Karamellufylltur súkkulaði- og salthnetudraumur

júní 17, 2013júní 17, 2013 ~ Svava ~ 8 athugasemd

Gleðilegan þjóðhátíðardag! Mér þykir 17. júní alltaf svo hátíðlegur og dreymir um að vera með fánastöng í garðinum til að geta flaggað. Sólin hefur látið sjá sig af og til hér fyrir utan eldhúsgluggann í morgun og ég vona að hún heiðri okkur með nærveru sinni í dag. Mér þykir tilheyra svona dögum að fá gott með kaffinu. Rjómapönnukökur og hnallþórur svíkja seint en stundum er gaman að bregða út af vananum og gera eitthvað allt annað. Þá þykir mér þessi kaka koma sterk til leiks. Ef það er til súkkulaðihimnaríki þá er þessi kaka þar. Hún er syndsamlega góð og dagsgömul er hún draumi líkast. Þegar ég bauð upp á kökuna þá kláraðist hún áður en ég hafði rænu á að taka fram vélina og mynda hana almennilega. Þið fáið því enga mynd af kökusneið í þetta sinn. Þó að kakan sé ekkert sérlega þjóðleg þá mun hún ekki svíkja neinn í þjóðhátíðarkaffinu í dag. Það er þó hætta á að hún steli senunni, enda með öllu ómótstæðileg. Berið hana fram með rjóma og fagnaðarlátunum mun seint linna.

Karamellufylltur súkkulaði- og salthnetudraumur (uppskrift frá Allt om mat)

150 g smjör
2 dl sykur
2 egg
3,5 dl hveiti
1 dl kakó
80 g karamellufyllt súkkulaði, t.d. Galaxy

Yfir kökuna

200 g suðusúkkulaði
2 dl salthnetur

Kakan: Smyrjið ca 22 cm kökuform og hitið ofninn í 200°. Bræðið smjörið í örbylgjuofni eða í potti. Hrærið egg og sykur saman þar til blandan verður létt. Bætið hveiti og kakói út í og hrærið saman við ásamt smjörinu. Setjið deigið í formið og þrýstið karamellufyllta súkkulaðinu ofan í. Bakið í miðjum ofni í um 10-12 mínútur. Látið kökuna kólna og takið hana úr forminu.

Yfir kökuna: Bræðið súkkulaðið varlega yfir vatnsbaði eða í örbylgjuofni. Hrærið salthnetunum saman við og breiðið yfir kökuna. Látið harðna í ískáp.

Daimlengjur

júní 15, 2013júní 15, 2013 ~ Svava ~ 10 athugasemd

Hversu dásamlegir eru svona dagar, þegar það er löng helgi framundan og góð veðurspá? Til að auka á gleðina hjá mér þá er mamma komin heim eftir tveggja vikna dvöl hjá systur minni í Danmörku. Það sem ég hef saknað hennar.

Við blésum til matarboðs í gærkvöldi og buðum mömmu og Eyþóri bróður mínum hingað til okkar í grískan ofnrétt og hættulega góðan eftirrétt. Uppskriftin er væntanleg á bloggið, að sjálfsögðu. Mamma kom hlaðin gjöfum, eins og henni er von og vísa, og færði mér m.a. dásamlega fallegt Le Creuset bökumót. Það verður ekki amalegt að bera það á borð með nýbökuðum kræsingum í.

Annað sem væri ekki amalegt að bera á borð eru þessar stórgóðu daimlengjur. Þær eru mjög fljótgerðar og því væri ekki úr vegi að skella í þær og taka með í nesti á 17. júní hátíðarhöldin. Daimlengurnar eru stökkar að utan og seigar að innan með stökkum daimbitum inn á milli. Hljómar vel, ekki satt?

