Kotasælupönnukökur

ágúst 10, 2013ágúst 10, 2013 ~ Svava ~ 11 athugasemd

Ég elska, elska, elska morgnana um helgar. Mér þykja þeir eitt það besta við helgarnar. Að geta byrjað daginn rólega, læðst fram á náttsloppnum, kveikt á útvarpinu og útbúið morgunmat. Öggi kemur oftast skömmu seinna fram og ef ég er ekki búin að leggja á borð þá gerir hann það. Þetta er notaleg stund og það ríkir kyrrð í húsinu sem er dásamlegt að hefja daginn í. Við erum oftast bara tvö á fótum og dundum okkur við þetta yfir spjalli um allt og ekkert. Þegar allt er tilbúið kveikjum við á kertum og vekjum krakkana. Virku morgnarnir eru hrein andstæða við helgarnar, þegar allir eru að flýta sér og enginn tími gefst til að njóta stundarinnar. Mér þykir leiðinlegt að byrja dagana þannig en einfaldlega næ ekki að koma okkur fyrr á fætur. Það að virku morgnarnir séu svona misheppnaðir veldur því eflaust að við njótum helganna enn betur.

Við erum ekki föst í sama morgunmatnum um helgar. Upp á síðkastið hef ég oftast fengið mér hrökkbrauð með osti og linsoðið egg en þess á milli gert amerískar pönnukökur, beikon og eggjahræru. Stundum setjum við bara morgunkorn, múslí, ab-mjólk, heimabakað brauð (þetta hefur lengi verið í uppáhaldi) og álegg á borðið. Síðan hef ég alltaf góðan djús með klökum í (Heilsusafi og rauður Brazzi verða oftast fyrir valinu).

Um síðustu helgi prófaði ég í fyrsta sinn að gera kotasælupönnukökur og bar þær fram með jarðaberjum og hlynsírópi. Aldrei hefði mig grunað að þær ættu eftir að vekja jafn mikla lukku og þær gerðu. Pönnukökurnar voru léttar í sér og fóru stórkostlega vel með fersku jarðaberjunum og hlynsírópinu. Ljúffengari morgunmat hef ég sjaldan fengið. Í fyrramálið ætla ég að endurtaka leikinn og ég hef hlakkað til þess alla vikuna. Dagurinn getur varla byrjað mikið betur en svona.

Kotasælupönnukökur (uppskrift úr The Weelicious Cookbok) – uppskriftin gefur um 18 litlar pönnukökur

3 egg
1 bolli kotasæla
1 tsk vanilludropar
2 msk hunang eða agave síróp
½ bolli hveiti
1 tsk lyftiduft
¼ tsk salt
smjör, olía eða olíusprey

Setjið fyrstu 4 hráefnin í skál og hrærið þeim saman. Bætið þurrefnunum saman við og hrærið saman.

Hitið pönnu við miðlungsháan hita og setjið smá af olíu eða smjöri á pönnuna. Setjið um 1 msk af deiginu á pönnuna fyrir hverja pönnuköku. Steikið í 2 mínútur á hvorri hlið, eða þar til pönnukakan er gyllt á lit og steikt í gegn.

Kjúklingur með sætum kartöflum, spínati og fetaosti

ágúst 7, 2013ágúst 7, 2013 ~ Svava ~ 49 athugasemd

Það hefur verið mikið um sætindi hér upp á síðkastið og ástæðan fyrir því er einfaldlega sú að ég missti mig í sætindunum í sumar. Ég fékk ekki einu sinni móral, ja nema kannski út af öllu Lindubuffinu. Allt hefur þó sinn tíma og til að bæta upp fyrir allt þá eldaði ég ljúffengan og bráðhollan kjúklingarétt þegar við vorum í sveitinni. Ætli ég hafi ekki eldað hann kvöldið sem ég áttaði mig á því að ég hafði borðað 5 kassa af Lindubuffi á þremur dögum og fannst ég skulda mér góðan kvöldverð.

Það hafa eflaust margir eldað sína útgáfu af þessum kjúklingarétti og það væri gaman að heyra hvernig þið gerið hann. Okkur þykir rétturinn mjög góður og ekki skemmir fyrir hvað hann er hollur. Fyrir utan að kjúklingurinn er steiktur á pönnu þá fer allt hráefnið í eitt eldfast mót og inn í ofn. Einfaldara getur það varla verið.

