Month: október 2012

Sírópsbrauð með rúsínum og fræjum

~ Svava ~ 1 athugasemd

 

Ég bakaði þetta brauð á laugardagsmorgninum og var ánægð með árangurinn. Það tók enga stund að hræra í brauðið og ilmurinn úr eldhúsinu var dásamlegur á meðan það bakaðist.  Deigið er heldur blautt í sér en brauðið þeim mun mýkra fyrir vikið.

Sírópsbrauð með rúsínum og fræjum

  • 5 dl hveiti
  • 1 dl heilhveiti
  • 1,5 tsk matarsódi
  • 0,5 tsk salt
  • 1/2 dl sólkjarnafræ
  • 1/2 dl graskersfræ
  • 1/2 dl hörfræ
  • 1/2 dl rúsínur
  • 0,75 dl síróp
  • 1/2 l súrmjólk

Blandið þurrefnunum saman. Bætið sírópi og súrmjólk saman við og blandið öllu vel saman. Setjið deigið í smurt brauðform og bakið við 175° í ca 1 klst.

 

Marineraður kjúklingur í rjómasósu

~ Svava ~ 7 athugasemd

Ég hef náð að gera ýmislegt yfir helgina. Ég kláraði loksins húfu sem ég hef verið að prjóna á Gunnar og nú vill Jakob eins. Ég ætla því að skjótast á morgun eftir meira garni og hefjast handa á ný.

Ég keypti nóvemberkaktus og koralkaktus og setti í fallegu blómapottana frá Greengate. Ég krosslegg fingur og vona að þeir lifi.

Ég keypti erikur og setti fyrir framan hús. Ég vildi hvítar eins og venjulega en Malín náði að tala mig inn á bleikar. Henni þóttu þær haustlegri.

Ég bakaði brauð í morgun á meðan fjölskyldan svaf. Það var dásamlegt að setjast niður saman og borða nýbakað brauð í morgunmat. Uppskriftin var ný og ég lofa að setja hana inn á morgun.

Ég bakaði stóra uppskrift af Silvíuköku. Þessi kaka hverfur alltaf um leið og hún kemur úr ofninum svo það hentar vel að stækka uppskriftina og baka hana í ofnskúffunni.

Að lokum eldaði ég frábæran kjúklingarétt sem ég ætla að enda færsluna á. Krakkarnir elskuðu hann og gáfu honum 9,9 í einkunn. Við Öggi tókum undir með þeim og borðuðum þar til ekkert var eftir.

Marineraður kjúklingur í rjómasósu

Marinering:

  • 6 kjúklingabringur
  • 0,5 dl sojasósa
  • 2 msk hvítvínsedik
  • fullt af klipptri steinselju
  • 1 hakkað hvítlauksrif

Blandið saman öllum hráefnunum í marineringuna og leggið kjúklingabringurnar í (ég skar bringurnar gróflega niður). Látið liggja í marineringunni yfir nóttu eða amk 6 klst. Látið allt í eldfast mót og bakið við 175°í 30-50 mínútur (eftir stærð á kjúklingabringunum).

Hellið vökvanum/marineringunni frá í skál í gegnum sigti.

Sósa:

  • 2 dl sýrður rjómi
  • 3 dl rjómi
  • 0,5 dl marinering eða meira (smakkið til, mér þykir best að nota alla marineringuna)
  • pipar og salt
  • maizena

Sjóðið saman öll hráefnin í sósunni. Smakkið til með marineringu, salti og pipar. Þykkið sósuna með maizena. Setjið annað hvort kjúklinginn í pottinn og látið sjóða saman um stund eða látið kjúklinginn ásamt sósunni í eldfast mót og hitið í ofni.

Berið fram með hrísgrjónum og góðu salati.

Amerísk eplabaka

~ Svava ~ 7 athugasemd

Ég bauð upp á þessa amerísku eplaböku með vanilluís yfir x-factor í gærkvöldi. Strákarnir voru yfir sig spenntir og töldu niður mínúturnar þar til hún kom úr ofninum. Við vorum öll stórhrifin og mælum með að þið prófið. Öggi skilar því að þetta sé, að öðrum eplakökum ólöstuðum, besta eplabaka sem hann hafi smakkað.

Uppskriftina fann ég á sænskri matarsíðu, Allt om mat.