Daimlengjur (uppskrift frá Bakverk och fikastunder)

100 g mjúkt smjör
1 dl sykur
2 msk sýróp
2,5 msk kakó
2 dl hveiti
½ tsk matarsódi
1 tsk vanillusykur
2 x 28 g. daimstykki

Hrærið smjör, sykur og sýróp saman þar til blandan verður kremkennd. Bætið hveiti, kakói, matarsóda og vanillusykri saman við og hrærið áfram. Setjið hakkað daim út í og hnoðið saman í deig með höndunum.

Skiptið deiginu í tvennt og rúllið út í tvær lengur á lengd við bökunarpappír. Leggið lengurnar á bökunarpappírinn og sléttið þær úr. Bakið í ca. 15 mínútur við 175° hita. Skerið kökurnar niður þegar þær koma út úr ofninum og látið þær síðan kólna.

Klessukökumuffins með lakkríssalti

júní 12, 2013júní 12, 2013 ~ Svava ~ Skrifa athugasemd

Fyrir nokkrum vikum fékk ég , ásamt fleiri bloggurum, sendingu frá Saltverk sem innihélt þrjár nýjar salttegundir; lavasalt, blóðbergssalt og lakkríssalt.

Ég hef verið hrifin af saltinu frá Saltverk og þetta nýja salt hefur svo sannarlega vakið áhuga minn. Ég ætla að prófa blóðbergssaltið á lambakjötið við tækifæri og er viss um að það eigi eftir að koma vel út. Í gærkvöldi setti ég hins vegar lakkríssaltið í klessukökumuffins og það voru allir á einu máli um að lakkríssaltið færi æðislega vel með súkkulaðibragðinu. Mamma stakk svo upp á að setja smá lakkríssalt út í heitt súkkulaði með rjóma og ég er spennt að prófa það.

Nýju salttegundirnar eru komnar í verslanir (ég veit að þær fást t.d. í Frú Laugu og í Búrinu) og því um að gera að næla sér í þetta gourmet salt.

Klessukökumuffins (12 kökur)

100 g smjör
2 egg
3 dl sykur
1,5 dl hveiti
1 dl kakó
1 msk vanillusykur
1/4 tsk lyftiduft
Saltverks lakkríssalt á hnífsoddi

Bræðið smjörið. Blandið öllum þurrefnum saman og hrærið smjörinu síðan saman við. Hrærið eggjunum síðast í deigið. Skiptið deiginu í um 12 muffinsform og bakið við 175° í um 12-15 mínútur.

Dásamleg ostakaka með jarðaberjum og hvítu súkkulaði

júní 8, 2013júní 8, 2013 ~ Svava ~ 10 athugasemd

Í dag giftu sænska prinsessan Madeleine og Christopher O´Niell sig og mér þykir viðeigandi að bjóða upp á sumarlega ostaköku í tilefni dagsins. Ég elska konungleg brúðkaup og við Öggi höfum eytt deginum fyrir framan sænska sjónvarpið að fylgjast með. Það er óhætt að segja að ég er hrifnæmari en Öggi og á meðan ég dásamaðist yfir hvað brúðarkjóllinn var fallegur og féll í stafi yfir hvað Peter Jöback söng vel (mér þykir hann svo mikið æði) þá fylgdist Öggi með af stóískri ró. Eftir að hafa horft á brúðkaupsdagskrá í fjóra tíma hóf Öggi undirbúning fyrir næsta brúðkaup, þar sem hann mun þeyta skífum í brauðkaupsveislu í kvöld. Hann er vinsæll plötusnúður og ég mæli svo sannarlega með honum ef þig vantar góðan skífuþeytara í brúðkaupsveislu, á árshátíð eða við hvaða tækifæri sem er. Ef þú vilt bóka hann getur þú sent honum línu á orlygur@poppvelin.is. Uppskriftina að ostakökunni vil ég endilega gefa ykkur en vil þó vara ykkur við að gera ekki sömu mistök og ég með súkkulaðið. Ég lét kökuna kólna áður en ég setti súkkulaðið yfir og kældi hana svo aftur eftir að súkkulaðið var komið á, sem gerði það að verkum að súkkulaðið varð glerhart. Setjið það strax á kökuna þannig að það blandist aðeins við ostablönduna eða bætið smá rjóma í súkkulaðið til að það harðni ekki svona. Þrátt fyrir glerhart súkkulaðið á kökunni hjá mér (vonlaust að skera hana þannig) þá þótti okkur kakan sérlega sumarleg, fersk og góð og ég mun gera hana aftur við fyrsta tækifæri. Ostakaka með jarðaberjum og hvítu súkkulaði (uppskrift úr Magisk sommar)

