Ofnbökuð fetaostídýfa með kirsuberjatómötum

mars 31, 2016október 1, 2020 ~ Svava ~ 1 athugasemd

Ég viðurkenni fúslega að mér þykir ósköp ljúft að fá svona 4 daga vinnuvikur inn á milli. Páskafríið er nýbúið og strax að koma helgi aftur. Lúxus! Ég nýti hvert tækifæri sem gefst til að vera með plokkmat, eins og osta og góðar pylsur, í kvöldmat. Með góðu víni eru ostadiskar og plokkmatur með því besta sem ég veit.

Þar sem helgin nálgast óðum þá má ég til með að gefa hugmynd að æðislegri viðbót við plokkmatinn, ofnbökuð fetaostaídýfa með kirsuberjatómötum og tabaskó. Ídýfan er líka frábær sem forréttur eða í saumaklúbbinn. Uppskriftina fékk ég hjá stelpu sem vann með mér og ég hugsa alltaf hlýlega til hennar þegar ég ber þessa dásemd á borð. Einfalt og stórgott, alveg eins og ég við hafa það!

Ofnbökuð fetaostaídýfa með kirsuberjatómötum

Setjið heilan fetakubb í eldfast mót. Sáldrið smá ólífuolíu yfir og kryddið með oregano. Skerið kirsuberjatómata í tvennt og raðið yfir ostinn og í kringum hann ef það er pláss í eldfasta mótinu. Setjið að lokum smá tabaskó sósu yfir allt. Bakið við 180° í 20-30 mínútur, eða þar til ídýfan lítur vel út.

Gleðilega páska

mars 27, 2016 ~ Svava ~ Skrifa athugasemd

Heimilið fylltist af páskablómum eftir ferminguna og þær hafa verið eina páskaskrautið þetta árið. Það var nánast einum of mikið af þeim á tímabili, sama hvert maður leit þá blöstu við gul blóm. Núna þegar sjálfur páskadagur er runninn upp hafa blómin hins vegar öll sungið sitt síðasta og ég gleymdi að kaupa mér páskaegg. Það er því fátt sem minnir á páskana hér heima í dag. Ég mun þó að halda fast í þá hefð að elda lambakjöt á páskadegi, það geri ég alltaf. Ég keypti lambahrygg fyrr í vikunni sem ég á eftir að ákveða hvernig ég ætla að matreiða og ætla því að leggjast yfir uppskriftir á meðan ég narta í páskaeggið hennar Malínar.

Langaði aðallega bara að kíkja inn og óska ykkur gleðilegra páska!

Kjúklingaborgari með pækluðum rauðlauk, hraðpæklaðri gúrku og hvítlaukschilisósu

mars 26, 2016október 1, 2020 ~ Svava ~ 9 athugasemd

Páskafríið í ár hefur verið óvenju ljúft og við höfum lítið annað gert en að slappa af og borða. Við byrjuðum fríið á að bjóða mömmu og bróður mínum hingað í kjúklingaborgara sem voru bornir fram í smjörsteiktu brioche brauði, með æðislegri hvítlaukschilisósu, pækluðum rauðlauk og gúrku, avokadó og helling af kóriander. Súpergott!! Sem meðlæti djúpsteikti ég bæði venjulegar franskar og sætkartöflufranskar. Mamma sagðist aldrei hafa fengið jafn góða borgara og bróðir minn borðaði svo yfir sig að hann var enn saddur daginn eftir.

Kjúklingaborgarar (uppskrift frá Matplatsen)

4 brioche hamborgarabrauð
4 kjúklingabringur (150 g hver)
1 dl hveiti
2 tsk chilikrydd
2 tsk kúmín (ath. ekki kúmen)
1 msk paprikukrydd
1 tsk salt
1-2 egg
2-4 dl panko (japanskt rasp)
kóriander og avókadó til að bera kjúklingaborgarann fram með

Ef kjúklingabringurnar eru þykkar þá er byrjað á að skera þær í tvennt til að fá þær þynnri. Kjúklingabringurnar eru síðan barðar út t.d. með buffhamri.

