Eplakaka með marsípani og nýtt í eldhúsið

~ Svava ~ 12 athugasemd

Í gær kom mamma loksins aftur frá Danmörku eftir að hafa verið þar í tæpar þrjár vikur. Mér fannst það allt of langur tími og saknaði hennar hræðilega. Mamma er mikið fyrir góðar eplakökur með rjóma og ég ákvað því að baka þessa gómsætu eplaköku með marsípani handa henni. Við tókum hana með okkur til hennar og þegar við fórum aftur heim var bara ein sneið eftir, átvöglin sem við erum. Við vorum öll sammála um að þykja kakan stórgóð og fara vel með vænni rjómaslettu.

Mamma hugsar alltaf svo vel um okkur og kom færandi hendi frá Danmörku. Hún bætti í eldhúsið hjá mér og gaf mér tvenn eldföst mót frá Le Creuset, þrenn bökunarmót frá Jamie Oliver, sósuausu frá Eva Trio, sigtiskeiðar frá Joseph Joseph og töng. Ég er í skýjunum.

Eplakaka með marsípani

  • 3 egg
  • 2,5 dl sykur
  • 1 tsk vanillusykur
  • 50 gr smjör
  • 1 dl mjólk
  • 3,5 dl hveiti
  • 2 tsk lyftiduft
  • smá salt
  • 120 gr marsípan

Fylling

  • 2 stór epli
  • 2 msk smjör
  • 2 msk flórsykur
  • 2 tsk kardimommur
  • 1 msk vanillusykur

Hitið ofninn í 175°. Afhýðið eplin og skerið í bita. Steikið bitana í smjöri, flórsykri, vanillusykri og kardimommu þar til þeir fá fallega húð og byrja að mýkjast. Takið af pönnunni og leggið til hliðar.

Hrærið egg, sykur og vanillusykur þar til ljóst og létt. Bræðið smjör og hrærið saman við mjólkina og blandið því við eggjablönduna.  Blandið saman hveiti, lyftidufti og salti og hrærið varlega saman við deigið.  Rífið marsípanið og blandið út í deigið.  Bætið að lokum steiktu eplabitunum í deigið. Setjið deigið í smurt smelluform og bakið í miðjum ofni í ca 25-30 mínútur eða þar til kakan er bökuð í gegn. Gott er að stinga bökunarprjóni í kökuna, ef hann kemur þurr upp þá er kakan tilbúin.

Dásamlegar brauðbollur með sólblómafræjum

~ Svava ~ 10 athugasemd

Við byrjuðum þennan sunnudag á löngum morgunverði með nýbökuðum brauðbollum. Ég held að dagar sem byrja svona vel geti ekki orðið annað en góðir. Brauðbollurnar eru frábærar á morgunverðarborðið og ekki skemmir fyrir að þær eru útbúnar kvöldið áður þannig að það þarf bara að stinga þeim í ofninn í 10-12 mínútur um morguninn.

Ég er ekki að ýkja þegar ég segi að það tekur enga stund að útbúa þessar brauðbollur. Í gærkvöldi gerði ég deigið, bjó til bollurnar og raðaði þeim á bökunarplötuna sem fékk svo að dúsa í ískápnum í nótt. Þegar ég vaknaði kveikti ég á ofninum og stakk síðan bökunarplötunni inn. Á meðan brauðið var að bakast lagði ég á borð. Þegar ég síðan vakti fjölskylduna þá spurði Öggi mig hvort ég hefði farið út í bakarí. Ég hafði verið svo snögg að gera deigið í gærkvöldi að hann hafði ekki tekið eftir því.

Brauðbollurnar eru æðislega góðar. Ekki láta ykkur bregða þegar þið takið þær út úr ískápnum morguninn eftir og þær eru kaldar og harðar því eftir baksturinn verða þær lungnamjúkar og dásamlegar. Ég mæli með því að þið prófið, þetta eru góð verðlaun fyrir mjög litla fyrirhöfn.

Brauðbollur

  • 1-2 dl sólblómafræ
  • 1 bréf þurrger
  • 2 dl mjólk
  • 1 dl ab-mjólk (eða súrmjólk)
  • 3 msk smjör við stofuhita
  • 1 tsk salt
  • 5-6 dl hveiti
  • 2 dl heilhveiti

Hrærið gerið út í kalda mjólkina. Bætið ab-mjólk, smjöri, salti, hveiti og sólblómafræjum saman við og blandið vel saman. Ég leyfi hnoðaranum á Kitchenaid hrærivélinni að sjá um þetta. Skiptið deginu í 10 hluta, hnoðið hvern hluta í kúlu og leggið á bökunarplötu klædda með bökunarpappír. Leggið plastfilmu yfir og leyfið að hefast inn í ískáp yfir nótt (ca 10 klst).