200 g digestive kex
100 g smjör
400 g hvítt súkkulaði
250 g philadelphiaostur
2½ dl rjómi
2 tsk flórsykur
250 g mascarpone ostur
½ líter fersk jarðaber
1 sítróna

Myljið kexið í matvinnsluvél. Ef þú átt ekki matvinnsluvél getur þú t.d. sett kexið í plastpoka og mulið það með trésleif.

Bræðið smjörið í potti. Bætið kexmylsnunni í bráðið smjörið og blandið vel. Hellið blöndunni í form með lausum botni og sléttið úr því með höndunum eða bakhlið á skeið. Setjið plastfilmu yfir og geymið í kæli.

Bræðið súkkulaðið í skál yfir sjóðandi vatni. Hrærið í á meðan súkkulaðið bráðnar.

Hrærið saman Philadelphia-ost, rjóma, flórsykur og mascarpone-ost í stórri skál. Skolið og skerið jarðaberin í fína bita. Hrærið jarðaberjum og rifnu sítrónuhýði í ostablönduna. Setjið ostablönduna yfir kexbotninn og breiðið síðan bráðnu súkkulaðinu yfir. Setjið kökuna í ískáp og látið hana kólna áður en hún er borin fram. Skreytið kökuna gjarnan með jarðaberjum.

Syndsamlega góðar klessukökumuffins

maí 26, 2013maí 26, 2013 ~ Svava ~ 10 athugasemd

Þessi helgi hefur einkennst af afslöppun og rólegheitum. Við höfum varla farið út fyrir húsins dyr og ættum að fara endurnærð inn í nýja viku. Ég lofaði uppskrift af klessukökumuffins á Facebook í gærkvöldi og núna hvet ég ykkur til að prófa þær.

Fyrir nokkrum árum voru þessar klessukökumuffins fastur liður í kvöldsnarlinu hjá okkur og ég man sérstaklega eftir einu sumrinu þegar við bjuggum í Uppsölum og borðuðum þær eins og enginn væri morgundagurinn. Það sumarið voru jarðaberin svo góð og ég var farin að gera kökurnar ósjálfrátt til að eiga með berjunum. Það var bara jafn sjálfsagt og að sjóða kartöflur með fiskinum. Þær voru hluti af rútínunni. Eftir að við vorum búin að borða skellti ég í kökurnar og þær bökuðust á meðan við gengum frá eftir matinn. Það voru góðir tímar.

Á fimmtuaginn dustaði ég rykið af uppskriftinni og bakaði kökurnar og í gærkvöldi endurtókum við leikinn. Það stefnir í annað klessukökutímabil og mér dettur ekki í hug að berjast gegn því. Þessar dásemdir mega vel vera á borðum hjá mér á hverju kvöldi því þær gera lífið örlítið ljúfara. Það besta er að hráefnið í kökurnar er svo einfalt að flestir eiga það alltaf til og það tekur enga stund að útbúa þær. Ég hef ýmist vanilluís eða þeyttan rjóma og jarðaber með kökunum, það gerir þær ómótstæðilegar. Prófið!