Blandið hveiti og kryddum saman í grunna skál. Hrærið eggið aðeins upp og setjið í aðra skál. Setjið panko í þriðju skálina. Veltið kjúklingabringunum fyrst upp úr hveitiblöndunni, síðan egginu og að lokum panko. Djúpsteikið kjúklinginn við 160° þar til hann er gylltur og stökkur. Látið renna af honum á eldhúspappír.

Takið brioche hamborgarabrauðin í sundur og steikið í smjöri á pönnu við miðlungshita þar til þau hafa fengið fallegan lit.

Hvítlaukschilisósa:

4 hvítlauksrif
hálft lime
1 dl mæjónes
1 dl sýrður rjómi
chilisósa eftir smekk (byrjið með 2 msk og smakkið ykkur áfram)

Pressið hvítlaukinn og safann úr lime og blandið með mæjónesi og sýrðum rjóma. Bætið chilisósunni saman við að lokum eftir smekk.

Hraðpækluð gúrka:

1 agúrka
1 msk borðsedik
1 dl vatn
2 msk sykur
salt og svartur pipar

Skerið gúrkuna í þunnar sneiðar með ostaskera. Blandið borðsediki, vatni og sykur saman og smakkið til með salti og pipar. Hellið yfir gúrkuna.

Pæklaður rauðlaukur:

2 rauðlaukar
safinn úr 2 lime
1/2 dl eplaedik
salt

Skerið rauðlaukinn í þunnar sneiðar og blandið saman við hin hráefnin. Látið standa í amk 15 mínútur áður en borið fram.

Setjið hamborgarana saman með sósu, djúpsteiktum kjúklingnum, avókadó, pækluðum rauðlauk, hraðpæklaðri gúrku og helling af kóriander.

Æðisleg snickersmarengsterta og myndir úr fermingu strákanna

mars 21, 2016október 1, 2020 ~ Svava ~ 9 athugasemd

Vikurnar hafa hreinlega horfið að undanförnu en núna eru strákarnir mínir fermdir og lífið að falla í rólegra horf. Við áttum yndislegan fermingardag. Erna vinkona hjálpaði mér í undirbúningnum og viku síðar þegar hún fermdi Gumma sinn hjálpaði ég henni. Við vinkonurnar græjuðum því tvær fermingar með viku millibili! Ég var spurð hér á blogginu hvað ég ætlaði að bjóða upp á í fermingunni og ég lét það í hendur strákana að velja það. Þeir voru ekki í vandræðum með að ákveða sig, brauðtertur, kökur, osta og súkkulaðimús!

Það er óhætt að segja að ég gekk of langt hvað varðar magn veitinga og hefði getað fætt hálfan Kópavog í viku með því sem var í afgang eftir veisluna. Ég hóaði því í nágrannana og lét þá taka hluta til sín, börnin hennar Ernu mættu með brautertur og ávaxtaspjót í nesti í skólann daginn eftir og ég fór með hluta í vinnuna til mín. Þar var ég spurð hvort uppskriftin af marengskökunni væri ekki örugglega á blogginu en hún var ekki hér, heldur gaf ég hana í MAN fyrir nokkru síðan. Það er því löngu tímabært að birta hana hér á blogginu.

Snickersmarengsterta

4 eggjahvítur
2 dl sykur
1 dl púðursykur
5 dl Rice Krispies

Stífþeytið eggjahvítur, sykur og púðursykur saman. Hrærið Rice Krispies varlega saman við. Klæðið ofnplötu með bökunarpappír, setjið deigið á og mótið um 25 cm hring úr því. Bakið við 150° í 60 mínútur. Látið botninn kólna áður en kremið er sett á.

