Brownies

~ Svava ~ 7 athugasemd

 

Ég hélt því fram í gær að ég hefði varla stigið fæti inn í eldhúsið um helgina en ég var þá búin að steingleyma að ég bakaði brownies á laugardeginum og tók með í matarboðið um kvöldið. Ég bakaði þær bara af forvitni því ég hafði séð uppskriftina á Smitten Kitchen þar sem Deb, sem heldur úti Smitten Kitchen, sagði að þetta væru hennar uppáhalds brownies.

Ég held að það sé ekki annað hægt en að elska Smitten Kitchen. Það eru svo girnilegar uppskriftir þar og þegar Deb segir að eitthvað sé í uppáhaldi hjá henni þá hreinlega verð ég að prófa það. Það er nákvæmlega það sem gerðist með þessar brownies, ég hef aldrei smakkað vondar brownies en ef þessar voru í uppáhaldi þá hlytu þær að vera guðdómlegar. Ég gat því ekki annað en bakað þær.

Þessar brownies voru auðvitað góðar, það vissi ég áður en ég bakaði þær. Græðgin var svo mikil að ég hugsaði ekki einu sinni út í það að hafa ís, rjóma eða ber með en það hefði verið enn betra. Það er örugglega líka gott að skera þær í litla bita og geyma inni í ískáp og geta fengið sér eins og súkkulaðimola. Ég hefði gert það ef ég hefði átt afgang.

Brownies

  • 85 gr dökkt súkkulaði (ég notaði síríus suðusúkkulaði en súkkulaði með meira kakóinnihaldi er jafnvel betra)
  • 115 gr ósaltað smjör
  • 265 gr sykur
  • 2 egg
  • 1 tsk vanillusykur
  • 1/2 tsk maldon salt (eða 1/4 tsk borðsalt)
  • 85 gr hveiti

Hitið ofninn í 175°. Klæðið 20×20 cm form með bökunarpappír og smyrjið bökunarpappírinn.

Bræðið súkkulaði og smjör saman í potti. Takið pottinn af hitanum og hrærið sykri, eggjum (einu í einu), vanillusykri og salti saman við.  Blandið hveiti saman við með skeið eða sleikju og skrapið vel niður með hliðunum. Hellið deiginu í bökunarformið og dreifið úr deiginu um formið. Bakið í 25-30 mínútur eða þar til prjóni stungið í kökuna kemur hreinn upp.

Látið kökuna kólna og skerið í bita.

 

Cajun-kjúklingapasta

~ Svava ~ 3 athugasemd

Við erum búin að vera í góðu yfirlæti um helgina og ég hef varla stigið fæti inn í eldhúsið. Á föstudagskvöldinu vorum við í mat hjá mömmu og í gærkvöldi hjá tengdó. Algjört lúxuslíf á okkur.

Í kvöld var þó engin sem bauð okkur í mat og ég eldaði cajun-kjúklingapasta að beiðni Jakobs. Hann er mesti matgæðingurinn af börnunum og hefur frábæran matarsmekk. Hann myndi seint sætta sig við ristað brauð með osti eða skinku í morgunmat heldur smyr brauðið sitt með pestó eða dijon sinnepi. Hann elskar mygluosta og mesta dekur sem hann getur hugsað sér er að fara á Noodle station á Skólavörðustígnum þar sem hann pantar sér sterka núðlusúpu. Jakob er alltaf mættur í eldhúsið til mín til að smakka á sósum þegar ég er að elda og það er frábært að fylgjast með honum á meðan hann smakkar þær til.

Og það var engin annar en Jakob sem fann uppskriftina að þessu cajun kjúklingapasta og bað mig um að elda það. Ég hafði verið að skoða skinnytaste síðuna á netinu og þegar ég hætti í tölvunni fór Jakob að skoða síðuna. Hann sá þá uppskriftina sem honum fannst við verða að prófa. Ég breytti uppskriftinni lítillega og notaði það sem ég átti í skápunum.

Cajun kjúklingapasta

  • 225 gr tagliatelle
  • 700 gr kjúklingabringur
  • 1-2 tsk cajun krydd
  • 1 msk ólívuolía
  • 1 rauð paprika, skorin í þunnar sneiðar
  • 1 gul paprika, skorin í þunnar sneiðar
  • 1 rauðlaukur
  • 3 hvítlauksrif
  • 2 tómatar, skornir í bita
  • 1 bolli kjúklingasoð (vatn og kjúklingateningur)
  • 1/3 bolli mjólk
  • 1 msk hveiti
  • 3 msk rjómaostur
  • nýmalaður pipar
  • salt

Blandið saman hveiti, rjómaosti og mjólk í matvinnsluvél eða með töfrasprota og leggið til hliðar.

