Dumle-lengjur

júní 14, 2014október 1, 2020 ~ Svava ~ 7 athugasemd

Ó, hvað ég elska helgarfrí. Að sofa út, borða langan morgunverð og byrja daginn rólega. Krakkarnir eru orðnir svo stórir og sofa langt frameftir morgni svo dagarnir byrja mjög rólega hér um helgar. Það er af sem áður var! Strákarnir voru á skemmtilegu námskeiði hjá Náttúrufræðistofu í vikunni, eyddu löngum stundum utanhús og voru dauðuppgefnir í gærkvöldi. Það var því sofið extra lengi í morgun og enn ekki allir komnir á fætur.

Ég myndi helst vilja eiga heimabakaðar smákökur alla daga til að bjóða upp á með kaffinu. Það tekur þó sinn tíma að móta margar litlar kökur og því gríp ég oftar til þess ráðs að baka lengjur sem eru skornar niður í passlegar stærðir. Það tekur enga stund! Ég hef áður birt uppskrift af Daimlengjum sem eru æðislegar og þessar Dumlellengjur gefa þeim ekkert eftir. Það má frysta þær og sagan segir að þær séu himneskar beint úr frystinum ofan í heitan kaffibollann…

Dumle-lengjur (uppskrift frá Jennys matblogg)

220 g smjör við stofuhita
4 msk ljóst sýróp
5 dl hveiti
2 dl sykur
1 ½ tsk lyftiduft
1 msk vanillusykur
150 g Dumlekaramellur, hakkaðar

Hitið ofninn í 200° og klæðið bökunarplötu með bökunarpappír.

Hrærið sykri og smjöri saman og bætið sýrópinu saman við. Blandið þurrefnunum saman og hrærið í smjörblönduna. Hrærið að lokum hökkuðum Dumlekaramellum í deigið.

Skiptið deiginu í tvennt og rúllið tvær rúllur úr því. Leggið rúllurnar á bökunarpappír og fletjið þær aðeins út með fingrunum. Bakið í miðjum ofni í 8-11 mínútur, eða þar til lengjurnar hafa fengið fallegan lit. Takið úr ofninum og leyfið mesta hitanum að rjúka úr kökunum. Skerið lengjurnar í sneiðar á meðan þær eru heitar og látið þær síðan kólna á grind.

Nutella semifreddo

júní 8, 2014október 1, 2020 ~ Svava ~ 1 athugasemd

Á föstudaginn voru skólaslit hjá strákunum og þeir eru því komnir í langþráð sumarfrí. Fríið byrjar vel, með glampandi sól sem hefur verið notið til hins ýtrasta. Þvílíkur munur þegar veðrið er svona gott! Vonandi fáum við sólríkt sumar.

Síðastliðinn fimmtudag útskrifaðist Malín hins vegar úr 10. bekk og lauk þar með grunnskólagöngu sinni. Mér þykir þetta vera svo stór áfangi og mikil tímamót. Skólinn var með fallega athöfn og bauð síðan öllum upp á mat að henni lokinni. Það voru 42 nemendur sem útskrifuðust úr skólanum og skólinn sá til þess að þau gátu kvatt á eftirminnilegan máta. Hvað tekur nú við skýrist í lok mánaðarins en þá koma svör frá menntaskólunum. Spennandi….

Í veislunni í skólanum komst ég að því að Malín var búin að bjóða vinahópnum hingað heim í forpartý. Það vildi svo heppilega til að kvöldið áður hafði ég útbúið tertu og var búin að versla inn í Caesarsalat sem ég ætlaði að hafa í kvöldmatinn. Veðrið var svo gott að við lögðum á borð úti á palli, ég gerði stóran skammt af salatinu og bauð síðan upp á Nutella semifreddo tertuna sem beið í frystinum í eftirrétt. Ég heyrði ekki betur en að allir hafi verið ánægðir og það var glaður hópur sem fór héðan þegar leið á kvöldið.

Uppskriftin af tertunni hef ég séð víða í sænskum bloggheimum þar sem hún hefur vakið mikla lukku. Hún stóð fullkomlega undir væntingum og er frábær eftirréttur fyrir sumarið, svo frískandi og góð. Það skemmir ekki fyrir að hægt er að útbúa hann með góðum fyrirvara og geyma í frysti. Mér þykir nauðsynlegt að bera tertuna fram með berjum, helst jarðaberjum. Súpergott!!!