Krem:

4 eggjarauður
3 msk sykur
2 snickers (samtals 100 g)
60 g smjör

Bræðið Snickers og smjör saman við vægan hita og látið aðeins kólna. Þeytið eggjarauður og sykur saman þar til blandan er orðin ljós og létt. Hrærið öllu varlega saman og setjið kremið yfir botninn.

Yfir tertuna:

5 dl rjómi
2 snickers (samtals 100 g)
ber

Þeytið rjóma og hakkið snickers. Setjið þeytta rjómann yfir kremið og stráið hökkuðu snickersi yfir. Skreytið með berjum.

Tómatsúpan á Nordstrom café

mars 8, 2016október 1, 2020 ~ Svava ~ 3 athugasemd

Sagan segir að tómatsúpan sem fæst á kaffihúsum Nordstrom verslana í Bandaríkjunum sé stórkostlega góð. Mér hefur aldrei dottið í hug að fara á kaffihúsið þegar ég hef verið í Nordstrom, það eru svo margir aðrir matsölustaðir í Bandaríkjunum sem mér þykja meira lokkandi. En kannski hef ég verið að missa af einhverju stórkostlegu?

Nordstrom hefur gefið út matreiðslubækur og í einni þeirra leynist uppskriftin af tómatsúpunni vinsælu. Krakkarnir hættu ekki að dásama hana þegar ég prófaði uppskriftina hér heima. Grilluð ostasamloka færi vel með en hér var boðið upp á nýbakað New York Times-brauð með osti. Krakkarnir voru í skýjunum! Einfaldur, barnvænn, ódýr og góður hversdagsmatur.

Tómatsúpa

⅓ bolli ólívuolía
4 stórar gulrætur, afhýddar og skornar í teninga
1 stór laukur, sneiddur
1 msk þurrkuð basilika
3 dósir heilir tómatar
1 líter vatn
2 kjúklingateningar
½ líter rjómi
salt og pipar

Hitið ólívuolíuna yfir miðlungshita í rúmgóðum potti. Setjið gulrætur og lauk í pottinn og eldið þar til byrjar að mýkjast, um 10 mínútur, bætið þá basiliku saman við og eldið þar til grænmetið er orðið alveg mjúkt, eða um 5 mínútur til viðbótar. Bætið tómatdósunum, vatni og kjúklingateningum í pottinn og látið sjóða við vægan hita í 20-30 mínútur, eða upp til 45 mínútur ef þú hefur tíma. Setjið súpuna því næst í matvinnsluvél eða setjið töfrasprota í pottinn og maukið súpuna. Bætið rjómanum saman við og hitið aftur. Smakkið til með salti og pipar.

Tælenskur kjúklingur með kókos

mars 3, 2016október 1, 2020 ~ Svava ~ 8 athugasemd

Við Malín ætlum að eyða kvöldinu saman yfir Jane the virgin en ég sagði henni að ég yrði fyrst að fá að blogga örstutt því ég luma á svo æðislegri uppskrift. Þessi réttur getur ekki annað en vakið lukku, sósan er svo brjálæðislega bragðgóð, bæði bragðmikil og með smá sætu. Þið verðið að prófa!

Tælenskur kjúklingur með kókos

3-4 kjúklingabringur
4 dl rjómi
½ dós sýrður rjómi (má sleppa)
1 dl chilisósa
½ – 1 dl ostrusósa
1 rauð paprika
1 gul paprika
1 lítill púrrulaukur
lítill brokkólíhaus
2 tsk rifið engifer
1 tsk sambal oelek
2-3 pressuð hvítlauksrif
2 msk sojasósa
1 msk mango chutney
2 msk kókosmjöl
salt og pipar

Skerið kjúklingabringurnar í bita, saltið og piprið og steikið upp úr olíu. Takið af pönnunni.

Skerið grænmetið í strimla og snöggsteikið, kryddið með salti og pipar og setjið hvítlaukinn með á pönnuna. Bætið kjúklingnum á pönnuna ásamt öllum öðrum hráefnum fyrir utan kókos, látið hann með undir lokin. Látið sjóða við vægan hita í 20-30 mínútur, eða þar til sósan fer að þykkna. Leyfið réttinum gjarnan að standa í smá stund og hitið hann jafnvel aftur áður en hann er borin fram.