Skerið grænmetið niður og leggið til hliðar. Skerið kjúklingabringurnar í strimla og kryddið með cajun-kryddi. Hitið ólívuolíu á pönnun og steikið kjúklingabringurnar. Kryddið með hvítlaukskryddi, salti og cajun-kryddi. Leggið til hliðar.

Bætið meiri ólívuolíu á pönnuna og mýkjið paprikurnar og rauðlaukinn við miðlungsháan hita, ca 3-4 mínútur. Bætið tómötunum og hvítlauknum á pönnuna og steikið áfram í 2-3 mínútur. Bætið mjólkurblöndunni, kjúklingasoðinu og kjúklingabringunum á pönnuna og látið allt sjóða saman um stund. Smakkið til með salti og pipar.

Sjóðið tagliatelle samkvæmt leiðbeiningum á pasta. Berið réttinn fram með pasta og hvítlauksbrauði.

Himnesk hnetusmjörskaka

~ Svava ~ 12 athugasemd

Þessi kaka er himnasendig fyrir þá sem elska hnetusmjör og hún er í algjöru uppáhaldi hjá Ögga. Hann er ekki þó einn um að þykja kakan góð og ég held að það sé ekki annað hægt en að falla fyrir henni.

Mér þykir mjög gaman að bjóða upp á þessa köku því hún vekur alltaf lukku. Um síðustu helgi fengum við vini okkar í kaffi og ég var byrjuð að baka möndluköku þegar Öggi fékk akút löngun í hnetusmjörskökuna. Þar sem ég er ósköp bóngóð í eldhússtörfunum þá ákvað ég að baka hana líka, öllum til mikillar gleði.

Ég hef mjög gaman af því að skoða amerískar uppskriftasíður og þar er oftast, ef ekki alltaf, notað bollamál. Það er lítið mál að breyta bollamáli yfir í desilítra (t.d. er tafla hér á síðunni) en ég mæli þó með því að fjárfesta í bollamáli. Þau kosta ekki mikið og ég sá t.d. bollamál frá Wilton í Kosti um daginn á um þúsund krónur.

Hnetusmjörskaka (uppskrift frá The Girl Who Ate Everything)

Botn:

  • ¼ bolli slétt hnetusmjör (þ.e. ekki með bitum í)
  • 1 bolli vatn
  • ½  bolli smjör
  • 1 bolli sykur
  • 1 bolli púðursykur
  • 2 bollar hveiti
  • 1 tsk salt
  • 1 tsk matarsódi
  • 2 egg
  • ½  bolli buttermilk (setjið 1 msk af sítrónusafa í bolla og fyllið hann síðan af mjólk. Látið standa í 5 mínútur)
  • 1 tsk vanillusykur

Krem:

  • ¾ bolli smjör
  • 6 msk buttemilk
  • ½  bolli slétt hnetusmjör
  • 3½ bolli flórsykur
  • 1 tsk vanillusykur

Hitið ofninn í 190°. Blandið saman hnetusmjöri, vatni og smjöri í potti og hitið að suðu. Bætið sykri, púðursykri, hveiti, salti og matarsóda saman við. Blandið eggjum, buttermilk (gerið 1 bolla af buttermilk, þ.e. blandið sítrónu og mjólk skv. skýringu hér fyrir ofan, notið hálfan bolla núna og geymið hinn helminginn til að nota í kremið) og vanillusykri saman og hrærið saman við. Klæðið skúffukökuform með bökunarpappír og bakið í ca 25 mínútur, eða þar til prjóni stungið í kökuna kemur hreinn upp.

Krem: Blandið saman smjöri, buttermilk og hnetusmjöri í potti og hitið að suðu. Takið af hellunni og hrærið flórsykri og vanillusykri saman við. Setjið kremið yfir kökuna.