Nutella semifreddo (fyrir 10 manns)

2 marangebottnar (keyptir eða heimagerðir, uppskrift fyrir neðan)
4 egg
2 msk sykur
5 dl rjómi
1 dós Nutella (um 400 g)

Skiljið eggjahvítur og -gulur og setjið í sitthvora skálina. Setjið 1 msk af sykri í hvora skál. Stífþeytið eggjahvíturnar og þeytið eggjarauðurnar þar til þær verða léttar og ljósar. Þeytið rjómann í þriðju skálinni.

Setjið annan marangebottninn í botn á smelluformi. Brjótið hinn botinn og leggið til hliðar.

Hærið eggjahvítum, eggjarauðum og rjóma varlega saman og hrærið síðan mulda marangebotninum saman við. Látið Nutella renna úr skeið yfir og blandið því þannig í til að það myndi rendur í deiginu (hitið Nutelladósina aðeins í örbylgjuofninum áður til að það sé betra að eiga við það). Setjið deigið yfir marangebottninn í forminu, ef það er of hátt þá er hægt að útbúa kannt með álpappír til að hækka formið eða hreinlega leggja hringinn (kanntinn) af öðru formi ofan á. Ég setti smá af Nutella yfir kökuna sem skraut áður en hún fór í frystinn.

Frystið tertuna í að minnsta kosti 4 klukkustundir áður en hún er borin fram. Berið hana fram með ferskum jarðaberjum.

Marangebotnar

4 eggjahvítur
3 dl sykur

Stífþeytt saman, sett í tvö form og bakað við 110° í 2 klst.

Mjúk súkkulaðikaka með vanillukremi og kókos

maí 25, 2014október 1, 2020 ~ Svava ~ 4 athugasemd

Ég veit ekki hvað er með mig en ég fæ oft svo svakalega löngun í köku og mjólk á kvöldin. Þá baka ég köku eftir kvöldmatinn og hef kvöldkaffi áður en krakkarnir fara að sofa. Mér þykir svo notalegt að setjast niður með þeim yfir spjalli, nýbakaðri köku og köldu mjólkurglasi og varla hægt að enda daginn betur.

Þessi kaka gladdi okkur eitt kvöldið í vikunni og vonandi nokkra vinnufélaga mína daginn eftir. Ég var alla vega spurð hvort að uppskriftin færi ekki á bloggið og það gleður mig alltaf. Svo hér kemur hún, á bloggið eins og lofað var. Dásamleg í alla staði og passar stórvel við náttföt, kertaljós og ískalda mjólk.

Mjúk súkkulaðikaka með vanillukremi og kókos

2 egg
1 ½ dl sykur
2 tsk vanillusykur
2 msk kakó
2 tsk lyftiduft
75 g smjör, brætt
3/4 dl mjólk
2 1/4 dl hveiti

Glassúr

1 ½ msk vanillusykur
3 dl flórsykur
35 g smjör, brætt
2-4 msk vatn

Til að strá yfir kökuna

kókosmjöl

Hitið ofninn í 180°. Hrærið egg og sykur saman þar til létt og ljóst. Bætið hinum hráefnunum saman við og hrærið snögglega saman í deig. Passið að hræra ekki of lengi því þá er hætta á að kakan verði þung í sér og seig. Setjið deigið í smurt form (um 24 cm í þvermál) og bakið kökuna í 15-20 mínútur, eða þar til prjóni sem er stungið í kökuna kemur hreinn upp.

Glassúr: Hrærið öllum hráefnum saman í skál. Notið vatnið til að ná réttri áferð og þykkt á glassúrnum.

Þegar kakan hefur kólnað þá er glassúrinn settur yfir hana og kókosmjöl stráð strax yfir glassúrinn.