Vikumatseðill

febrúar 28, 2016október 1, 2020 ~ Svava ~ 1 athugasemd

Þá er enn ein vikan að enda og ný bíður. Sunnudagar hjá mér þýða oftast langur morgunverður, göngutúr, nýtt naglalakk, vikuinnkaup og vikumatseðill. Þetta er ekki flókið en eftir þetta getur vikan ekki annað en byrjað vel!

Vikumatseðill

Mánudagur: Lax með mango chutney og pistasíuhnetum

Þriðjudagur: Parmesanbuff í rjómasósu

Miðvikudagur: Pulsu- og makkarónuskúffa

Fimmtudagur: Tacos með rauðum linsubaunum

Föstudagur: Tortellini í brúnuðu salvíusmjöri

Með helgarkaffinu: Nutellakökur

Himneskar humarvefjur

febrúar 25, 2016október 1, 2020 ~ Svava ~ 1 athugasemd

Ég sá athugasemdir varðandi bollamálin í möffinsuppskriftinni góðu. Það er lítið mál að breyta bollamáli yfir í dl, 1 bolli er 2,3-2,4 dl. Ég mæli þó hiklaust með að fjárfesta í bollamálum, þau kosta nokkra hundraðkalla og koma oft að góðum notkum.

Mér datt í hug að setja inn uppskrift fyrir helgina, sem er í sjálfu sér engin nákvæm uppskrift heldur kannski frekar hugmynd að helgarmat, himneskar humarvefjur. Ég hef boðið upp á þær í forrétt þegar ég er með matarboð en einnig sem léttan kvöldverð með hvítvínsglasi. Þetta hittir alltaf í mark!

Himneskar humarvefjur

franskbrauð
íslenskt smjör
hvítlaukur, pressaður
fersk steinselja, hökkuð
skelflettur humar

Hitið ofn í 180°. Bræðið smjör, hvítlauk og steinselju saman. Skerið skorpuna af brauðsneiðunum, veltið hverri brauðsneið upp úr bræddu smjörblöndunni og fletjið síðan brauðsneiðarnar út með kökukefli. Setjið humar í hverja brauðsneið og rúllið þeim svo upp. Setjið í eldfast mót og inn í ofn í 8 mínútur.

Mér þykir gott að bera humarvefjurnar fram með ruccolasalati, smá balsamikgljáa og aioli eða hvítlaukssósu. Gott hvítvínsglas fullkomnar svo máltíðina.

Fullkomnar súkkulaðimöffins með súkkulaðibitum

febrúar 20, 2016október 1, 2020 ~ Svava ~ 5 athugasemd

Í vikunni bakaði ég möffins til að eiga með kaffinu. Ég veit ekki hvernig mér datt í hug að þær myndu jafnvel fá að liggja óhreyfðar fram að helginni en það fór auðvitað eins og það fór, og alls ekki eins og ég hafði hugsað mér. Ég hætti ekki að furða mig á því hvað unglinsstrákar geta borðað mikið! Möffinsin kláruðust samdægurs, að sjálfsögðu. Fyrst borðuðum við þau nýkomnin úr ofninum og þá voru súkkulaðibitarnir bráðnaðir í heitum möffinsunum, klikkaðslega gott. Síðan um kvöldið voru súkkulaðibitarnir harðnaðir í þeim og gáfu stökkt kröns í mjúkt möffinsið, líka alveg brjálæðislega gott.

Næst mun ég sýna fyrirhyggju og taka hluta af þeim frá. Það má t.d. frysta möffinsin. Það getur verið gott að eiga þau í frystinum þegar gesti ber að garði eða möffinslönguninn grípur mann. Þá er bara að hita eitt í örbylgjuofninum í 30-45 sek og það er eins og þú hafir verið að taka það úr ofninum.