Penslið bollurnar með upphrærðu eggi og stráið sólblómafræjum yfir. Bakið í ca 10-12 mínútur við 200°.

Að lokum langar mig að benda á nýjan djús sem við prófuðum í morgun, Sunquick tropefrugt, sem okkur þótt mjög góður. Öggi segir að nú muni fólk halda að ég sé að auglýsa djúsinn en ég get lofað því að ég keypti hann sjálf og fæ ekkert fyrir að benda á hann. Eins og venjulega þá setti ég vel af klaka út í djúskönnuna, djúsinn verður svo svalandi og mikið betri við það.

Djöflakjúklingur og heimagerðar franskar kartöflur

~ Svava ~ 1 athugasemd

Dagurinn hefur verið æðislegur í alla staði. Reykjavíkurmaraþonið gekk vel hjá feðgunum og bræðurnir náðu að safna 306 þúsundum fyrir Neistann. Það veitir okkur mikla gleði að það hafi safnast svona mikill peningur fyrir Neistann, félag sem stendur okkur nærri og okkur þykir svo vænt um.

Eftir að hafa eytt deginum í bænum komum við heim og ég eldaði Djöflakjúkling með heimagerðum frönskum kartöflum í kvöldmat. Ég er komin með æði fyrir kryddblöndu í kvörn frá Jamie Oliver sem er með timjan, sítrónu og salti. Ég notaði hana á kartöflurnar og einfaldlega skar þær niður, steikti aðeins á pönnu, lagði í ofnskúffu og kryddaði með saltblöndunni og pipar. Ég bakaði síðan kartöflurnar í ofninum með kjúklingnum.

Í uppskriftinni af Djöflakjúklingnum á að vera brauðmylsna af franskbrauði en ég átti ekki franskbrauð og notaði Paxo brauðrasp í staðinn. Mér fannst ég þurfa mun meira af honum en 1 bolla og var stöðugt að bæta meiri raspi í skálina.

Djöflakjúklingur (uppskrift frá Bon Appétit)

  • 1 bolli hveiti
  • 3 tsk maldon salt
  • 1/4 tsk nýmalaður svartur pipar
  • 2 stór egg
  • 6 msk dijon sinnep
  • 1/2 tsk cayenne pipar
  • 1 bolli brauðmylsna af franskbrauði
  • 3 msk ólivuolía

Hitið ofninn í 190°. Blandið hveiti, 2 tsk af saltinu og svörtum pipar í skál.  Hrærið saman eggjum, dijon sinnepi og cayenne pipar í annari skál. Blandið saman brauðmylsnu og 1 tsk af saltinu saman í þriðju skálina.

Veltið kjúklingabringunum, einni í einu, upp úr hveitiblöndunni og hristið síðan bringuna þannig að auka hveiti falli af. Veltið bringunni næst upp úr eggjablöndunni og að lokum upp úr brauðmysnunni. Leggið bringuna á grind og endurtakið með afganginn af bringunum.

Hitið olíuna á pönnu yfir miðlungsháum hita. Leggið kjúklingabringurnar á pönnuna og steikið þar til hún fær fallegan lit, það ætti að taka um 2-3 mínútur. Snúið kjúklingabringunum við og færið pönnuna í ofninn. Bakið þar til kjúklingurinn er eldaður í gegn, það ætti að taka um 12 mínútur. Ef þið eigið ekki pönnu sem má fara inn í ofn (ég á sjálf ekki þannig pönnu) þá steikið þið kjúklingabringunar eins á hinni hliðinni og leggið þær síðan í eldfast mót áður en þið setjið þær í ofninn.

Tacobaka

~ Svava ~ 19 athugasemd

Þessi vika hefur verið fullbókuð og mikið púsl að láta allt ganga upp. Það hefur gefist lítill tími í eldhúsinu og ég er búin að vera með hvern hraðréttinn á fætur öðrum alla vikuna. Ég er því búin að hlakka mikið til þess að eiga rólegt föstudagskvöld með fjölskyldunni og góðum mat.