Skúffukaka

apríl 4, 2014október 1, 2020 ~ Svava ~ 4 athugasemd

Í gærkvöldi var árshátíð hjá Malínu og þar sem hún er í 10. bekk þá var þetta síðasta grunnskólaárshátíðin hennar. Þegar ég kom heim úr vinnunni gekk ég inn í stórkostlegt ilmvatnsský og heimilið var undirlagt af stelpum í árshátíðarundirbúningi. Við eldhúsborðið var verið að græja neglur, inn á baði verið að krulla hár og það var sama hvert ég leit, alls staðar voru ummerki af því skemmtilega kvöldi sem var í vændum hjá þeim. Það var æðislegt að fylgjast með þeim, stemmningin í toppi og ekki annað hægt en að smitast af gleðinni. Eftir árshátíðina var hópurinn sóttur af limmósínu sem rúntaði um bæinn áður en þau enduðu ferðina hér heima. Í morgun hélt gleðin áfram því Malín var búin að bjóða hópnum hingað heim í morgunverð fyrir skóla. Það var boðið upp á spæld egg, amerískar pönnukökur, snúða, vínarbrauð og ferska ávexti sem vinirnir sameinuðust í að kaupa og útbúa. Skemmtilegur endir á síðustu grunnskólaárshátíðinni. Í haust halda þau í sitthvora áttina og nýr kafli tekur við. Það eru spennandi tímar framundan hjá þeim.

Um síðustu helgi bakaði ég æðislega skúffuköku og ákvað að drífa mig að setja inn uppskriftina ef þið eruð í bökunarhugleiðingum um helgina. Mér þykir skúffukaka alltaf standa fyrir sínu og vera ómótstæðileg með ískaldri mjólk. Þessi var mjög góð og ekki lengi að klárast.

Að lokum langar mig til að benda ykkur á síðu á Facebook sem ég var að uppgötva, Njóttu. Þetta er lífsstílssíða fyrir þá sem kunna að meta það góða í lífinu! Á síðunni má finna uppskriftir, vínráðgjöf, hugmyndir af skreytingum fyrir matarboð, tilboð á veitingastöðum bæjarins og fl. sem nautnaseggir ættu ekki að láta framhjá sér fara. Það er flottur leikur í gangi á síðunni þar sem er hægt að vinna út að borða fyrir tvo á Lækjarbrekku ásamt veglegri gjafakörfu frá Njóttu. Þú getur tekið þátt í leiknum hér. Það verður dregin út vinningur strax á mánudaginn og síðan aftur 14. apríl. Það er um að gera að taka þátt!

Skúffukaka

2 egg
3 dl sykur
150 g smjör
1 dl mjólk
4 dl hveiti
2 tsk lyftiduft
1 msk vanillusykur
4 msk kakó

Glassúr

75 g smjör
4 msk kakó
4 dl flórsykur
0,5 dl kalt kaffi
1 msk vanillusykur
2 dl kókosmjöl til að strá yfir

Bræðið smjör og látið aðeins kólna. Hrærið egg og sykur þar til blandan er ljós og létt. Hrærið hveiti, lyftidufti, kakó og vanillusykri saman við. Hærið að lokum smjöri og mjólk varlega í deigið (svo það skvettist ekki í allar áttir). Setjið deigið í smurt skúffukökuform (eða klæðið það með bökunarpappír) og bakið við 175° í um 30 mínútur.

Glassúr: Bræðið smjör í potti. Bætið kakó, flórsykri, kaffi og vanillusykri í pottinn og hrærið saman þar til blandan er slétt. Látið kökuna kólna áður en glasúrinn er settur yfir. Stráið kókosmjöli yfir strax eftir að glassúrinn hefur verið settur á kökuna.

Nutellaostakaka með Oreobotni

mars 29, 2014október 1, 2020 ~ Svava ~ 2 athugasemd

Börnin mín gætu lifað á Nutella og Malín veit fátt betra en ostakökur. Þegar ég datt niður á uppskrift af Nutellaostaköku á Pinterest var ég því ákveðin í að gera vel við okkur og bjóða upp á kökuna við fyrsta tækifæri.

Ég finn alltaf tilefni fyrir eftirrétt. Það dugar að allir séu heima eða gott sjónvarpsefni til að njóta eftirréttarins yfir. Mér þykir það lífga upp á daginn og færa honum örlítinn hversdagslúxus.

Þessi ostakaka er æðisleg og krakkarnir voru fljót að hreinsa skálina þegar ég var búin að hræra í fyllinguna. Tilbúna kakan vakti ekki minni lukku og hreinlega hvarf úr skálunum. Núna er beðið eftir að ég bjóði aftur upp á hana, sem ég mun svo sannarlega gera fljótlega!

Það tekur stutta stund að útbúa þessa dásemd og hráefnalistinn er einfaldur. Þið finnið Cool Whip í frystinum í Hagkaup og best er að láta það þiðna í ísskáp. Það tekur um 4 klst.

