Þessi vika hefur verið ein sú rólegasta í langan tíma og ég hef notið þess að fara beint heim eftir vinnu og eyða því sem eftir er af deginum heima í rólegheitum. Mér þykir svo gott að fá svona daga í algjörri afslöppun. Nú tekur við annasöm og skemmitleg vika með tveimur saumaklúbbum, lakkrísveislu á Kolabrautinni og löngu tímabærri klippingu. Það sem ég hlakka til!

Matseðill vikunnar geymir allt frá ljúffengri fiskuppskrift frá mömmu til himneskrar hnetusmjörsköku sem er í miklu uppáhaldi hjá Ögga. Ef þið hafið ekki smakkað kjúklingaréttinn á föstudeginum þá hvet ég ykkur líka til að prófa hann. Hann vekur alltaf lukku.

Mánudagur: Fiskréttur með blaðlauk og sveppum er frábær mánudagsréttur. Uppskriftina fékk ég frá mömmu og rétturinn er ljúffengur eins og allt sem kemur úr eldhúsinu hennar.

Þriðjudagur: Það á eftir að gleðja krakkana að sjá milljón dollara spaghetti á matseðlinum. Þessi uppskrift var sú vinsælasta á blogginu í fyrra og er sérlega fjölskylduvæn.

Miðvikudagur: Mér þykir þessi mexíkóska kjötsúpa dásamleg og passa vel núna í myrkrinu og kuldanum.

Fimmtudagur: Pasta með púrrulauk og beikoni að hætti Jamie Oliver er svo gott að það er tilhlökkunarefni að vita af því á matseðlinum. Ódýr og einfaldur réttur sem kemur virkulega á óvart.

Föstudagur: Kjúklingur með karamelluhúðaðri papriku í mangó chutney sósu svíkur engan.

Með helgarkaffinu: Himnesk hnetusmjörskaka sem mun ekki standa lengi á borðinu.

Núna þegar veturinn nálgast með hraði, það er farið að kólna í veðri og meira að segja þarf að draga rúðusköfuna fram suma morgna þykir mér enn mikilvægara að vera skipulögð í matarinnkaupum. Mér hryllir við tilhugsunina að þurfa að fara í búðina eftir vinnu og ákveða hvað eigi að vera í matinn. Nei, stórinnkaup um helgar er það sem hentar mér.

Hér kemur mín tillaga að vikumatseðli fyrir næstu viku. Ekki fúlsa við pylsuréttinum á fimmtudeginum, hann er ljúffengur og krakkarnir elska hann. Ég vona að matseðillinn nýtist ykkur og enn fremur vona ég að þið vikan verði ykkur góð.

Mánudagur: Mér þykir Steiktur fiskur í parmesanraspi vera góð byrjun á vikunni. Við fáum okkur hrásalat og hvítlaukssósu með honum.

Þriðjudagur: Ofnbakaðar kjötbollur með kartöflumús og sósu er einn af uppáhalds hversdagsmatnum mínum.

Miðvikudagur: Sveppasúpa er einföld og ódýr máltíð sem passar vel í miðri viku.

Fimmtudagur: Pylsupottréttur með beikoni og sweet chili rjómasósu. Fljótlegt og  hentar því vel á fimmtudögum. Ekki skemmir fyrir hvað þetta er vinsælt hjá krökkunum.

Föstudagur: Mér þykja fylltar tortillaskálar vera fullkominn föstudagsmatur. Einfaldar, fljótgerðar og súpergóðar!

Með helgarkaffinu: Mokkakakan fer alltaf vel með kaffinu. Ég hef bakað hana svo óteljandi oft og fæ ekki nóg af henni.

Mér sýndist tillagan að vikumatseðlinum sem ég setti inn síðasta sunnudag falla í góðan jarðveg og endurtek því leikinn. Nú geng ég þó skrefinu lengra og sting líka upp á köku til að eiga með helgarkaffinu. Þessi vika býður upp á rétti heimshorna á milli og ég vona að þið finnið eitthvað sem ykkur líkar.

Mánudagur: Ofnbakaður fiskur með paprikusósu. Það getur verið gott að nota smurosta í sósur og hér passar paprikusmurosturinn mjög vel með fiskinum.

Þriðjudagur: Spaghetti bolognese. Klassískt og gott. Mér þykir sýrði rjóminn lyfta réttinum upp á hærra plan og verð alsæl ef það er afgangur í nestiboxið daginn eftir.

Miðvikudagur: Ofnbakaður grjónagrautur sem gerir eldamennskuna eins einfalda og hægt er.

Fimmtudagur: Þessar bragðmiklu tælensku núðlur með kjúklingi munu lífga upp á daginn.

Föstudagur: Mexíkósk kjúklingabaka. Súpergóð baka sem passar vel á föstudagskvöldum. Berið hana fram með salati, nachos, guacamole og salsasósu og hamingjan verður taumlaus.

Með helgarkaffinu: Silvíukaka. Ljúffeng kaka sem tekur enga stund að reiða fram og hráefnið í hana er yfirleitt til í skápunum. Ein af uppáhöldunum hér á bæ.