Puy linsurósmarín og hvítlaukssúpa

~ Svava ~ 3 athugasemd

Það er alveg hreint dásamlegur súpubar í Borgartúninu og þar sem ég vinn í sama húsnæði hef ég ósjaldan skotist þangað í hádeginu. Uppáhalds súpan mín er bara í boði á mánudögum en á þriðjudögum fæst stórgóð frönsk linsubaunasúpa sem mér heyrist vera í uppáhaldi hjá flestum.

Ebba Guðný, heilsugúrú og snillingur, gaf í þætti sínum Eldað með Ebbu uppskrift af linsubaunasúpu sem ég lét loksins verða af að elda um daginn, en franska linsubaunasúpan frá Súpubarnum var einmitt fyrirmynd þeirrar uppskriftar. Súpan er dásamlega góð! Ég bætti smá sellerý og cayenne pipar út í súpuna en því má auðvitað sleppa. Súpuna setti ég síðan í 4 box og átti nesti út vikuna. Stórkostlega gott!

Puy linsurósmarín og hvítlaukssúpa (uppskrift frá Ebbu Guðnýju)

1 stór blaðlaukur eða 2 litlir
1 1/2 dl grænar/brúnar/puy linsur
6-8 hvítlauksrif, pressuð
1 1/2 tsk. Himalaya- eða sjávarsalt
2 msk. lífrænn gerlaus grænmetiskraftur
1 krukka maukaðir tómatar
500 ml vatn
3-4 greinar ferskt rósmarín
1 1/2 msk. timjan (þurrkað)
4-6 gulrætur (ferð eftir stærð – 4 stórar eða 6 fremur litlar)
250 ml rjómi (1 peli)
1 stiki af sellerý
smá cayenne pipar
Graslaukur til að skreyta með í lokin og bragðbæta (má sleppa)

Skerið blaðlauk, sellerý og gulrætur smátt. Hitið smá vatn í botni á rúmgóðum potti og steikið grænmetið. Bætið hvítlauk saman við og síðan hráefnunum hverju á fætur öðru. Látið sjóða þar til baunirnar eru orðnar mjúkar (ég lét súpuna sjóða við vægan hita í um 30 mínútur). Berið fram með góðu brauði.

Sænsk súkkulaðikaka deluxe

~ Svava ~ Skrifa athugasemd

Hryðjuverkaárásin í Stokkhólmi á föstudaginn hefur verið ofarlega í huga mínum yfir helgina. Mér þykir hún svo hræðilega nálægt mér. Ég bjó í Stokkhólmi, á vini þar og fer reglulega þangað. Ég hef svo margoft staðið þar sem árásin átti sér stað, síðast núna í ársbyrjun.

Ég get ekki hætt að hugsa um 11 ára stelpuna sem var að koma úr skólanum og ætlaði að hitta mömmu sína við neðanjarðarlestina, en komst aldrei til hennar. Hvernig mamma hennar leitaði af henni á spítölum borgarinnar í örvæntingu áður en lögreglan bankaði upp á hjá henni. Vörubílsstjórann sem skildi lyklana eftir í bílnum á meðan hann skaust frá og mun eflaust seint jafna sig á því. Myndir af lögreglumönnum sem hikuðu aldrei, heldur hlupu beint að hættunni.

Þegar Viktoría prinsessa var spurð af blaðamanni „hvernig höldum við áfram eftir þetta?“ svaraði hún „í sameiningu“. Það er svo fallegt að sjá samheildina sem myndast við svona aðstæður. Þegar fólk staldrar við og sér hvað það er sem raunverulega skiptir máli í lífinu.

Ég hef verið á leiðinni að setja hingað inn uppskrift af svo góðri klessuköku sem ég bakaði um daginn og það er kannski sérlega viðeigandi að setja hana inn núna. Að baka köku og setjast niður með ástvinum gerir maður aldrei of oft. Njótum stundarinnar og veljum vandlega hvernig við eyðum tímanum.