Nutellaostakaka með Oreobotni (fyrir 4-6)

Botn:

12 Oreo kexkökur
3 msk smjör, brætt

Fylling:

225 g Philadelphia rjómaostur
2/3 bolli Nutella
1 tsk vanilludropar
1 askja (225 g) Cool Whip (fæst í Hagkaup), sem hefur þiðnað í ísskáp í amk 4 klst.

Botn: Myljið Oreo kexkökurnar (t.d. í matvinnsluvél), bræðið smjörið og hrærið saman. Skiptið blöndunni jafnt á milli þeirra skála eða glasa sem á að bera kökurnar fram í, þrýstið blöndunni í botninn og leggið til hliðar.

Fylling: Setjið rjómaost og Nutella í skál og hrærið saman með handþeytara eða í hrærivél þar til blandan er mjúk og einlit. Hrærið vanilludropum saman við. Notið sleikju til að blanda Cool Whip saman við blönduna, vinnið allt varlega saman þar til blandan er orðin einlit og engar rendur í henni. Setjið fyllinguna yfir Oreobotninn (ég setti fyllinguna í sprautupoka og sprautaði henni í skálarnar). Setjið plastfilmu yfir og geymið í ísskáp þar til borið fram.

Blóðappelsínu ostakaka

febrúar 4, 2014október 1, 2020 ~ Svava ~ 4 athugasemd

Þegar ég verslaði inn um helgina sá ég að ávöxtur mánaðarins í Hagkaup er blóðappelsína. Þær voru svo girnilegar að ég greip tvo poka með mér. Við vorum fljót að klára fyrri pokann, enda gjörsamlega ómótstæðilegar kaldar og safaríkar úr íssápnum, en hinn fékk að fara í ostaköku sem ég hef haft augastað á og beðið eftir tækifæri til að baka.

Ég var svo heppin að eiga von á tengdaforeldrum mínum í mat kvöldið eftir og gat því boðið þeim upp á ostakökuna í eftirrétt. Kakan vakti mikla lukku því bæði er hún falleg á borði og smakkast dásamlega. Frískandi og fullkominn eftirréttur að mínu mati.

Ég bakaði kökuna deginum áður og gerði efsta lagið daginn sem ég bar hana fram. Í fljótu bragði lítur kakan kannski út fyrir að vera flókin og tímafrek en svo er nú ekki. Það tekur enga stund að gera kökuna og það er jafnvel betra að gera hana með dags fyrirvara, sem mér þykir geta verið mikill kostur.

Að lokum vil ég benda á að á morgun er alþjóðlegi Nutella-dagurinn og því um að gera að nýta tækifærið og bjóða upp á góðgæti með Nutella í. Þú finnur nokkrar góðar uppskriftir hér á blogginu, t.d. þessa mjúku Nutellaformköku sem er æðisleg með kaldri mjólk, bananaköku með Nutellakremi sem hefur fengið mikið hrós, bananabrauð með Nutella sem á eftir að hverfa ofan í mannskapinn á svipstundu, hnetusmjörs- og Nutella kökur, hafrakökur með bönunum og Nutella, hnetusmjörs- og bananapönnukökur með Nutellasýrópi sem slá alltaf í gegn á morgunverðarborðinu og heitur Nutella súkkulaðidrykkur sem tekur enga stund að gera.

Blóðappelsínu ostakaka

Botninn

200 g Digestivekex
50 g piparkökur
100 g smjör

Lag 1

450 g Philadelphia ostur
um 1 msk rifið hýði af blóðappelsínu (passið að taka bara ysta lagið og ekki hvíta hlutann, hann gefur beiskt bragð)
2 msk safi úr blóðappelsínu
3 egg
1¼ dl sykur

Lag 2

3 dl sýrður rjómi
3 msk sykur
1 msk vanillusykur

Lag 3

1½ dl safi úr blóðappelsínum
2 matarlímsblöð

Hitið ofninn í 180°.

Myljið kexin og blandið bræddu smjöri saman við. Þrýstið blöndunni í botn á 24 cm kökuformi og bakið í 5-10 mínútur.

Setjið öll hráefnin í lag 1 í matvinnsluvél og vinnið saman í jafnt deig (það er líka hægt að nota töfrasprota). Hellið deiginu yfir forbakaðann kexbotninn og bakið neðarlega í ofninum í 25 mínútur. Passið að baka kökuna ekki lengur svo hún verði ekki þurr.

