Sítrónukaka með kókos

júlí 2, 2015október 1, 2020 ~ Svava ~ 4 athugasemd

Nú þegar sumarfríin eru farin að bresta á þykir mér upplagt að gefa sér tíma í að baka köku og hóa í fjölskyldu eða vini í kaffi og kökusneið. Síðan fær maður sér aðra sneið og jafnvel aðra þar til kakan er búin. Yfir kökudásemdinni spjallar maður við kaffigesti og stundin er svo ljúf að maður vill ekki að hún taki enda. Það þekkja þetta allir.

Þessi kaka kallar á svona uppákomur, kaffiboð sem enginn vill yfirgefa. Kakan er svo mjúk og dásamleg að það mun enginn standa upp frá borðinu fyrr en hún er búin. Og þegar hún er búin, þá langar manni til að standa upp til þess eins að baka aðra.

Sítrónukaka með kókos – uppskrift úr tímaritinu Hembakat

1 msk sítrónusafi + fínrifið hýði af einni sítrónu
3 egg
2 dl sykur
2 tsk lyftiduft
1 tsk vanillusykur
smá salt
100 g smjör, brætt
½ dl mjólk
¾ dl kókos
3 dl hveiti

Glassúr

1½ dl flórsykur
nokkrar teskeiðar af sítrónusafa eða vatni

Skraut

kókos

Hitið ofninn í 180°. Rífið sítrónuhýðið fínt með rifjárni, passið að taka bara gula hlutann og forðist þann hvíta. Hrærið egg og sykur saman þar til blandan er létt og ljós. Bætið lyftidufti, vanillusykri, salti, smjör og mjólk saman við og hrærið vel saman. Bætið sítrónusafti, sítrónuhýði og hveiti saman við og hrærið snögglega saman í slétt deig (passið að hræra ekki of lengi því þá er hætta á að kakan verði seig). Setjið deigið í smurt formkökuförm og bakið neðst í ofninum í 30-40 mínútur. Látið kökunar kólna í forminu.

Glassúr: Hrærið flórsykur og sítrónusafa eða vatni (litlu í einu) saman þar til það nær passlegri þykkt. Setjið yfir kökuna þegar hún hefur kólnað og stráið smá kókosmjöli yfir.

Massarína með súkkulaði

apríl 20, 2015október 1, 2020 ~ Svava ~ 1 athugasemd

Í gær komu strákarnir heim frá Kaupmannahöfn og það var betra en orð fá lýst. Það sem við höfum saknað þeirra! Það fylgir þeim svo mikið líf og gleði. Þeir voru alsælir með ferðina og komu færandi hendi, bæði með gjafir til allra og bestu flodeboller (rjómabollur? krembollur? Ég er ekki viss…) í heimi. Þeir kunna þetta bræðurnir!

Ég var búin að lofa þeim vöfflukaffi við heimkomuna en ákvað að gera betur og skellti líka í köku sem ég hef verið að bíða eftir tækifæri til að prófa. Massarína með súkkulaðibitum. Ég veit nú ekki alveg hvað gerðist því súkkulaðibitarnir sukku allir á botninn á kökunni en það kom ekki að sök, hún var dásamlega góð.

Massarína með súkkulaði

200 g marsípan
200 g sykur
200 g smjör
4 egg
120 hveiti
150 suðusúkkulaði

Hitið ofninn í 180°.

Rífið marsípanið gróft og hrærið því saman við sykurinn. Bræðið smjörið og hrærið því saman við marsípan/sykurblönduna þar til blandan myndar jafnan massa. Hrærið eggjunum saman við, einu í einu. Hrærið hveitinu saman við og að lokum hökkuðu súkkulaði. Setjið deigið í 22 cm form og bakið í um 35 mínútur.

Skúffukaka með karamellukremi

apríl 11, 2015október 1, 2020 ~ Svava ~ 1 athugasemd

Ég er orðin svolítið dauf í dálkinn eftir að hafa legið heila viku í flensu og óska þess heitast að hún núna fari og veri. Ég er þó öll að koma til og hef fulla trú á að ég verði stálslegin áður en helgin er á enda. Ég er viss um það.

