Gleðileg jól

desember 24, 2013 ~ Svava ~ 4 athugasemd

Ég velti því fyrir mér hvort ég sé ein hér á netinu í dag en átta mig svo á því að það getur ekki verið. Veðurspáin er slæm og eflaust margir að leita frétta af veðri og jafnvel einhverjir að kanna opnunartíma verslana því það gleymist að kaupa konfekt eða rjóma. Þetta er svo stór dagur, aðfangadagur jóla, og ég vona að lífið sé að leika við ykkur. Hér sefur fjölskyldan og ég er ein á fótum. Það er algjör þögn í húsinu og eina birtan er frá jólatréinu, aðventuljósum og kertaljósum sem ég kveikti áður en ég kom mér fyrir hér í stofusófanum. Friðurinn er svo notalegur að ég tími ekki að kveikja á útvarpinu.

Við eigum von á mömmu til okkar í möndlugraut í hádeginu og síðan fer Öggi með krakkana að keyra út jólagjafirnar. Ég verð hér heima á meðan og undirbý jólin. Set dúk á borðið, tek fram sparistellið og set jólanammið í skálar á milli þess sem ég hræri í pottum og smakka til sósuna. Í kvöld borðum við hamborgarhrygg, opnum gjafir og lesum jólakort yfir konfekti og appelsíni.

Ég óska ykkur gleðilegra jóla og vona að jólahátíðin fylli hug ykkar og hjörtu af gleði, birtu og yl.

Aðventugjafir

desember 17, 2013október 1, 2020 ~ Svava ~ 4 athugasemd

Mér þykir gaman að færa fólki aðventugjafir og hingað til hafa þær gjafir sem ég hef gefið verið matarkyns. Það er svo einfalt að setja nokkrar sörur, smákökur eða jólasælgæti í fallegan poka og hnýta slaufu um hann. Ég held að allir verða glaðir af þess háttar gjöfum, ja nema kannski þeir sem eru í megrun en þeim er þá nær að standa í slíkri vitleysu í sjálfum jólamánuðinum.

Um daginn fór Öggi til Péturs vinar síns og þá nýtti ég tækifærið og sendi Pétri piparmyntustykki. Ég vona að honum hafi þótt þau góð en er mest hrædd um að Öggi hafi borðað þau frá honum á meðan þeir sátu yfir kaffibolla og tölvuuppfærslum. Öggi vill nefnilega meina að piparmyntustykkin fari glæsilega með kaffinu og fær sér varla kaffibolla hér heima án þess að brjóta sér bita af þeim.

Um daginn færði ég svo mömmu og tengdamömmu sinn hvorn pokann af heimagerðu granóla með pekanhnetum. Þær urðu mjög glaðar en eflaust varð ég glöðust af öllum því mér þótti svo gaman að færa þeim þetta. Ég er með æði fyrir þessu granóla og hef upp á síðkastið byrjað dagana á skál með ab-mjólk og vænum skammti af granóla. Það er æðislega gott og ekki skemmir fyrir hversu einfalt er að útbúa það.

Granóla með pekanhnetum

3 bollar tröllahafrar
1 bolli grófsaxaðar pekanhnetur
2 tsk kanil
¼ tsk salt
½ bolli ljós púðursykur
¼ bolli vatn
2 msk bragðlaus olía
1 msk vanillusykur

Hitið ofninn í 150° og leggið bökunarpappír á tvær ofnplötur. Blandið tröllahöfrum, pekanhnetum, kanil, vanillusykri og salti í skál. Blandið ljósum púðursykri og ¼ bolla af vatni saman í pott og hitið að suðu yfir miðlungsháum hita. Hrærið í þar til sykurinn hefur bráðnað. Bætið olíunni saman við. Takið pottinn af hitanum og hellið yfir þurrefnin. Hrærið í blöndunni þar til allt hefur blandast vel.

Skiptið blöndunni á bökunarplöturnar og dreifið úr þeim. Bakið í 15 mínútur, hrærið í granólanu og færið plöturnar þannig að sú sem var ofar í ofninum fari fyrir neðan og öfugt. Bakið áfram í 10-15 mínútur til viðbótar eða þar til granólað er komið með fallegan lit. Tröllahafrarnir geta verði mjúkir þegar þeir koma úr ofninum en þeir verða stökkir þegar þeir kólna. Látið kólna alveg á bökunarplötunum.