Þessi tacobaka hefur verið reglulega á borðum hjá okkur í gegnum tíðina. Ég hef gert hana bæði fyrir matarboð og saumaklúbba og hef gefið mörgum uppskriftina að henni. Okkur þykir hún mjög góð og passa vel á föstudagskvöldum.

Mér þykir gott að bera bökuna fram með salati, nachos, salsa, sýrðum rjóma og guacamole eða avókadóhræru. Avókadóhræran er einföld og fljótleg og verður því oftar en ekki fyrir valinu. Ég einfaldlega stappa avókadó og blanda saman við pressað hvítlauksrif, sítrónusafa, cayanne pipar og smá sýrðum rjóma.

Botn

  • 4 dl hveiti
  • 2 tsk lyftiduft
  • 1/2 tsk salt
  • 50 gr smjör
  • 1 1/2 dl mjólk

Fylling

  • 500 gr nautahakk
  • 1 laukur
  • 2 hvítlauksrif
  • 3 msk tómatpuré
  • 2 msk chillisósa
  • 1 msk sojasósa
  • 2 tsk chilipipar (krydd)
  • 2 tsk cummin
  • 2 tsk kóriander (krydd)
  • 2 tsk karrý
  • 1-2 tsk salt
  • 2 dl vatn

Ofanlag

  • 3 tómatar
  • 2 dl sýrður rjómi
  • 4 msk majónes
  • 150 gr rifinn ostur

Hitið ofninn í 200°. Blandið saman hveiti, lyftidufti og salti í skál. Látið smjörið ná stofuhita, skerið það í bita og blandið því við þurrefnin. Bætið mjólkinni saman við og hrærið öllu saman í deig. Þrýstið deiginu í bökuform eða smelluform. Það þarf ekki að forbaka botninn.

Hakkið lauk og steikið ásamt nautahakki og fínt hökkuðum hvítlauk. Steikið þar til nautahakkið er ekki lengur rautt. Bætið tómatpuré, chilisósu og sojasósu á pönnuna ásamt kryddunum og vatni. Látið sjóða við vægan hita þar til vatnið er næstum horfið, ca 10-15 mínútur. Smakkið til og kryddið meira ef þarf. Setjið nautahakkið yfir botninn.

Skerið tómatana í bita og dreifið yfir nautahakkið.

Hrærið saman sýrðum rjóma, majónesi og rifnum osti og breiðið yfir tómatana.

Bakið í miðjum ofni í ca 15 mínútur eða þar til osturinn er bráðinn og fengið fallegan lit.

Berið fram með góðu salati, nachos, sýrðum rjóma, salsa eða guacamole.

 

 

 

Ofnbökuð eggjakaka með nautahakki

~ Svava ~ 6 athugasemd

Það er búið að vera nóg að gera á heimilinu í kvöld og enginn tími verið til að sinna blogginu. Ég má þó til með að líta stutt inn og deila með ykkur uppskrift að kvöldmatnum hjá okkur.

Það er langt síðan ég sá þessa uppskrift en hún hefur ekki ratað inn á matseðilinn fyrr en núna. Hún verður þó án efa elduð oftar því þessi ofnbakaða eggjakaka sló í gegn og kláraðist upp til agna. Hún er einföld og fljótleg og hentar því vel í dagsins amstri.

Ofnbökuð eggjakaka með nautahakki (uppskrift frá Tasteline).

Fyllingin

  • 400 gr nautahakk
  • 2 hvítlauksrif
  • 1 laukur
  • 3 msk vatn
  • 1,5 msk tómatpuré
  • timjan
  • chili explosion krydd frá Santa Maria

Botninn

  • 4 egg
  • 1 dl rjómi
  • 2 msk smjör
  • 1 tsk oregano

Ofanlag

  • 3 dl rifinn ostur
  • 1,5 dl rjómi
  • 3/4 dl sýrður rjómi
  • kokteiltómatar

Hitið ofninn í 200°. Skerið lauk og hvítlauk smátt niður. Steikið nautahakkið ásamt laukunum þar til nautahakkið er full steikt. Saltið og piprið. Bætið vatni á pönnuna ásamt tómatpuré og hökkuðu fersku timjan (eða þurrkuðu ef þið eigið ekki ferskt) og látið sjóða við vægan hita þar til vökvinn hefur að mestu gufað upp.

Hrærið eggin með rjóma og oregano og hellið blöndunni í smurt eldfast mót. Bakið í ofni í ca 8-10 mínútur. Takið úr ofninum og leggið hakkfyllinguna yfir.

