Eins og þeir sem fylgja mér á Instagram hafa eflaust áttað sig á þá hef eytt undanförnum dögum í sveitinni. Mér þótti það æðislegt fyrir utan að vera ekki nettengd og geta því ekki uppfært bloggið. Verst þótti mér að hafa ekki haft vit á að láta ykkur vita af því áður en ég fór en satt að segja áttaði ég mig ekki á því fyrr en á hólminn var komið að það var vonlaust að blogga í stöpulu 3G sambandi. Því fór sem fór en nú er ég mætt aftur, vonandi tvíelfd til leiks.

Mér hlotnaðist sá heiður að vera matgæðingur vikunnar í nýjasta tölublaði Vikunnar (held reyndar að það fari úr búðum á morgun).  Í blaðinu má finna stutt viðtal við mig ásamt því að ég gef ég fjórar uppskriftir sem að mér þykja hver annarri betri.  Tvær þeirra hafa þegar verið birtar hér á blogginu fyrir all nokkru og þola vel að vera rifjaðar upp.

Annars vegar eru það þessir hamborgarar. Það væri synd að láta grillsumarið líða án þess að prófa þá. Það er svo einfalt að útbúa hamborgara og þeir verða svo mikið betri þegar þeir eru heimagerðir. Þessi uppskrift er einföld en stórgóð.

Hins vegar eru það kartöflur sem við fáum ekki nóg af og eru með bestu kartöflum sem ég hef smakkað. Það er ótrúlega einfalt að útbúa þær og ég hef borið þær oftar á borð en ég vil viðurkenna. Það er svo þægilegt að henda þeim í ofninn á meðan kjötið eða hamborgararnir eru grillaðir og satt að segja get ég borðað þær einar og sér. Algjörlega  ómótstæðilegar!

Í blaðinu gef ég einnig uppskriftir af tortillavefjum og súkkulaðipavlovu en þær hafa hvorugar verið birtar hér á blogginu áður. Tortillavefjurnar eru frábærar á veisluborðið en ég hef líka boðið upp á þær sem snarl með fordrykk. Það má útbúa fyllinguna deginum áður og þá tekur enga stund að smyrja henni á tortilluvefjurnar og rúlla þeim síðan upp daginn sem á að bera þær fram. Uppskriftina fékk ég hjá kærri vinkonu, Ernu, fyrir mörgum árum og hef notað hana óspart síðan.

Tortillavefjur

• 400 g rjómaostur
• 1 lítill púrrulaukur
• 1 lítil rauð paprika
• 1 lítið rautt chili (ferskt)
• 150 g góð skinka
• 8 tortillakökur

Sneiðið púrrulauk fínt, saxið papriku, kjarnhreinsið og fínhakkið chili og skerið skinku smátt. Hrærið öllu saman við rjómaostinn.

Smyrjið hrærunni á tortillakökur, rúllið þeim upp og skerið í bita.

Í gærkvöldi gerði ég hafrastykki. Núna eru börnin komin í sumarfrí og þá vil ég passa upp á að eiga gott snarl fyrir þau hér heima. Það er svo einfalt að gera hafrastykki og mér þykja heimagerð svo mikið betri en þau sem fást í stórverslunum. Þurrefnum er einfaldlega blandað saman í skál, smjör, hnetusmjör, hunang og sýróp brætt saman í potti og svo er öllu blandað saman, þrýst í form og bakað.

Þegar hafrakakan kemur úr ofninum er hún látin kólna og síðan skorin í passlega stór stykki.

Mér þykja hafrastykkin vera frábært nesti sem hentar vel í ferðalagið, göngur eða hjólatúra. Ég pakka þeim inn í bökunarpappír og þá er þægilegt að grípa þau með sér á hlaupum út. Í morgun stakk ég einu í veskið áður en ég fór í vinnuna og mikið þótti mér gott að geta fengið mér það í lok vinnudagsins.

