Pasta carbonara

október 15, 2013 ~ Svava ~ Skrifa athugasemd

Ég ætla að eyða kvöldinu í saumaklúbbi með vinkonum mínum en áður en ég ríf mig af stað ætla ég að gefa ykkur æðislega uppskrift að pasta carbonara. Ég hef ekki tölu á hversu margar uppskriftir af pasta carbonara ég hef prófað og í síðustu viku prófaði ég enn eina uppskriftina. Í þetta sinn held ég að ég hafi hitti á þá réttu og að leit mín að hinni fullkomnu carbonara uppskrift sé þar með lokið.

Það er ekki hægt annað en að elska þennan rétt. Hann er svo æðislega góður og það tekur enga stund að útbúa hann sem getur hentað vel í amstri dagsins. Þar sem við erum svo sannarlega ekki á kolvetnasnauðu fæði þá fengum við okkur hvítlauksbrauð með. Svo ólýsanlega gott.

Pasta Carbonara (uppskrift frá The pioneer woman)

350 g pasta (hvaða tegund sem er, ég var með spaghetti)
300 g beikon, skorið smátt
1/2 laukur, hakkaður
2 hvítlauksrif, hökkuð
3 egg
3/4 bolli fínrifinn Parmesan
3/4 bolli rjómi
Salt og vel af svörtum pipar

Sjóðið pasta samkvæmt leiðbeiningum á pakkningu.

Á meðan pastað sýður er beikonið steikt þar til það byrjar að verða stökkt. Takið beikonið af pönnunni og setjið það á eldhúspappír. Hellið fitunni af pönnunni en skolið hana ekki. Setjið pönnuna aftur á helluna, lækkið hitann í miðlungslágann (ég nota stillingu 3 af 9) og steikið lauk og hvítlauk þar til mjúkt og komið með gylltan lit. Leggið til hliðar.

Hrærið saman eggjum, fínrifnum parmesan, rjóma, salti og pipar í skál og leggið til hliðar.

Þegar pastað er tilbúið er vatninu hellt af (geymið þó 1-2 dl af pastavatninu) og pastað sett aftur í pottinn. Hellið parmesaneggjablöndunni hægt út í og hrærið stöðugt í pastanu á meðan. Sósan á að hjúpa pastað. Hrærið smá af pastavatninu saman við. Bætið beikoninu og lauknum saman við og hrærið öllu saman. Berið fram með ferskum parmesan og meira af pipar.

Hvítlauksbrauðið var einfalt; Heimilisbrauð steikt upp úr miklu smjöri og kryddað með hvítlaukssalti.

Vikumatseðill

október 13, 2013október 13, 2013 ~ Svava ~ 6 athugasemd

Mér þykir alltaf jafn skrítið hvað helgarnar, og vikurnar ef út í það er farið, líða hratt. Áður en maður veit af er vikan liðin og ný tekin við. Ég kvarta ekki, ég kann ekkert síður við virku dagana en helgarnar. Rútínan á vel við mig.

Ég er vön að skrifa skrifa lista yfir það sem ég þarf að gera og muna. Mér finnst ég þurfa þess til að fá yfirsýn yfir hlutina og til að gleyma þeim ekki. Til að plana og skipulegg vikurnar. Þessa dagana er jólagjafalistinn sá sem fær mesta athygli, ég skrifa niður þegar mér dettur sniðug jólagjöf í hug. Og svo skrifa ég alltaf matseðil fyrir hverja viku. Það er eflaust uppáhalds listinn minn og sá sem ég legg mestu vinnuna í. Þá fer ég í gegnum það sem ég á í ísskápnum og frystinum og skoða síðan uppskriftir út frá því. Þetta hef ég gert í fjölda mörg ár og finnst það bæði spara tíma og pening að gera stórinnkaup einu sinni í viku.

Mér datt í hug að deila með ykkur hugmynd að vikumatseðli. Ég vona síðan að þið eigið góða viku framundan.