Klessukökumuffins (12 kökur)

100 g smjör
2 egg
3 dl sykur
1,5 dl hveiti
1 dl kakó
1 msk vanillusykur
1/4 tsk lyftiduft

Oreo-ostakaka

maí 5, 2013maí 5, 2013 ~ Svava ~ 17 athugasemd

Mér þykir alltaf jafn leiðinlegt þegar ég næ ekki að blogga daglega, svo ég tali nú ekki um þegar það líða fleiri dagar á milli bloggfærslna. Helst vil ég að það bíði eitthvað nýtt í hvert sinn sem þú kíkir hingað inn og kannski er það þannig? Fjarvera mín síðustu daga var þó ekki að ástæðulausu því hér hefur verið í nógu að snúast.

Eins og Instagram-fylgjendur hafa kannski tekið eftir þá varð Malín 15 ára á föstudaginn. Malín er ein veisluglaðasta manneskja sem ég þekki og fagnar hverju tækifæri sem gefst til veisluhalda. Í ár var ákveðið að bjóða fjölskyldunni í grill og kökur á föstudagskvöldinu en vinkonunum í mexíkóska súpu og kökur á laugardagskvöldinu. Á meðan á vinkonuafmælinu stóð dvöldu strákarnir í góðu yfirlæti hjá mömmu og við Öggi skelltum okkur á frábæra tónleika í Hörpu, saga Eurovision. Seint og um síðir snérum við heim og mikið var notalegt að fara í náttfötin, hita afganginn af kjúklingasúpunni og smakka kökurnar.

Ég fékk um daginn uppskrift frá samstarfskonu minni (takk elsku Guðrún Lilja) af frábærri Oreo-ostaköku og þar sem að Malín er forfallin ostakökuaðdáandi lá beinast við að prófa uppskriftina fyrir afmælið hennar. Kakan vakti mikla lukku og það litla sem eftir var af henni kláruðum við Öggi strax um nóttina.

Mér þykir kakan vera dásamleg í alla staði. Hún er einföld, það tekur stuttan tíma að útbúa hana og það er hægt að gera hana með góðum fyrirvara því hún er fryst. Best af öllu er þó hvað hún er góð. Hér kemur uppskriftin ef ykkur langar að prófa.

Oreo-ostakaka

1 pakki Royal vanillubúðingur
1 bolli mjólk
1 tsk vanilludropar
1 peli rjómi (2,5 dl.)
200 g rjómaostur
1 bolli flórsykur
24 oreo kexkökur (ég notaði 32, sem eru 2 kassar)

-Þeytið saman búðingsduftið, mjólkina og vanilludropana og setjið í ískáp í 5 mínútur.

-Hrærið saman flórsykri og rjómaosti í annari skál.

-Þeytið rjómann.

Blandið þessu öllu saman í eina skál.

Myljið oreokexið (í matvinnsluvél eða með frjálsri aðferð!).

Setjið til skiptist í skál oreokex og ostakökublönduna, endið á kexinu. Geymið í frysti og takið út 1,5 klst. áður en kakan er borin fram.

Rice krispies kaka með bananarjóma og karamellu

apríl 30, 2013apríl 30, 2013 ~ Svava ~ 14 athugasemd

Ég luma enn á nokkrum eftirréttauppskriftum frá grillveislunni með júróvisjónhópnum og datt í hug að það væri kannski sniðugt að setja inn uppskriftina að barnvænu rice krispies kökunni. Hún er jú svo dásamlega einföld og góð. Það væri nú ekki úr vegi að bjóða upp á hana með kaffinu á morgun.

Mig grunar að margir eigi þessa uppskrift en það gerir hana ekki minna góða. Mér þykir kakan algjört sælgæti og hún er í miklu uppáhaldi hjá krökkunum. Uppskriftina fékk ég hjá mömmu en hún hefur verið í fórum hennar í fjölda mörg ár. Hún gerir kökuna oft þegar hún á von á krökkunum til sín og uppsker alltaf mikil lof fyrir.