Amerísk eplabaka

  • 4 epli
  • 1 tsk kanil
  • 100 gr smjör
  • 2,5 dl sykur
  • 150 gr hveiti
  • 1 tsk lyftiduft
  • 2 tsk vanillusykur
  • 1,5 tsk salt
  • 1 egg, upphrært

Hitið ofninn í 200° og smyrjið bökuform með smjöri. Afhýðið eplin og fjarlægið kjarnana. Skerið eplin í þunnar sneiðar og leggið í bökuformið. Stráið kanil yfir.

Bræðið smjörið og látið það kólna. Blandið þurrefnunum saman í skál. Hrærið eggið upp með gaffli eða vispi. Blandið smjöri og eggi saman við þurrefnin. Breiðið deigin yfir eplin og stráið smá kanil yfir. Bakið í neðri hlutanum á ofninum í 40 mínútur. Berið fram með ís eða rjóma.

Stórgóð kjúklingabaka.

~ Svava ~ 1 athugasemd

Við erum búin að bíða eftir þessu kvöldi alla vikuna. Það er eplakaka í ofninum og við ætlum að eyða kvöldinu í sjónvarpsófanum. Á meðan við bíðum eftir að X-factor byrji ætla ég að gefa uppskriftina af kvöldmatnum.

Í kvöld dró ég fram gamlan uppáhaldsrétt sem mér þykir vera frábær föstudagsmatur. Þessi baka kemur verulega á óvart og ekki láta hvítkálið fæla ykkur frá henni. Bakan er æðislega góð og krakkarnir eru ekki síður hrifin af henni en við Öggi.

Stórgóð kjúklingabaka

Bökudeig

  • 3 dl hveiti
  • 125 gr smjör
  • 2-3 msk kallt vatn

Fylling

  • 1 grillaður kjúklingur
  • 1 laukur
  • 3 dl niðurskorið hvítkál
  • 1 tsk salt
  • 1 poki taco-kryddblanda
  • 1 dós sýrður rjómi
  • 1 dl rjómi
  • smjör eða olía til að steikja lauk og hvítkál í
  • 150 gr rifinn ostur

Vinnið saman hráefnin í bökubotninn og látið standa í kæli um stund. Skerið lauk og hvítkál í sentimetersstóra bita og steikið þar til það verður mjúkt. Skerið kjúklinginn niður og bætið á pönnuna ásamt kryddum, sýrðum rjóma og rjóma. Hrærið í og látið sjóða við vægan hita um stund.

Þrýstið bökudeiginu í formið og forbakið í ca 10 mínútur við 200°. Hellið kjúklingahrærunni í og stráið ostinum yfir. Bakið við 225° í ca 25 mínútur. Berið fram með góðu salati. Í kvöld var ég með iceberg (skerið kálið niður og látið það liggja í ísköldu vatni, kálið verður brakandi stökkt og gott), rauða papriku, mangó, avókadó, gúrku, rauðlauk, fetaost og mulið nachos. Sjúklega gott.

Hindberjabaka með hvítu súkkulaði og möndluflögum

~ Svava ~ 4 athugasemd

Í tilefni þess að þessi færsla er sú hundraðasta hér á blogginu ákvað ég að líta yfir farinn veg og benda á þrjár uppskriftir sem eru í uppáhaldi hjá mér.

Súkkulaði- og bananabakan kemur fyrst upp í hugann enda er það baka sem mig langar stöðugt í. Hún er með vanillukremi, bönunum, súkkulaðikremi og rjóma og það hljóta allir að átta sig á hversu dásamleg hún er.

Sá réttur sem ég tilnefni næst er kjúklingasúpan með ferskjunum. Ég hreinlega elska þessa súpu og gæti borðað hana í öll mál.

Ég er að átta mig á hversu erfitt mér þykir að velja þrjár uppskriftir. Ég á enn eftir að minnast á mexíkósku kjúklingabökuna, bananabrauðið og Silviukökuna. Ég get þó ekki sleppt því að telja upp brauðið sem ég hef bakað svo oft að það er ótrúlegt að við skulum ekki vera komin með leið á því. Þó að múslíið sem ég gaf uppskrift af í Fréttablaðinu sé komið í harða samkeppni við brauðið á morgnanna þá ætla ég að gefa brauðinu vinninginn, þar sem það hefur fylgt okkur svo lengi.