Hrærið hráefnunum í lag 2 saman og breiðið yfir kökuna. Bakið í 5 mínútur til viðbótar. Látið kökuna kólna alveg (helst í ísskáp yfir nóttu) áður en lag 3 er sett yfir.

Leggið matarlímsblöðin í kalt vatn. Hitið safann úr blóðappelsínum í potti. Takið af hitanum, kreystið vökvann frá matarlímsblöðunum og bætið blöðunum í pottinn. Hrærið þar til matarlímsblöðin hafa bráðnað. Látið kólna aðeins áður en blöndunni er hellt varlega yfir kökuna. Látið kökuna standa í ísskáp þar til hlaupið hefur stífnað.

Berið kökuna fram kalda úr ísskáp og gjarnan með þeyttum rjóma.

Browniekaka með daim og jarðaberjafrauði

janúar 21, 2014október 1, 2020 ~ Svava ~ 7 athugasemd

Eftir kvöldmatinn í gær létum við okkur dreyma um góðan eftirrétt. Eftir að hafa velt upp öllum mögulegum eftirréttum sem okkur komu til hugar komst ég að þeirri niðurstöðu að mig langaði mest í þessa köku, brownieköku með daim og jarðaberjafrauði. Ég hefði gefið mikið fyrir sneið af henni, þó ekki væri nema smá flís til að njóta eftir matinn. Hún er svo æðislega góð, með ríkulegum súkkulaðibotni og fersku jarðaberjafrauði sem fer saman eins og hönd í hanska.

Það er óhætt að segja að kakan hafi farið sigurför um sænska matarbloggheima og ég hef ekki tölu á þeim bloggsíðum sem ég hef séð uppskriftina á. Mér þykir það alltaf góðs viti að sjá sömu uppskrift á mörgum stöðum og þær uppskriftir hafi undantekningarlaust reynst mér góðar.

Ég verð að viðurkenna að matarlím fældi mig lengi vel frá uppskriftum en ég er sem betur fer komin yfir það. Ég gerðist meira að segja svo djörf að bæta auka matarlímsblaði í þessa köku þar sem ég las í umsögnum að hún ætti það til að vera ekki nógu stíf. Upphaflega uppskriftin gerði ráð fyrir 5 matarlímsblöðum en ég nota 6 blöð og hef aldrei lent í vandræðum.

Browniekaka með daim og jarðaberjafrauði

Brownie botn:

110 g smjör
2 1/3 dl sykur
1 msk sýróp
2 egg
1 1/2 dl hveiti
1/2 tsk salt
1 1/2 tsk vanillusykur
1 dl kakó
2 stk. stór Daim (56 g hvor pakkning), grófhakkað

Jarðaberjafrauð:

5-6 matarlímsblöð
1/2 kg jarðaber
3 eggjarauður
2 dl flórsykur
6 dl rjómi

Skraut

1 kg jarðaber

Brownie botn: Hitið ofninn í 175°. Hrærið smjör, sykur og sýróp saman þar til blandan verður ljós og létt. Hrærið eggjunum saman við. Bætið hveiti, salti, vanillusykri, kakói og grófhökkuðu Daim út í og hrærið saman. Setjið deigið í smurt smelluform sem er 24 cm í þvermál og bakið í 20 mínútur. Látið botninn kólna alveg áður en jarðaberjafrauðið er gert.

Það getur verið gott að losa um kökuna í forminu áður en jarðaberjafrauðið er sett yfir hana, til að það sé einfaldara að flytja kökuna yfir á kökudisk þegar hún er tilbúin.

Jarðaberjafrauð: Leggið matarlímsblöð í kalt vatn í 5 mínútur. Maukið jarðaber í matvinnsluvél eða með töfrasprota og leggið til hliðar. Hrærið eggjarauður og flórsykur saman þar til blandan verður ljós og létt. Léttþeytið rjómann í annarri skál. Hitið 1/10 af jarðaberjamaukinu í potti. Takið matarlímsblöðin úr vatninu, kreystið mesta vökvann frá þeim og bætið blöðunum í pottinn. Látið þau bráðna við vægan hita í jarðaberjamaukinu. Þegar matarlímsblöðin hafa bráðnað er blöndunni hrært saman við restina af jarðaberjamaukinu.