Þangað til ætla ég að halda áfram að dunda mér við að lesa matreiðslublöðin mín og gæla við tilhugsunina um hlýtt sumar með mörgum grillkvöldum og skemmtilegum ferðalögum. Ég var svo heppin að fá Bon Appétit blað inn um lúguna í vikunni (það sem sú áskrift hefur oft veitt mér mikla gleði og verið hverrar krónu virði) og er búin að lúslesa það spjaldanna á milli og merkja við þær uppskriftir sem ég ætla að prófa. Síðan ætla ég að halda áfram að gæða mér á skúffuköku sem ég bakaði og er æðisleg. Mér þykir góð tilbreyting að hafa karamellukrem á skúffukökunni og því verður seint neitað að karamella og súkkulaði fara stórvel saman. Kannski eitthvað til að baka með helgarkaffinu?

Skúffukaka með karamellukremi (uppskrift úr Hembakat)

2 egg
2 dl sykur
2 tsk lyftiduft
1 dl púðursykur
3 msk kakó
2 tsk vanillusykur
1 ½ dl mjólk
150 g smjör, brætt
4 dl hveiti

Karamelluglassúr:

125 g smjör
1 ½ dl sykur
3/4 dl rjómi
3/4 dl síróp
1 tsk kakó

Yfir kökuna:

kókosmjöl

Hitið ofninn í175°. Hrærið egg og sykur saman þar til blandan er orðin létt og ljós. Blandið saman lyftidufti, púðursykri, kakó og vanillusykri. Hrærið blöndunni út í eggjablönduna ásamt mjólk, bræddu smjöri og hveiti. Hrærið snögglega saman í slétt deig. Setjið deigið í skúffukökuform (sirka 22 x 35 cm að stærð) og bakið í miðjum ofni í 25-30 mínútur.

Karamelluglassúr: Bræðið smjörið í potti. Hrærið sykri, rjóma, sírópi og kakói saman við og látið suðuna koma upp á meðan hrært er í pottinum. Lækkið hitann og látið sjóða við vægan hita í 18-20 mínútur.

Setjið karamelluglassúrinn yfir kökuna og stráið kókos yfir. Leyfið karamellunni að stífna aðeins áður en kakan er skorin í bita.

Pannacottakaka með ástríðualdin

apríl 4, 2015október 1, 2020 ~ Svava ~ Skrifa athugasemd

Ó, hvað ég elska páskafrí. Fyrir utan sumarfrí þá þykir mér páskafrí vera besta fríið. Ekkert sem þarf að gera annað en að njóta. Við hófum fríið í Bláfjöllum á miðvikudagskvöldinu í æðislegu veðri og á heimleiðinni keyptum við nammi og skyndibita sem við nutum hér heima yfir sjónvarpinu, endurnærð eftir útiveruna. Síðan höfum við farið í göngutúra og notið þess að borða gott og vera saman. Nú liggur leiðin með krakkana og vinafólki í hellaferð og planið er að enda daginn í humar og hvítvíni. Hversu ljúft!

Ég gerði köku um daginn fyrir saumaklúbbinn minn sem við vorum allar svo hrifnar af að ég má til með að setja uppskriftina hingað inn. Þessi dásemd myndi sóma sér svo dæmalaust vel á páskaborðinu og er ferskur og góður eftirréttur. Njótið!

Pannacottakaka með ástríðualdin – uppskrift frá Bakverk och Fikastunder

Botn:

200 g digistive kex
100 g brætt smjör

Myljið digestive kexið í mylsnu (notið matvinnsluvél ef þið eigið hana, annars bara kökukefli og plastpoka!). Bræðið smjörið og blandið saman við kexmylsnuna. Þrýstið blöndunni í botninn á lausbotna formi sem er um 24 cm í þvermál. Kælið.

Fylling:

5 ástríðualdin
4 dl rjómi
0,5 dl mjólk
0,5 tsk vanillusykur
0,5 dl sykur
2,5 matarlímsblöð

Leggið matarlímið í kalt vatn í að minnsta kosti 5 mínútur. Skafið úr ástríðualdinunum og setjið í pott ásamt rjóma, mjólk, vanillusykri og sykri. Látið suðuna koma upp og takið þá pottinn af hitanum. Takið matarlímsblöðin úr vatninu, kreistið mesta vatnið frá og setjið matarlímsblöðin í pottinn. Hrærið þar til þau hafa leyst upp. Sigtið blönduna og látið hana yfir botninn. Látið standa í ísskáp í að minsta kosti 4 klst.

