Ég hef lítið dundað mér í eldhúsinu upp á síðkastið enda hafa krakkarnir verið út og suður og fáir heima í mat. Um helgina náðist þó hópurinn saman og á föstudagskvöldinu prófaði ég uppskrift af frábærum föstudagsmat (uppskriftin kemur!) og í gærkvöldi vorum við með svínalundir í svo æðislegri sósu að við gátum ekki hætt að dýfa meðlætinu í hana eftir að við  vorum búin að borða. Svo brjálæðislega gott!

Svínalund í rjómasósu (uppskrift fyrir 5-6)

• 2 svínalundir (ég gleymdi að athuga þyngdina en þær voru í meðalstærð)
• salt og pipar

Sósa:

• 5 dl rjómi
• 2 msk kálfakraftur
• 2 msk dijon sinnep
• 2 tsk salvía (þurrkuð)
• 1 tsk hunang
• nokkrir dropar af sítrónusafa
• salt og pipar

Skerið svínalundirnar í um 2,5 cm þykkar sneiðar og kryddið með salti og pipar. Bræðið smjör og olíu saman á pönnu og steikið kjötið þar til það hefur fengið steikingarhúð á báðum hliðum. Takið kjötið af pönnunni og leggið til hliðar. Setjið öll hráefnin fyrir sósuna á pönnuna (ekki þrífa hana eftir kjötið!) og látið sjóða saman í nokkrar mínútur. Leggið kjötið í sósuna og látið sjóða við vægan hita í 5 mínútur.

Þegar við flugum til Balí millilentum við í Stokkhólmi þar sem ég byrgði mig upp af tímaritum og sælgæti fyrir 13 tíma flugið sem beið okkar yfir til Singapore. Í einu tímaritanna, Family Living, leyndust nokkrar mexíkóskar uppskriftir sem mér leist vel á og reif úr blaðinu.

Í gærkvöldi prófaði ég fyrstu uppskriftina og þeir sem fylgja mér á Instagram gátu séð myndir af herlegheitunum í Instastory. Eldamennskan var svo einföld að ég nýtti tækifærið og eldaði kjúklingasúpu í leiðinni til að eiga í kvöld. Gunnar var að keppa yfir kvöldmatartímann, í grenjandi rigningu, og það var dásamlegt að koma heim eftir leikinn og þurfa bara að hita súpuna upp.

Ég held að það sé sama hvaða mexíkóska rétt ég býð upp á hér heima, þeir slá alltaf í gegn. Þessi réttur var engin undantekning. Ég bar kjötið bæði fram með litlum tortillakökum og stökkum skeljum og í meðlæti var ég með kál, papriku, rauðlauk, gúrku, avokadó, salsa, sýrðan rjóma og svart Doritos. Súpergott!

Carnitas (uppskrift fyrir 5)

• 1 kg beinlaus grísahnakki
• 1 ½ gulur laukur
• 4 hvítlauksrif
• 1 rautt chillí
• 2 tsk salt
• smá pipar úr kvörn
• safi úr einni appelsínu
• 175 ml bbq-sósa
• 3/4 líter Coca-Cola
• 1/2 líter vatn (ég setti bara 1/4 líter)

Skerið kjötið í 2 cm bita. Afhýðið lauk og hvítlauk og skerið gróft niður. Fjarlægið fræin (ef þið viljið ekki hafa réttinn sterkann, látið þau annars vera með) og fínhakkið chillíið. Setjið öll hráefnin í pott (þykkbotna ef hann er til) og látið sjóða við vægan hita í 3-4 klst. Hrærið annað slagið í pottinum. Undir lokin ætti allur vökvi að vera orðinn þykkur á kjötinu. Rífið kjötið niður með tveim göfflum og berið fram.

SaveSave

SaveSave

Það hefur verið flensa á heimilinu í viku og það virðist ekker fararsnið á henni. Jakob kom veikur heim úr skólanum síðastliðinn fimmtudag og steinlá fram á sunnudag en þá tók Gunnar við og hefur legið síðan þá. Við erum alveg búin að fá nóg af þessu ófremdarástandi og óskum þess heitt að flensan fari að láta sig hverfa.

Ég fékk óstjórnlega löngun í snitsel um daginn sem endaði auðvitað með að það var snitsel í kvöldmatinn skömmu síðar. Mér þykir allur matur í raspi góður en elda þannig mat þó furðu sjaldan. Ég bar snitselinn fram með kartöflumús, piparsósu og rifsberjahlaupi. Súpergott!!

Snitsel

• 8 úrbeinaðar grísakótilettur
• 2 dl hveiti
• 2 egg
• 2 dl brauðrasp eða Panko
• salt og pipar
• olía (ekki ólífuolía)

Byrjið á að berja kótiletturnar með flötu hliðinni á buffhamri til að ná þeim þunnum. Kryddið báðar hliðar síðan með pipar og salti.