Himnesk kjúklingasúpa með ferskjum

~ Svava ~ 22 athugasemd

 

Í gær fékk ég í hendurnar nýjasta Gestgjafann þar sem meðal annars er þáttur eftir litlu mig. Mér þótti mikill heiður að vera beðin um að gera þrjár síður fyrir blaðið og hafði æðislega gaman af. Það var mjög spennandi að fá Gestgjafann í hendurnar í gær og ég ætlaði varla að þora að opna hann. Í blaðinu gef ég fljótlegar uppskriftir fyrir saumaklúbbinn sem eru allar mjög góðar og ég get lofað því að ykkur á eftir að þykja súkkulaðikakan með kókosnum æðislega góð. Drífið ykkur nú og kaupið blaðið, það er stútfullt af girnilegum uppskriftum.

Ég var að fara í gegnum myndirnar í tölvunni og rakst þá á þessar myndir af kjúklingasúpu sem ég gerði fyrir nokkrum vikum og átti alltaf eftir að setja inn. Ég skil ekki hvernig það gat gerst því ég elska þessa súpu.

Uppskriftin kemur frá Beggu frænku minni og þegar hún bauð mér í súpuna í fyrsta sinn þá kolféll ég fyrir henni og varð ekki róleg fyrr en hún var búin að gefa mér uppskriftina. Súpan er ekki síðri daginn eftir og því sniðugt að bjóða upp á hana í afmælum eða saumaklúbbum og geta þá undirbúið hana deginum áður.

Kjúklingasúpa með ferskjum

  • 1 stór laukur (smátt saxaður)
  • smjör
  • 3-4 tsk karrýmauk (ég nota  Pataka´s mild curry paste, coriander & cumin)
  • 4 hvítlauksrif, pressuð
  • 1 ½  dós niðursoðnir tómatar
  • 5 dl kjúklingasoð (vatn og 2 kjúklingateningar)
  • 1 lítil dós tómatpuré
  • 1/2 líter rjómi
  • 1 stór dós niðursoðnar ferskjur
  • 3 kjúklingabringur.

Bræðið smjör og karrýmauk í potti og bætið lauknum í. Látið laukinn mýkjast við vægan hita. Bætið tómötum, tómatpuré, kjúklingasoði, hvítlauk og rjóma saman við og látið sjóða við vægan hita í ca 10 mínútur.

Skerið ferskjurnar smátt niður og bætið út í ásamt safanum. Látið sjóða áfram í aðrar 10 mínútur.

Skerið kjúklingabringurnar smátt og steikið á pönnu upp úr smjöri. Saltið með maldonsalti. Bætið kjúklingabitunum út í súpuna og látið hana sjóða í 5 mínútur til viðbótar.

Ofnbakaður grjónagrautur

~ Svava ~ 31 athugasemd

Ég var með kvöldmat sem við hjónin erum hvorugt sérlega hrifin af en krakkarnir elska, grjónagraut og lifrapylsu. Ég elda grjónagraut eins sjaldan og ég kemst upp með en annað slagið læt ég það eftir krökkunum.

Þar sem ég er óspennt fyrir grjónagrautnum er áhuginn fyrir að standa yfir pottinum og passa að hann brenni ekki við botninn mjög takmarkaður. Að elda grautinn í ofninum hentar mér mun betur og kvöldmaturinn getur varla orðið einfaldari en þetta. Grauturinn sér um sig sjálfur í ofninum og það þarf ekki að svo mikið sem að líta á hann á meðan.

Grjónagrautur í ofni

  • 2,5 dl hrísgrjón (t.d. frá River)
  • 1,25 líter nýmjólk
  • nokkrar smjörklípur
  • 1 tsk salt
  • 1 msk sykur

Hitið ofninn í 175°. Blandið öllum hráefnum saman í stórt eldfast mót (amk 2 lítra). Setjið álpappír yfir og bakið í miðjum ofni í ca 1,5 klst. (það er í lagi að sleppa álpappírnum því það myndast himna yfir grautinn sem er síðan flett af).

Þegar grauturinn er tilbúinn er efsta laginu á honum flett af og hrært vel í honum. Þynnið grjónagrautinn með mjólk ef þörf er á.

Lasagna

~ Svava ~ 6 athugasemd

Ég fæ reglulega löngun í lasagna og þykir gaman að breyta til og prófa nýjar lasagna uppskriftir. Þó ég sé mjög hrifin af lasagna með rjómakremi þá er þetta sú uppskrift sem hefur hangið lengst með mér og er sú sem ég elda oftast. Hún er í algjöri uppáhaldi hjá krökkunum og ég skil það vel því hún er stórgóð.