Kakan er eins einföld og hægt er að hugsa sér og það tekur enga stund að gera hana. Uppskriftin er frá þeim tíma þegar hægt var að kaupa Nóa töggur eftir lit en mér skilst að nú séu þær bara seldar blandaðar í pokum. Þetta er þó ekki vandamál því það má bræða hvaða karamellur sem er í karamellusósuna, t.d. súkkulaðikúlur eða karamellusprengjur, eða hreinlega að kaupa tilbúna karamellusósu.

Rice krispies kaka með bananarjóma og karamellu

Botn:

100 g smjör
100 g suðusúkkulaði
100 g karamellufyllt súkkulaði, t.d. Rolo, Galaxy, karamellufyllt Pipp eða mars.
4 msk síróp
4-5 bollar Rice Krispies

Bræðið smjör, súkkulaði og síróp saman í rúmgóðum potti við vægan hita. Takið pottinn af hitanum og hrærið Rice Krispies saman við. Setjið blönduna í form og látið kólna í ískáp.

Bananarjómi:

1 peli rjómi (2,5 dl)
1 stór banani

Stappið bananann og þeytið rjómann. Blandið stöppuðum banananum varlega saman við rjómann og breiðið yfir botninn.

Karamellusósa:

20-30 ljósar Nóa töggur (eða aðrar karamellur)
1 dl rjómi

Bræðið töggurnar í rjómanum við vægan hita og hrærið þar til blandan er slétt. Kælið karamellusósuna áður en hún er sett yfir rjómann.

After Eight kaka

apríl 28, 2013apríl 28, 2013 ~ Svava ~ 12 athugasemd

Ég á dásamlega uppskriftamöppu sem ég útbjó á Svíþjóðarárunum okkar. Á þeim tíma notaði ég netið nánast til þess eins að skoða uppskriftasíður og í hvert sinn sem ég datt niður á spennandi uppskrift þá setti ég hana í word-skjal. Það var ekkert skipulag á þessu hjá mér og uppskriftirnar voru ekki flokkaðar eftir einu né neinu. Ég setti bara alltaf nýjustu uppskriftina neðst og lét þar við sitja. Það er kannski það sem gerir möppuna svona sjarmerandi í mínum augum. Dag einn prentaði ég word-skjalið út, setti í möppu og var þar með komin með eina af mínum bestu uppskriftabókum.

Ég hef gert margar uppskriftir úr uppskriftamöppunni en þessi uppskrift er uppáhalds. Ég hef ofnotað hana í mörg ár og veit alltaf að hún á eftir að vekja lukku þegar ég ber hana fram. Ég hef gefið mörgum uppskriftina og verið beðin um að baka hana við ýmis tilefni og furða mig því á að hún hafi ekki ratað hingað á bloggið fyrr. Það var kannski alveg í stíl við það að ég gleymdi að mynda kökuna eftir að hún var skorin og get því ekki boðið upp á mynd þar sem sést inn í kökuna. Þið verðið bara að trúa mér þegar ég segi að hún er mjúk, örlítið blaut og fullkomlega dásamleg.

After Eight kaka

250 g suðusúkkulaði
175 g smjör
2 tsk nescafé (instant kaffiduft)
2 dl sykur
4 egg
1 ½ tsk vanillusykur
½ tsk lyftiduft
½ dl hveiti

Glassúr

25 g smjör
3/4 dl rjómi
200 g After Eight

Hitið ofninn í 175° og smyrjið 24 cm form.

Brjótið súkkulaðið í minni bita og setjið í pott ásamt smjörinu. Bræðið við vægan hita og hrærið reglulega í á meðan. Takið pottinn af hitanum og látið blönduna kólna aðeins.

Myljið kaffiduftið þannig að það verði fínmalað (ég nota mortél til verksins). Hrærið sykri, eggjum og kaffidufti í súkkulaðiblönduna og hrærið þar til deigið er slétt. Blandið vanillusykri, lyftidufti og hveiti saman og sigtið ofan í súkkulaðideigið. Hrærið þar til deigið er slétt.