Það gæti þótt tómlegt að bera kjúklingarétt fram án meðlætis en mér þykir það sem leynist í eldfasta mótinu standa fyrir sínu eitt og sér, enda er allt þar. Spínat, sætar kartöflur, kjúklingur, tómatar, fetaostur, furuhnetur…. þetta getur ekki klikkað! Það má þó auðvitað vel bera brauð eða salat fram með réttinum og það myndi ég eflaust gera ef ég væri með matarboð en fyrir okkur fjölskylduna dugar þetta vel svona.

Ég verð að viðurkenna að ég er sérlega skúffuð með myndatökuna hér hjá mér og íhugaði að gefa ekki uppskriftina út af því hversu lélegar myndirnar eru. Ég kenni sumarbústaðarbirtunni um, viðarveggjum og lofti sem gáfu myndunum gulan blæ. Eða að Lindubuffið hafi gert mig hálf sloj. Jú, það hlýtur að vera ástæðan. Ég kenni Lindubuffinu um og treysti því að þið dæmið ekki réttinn af myndunum.

Kjúklingur með sætum kartöflum, spínati og fetaosti

1 stór sæt kartafla
1 poki spínat
4-5 kjúklingabringur
1 krukka fetaostur
1 lítill rauðlaukur, skorinn fínt
heilsutómatar eða konfekttómatar, skornir í bita
furuhnetur
balsamik gljái

Hitið ofninn í 180°. Skrælið sæta kartöflu og skerið í sneiðar eða sneiðið með ostaskera. Látið kartöflusneiðarnar í eldfast mót, setjið smá ólífuolíu yfir, saltið og piprið og setjið inn í ofn í 15 mínútur eða á meðan kjúklingurinn er undirbúinn.

Skerið kjúklingabringurnar í bita og steikið stutt (lokið þeim) á heitri pönnu. Kryddið eftir smekk (mér þykir t.d. gott að nota fajita krydd).

Þegar kartöflurnar hafa verið í ofninum í 15 mínútur eru þær teknar út. Setjð spínat yfir sætu kartöflurnar og kjúklinginn yfir spínatið. Stráið tómötum og rauðlauk yfir og hellið að lokum fetaostinum ásamt olíunni yfir allt. Setjið í ofn og bakið í 30 mínútur.

Á meðan rétturinn er í ofninum eru furuhnetur ristaðar. Þegar rétturinn kemur úr ofninum er furuhnetunum stráð yfir og balsamik gljáa dreypt yfir.

Kaffi- og valhnetukaka

ágúst 5, 2013ágúst 5, 2013 ~ Svava ~ 4 athugasemd

Sumarfríið mitt er á enda og það vekur blendnar tilfinningar. Kvíði fyrir að þurfa að vakna aftur á morgnanna en tilhlökkun að hitta vinnufélagana á ný. Mest hlakka ég þó til að lífið falli í rútínu aftur. Ég virka best í rútínu, þegar ég hef verkefni til að takast á við og þarf að skipuleggja mig. Ég geri alltaf vikumatseðil og versla inn fyrir vikuna á laugardögum en um leið og ég fer í sumarfrí hætti ég því. Ég veit ekki af hverju, þetta bara gerist ósjálfrátt og veldur því að við eyðum meiri pening í mat og borðum oftar en ekki síðri mat en við erum vön að gera. Hlaupum í búðina rétt fyrir lokun og kaupum það sem bregður fyrst fyrir augum. Núna hlakka ég til að koma þessu í réttan farveg aftur.

Við erum búin að eiga gott sumarfrí og gerðum margt af því sem ég ætlaði mér að gera í fríinu. Þó ekki allt. Ég var til dæmis staðráðin í að hreyfa mig á hverjum degi. Ég gerði það ekki en borðaði hins vegar Lindubuff á hverjum degi. Það var ekki fyrr en um daginn þegar ég fékk Ögga með mér í bíltúr rétt fyrir miðnætti til þess eins að kaupa mér kassa af Lindubuffi að ég áttaði mig á því að þetta væri komið út í vitleysu. Ég hef ákveðið að kveðja Lindubuffið eftir helgina. Þegar lífið fer í rútínu aftur.