Þetta lasagna er mikill og góður fjölskyldumatur og ég hef enn ekki hitt það barn sem þykir það ekki gott. Mér þykir mikill kostur hvað uppskriftin er einföld og flest hráefnin á ég oftast til í skápnum. Hér er engum óþarfa bætt við og eflaust þess vegna sem börnin eru svona hrifin af því. Þetta er góður réttur sem passar bæði til hvunndags og betri tilefna.

Það hafa margir spurt mig út í Chili Explosion kryddið frá Santa Maria sem ég nota mikið og mér þykir nánast ómissandi í hakkrétti. Það virðist vera að valda ruglingi að kryddin frá Santa Maria eru yfirleitt með bláu loki en Chili Explosion kryddið er það ekki. Ég ákvað því að taka mynd af kryddinu ef fleiri eru spenntir fyrir að prófa það. Ég held að það fáist í flestum búðum en ég hef keypt mitt í Bónus.

Lasagna

  • 1-2 laukar
  • 1 msk smjör eða olía
  • 400 gr nautahakk
  • 1 dós hakkaðir tómatar
  • 2 msk tómatpuré
  • 1 grænmetisteningur
  • 1 tsk basilika (þurrkuð)
  • 1 tsk salt
  • nýmalaður svartur pipar
  • chili explosion

Ostasósa

  • 4 msk hveiti
  • 7 dl mjólk
  • 2 dl (ca 70 gr) rifinn ostur
  • salt

Ofanálag

  • Rifinn ostur

Kjötsósan: Skalið og hakkið laukinn. Hitið olíu eða smjör á pönnu og steikið laukinn og nautahakkið. Bætið niðursoðnum tómötum, tómatpuré, basiliku, chili explosion og grænmetistening saman við og leyfið að sjóða við vægan hita undir loki í ca 20 mínútur.  Smakkið til með salti og pipar og jafnvel meira af chili explosion eða basiliku.

Ostasósan: Hrærið hveitið saman við smá af mjólkinni í potti. Bætið restinni af mjólkinni út í og hrærið í pottinum á meðan suðan er að koma upp. Látið sjóða við vægan hita í 3 mínútur. Takið pottinn af hellunni og hrærið rifna ostinum út í ásamt smá salti. Athugið að sósan á ekki að sjóða eftir að osturinn er kominn í hana.

Setjið helminginn af ostasósunni í botninn á eldföstu móti og leggið lasagnaplötur yfir. Setjið helminginn af kjötsósunni yfir lasagnaplöturnar og leggið síðan annað lag af lasagnaplötum yfir. Setjið hinn helminginn af kjötsósunni yfir og leggið þriðja lagið af lasagnaplötum yfir. Endið á að setja seinni helminginn af ostasósunni yfir og stráið rifnum osti yfir ostasósuna.

Bakið lasagnað í 15-20 mínútur við 220°.

Pizzasnúðar

~ Svava ~ 19 athugasemd

Ég baka oft pizzasnúða og þykir gott að eiga þá í frystinum. Á sumrin kippum við þeim með okkur í lengri bílferðir eða hjólatúra og á veturnar þykir krökkunum gott að geta hitað sér þá eftir skóla eða æfingar.

Ég hef prufað margar uppskriftir að pizzasnúðum en þessi er sú sem stendur upp úr og okkur þykir langbest. Ég leyfi deiginu að hefast lengi og uppsker stóra og mjúka snúða fyrir vikið. Til að snúðarnir verða léttir og góðir finnst mér skipta mestu máli að hnoða deigið lengi (ég nota hnoðaran á Kitchen Aid hrærivélinni og læt hann hnoða í um 5 mínútur), nota eins lítið hveiti og ég kemst upp með og að leyfa deiginu að hefast lengi. Þó að baksturinn taki lengri tíma þá er samt vinnan við þá ósköp fljótleg og mér þykir því lítið mál að henda í snúðana þegar ég er heima.

Ég hef bæði prófað að setja pizzasósu og tómatsósu í snúðana og við erum öll sammála um að tómatsósan sé mun betri og ég held mig því alfarið við hana. Mér þykir heimabakað brauðmeti með geri yfirleitt ekki geymast vel og frysti því alltaf snúðana á meðan þeir eru enn heitir. Það er síðan lítið mál að leyfa örbylgjuofninum að hita þá aftur og þá verða þeir alltaf eins og nýbakaðir.