Sænsk súkkulaðikaka deluxe

  • 3 egg
  • 3,5 dl sykur
  • 1 tsk vanillusykur
  • 4-5 msk kakó
  • 2 dl hveiti
  • 150 g brætt smjör

Krem:

  • 50 g smjör við stofuhita
  • 2 msk kalt kaffi
  • 2,5 dl flórsykur
  • 1 msk kakó
  • 1 tsk vanillusykur

Yfir kökuna:

  • kókosmjöl

Hitið ofninn í 175°.

Bræðið smjörið og látið það kólna aðeins. Hrærið saman egg og sykur. Blandið þurrefnunum saman og hrærið þeim saman við eggjablönduna. Hrærið að lokum smjörinu í deigið. Athugið að þeyta aldrei deigið heldur bara að hræra það saman því ef það myndast of mikið loft í deiginu er hætta á að það verði þurrt. Smyrjið lausbotna form og setjið deigið í það. Bakið kökuna í miðjum ofni í 20-30 mínútur. Kakan á að vera blaut í miðjunni þegar hún er tekin úr ofninum. Látið kökuna standa í ísskáp í nokkra tíma áður en kremið er sett á hana.

Hrærið öllum hráefnunum í kremið saman og setjið yfir kökuna. Stráið kókosmjöli yfir. Geymið kökuna í ísskáp.

Mongolian beef

~ Svava ~ 2 athugasemd

Um daginn spurði Jakob mig hvort við gætum ekki haft kínverskan í kvöldmat fljótlega. Ég verð alltaf jafn ánægð þegar krakkarnir stinga upp á kvöldmat og set óskirnar beint inn á vikumatseðilinn. Þar sem ég átti nautakjöt í frystinum féll valið á Mongolian beef. Ég lumaði á uppskrift sem sagan segir að komi frá PF Chang’s (ég sel það þó ekki dýrar en ég keypti það!) sem mér þótti upplagt að prófa. Rétturinn var æðislegur! Fljótgerður og svo mikið betri en take away. Fullkominn föstudagsmatur!

Mongolian beef

  • 500 g nautakjöt, skorið í bita
  • ⅛ bolli kornsterkja (maizena mjöl)
  • ½ msk sesam olía
  • ½ msk canola eða grænmetisolía
  • 3 hvítlauksrif, pressuð
  • 1 tsk engifer, fínrifið
  • ½ bolli sojasósa
  • ½ bolli vatn
  • ¾ bolli púðursykur
  • olía til að steikja í
  • vorlaukur til að skreyta með (má sleppa)

Veltið nautakjötinu upp úr maizena mjölinu (gott að setja saman í poka og hrista vel) og látið standa í ísskáp í 10 mínútur. Á meðan er sósan gerð.

Hitið sesam og canola eða grænmetisolíu á pönnu. Bætið hvítlauki og engiferi á pönnuna og steikið í 1-2 mínútur. Hrærið sojasósu, vatni og púðursykri saman við. Látið suðuna koma upp og sjóðið í 2-3 mínútur. Takið af hitanum og leggið til hliðar.

Hitið olíu á djúpri pönnu (um 1 bolli eða 2,5 dl er passlegt) og djúpsteikið nautakjötið. Passið að setja það í skömmtum á pönnuna, svo það sé ekki of mikið kjöt á henni í einu. Brúnið kjötið á báðum hliðum, í um 1-2 mínútur á hvorri hlið. Takið kjötið úr olíunni og látið renna af því á eldhúspappír.

Setjið nautakjötið í sósuna og blandið vel saman. Látið suðuna koma aftur upp og sjóðið í 2-3 mínútur (sósan þykknar aðeins við þetta). Stráið vorlauk yfir og berið strax fram með hrísgrjónum.