Ögga fannst við hæfi að fagna hundruðustu bloggfærslunni og mér leist stórvel á hugmyndina. Það fór svo að ég bauð fjölskyldunni upp á heita hindberjaböku með hvítu súkkulaði og möndluflögum og vanilluís með kvöldkaffinu við mikinn fögnuð viðstaddra. Við gætum vel vanist þessu á hverju kvöldi og ég deili uppskriftinni með ykkur af mikilli gleði.

Það vildi svo heppilega til að mamma leit við í miðjum fagnaðarlátum og ég náði að bjóða henni upp á nýbakaða hindberjabökuna og ís. Hún kom færandi hendi sem okkur þótti sérlega skemmtilegt á þessu bloggfærslu-afmæli. Í pakkanum leyndist æðislega fallegur glaðingur frá Le Creuset.

Hindberjabaka með hvítu súkkulaði og möndluflögum

  • 1 dl sykur
  • 3 dl hveiti
  • 125 gr smjör
  • 4-5 dl frosin hindber (eða önnur ber)
  • 1 msk kartöflumjör
  • 3 msk sykur
  • 100 gr hvítt súkkulaði
  • 50 gr möndluflögur

Hitið ofninn í 200°. Blandið sykri og hveiti í skál og bætið smjörinu í teningum saman við. Klípið saman í grófan mulning og þrýstið í botninn á bökuformi. Blandið hindberjunum saman við kartöflumjölið og sykurinn og setjið blönduna yfir bökubotninn. Rífið hvítt súkkulaði og stráið yfir berin. Dreifið möndluflögum yfir og bakið í miðjum ofni í 20-25 mínútur, eða þar til bakan hefur fengið fallegan lit.

Berið fram með ís eða rjóma.

 

Ragù með pasta

~ Svava ~ 1 athugasemd

Eftir góðan endasprett í Berlín komum við heim klukkan þrjú í nótt. Við ætluðum ekki að trúa því þegar vekjaraklukkan hringdi í morgun og það var mikið þrekvirki að komast á fætur eftir allt of lítinn svefn. Dagurinn leið þó hratt og áður en ég vissi af var vinnudeginum lokið og ég farin að huga að kvöldmat.

Við Öggi vorum farin að þrá heimaeldaðan mat og ég ákvað að hafa hann einfaldan í kvöld. Það voru skiptar skoðanir um ágæti þessa rétts, við Malín voru ekkert yfir okkur hrifnar á meðan Ögga og strákunum þótti maturinn stórgóður og borðuðu á sig gat.

Kvöldinu ætlum við að eyða fyrir framan sjónvarpið í langþráðri afslöppun. Við keyptum okkur uppáhalds súkkulaðið okkar í Berlín og ætlum að gæða okkur á því. Ég get ekki hugsað mér neitt betra þessa stundina en sjónvarpssófann og súkkulaðið.

Ragù með pasta

  • 500 gr pasta (ég var með lífrænt heilhveiti penne)
  • 400 gr nautahakk
  • 2 msk ólivuolía
  • 1 laukur
  • 4 dl grænmetiskraftur
  • 120 gr Philadelphia vitlök & örter
  • rifinn parmesan
  • salt og pipar

Sjóðið pastað eftir leiðbeiningum á pakkningu. Fínhakkið lauk og steikið í olíu þar til hann hefur fengið fallegan lit. Bætið nautahakkinu á pönnuna og steikið það vel. Hellið grænmetiskraftinum yfir og látið sjóða í 30 mínútur. Hrærið reglulega í pönnunni.

Blandið Philadelphia ostinum á pönnuna og smakkið til með pipar og salti.  Blandið saman við pastað og hrærið vel saman. Berið fram með ferskrifnum parmesan osti.

Ljúfmeti og lekkerheit í fjölmiðlum

~ Svava ~ 2 athugasemd

 

 

Bloggið hefur verið í fjölmiðlum þessa helgina og fékk hvorki meira né minna en heilsíður bæði í Fréttablaðinu og Morgunblaðinu. Ég þakka af öllum hug og hjarta þessar umfjallanir og allar heimsóknirnar sem bloggið hefur fengið í kjölfarið.

