Eins og þeir sem fylgja mér á Instagram hafa eflaust tekið eftir þá hef ég eytt síðustu dögum með mömmu og Malínu hjá systur minni í Kaupmannahöfn. Við flugum út á fimmtudagsmorgun og komum aftur heim í dag. Við áttum yndislega daga saman, gengum um bæinn, sátum á kaffihúsum, litum í búðir, dáðumst af fallegum jólaskreytingum og borðuðum ris a la mande. Þess á milli nutum við þess að stjana við systurdóttur mína sem vefur okkur um fingur sér án þess að hafa nokkuð fyrir því. Á kvöldin vöktum við frameftir yfir skálum fullum af sætindum og nutum þess að vera allar saman komnar. Það gerist allt of sjaldan þar sem systir mín hefur búið úti í yfir 10 ár.

Þrátt fyrir ævintýri síðustu daga er matseðillinn hér á sínum stað. Á sunnudegi eins og hefð er fyrir en kannski örlítið seinn á ferðinni. Ég vona að það komi ekki að sök.

Mánudagur: Pönnusteiktur þorskur með sætum kartöflubátum og basilikumajónesi að hætti Jamie Oliver þykir mér góður réttur, eins og flest sem frá honum kemur.

Þriðjudagur: Ofnbökuð eggjakaka með nautahakki er góður hversdagsmatur sem krakkarnir eru hrifnir af.

Miðvikudagur: Rjómalöguð kjúklingasúpa fer vel í kuldanum og myrkrinu.

Fimmtudagur: Brauð með ítalskri fyllingu fær pláss á matseðlinum því það er svo gott.

Föstudagur: Tælenskur kjúklingur í grænu karrýi þykir mér æðislega góður réttur. Það tekur stutta stund að matreiða réttinn sem gerir hann að frábærum föstudagsmat.

Með helgarkaffinu: Þessi mjúka kanilsnúðakaka vekur alltaf lukku og fer því vel með helgarkaffinu.

Í dag er von á ljósmyndara hingað heim til að mynda fyrir tímarit sem kemur út á næstunni. Ég er búin að baka köku og hef mestar áhyggjur af því að einhver fái sér sneið af henni áður en ljósmyndarinn kemur. Kakan kallar á mig og ég get ekki beðið eftir að myndatakan verði yfirstaðin og við getum sest niður og notið hennar. Ég hlakka líka til að gefa ykkur uppskriftina en það verður víst að bíða.

Ég gerði matseðil fyrir komandi viku seint í gærkvöldi. Mér þykir hann sérlega ljúffengur. Ef þið hafið ekki bakað New York times-brauðið þá mæli ég með að þið prófið. Það er svo gott að það nær engri átt.

Mánudagur: Gratíneraður fiskur með púrrulauk og blómkáli er réttur sem krakkarnir elska og ljúffeng byrjun á vikunni.

Þriðjudagur: Í síðustu viku elduðu tveir vinnufélagar mínir hakkabuff með fetaosti sem gerði það að verkum að ég hef hugsað um þau síðan. Það var því engin spurning að þau færu á  matseðilinn.

Miðvikudagur: Sveppapasta þykir mér passa vel í miðri viku. Einfalt, ódýrt og stórgott. Ég mæli með að hræra í New York times brauð kvöldinu áður til að bera fram með pastanu. Það tekur enga stund og þið munuð ekki sjá eftir því. Betra brauð en vandfundið.

Fimmtudagur: Mér þykir Bangkok-kjúklingurinn dásamlega góður og tilhlökkunarefni að vita af honum á matseðlinum. Gerið ríkulegan skammt til að eiga í nestisbox daginn eftir er mín tillaga.

Föstudagur: Gratinerað taco er fullkominn föstudagsmatur. Svo æðislega einfalt og brjálæðislega gott.

Með helgarkaffinu: Hvernig væri að gera vel við sig með góðum vöfflum (besta uppskrift sem ég hef prófað!) með sultu og rjóma og heitum Nutella-súkkulaðidrykk? Ekki svo galið myndi ég halda.

Þessi vika hefur verið ein sú rólegasta í langan tíma og ég hef notið þess að fara beint heim eftir vinnu og eyða því sem eftir er af deginum heima í rólegheitum. Mér þykir svo gott að fá svona daga í algjörri afslöppun. Nú tekur við annasöm og skemmitleg vika með tveimur saumaklúbbum, lakkrísveislu á Kolabrautinni og löngu tímabærri klippingu. Það sem ég hlakka til!

Matseðill vikunnar geymir allt frá ljúffengri fiskuppskrift frá mömmu til himneskrar hnetusmjörsköku sem er í miklu uppáhaldi hjá Ögga. Ef þið hafið ekki smakkað kjúklingaréttinn á föstudeginum þá hvet ég ykkur líka til að prófa hann. Hann vekur alltaf lukku.

Mánudagur: Fiskréttur með blaðlauk og sveppum er frábær mánudagsréttur. Uppskriftina fékk ég frá mömmu og rétturinn er ljúffengur eins og allt sem kemur úr eldhúsinu hennar.

Þriðjudagur: Það á eftir að gleðja krakkana að sjá milljón dollara spaghetti á matseðlinum. Þessi uppskrift var sú vinsælasta á blogginu í fyrra og er sérlega fjölskylduvæn.

Miðvikudagur: Mér þykir þessi mexíkóska kjötsúpa dásamleg og passa vel núna í myrkrinu og kuldanum.

Fimmtudagur: Pasta með púrrulauk og beikoni að hætti Jamie Oliver er svo gott að það er tilhlökkunarefni að vita af því á matseðlinum. Ódýr og einfaldur réttur sem kemur virkulega á óvart.

Föstudagur: Kjúklingur með karamelluhúðaðri papriku í mangó chutney sósu svíkur engan.

Með helgarkaffinu: Himnesk hnetusmjörskaka sem mun ekki standa lengi á borðinu.