Mánudagur: Fiskur með beikoni og eggjasósu. Ég byrja vikuna yfirleitt á fiski og þessi fiskréttur er bæði einfaldur og góður. Ekki skemmir fyrir hvað krakkarnir eru hrifin af honum.

Þriðjudagur: Pastagratin fellur yfirleitt í góðan jarðveg hér heima. Uppskriftin er drjúg og mér þykir gott að taka afganginn með mér í nesti daginn eftir.

Miðvikudagur: Blómkálssúpa. Ég hef oft súpur í matinn á miðvikudögum. Með súpunni ber ég ýmist fram heimabakað brauð eða baguette sem ég kaupi frosin í matvörubúðinni og hita upp rétt áður en ég ber súpuna framm.

Fimmtudagur: Þunnbrauðsvefja með pylsum og kartöflumús. Á fimmtudögum gerum við stórhreingerningu hér heima fyrir helgina og þá höfum við oftast eitthvað fljótlegt í matinn.

Föstudagur: Mexíkópizza. Það hefur engin pizza náð að slá þessa út. Ég hvet ykkur til að prófa!

Krabbelurer

október 13, 2013október 13, 2013 ~ Svava ~ 3 athugasemd

Ég hef rekist ítrekað á uppskriftir af því sem svíar kalla krabbelurer upp á síðkastið. Krabbelurer eru klattar sem mætti segja að séu á milli þess að vera pönnukökur og kleinuhringir. Deigið er steikt á pönnu upp úr smjöri og að því loknu velt upp úr sykri og borðað með þeyttum rjóma og sultu. Hljómar vel, ekki satt?

Svíarnir bera þetta óhikandi á borð sem morgunverð og sælkerinn sem ég er þá ákvað ég að gera slíkt hið sama í morgun. Við byrjuðum þó morgunverðinn á eggjahræru og Finn Crisp og að því loknu fengum við okkur krabbelurer. Æðislega gott.

Krabbelurer

1 egg
5 msk sykur
2,5 dl hveiti
1 tsk lyftiduft
1 tsk vanillusykur
3/4 dl mjólk
smjör til að steikja úr
sykur til að velta upp úr

Hrærið egg og sykur þar til blandan er létt. Bætið þurrefnum og mjólk saman við og hrærið deigið slétt.

Steikið á pönnu við miðlungshita upp úr vel af smjöri í um 3 mínútur á hvorri hlið (seinni hliðin gæti þurft styttri tíma). Veltið upp úr sykri. Berið fram með sultu og jafnvel þeyttum rjóma.

Hnetusmjörs- og bananapönnukökur með Nutellasýrópi

október 10, 2013október 10, 2013 ~ Svava ~ 7 athugasemd

Nú leið langur tími á milli færslna hjá mér og mig langar að þakka ykkur sem hafið sent mér línur út af því. Það hlýjar mér að þið hugsið til mín og ég skil að þið veltið því fyrir ykkur hvort ég sé hætt að blogga en svo er nú ekki. Ég tók mér bara smá frí.

Nú stóð ekki til að taka svona langt hlé frá blogginu heldur gerðist það bara ósjálfrátt. Ég komst þó að því að bloggið á eina svakalega grúppíu, Ögga! Hann hefur reynt hvað hann getur að fá mig til að setjast við tölvuna og skrifa ykkur línur og upplýsti mig reglulega um hversu margir dagar væru liðnir frá síðustu færslu. Hann var ekki að ná þessu bloggfríi og á hrós skilið fyrir alla þá hvatningu sem hann gefur mér. Hann verður því eflaust mjög glaður þegar hann lítur hingað inn núna 🙂

Ég hef oft skrifað um hvað mér þykir gaman að vera með góðan morgunverð um helgar. Mér þykir fátt jafnast á við að byrja daginn í eldhúsinu og setjast svo saman niður yfir löngum morgunverði. Kotasælupönnukökurnar eru orðinn fastur liður á morgunverðarborðinu okkar um helgar en um daginn prófaði ég nýjar pönnukökur, hnetusmjörs- og bananapönnukökur með Nutellasýrópi. Þær vöktu rífandi lukku og verða klárlega oftar á borðum hjá okkur. Ég mæli með að þið prófið!

