Sloppy Joe

mars 20, 2014október 1, 2020 ~ Svava ~ 3 athugasemd

Þegar við fórum heim frá Orlando langaði mig allra helst til að fylla ferðatöskurnar af matreiðslubókum. Ég hafði nokkrum dögum áður eytt góðum parti úr degi í Barnes & Nobles, í hættulega þægilegum hægindastól, og flett hverri bókinni á fætur annarri. Mig langaði í svo óteljandi margar, enda úrvalið æðislegt, en ég hef sem betur fer í gegnum tíðina áttað mig á því hvaða matreiðslubækur ég nota og hverjar enda upp í hillu. Uppskriftir með framandi hráefnum, flóknum eldunaraðferðum og engum myndum ná sjaldan til mín.

Á endanum fengu þrjár matreiðslubækur að fylgja mér heim, tvær eftir Ree Drummond (sem er eflaust betur þekkt sem The Pioneer Woman) og síðan áhugaverð bók sem ég greip á hlaupum í Target eitt kvöldið, Fifty Shades of Chicken. Á kápunni stendur að bókin sé „The New York Times Bestseller“, hún hefur fengið góða dóma og uppskriftirnar lofa góðu. Það var þó ekki fyrr en ég var komin heim og fór að fletta bókinni betur að ég áttaði mig á að hún er skrifuð í anda Fifty Shades of Grey. Uppskriftirnar hafa kjánalega klámfengna forsögu, inn á milli fallegra mynda af kjúklingaréttum má finna myndir af karlmanni sem er ýmist ber að ofan eða í svuntu einni klæða að stússast í eldhúsinu og uppskriftirnar heita nöfnum eins og Roast Me All Night Long Chicken og Happy Ending Chicken. Þetta er allt voða girnilegt og flott en ég veit ekki, getur maður boðið tengdaforeldrum sínum í kjúkling sem heitir Sexy Sliders? Ég er alla vega orðin spennt að prófa uppskriftirnar og á eflaust eftir að hóa í saumaklúbbinn í Jerked-Around eða Please Don´t Stop Chicken fljótlega.

Bækur Ree Drummond eru af öðrum toga enda mjög fjölskylduvænar og ég fæ ekki betur séð en að uppskriftirnar séu dásamlegar. Síðasta föstudagskvöld vígði ég aðra bókina þegar ég eldaði rétt sem heitir Sloppy Joe. Uppskriftin kom úr The Pioneer Woman Cooks, Food From my Frontier, og var stórkostlega góð. Svona matur hittir alltaf í mark hér heima. Það varð smá afgangur af hakkblöndunni sem var settur í frysti og mun fara ofan á pizzu næst þegar við höfum pizzukvöld.

Sloppy Joe (lítillega breytt uppskrift frá The Pioneer Woman)

600 g nautahakk
1 græn paprika, skorin smátt
1 laukur, skorinn smátt
3 hvítlauksrif, pressuð
1 bolli tómatsósa
2/3 bolli vatn
2 msk púðursykur
1 tsk chiliduft
1 tsk sinnepsduft
1/2 tsk rauðar piparflögur (red pepper flakes)
Chili Explosion krydd (má sleppa en mér þykir það alltaf gefa hakkréttum svo gott bragð)
Worcestershire sósa eftir smekk
Tabasco sósa eftir smekk
Salt og pipar eftir smekk
6 hamborgarabrauð

Brúnið nautahakkið á pönnu. Hellið fitunni af og bætið papriku og lauki á pönnuna. Steikið áfram og bætið hvítlauk á pönnuna. Hellið tómatsósu og vatni á pönnuna á hrærið öllu saman. Bætið púðursykri, chilidufti, sinnepsdufti, piparflögum, chili explosion, worcestershire sósu, tabasco sósu, salti og pipar á pönnuna. Hrærið öllu saman og látið sjóða undir loki við vægan hita í 20 mínútur.

Smyrjið hamborgarabrauðin með smjöri og steikið á pönnu (með smjörhliðina niður) þar til þau hafa fengið gyllta og stökka húð. Setjið nautahakksböndina á hamborgarabrauðin og berið fram með frönskum, salati, snakki eða því sem hugurinn girnist. Við settum ýmist sýrðan rjóma eða kokteilsósu á hamborgarabrauðin áður en nautahakksblandan fór á. Súpergott!