Setjið deigið í formið og bakið í neðri hluta ofnsins í 55-60 mínútur.

Glassúr: Setjið smjör og rjóma í pott og hitið að suðu. Takið af hitanum og setjið After Eight plöturnar í pottinn. Hrærið þar til blandan er slétt.

Takið kökuna úr forminu og breiðið glassúrinn yfir. Berið kökuna fram með rjóma og jarðaberjum.

Twix-bitar

apríl 27, 2013apríl 27, 2013 ~ Svava ~ 9 athugasemd

Gleðilegt sumar kæru blogglesendur. Ég vona að sumarið hafi byrjað vel og að það eigi eftir að leika við ykkur.

Það styttist óðum í Malmö-ferðina okkar og það kítlar í maganum þegar ég hugsa til þess. 10 dagar í Svíþjóð er ekki til að kvarta undan og ég get ekki beðið eftir að njóta alls þess sem Malmö hefur upp á að bjóða.

Ég er hrifin af Malmö. Við Öggi fórum reglulega þangað þegar við bjuggum í Svíþjóð og fyrir rúmum þremur árum fórum við í nostalgíu-helgarferð þangað. Núna erum við þó alveg tóm hvað varðar veitingastaði og fleira þannig að ef þið lumið á ábendingum um góða veitingastaði, skemmtileg kaffihús og áhugaverða staði á Malmö svæðinu þá eru þær vel þegnar.

Sem upphitun fyrir ferðina var blásið til grillveislu hjá Valla og Silju í gær. Á gestalistanum voru júróvisjónfarar ásamt mökum og börnum og taldi hópurinn um 30 manns. Við Silja erum búnar að vera að skipuleggja veisluna undanfarna daga og vorum ánægðar með hversu vel til tókst.

Silja fékk þá góðu hugmynd að láta Valla grilla kjúklingabringur ofan í mannskapinn. Hún átti æðislega uppskrift að marineringu fyrir kjúkling og svo myndi hún setja kartöflubáta í ofn, gera salat og útbúa sósur. Silja hafði rétt fyrir sér, maturinn vakti stormandi lukku og ég verð að fá hana til að gefa uppskriftina að marineringunni og sósunum til að setja hingað á bloggið. Æðislega gott.

Ég tók að mér að sjá um eftirréttina. Ég ákvað að gera After Eight-köku sem ég hef bakað óteljandi sinnum í gegnum árin og þykir alltaf jafn góð. Á meðan ég var að baka hana furðaði ég mig á því hvernig ég hafi getað bloggað í tæpt ár án þess að hafa gefið þessa uppskrift. Hálfgerður skandall af minni hálfu. Ég hef gefið flestum sem ég þekki uppskriftina og verið beðin um að baka hana fyrir annara manna veislur og gleymi svo að setja hana hingað inn. Ég prufaði síðan nokkrar nýjungar og gerði eina barnaköku sem mamma gerir svo oft fyrir krakkana mína og er í miklu uppáhaldi.

Ég ætlaði að setja inn uppskriftina að After Eight-kökunni en Öggi og Malín eru búin að dásama Twix-bitana svo mikið að ég skipti um skoðun. Þau eru komin með þessa bita á heilann og ekki að ástæðulausu. Þetta heimagerða Twix er himneskt og það var bæði gaman að útbúa það og bera fram. Uppskriftin er æðisleg og ef þú smakkar þessa dásemd einu sinni þá áttu eftir að vilja gera þá aftur og aftur því þeir eru hættulega góðir.

Twix-bitar (uppskrift frá Bakverk och Fikastunder)

Botn:

125 g mjúkt smjör
4 dl hveiti
0,5 dl sykur

Karamella:

175 g smjör
2 dl sykur
3 dl rjómi
0,5 dl sýróp

Yfir:

200 g rjómasúkkulaði

Hnoðið hráefnunum í botninn saman og þrýstið í botninn á formi sem er ca. 20 x 30 cm. Bakið við 175° í 20 mínútur.