Hrærið saman rifnum osti, rjóma og sýrðum rjóma og hellið yfir nautahakkið. Dreifið sneiddum kokteiltómötum yfir. Setjið aftur í ofninn og bakið í ca 10 mínútur eða þar til osturinn hefur bráðnað og fengið fallegan lit.

Berið fram heitt með góðu salati (og tómatsósu að mati strákanna).

Hindberjakökur

~ Svava ~ 2 athugasemd

Við fengum þær yndislegu fréttir í kvöld að Svanhvít systir hefði eignaðist litla stelpu í Kaupmannahöfn. Við erum búin að bíða eftir litlu frænkunni í tvær vikur og því óhætt að segja að öllum sé létt yfir að hún sé loksins komin í heiminn og að allt hafi gengið vel. Það er óbærilegt að vera svona langt í burtu frá þeim. Við fengum strax sendar myndir og erum öll sammála um að hún er fullkomin.

Í vor ákváðum við Gunnar að prjóna sængurgjöf handa litlu frænku. Gunnar vildi prjóna sokka og ég ákvað að gera peysu í stíl. Við áttum margar notalegar stundir saman yfir prjónunum og erum ánægð með útkomuna. Bæði sokkarnir og peysan eru úr merinó ull frá Rowan sem er bæði mjúk og hlý fyrir litla englakroppa. Uppskriftin að peysunni kemur frá Petit Purls og sokkauppskriftina fann ég í gömlu Rowan blaði sem heitir Rowan babies.

Við fögnum deginum með því að bjóða upp á hindberjakökur sem eru bæði einfaldar og mjög fljótbakaðar. Ég stóðst ekki mátið og gerði hjörtu í staðin fyrir holu sem ég fyllti með hindberjasultu. Mér þóttu þær svo mikið fallegri þannig.

Hindberjakökur

  • 125 gr smjör
  • 3/4 dl sykur
  • 2 1/2 dl hveiti
  • 2 tsk vanillusykur
  • 1 tsk lyftiduft

Hitið ofninn í 200°. Hrærið smjör og sykur saman þar til létt og ljóst. Bætið hveiti, vanillusykri og lyftidufti saman við og hrærið saman. Setjið deigið á hveitistráð borð og rúllið upp í rúllu. Skerið rúlluna í eins stóra bita og þið viljið hafa kökurnar (mér finnst passlegt  að hafa 12-15 bita) og rúllið hverjum bita í kúlu. Leggið hverja kúlu í möffinsform og þrýstið aðeins á þær. Gerið holu í miðjuna og fyllið hana með hindberjasultu. Bakið í ca 10 mínútur.

Gratineraður fiskur á hrísgrjónabeði

~ Svava ~ 14 athugasemd

Dagurinn er búinn að vera viðburðaríkur hjá smáfuglum heimilisins. Klukkan níu í morgun voru bræðurnir mættir í útvarpsviðtal fyrir bæði Leynifélagið og morgunútvarp Rásar 2 vegna Reykjavíkurmaraþonsins. Þeim var boðið að koma í viðtal því Gunnar ætlar að hlaupa 10 km til styrktar Neistans, félagi hjartveikra barna. Hann ákvað það fyrir ári síðan en ég held að það hafi enginn tekið hann alvarlega þá, í það minnsta ekki við.

Gunnar talaði reglulega um maraþonið í vetur og í byrjun sumars sagði hann að nú væri ekki lengur til setunnar boðið, hann yrði að fara að æfa sig. Mér fannst hugmyndin svo galin að ég reyndi hvað ég gat að tala hann af þessu, benti honum á að þetta væri svo löng vegalengd, að hann væri ekki vanur að hlaupa og ætti enga hlaupaskó en hann sagðist alveg getað hlupið þetta í gúmítúttunum sínum. Gunnar gaf sig ekki og það fór svo að Öggi fór með honum út að hlaupa og hlupu þeir 7 km. Við vorum alveg orðlaus yfir dugnaðinum og fórum með hann daginn eftir og keyptum hlaupaskó.  Síðan þá hefur Gunnar hlupið reglulega í sumar og tók þátt í Ármannshlaupinu í júlí þar sem hann náði mjög góðum árangi og hljóp 10 km á 54.28.

Nú styttist óðum í Reykjavíkurmaraþonið og ég verð að viðurkenna að ég verð fegin þegar það verður yfirstaðið. Ég er nefnilega hræðileg íþróttamamma, fer alveg á taugum og ímynda mér allt það versta sem getur komið fyrir. Ef einhvern langar að heita á þennan flotta strák minn og styrkja gott málefni þá er hægt að gera það hér.