Mangókjúklingur

desember 16, 2013október 1, 2020 ~ Svava ~ 3 athugasemd

Þá er síðasta vikan fyrir jól runnin upp og ekki seinna vænna en að fara að klára það síðasta fyrir jólin. Við erum búin að því helsta en eigum eftir að versla jólamatinn og skreyta tréið. Gunnar æfir sig af kappi fyrir sína fyrstu jólatónleika í tónlistarskólanum og við hin bíðum spennt eftir að fá að njóta þeirra á fimmtudaginn.

Við áttum æðislega helgi sem einkenndist af notalegheitum og afslöppun. Við keyptum jólatré, horfðum á jólamyndir, buðum mömmu í aðventukaffi og borðuðum góðan mat. Ég eldaði mangókjúkling sem okkur þótti sérlega góður og krakkarnir voru alsælir með.

Uppskriftir af mangókjúklingum hafa verið vinsælar og eflaust eiga flestir sína uppáhalds uppskrift. Ætla ég að bera í barmafullan lækinn og gefa enn eina uppskriftina af mangókjúklingi? Já, svo sannarlega! Þessi uppskrift er nefnilega ekki eins og þær hefðbundu því hún er með sýrðum rjóma (sem gerir alltaf allt svo gott), tómatpuré, epli og hot mango chutney sem gerir réttinn dásamlega bragðgóðan. Verið óhrædd við að nota sterkt mango chutney því sýrði rjóminn mildar það og eftir situr ljúffengt bragð sem er ó, svo gott.

Mangókjúklingur

500 g kjúklingabringur
1 rauð paprika
1 græn paprika
½ grænt epli
salt og pipar
2 msk tómatpuré
1 msk hveiti
1 dós sýrður rjómi (2 dl.)
1 krukka hot mango chutney (2,5 dl.)
2 dl mjólk
1 kjúklingateningur

Skerið kjúklingabringur og grænmeti í bita. Steikið kjúklinginn í smjöri eða olíu við háan hita. Saltið og piprið. Bæti paprikum og epli á pönnuna og steikið áfram í nokkrar mínútur. Bætið tómatpuré á pönnuna, stráið hveiti yfir og blandið saman þannig að hveitið verði ekki að kekkjum. Setjið sýrðan rjóma, mango chutney, mjólk og kjúklingateningi á pönnuna og látið sjóða við vægan hita þar til kjúklingurinn er fulleldaður, 5-10 mínútur.

Berið fram með hrísgrjónum og/eða salati.

Vikumatseðill

desember 15, 2013október 1, 2020 ~ Svava ~ Skrifa athugasemd

Gleðilegan þriðja í aðventu kæru lesendur. Hjá okkur stendur til að kaupa jólatréð í dag og síðan verðum við með þriðja aðventukaffið okkar. Það er orðið að miklu tilhlökkunarefni að fá heitt súkkulaði með rjóma og dásamlegar eplaskífurnar hér á sunnudögum. Í dag munu saffransnúðarnir einnig standa á borðum og svo auðvitað smákökurnar. Það er því full ástæða að hlakka til.

Matseðill vikunnar er í léttari kantinum, enda kannski full þörf á þegar jólavikan er handan við hornið. Ef þið hafið ekki eldað kjúklingasúpuna með ferskjunum þá hvet ég ykkur til að prófa hana. Hún er ó, svo góð og ekki síðri daginn eftir.

Mánudagur: Lax með mango chutney og pistasíuhnetum er enn eitt góðgætið sem ég fékk hjá mömmu. Æðislegur réttur!

Þriðjudagur: Makkarónuskúffa Markoolio er barnvænn réttur sem tekur stutta stund að gera. Það er um að gera að poppa réttinn upp ef vilji er fyrir hendi, t.d. með beikoni, papriku eða bragðmiklum osti. Krakkarnir mínir eru þó hæstánægð með réttinn eins og hann er.

Miðvikudagur: Mér þykir grænmetislasagna vera sniðugur leikur fyrir jólin og þessi uppskrift er ekki af verri endanum.

Fimmtudagur: Tælenskt kjúklingasalat sem er dásemdin ein.

Föstudagur: Himnesk kjúklingasúpa með ferskjum hefur verið í uppáhaldi hjá mér síðan ég smakkaði hana fyrst.

Með helgarkaffinu: Þar sem það er mikil matarveisla framundan með sætum eftirréttum í löngum röðum þá ætla ég að stinga upp á hollu og góðu brauði til að eiga um helgina. Þetta er það brauð sem ég baka oftast og finnst frábært að byrja dagana á vænni sneið.