Við gengum á Glym, rétt eins og undanfarin sumur. Malín fór ekki með okkur enda upptekinn unglingur í unglingavinnu. Strákunum þótti þetta einn af hápunktum sumarsins og vilja ólmir fara aðra ferð sem fyrst.

Við áttum ljúfa daga í sumarbústað og vorum heppnari með veðrið en við höfðum þorað að vona. Eins og lög gera ráð fyrir þá borðuðum við hverja dásemdina á fætur annari á milli þess sem við þvældumst um sveitirnar. Við skemmtum okkur konunglega.

Við fórum á Geysi og náðum næstum því að eyðaleggja myndavélina okkar þegar þessi mynd var tekin. Þegar Strokkur gaus var ekki annað hægt en að smella myndum af strákunum flýja vatnsgusuna úr honum. Það kostaði þó vatnsgusu yfir myndavélina sem þurfti að fara í viðgerð í kjölfarið.

Strákarnir urðu rennblautir. Öggi smellti af þessari skemmtilegu mynd og það var ekki fyrr en við komum heim sem við tókum eftir henni. Strákarnir eru að dansa bræðradans sem að þeir sömdu og það er hrein tilviljun að maðurinn í græna bolnum stendur í sömu stellingu og þeir. Okkur þótti það bráðfyndið.

Við Öggi fórum í brúðkaup og höfum sjaldan skemmt okkur jafn vel. Eyþór og Soffía voru svo fallegt brúðpar að það var ekki hægt að hætta að horfa á þau.

Við fórum út í Viðey. Ég skammast mín að segja frá því að þetta var í fyrsta sinn sem ég fer þangað. Það var svo fallegt að rölta þar um. Ævintýri líkast.

Við spiluðum kubb.

Og körfubolta í náttbuxum.

Við Öggi fórum með kærum vinum út að borða á Kopar. Við pöntuðum okkur ævintýraferð af matseðlinum og vorum hvergi svikin. Hver rétturinn var öðrum betri. Frábært kvöld í frábærum félagsskap. Við sátum á efri hæðinni og útsýnið frá borðinu okkar var engu líkt.

Ég bakaði köku sem við fórum með í nestisferð í Guðmundarlund. Við áttum æðislegan dag þar með krökkunum, spiluðum kubb og gæddum okkur á nýbakaðri kaffiköku. Ó, hvað ég elska kaffikökur. Þessi var sérlega ljúffeng. Ég læt að lokum uppskriftina fylgja ef þig langar að prófa.

Kaffi- og valhnetukaka (uppskrift úr matreiðslubók Nigellu Lawson, Kitchen)

50 g valhnetur
225 g sykur
225 g mjúkt smjör
200 g hveiti
4 tsk instant espresso duft (eða 2 tsk Nescafé leyst upp í 1 msk af sjóðandi vatni)
2 ½ tsk lyftiduft
½ tsk matarsódi
4 stór egg
1 – 2 msk mjólk

Glassúr

350 g flórsykur
175 g mjúkt smjör
2 ½ tsk instant espresso duft (leyst upp í 1 msk af sjóðandi vatni)
um 10 valhnetur til skrauts

Hitið ofninn í 180°. Klæðið botninn á tveimur 20 cm kökuformum með smjörpappír og smyrjið hliðarnar. Setjið valhnetur og sykur í matvinnsluvél og látið vélina ganga þar til hneturnar og sykurinn eru orðin að fíngerðum hnetusykri. Bætið smjöri, hveiti, espresso dufti, lyftidufti, matarsóda og eggjum í matvinnsluvélina og vinnið saman í slétt deig. Látið að lokum mjólk renna niður troðarann á meðan matvinnsluvélin gengur. Skiptið deiginu í formin og bakið í 25 mínútur. Látið kökubotnana kólna alveg áður en glassúrinn er settur á.

Glassúr: Setjið flórsykur í matvinnsluvél og látið vélina ganga þar til flórsykurinn er kekkjalaus. Bætið smjöri saman við og látið vélina ganga þar til flórsykurinn og smjörið er orðið að mjúku kremi. Leysið kaffiduftið upp í sjóðandi vatni og bætið því í matvinnsluvélina. Látið vélina vinna kaffið snöggt saman við kremið.