En úr maraþoni í kvöldmatinn. Það er alltaf jafn gott að fá fisk í byrjun vikunnar og í dag kom Öggi við í fiskbúðinni á leiðinni heim og keypti glæsilegan þorsk. Ég gerði þennan fiskrétt úr þorskinum sem rann vel ofan í fjölskylduna.

Gratineraður fiskur á hrísgrjónabeði

  • hrísgrjón (ég sauð 1 1/2 bolla fyrir okkur átvöglin)
  • þorskur eða ýsa (ég var með 1 kg)
  • töfrakrydd (má sleppa)
  • 2,5 dl rjómi
  • 3 msk majónes
  • 2 tsk dijon sinnep
  • 2 tsk karrý
  • 50-100 gr ferskrifinn parmesan
  • rauð paprika
  • 1/2 blaðlaukur
  • 200 gr rifinn ostur

Hitið ofninn í 180°. Sjóðið hrísgrjón og leggið í botninn á eldföstu móti. Skerið fiskinn í sneiðar, leggið yfir hrísgrjónin og kryddið með salti, pipar og því sem þykir gott (ég notaði töfrakrydd frá Pottagöldrum). Hrærið saman rjóma, majónesi, sinnepi, karrý og parmesan. Smakkið til og saltið og piprið. Hellið sósunni yfir fiskinn og stráið fínskorinni papriku og blaðlauk yfir. Setjið að lokum rifinn ost yfir og bakið í ca 30 mínútur.

Sænsk kladdkaka með vanillurjómakremi

~ Svava ~ 5 athugasemd

Á heimilinu ríkir eintóm hamingja yfir að vera búin að endurheimta Malínu frá Svíþjóð. Hennar hefur verið sárlega saknað og mér finnst hún hafa verið í burtu svo mikið lengur en raun er. Ef einhvern tímann hefur verið tilefni til að fagna þá var það núna. Við vorum með kvöldmat sem okkur finnst hæfa kóngi, kjöt í káli og spánýjar kartöflur. Í eftirrétt var ég með eina af uppáhalds kökunum mínum sem tekur enga stund að gera.

Uppskriftin að kökunni kemur frá margrómuðu kaffihúsi í Stokkhólmi sem heitir Rosendals Trädgårdscafé. Eina dásemdin sem ég hef notið þaðan er uppskriftabók frá þeim sem ég keypti mér fyrir mörgum árum og hef notað vel. Þó mig hafi lengi langað til að fara á kaffihúsið hef ég ekki enn látið verða af því. Ég hef  hins vegar bakað mikið úr bókinni og finnst uppskriftirnar vera mjög góðar.

Vanillurjómakremið finnst mér passa fullkomlega við kökuna. Jarðaberin fullkomna svo herlegheitin og fara einstaklega vel með súkkulaðinu og vanillukreminu.

Sænsk kladdkaka

  • 100 gr smjör
  • 3 dl sykur
  • 2 egg
  • 2 tsk vanillusykur
  • 5 msk kakó
  • 1 1/2 dl hveiti

Hitið ofninn í 175°. Bræðið smjörið í potti og blandið öllum hráefnunum vel saman við. Setjið deigið í smurt form (helst 22 cm) og bakið í ca 30 mínútur. Sigtið flórsykur yfir kökuna áður en hún er borin fram.

Vanillurjómakrem

  • 3 dl rjómi
  • 3 eggjarauður
  • 3 msk flórsykur
  • 1 msk vanillusykur

Hrærið saman eggjarauður, flórsykur og vanillusykur þar til úr verður þykkt og ljóst krem. Þeytið rjómann og blandið saman við eggjablönduna. Hrærið saman í þykkt krem.

Oreganokjúklingur og vettlingar

~ Svava ~ 3 athugasemd

Ég hef aldrei skrifað bloggfærslu við eins fallegar aðstæður og núna. Við erum í Vestmannaeyjum og ég horfi yfir dalinn, byggðina, Heimaklett og út á haf. Mér finnst alltaf jafn yndislegt að koma hingað og það er að verða hefð hjá okkur að fara til Eyja á sumrin. Í gærkvöldi fórum við í sund fyrir kvöldmat og komum svo við í videóleigunni á leiðinni heim, leigðum 4 myndir og keyptum ársbyrgðir af nammi og snakki. Öggi og strákarnir eru að horfa á síðustu myndina, mynd sem strákarnir völdu. Mér líst ekkert á hana og sit því hér við tölvuna og ætla að gefa uppskrifina af kvöldmatnum hjá okkur í gær.