Vikumatseðill

~ Svava ~ Skrifa athugasemd

Þá var aftur kominn sunnudagur og tímabært að skipuleggja næstu viku. Ég fór á fleygiferð um bæinn í gær þar sem það vantaði orðið eitt og annað, eins og nýtt lak á rúmið okkar, fótboltasokka á Gunnar og nestisboxin í Ikea (þið vitið, þessi úr glerinu sem eru svo góð). Ég endaði ferðina síðan á stórum vikuinnkaupum. Þegar ég vaknaði í morgun og leit út um gluggan var ég svo fegin að hafa klárað allt í gær, því nú þarf ég ekki að fara út úr húsi í dag. Sumar í gær, vetur í dag. Vonandi kemur vor á morgun!

Vikumatseðill

Mánudagur: Fiskur í okkar sósu

Þriðjudagur: Quiche Lorraine

Miðvikudagur: Kjötbollur í möffinsformi

Fimmtudagur: Pasta með salami og blaðlauki

Föstudagur: Satay kjúklingasalat

Með helgarkaffinu: Sítrónuformkaka

Súkkulaðihúðaðar kókoskúlur

~ Svava ~ 4 athugasemd

Í gær dundaði ég mér við að gera þessar sérlega góðu kókoskúlur. Það sem gerir þær svo dásamlega góðar er að það er bæði brætt súkkulaði í deiginu og utan um kókoskúlurnar. Súkkulaði gerir allt aðeins betra, þannig er það bara! Það er upplagt að gera tvöfaldan skammt og geyma í frysti því það er bara svo gott að geta nælt sér í eina kókoskúlu til að eiga með kaffibollanum. Annars er best að geyma þær í ísskáp en þá er hætta á að þær klárist einn, tveir og tíu!

Súkkulaðihúðaðar kókoskúlur (uppskriftin gefur um 25 kúlur)

  • 4 dl haframjöl (ég var með tröllahafra en hvaða haframjöl sem er dugar)
  • 100 g smjör
  • 1,5 dl flórsykur
  • 2 msk kakó
  • 2 msk sterkt kaffi (kalt)
  • 1/2 msk vanillusykur
  • 50 g rjómasúkkulaði

Utan um kókoskúlurnar:

  • 200 g súkkulaði (ég var með rjómasúkkulaði og suðusúkkulaði til helminga)
  • kókosmjöl

Setjið haframjöl í matvinnsluvél og látið vélina ganga þar til haframjölið er fínmalað. Bætið smjöri, flórsykri, kakó, kaffi og vanillusykri saman við og vinnið saman í sléttan massa. Bræðið súkkulaðið og látið kólna. Bætið því síðan vel saman við massann.

Mótið kúlur, leggið þær á smjörpappír og látið standa í frysti í um 30 mínútur.

Bræðið súkkulaðið og setjið kókosmjöl í skál. Dýfið kókoskúlunum, einni í einu, í brædda súkkulaðið og veltið þeim síðan upp úr kókosmjölinu (mér þótti best að nota teskeið til að setja kúluna í súkkulaðið og var síðan með gaffal í kókosmjölinu, byrjaði á að moka kókosmjöl yfir kúluna og velti henni síðan um í kókosmjölinu). Geymið kókoskúlurnar í ísskáp eða frysti.

 

Boston!

~ Svava ~ 1 athugasemd

Þeir sem fylgja mér á Instagram hafa eflaust áttað sig á því að ég var í fríi í Boston, sem skýrir fjarveruna hér á blogginu. Það sem við höfðum það gott!

Við gistum á The Colonnade hótelinu sem er vel staðsett og með allt í göngufæri. Morgunmaturinn á hótelinu er dásamlegur og við nýttum okkur herbergisþjónustuna óspart. Herbergið okkar var rúmgott og með útsýni yfir Boston og það var ósköp notalegt að byrja dagana þar með morgunverðinn við gluggann.


Handan við hornið er upplagt að fara í hand- og fótsnyrtingu. Bara nokkur skref frá hótelinu og opnar snemma. Mér fannst æðislegt dekur að skottast þangað eftir morgunverðinn og fá snyrtingu og fótanudd morguninn eftir að við komum út.