Setjið hveiti í eina skál, hrærð egg í aðra skál og brauðrasp í þriðju skálina. Veltið kótilettunum fyrst upp úr hveitinu, síðan egginu og að lokum brauðraspinum.

Hitið vel af olíu á pönnu, þannig að það sé um 1 cm lag yfir pönnunni. Steikið snitselinn í um 2-3 mínútur á hvorri hlið. Takið snitselinn af pönnunni og yfir á disk klæddan eldhúspappír. Berið strax fram með kartöflumús og sósu.

Ég hef undanfarna daga verið löt í eldhúsinu. Hef lítið nennt að hafa fyrir kvöldmatnum og viljað hafa hann eins einfaldan og hægt er. Það geta komið svona dagar, en núna finn ég hins vegar að þetta tímabil er yfirstaðið og núna vantar mig fleiri máltíðir í daginn til að komast yfir að elda allt sem mig langar að prófa.

Í letikastinu eldaði ég þennan ofureinfalda rétt þar sem allt fór í einni ofnskúffu inn í ofn. Það er eitthvað við svona rétti þar sem allt fer í eina skúffu og verður tilbúið á sama tíma. Kjötið verður svo mjúkt og rótargrænmetið fær gott bragð af kjötmarineringunni. Meðlætið þarf ekki að vera flókið. Ég var meira að segja svo löt að ég opnaði bara kalda hvítlaukssósu og hrópaði gjörið svo vel! Ekkert frekara meðlæti þurfti en vissulega væri smart að bera salat fram með réttinum og góða heita sósu. Eða tzatziki og grískt salat. En á letidögum þarf ekkert slíkt og hér voru allir kampakátir með einfaldleikann.

Ofnbökuð svínalund með rótargrænmeti – allt í einni skúffu!

• 1 svínalund
• 1/2 dl ólivuolía
• 2 msk sítrónusafi
• 1 hvítlauksrif
• 1 tsk timjan
• maldonsalt
• svartur pipar úr kvörn
• rótargrænmeti (ég var með kartöflur og sætar kartöflur)

Marinerið svínalundina í ólivuolíu, sítrónusafa, pressuðum hvítlauk, timjan, salti og pipar. Látið liggja í 20 mínútur eða á meðan rótargrænmetið er undirbúið og ofninn hitaður. Hitið ofninn í 200°. Skerið rótargrænmetið í báta/bita og setjið í ofnskúfu, veltið því upp úr ólívuolíu og kryddið eftir smekk (ég notaði maldon salt, pipar og timjan). Setjið inn í ofn í 15 mínútur. Á meðan er svínalundin brúnuð á pönnu við háan hita, á öllum hliðum. Bætið svínalundinni í ofnskúffuna og hellið því sem eftir var af marineringunni yfir og bakið áfram í 20 mínútur. Leyfið kjötinu að standa aðeins áður en það er skorið í sneiðar.

Ég þarf ekki að huga að neinum helgarmat þessa helgina þar sem ég fer út að borða og í bíó á föstudagskvöldinu, út að borða og á tónleika á laugardagskvöldinu og í saumaklúbb á sunnudagskvöldinu! Það eru ekki allar helgar svona vel bókaðar hjá mér, eins heimakær og ég nú er. Ég er þó með góða tillögu að helgarmat fyrir þá sem eru farnir að huga að helgarmatnum, hægeldaður svínahnakki í rjómasósu með kartöflum (brúnaðar er enn betra!), salati og rifsberjahlaupi. Ótrúlega einfalt og tekur örskamma stund að útbúa en þarf síðan að vera allan daginn í ofninum, þannig að þegar kjötið er tilbúið dettur það nánast í sundur. Þetta var helgarmaturinn okkar um síðustu helgi og þar sem strákarnir voru í afmæli á laugardagskvöldinu nýtti ég tækifærið og eldaði góðan skammt þá sem við gátum notið bæði laugardags- og sunnudagskvöld. Ég setti kjötið í ofninn strax um morguninn og um kvöldið var ekkert að gera nema að sjóða kartöflur og útbúa sósu úr soðinu. Einfalt og stórgott!

Pulled pork í rjómasósu (uppskrift frá Bakverk och fikastunder)

• 1 kg. svínahnakki í sneiðum
• salt, svartur pipar, hvítur pipar og aromat
• 2 nautakjötsteningar
• 3 dl vatn

Kryddið svínahnakkasniðarnar og steikið síðan upp úr smjöri við háan hita þannig að kjötið fái fallega steikarhúð á öllum hliðum. Leggið í eldfast mót (bætið jafnvel smá meira af kryddi á). Hellið vatninu yfir pönnuna og bætið nautakjötsteningunum í. Látið suðuna koma upp og teningana leysast upp. Hellið vatninu af pönnunni yfir kjötið og setjið álpappír yfir formið (ef þið eigið ofnpott þá er upplagt að nota hann). Setjið í 130° heitan ofn í 8-10 klst.