Setjið annann kökubotninn á hvolf á kökudisk (þannig að sú hlið sem snéri niður í kökuforminu snúi upp). Breiðið helmingnum af glassúrnum yfir og leggið síðan seinni botninn ofan á þannig að slétta hliðin á honum (sú sem séri niður í kökuforminu) leggist yfir kremið (s.s. sléttu hliðarnar mætast í miðjunni). Breiðið restina af kreminu yfir. Skreytið kökuna með valhnetum.

Torta di Pernilla

júlí 31, 2013júlí 31, 2013 ~ Svava ~ 5 athugasemd

Við Öggi áttum 11 ára brúðkaupsafmæli 20. júlí sl. Þá vorum við stödd í sveitinni og héldum upp á daginn með því að grilla ljúffengt lamba prime og í eftirrétt bakaði ég súkkulaðiköku. Ég birti mynd af kökunni á Facebook og núna eru sumir súkkulaðielskendur orðnir langeygir eftir uppskriftinni. Ó, hvað ég skil það vel.

Kakan er algjör draumur og það er nánast skylda að bera hana fram með rjóma og berjum. Hún er blaut í sér og mér þykir hún best eftir að hafa fengið að standa í ískáp. Það má segja að kakan sé eins og konfektmoli, dásamlega góð og lítil sneið dugar.

Torta di Pernilla (uppskrift úr bókinni Pernillas Praliner)

250 g dökkt súkkulaði
5 egg
1 msk hveiti
200 g brætt smjör
3 dl sykur

Glassúr

1 dl rjómi
150 g dökkt súkkulaði
25 g smjör
1 dl flórsykur

Hitið ofninn i 175°. Bræðið súkkulaðið yfir vatnsbaði. Takið bráðið súkkulaðið af hitanum og hrærið eggjum, einu í einu, saman við með skeið. Bætið hveiti, smjöri og sykur varlega saman við og hrærið saman í slétt krem. Smyrjið 24 cm kökuform með lausum botni. Hellið deiginu í formið og bakið í miðjum ofni í 25 mínútur. Kakan á að vera blaut í miðjunni en tekur sig þegar hún kólnar.

Glassúr: Setjið rjómann í pott og hitið að suðu. Takið pottinn af hitanum. Brjótið súkkulaðið og setjið ásamt smjörinu í rjómann. Hrærið þar til allt hefur bráðnað saman (það gæti þurft að hita aðeins undir pottinum). Hrærið flórsykri saman við. Setjið glassúrinn aðeins í ískáp til að hann þykkni og verði kremkenndari. Breiðið glassúrinn yfir kökuna þegar hún hefur kólnað að fullu.

Drømmekage frá danska bakaríinu Lagkagehuset

júlí 28, 2013ágúst 6, 2013 ~ Svava ~ 9 athugasemd

Mér áskotnaðist dásamlegt danskt kökublað frá vinkonu minni um daginn. Blaðið er æðislegt og ég á örugglega eftir að baka flest allt í því en það sem vakti fyrst áhuga minn voru uppskriftir sem danska bakaríið Lagkagehuset gaf. Ég hef aldrei farið í Lagkagehuset en systir mín sem býr í Kaupmannahöfn er tíður gestur þar og ég varð spennt að prófa uppskriftirnar.

Á föstudaginn bakaði ég fyrstu uppskriftina sem að bakaríið gaf, Drømkage. Í kökunni eru meðal annars 8 egg og fræ úr tveimur vanillustöngum og því kannski engin furða að hún hafi vakið lukku hjá bakariinu. Þrátt fyrir kókosmjöl í deiginu og kaffi í ofanbráðinni þá minnir kakan óneitanlega á gömlu góðu sjónvarpsköku okkar íslendinga. Þessi er bara aðeins þéttari í sér.

Öggi vill meina að þessi danska útgáfa sé með betri kökum sem hann hafi smakkað og dásamar hana við hvern bita. Ég tek ekki svo djúpt í árina en á þó líkt og hann erfitt með að standast kökuna því hún er stórgóð. Hér kemur uppskriftin ef ykkur langar að prófa.

Drømmekage

375 g mjúkt smjör
375 g sykur
8 egg
475 g hveiti
2 tsk lyftiduft
fræ úr tveimur vanillustöngum
1,5 dl mjólk
100 g kókosmjöl

Ofanbráð

3/4 dl vatn
1 ½ tsk Nescafé
150 g smjör
150 g kókosmjöl
300 g púðursykur
75 g sýróp

Hitið ofninn í 180°. Hrærið smjör og sykur vel saman. Bætið eggjunum, einu í einu, saman við og hrærið í deiginu á meðan. Blandið hveiti, lyftidufti og fræjum úr vanillustöngum saman og hrærið í deigið. Hrærið að lokum mjólk og kókosmjöli í deigið.