  


Á móti hótelinu, í Prudential verslunarmiðstöðinni, er æðislegur matarmarkaður, Eataly. Þar settumst við niður á hverjum degi og fengum okkur osta, skinkur og vínglas. Það var svo notalegt að sitja þar við barinn og gæða sér á matnum. Mæli með því! Síðasta daginn versluðum við góðgæti og æðislegt rauðvín sem við tókum með okkur heim.


Annar staður sem ég mæli með er Taj Boston sem er á horni Newbury og Arlington. Þar inni er æðislegur bar sem er notalegt að setjast á eftir að hafa rölt um bæinn. Við fórum tvisvar þangað, í annað skiptið settumst við inn í drykk eftir að hafa rölt bæinn þveran og endilangan og í seinna skiptið fórum við í kampavín. Þarna er boðið upp á bestu hnetur sem ég hef smakkað. Ég borðaði mig sadda af þeim í bæði skiptin.

Það er nú varla hægt að fara til Ameríku án þess að fara á steikhús. Við fórum á Capital Grille og fengum okkur nautalund og humar, trufflufranskar og kartöflugratín. Brjálæðislega gott!

 

Kvöldið sem við komum út fórum við á Cheesecake factory, sem var beint á móti hótelinu okkar. Við fengum svo góðan mat (spicy cashew chicken og thai coconut-lime chicken) að það hálfa væri nóg. Við tókum síðan eftirréttinn, ostakökusneið, með okkur upp á hótel. Þæginlegt að þurfa bara að rölta yfir götuna, sérstaklega þar sem við vorum hálf þreytt eftir ferðalagið.

Mig hefur lengi langað til að smakka hin margrómaða Shake Shack borgara en get ekki sagt að hann hafi staðið undir væntingum. Borgarinn var hvorki fugl né fiskur en ostafranskarnar voru hins vegar æðislega góðar.

Við áttum yndislega daga í Boston og móttökurnar sem biðu okkur heima gátu ekki verið betri. Þegar við komum heim var búið að þrífa allt hátt og lágt, skipta um á rúmunum og á borðinu beið nýbakað bananabrauð. Yndisgull sem ég á ♥

Vikumatseðill

~ Svava ~ 2 athugasemd

Það er svo dásamlegt að koma fram á morgnanna þessa dagana og mæta dagsbirtunni sem skín inn um gluggana. Þegar ég kom fram í morgun skein sólin inn og helgarblómin sem voru keypt á föstudaginn stóðu svo fallega í birtunni að ég mátti til með að smella af mynd.

Vikumatseðill

Mánudagur: Brasilískur fiskréttur

Þriðjudagur: Salamibaka með fetaosti

Miðvikudagur: Nautahakks- og makkarónupanna

Fimmtudagur: Þunnbrauðsvefja með pulsu og kartöflumús

Föstudagur: Indverskur Butter Chicken

Með helgarkaffinu: Marmarakaka með súkkulaði og sítrónu

Nautahakkshamborgarar

~ Svava ~ 4 athugasemd

Í kvöld fer lítið fyrir eldamennskunni hjá mér því ég er að fara í saumaklúbb. Áður en ég fer ætla ég þó að hendast í Hagkaup í Smáralindinni því ég sá að það er 20% afsláttur af snyrtivöru þar í kvöld út af konukvöldi. Tímasetningin gæti ekki verið heppilegri því ilmvatnið mitt er að klárast og augnblýanturinn er á síðustu metrunum. Síðan má alltaf á sig glossum bæta, sérstaklega þegar það er afsláttur. Áður en ég hleyp út má ég þó til með að setja inn uppskrift af nautahakkshamborgurum sem mér þykja passa svo vel á helgarmatseðilinn. Ég sá þá fyrir löngu á Pinterest og lét loksins verða af því að elda þá um daginn. Einfaldir og súpergóðir!