Vikumatseðill

mars 16, 2014október 1, 2020 ~ Svava ~ 1 athugasemd

Erna vinkona mín gaf mér æðislegan handáburð fyrir jól. Mér þykir lyktin af honum svo fersk og fullkomin í alla staði og varð því að vonum glöð þegar ég rak augun í handsápu frá sama merki í Hagkaup um daginn. Núna standa sápan og handáburðurinn við baðvaskinn og gefa hversdagsleikanum örlitla fegurð. Þær eiga þó kannski betur heima við eldhúsvaskinn, sérstaklega með tilliti til þess að lyktirnar koma frá ávöxtum og kryddum.

Eftir að hafa lýst með fjarveru sinni undanfarnar vikur þá er vikumatseðillinn hér aftur á sínum stað. Ég vona að þið finnið eitthvað á honum sem ykkur líkar.

Mánudagur: Mér þykir fiskur með beikoni og eggjasósu vera ljúffeng byrjun á vikunni. Samsetningin kemur skemmtilega á óvart!

Þriðjudagur: Kjötbollur vekja alltaf lukku hér á bæ og okkur þykja þessar ofnbökuðu kjötbollur æðislegar.

Miðvikudagur: Blómkálssúpan stendur alltaf fyrir sínu og fellur í kramið hjá öllum aldurshópum.

Fimmtudagur: Sveppapasta er fljótlegt og gott. Það er ekki svo galið að bera það fram með New York Times-brauði.

Föstudagur: Mér þykir mexíkóskur mangókjúklingur vera fullkominn föstudagsmatur. Ég ber hann fram með salati (iceberg sem hefur legið í ísköldu vatni og er því brakandi stökkt) með rauðri papriku, rauðlauki, kokteiltómötum, miklu avókadó, fetaosti og mulnu nachos (svart Doritos).

Með helgarkaffinu: Hnetusmjörs- og súkkulaðivöfflur með bananarjóma lífga upp á hvaða dag sem er og sóma sig vel með helgarkaffinu.

Tobleronemús

mars 13, 2014október 1, 2020 ~ Svava ~ 6 athugasemd

Ég hef eytt síðustu dögum í að kynna mér menntaskólana með Malínu. Mér þykir svo ótrúlegt að það sé komið að þessu og langar allra mest til að stöðva tímann. Hún ákvað að heimsækja skólana sem koma til greina áður en hún tekur lokaákvörðun og ég reyni hvað ég get að sitja á skoðunum mínum og hafa sem minnst áhrif á hana. Það er jú hún sem ætlar að eyða næstu árum á skólabekk, ekki ég. Ég nýt þess þó að taka þátt í þessu með henni, að skoða skólana og heyra hvað henni finnst. Hún hefur alltaf haft sterkar skoðanir og verið skynsöm, ég hef því engar áhyggjur yfir að hún velji annað en rétt.

Mér datt í hug að setja inn uppskrift af æðislegri súkkulaðimús sem gæti verið sniðugt að bjóða upp á um helgina. Ég gaf uppskriftina í nýjasta tölublaði MAN magasín. Ég veit ekki hvort ég hafi sagt frá því áður en ég hef gefið uppskriftir í MAN frá upphafi og ef þið hafið ekki skoðað blaðið hvet ég ykkur til þess því það er æðislegt. Ég verð alltaf jafn glöð þegar ég kem heim og nýtt tölublað bíður mín.

Tobleronamús

100 g Toblerone
100 g dökkt Toblerone eða suðusúkkulaði
4 eggjarauður
5 dl rjómi

Bræðið súkkulaðið yfir vatnsbaði eða í örbylgjuofni. Látið það kólna örlítið og hrærið síðan eggjarauðum saman við þar til blandan er slétt. Léttþeytið rjómann og hrærið honum saman við súkkulaðiblönduna í smáum skömmtum. Setjið í skálar og látið standa í ísskáp þar til Tobleronemúsin hefur stífnað.

Heima er best!

mars 10, 2014mars 10, 2014 ~ Svava ~ 8 athugasemd

Þá er ég komin aftur heim eftir yndislegar vikur í Orlando. Ég hafði hugsað mér að blogga í fríinu en þegar á hólminn var komið hafði ég enga löngun til að sitja við tölvuna. Það fór svo að ég kom varla nálægt henni allt fríið og sit því í súpunni núna. Það hafa aldrei beðið mín jafn margir óopnaðir tölvupóstar og ég vona að þið fyrirgefið mér ef ég hef ekki svarað ykkur. Endilega sendið mér aftur póst ef svo er.