Blandið eggjablöndunni varlega saman við jarðaberjamaukið og hrærið síðan rjómanum varlega saman við þar til blandan er slétt. Hellið blöndunni yfir brownie botninn. Látið kökuna standa í að minnsta kosti 4 tíma í ísskáp áður en hún er borin fram. Það má einnig frysta kökuna og þá er hún tekin út og látin standa við stofuhita 4 tímum áður en hún er borin fram.

Setjið jarðaber yfir kökuna áður en hún er borin fram.

Frönsk súkkulaðikaka með söltum hnetum og karamellusósu

nóvember 18, 2013nóvember 18, 2013 ~ Svava ~ 5 athugasemd

Í fjarveru okkar Malínar naut Öggi þess að dekra við strákana og mér sýnist hann hafa látið um það bil allt eftir þeim. Hér var horft á hverja geimmyndina á fætur annarri, farið í Bláa lónið, kvöldmaturinn borðaður fyrir framan sjónvarpið og málaður veggur í herberginu þeirra. Yfir kvöldmatnum í gær sögðu strákarnir að þetta hefðu verið æðislegir dagar. Jú, maður þakkar!

Öggi hafði keypt kjúklingabringur til að hafa í kvöldmatinn og þar sem við áttum pestókrukku í skápnum og fetaost í ísskápnum lá beinast við að hrúga öllu saman í einn rétt. Í eftirrétt bakaði ég síðan franska súkkulaðiköku sem við hrúguðum söltum hnetum yfir og toppuðum með karamellusósu. Ljúffengari endi á vikunni var ekki hægt að fá.

Frönsk súkkulaðikaka með söltum hnetum og karamellusósu

150 g smjör
150 g suðusúkkulaði, hakkað
3 stór egg
3 dl sykur
1½ dl hveiti
½ dl kakó

Hitið ofninn í 175°. Klæðið form í stærðinni 20×20 cm með smjörpappír.

Bræðið smjör og súkkulaði saman í potti yfir lágum hita. Hrærið egg og sykur saman þar til blandan verður ljós og létt. Hrærið bræddu súkkulaðiblöndunni saman við eggjablönduna. Bætið hveiti og kakói út í og hrærið saman í slétt deig. Setjið deigið í bökunarformið og bakið í 22-25 mínútur. Kakan á að vera þétt í sér, þurrari í kanntinum og svigna í miðjunni.

Kakan er best ef hún fær að taka sig í nokkra tíma áður en hún er borin fram. Skerið hana í bita, stráið vel af söltum hnetum yfir og hellið karamellusósu yfir. Við höfðum þetta einfalt og notuðum tilbúnar karamellusósur sem við áttum í skápnum og höfum verið að nota út á ís og jafnvel laumað smáveigis af í kaffibollana þegar enginn sér. Karamellusósur gera jú flest allt aðeins betra 🙂

Bláberjate möffins

nóvember 13, 2013nóvember 13, 2013 ~ Svava ~ Skrifa athugasemd

Þegar ég kom fram í morgun blasti við mér fannhvít jörð og jólasnjór féll frá himninum. Það var engin á ferli og friðsældin var dásamleg. Þvílík fegurð. Það brá þó snögglega fyrir gleðina þegar það rifjaðist upp fyrir mér að bíllinn minn var enn á sumardekkjum. Eða kannski ekki sumardekkjum heldur heilsársdekkjum sem mér þykja ekki gera neitt gagn í hálku. Það var því ekkert spes að keyra í vinnuna í morgun og mikið var ég fegin þegar ég var komin á leiðarenda. Nú er næsta mál á dagskrá að kaupa ný dekk sem virka betur í vetrarveðrinu.

Í haust fékk Malín skyndilegan áhuga fyrir tedrykkju og skáparnir fylltust af ólíkum tesortum. Eftir að hafa horft á tepakkningarnar í nokkra daga fékk ég þá hugdettu að prófa að baka úr því. Kvöld eitt þegar rigningin dundi á gluggana og strákarnir sátu við eldhúsborðið að gera heimanámið ákvað ég að hrinda hugmyndinni í framkvæmd. Úr varð að ég bakaði möffins með bláberjatei sem ég sprautaði rjómaostakremi yfir og bauð upp á með kvöldkaffinu við miklar vinsældir. Bláberjateið fór vel með kreminu sem hafði sítrónukeim en auðvitað má skipta því út fyrir aðrar bragðtegundir. Uppskriftina er því auðvelt að leika sér með.