Hnetusmjörs- og bananapönnukökur með Nutellasýrópi

Pönnukökur:

· 1 bolli hveiti

· 1 tsk matarsódi

· ¼ tsk salt

· 3 msk sykur

· 1 ½ bolli súrmjólk

· 1 stórt egg

· ½ tsk vanillusdropar

· ½ bolli hnetusmjör

· 1 banani, skorinn í litla bita

Setjið hveiti, matarsóda, salt, sykur, súrmjólk, egg, vanilludropa og hnetusmjör í skál og hrærið þar til hráefnin hafa blandast vel. Bætið bananabitunum út í og hrærið þeim varlega saman við deigið.

Steikið pönnukökurnar á miðlungsheitri pönnu.

Nutella sýróp

· ½ bolli ósaltað smjör

· ½ bolli sykur

· ½ bolli mjólk

· ½ tsk matarsódi

· ½ tsk vanilludropar

· ¼ bolli Nutella

Setjið smjör, sykur og mjólk í pott og hitið yfir miðlungsháum hita. Hrærið í pottinum þar til hráefnin hafa bráðnað saman. Þegar byrjar að sjóða er hitinn lækkaður og matarsóda og vanilludropum hrært saman við. Sýrópið mun bullsjóða og lyftast við þetta. Takið pottinn af hitanum og hrærið Nutella saman við þar til það hefur bráðnað. Berið sýrópið fram með pönnukökunum og ef það verður afgangur þá er kjörið að eiga hann út á ís eða til að dýfa jarðaberjum í.

Sloppy Tacos

september 8, 2013september 8, 2013 ~ Svava ~ 2 athugasemd

Ég var svo lánsöm að fá þessa glæsilegu bók eftir Steingrím Sigurgeirsson senda frá Forlaginu. Bókin kom í verslanir á fimmtudaginn og ætti að vera til á hverju heimili. Hún er stútfull af fróðleik um vín og gaman að blaða í henni. Bókin mun klárlega liggja á sófaborðinu hjá okkur til að grípa í á næstunni. Kærar þakkir og hamingjuóskir til Forlagsins og Steingríms með bókina.

Við áttum rólega og góða helgi. Planið var að fara í útgáfuteiti MAN magasíns á föstudagskvöldinu en þegar til kastanna kom hætti ég við. Gunnar var á fimleikaæfingu, Malín á leið á skólaball og Öggi og Gunnar á leið í Hörpu á tónleika seinna um kvöldið. Það að eyða kvöldinu heima með Jakobi lokkaði meira en allt annað og við enduðum á að baka okkur pizzu og eiga notalegt föstudagskvöld saman.

Fyrir helgi datt nýjasta Bon Appétit inn um lúguna og ég ákvað að prófa fyrstu uppskriftina í gærkvöldi. Valið féll á Sloppy Tacos og það er óhætt að segja að engin varð svikinn af því vali. Stórgóður réttur sem mun verða á borðum hér oftar. Ekta föstudagsmatur!

Sloppy Tacos (uppskrift úr Bon Appétit)

Límónu sýrður rjómi:

1 bolli sýrður rjómi
1 msk fínrifið límónuhýði (lime)
¼ bolli ferskur límónusafi
2 msk hakkað ferskt kóríander
1 msk hrísgrjónaedik (rice vinegar)
Gróft salt

Setjið öll hráefnin í skál og hrærið þeim saman. Smakkið til með salti. Setjið plastfilmu yfir skálina og geymið í kæli í að minnsta kosti 1 klst. eða upp í 1 sólarhring.