Nú vill svo til að við Öggi fórum til Berlínar yfir helgina og ég hef því enga uppskrift til að bjóða upp á. Við búum á 29. hæð á Park Inn hótelinu með þetta stórbrotna útsýni yfir austur-Berlín. Mér þykir myndin hér að ofan minna á póstkort en hún er tekin út um gluggann hjá okkur. Þetta hefur verið mikil menningar- og matarferð og erum við meðal annars búin að borða gæsalifur, humar, hjört, tælenskan og víetnamskan mat á milli þess sem við höfum raðað í okkur sætindum. Á morgun ætla ég að eyða deginum í búðunum og um kvöldið fljúgum við heim aftur. Okkur er farið að hlakka til að fara heim til krakkanna sem eru búin að vera í góðu yfirlæti með tengdó í fjarveru okkar.

Kúrbítsbrauð með valhnetum og súkkulaði

~ Svava ~ 5 athugasemd

Ég sá þessa uppskrift í morgunverðarblaðinu frá Fine Cooking um daginn og hugsaði með mér að hún væri kjörin til að vígja nýju matvinnsluvélina mína með. Hún hefur staðið glansandi ný og fín á eldhúsborðinu síðustu vikurnar og ég verð hamingjusöm við það eitt að hugsa til hennar en það var þó kominn tími til að byrja að nota vélina.

Ef ég á að vera hreinskilin þá var það þrennt sem heillaði mig við þessa uppskrift: súkkulaðið, hneturnar og tækifærið til að nota matvinnsluvélina. Það er þó í raun engin þörf á matvinnsluvél til að baka þetta brauð því það er vel hægt að nota bara venjulegt rifjárn. Kúrbíturinn heillaði mig ekkert og ef uppskriftin hefði ekki verið úr Fine Cooking blaði hefði ég eflaust látið hann fæla mig frá. Mikið var ég fegin að ég gerði það ekki því brauðið var algjört æði. Það hélst mjúkt lengi og ég held að það sé kúrbítnum að þakka.

Þetta brauð myndi slá í gegn á brönsborði og þá er tilvalið að baka það deginum áður.

Kúrbítsbrauð með valhnetum og súkkulaði

  • 110 gr smjör
  • 2 bollar og 2 msk hveiti
  • 1 stór kúrbítur (ca 330 gr)
  • 3/4 bolli + 2 msk sykur
  • 1/3 bolli sterkt uppáhelt kaffi, kalt eða við stofuhita
  • 1/3 bolli jógúrt
  • 2 stór egg
  • 1/3 bolli fínhakkað suðusúkkulaði
  • 1/2 bolli hakkaðar valhnétur
  • 1 tsk lyftiduft
  • 1/2 tsk matarsódi
  • 1/2 tsk salt
  • 1/2 tsk kanil

Hitið ofninn í 190°. Smyrjið brauðform og dustið með hveiti.

Skerið endana af kúrbítnum frá og rífið kúrbítinn með grófa rifjárninu á matvinnsluvél (eða venjulegu rifjárni). Hendið frá því sem verður eftir á rifjárninu. Setjið rifinn kúrbítinn í sigti og stráið 1 msk af sykri yfir og hristið vel. Stráið annari msk af sykri yfir og hristið aftur. Látið standa í sigtinu í 20 mínútur.

Bræðið smjörið í potti við miðlungs hita. Hellið smjörinu í skál og látið kólna aðeins. Hrærið 3/4 bolla af sykri, kaffi, jógúrt og eggjum saman við smjörið.

Setjið hveiti, súkkulaði, valhnetur, lyftiduft, matarsóda, salt og kanil í skál og blandið saman.

Kreistið safann úr kúrbítnum og blandið kúrbítnum saman við smjörblönduna. Hellið blöndunni yfir þurrefnin og hrærið öllu saman með trésleif. Setjið deigið í brauðform og bakið í ca klukkustund, eða þar til bökunarprjóni stungið í mitt brauðið kemur hreinn upp.

Hakkpanna með hvítkáli

~ Svava ~ 2 athugasemd

Ég kíki stutt inn í kvöld þar sem ég er með saumaklúbb og stelpurnar eru væntanlegar á hverri stundu. Ég ætla að bjóða upp á gríska ofnréttinn og hvítlauksbrauð. Ég er síðan búin að gera tvær kökur í eftirrétt.