Yfir kökuna:

2 matarlímsblöð
4 ástríðualdin
1 dl vatn
1 msk sykur

Leggið matarlímið í kalt vatn í að minnsta kosti 5 mínútur. Skafið úr ástríðualdinunum og setjið í pott ásamt vatni og sykri. Hitið upp og hrærið síðan matarlímsblöðunum saman við. Hellið vökvanum yfir pannacottað og látið stífna í ísskáp í nokkrar klukkustundir.

Heimsins bestu súkkulaðibitakökur

mars 24, 2015október 1, 2020 ~ Svava ~ 9 athugasemd

Undanfarnir dagar hafa verið nokkuð viðburðaríkir því við fengum skiptinema frá Frakklandi til okkar síðasta föstudag sem mun dvelja hjá okkur í viku. Í haust munu hlutskiptin síðan snúast við þegar Malín fer Frakklands sem skiptinemi í viku. Þetta ævintýri er á vegum Versló og er bæði stórsniðugt og skemmtilegt. Við vorum sérlega heppin með skiptinema, fengum yndislega stelpu til okkar sem er jákvæð og þakklát fyrir allt sem er gert fyrir hana og segist vera farin að kvíða því að kveðja og halda heim. Hún fer vonandi með góða upplifun héðan á föstudaginn og Malín hefur eflaust eignast vinkonu fyrir lífstíð.

En úr einu í annað, ég les annað slagið amerískt blogg sem heitir Love Taza. Bloggið er ekki matarblogg en af og til læðast þangað inn mataruppskriftir og þegar þar birtist uppskrift sem hét „The world´s best chocolate chip cookie“ þá gat ég ómöglega staðist að prófa þær. Skiljanlega! Kökurnar eru æðislegar og ekki skemmir fyrir hvað það er einfalt að gera þær. Þessar mun ég baka aftur og aftur…

Heimsins bestu súkkulaðibitakökur (uppskrift frá Love Taza)

1 bolli smjör
1 bolli sykur
1 bolli púðursykur
2 egg
1 tsk. vanilludropar
1 tsk. matarsódi
2 tsk lyftiduft
½ tsk salt
3¼ bollar hveiti
1 bolli (eða meira) súkkulaðibitar

Hrærið smjörið mjúkt og kremkennt. Hrærið sykri og púðursykri saman við. Hrærið eggjum og vanilludropum saman við. Blandið þurrefnunum saman og hrærið þeim smátt og smátt saman við smjör/sykur blönduna. Hrærið súkkulaðibitum að lokum í deigið.

Skiptið deiginu í um 30-35 bita og raðið á bökunarpappírsklædda bökunarplötu (það er algjör óþarfi við að dunda sér við að rúlla kúlur úr deiginu). Bakið við 175° í 8-10 mínútur.

Sebrakaka

mars 21, 2015október 1, 2020 ~ Svava ~ 5 athugasemd

Það er orðið langt síðan ég gaf uppskrift af köku sem er hálf furðulegt því ég eeeeeeelska kökur. Að bjóða upp á nýbakað með kvöldkaffinu þykir mér með því notalegasta sem ég veit og að eiga heimabakaða köku á eldhúsborðinu um helgar er alltaf jafn gott.

Um daginn bakaði ég köku sem okkur þótti öllum góð. Nú man ég ómöglega hvaðan uppskriftin kom en finn kannski út úr því þegar fram líður og skal þá setja það inn. Þessi fer mjög vel með helgarkaffinu og mun eflaust ekki staldra lengi við.

Sebrakaka

4 egg
2 ½ dl sykur
2 ½ dl mjólk
250 g smjör, brætt
1 msk vanillusykur
1 msk lyftiduft
smá salt
5 dl hveiti

Fyrir dökka deigið:

3 msk kakó

Fyrir ljósa deigið:

3 msk hveiti

Hitið ofninn í 180° og smyrjið 24 cm hringlaga kökuform.