Fylling og samsetning:

2 msk ólívuolía
900 g nautahakk
1 laukur, hakkaður
6 hvítlauksrif, fínhökkuð
1 dós heilir tómatar (400 g)
1 flaska Heinz chilisósa
¼ bolli Worcestersósa
3 msk chiliduft (ég notaði 2 msk af sterku mexíkósku chilidufti)
1 msk hvítlauksduft (ath. ekki hvítlaukssalt!)
1 msk laukduft
1 msk púðursykur
1 msk cumin
12 stökkar tacoskeljar, hitaðar
rifinn cheddar ostur
iceberg
ferskt salsa
ferskt kóriander
lime bátar

Hitið 1 msk af ólívuolíu á pönnu yfir miðlungsháum hita. Setjið nautahakkið á pönnuna og steikið þar til allt hakkið er steikt, um 5 mínútur. Takið af pönnunni og leggið til hliðar.

Bætið 1 msk af ólívuolíu á pönnuna og setjið lauk og hvítlauk á hana. Steikið laukana þar til þeir byrja að brúnast, um 5 mínútur. Passið að hafa ekki of mikinn hita á pönnunni.

Hitið ofn í 200°.

Bætið tómötum á pönnunna og brjótið þá í sundur. Látið sjóða við vægan hita í 8-10 mínútur, eða þar til sósan byrjar að þykkna. Bætið nautahakki, chilisósu, Worcestersósu, chilidufti, hvítlauksdufti, laukdufti, púðursykri og cumin á pönnuna og blandið öllu vel saman. Látið sjóða í 10-12 mínútur við vægan hita og hrærið reglulega í.

Setjið fyllinguna í eldfast mót (sirka 20×30 cm) og bakið i ofninum í 30-40 mínútur.

Berið fyllinguna fram í heitum tacoskeljum með rifnum cheddar osti, iceberg, salsa, kóríander, límónu sýrðum rjóma og límónubátum.

New York Times súkkulaðibitakökur

september 4, 2013september 4, 2013 ~ Svava ~ 4 athugasemd

Skrýtið hvernig lífið breytist alltaf á haustin. Það er eins og allt fari í gang með einum hvelli. Skólarnir og tómstundirnar byrja hjá krökkunum, saumaklúbbar vakna til lífs eftir sumarið og áður en maður veit af eru vikurnar uppbókaðar og næstum tvær vikur liðnar á milli bloggfærslna. Líf og fjör sem gerir haustið svo skemmtilegt.

Við fórum vel inn í haustrútínuna. Helgina áður en skólinn byrjaði gerði ég súkkulaðibitakökudeig sem við nutum góðs af á hverju kvöldi fyrstu skólavikuna. Uppskriftin af kökunum, sem ber það mikla nafn The New York Times Best Chocolate Chip Cookie Recipe, var fyrst birt í blaðinu sumarið 2008 og hefur síðan þá farið sem stormsveipur um internetið. Þessar kökur hafa orðstýr í bloggheimum um að vera ómótstæðilegar og ég get lofað að það er hverju orði sannara.

Uppskriftin er svakalega stór og þeir skynsömu myndu eflaust helminga hana. Ég gerði það þó ekki, enda hefur aldrei vottað fyrir skynsemi hjá mér þegar kemur að sætindum, heldur naut þess að eiga deigið í ískápnum og baka nokkrar kökur á hverju kvöldi í tæpa viku. Það var góð vika. Okkur hlakkaði öllum til að setjast niður á kvöldin með kalda mjólk og nýbakaðar kökurnar og það var ákveðin sorg sem fylgdi því þegar deigið á endanum kláraðist.