Nautahakkshamborgarar – lítillega breytt uppskrift frá Kevin & Amanda

  • 450 g nautahakk
  • 1 tsk salt
  • 1 tsk pepper
  • 1 tsk kúmin (ath. ekki kúmen)
  • 1 tsk sinnepsduft
  • 1/2 tsk reykt paprika
  • 2 bollar hakkaður laukur (ca 1 stór eða 2 litlir laukar)
  • 3-4 hvítlauksrif, fínhökkuð
  • 2 dl hakkaðir tómatar í dós með chili (ég var með frá Hunts)
  • 1 tsk sykur
  • 1 nautateningur
  • ostur (ég var með cheddar ost)
  • 6 hamborgarabrauð

Gljái

  • 1/2 bolli (8 msk) smjör
  • 2 msk púðursykur
  • 1 msk Worcestershire sósa
  • 1 msk sinnep
  • 1 msk sesamfræ

Hitið ofninn í 175° og smyrjið eldfast mót sem rúmar 6 hamborgarabrauð.

Hitið pönnu vel og setjið hakkið á pönnuna. Látið það brúnast vel og kryddið með salti, pipar, kúmin, sinnepsdufti og reyktri papriku. Bætið lauk og hvítlauk á pönnuna og steikið áfram þar til laukurinn er mjúkur. Hrærið hökkuðu tómötunum saman við og látið sjóða saman í smá stund.

Setjið neðri helmingana af hamborgarabrauðunum í eldfasta mótið. Setjið nautahakkið yfir og ost í sneiðum (gott að setja vel af honum). Setjið lokin af hamborgarabrauðunum yfir.

Setjið öll hráefnin í gljáann í pott og hitið þar til allt hefur blandast vel saman. Hellið yfir hamborgarana og setjið í ofninn í um 25 mínútur.

Tælenskt kjúklingapasta frá California Pizza Kitchen

~ Svava ~ 2 athugasemd

Ég fer til Bandaríkjanna síðar í mánuðinum og hef undanfarin kvöld verið að skoða veitingastaði þar. Ég bóka alltaf borð áður en ég fer erlendis, bæði því mér þykir svo gaman að vera búin að hugsa út staði til að borða á og líka til að koma í veg fyrir að við endum dauðþreytt eftir daginn á næsta nálæga veitingastað. Reynslan hefur kennt okkur að panta borðin seint, þar sem við erum oftast á þvælingi langt fram eftir degi. Það er svo notalegt að komast aðeins upp á hótel, henda sér í sturtu og jafnvel fá sér einn drykk á meðan verið er að hafa sig til fyrir kvöldið.

Ég sé oftast til þess að ná einni ferð á California Pizza Kitchen þegar ég er í Bandaríkjunum en þangað fer ég helst í hádeginu. Það var á tímabili frábær pizza á matseðlinum hjá þeim sem ég síðar fann uppskrift af á netinu og eldaði hér heima. Það er dálítið tímafrekt að gera hana en mér þykir pizzan svo góð og vel þess virði að leggja smá á sig fyrir hana. Uppskriftina setti ég hingað inn fyrir löngu, það má finna hana hér.

Í þessum hugleiðingum rifjaðist upp fyrir mér uppskrift af tælensku kjúklingapasta frá California Pizza Kitchen sem hefur gengið um á netinu. Mér þótti því áhugavert að prófa uppskriftina og varð ekki fyrir vonbrigðum. Þessi pastaréttur sló svo í gegn hér heima að ég get ekki hætt að hugsa um hann. Þennan rétt á ég eftir að elda aftur og aftur, svo mikið er víst!