Pizzasnúðar

  • 1 bréf þurrger
  • 5 dl mjólk (37°heit)
  • 3 msk ólívuolía
  • 1 tsk salt
  • 1 msk sykur
  • 1 egg
  • ca 14 dl hveiti

Fylling

  • 200 gr skinka
  • ca 1 dl tómatsósa
  • 3 dl rifinn ostur
  • 2 msk oregano

Til að pensla með

  • 1 egg
  • maldonsalt og oregano

Blandið saman þurrgerinu og smá af fingurheitri mjólkinni. Setjið afganginn af mjólkinni út í ásamt ólívuolíunni, saltinu, sykrinum og egginu. Setjið nánast allt hveitið saman við  (passið að setja ekki of mikið) og vinnið deigið vel saman. Ég hnoða það í ca 5 mínútur í hrærivélinni. Látið deigið hefast á hlýjum stað í amk 30 mínútur.

Skerið skinkuna niður og raðið möffinsformum á ofnplötur.

Þegar deigið er búið að hefast er það lagt á mjölað borð og hnoðað létt saman. Skiptið deiginu í tvo hluta og fletjið hvorn hluta í aflanga köku. Smyrjið tómatsósu á og stráið skinkubitum, osti og oregano yfir. Rúllið deiginu saman og skerið hverja rúllu í ca 12-15 bita. Leggið bitana í möffinsformin og leyfið þeim að hefast í amk 30 mínútur.

Hitið ofninn í 225°. Penslið snúðana með upphrærðu eggi og stráið maldonsalti og oregano yfir. Bakið snúðana í miðjum ofni í 12-15 mínútur.

Grískur ofnréttur

~ Svava ~ 15 athugasemd

Ég hef séð uppskrift að þessum gríska ofnrétti víðsvegar á sænskum matarbloggum og óhætt að segja að hann hafi verið að slá í gegn. Eins og svo oft áður þegar ég sé uppskriftir ganga um netið varð ég spennt að prófa og fannst því upplagt að elda þennan gríska ofnrétt núna um helgina.

Ég skil vinsældir réttsins vel og það er óhætt að segja að hann hafi skotið sér beint á lista yfir uppáhaldsrétti hjá okkur. Marineringin á kjötinu gefur honum æðislega gott bragð og kalda sósan passar mjög vel með. Ég átti þetta hvítlauksbrauð niðurskorið í frystinum sem ég setti frosið í ofninn í stutta stund og bar fram með ofnréttinum ásamt köldu sósunni og ólívum. Þvílík veisla, við vorum öll stórhrifin og gefum máltíðinni hæstu einkunn.

Grískur ofnréttur

  • Kartöflubátar
  • 500 gr svínalund
  • 1 rauð paprika
  • 1 rauðlaukur
  • 1 askja kokteiltómatar
  • 1 fetakubbur

Marinering fyrir kjötið

  • 1 ½ dl olía (ekki ólívuolía)
  • 2 msk sojasósa
  • 3 hvítlauksrif
  • 1 tsk engifer (krydd, ekki ferskt)
  • 1 ½ tsk sambal oelek (chilimauk sem fæst t.d. í Bónus)
  • salt og pipar

Köld sósa

  •  2 dl sýrður rjómi (1 box)
  • 3 msk majónes
  • 1 tsk ítalskt salatkrydd eða jurtakrydd
  • 1 pressað hvítlauksrif

Deginum áður:

Blandið hráefnunum í marineringuna saman. Skerið kjötið í ca 1 cm þykkar sneiðar og leggið í marineringuna. Látið standa í lokuðu boxi eða skál í ískáp í sólarhring.

Blandið hráefnunum í sósuna saman og geymið í ískáp.

Sama dag:

Hitið ofnin í 220°. Skerið kartöflur í báta og leggið í stórt eldfast mót eða ofnskúffu. Saltið og kryddið með smá chili explosion kryddi og setjið í ofninn í 20-25 mínútur.

Skerið rauðlaukin og paprikuna í báta og kirsuberjatómatana í fernt. Takið kartöflurnar úr ofninum og leggið niðurskorið grænmetið yfir þær. Leggið kjötið ásamt marineringunni yfir grænmetið og endið á að mylja fetakubbinn yfir kjötið. Setjið í ofninn í 20-25 mínútur.

Berið fram með köldu sósunni og jafvel ólívum og góðu brauði.