New York Times súkkulaðibitakökur

2 bollar mínus 2 msk hveiti
1 1/3 bolli brauðhveiti (ef þú átt það ekki notar þú venjulegt hveiti)
1 1/4 tsk matarsódi
1 1/2 tsk lyftiduft
1 1/2 tsk gróft salt
1 1/4 bolli ósaltað smjör
1 1/4 bolli ljós púðursykur
1 bolli plús 2 msk sykur
2 egg
2 tsk vanilludropar
560 g dökkir súkkulaðibitar

sjávarsalt eða gróft salt til að strá yfir kökurnar

Aðferð:

Sigtið hveiti, matarsóda, lyftiduft og salt saman í skál og leggið til hliðar.
Setjið smjör og sykur í hrærivélaskál og hrærið saman i um 5 mínútur eða þar til blandan verður mjúk og kremkennd.
Hrærið eggjunum saman við, einu í einu, og hrærið vel á milli.
Bætið vanilludropum út í deigið.
Stillið hrærivélina á hægan hraða, bætið þurrefnunum í deigið og hrærið þar til hráefnin hafa blandast saman. Passið að ofhræra ekki deigið, það ætti að duga að hræra það í 5-10 sekúndur.
Bætið súkkulaðibitunum varlega í deigið.
Setjið deigið í plastfilmu og geymið í ískáp í 48 klst (eða að minnsta kosti 24 klst. Það má geyma það í allt að 72 klst. en ég geymdi það aðeins lengur).
Þegar það á að baka kökurnar er ofninn hitaður í 175°. Setjið bökunarpappír á bökunarplötu og mótið kúlur úr deiginu á stærð við golfkúlu. Setjið deigkúlurnar á bökunarplötuna (passið að hafa gott bil á milli því þær renna út) og stráið salti yfir.
Bakið kökurnar í 18-20 mínútur eða þar til þær eru gylltar á lit en mjúkar. Látið kökurnar kólna á grind í 10 mínútur.

Pizza með karamelliseruðum lauk og pipruðu beikoni

ágúst 22, 2013ágúst 22, 2013 ~ Svava ~ 8 athugasemd

Það er tvennt sem ég er ákveðin í að gera í dag. Ég ætla að gefa ykkur uppskrift að brjálæðislega góðri pizzu og síðan ætla ég að setjast niður og svara tölvupóstum og spurningum sem ég hef fengið frá ykkur í vikunni. Ég vona að þið fyrirgefið seinaganginn. Mér þykir svo gaman að heyra frá ykkur en næ ekki alltaf að svara strax.

Um síðustu helgi breytti ég út af vananum og bauð upp á föstudagspizzuna í nýrri útfærslu. Eða bæði og, ég prófaði að gera pizzu með karamelliseruðum lauk og pipruðu beikoni en til vonar og vara gerði ég líka hefðbundna pizzu.

Ég hefði betur sleppt varaskeifunni því nýja pizzan reyndist ólýsanlega góð. Svo góð að ég sá eftir að hafa bara gert tvær því þær hreinlega hurfu af borðinu. Sætur laukurinn og salt beikonið passa stórkostlega vel saman og osturinn fullkomnar veisluna.

Ég held að það gæti verið gaman að bjóða upp á pizzuna sem forrétt og bera hana þá fram með ísköldum bjór í flöskum. Ég er sjálf ekki mikið fyrir bjór en grunar að hann færi vel með pizzunni. Það er kannski eitthvað til að prófa um helgina?

Pizza með karamelliseruðum lauk og pipruðu beikoni

8 þykkar beikonsneiðar, skornar í bita
2 msk ósaltað smjör
2 laukar, skornir í þunnar sneiðar
¼ tsk salt
1 msk púðursykur
2 hvítlauksrif, fínhökkuð
1 tsk ferskmalaður pipar
350 g óðalsostur, rifinn (ég mæli sérstaklega með honum, hann passar svo vel á pizzuna)