Stökk piparmyntustykki með hvítu súkkulaði

desember 14, 2013október 1, 2020 ~ Svava ~ 2 athugasemd

Í gær héldu Svíar dag heilagrar Lúsíu, Santa Lucia, hátíðlegann. Á Svíþjóðarárum okkar biðu krakkarnir full tilhlökkunar eftir að dagurinn rynni upp og þegar svo gerði klæddum við Malínu í hvítan skósíðan kjól, bundum rauða slaufu um mittið og settum kertakórónu á höfuðið. Strákarnir voru ýmist klæddir sem jólasveinar eða piparkökukarlar og þannig héldu krakkarnir í skólann og leikskólann, með fiðrildi í maganum. Síðar um daginn fylgdumst við Öggi tárvot með þeim ásamt skólafélögum koma gangandi í myrkrinu með kerti í höndunum syngjandi Santa Lucia, hver með sínu nefi. Eftir sönginn var boðið upp á lúsíukaffi í leikskólanum. Ég mun einnig seint gleyma lúsíutónleikunum sem við Öggi fórum á í dómkirkjunni í Uppsölum fyrstu jólin okkar þar. Hátíðleikinn og fegurðin sem við upplifðum þar verða seint toppuð. Þetta voru svo fallegir dagar.

Þar sem Svíþjóðarnostalgían blundar alltaf í okkur (og kannski aðallega mér) þá ákváðum við að bjóða vinum okkar, sem bjuggu á sama tíma og við í Uppsölum, til okkar í sænskt jólahlaðborð í gær. Við fylgdum öllum kúnstarinnar reglum og buðum upp á hefðbundinn sænskan jólamat, spiluðum sænsk jólalög og flögguðum sænska fánanum á hlaðborðinu. Ég mun eflaust birta hér matseðilinn fljótlega, þó ekki væri nema bara fyrir mig til að geta rifjað hann upp að ári liðnu, en í dag ætla ég að gefa uppskrift af jólasælgæti sem fékk að fljóta með á eftirréttarborðinu í gær. Undir lok kvölds var ég farin að dýfa þessum piparmyntustykkjum í súkkulaðimús sem stóð einnig á borðinu og hefði getað haldið því endalaust áfram. Ég hlakka til að fá mér þau með heitu súkkulaði á morgun.

Stökk piparmyntustykki með hvítu súkkulaði (uppskrift frá Shutterbean)

450 g gott hvítt súkkulaði
2 bollar Rice Krispies
2 pokar Bismark brjóstsykur (150 g. hvor poki)

Setjið brjóstsykurinn í plastpoka og myljið, t.d. með buffhamri. Takið fínustu mylsnuna frá, það getur verið sniðugt að geyma hana og nota t.d. í þeyttan rjóma eða út á heitt súkkulaði.

Bræðið súkkulaðið yfir vatnsbaði eða í örbylgjuofni. Hrærið Rice Krispies saman við. Setjið blönduna á bökunarpappír og deifið úr henni í um það bil stærðina 25 x 35 cm. Stráið brjóstsykurbrotunum yfir, leggið bökunarpappír yfir og þrýstið ofan á til að brjóstsykurinn festist í súkkulaðinu. Kælið í 20-30 mínútur, ekki lengur því þá getur brjóstsykurinn mýkst.

Takið bökunarpappírinn af. Brjótið piparmyntustykkið í bita og geymið við stofuhita í loftþéttum umbúðum. Stykkin geymast í um viku.

Einfaldur pestókjúklingur

desember 11, 2013október 1, 2020 ~ Svava ~ Skrifa athugasemd

Í gær voru tvær vikur til jóla upp á dag. Hér áður fyrr fannst mér tíminn standa í stað á þessum tímapunkti en í dag þýtur hann frá mér. Ég reyni að teygja lopann og lengja daginn með því að vaka fram eftir á kvöldin. Það er ekki að ég sé svona upptekin, síður en svo. Mér þykir bara svo notalegt hér heima með jólaljós í gluggum, logandi kerti á borðum, smákökur í skálum og myrkrið úti og vil njóta þess til hins ýtrasta. Þegar krakkarnir eru sofnaðir kemur andinn yfir mig og ég sæki aðeins meira jólaskraut, færi hluti á milli staða og ákveð svo að hita mér saffransnúð áður en ég leggst í rúmið. Vesenast fram eftir og vakna svo dauðþreytt. Mér þykja kvöldin einfaldlega of notaleg þessa dagana til að sofa þau frá mér.