Setjið deigið í bökunarpappírsklætt bökunarform sem er um 25 x 35 cm að stærð. Bakið kökuna í 35-40 mínútur.

Ofanbráð: Hitið vatnið í potti og leysið neskaffið upp í því. Bætið smjörinu saman við og látið það bráðna í blöndunni. Setjið restina af hráefnunum saman við og hrærið vel saman yfir lágum hita. Breiðið blöndunni yfir kökuna og bakið hana í 8 mínútur til viðbótar.

Tortillavefjur

júlí 24, 2013júlí 24, 2013 ~ Svava ~ 13 athugasemd

Eins og þeir sem fylgja mér á Instagram hafa eflaust áttað sig á þá hef eytt undanförnum dögum í sveitinni. Mér þótti það æðislegt fyrir utan að vera ekki nettengd og geta því ekki uppfært bloggið. Verst þótti mér að hafa ekki haft vit á að láta ykkur vita af því áður en ég fór en satt að segja áttaði ég mig ekki á því fyrr en á hólminn var komið að það var vonlaust að blogga í stöpulu 3G sambandi. Því fór sem fór en nú er ég mætt aftur, vonandi tvíelfd til leiks.

Mér hlotnaðist sá heiður að vera matgæðingur vikunnar í nýjasta tölublaði Vikunnar (held reyndar að það fari úr búðum á morgun). Í blaðinu má finna stutt viðtal við mig ásamt því að ég gef ég fjórar uppskriftir sem að mér þykja hver annarri betri. Tvær þeirra hafa þegar verið birtar hér á blogginu fyrir all nokkru og þola vel að vera rifjaðar upp.

Annars vegar eru það þessir hamborgarar. Það væri synd að láta grillsumarið líða án þess að prófa þá. Það er svo einfalt að útbúa hamborgara og þeir verða svo mikið betri þegar þeir eru heimagerðir. Þessi uppskrift er einföld en stórgóð.

Hins vegar eru það kartöflur sem við fáum ekki nóg af og eru með bestu kartöflum sem ég hef smakkað. Það er ótrúlega einfalt að útbúa þær og ég hef borið þær oftar á borð en ég vil viðurkenna. Það er svo þægilegt að henda þeim í ofninn á meðan kjötið eða hamborgararnir eru grillaðir og satt að segja get ég borðað þær einar og sér. Algjörlega ómótstæðilegar!

Í blaðinu gef ég einnig uppskriftir af tortillavefjum og súkkulaðipavlovu en þær hafa hvorugar verið birtar hér á blogginu áður. Tortillavefjurnar eru frábærar á veisluborðið en ég hef líka boðið upp á þær sem snarl með fordrykk. Það má útbúa fyllinguna deginum áður og þá tekur enga stund að smyrja henni á tortilluvefjurnar og rúlla þeim síðan upp daginn sem á að bera þær fram. Uppskriftina fékk ég hjá kærri vinkonu, Ernu, fyrir mörgum árum og hef notað hana óspart síðan.

Tortillavefjur

400 g rjómaostur
1 lítill púrrulaukur
1 lítil rauð paprika
1 lítið rautt chili (ferskt)
150 g góð skinka
8 tortillakökur

Sneiðið púrrulauk fínt, saxið papriku, kjarnhreinsið og fínhakkið chili og skerið skinku smátt. Hrærið öllu saman við rjómaostinn.

Smyrjið hrærunni á tortillakökur, rúllið þeim upp og skerið í bita.

Tacolasagna

júlí 18, 2013júlí 18, 2013 ~ Svava ~ 6 athugasemd

Við erum loksins komin í langþráð sumarfrí. Á þriðjudaginn unnum við Öggi okkar síðasta vinnudag fyrir frí og í gær vann Malín sinn síðasta dag í unglingavinnunni og kláraði jafnframt hraðlestrarskólann sem hún ákvað af eigin frumkvæði að fórna sumrinu í. Við erum því öll komin í sumarfrí núna og ráðum okkur varla fyrir gleði.