Rjómasósa

• krafturinn frá kjötinu (sem verður á botninum á mótinu eftir eldunina)
• 2,5 dl rjómi
• ca 1 tsk. rifsberjahlaup
• smá sykur
• maizena til að þykkja sósuna

Setjið kjötkraftinn í pott og hrærið rjóma saman við. Látið sjóða saman í smá stund og smakkið til með rifsberjahlaupi og smá sykri (jafnvel smá hvítur pipar). Þykkið sósuna með Maizena mjöli.

• 1 kg beinlaus svínabógur (eða annað svínakjöt, t.d. kótilettur)
• 2 msk kryddblanda (uppskrift fyrir neðan)
• 1 lime
• 1 appelsína
• 1 msk sojasósa
• 1 tsk cumin
• 5 hvítlauksrif
• 1/2 – 1 líter Coca cola

Kryddblanda

• 3 msk paprikukrydd
• 1 tsk cayennepipar
• 1 tsk hvítur pipar
• 1 msk hvítlaukskrydd
• 1 msk chilikrydd
• 1 msk þurrkað oregano
• 1 msk salt

Blandið öllu saman.

Skerið kjötið í litla bita og nuddið kryddblöndunni (ath. að nota bara 2 msk af henni) og cumin. Pressið lime- og appelsínusafa yfir og hellið sojasósu yfir. Bætið fínhökkuðum hvítlauk saman við og blandið öllu vel saman. Látið standa að minnsta kosti 1 klst. en gjarnan lengur (það er t.d. upplagt að gera þetta kvöldið áður til að flýta fyrir).

Steikið kjötið við háan hita og hellið afgangs marineringu yfir. Hellið Coca Cola yfir þannig að það næstum fýtur yfir kjötið og látið sjóða undir loki í amk 2 klst. Fylgist með og bætið Coca Cola á eftir þörfum. Undir lokin á suðutímanum á vökvinn að vera farinn. Tætið kjötið í sundur áður en þið berið það fram.

• 2 mangó, skorin í teninga (má nota frosið mangó)
• 1/2 pakkning kóriander
• safi úr 1-2 lime
• biti af fínhökkuðu chili (fjarlægið fræin ef þið viljið ekki hafa salsað sterkt)
• 1/2 tsk salt

Um helgar þykir mér notalegt að hægelda mat. Að kveikja á útvarpinu og dunda mér hér heima á meðan kvöldmaturinn sér um sig sjálfur á eldavélinni eða í ofninum. Kjötið verður svoooo meyrt að það nánast dettur í sundur. Brjálæðislega gott!

Það rifjaðist upp fyrir mér í gærkvöldi að ég á eftir að setja inn uppskrift af dásamlegum hægelduðum kótilettum sem ég eldaði tvær helgar í röð um daginn. Þegar ég var með þær í fyrsta sinn hugsaði ég með mér að þetta væri nú eitthvað fyrir mömmu. Helgina eftir eldaði ég því kótiletturnar aftur og bauð henni til okkar. Hún dásamaði þær við hvern bita og við vorum sammála um að þetta er frábær helgarmatur.

Hægeldaðar kótilettur í rjómasósu (uppskrift fyrir 4)

• 6 svínakótilettur
• 1 gulrót
• 1 gulur laukur
• 1 lárviðarlauf
• salt og pipar
• vatn
• 1 msk kálfakraftur (kalvfond)
• 2 dl rjómi
• 1 dl sýrður rjómi
• 1 msk sojasósa
• salt og pipar
• sykur

Saltið og piprið kótiletturnar og brúnið þær á báðum hliðum á rúmgóðri pönnu. Skerið lauk í báta og gulræturnar í sneiðar og bætið á pönnuna, hellið síðan vatni svo rétt fljóti yfir. Setjið kálfakraft og lárviðarblað í og látið sjóða undir loki við vægan hita í 2-3 klukkustundir. Snúið kótilettunum gjarnan annað slagið.

Takið kjötið af pönnunni og sigtið sósusoðið. Setjið soðið aftur á pönnuna (laukurinn og gulrótin eiga ekki að vera með), hrærið rjóma og sýrðum rjóma saman við og smakkið til með sojasósu, salti og pipar. Setjið smá sykur í sósuna og leggið kótiletturnar í og látið sjóða saman í nokkrar mínútur. Berið fram með kartöflum og rifsberjahlaupi