Kjúklingaréttir standa alltaf fyrir sínu og um daginn gerði ég einfaldan pestókjúkling sem sló rækilega í gegn hjá fjölskyldunni. Uppskriftina fékk ég hjá æskuvinkonu minni sem taldi sig hafa fengið hana úr gömlu uppskriftarhefti. Rétturinn er dásamlega góður og það tekur enga stund að reiða hann fram. Krakkarnir voru yfir sig hrifin og það var barist um síðasta bitann.

Einfaldur pestókjúklingur

kjúklingalundir
salt og pipar
pestó
furuhnetur

Hitið ofn í 200°. Setjið kjúklingalundir í eldfast mót, piprið og saltið og setjið pestó yfir. Setjið í ofninn í 15 mínútur, stráið þá furuhnetum yfir og setjið svo aftur í ofninn í 5 mínútur til viðbótar eða þar til kjúklingalundirnar eru fulleldaðar.

Berið fram með salati, hrísgrjónum, sætri kartöflustöppu eða hverju sem er. Þetta getur ekki klikkað.

Vikumatseðill

desember 9, 2013október 1, 2020 ~ Svava ~ 2 athugasemd

Þið verðið að afsaka seinaganginn á vikumatseðlinum. Helgin hefur verið þéttbókuð og gærdagurinn flaug frá mér. Við sváfum út, versluðum vikuinnkaupin, gerðum eplaskífur og heitt súkkulaði með aðventukaffinu og fórum svo á yndislega jólatónleika Heru Bjarkar. Góður dagur sem leið allt of hratt.

Það má þó segja að betra er seint en aldrei og hér kemur vikumatseðillinn. Mér þykir erfitt að velja uppáhald á honum enda mikið af uppáhalds réttum þar að finna. Ef þið gerið pretzelvöfðu pylsurnar (súpergóðar!) þá mæli ég með ofnbökuðu kartöflubátunum með, ég gæti lifað á þeim! Kjúklingabakan er æði og tacogratínið ekki síðra. Rocky road má vera í eftirrétt alla vikuna mín vegna, það er ómótstæðilegt.

Mánudagur: Gratineraður fiskur á hrísgrjónabeði er ljúffeng byrjun á vikunni.

Þriðjudagur: Tacogratín með pastabotni er máltíð sem hittir í mark. Berið réttinn fram með góðu salati og nachos.

Miðvikudagur: Blómkálssúpa með beikoni er einföld og góð máltíð sem hentar vel í miðri viku.

Fimmtudagur: Kjúklingabaka með sweet chili er ævintýralega góð baka sem allir eiga eftir að falla fyrir. Ég bara veit það.

Föstudagur: Ég veit að pretzelvafðar pylsur líta út fyrir að vera mikil fyrirhöfn og vesen en þær eru svo sannarlega þess virði. Berið þær fram með ofnbakuðum kartöfluhelmingum og þið eigið eftir að slá í gegn. Af hverju ekki að borða matinn fyrir framan jólamynd í sjónvarpinu? Hrúgið pylsunum á stórann disk, setjið kartöflurnar í stóra skál, tómatsósu og sinnep í litlar skálar og borðið sem hálfgerðan plokkmat. Súpernæs!

Með helgarkaffinu: Mér þykir tilvalið að gera rocky road og bjóða gestum og gangandi upp á um helgina. Einfalt jólanammi sem allir elska.

Danskar eplaskífur

desember 7, 2013október 1, 2020 ~ Svava ~ 12 athugasemd

Mér þykir tíminn líða allt of hratt á aðventunni og vildi óska að ég gæti hægt á honum til að geta notið betur. Ég vil halda fast í jólahefðirnar okkar eins og að horfa á jólamyndir saman um helgar, að fá okkur kvöldkaffi með smákökum og að spila saman. Mig hefur lengi dreymt um að eplaskífur verði hluti af jólahefðinni og nokkuð sem við hlökkum til að fá þegar styttist í aðventuna. Ástæðan fyrir þessum draumórum mínum er einfaldlega sú að mér þykir eitthvað svo jólalegt við eplaskífur með hvítum flórsykri og rauðri sultu og síðan þykja mér þær líka svo æðislega góðar. Ég hef þó aldrei átt eplaskífupönnu og því hefur lítið farið fyrir eplaskífuveislum hjá mér.