Krakkarnir elska hafrastykkin og Malín var fljót að stinga einu í nestiboxið áður en hún hélt af stað í unglingavinnuna í morgun.

Hafrastykki

• 230 g haframjöl (2½ bolli)
• 10 g rice krispies (½ bolli)
• 20 g kókosmjöl (¼ bolli)
• 90 g súkkulaðibitar  (½ bolli ) -mér þykir suðusúkkulaði best
• 100 g púðursykur (½ bolli)
• 1/2 tsk salt
• 50 g smjör (¼ bolli)
• 60  g hnetusmjör (¼ bolli)
• 3 msk hunang
• 2 msk sýróp (má sleppa)
• 1/2 tsk vanilludropar

Setjið smjör, hnetusmjör, hunang og sýróp í pott og bræðið saman við lágan hita. Þegar blandan hefur bráðnað er vanilludropum bætt út í.

Setjið haframjöl, rice krispies, kókosmjöl, súkkulaðibita, púðursykur og salt í skál og blandið vel. Hellið smjörblöndunni saman við og hrærið öllu vel saman. Þrýstið blöndunni í bökunarform sem er 20×20 cm og bakið við 175° í 20 mínútur. Kælið og skerið síðan í stykki.

Það styttist í helgina og þegar krakkarnir spurðu mig áðan hvort við gætum ekki haft pönnupizzuna í matinn á morgun þá áttaði ég mig á því að ég hef ekki enn gefið ykkur uppskriftina að þessu nýja uppáhaldi hjá þeim.

Fyrir allnokkru þegar ég var að blaða í ELLE mat & vin-tímariti rak ég augun í uppskrift að pönnupizzu. Ég bakaði pizzuna strax í sömu viku og hún hefur verið fastur liður á matseðlinum síðan þá. Hvaðan pizzan fær nafnið pönnupizza er mér þó hulin ráðgáta, þar sem hún er bökuð á ofnplötu eins og venjulegar pizzur, en ekki ætla ég, smáborgarinn sjálfur,  að deila við jafn flott tímarit og ELLE er.

Hvort sem það er rétt að kalla pizzuna pönnupizzu eða ekki breytir því ekki að pizzan er svakalega góð og við fáum ekki nóg af henni. Ég setti inn mynd af pizzunni á Instagram fyrir nokkrum vikum og hef eftir það fengið þrjá tölvupósta þar sem ég hef verið beðin um uppskriftina. Það er því orðið löngu tímabært að setja hana hingað á bloggið ef fleirum langar að prófa.

Pönnupizza

• 1 pakki þurrger
• 1 tsk salt
• 1 tsk sykur
• 2 msk ólívuolía
• 2 ½ dl vatn (fingurheitt)
• 6 ½ dl hveiti
• 1 msk lyftiduft

Setjið ger, salt, sykur og ólívuolíu í skál. Hellið fingurheitu vatni yfir og hrærið aðeins í (ég læt þetta oft standa í nokkrar mínútur). Blandið hveiti og lyftidufti saman við og hnoðið saman í deig. Látið deigið hefast í 40 mínútur. Fletjið deigið út og látið það hefast aftur í 30 mínútur. Setja áleggið á og baka við 200-220°.

Ég er búin að lofa Ögga sjónvarpskvöldi og kíki því bara stutt inn í kvöld. Kvöldmaturinn var ljúffengur heimagerður skyndibiti sem var fullkomnaður með dásamlegum eftirrétti. Uppskriftin að kvöldmatum er einföld:

Sarek tunnbröd. Kartöflumús. Boston gúrka. Tvær soðnar (eða grillaðar) pulsur. Tómatsósa og gott sinnep. Hrár og steiktur laukur. Vafið upp og borðað. Eftirrétturinn var himneskur. Uppskriftina finnið þið hér.