Heppnin var með okkur í gær, á okkar fyrsta sumarfrísdegi, þegar sólin ákvað að glenna sig og við tókum snögga ákvörðun um að drífa okkur með strákana á Glym. Við höfum gengið á Glym síðustu sumur og krökkunum þykir það æðisleg ævintýraför.

Náttúrufegurðin þar er ólýsanleg og gönguleiðin skemmtileg. Þessar ferðir okkar hafa staðið svolítið upp úr eftir sumarið og strákarnir hafa beðið spenntir í sumar eftir að fara. Í gær var allt eins og það átti að vera, veðrið var fallegt, útsýnið stórbrotið og við snérum endurnærð heim.

Það var þéttsetið við eldhúsborðið um helgina þegar við vorum með matarboð tvö kvöld í röð. Við buðum mömmu til okkar annað kvöldið og ég prófaði nýja uppskrift af tacolasagna sem vakti mikla lukku og verður klárlega oftar á borðum hjá okkur í framtíðinni. Mér þykir svo mikill fjársjóður í svona uppskriftum, sem eru góðar en einfaldar, og því ekkert mál að blása til veislu með lítilli fyrirhöfn. Frábær föstudagsmatur sem ætti að falla vel í kramið hjá matargestum. Prófið!

Tacolasagna

1 poki nachos flögur (ég notaði ostanachos frá Santa María)
300 g nautahakk
1 hvítlauksrif
1 bréf tacokrydd
1 púrrulaukur
1 dl ólívur
225 g tacosósa
400 g niðursoðnir hakkaðir tómatar
2 dl sýrður rjómi
2 dl rifinn ostur

Hitið ofninn í 225°.

Setjið nachos í botn á eldföstu móti.

Brúnið nautahakk á pönnu og blandið pressuðu hvítlauksrifi og tacokryddi saman við.

Setjið nautahakkið yfir nachosið.

Skerið púrrulaukinn í sneiðar og ólívurnar í tvennt og stráið yfir nautahakkið.

Blandið tacosósu og niðursoðnum tómötum saman og setjið yfir púrrulaukinn og ólívurnar.

Hrærið sýrða rjómann svo hann þynnist aðeins (setjið jafnvel 1 msk af vatni saman við hann) og breiðið hann yfir tómatsósuna.

Endið á að strá rifnum osti yfir.

Bakið í miðjum ofni í 25-30 mínútur.

Berið fram með góðu salati og jafvel guacamole, sýrðum rjóma eða salsa.

Syndsamlega góðar vöfflur

júlí 14, 2013júlí 14, 2013 ~ Svava ~ 6 athugasemd

Ég hef áður sagt frá vöffluæðinu sem virðist ganga árstíðarbundið yfir heimilið og enn og aftur ætla ég að bjóða upp á nýja vöffluuppskrift. Ég held í alvöru að þessi sé best, eða í það minnsta deili toppsætinu með hnetusmjörs- og súkkulaðivöfflunum, þó að hráefnalistinn sé ekki með hefðbundnu móti. Mig rekur ekki minni til að hafa séð kornsterkju og grænmetisolíu í íslenskum vöffluuppskriftum en hér bregður báðum þessum hráefnum fyrir og gera vöfflunni góð skil. Stökk að utan, mjúk að innan. Þannig vil ég hafa vöfflurnar og þannig eru þessar. Dásamlegar með sultu og rjóma og fara stórvel með sunnudagskaffinu.

Syndsamlega góðar vöfflur (uppskrift frá Food 52)

1½ bolli hveiti
½ bolli kornsterkja (maizenamjöl)
1 tsk lyftiduft
½ tsk matarsódi
1 tsk salt
2 bollar nýmjólk eða súrmjólk
2/3 bolli grænmetisolía (vegetable oil) eða brætt smjör
2 egg
3 tsk sykur
1 ½ tsk vanilludropar

Setjið hveiti, kornsterkju, lyftiduft, matarsóda og salt í skál og blandið vel saman. Bætið mjólk, grænmetisolíu, eggjum, sykur og vanillu saman við og blandið vel. Látið deigið standa í 30 mínútur.

Bakið vöfflurnar á smurðu vöfflujárni. Berið fram með sultu og rjóma, smjöri og hlynsýrópi eða hverju því sem hugurinn girnist.