Það var svo í fyrra að tengdamamma mín gaf mér eplaskífupönnu fyrir jólin og um síðustu helgi lét ég þennan langþráða draum minn rætast. Við kveiktum á fyrsta aðventukertinu, hlustuðum á jólatónlist, hituðum okkur súkkulaði og borðuðum nýsteiktar eplaskífur. Stundin stóð svo fyllilega undir væntingum og ég vildi ekki að hún tæki enda. Eplaskífur með þeyttum rjóma og hindberjasultu eru dásamlegar og bornar fram með heitu súkkulaði með rjóma og súkkulaðispæni, ég hef ekki orð til að lýsa því hversu vel það fer saman.

Eplaskífur voru upphaflega steiktar með eplabitum í, sem útskýrir nafnið, en smám saman hafa þeir horfið úr. Ég ætla að prófa að setja þá í þegar ég er orðin klárari í að steikja eplaskífurnar en þangað til munum við gera okkur þær að góðu án eplana. Ég er ekki einu sinni viss um að mér muni þykja þær betri með eplunum. Það á eftir að koma í ljós.

Á morgun endurtökum við leikinn og við hlökkum öll til. Ég er viss um að eplaskífurnar eiga eftir að verða hluti af aðventunni hjá okkur. Enn ein jólahefðin sem verður mér kær.

Eplaskífur með sítrónu og vanillu (um 20-25 stykki)

3 egg
3 msk sykur
2,5 dl mjólk
2 dl rjómi
1 tsk salt
4 dl hveiti
2 tsk lyftiduft
rifið hýði af 1 sítrónu (passið að rífa bara yfirborðið og ekki niður í hvíta hlutan)
2 tsk vanillusykur

Skiljið eggjahvíturnar frá gulunum og setjið í sitthvora skálina. Stífþeytið eggjahvíturnar. Hrærið eggjagulum, sykri, mjólk, rjóma og salti saman og bætið síðan hveiti og lyftidufti saman við. Hrærið þar til deigið er kekkjalaust. Bætið stífþeyttu eggjahvítunum varlega saman við ásamt vanillusykri og sítrónuhýði.

Bakið eplaskífurnar í smjör- og olíublöndu (notið til helminga og passið að vera með bragðdaufa olíu, ekki ólívuolíu) í eplaskífupönnu. Fyllið nánast eplaskífuholurnar á pönnunni með deigi. Lyftiduftið gerir það að verkum að deigið næstum rennur út fyrir en það gerir ekkert til, þegar þú snýrð þeim þá verða skífurnar fallega hringlaga.

Samkvæmt danskri hefð á að bera eplaskifurnar fram með flórsykri og jarðaberjasultu en ég vil borða mínar með flórsykri, hindberjasultu og þeyttum rjóma.

Daimtoppar og vinningshafar í gjafaleik

desember 5, 2013október 1, 2020 ~ Svava ~ Skrifa athugasemd

Ég eyddi gærkvöldinu í matarboði með vinkonum mínum og kom ekki heim fyrr en um miðnætti. Þá var gjafaleiknum í samvinnu við Heru Björk ný lokið og ég fór að velta því fyrir mér hvernig best væri að draga vinningshafana. Það fór svo að ég prentaði út öll kommentin og sat svo langt fram á nótt við að klippa nöfnin í sundur og brjóta miðana saman. Ég áttaði mig engan vegin á því hversu mikil vinna biði mín, enda rúmlega 400 þátttakendur, og eftir á að hyggja hefði verið skynsamlegra að nýta tæknina og láta tölvuforrit velja vinningshafa. Að lokum voru þó nöfn allra þátttakenda komin í pottinn og þrjú nöfn dregin upp úr.

Ég óska Kristínu, Helgu og Ingu Lind innilega til hamingju með vinningana og vona að þeir eigi eftir að auka á notalegheit desembermánaðar. Þið hafið fengið tölvupóst frá mér með upplýsingum um hvernig þið nálgist vinningana. Sjálf hlakka ég mikið til tónleikanna á sunnudaginn. Kannski að við sjáumst þar?

Úr jólatónlist í jólabakstur, nú styttist í aðra aðventu og smákökurnar lokka. Ég gaf uppskrift af súkkulaðimarenstoppum með frönsku núggati hér um daginn en geri enn betur í dag með þessum Daimtoppum. Þeir eru algjört sælgæti og ég átti engan möguleika á að halda þeim frá fjölskyldunni. Topparnir staldra því ekki lengi við en það er í fínu lagi því það er einfalt að útbúa þá. Ég mæli með að þið prófið!