Bláberjate möffins (ca 12 stk)

4 dl hveiti
3 dl sykur
1 tsk lyftiduft
1 tsk matarsódi
½ tsk salt
3 tepokar af bláberjate
2 tsk sykur (til að merja teið með)
100 g smjör við stofuhita
2 dl mjólk
2 egg
1 tsk vanilludropar

Rjómaostakrem

60 g mjúkt smjör
5 dl flórsykur
1 tsk vanillusykur
rifið hýði af einni sítrónu
100 g philadelphia rjómaostur

Hitið ofninn í 175°. Myljið teið úr tepokunum með 2 tsk af sykri í mortéli. Sigtið hveiti, sykur, matarsóda, lyftiduft, temulninginn og salt í skál og bætið smjörinu og 1 dl af mjólk út í. Hærið saman í slétt deig. Hrærið því sem eftir er af mjólkinni, eggjunum og vanilludropum saman í annari skál og blandið því síðan saman við deigið. Setjið deigið í möffinsform og bakið í miðjum ofni í 12-18 mínútur (fer eftir stærð á möffinsformunum).

Hrærið öllum hráefnum í kremið saman og smakkið til með flórsykrinum. Sprautið kreminu yfir möffinsin þegar hitinn er farinn úr þeim.

Kanilsykurhúðaðir kleinuhringir

nóvember 9, 2013nóvember 9, 2013 ~ Svava ~ 6 athugasemd

Við fáum okkur oft kvöldkaffi á virkum dögum en um helgar þrái ég helgarkaffið með heimabökuðu og nýju brauði. Það er þó ekki kaffið sem ég þrái heldur sætabrauðið og þegar ég dett niður á girnilegar sætabrauðsuppskriftir þá get ég ekki hætt að hugsa um þær.

Tengdó bauð okkur í kaffi fyrir nokkru og þar sem ég hafði stuttu áður dottið niður á uppskriftina af þessum kleinuhringjum greip ég tækifærið, bakaði þá og tók með mér. Uppskriftina lofaði ég að setja á bloggið en virðist hafa gleymt því. Ég furða mig á því, sérstaklega þar sem mér þóttu kleinuhringirnir svo góðir að ég hef verið á leiðinni að baka þá aftur. Kaffigestirnir voru líka hrifnir og kleinuhringirnir voru fljótir að hverfa af borðinu.

Ég bar kleinuhringina fram heita með vanilluís (það má alltaf ganga að góðum vanilluís sem vísum í frystinum hjá tengdó) en þeir standa þó vel fyrir sínu einir og sér. Þar sem ég hafði bakað þá um morguninn hitaði ég þá aðeins í ofninum áður en ég bar þá fram síðar um daginn.

Kanilsykurhúðaðir kleinuhringir (uppskrift frá Barefoot Contessa)

1 bolli hveiti
3/4 bolli sykur
1 tsk lyftiduft
½ tsk kanill
¼ tsk múskat
¼ tsk salt
1 stórt egg
½ bolli súrmjólk
2 msk smjör, brætt
1 tsk vanilludropar

Til að húða kleinuhringina:

4 msk smjör, brætt
1/2 bolli sykur
1 tsk kanill

Hitið ofninn í 175° og spreyjið kleinuhringjabökunarform með olíu.

Sigtið hveiti, sykur, lyftiduft, kanil, múskat og salt saman í skál.

Hrærið egg, súrmjólk, brætt smjör og vanilludropa saman í annari skál. Hellið blöndunni saman við þurrefnin og hrærið saman í deig. Passið að ofhræra ekki deigið heldur bara hræra þar til það er slétt og kekkjalaust.

Setjið deigið í plastpoka og klippið smá af einu horninu. Sprautið deiginu í kleinuhringjamótið og fyllið það að þremur fjórðu með deigi. Bakið í 15-17 mínútur eða þar til bökunarprjóni stungið í kleinuhringinn kemur hreinn upp. Látið kleinuhringina kólna í forminu í 5 mínútur áður en þeim er hvolft úr.

Hrærið saman sykri og kanil til að húða kleinuhringina með og bræðið smjörið. Penslið heita kleinuhringina með bræddu smjöri og veltið þeim síðan upp úr kanilsykrinum. Berið kleinuhringina heita fram.