Góðan dag! Er að prófa að blogga úr símanum. Ef það virkar datt mér í hug að uppfæra bloggið með nýrri mynd á klukkustundar fresti í dag. Sjáum hvort þetta gengur 🙂

Morgunmaturinn á hótelinu er frábær. Við fáum okkur alltaf það sama, ég hrökkbrauð með skinku og osti, linsoðið egg, hindberjajógúrt með múslí og appelsínudjús og Öggi fær sér beikon og egg. Stórgóð byrjun á deginum.

Út að prófa leiktækin sem eru fyrir utan hótelið okkar. Öggi var skynsamur og sat hjá á meðan ég fékk að finna fyrir því.

Jakob svalar þorstanum á meðan við bíðum eftir strætó. Leiðin liggur í bæinn.

Það er heitt í dag en smá vindur. Við kælum okkur niður með ís.

Malín vill fara í HM. Gunnar styttir sér stundir á meðan og prófar hatta.

Við förum aftur heim á hótel. Það ganga sérstakar eurovisionrútur um borgina fyrir okkur sem erum með aðgangspassa. Strákarnir eru spenntir fyrir rútuferðinni og vonast til að hitta eurovisionstjörnur um borð.

Það voru engar stjörnur um borð í eurovisionrútunni og ferðinn heim tók bara nokkrar mínútur. Við röltum yfir á ströndina sem er við hótelið og fáum okkur að borða þar.

Við Öggi höfum fengið okkur þetta cesarsalat áður í ferðinni. Það er æði og við pöntum það eina ferðina en.

Öggi þarf að fara á æfingu í höllinni. Við tökum rútuna með hópnum upp í höll en tökum stefnuna svo á verlunarmiðstöðina sem er þar við hliðina á. Þar eigum við nefnilega stefnumót.

Kvöldmatur. Tælenskt fyrir mig og Jakob, hamborgara fyrir hina. Strákarnir vilja sitja úti á svölum með lituðu gleri sem veldur því að myndin verður furðuleg á litin.

Það er pása hjá hópnum. Öggi og Beggi koma og hitta okkur.

Við röltum um og kíkjum í búðir. Malín kaupir sér snyrtivörur og er alsæl.

Unnur kaupir grínhnífa handa strákunum. Þeir eru í skýjunum.

Við tökum eurovisionrútuna heim á hótel og erum eina fólkið í henni.

Krakkarnir eru þreyttir eftir daginn. Þau fara upp á herbergi en ég hleyp yfir í stórmarkaðinn sem er á móti hótelinu og kaupi drykki og snarl.

Öggi kemur til baka frá höllinni. Hann kemur alltaf upp með drykki handa okkur á kvöldin og þó að klukkan sé orðin margt þá heldur hann í hefðina. Núna ætlum við aðeins að horfa á sjónvarpið áður en við sofnum. Það er stór dagur á morgun og við erum full tilhlökkunnar. Við kveðjum í dag.

Í gær fór ég til Kaupmannahafnar að hitta systur mína og litlu stelpuna hennar. Ég náði því aldrei að setja inn færslu en setti þó einhverjar myndir frá deginum á Instagram. Yndislegur dagur í alla staði.

Ég sagðist ætla að setja myndbandið af Eyþóri syngja í norræna partýinu hingað á síðuna en það gekk ekki. Ég gat hins vegar sett það á Facebook og ef þið hafið ekki séð það þá hvet ég ykkur til að kíkja. Hann er ótrúlegur!

Opnunarhátíðin var haldin hér í óperuhúsinu á sunnudagskvöldinu. Það var heilmikil upplifun og ekki skemmdi fyrir að hitta Loreen.

Eyþór tók sig vel út á rauða dreglinum.

Hann gaf eiginhandaáritanir.

Og viðtöl.

Við fengum vín og mat.

Og kampavín og franskar makkarónur í eftirrétt.