Daimtoppar

3 eggjahvítur
200 g ljós púðursykur
400 g Daimkúlur (4 pokar)

Stífþeytið eggjahvíturnar og hrærið púðursykrinum smátt og smátt saman við. Hrærið Daimkúlum varlega saman við.

Setjið litla toppa með teskeiðum á bökunarpappírsklædda plötu og bakið við 150°í ca 15 mínútur.

Indverskur korma kjúklingur og nan-brauð

desember 3, 2013október 1, 2020 ~ Svava ~ 8 athugasemd

Um helgina leit mamma við hjá okkur með súkkulaðimús og færði mér það sem hún kallaði kærleiksgjöf. Í pakkanum leyndist silkiklútur sem mér þykir svo fallegur að ég fell í stafi. Ég átti einn Plomo o Plata klút fyrir sem ég hef varla tekið af mér en gerði óvart smá gat á hann um daginn þegar ég flækti hann í rennilás. Mamma hafði þó ekki hugmynd um það og því kom gjöfin skemmitlega á óvart. Takk enn og aftur elsku mamma ♥

Við enduðum þessa fyrstu aðventuhelgi á dásamlegri máltíð, korma kjúklingi með hrísgrjónum og nan-brauði. Mér þykir indverskur matur svo góður og þó að ég geri hann stundum frá grunni þá þakka ég fyrir að hægt sé að kaupa sósurnar tilbúnar þegar tíminn er knappur. Ég kynntist þeim fyrst þegar vinafólk bauð okkur í mat sem okkur þótti sérlega góður. Þegar ég bað um uppskriftina sögðust þau einfaldlega hafa steikt kjúkling og hellt tilbúinni korma sósu yfir. Síðan þá hef ég notað sósuna óspart en hef gaman af að breyta til með ólíku meðlæti. Mér þykir mjög gott að bera réttinn fram með mangó chutney og sýrðum rjóma en um helgina bætti ég lauki, hvítlauki og engifer í sósuna og bar réttinn síðan fram með ristuðum kasjúhnetum til að strá yfir kjúklinginn, hrísgrjónum og nan-brauði sem er gott að dýfa í bragðgóða sósuna. Það var ekki svo mikið sem sósudropi eftir af matnum og diskana hefði verið hægt að setja beint upp í skáp, svo vel var sleikt af þeim.

Að lokum vil ég minna á gjafaleikinn í samvinnu við Heru Björk. Leikurinn er í gangi út morgundaginn og á fimmtudaginn dreg ég vinningshafa.

Indverskur korma kjúklingur

500 g kjúklingalundir
1 lítill laukur, skorinn í þunnar sneiðar
1 tsk rifið engifer
1 tsk hvítlauksmauk (eða 1-2 hökkuð hvítlauksrif)
1 krukka korma sósa (ég nota sósuna frá Patak´s, það eru 450 g. í krukkunni)
Ristaðar kasjúhnetur

Hitið olíu á pönnu við miðlungshita og mýkið laukinn. Bætið hvítlauk, engifer og kjúklingalundum á pönnuna og steikið í um 5 mínútur eða þar til kjúklingurinn er kominn með steikingarhúð en er ekki full eldaður. Bætið sósunni á pönnuna og látið sjóða við vægan hita undir loki í 10 mínútur. Hrærið af og til í pönnunni á meðan.

Nan-brauð

1,5 dl fingurheitt vatn
2 tsk sykur
2 tsk þurrger
4 dl hveiti
0,5 tsk salt
2 msk brætt smjör
2 msk hreint jógúrt
Garam Masala (má sleppa)
gróft salt, t.d. Maldon (má sleppa)

Hrærið saman geri, vatni og sykri. Leggið viskastykki yfir skálina og látið standa í 10 mínútur.

Bætið hveiti, salti, smjöri og jógúrt saman við og hnoðið saman í deig. Leggið viskastykki yfir skálina og látið deigið hefast í 30 mínútur.

Skiptið deiginu í 4-6 hluta (eftir hversu stór þú vilt að brauðin verði) og sléttið út í aflöng brauð (það þarf ekkert kökukefli, hendurnar duga vel). Mér þykir gott að krydda brauðin með garam masala og grófu salti áður en ég steiki þau. Bræðið smjör á pönnu við miðlungshita og steikið brauðið í 3-4 mínútur áður en því er snúið við og steikt áfram í 2-3 mínútur.