Hrærið egg og sykur saman þar til blandan er ljós og létt. Bætið mjólk, smjöri, vanillusykri, lyftidufti, salti og hveiti saman við og hrærið þar til blandan er slétt og kekkjalaus. Setjið 5-6 dl af deiginu í aðra skál og hrærið kakói saman við. Hrærið 3 msk af hveiti saman við ljósa deigið.

Setjið um ½ dl af ljósa deiginu í miðjuna á bökunarforminu. Setjið síðan um ½ dl af dökka deiginu í miðjuna á ljósa deiginu í forminu. Við þetta rennur ljósa deigið út, nær köntunum. Haldið áfram að setja dökka og ljósa deigið til skiptis á þennan máta í formið og reynið að enda á ljósa deiginu.

Bakið kökuna neðarlega í ofninum í 45-55 mínútur.

Vinsælustu uppskriftir ársins 2014

janúar 13, 2015október 1, 2020 ~ Svava ~ 2 athugasemd

Eins og mér þykir gaman að taka fram jólaskrautið fyrir aðventuna þá finnst mér líka alltaf jafn gott að pakka því niður aftur. Og á hverju einasta ári skipti ég jólaskrautinu út fyrir ferska túlípana. Mér þykir það hreinlega tilheyra því að pakka niður jólunum.

Ég hef undanfarin ár birt hér lista yfir vinsælustu uppskriftir ársins og ætla að halda í þá hefð. Mér þykir alltaf áhugavert að sjá hvaða uppskriftir það eru sem hafa vakið mestu lukku og það gleður mig að sjá tvo fiskrétti á listanum í ár. Að sama skapi er ánægjulegt að sjá sumar uppskriftir á listanum ár eftir ár. Ég bendi á að listann má vel nýta sem vikumatseðill, enda bæði fjölbreyttur og ljúffengur.

Kjúklingur með sætum kartöflum, spínati og fetaosti er nú vinsælasta uppskrift ársins annað árið í röð. Uppskriftinni hefur verið deilt yfir 10.000 sinnum og skildi engan undra. Dásamlega góður réttur sem er í senn hollur, fljótgerður og einfaldur að útbúa.

Í öðru sæti er hakkabuff með fetaosti. Heimilismatur eins og hann gerist bestur!

Í þriðja sæti er fiskur í okkar sósu. Þessi fiskréttur er einn af mínum uppáhalds og það gleður mig að sjá hann svona ofarlega á lista.

Mexíkóskur mangókjúklingur var fjórða vinsælasta uppskrift ársins. Æðislegur réttur sem mér þykir passa sérlega vel á föstudagskvöldum.

Fimmta vinsælasta uppskrift ársins var í öðru sæti á listanum í fyrra. Einföld og góð skúffukaka sem svíkur engan og er ómótstæðileg með ískaldri mjólk.

Uppáhalds bananabrauðið heldur sjötta sæti listans frá því í fyrra. Ég vil ekki vita hversu oft ég hef bakað þetta brauð en við fáum ekki leið á því.

Í sjöunda sæti er mexíkósk kjúklingasúpa. Hér er á ferðinni uppskrift sem ég gríp oft til og hún vekur alltaf lukku. Dásamleg súpa í alla staði.

Pizza sem klikkar aldrei er áttunda vinsælasta uppskriftin. Hún stendur alltaf fyrir sínu og er öruggt kort á föstudagskvöldum.

Í níunda sæti er ofnbakaður fiskur í paprikusósu. Namm!

Tíunda vinsælasta uppskriftin var sú vinsælasta fyrir tveimur árum, milljón dollara spaghetti. Barnvænn réttur sem slær alltaf í gegn.

Litlar og lekkerar marangekökur

júlí 26, 2014október 1, 2020 ~ Svava ~ 2 athugasemd

Hér kemur enn ein uppskriftin úr eldhúsinu hennar mömmu. Við fengum þessar dásamlegu marangekökur í eftirrétt hjá henni þegar hún bauð okkur í þessa kjúklingasúpu. Súpan var æðisleg og marangekökurnar ekki síðri. Mamma klikkar aldrei! Við gátum ekki hætt að dásama þær og ég var ekki lengi að biðja um uppskriftina.