Það er yndislegt að vera í Florida og ný ævintýri bíða á hverjum degi. Við fórum í skemmtigarða, á tónleika, á ströndina, í hjólaskautahöll, í siglingu, á nýja veitingastaði á hverju kvöldi og svo mætti lengi telja en það sem stóð upp úr var þegar við keyrðum út fyrir Orlando og leigðum okkur kajak. Það var búið að vara okkur við krókódílum í vatninu og við sáum nokkra, þar af einn sem fór alveg upp við kajakinn okkar. Þvílíkt ævintýri og svo æðislega skemmtilegt.

Ég hef enga uppskrift til að deila hér í kvöld enda hef ég varla eldað nokkuð af viti síðustu vikurnar. Undir lokin á fríinu gat ég ekki beðið eftir að komast aftur heim í eldhúsið mitt og hef síðustu daga legið yfir uppskriftum til að prófa. Mig langaði bara til að kíkja hingað inn til að senda ykkur smá kveðju. Ég var farin að sakna ykkar.

Ég sá að Facebook-fylgjendur Ljúfmetis eru að nálgast 13.000! Ég er orðlaus og þakklát inn að hjartarótum. Takk, takk, takk! Þið gleðjið mig meira en ég mun nokkurn tímann fá lýst.

Vikumatseðill

febrúar 9, 2014október 1, 2020 ~ Svava ~ 2 athugasemd

Það sem af er helginni hef ég eytt í mestu makindum. Hitt vinkonu mína, gert vikuinnkaupin, fengið mömmu í kaffi, prjónað og borðað allt of mikið af nammi. Í dag ætla ég að rífa mig upp og ganga Sveifluháls með nokkrum vinnufélögum. Ég veit að það verður frábær ferð og ekki skemmir fyrir hvað veðrið er fallegt.

Eins og svo oft áður vil ég byrja vikuna á fiski og parmesanhjúpaður fiskur stendur efst á óskalistanum hjá mér. Pastagratínið á þriðjudeginum gæti vel dugað í tvær máltíðir, sérstaklega ef þú drýgir það með salati og brauði. Núðlurnar á fimmtudeginum koma skemmtilega á óvart og ef þið hafið ekki prófað mexíkósku kjúklingabökuna þá hvet ég ykkur til þess. Hún hefur verið í uppáhaldi hjá okkur frá því að ég gerði hana fyrst.

Mánudagur: Mér þykir steiktur fiskur í parmesanraspi vera góð byrjun á vikunni.

Þriðjudagur: Pastagratín vekur alltaf lukku og ég elska að uppskriftin dugar okkur í kvöldmat og nesti daginn eftir.

Miðvikudagur: Mér þykir gott að hafa súpu í miðri viku og þessi sveppasúpa er bæði einföld og góð.

Fimmtudagur: Jakob mun hoppa hæð sína þegar hann sér þessar bragðmiklu tælensku núðlur með kjúklingi á matseðlinum. Hann gæti lifað á núðlum og þessar eru mjög góðar.

Föstudagur: Þessi mexíkóska kjúklingabaka er ein af mínum uppáhalds. Ég ber hana fram með salati, nachos, salsa, sýrðum rjóma og guacamole.

Með helgarkaffinu: Möndlukakan er jafn falleg og hún er góð. Ég hef ekki keypt möndluköku eftir að ég datt niður á þessa uppskrift því þessi er svo margfalt betri og það tekur enga stund að baka hana.

Nutellasjeik

febrúar 5, 2014október 1, 2020 ~ Svava ~ 4 athugasemd

Við létum alþjóðlega Nutella-daginn ekki framhjá okkur fara, enda verð ég seint þekkt fyrir að grípa ekki tækifæri til að gera vel við mig!

Ég gerði Nutellasjeik sem við fengum okkur eftir kvöldmatinn. Hann er svo hressandi og dásamlega góður. Einfaldara gerist það ekki og krakkarnir elska hann.

Nutellasjeik (2 stór glös)

2 bollar vanilluís
1/2 bolli mjólk
4 msk Nutella

Mixið allt saman í blandara eða með töfrasprota. Hellið í glös og skreytið með t.d. með þeyttum rjóma, súkkulaðispæni og súkkulaðisósu.

Blóðappelsínu ostakaka

febrúar 4, 2014október 1, 2020 ~ Svava ~ 4 athugasemd

Þegar ég verslaði inn um helgina sá ég að ávöxtur mánaðarins í Hagkaup er blóðappelsína. Þær voru svo girnilegar að ég greip tvo poka með mér. Við vorum fljót að klára fyrri pokann, enda gjörsamlega ómótstæðilegar kaldar og safaríkar úr íssápnum, en hinn fékk að fara í ostaköku sem ég hef haft augastað á og beðið eftir tækifæri til að baka.