Satay-kjúklinganúðlur

~ Svava ~ 5 athugasemd

Dagurinn hefur verið hinn ljúfasti í alla staði. Við erum búin að fara í afmæli, gera vikuinnkaupin, horfa á sjónvarpið og vera í algjörum rólegheitum. Okkur langaði í eitthvað gott í kvöldmat og ég endaði á að elda enn einn réttinn úr Jamie Oliver ársblaðinu, satay-kjúklinganúðlur.

Þetta blað fer að vera með betri kaupum sem ég hef gert í matreiðslublöðum. Það virðist sama hvað ég elda úr því, allt hefur verið ljómandi gott. Okkur þóttu þessar satay-kjúklinganúðlur alveg stórgóðar og kláruðum þær upp til agna.

Ég veit ekki hvað gerðist hjá mér í matvörubúðinni í dag því ég gleymdi að kaupa tvennt af innkaupalistanum og bæði hráefnin voru fyrir þessar kjúklinganúðlur, baunaspírur og vorlaukur. Ég nennti ómöglega að fara aðra ferð í búðina og sleppti þeim því bara. Það kom ekki að sök en næst mun ég hafa þau með.

Satay-kjúklinganúðlur (uppskrift fyrir 2-3)

  • jarðhnetuolía (ég notað vegetable oil)
  • 1 laukur, skorin í þunna báta
  • 2 hvítlauksrif, söxuð
  • 1 rautt chili, fræhreinsað og skorið í sneiðar
  • engiferbútur á stærð við þumal, rifið
  • 1 lemongrass (ég notaði hýði af hálfri sítrónu í staðin)
  • 3 kjúklingabringur, skornar í sneiðar
  • 50 gr crunchy hnetusmjör (rúmlega 3 msk)
  • 2 msk fiskisósa (fish sause)
  • 2 msk sojasósa
  • 1 msk sykur
  • 400 ml kókosmjólk (1 dós)
  • 200 gr núðlur
  • handfylli af baunaspírum
  • lime skorið í báta og vorlaukur til að bera fram með réttinum

Hitið olíuna á pönnu og steikið lauk, hvítlauk, rautt chili, engifer og sítrónuhýði þar til það byrjar að taka lit. Bætið kjúklingnum á pönnuna og steikið áfram í nokkrar mínútur. Bætið hnetusmjöri, fiskisósu, sojasósu, sykri og kókosmjólk á pönnuna og látið suðuna koma upp. Sjóðið við vægan hita í 5-10 mínútur.

Sjóðið núðlurnar eftir leiðbeiningum á pakkningu. Blandið kjúklingnum saman við núðlurnar ásamt baunaspírunum. Berið fram með lime-bátum og vorlauk.

Mokkakaka

~ Svava ~ 7 athugasemd

Í kvöld ætlum við Öggi að bregða undir okkur betri fætinum og fara á Grillið á Hótel Sögu með vinnufélögum mínum. Við ætlum að byrja kvöldið í for-fordrykk í heimahúsi, færa okkur síðan yfir í fordrykk á Mímisbar og þaðan í þriggja rétta kvöldverð á Grillinu. Það er því skemmtilegt kvöld framundan og ég má ekkert vera að því að sitja við tölvuna.

Þar sem ég mun ekki elda í kvöld datt mér í hug að gefa uppskriftina að kökunni sem er hér efst á síðunni, sjálfri forsíðumyndinni. Kakan er æðislega góð og passar vel með kaffinu um helgina.

Mokkakaka

Botn:

  • 2 egg
  • 3 dl sykur
  • 1 ½ dl mjólk
  • 4 ½  dl hveiti
  • 3 tsk lyftiduft
  • 150 gr smjör
  • 2 tsk vanillusykur
  • 1 msk kakó

Glassúr:

  • 3 ½  dl flórsykur
  • 50 gr brætt smjör
  • 4 msk kaffi
  • 1 msk kakó
  • 2 tsk vanillusykur
  • kókosmjöl til að setja yfir kökuna

Hitið ofninn í 225°. Hrærið egg og sykur létt og ljóst. Blandið hveiti og lyftidufti saman og hrærið saman við eggjablönduna á víxl við mjólk og brætt smjör. Hrærið að lokum kakói og vanillusykri saman við deigið. Setjið deigið í skúffukökuform sem hefur verið klætt með bökunarpappír og bakið í ofninum í ca 15 mínútur.

Hrærið hráefnunum í glassúrinn saman og breiðið yfir kökuna. Stráið að lokum kókosmjöli yfir.