Pestó- og ostafylltar kjúklingabringur

júlí 13, 2013júlí 13, 2013 ~ Svava ~ 9 athugasemd

Vikan hefur verið annasöm og lítill tími gefist til að blogga. Mér þykir það svolítið leiðinlegt því ég hef verið verið svo spennt fyrir að gefa uppskrift af þessum fylltu kjúklingabringum sem slógu í gegn hér um síðustu helgi.

Ég hef aldrei kynnst neinum sem eru jafn hrifnir af pestói og Öggi og Jakob eru. Þeim þykir allt með pestói gott og þegar ég bauð upp á þessar pestófylltu kjúklingabringur um síðustu helgi hrósuðu þeir matseldinni við hvern bita. Þetta sló einfaldlega í gegn. Ég mæli með að þið prófið. Uppskriftin miðast við eina kjúklingabringu og ber að stækka eftir fjölda matargesta.

Þetta er ekki flókið. Byrjið á að setja kjúklingabringuna í plastpoka og berjið hana út, eins þunna og þið getið. Ekki hafa áhyggjur af útlitinu, það fer í felur undir lokin.

Smyrjið pestóhrærunni yfir bringuna, en skiljið um sentimeter eftir meðfram könntunum. Rúllið bringunni upp og festið hana saman með tannstönglum. Aftur, ekki hafa áhyggjur af útlitinu. Hún verður fallegri.

Dýfið kjúklingabringunni í hrært egg og veltið henni síðan upp úr parmesanhveitiblöndu. Setjið í eldfast mót eða ofnskúffu.

Bakið í ofni og þessi dásemd mun taka á móti ykkur.

Pestó- og ostafylltar kjúklingabringur – uppskriftin miðast við 1 kjúklingabringu

1 stór kjúklingabringa
1 msk grænt pestó
1 msk sýrður rjómi
1 msk rifinn mozzarella ostur

Hrærið saman pestó, sýrðum rjóma og mozzarella osti. Setjið kjúklingabringuna í plastpoka og berjið hana út, eins þunna og þú nærð henni. Takið kjúklingabringuna úr plastpokanum og smyrjið pestóhrærunni yfir hana en látið hana þó ekki fara alveg að köntunum. Rúllið kjúklingabringunni upp og festið hana saman með tannstönglum.

1 egg
1½ msk fínrifinn parmesan
1½ msk hveiti (eða möndlumjöl ef þið eigið það)
svartur pipar

Hrærið eggið og setjið í grunna skál. Blandið saman parmesan og hveiti í annari skál og kryddið til með svörtum pipar. Dýfið kjúklingabringunni í eggjahræruna og síðan í parmesanhveitiblönduna. Passið að kjúklingurinn sé vel hjúpaður. Setjið kjúklinginn í smurt eldfast mót og bakið við 190° í 30-35 mínútur.

Steiktur fiskur í kókoskarrý

júlí 9, 2013júlí 9, 2013 ~ Svava ~ 12 athugasemd

Mamma hefur alltaf verið mikill eldhúsdundari og hefur safnað uppskriftum svo lengi sem ég man eftir mér. Uppskriftabækurnar hennar eru æðislegar, með handskrifuðum uppskriftum í bland við blaðaúrklippur sem hafa verið límdar inn. Persónulegar og fallegar, alveg eins og mamma er.

Um daginn þegar ég var hjá henni lá ein af uppskriftarbókunum á eldhúsborðinu. Þegar ég fór að blaða í hana sá ég að bókin var stútfull af skemmtilegum uppskriftum. Ég nældi mér í nokkrar hversdagsuppskriftir úr henni og við höfum notið góðs af þeim upp á síðkastið. Ég var búin að gefa eina fiskuppskrift úr bókinni (þú finnur hana hér) og hér kemur önnur sem er skemmtileg útfærsla á steiktum fiski. Einfaldari gerist hann varla og allir voru á einu máli um að maturinn væri stórgóður.

Steiktur fiskur í kókoskarrý

ýsu- eða þorskflök (ca 600-800 g)
2 dl hveiti
1 dl mjólk
1 tsk karrý
½ tsk timjan
1 egg
2 msk kókosmjöl
salt
pipar

Öllum hráefnum, fyrir utan fiskinn, er hrært saman í skál. Fiskurinn er skorinn í bita og látinn liggja í blöndunni í 1-1½ klst. Steikið fiskinn á pönnu og berið hann fram með hrísgrjónum og karrýsósu.