Ég var svo heppin að eiga von á tengdaforeldrum mínum í mat kvöldið eftir og gat því boðið þeim upp á ostakökuna í eftirrétt. Kakan vakti mikla lukku því bæði er hún falleg á borði og smakkast dásamlega. Frískandi og fullkominn eftirréttur að mínu mati.

Ég bakaði kökuna deginum áður og gerði efsta lagið daginn sem ég bar hana fram. Í fljótu bragði lítur kakan kannski út fyrir að vera flókin og tímafrek en svo er nú ekki. Það tekur enga stund að gera kökuna og það er jafnvel betra að gera hana með dags fyrirvara, sem mér þykir geta verið mikill kostur.

Að lokum vil ég benda á að á morgun er alþjóðlegi Nutella-dagurinn og því um að gera að nýta tækifærið og bjóða upp á góðgæti með Nutella í. Þú finnur nokkrar góðar uppskriftir hér á blogginu, t.d. þessa mjúku Nutellaformköku sem er æðisleg með kaldri mjólk, bananaköku með Nutellakremi sem hefur fengið mikið hrós, bananabrauð með Nutella sem á eftir að hverfa ofan í mannskapinn á svipstundu, hnetusmjörs- og Nutella kökur, hafrakökur með bönunum og Nutella, hnetusmjörs- og bananapönnukökur með Nutellasýrópi sem slá alltaf í gegn á morgunverðarborðinu og heitur Nutella súkkulaðidrykkur sem tekur enga stund að gera.

Blóðappelsínu ostakaka

Botninn

200 g Digestivekex
50 g piparkökur
100 g smjör

Lag 1

450 g Philadelphia ostur
um 1 msk rifið hýði af blóðappelsínu (passið að taka bara ysta lagið og ekki hvíta hlutann, hann gefur beiskt bragð)
2 msk safi úr blóðappelsínu
3 egg
1¼ dl sykur

Lag 2

3 dl sýrður rjómi
3 msk sykur
1 msk vanillusykur

Lag 3

1½ dl safi úr blóðappelsínum
2 matarlímsblöð

Hitið ofninn í 180°.

Myljið kexin og blandið bræddu smjöri saman við. Þrýstið blöndunni í botn á 24 cm kökuformi og bakið í 5-10 mínútur.

Setjið öll hráefnin í lag 1 í matvinnsluvél og vinnið saman í jafnt deig (það er líka hægt að nota töfrasprota). Hellið deiginu yfir forbakaðann kexbotninn og bakið neðarlega í ofninum í 25 mínútur. Passið að baka kökuna ekki lengur svo hún verði ekki þurr.

Hrærið hráefnunum í lag 2 saman og breiðið yfir kökuna. Bakið í 5 mínútur til viðbótar. Látið kökuna kólna alveg (helst í ísskáp yfir nóttu) áður en lag 3 er sett yfir.

Leggið matarlímsblöðin í kalt vatn. Hitið safann úr blóðappelsínum í potti. Takið af hitanum, kreystið vökvann frá matarlímsblöðunum og bætið blöðunum í pottinn. Hrærið þar til matarlímsblöðin hafa bráðnað. Látið kólna aðeins áður en blöndunni er hellt varlega yfir kökuna. Látið kökuna standa í ísskáp þar til hlaupið hefur stífnað.

Berið kökuna fram kalda úr ísskáp og gjarnan með þeyttum rjóma.

Puffed pancake

febrúar 1, 2014október 1, 2020 ~ Svava ~ 4 athugasemd

Um síðustu helgi prófaði ég að gera „puffed pancake“ í morgunmat. Það tók enga stund og krakkarnir voru svo ánægð með þessa byrjun á deginum að þau kláruðu pönnukökuna áður en ég náði að smakka hana. Ég hef því ekki hugmynd um hvernig hún bragðaðist en þau gáfu henni bestu einkunn. Það eru eflaust til betri uppskriftir en þessi féll vel í kramið hjá krökkunum og ég hlakka til að prófa hana aftur og smakka sjálf.

Ég bar pönnukökuna fram með jarðaberjum, flórsykri, hlynsýrópi og rjóma en hér er tækifæri til að gefa hugmyndafluginu lausan tauminn. Mér dettur í hug að það gæti verið gott að bera pönnukökuna fram með t.d. bláberjum, hindberjum, ávöxtum, banana, möndluflögum, kókosflögum, hlynsýrópi, sítrónusafa, Nutella…

Puffed pancake (ein pönnukaka sem hverfur á svipstundu ofan í þrjú börn)

2 egg
½ bolli mjólk
½ bolli hveiti
smá salt
smá kanil
1 msk smjör

Hitið ofninn í 215°.