Hitið pönnu yfir miðlungsháum hita og steikið beikonið svo að fitan byrjar að renna af því og beikonið er aðeins byrjað að steikjast. Það á eftir að klára steikinguna í ofninum. Færið beikonið af pönnunni yfir á disk þaktan eldhúspappír og myljið pipar yfir. Látið fituna vera áfram á pönnunni, lækkið hitan í lágann hita og bætið smjöri saman við. Þegar smjörið er bráðnað er laukurinn settur á pönnuna ásamt salti. Setjið lok yfir og eldið við vægan hita í klukkustund, en hrærið í lauknum á 10 mínútuna fresti. Eftir klukkustund er púðursykri bætt á pönnuna og látið krauma áfram undir loki í 15 mínútur. Hrærið hvítlauk saman við og takið af hitanum. Færið laukinn yfir í skál og leggið til hliðar.

Fletjið pizzubotnana út og stráið helmingnum af ostinum yfir þá. Setjið laukinn yfir ostinn og þar á eftir beikonið. Endið á að setja ost yfir og bakið við 180° í 30-35 mínútur, eða þar til botninn er gylltur og osturinn bránaður og kominn með fallegan lit.

Bananakaka með súkkulaði og hnetusmjöri

ágúst 17, 2013ágúst 17, 2013 ~ Svava ~ 3 athugasemd

Síðasta helgin fyrir skólasetningu er runnin upp og haustið framundan. Mér þykir þetta einn af bestu tímum ársins, hálfgerð áramót þegar allt byrjar upp á nýtt. Best þykir mér þó að allt fer í rútínu á ný. Ég er svo mikil rútínumanneskja að það nær engri átt.

Við ætlum að njóta þessarar síðustu helgar sumarfrísins hjá krökkunum. Við fórum út að borða saman í gærkvöldi og í dag liggur leiðin í bókabúðirnar að kaupa skóladót. Öggi mun þeyta skífum í brúðkaupi í kvöld og við Malín ætlum að nýta kvöldið í að merkja skólabækurnar og horfa á stelpumynd.

Áður en dagurinn fer í gang hér á heimilinu nýti ég tímann í að blogga því mig langar svo að gefa ykkur uppskriftina af þessari ljúffengu bananaköku með súkkulaðibitum sem ég baka reglulega og fer afskaplega vel með helgarkaffinu. Kakan er fjölskylduvæn og fellur í kramið hjá öllum aldurshópum. Hún endist ekki lengi á borðinu, enda svo sem ekki ætluð upp á punt.

Bananakaka með súkkulaði og hnetusmjöri

5 dl hveiti
3/4 tsk matarsódi
½ tsk salt
3 þroskaðir bananar
1 dl hnetusmjör
1 ¼ dl sykur
1 dl púðursykur
3/4 dl súrmjólk
75 g brætt smjör
2 egg
100 g hakkað suðusúkkulaði (eða það súkkulaði sem þú velur)

Hitið ofninn í 175°. Smyrjið formkökuform og klæðið með bökunarpappír.

Blandið hveiti, matarsóda og salti saman í skál. Stappið bananana í annarri skál og blandið hnetusmjöri, sykri , súrmjólk, smjöri og eggjum saman við þá. Hrærið blöndunni saman í kekkjalaust deig. Bætið þurrefnunum saman við og hrærið saman þar til deigið er slétt. Hrærið að lokum súkkulaðibitunum í deigið.

Setjið deigið í formið og bakið í miðjum ofni í um 60 mínútur, eða þar til prjóni stungið í kökuna kemur þurr upp.

Súkkulaðipavlova með mascarponerjómakremi, Maltesers, Daim, ristuðum pekanhnetum, og súkkulaðisósu

ágúst 15, 2013ágúst 15, 2013 ~ Svava ~ 26 athugasemd

Ég hef fengið fyrirspurnir um uppskriftina að þessari dásemd sem ég birti mynd af hér á blogginu í júní. Það er tvennt sem ég bara skil ekki, hvernig gat ég gleymt að setja inn uppskriftina og hvernig gat sumarið liðið svona fljótt? Mér finnst eins og ég hafi bakað kökuna síðast í gær.

