluna. Leggið jarðaberin yfir og stráið restinni af daim yfir. Látið kökuna standa í ísskáp þar til hún er borin fram.

Banana- og súkkulaðikaka

júní 29, 2013júní 29, 2013 ~ Svava ~ Skrifa athugasemd

Við höfum verið dugleg að heimsækja ísbúðirnar undanfarnar vikur. Þegar það er bjart langt fram eftir kvöldi þykir okkur svo gaman að renna í ísbíltúr eftir kvöldmat. Í vikunni skelltum við okkur í uppáhaldsísbúðina okkar, Ísgerðina, og fengum svo góðar móttökur að ég má til með að hrósa þeim fyrir góða þjónustu.

Ísgerðin er með fjölbreytt úrval af jógúrtís sem er léttur í maga og okkur þykir sérlega góður. Bragðtegundirnar eru breytilegar og þegar ég spurði fékk ég að vita að þeir eru með um 40 bragðtegundir sem þeir skiptast á að nota. Síðan er hægt að setja nammi, íssósur og ferska ávexti út á ísinn. Æðislega gott! Afgreiðslumaðurinn var svo almennilegur að bjóða okkur innfyrir að skoða og þar var allt til fyrirmyndar, svo snyrtilegt og hreint, eins og það á að vera. Ég má því til með að mæla með heimsókn í Ísgerðina ef þið ætlið í ísbíltúr um helgina.

Önnur góð hugmynd fyrir helgina er að baka þessa banana- og súkkulaðiköku. Hún er stórgóð og fer ljómandi vel með helgarkaffinu.

Banana- og súkkulaðikaka (uppskrift frá Mästerkocken)

125 g smjör
3 egg
2 dl sykur
2 dl súrmjólk
4 dl hveiti
1 tsk lyftiduft
½ tsk matarsódi
2 bananar
2 msk kakó

Hitið ofninn í 175°. Bræðið smjörið. Hrærið egg og sykur saman þar til blandan verður ljós og létt. Hrærið smjörið í blönduna og bætið súrmjólk saman við. Blandið hveiti, lyftidufti og matarsóda saman og hrærið saman við deigið.

Skiptið deiginu í tvær skálar. Stappið bananana og blandið þeim í helminginn af deiginu og setjið kakó í hinn helminginn.

Smyrjið formkökuform. Hellið bananadeiginu og kakódeiginu á víxl í formið. Gerið að lokum mynstur í deigið með gaffli. Bakið í neðri hluta ofnsins í um 1 klst.

Bananakleinuhringir með súkkulaðiglassúr

júní 19, 2013júní 19, 2013 ~ Svava ~ 9 athugasemd

Mér þykir þessi tími ársins alltaf svolítið ruglingslegur. Krakkarnir eru í sumarfríi en við Öggi ekki. Við hegðum okkur samt eins og við séu í fríi, förum allt of seint að sofa, borðum aðeins betri mat og lifum afslappaðra lífi.

Við einfaldlega leyfum okkur meira og undanfarna daga hef ég bakað daglega. Mér þykir fátt jafnast á við það að fá hamingjusöm börn inn á kvöldin og setjast niður með þeim yfir nýbakökuðu bakkelsi. Heyra sögur frá deginum og njóta þess að fá smá gæðatíma saman áður en þau fara að sofa.

Það hefur gripið um sig kleinuhringjaæði hjá mér og ég fæ ekki nóg af þeim. Það er svo gaman að baka kleinuhringi og enn skemmtilegra að bera þá fram. Ég hef bakað kleinuhringina hennar Nönnu (sjúklega góðir!) all oft upp á síðkastið og gæti vel gert mér þá að góðu það sem eftir er.

Í gær breytti ég þó út af vananum og bakaði bananakleinuhringi með súkkulaðiglassúr. Uppátækið sló í gegn hjá krökkunum og Gunnar sagðist aldrei hafa smakkað neitt jafn gott. Ég hef það á tilfinningunni að ég eigi eftir að baka þessa ansi oft í sumar.

Bananakleinurhringir með súkkulaðiglassúr – uppskriftin gefur 16 kleinuhringi (uppskrift frá Heather Christo Cooks)

2 bollar hveiti
1 ¼ bolli sykur
2 tsk lyftiduft
1 tsk salt
½ tsk kanil
¼ tsk múskat
¾ bolli súrmjólk
½ bolli stappaður banani (ca 1 banani)
2 egg
2 tsk vanilludropar (ég notaði vanillusykur)
4 msk smjör

Súkkulaðiglassúr

½ bolli rjómi (ég myndi byrja með ¼ bolla og bæta síðan við eftir þörfum)
110 g hakkað dökkt súkkulaði
2 msk sýróp

Hitið ofninn í 175° og spreyið kleinuhringjamót með olíu.

Bræðið smjör í litlum potti og látið það sjóða við vægan hita þar til það hefur brúnast (passið þó vel að brenna það ekki). Setjið til hliðar og látið kólna aðeins.

Blandið öllum þurrefnum saman í stóra skál.

Blandið saman súrmjólk, stöppuðum banana, eggjum og vanilludropum í skál. Setjið blönduna saman við þurrefnin og hrærið vel saman. Bætið brúnuðu smjörinu saman við og hrærið þar til allt hefur blandast vel.

Setjið deigið í kleinuhringjamótið (mér þykir gott að setja deigið í poka, klippa af einu horninu og sprauta deiginu í mótið), fyllið 2/3 af hverri holu. Bakið kleinuhringina í 8-10 mínútur eða þar til þeir eru bakaðir í gegn en þó mjúkir að utan. Mér þykir gott að prufa að þrýsta á þá, ef kleinuhringurinn gefur aðeins eftir en lyftist strax aftur upp þá er hann tilbúinn. Látið kleinuhringina kólna áður en glassúrin er settur á.

Glassúr: Setjið rjóma og hakkað súkkulaði í pott og hitið að suðu. Bætið sýrópinu saman við og takið pottinn af hitanum. Hrærið þar til súkkulaðið er bráðnað og glassúrin er orðin sléttur og glansandi.

Dýfið kleinuhringjunum ofan í glassúrinn og njótið.