Tælenskt kjúklingapasta – uppskrift frá California Pizza Kitchen

  • 450 g spaghetti
  • 3 msk sesam olía
  • 1 bolli gulrætur, skornar í strimla
  • 2 bollar kínakál, skorið í strimla
  • 2 bollar eldaðar kjúklingabringur, skornar í bita
  • 8 vorlaukar
  • 5 hvítlauksrif, fínhökkuð
  • 1 msk rifið engifer
  • 1/4 bolli hunang
  • 1/4 bolli hnetusmjör (creamy)
  • 1/4 bolli sojasósa
  • 3 msk hrísgrjónaedik
  • 1 – 1,5 msk sriracha hot chilli sósa

Setjið vatn í rúmgóðan pott og hitið að suðu. Bætið 1-2 msk af salti út í vatnið. Bætið spaghetti í pottinn og sjóðið skv. leiðbeiningum á pakkningu. Hellið vatninu frá og hrærið 2 msk af sesamolíu saman við spaghettíið.

Þurrkið pottinn og setjið 1 msk af sesamolíu í hann. Setjið vorlauk (takið fyrst smá af honum frá til að setja yfir réttinn sem skraut), gulrætur, kínakál, kjúkling, hvítlauk og engifer í pottinn. Steikið í 1-2 mínútur og bætið þá hunangi, hnetusmjöri, sojasósu, ediki og Sriracha sósu í pottinn. Hærið öllu vel saman og bætið að lokum spaghettíinu í pottinn. Blandið öllu vel saman. Skreytið með vorlauk og berið fram.

 

 

 

Ostaídýfa með karamelluseruðum lauk og beikoni

~ Svava ~ Skrifa athugasemd

Ostaídýfa með karamelluseruðum lauk og beikoni

Góðan daginn!

Ég sit hér við eldhúsborðið í náttsloppnum og ætla að drífa mig á fætur og út í göngutúr um leið og færslan er komin inn. Veðrið er svo fallegt að það væri synd að nýta það ekki í útivist. Í kvöld ætlum við á Bestu lög Vilhjálms Vilhjálmssonar tónleikana í Hörpu og síðan á Food and fun á Apótekið. Ég get ekki beðið! Krakkarnir verða hér heima á meðan og ætla að gera sér pizzur. Það er ákveðinn lúxus sem fylgir því að vera með svona stór börn. Malín er að verða 19 ára og því hálf fullorðin. Það er því lítið mál að bregða sér frá.

Ostaídýfa með karamelluseruðum lauk og beikoni

Um síðustu helgi vorum við bara tvö í mat og nýttum því tækifærið til að fá okkur osta og rauðvín. Ég prófaði að gera ostaídýfu úr bræddum ísbúa sem varð svo góð að uppskriftin verður að komast hingað inn. Best er að bera hana fram með góðu kexi eða stökku brauði, t.d. baquette sem hefur verið skorið í sneiðar og ristað á pönnu eða í ofni. Síðan er líka gott að setja smá chilisultu yfir. Vert að prófa!

Ostaídýfa með karamelluseruðum lauk og beikoniOstaídýfa með karamelluseruðum lauk og beikoni

Ostaídýfa með karamelluseruðum lauk og beikoni

  • 1 laukur, hakkaður
  • 1 tsk sykur
  • 4 beikonsneiðar, eldaðar og hakkaðar
  • 1/2 dl sýrður rjómi
  • 1/2 dl majónes
  • 100 g ísbúi, rifinn
  • salt og pipar

Setjið smá ólífuolíu á pönnu og hitið við lágan hita (ég var með stillingu 3 af 9). Steikið laukinn í 20 mínútur, setjið þá sykur yfir hann og steikið í 45-60 mínútur til viðbótar. Hrærið annað slagið í pönnunni svo laukurinn brenni ekki.

Steikið beikonið (mér þykir best að steikja það í ofni, við 200° í 5-10 mínútur). Látið það kólna aðeins og skerið svo fínt niður.

Blandið saman majónesi, sýrðum rjóma, beikoni, salti og pipar. Hrærið rifnum Ísbúa og karamelluseruðum lauki saman við. Setjið blönduna í lítið eldfast mót, stráið 2 msk af rifnum Ísbúa yfir og bakið við 200° í um 20 mínútur.

Berið heitt fram með kexi eða brauði.