Mér þykir þessi pavlova hafa allt og vera draumi líkast. Hún er svo góð og hráefnin passa svo fullkomlega saman. Það er varla hægt að lýsa því en kakan er svo mikil súkkulaðisæla að hún gerir alla glaða og lífið örlítið betra.

Til að flýta fyrir er kjörið að baka botnana kvöldið áður en það á að bera kökuna fram. Setjið hana síðan saman samdægurs og geymið í ískáp þar til veislan hefst. Það eiga allir eftir að falla í stafi við fyrsta bita – ég lofa!

Súkkulaðipavlova með mascarponerjómakremi, Maltesers, Daim, ristuðum pekanhnetum og súkkulaðisósu (uppskrift frá Lindu Lomelino)

Súkkulaðimarensbottnar:

50 g dökkt súkkulaði (70%)
6 stórar eggjahvítur
3 dl sykur
3 msk kakó
1 msk maizena mjöl
1 tsk hvítvínsedik

Mascarponekrem:

250 g mascarpone ostur
2-3 msk sykur
5 dl rjómi
2 msk espresso

Fylling:

Maltesers
Daimkúlur
Ristaðar pekanhnetur (ristaðar í 175° heitum ofni í 5 mínútur)

Súkkulaðisósa:

3/4 dl sykur
1 dl sterkt kaffi
3 msk kakó

Súkkulaðimarensbottnar

Brjótið súkkulaðið í bita og bræðið það varlega yfir vatnsbaði eða í örbylgjuofni. Látið kólna.

Hitið ofninn í 175°. Teiknið tvo eða þrjá hringi sem eru um 15 cm í þvermál á bökunarpappír. Staðsetjið þá eins langt frá hvor öðrum og mögulegt er. Snúið bökunarpappírnum við og leggið hann á ofnplötu.

Þeytið eggjahvíturnar þar til þær byrja að mynda froðu og bætið þá sykrinum smátt og smátt saman við. Þeytið áfram þar til blandan er orðin stífþeytt. Það á að vera hægt að halda skálinni á hvolfi án þess að marensdeigið renni úr henni. Sigtið kakó og maizenamjöl út í deigið, bætið hvítvínsediki saman við og blandið öllu vel saman. Hrærið að lokum bræddu súkkulaðinu gróflega í marensdeigið.

Skiptið marensdeiginu jafnt á hringina á bökunarpappírnum. Botnarnir eiga eftir að renna aðeins út þegar þeir bakast. Setjið marensinn í ofninn og lækkið hitann í 125°. Bakið marensinn í 60-75 mínútur. Botnarnir eiga að vera harðir og stökkir við kantana en seigir í miðjunni. Slökkvið á ofninum en látið botnana vera áfram á eftirhitanum í honum, með ofnhurðina hálfopna þar til ofninn er orðinn kaldur.

Mascarponekrem:

Hrærið mascarponeostinn og sykurinn saman þar til blandan verður mjúk og kremkennd. Bætið rjómanum saman við og þeytið þar til blandan þykknar. Bætið espresso saman við og þeytið áfram þar til það hefur blandast saman við kremið.

Súkkulaðisósa:

Blandið öllu saman í pott og látið suðuna koma upp. Sjóðið í 3-5 mínútur eða þar til sósan hefur tekið að þykkna aðeins. Látið kólna.

Setja kökuna saman:

Leggið fyrsta botninn varlega á kökudisk og smyrjið helmingnum af mascarponekreminu yfir. Stráið grófhökkuðu maltesers, daimkúlum og ristuðum pekanhnetum yfir. Leggið seinni botninn yfir og smyrjið því sem eftir er af mascarponekreminu yfir. Skreytið með maltesers, daimkúlum, pekanhnetum og súkkulaðisósu. Látið tertuna gjarnan standa í ískáp í að minnsta kosti klukkutíma áður en hún er borin fram.

