Ég var ekkert að flækja hlutina í kvöld og eldaði blómkálssúpu í matinn. Okkur finnst hún alltaf jafn góður og notalegur matur. Blómkálssúpuna elda ég oft enda einföld, fljótleg og að mínu mati mjög góður hversdagsmatur. Það þarf bara að eiga blómkálshaus og smá rjómaslettu til að geta töfrað fram góðan kvöldverð á svipstundu. Ég á alltaf baguette brauð frá Délifrance í frystinum sem ég kaupi frosið í matvörubúðinni og þykir þægilegt að geta gripið í og hitað til að hafa með súpunni.
Ég geri alltaf súpur frá grunni og get ekki ímyndað mér að pakkasúpur séu góðar. Það er án nokkurns vafa hægt að finna fínni uppskriftir að blómkálssúpum en okkur þykir þessi svo góð og hún klikkar aldrei. Í kvöld ákvað ég að skrifa niður hvernig ég geri súpuna ef einhvern langar að prófa. Uppskriftin er ekki heilög og mér dytti ekki í hug að fara út í búð eftir öðru hráefni en blómkálinu. Ef ég á ekki rjóma þá nota ég meiri mjólk, ef ég á ekki grænmetistening þá nota ég bara kjúklingatening og öfugt. Það virðist ekki skipta neinu máli, súpan verður alltaf góð.
Blómkálssúpa
- stór blómkálshaus
- 50 gr smjör
- 1 dl hveiti
- 6-7 dl soð
- 2 dl rjómi
- 3 dl mjólk
- 1 grænmetisteningur
- 1 kjúklingateningur
- hvítur pipar
- salt
Skerið blómkálshausinn niður og setjið í pott. Hellið vatni þannig að rétt fljóti yfir og sjóðið þar til blómkálið verður mjúkt.
Í öðrum potti er smjörið brætt og hveitinu hrært saman við. Bætið blómkálssoðinu smám saman í pottinn og hrærið vel á milli. Bætið rjómanum, mjólkinni og teningunum út í. Leyfið að sjóða saman um stund og smakkið til með hvítum pipar og salti. Ef súpan er bragðlítil þá er bætt við meiri krafti. Bætið að lokum blómkálinu í pottinn og leyfið að sjóða saman um stund áður en súpan er borin fram.
Ég leyfi töfrasprotanum stundum að mauka blómkálið áður en ég ber súpuna fram og hef alltaf brauð með súpunni.
Ljúfmeti og lekkerheit 
mmmmmmmm ekkert smá góð ! Breytti reyndar smá en hún er sjúklega góð
Átti blómkálshaus inni í ísskáp sem var kominn á síðasta séns, ákvað því að prófa þessa súpu. Hún sló þvílíkt í gegn hjá öllum í fjölskyldunni, eldri stelpan mín fékk sér meira að segja aukaskammt en það gerist nánast aldrei hjá henni. Bætti reyndar smá gráðosti útí (sem einnig var á síðasta séns haha) og það gerði bara gott.
Prófaði þessa í kvöld og hún er æði! Takk fyrir að deila uppskriftinni 🙂
Ætla að gera þessa í þriðja skiptið! Fannst kurteisi að kvitta fyrir mig af þeim sökum ;o) Stórskemmtileg síða hjá þér. Góður „venjulegur“ matur, fallegar myndir og persónulegt krydd.. Takk
Gerdi tettaum daginn f tengdaforeldra mina af tvi mömmu hans bjarna finnst blomkal svo gott.- var alveg hreint otrulega einfalt og mjööög gott- tau voru himinlifandi og hun skodar siduna tina potttettnuna ( mamma hans bjarna) – tetta geri eg potttett aftur!-
Gerði þessa í kvöld og hún var rosa góð! Geri hana pottþétt aftur. Takk fyrir:)
Sæl og takk fyrir frábæra síðu. Má ég spyrja hvernig soð við erum að tala um í þessari uppskrift? Býrðu það til eða kaupirðu það?
Þessi er alveg frábær, einföld og góð. Notaði reyndar kókoshveiti í stað venjulegs hveitis og var bara ánægð með útkomuna, örlítill kókoskeimur sem mér fannst skemmtileg tilbreyting 🙂
hef eldað þessa oft og alltaf jafn góð. Vildi bara kvitta og þakka fyrir mig 🙂
Takk fyrir okkur. Þessi súpa er æðisleg og ég, hamfarakokkurinn, náði að gera hana áfallalaust. Allir saddir og sælir a minu heimili í kvöld.
gerði þessa með kókoshveiti og hún er svakalega góð og ég á eftir að gera hana aftur – takk fyrir frábærar uppskriftir- 🙂
Ég verð að þakka kærlega fyrir þessa uppskrift – önnur eins hrós hef ég aldrei hlotið fyrir eldamennsku áður! Benti að sjálfsögðu á hvar uppskriftina er að finna!
-L
Gaman að heyra! 🙂
Þessi uppskrift hljómar ekkert smá vel! Hlakka til að prófa 🙂 Kærastinn minn er því miður með mjólkuróþol… hefur einhver prófað að nota kókosmjólk í staðinn fyrir venjulega mjólk/rjóma?
Hvað er þessi uppskrift fyrir marga?
Hvað er þessi fyrir ca. marga?
Alveg dásamleg súpa oh ssssvvvvooo góð , takk fyrir okkur
Þetta er meiriháttar góð súpa. Hef eldað hana áður og dóttur minni, fjögurra ára, fannst hún mjög góð ;o) Takk
Þessi er algert æði! Ég eldaði hana í leikskólanum sem ég vinn sem matráður, fjórfaldaði hana og bætti við brokkolí á móti blómkálinu og öll börnin voru himinlifandi – frá 1 árs og upp í 6 ára. Rosalega góð!
Takk fyrir alveg frábæra síðu. Ég elda eitthvað fra þér í hverri viku 🙂 Soðið sem þú nefnir í upptalningunni er það blómkálssoðið sem á að gera fyrst? Er ekki alveg að skilja hvernig soð þú átt við.
ég ólst upp á þessari og sveppa og brokklí í hádeginu hjá mömmu. Mamma kvaddi þennan heim með mörgum af sínum hversdags uppskriftum í huganum bara, það var gott að geta stutt sig við þessa og minningarnar af mömmu í eldhúsinu og töfra fram sama bragð og hún gerði bara með því að veifa höndunum. það var stutt í tárin þegar við borðuðum þessa um daginn. xo