Litlar og lekkerar marangekökur (8 stykki)

Botnar:

3 eggjahvítur
½ tsk sítrónusafi
180 g sykur

Yfir kökurnar:

2,5 dl rjómi
sítrónubörkur af 1 sítrónu
safi af ½ sítrónu
ávextir, að vild

Þeytið eggjahvítur með sítrónusafa og bætið sykri smátt og smátt saman við. Þeytið áfram þar til blandan er orðin þykk. Leggið bökunarpappír á plötu og mótið 8 kökur, gjarnan með smá dæld í miðjunni. Bakið við 130° í 30 mínútur.

Þeytið rjóma og bætið sítrónuberki af 1 sítrónu og safa úr ½ sítrónu saman við. Skerið ávexti smátt. Setjið rjómann yfir kökurnar og skreytið með ávöxtum.

Súkkulaði- og bananakaka

júlí 19, 2014október 1, 2020 ~ Svava ~ 8 athugasemd

Ég á alltaf erfitt með að henda mat en sá matur sem ég get alls ekki hent eru bananar. Þeir eru svo ljúffengir í brauðum og kökum, þó þeir séu orðnir ljótir og enginn hefur lyst á þeim, að ég enda alltaf á að baka úr þeim. Í langfelstum tilfellum enda gamlir bananar í þessu bananabrauði sem hverfur síðan undantekningarlaust á svipstundu ofan í krakkana, en annað slagið bregð ég út af vananum og prófa nýjar uppskriftir. Þessa uppskrift sá ég hjá Smitten Kitchen og get lofað að hún er dásamlegri en orð fá lýst.

Í kökunni eru bæði kakó og súkkulaðibitar (tvöfalt súkkulaðibragð!!) sem blandast saman við bananabragðið og gerir kökuna gjörsamlega ómótstæðilega. Ég hakka súkkulaðið gróft því mér þykir gott að finna fyrir súkkulaðibitunum í kökunni.

Kakan er í algjöru uppáhaldi hjá okkur þessa dagana og ég hef ekki tölu yfir hversu oft ég hef bakað hana á undanförnum vikum. Ég fann þó síðastliðið fimmtudagskvöld, þegar ég tók kökuna út úr ofninum kl. 11 um kvöldið og settist í sæluvímu niður með heita kökusneið og ískalt mjólkurglas og það var ó, svo dásamleg stund, að kannski væri þetta of langt gengið. Ég ætla því ekki að baka kökuna í komandi viku en þið getið gert það. Hér kemur uppskriftin…

Súkkulaði- og bananakaka

3 mjög þroskaðir bananar
115 g smjör, brætt
145 g púðursykur
1 stórt egg
1 tsk vanilludropar
1 tsk matarsódi
1/4 tsk salt
1/2 tsk kanil
125 g hveiti
50 g kakó
170 g súkkulaði, grófhakkað (ég nota suðusúkkulaði)

Hitið ofninn í 175° og smyrjið formkökuform.

Stappið banana í botni á stórri skál (ég nota hrærivélina). Hrærið bræddu smjöri saman við, síðan púðursykri, eggi og vanilludropum. Bætið matarsóda, salti, kanil, hveiti og kakó saman við og hrærið varlega þar til hefur blandast vel (passið að hræra ekki of lengi). Hrærið súkkulaðibitunum í deigið og setjið það í smurt formið. Bakið í 55-65 mínútur, eða þar til próni stungið í kökuna kemur deiglaus upp. Látið kökuna kólna í forminu í 10-15 mínútur.

Kakan geymist í 4 daga í plasti við stofuhita en ég get nánast fullyrt að hún mun aldrei endast svo lengi!

Ljúfmeti og lekkerheit 2 ára og dásamleg sítrónukaka með hindberjum og pistasíuhnetum

júní 23, 2014október 1, 2020 ~ Svava ~ 12 athugasemd

Ég veit að það er mánudagur en ég bakaði köku í tilefni dagsins og taldi mig hafa góða ástæðu til. Bloggið mitt er 2 ára í dag. Tveggja ára! Ef það gefur ekki tilefni til að baka köku þá veit ég ekki hvað.