Gúllas með sólþurrkuðum tómötum

ágúst 13, 2013ágúst 13, 2013 ~ Svava ~ 12 athugasemd

Mamma keypti hluta úr nauti beint frá býli í vor og gaf okkur… ja eflaust bróðurpartinn af því. Ég hef aldrei smakkað jafn gott kjöt og hef legið á því eins og ormur á gulli.

Um daginn datt ég niður á uppskrift af gúllas sem vakti áhuga minn, þó aðallega vegna þess að í henni voru sólþurrkaðir tómatar og bjór. Ég ákvað að uppskriftin væri nógu spennandi til að splæsa gúllasbitunum frá mömmu í hana.

Ég byrjaði eldamennskuna um leið og ég kom heim úr vinnunni því ég hafði tekið eftir að rétturinn ætti að sjóða við vægan hita í tvo tíma áður en gulrótum og kartöflum væri bætt út í og þá soðið áfram í hálftíma. Það er því óhætt að segja að rétturinn er ekki reiddur fram í snatri.

Ég verð að viðurkenna að þegar ég var búin að brúna kjötið, laukinn og hvítlaukinn og hellti því næst bjórnum á pönnuna féllu á mig tvær grímur. Mér leist ekkert á þetta lengur en það var ekki aftur snúið úr þessu. Það var ekki fyrr en kjötkrafturinn, sólþurrkuðu tómatarnir og kryddin voru komin út í, byrjað að sjóða og dásamlegur ilmur tók að berast frá pottinum að ég andaði léttar. Það lék engin vafi á að þetta yrði gott.

Þó að eldunartíminn sé langur þá fer ekki mikill tími í að útbúa réttinn. Aðalatriðið er að byrja nógu snemma og síðan er hægt að dunda sér við önnur störf á meðan rétturinn sýður við vægan hita á pönnunni.

Ég bar nýbakað New York-times brauð fram með réttinum. Ég mæli með því. Stökk skorpan og mjúkt brauðið fer vel með gúllasinu og ég get lofað að þú átt ekki eftir að geta hætt að dýfa brauðinu í sósuna. Notalegur og góður matur, sérstaklega núna þegar fer að hausta.

Gúllas með sólþurrkuðum tómötum

um 900 g nautagúllas
2 msk ólívuolía
1 laukur, hakkaður
4 hvítlauksrif, fínhökkuð
1 litil bjórdós (33 cl.). Ég var með Víking.
2 msk Worcester sósa
4 bollar vatn
2 nautateningar
1 grænmetisteningur
½ bolli sólþurrkaðir tómatar, hakkaðir
½ tsk salt
½-1 tsk paprika
½ msk dijon sinnep
rauðar kartöflur, skornar í fernt
gulrætur, skornar í sneiðar

Hitið ólívuolíu í stórum potti eða djúpri pönnu og brúnið kjötið á öllum hliðum. Færið kjötið yfir á hreinan disk og setjið lauk og hvítlauk í pottinn. Þegar laukurinn er orðinn mjúkur er bjórnum hellt yfir. Hrærið í pottinum þannig að krafturinn á botninum blandist í vökvann. Bætið Worcester sósu, vatni, krafti, sólþurrkuðum tómötum, salti, papriku og sinnepi í pottin og látið suðuna koma upp. Bætið kjötbitunum í pottinn og lækkið hitann í væga suðu. Látið lokið á pottinn og látið sjóða við vægan hita í 2 klukkustundir. Bætið þá kartöflum og gulrótum í pottinn og látið sjóða í 30 mínútur til viðbótar. Rétt áður en rétturinn er borinn fram er tekinn 1 bolli af vökva úr pottinum, hrært 2 msk af hveiti saman við og hrært aftur út í pottinn. Þetta er gert til að þykkja sósuna. Berið réttinn fram með góðu brauði með grófri skorpu.