Í gær var í mörgu að snúast hér á heimilinu og ég náði aldrei að setja inn færslu. Ég eldaði kvöldmat sem krökkunum þótti svo góður að ég má til með að setja hann inn. Ég átti hvítkál sem var fyrir mér í ískápnum og ég vildi fara að losna við. Ég átti líka tæplega hálfa krukku af tómatþykkni  og rúmlega botnfylli af rifsberjasultu. Allt fékk þetta að fara á pönnuna ásamt kjötkrafti, soyasósu, salti  og pipar og úr varð stórfínn réttur.

Hakkpanna með hvítkáli

  • 1 bakki nautahakk
  • 1 bakki svínahakk
  • 1-2 laukar, skorinn fínt
  • ½ hvítkálshaus, skorinn nokkuð smátt
  • 4-5 msk tómatpuré
  • 3-4 msk rifsberjahlaup
  • 2 teningar kjötkraftur
  • soyasósa
  • salt og pipar

Steikið hvítkál og lauk við miðlungsháan hita upp úr vænni klípu af smjöri þar til það er orðið mjúkt og byrjað að glansa. Takið af pönnunni og leggið til hliðar.

Setjið olíu á pönnuna og steikið hakkið. Bætið hvítkálinu og lauknum ásamt restinni af hráefnunum á pönnuna og látið malla um stund. Smakkið til með salti og pipar og bætið við tómatpuré, rifsberjahlaupi eða soyasósu eftir þörfum.

Það þarf enga sósu með þessu því það myndast sósa af soðinu. Ég sauð kartöflur og dró fram hrásalat og sultu til að hafa með. Krakkarnir elskuðu þetta.

Kjúklingur í mildri chili-rjómasósu með krumpuðum kartöflum

~ Svava ~ 6 athugasemd

Við enduðum helgina með þessum góða kjúklingarétti og krumpuðum kartöflum. Það þarf ekki að hafa mikið fyrir þessum mat og hann var því algjörlega í takt við helgina hjá okkur.

Sósan í þessum kjúklingarétti er æðislega góð og það er kjörið að bera hann fram með pasta eða hrísgrjónum. Mig langaði hins vegar svo mikið í kartöflur og þar sem ég átti fullan poka af þeim urðu þær fyrir valinu í þetta sinn. Þær verða stórgóðar við þessa meðferð, að kremja þær eftir að þær hafa verið soðnar, setja olíu og krydd yfir og leyfa þeim að fá fallegan lit í ofninum. Okkur þótti æði að dýfa þeim í sósuna og hættum ekki fyrr þær voru allar búnar.

Kjúklingur í mildri chili-rjómasósu

  • 900 gr kjúklingabringur
  • paprikukrydd
  • salt
  • 1 dós sýrður rjómi
  • 1 lítill peli rjómi
  • 1-2 kjúklingateningar
  •  1 tsk sambal oelek (fæst t.d. í Bónus, sjá mynd hér að neðan)
  • 2-3 msk chilisósa (t.d. frá Heinz, ekki sweet chilli sósa)
  • salt og pipar
  • ca 2 dl rifinn ostur

Krumpaðar kartöflur

  • kartöflur
  • ólívuolía eða önnur olía
  • salt og jurtakrydd

Hitið ofninn í 200°. Sjóðið kartöflurnar með hýðinu. Skerið bringurnar í tvennt eða þrennt og leggið í eldfast mót. Kryddið með paprikukryddi og salti.

Hrærið saman í potti rjóma, sýrðum rjóma, kjúklingakrafti, chilisósu og sambal oelek og látið suðuna koma upp. Smakkið til með salti og pipar. Hellið heitri sósunni yfir kjúklinginn og setjið í ofninn í ca 20 mínútur. Stráið þá osti yfir réttinn og eldið áfram í ca 15-20 mínútur.

Þegar kartöflurnar eru soðnar er vatninu hellt af og þær lagðar á bökunarpappírsklædda ofnplötu. Þrýstið á kartöflurnar (ég nota botn á glasi til þess), penslið þær með olíu og kryddið með salti og jurtakryddi. Setjið kartöflurnar í ofninn þar til þær hafa fengið fallegan lit.