Bloggið er eitt skemmtilegasta áhugamál sem ég hef á ævinni haft. Ég eyði helst öllum lausum stundum í það, þó það sjáist kannski ekki hér. Að lesa uppskriftir, plana matseðla, prófa mig áfram, misheppnast, heppnast, skrifa niður uppskriftir, taka myndir… allt tekur þetta sinn tíma og ég hef ánægju af þessu öllu. Meira en það, ég elska þetta. Fyrir utan bloggið er ég í fullu starfi og með þrjú börn, það er því líf og fjör alla daga vikunnar sem veldur því að suma daga gefst einfaldlega ekki tími til að sinna blogginu og mér þykir alltaf jafn leiðinlegt þegar svo er.

Bloggið væri ekkert án ykkar og það gleður mig inn að hjartarótum hvað þið eruð mörg sem kíkið hingað inn á hverjum degi. Ég man í byrjun þegar heimsóknirnar fóru í fyrsta sinn yfir 100 og mér þótti það svo merkilegt. Í dag skipta þær tugum þúsunda á degi hverjum og mig sundlar af tilhugsuninni einni saman. Þið eruð út um allan heim og bloggið hefur meðal annars fengið heimsóknir frá löndum eins og Venezuela, Qatar, Cambodia, Jordan, Mozambique, Kuwait, Nepal, Yemen og Aruba. Hverjir voru þar? Ég verð svo forvitin þegar ég sé heimsóknir frá framandi löndum.

Takk fyrir öll falleg komment og tölvupósta sem þið hafið sent mér á þessum tveimur árum. Þið hafið fegrað líf mitt með þeim og ég mun seint ná að lýsa því hversu vænt mér þykir um að þið gefið ykkur tíma til að senda mér kveðju ♥

Ég er áskrifandi af Bon Appetit fyrir nokkru einsetti ég mér að prófa alltaf að minnsta kosti eina uppskrift úr hverju blaði sem dettur inn um lúguna. Það gengur svona og svona en ég lúsles blöðin aftur og aftur. Ég elska þessi blöð. Í nýjasta blaðinu kallaði þessi uppskrift á mig, kannski vegna þess að ég er svo hrifin af sítrónum, hindberjum og pistasíuhnetum. Hún var því sjálfskrifuð sem uppskriftin sem yrði prófuð úr þessu blaði. Þessi kaka hefur allt og getur ekki klikkað. Mér þótti hún svo ljúffeng og við dásömuðum hana við hvern bita.

Sítrónukaka með hindberjum og pistasíuhnetum (uppskrift úr bon appétit)

1 3/4 bolli hveiti (250 g)
1 ½ tsk lyftiduft
½ tsk gróft salt
4 stór egg
1 1/4 bolli + 2 msk sykur
2 tsk vanilludropar
2 msk fínrifið sítrónuhýði
1 msk + 1/4 bolli ferskur sítrónusafi
3/4 bolli mild ólífuolía
1 bolli fersk hindber
3 msk hakkaðar ósaltaðar og óristaðar pistasíuhnetur

Hitið ofn í 175° og smyrjið 24 cm kökuform.

Hrærið saman hveiti, lyftidufti og salti í skál og leggið til hliðar. Hrærið egg og 1 bolla af sykri saman með handþeytara eða í hrærivél í 5 mínútur. Þá ætti blandan að vera orðin ljós og létt. Látið hrærivélina ganga og bætið vanilludropum og 1 msk af sítrónusafa saman við. Hrærið síðan olíunni smátt og smátt saman við. Hærið að lokum þurrefnum og sítrónuhýði varlega saman við. Setjið deigið í kökuformið og sléttið úr yfirborðinu. Setjið hindberin yfir, síðan pistasíuhneturnar og 2 msk af sykri. Bakið kökuna í 45-55 mínútur, eða þar til prjóni sem stungið hefur verið í kökuna kemur hreinn upp.

Á meðan kakan er í ofninum er 1/4 bolli af sykri og 1/4 bolli af sítrónusafa sett í lítinn pott. Látið suðuna koma upp, hrærið í og látið sykurinn leysast upp. Látið sítrónusýrópið kólna.

Þegar kakan er tilbúin er hún tekin úr ofninum og sett á grind til að kólna (ekki taka hana úr kökuforminu). Burstið sítrónusýrópinu yfir hana, notið allt sýrópið. Látið kökuna kólna alveg í forminu.