Það er stórmarkaður beint á móti hótelinu okkar og við förum þangað daglega til að ná okkur í drykki. Ef ég drykki kók þá myndi ég kaupa þessa 🙂

Ég gleymdi myndavélinni heima í gærdag og hef því bara myndir frá kvöldinu. Öggi var svo heppinn að sjá Charlotte Perelli og smellti af mynd fyrir mig. Ekki besta mynd sem til er af henni en samt….

Um kvöldid var samnorrænt partý. Allir fengu drykki og ostabakka og ég fékk myndir af mér með stjörnunum. Öggi tekur mig örugglega aldrei aftur með á svona samkomur! Hér erum við í rútunni á leiðinni í partýið og Öggi alveg grunlaus um hvað biði hans.

Sænski Robin er búinn að heilla mig upp úr skónum. Ég fylgdist með sænsku forkeppninni og var ekki hrifin af laginu þá en núna þykir mér það æðislegt. Ég lét Ögga strax taka mynd af mér með honum.

Marie Serneholt var líka i partýinu. Hún hefur tekid þátt og verið kynnir í sænsku forkeppninni en er eflaust frægust fyrir að hafa verið söngkona i A-teens.

Ögga fannst nóg komið og sagðist líka vera frægur. Til að róa hann lét ég taka mynd af mér með honum.

Eyþór tók lagið og var frábær! Ég tók upp video og ætla að reyna að setja það inn i dag.

Eftir partýið fóru einhverjir út á lífið en Öggi lagði ekki í meira og vildi bara koma mér heim. Hefur eflaust verið hræddur um að við myndum rekast á fleiri sænskar stjörnur. Hann bauð upp á gos, nammi og sjónvarpsgláp og ég lét til leiðast.

Núna liggur leiðin út i sólina. Ég ætla að reyna að stinga mér inn í Apple búð til að setja inn myndbandið frá því í gær. Kem annars með fleiri myndir á morgun.

Ég er loksins komin til Malmö og næ vonandi að setja færsluna inn. Netið hér á hótelinu er glatað, er ofboðslega hægt og virkar ekki alltaf en núna virðist það vera í lagi.

Hér iðar allt af lífi og hópurinn er með þéttskipaða dagskrá. Við makarnir fylgjum hópnum þegar okkur líst svo á en fylgjum okkar eigin prógrammi þess á milli. Eftir að við komum á fimmtudaginn litum við aðeins í búð og settumst síðan á hótelbarinn í smá afslöppun. Um kvöldið fórum við með hópnum á íslendingasamkomu í Lundi og ég hef sjaldan verið jafn þreytt og þegar ég lagðist í rúmið um nóttina.

Ferðalagið hingað gekk vel þó að minnstu munaði að við hefðum misst af flugvélinni. Við mættum tímalega í Leifsstöð en gleymdum okkur í fríhöfninni. Rétt náðum að versla smá snyrtivörur áður en við þurftum að hlaupa út í vél.

Það var svo gott að sjá Ögga aftur. Hann var búinn að gera svo fint,  tók á móti mér með rauðum rósum, uppáhalds sódavatninu mínu og fallegu hálsmeni frá Hendrikku Waage. Yndislegur.

Í gær litum við stelpurnar í búðirnar og ég snéri heim í nýjum skóm og með nýja matreiðslubók. Hlakka til að byrja að nota hana og mér sýnist á öllu að einhverjar uppskriftir eigi eftir að enda hér á blogginu.

Í gærkvöldi fór íslenski hópurinn saman út að borða. Staðurinn var skemmtilegur en þeim þótti erfitt að taka á móti svona stórum hópi og takmarkaði matseðilinn hjá okkur. Það voru skiptar skoðanir á matnum en ég var ánægð. Ég fékk mér ferskvatns síldarhrogn í forrétt, kálf í aðalrétt og súkkulaðitrufflu í eftirrétt og þótti forrétturinn standa upp úr. Sjúklega góður.

Morgunmaturinn hér á hótelinu er æðislegur! Við stillum vekjaraklukkuna svo að við missum ekki af honum.