Fullkomnar súkkulaðibitamöffins með súkkulaðibitum (uppskriftin gefur 12 ágætlega stór möffins)

2/3 bolli kakó
1 3/4 bolli hveiti
1 1/4 bolli púðursykur
1 tsk matarsódi
3/4 tsk salt
1 tsk instant kaffi
1 1/2 bolli grófhakkað suðusúkkulaði
2 stór egg
3/4 bolli mjólk
2 tsk hvítvíns edik
2 tsk vanilludropar
1/2 bolli smjör, brætt

Hitið ofninn í 175° og takið fram möffinsform. Ég set formin í möffinsmót, þá halda þau löguninni betur. Þessu má þó sleppa.

Hrærið þurrefnum saman (hveiti, sykri, matarsóda, salti og kaffi).

Grófhakkið súkkulaðið.

Hrærið súkkulaðibitum saman við þurrefnin og leggið til hliðar.

Hrærið eggjum, mjólk, ediki og vanilludropum saman.

Bræðið smjörið.Hrærið eggjablöndunni saman við þurrefnin og hrærið síðan bræddu smjörinu saman við þar til allt hefur blandast vel. Notið skeið og setjið deigið í möffinsformin, fyllið þau að 3/4.

Bakið í 20-15 mínútur, eða þar til prjóni stungið í möffinsin kemur hreinn upp.

Ofnbökuð svínalund með rótargrænmeti – allt í einni skúffu!

febrúar 17, 2016október 1, 2020 ~ Svava ~ 2 athugasemd

Ég hef undanfarna daga verið löt í eldhúsinu. Hef lítið nennt að hafa fyrir kvöldmatnum og viljað hafa hann eins einfaldan og hægt er. Það geta komið svona dagar, en núna finn ég hins vegar að þetta tímabil er yfirstaðið og núna vantar mig fleiri máltíðir í daginn til að komast yfir að elda allt sem mig langar að prófa.

Í letikastinu eldaði ég þennan ofureinfalda rétt þar sem allt fór í einni ofnskúffu inn í ofn. Það er eitthvað við svona rétti þar sem allt fer í eina skúffu og verður tilbúið á sama tíma. Kjötið verður svo mjúkt og rótargrænmetið fær gott bragð af kjötmarineringunni. Meðlætið þarf ekki að vera flókið. Ég var meira að segja svo löt að ég opnaði bara kalda hvítlaukssósu og hrópaði gjörið svo vel! Ekkert frekara meðlæti þurfti en vissulega væri smart að bera salat fram með réttinum og góða heita sósu. Eða tzatziki og grískt salat. En á letidögum þarf ekkert slíkt og hér voru allir kampakátir með einfaldleikann.

Ofnbökuð svínalund með rótargrænmeti – allt í einni skúffu!

1 svínalund
1/2 dl ólivuolía
2 msk sítrónusafi
1 hvítlauksrif
1 tsk timjan
maldonsalt
svartur pipar úr kvörn
rótargrænmeti (ég var með kartöflur og sætar kartöflur)

Marinerið svínalundina í ólivuolíu, sítrónusafa, pressuðum hvítlauk, timjan, salti og pipar. Látið liggja í 20 mínútur eða á meðan rótargrænmetið er undirbúið og ofninn hitaður. Hitið ofninn í 200°. Skerið rótargrænmetið í báta/bita og setjið í ofnskúfu, veltið því upp úr ólívuolíu og kryddið eftir smekk (ég notaði maldon salt, pipar og timjan). Setjið inn í ofn í 15 mínútur. Á meðan er svínalundin brúnuð á pönnu við háan hita, á öllum hliðum. Bætið svínalundinni í ofnskúffuna og hellið því sem eftir var af marineringunni yfir og bakið áfram í 20 mínútur. Leyfið kjötinu að standa aðeins áður en það er skorið í sneiðar.