Á meðan ofninn hitnar er smjörið látið bráðna í bökunarformi í ofninum. Hrærið egg, mjólk, hveiti, salt og kanil saman í skál. Hellið deiginu í heitt bráðið smjörið í bökunarforminu. Bakið í 10-12 mínútur eða þar til pönnukakan er stíf og uppblásin meðfram kanntinum. Kakan sekkur aðeins niður þegar hún kemur úr ofninum. Berið strax fram.

Fiskbakan frábæra

janúar 28, 2014október 1, 2020 ~ Svava ~ 4 athugasemd

Sumarið 2001 voru matreiðsluþættir með Jamie Oliver sýndir í sænska sjónvarpinu. Ég missti helst ekki af þætti og þegar mér leist vel á uppskriftirnar reyndi ég að skrifa þær niður. Það var oft hægara sagt en gert og á endanum gafst ég upp og keypti mér matreiðslubókina. Síðan þá hef ég eignast margar bækur eftir hann og hef enn ekki verið svikin af uppskriftunum.

Það var þetta sumar sem ég eldaði í fyrsta sinn fiskbökuna hans Jamie Oliver. Okkur þótti hún stórgóð og um daginn fékk ég æðislega löngun í að elda hana aftur. Ég dró því gömlu bókina fram og mánudagsfiskinum var reddað.

Jamie Oliver segir að rétturinn eigi að vera heimilislegur og tilgerðarlaus og ber hann fram með bökuðum baunum og tómatsósu, sem sé ósmekklegt en gott eins og hann vill hafa það. Samsetningin kann að hljóma furðulega en hún kemur á óvart og allt fer þetta mjög vel saman.

Fiskbakan frábæra (uppskrift frá Jamie Oliver)

6 stórar kartöflur, afhýddar og skornar í bita
ólífuolía (eða smjör)
salt og nýmalaður svartur pipar
múskat (má sleppa)
2 egg
2 stórir hnefar af spínati
1 laukur, saxaður smátt
1 gulrót, skorin í tvennt og söxuð smátt
2,5 dl rjómi
2 vænir hnefar af rifnum cheddar- eða parmesanosti
safi úr 1 sítrónu
1 kúfuð teskeið enskt sinnep
stór hnefi af steinselju, söxuð smátt (má sleppa)
450 g ýsu- eða þorskflök, roðflett, beinhreinsuð og skorið í ræmur

Hitið ofninn í 230°.

Setjið kartöflurnar í sjóðandi saltað vatn og látið þær sjóða í 2 mínútur. Setjið eggin varlega út í og sjóðið þau í 8 mínútur. Eggin eiga þá að vera orðin harðsoðin og kartöflurnar líka soðnar. Gufusjóðið spínatið um leið í sigti ofan á pottinum (það tekur bara um 1 mínútu). Takið spínatið úr sigtinu, kreistið varlega úr því umframvætu og leggið til hliðar.

Takið eggin úr pottinum, kælið undir köldu vatni, takið utan af þeim og skerið í fernt. Leggið til hliðar.

Stappið kartöflurnar og setjið ólívuolíu eða brætt smjör saman við þær (ég nota alltaf smjör). Kryddið með salti, pipar og jafnvel smá múskati. Leggið til hliðar.

Steikið lauk og gulrót í ólífuolíu við vægan hita í um 5 mínútur. Hellið þá rjóma yfir og hitið að suðu. Takið pönnuna af hitanum og hrærið osti, sítrónusafa, sinnepi og steinselju saman við.

Setjið fiskinn, spínatið og eggin í eldfast mót. Hellið rjómasósunni með grænmetinu yfir og endið á að setja kartöflumúsina ofan á. Setjið í ofn í 25-30 mínútur eða þar til kartöflurnar eru orðnar gylltar á lit. Berið fram með bökuðum baunum og tómatsósu.

Súkkulaðisjeik

janúar 25, 2014október 1, 2020 ~ Svava ~ 5 athugasemd

Ískaldur og svalandi súkkulaðisjeik er alltaf viðeigandi og stórgóð leið til að lífga upp á hversdagsleikann. Við fengum okkur þennan í eftirrétt í vikunni og glösin voru ekki lengi að tæmast. Krakkarnir gáfu þumalinn upp og mig grunar að blandarinn okkar fái litla hvíld á næstunni.