Núna verð ég að hætta því stelpurnar eru farnar að bíða eftir mér. Við ætlum að eyða deginum í bænum. Ég læt heyra aftur frá mér á morgun, er með einhverjar uppskriftir sem eiga eftir að fara inn á bloggið og ætla svo að deila með mér af júrovisjónlífinu hér í Malmö.

Mér skilst að nýjasta trendið sé hið svokallaða LKL-mataræði, eða lág kolvetna lífsstíllinn, og full af vilja til að hanga með ákvað ég að prófa. Ég keypti mér sænska bók (íslenska bókin var ekki komin út) sem ég las spjaldanna á milli og þóttist heldur betur til í slaginn. Þeir sem þekkja mig fengu stjórnlaust hláturskast þegar ég sagði þeim frá þessum plönum mínum og þau máttu líka hlægja. Ég entist í tvo og hálfan dag, sem mörgum þótti bara nokkuð gott. Ég fékk staðfest það sem mig hefur lengi grunað, að ég er kolvetna- og sykuróð. Mér þykja bara vera svo mikil lífsgæði að borða góðan mat. Í þessa rúmu tvo daga var ég í alvöru sorgmædd yfir því að geta ekki fengið mér kökusneið með kvöldkaffinu og ég gat ekki hugsað þá hugsun til enda að sleppa því að fá mér nýbakað brauð um helgar. Mér fannst ég þurfa að kveðja svo margar gæðastundir með því að segja skilið við þessi góðgæti. Svo ég gafst upp, á mettíma.

Ég fylgdi matarræðinu sem sagt í tvo daga og annað þessara kvölda útbjó ég blómkálshrísgrjón sem meðlæti með kvöldmatnum. Þau voru glettilega góð og þó ég fylgi ekki mataræðinu þá mun ég eflaust bjóða aftur upp á þau því krökkunum þóttu þau æðisleg. Og holl eru þau, því verður ekki neitað.

Blómkálshrísgrjón

• 1 blómkálshaus
• smá salt

Rífið blómkálið niður á grófasta hluta rifjárnsins. Sjóðið vatn og saltið. Setjið blómkálið í sjóðandi vatnið og látið sjóða í 5 mínútur.

Ég sá í kommentunum að það var beðið um uppskriftina að steiktu perunum sem ég sagði frá í gær og þó mér hafi svo sannarlega staðið hugur til að setja uppskriftina inn þá þykir mér gaman að sjá að þið eruð spennt fyrir henni. Og það megið þið líka vera því þær eru algjört æði.

Þessar smjörsteiktu perur eru æðislegar sem forréttur. Við buðum þó upp á þær ásamt tómatcrostini með þeyttum fetaosti sem léttan kvöldverð og vorum stórhrifin af þeirri blöndu. Það tekur enga stund að útbúa þennan einfalda rétt og það þarf ekki annað en að líta yfir hráefnalistann til að sjá hversu stórkostlega góður hann er. Mig grunar að ég eigi eftir að ofnota báða þessa rétti í sumar.

Smjörsteiktar perur með brie og furuhnetum á ruccolabeði

• 400 g brieostur
• 200 g ruccola
• 75 g furuhnetur
• 4 perur
• ólívuolía
• balsamiksýróp
• gróft salt
• smjör

Skolið ruccola og dreifið úr því yfir fat. Ristið furuhneturnar á pönnu (passið að hafa ekki of háan hita svo þær brenni ekki!).

Skerið perurnar í sneiðar og steikið úr smjöri á pönnu. Skerið brieostinn í sneiðar og leggið yfir perurnar á heitri pönnunni.

Þegar brieosturinn byrjar að bráðna eru perurnar teknar af pönnunni og lagðar ofan á ruccolað. Að lokum eru ólívuolía, gróft salt, balsamiksýróp og furuhnetur sett yfir.