Setjið öll hráefnin í karamelluna í pott og látið suðuna koma upp. Sjóðið við vægan hita í 45-50 mínútur. Til að sjá hvort að karamellan er tilbúin er gott að setja smá af henni í glas með ísköldu vatni. Ef það gengur að hnoða karamelluna í kúlu þá er hún tilbúin. Karamellan á að vera mjúk en hægt að rúlla henni saman. Hellið karamellunni yfir botninn og setjið í ískáp í ca 15 mínútur.

Bræðið súkkulaðið og hellið því yfir karamelluna. Látið kólna í ískáp og skerið síðan í bita.

Gulllans kaka

apríl 13, 2013apríl 13, 2013 ~ Svava ~ 4 athugasemd

Þessi dásamlega mynd náðist af frænkunum um páskana þegar Hrönn hvíslaði leyndarmáli að Malínu. Neglurnar voru lakkaðar og sparidressið á, enda páskadagur þegar myndin var tekin. Í dag blæs Hrönn til afmælisveislu og við hlökkum til að mæta, gefa henni afmælisgjöf og fá knús. Hún er yndisleg.

Ég er að reyna að mana mig í að fara út í göngutúr áður en við förum í afmælið en það er svo hræðilega kuldalegt úti og vindkviðurnar fá mig til að vilja sitja hér inni í hlýjunni fram á sumar. Mig langar mikið meira til að dóla hér í náttsloppnum, fá mér aðra kökusneið og byrja á næsta prjónaverkefni. Eftir langvarandi prjónapásu er ég nú búin að draga fram misheppnaða lopapeysu sem ég ætla að reyna að bjarga. Ég ætti auðvitað að byrja á að troða eigandanum í peysuna og taka fyrir og eftir myndir fyrir bloggið, ef verkefnið skyldi heppnast. Nú rifast líka upp fyrir mér að ég átti eftir að mynda vetlingana sem ég sýndi hér á byrjunarstigi fyrir áramót…

Þegar ég kom heim úr vinnunni í gær ákvað ég að baka köku sem ég hef lengi verið á leiðinni að prufa. Kakan reyndist dásamlega góð og krakkarnir voru alsælir með hana. Kakan fyllir út í heila ofnskúffu og ætti því að duga með kaffinu alla helgina. Og góð er hún. Hættulega góð.

Gullans kaka (uppskrift frá Koka ihop)

Botn:

2 egg
3 dl sykur
150 g smjör, brætt
1,5 dl mjólk
4 dl hveiti
4 msk kakó
1 msk vanillusykur
1 msk lyftiduft

Glassúr

112,5 g smjör
3,75 dl flórsykur
2,25 msk rjómi
1,5 tsk vanillusykur

Skraut

50 g suðusúkkulaði

Botn: Hitið ofninn í 225°. Bræðið smjörið. Hrærið egg og sykur saman. Hrærið hveiti, kakói, vanillusykri og lyftidufti saman við. Bætið bræddu smjörinu og mjólk saman við og hrærið þar til deigið er kekkjalaust. Setjið deigið á bökunarpappírsklædda ofnskúffu (ca. 30×40 cm) og bakið í 12-15 mínútur. Prófið að stinga prjóni í kökuna til að sjá hvort hún sé tilbúin og passið að baka hana ekki of lengi. Látið kökuna kólna alveg áður en glassúrinn er settur á.

Glassúr: Bræðið smjörið og bætið flórsykri, rjóma og vanillusykri saman við. Hrærið þar til blandan er slétt. Breiðið heitan glassúrinn yfir kalda kökuna og látið harðna.

Skraut: Bræðið súkkulaðið og setjið í mjórri bunu yfir kökuna. Látið harðna.