Áður en við lögðum af stað hingað leist okkur ekkert á veðurspána en núna þegar við erum á heimleið erum við sammála um að helgin hefði ekki verið svona róleg og notaleg ef við hefðum ekki fengið rigninguna. Við erum meðal annars búin að klára að lesa Hungurleikana, horfa á sjónvarpið, spila, blogga og prjóna. Prjónaverkefni helgarinnar voru þessir vetrarvettlingar fyrir Gunnar sem ég prjónaði úr afgangsgarni sem ég átti. Uppskriftin kemur úr bók eftir Kristínu Harðardóttur sem heitir Vettlingar og fleira.

Uppskrifina að kjúklingaréttinum fékk ég fyrir mörgum árum í blaði sem sænska matvörukeðjan Ica gefur út, Buffé. Þetta er einfaldur og fljótlegur réttur sem okkur þykir feiknagóður. Oregano og balsamik edik gefur réttinum mikið og gott bragð og okkur þykir gott að hafa baguette með til að dýfa í sósuna.

Oreganokjúklingur

  • 4 kjúklingabringur
  • 4 hvítlauksrif
  • smjör
  • salt og pipar
  • 5 dl matreiðslurjómi
  • 2 kjúklingateningar
  • 5-6 tsk ferskt eða þurrkað oregano
  • 2-3 msk balsamik edik

Skerið hverja kjúklingabringu í þrennt á lengdina. Takið hýðið af hvítlauksrifunum og hakkið þau fínt niður.  Steikið kjúklinginn upp úr smjöri á pönnu við miðlungsháan hita og saltið og piprið. Blandið matreiðslurjóma, kjúklingateningum, oregano og balsamik ediki saman í potti og látið suðuna koma upp. Bætið kjúklingnum og hvítlauknum út í og látið sjóða við vægan hita undir loki í ca 5 mínútur. Smakkið til og bætið ef til vill meiri oregano eða basamik ediki út í. Berið fram með ofnbökuðum kartöflum eða hrísgrjónum og salati. Okkur þykir líka gott að hafa baguette brauð með til að dýfa í sósuna því hún er mjög bragðgóð.

Himneskur ís

~ Svava ~ 3 athugasemd

Þessi ís er eitt best geymda leyndarmál heimilisins og alveg öruggt kort að spila út ef ég ætla að slá í gegn í eldhúsinu án þess að hafa mikið fyrir því. Ísinn fékk viðurnefnið himneski ísinn frá Ögga því hann kallar hann aldrei annað. Mér finnst heimatilbúinn ís oft eiga það til að verða of harður og erfiður viðureignar. Þessi ís er ekki þannig því þó hann sé nýkominn úr frystinum er léttilega hægt að skera hann eða gera ískúlu úr honum. Hann er yndislegur í alla staði og ég held hreinlega að þetta sé besti heimagerði ís sem ég hef smakkað.

Þegar við vorum með kveðjuboðið áður en Malín hélt til Svíþjóðar gerði ég þennan ís í eftirrétt. Malín elskar eftirrétti og kann gott að meta í þeim efnum. Hún var þó ekki ein um að kunna meta þennan ís því öllum þótti hann alveg æðislegur.

Það er ekki hægt að gera einfaldari ís en þennan og það tekur ekki nema nokkrar mínútur að útbúa hann. Þetta er eiginlega of gott til að vera satt.  Það þarf bara rjóma og niðursoðna sæta mjólk og síðan er hægt að bragðbæta ísinn eftir smekk. Þegar ég gerði hann fyrir kveðjuboðið átti ég súkkulaðidropa og 2 poka af m&m með hnetusmjöri sem ég setti út í og á síðustu stundu (algjör skyndiákvörðum sem kom þegar búið var að mynda innihaldið) ákvað ég að bæta líka hnetusmjöri í ísinn. Ég ætla ekki að reyna að lýsa því hvað það var gott.

Ís

  • 5 dl rjómi
  • 1 dós niðursoðin sæt mjólk (ég keypti hana í Kosti)

Rjóminn er þeyttur þar til hann byrjar að mynda mjúka toppa. Hrærið áfram á lágum hraða og bætið niðursoðnu mjólkinni út í í mjórri bunu. Blandið vel saman. Bragðbætið eftir smekk og frystið í minnst 6 klukkutíma.