Litlar After Eight pavlovur

janúar 6, 2018október 1, 2020 ~ Svava ~ 1 athugasemd

Hér kemur síðasta uppskriftin frá áramótunum okkar, nefnilega eftirrétturinn. Ég er vön að vera með tvenna eftirrétti á gamlárskvöld en núna lét ég einn duga. Ég gerði litlar pavlovur með After eight bæði í botninum og í rjómanum. Svo gott!

Botnana gerði ég kvöldið áður. Ég bræddi líka súkkulaðið í rjómanum þá og geymdi í ísskáp yfir nóttu. Daginn eftir þeytti ég súkkulaðirjómann upp og sprautaði yfir botnana. Áður en ég bar kökurnar fram skreytti ég þær með berjum og Afteri eight plötu sem hafði verið skorin í þríhyrning. Þar sem við elskum rjóma í þessar fjölskyldu þá bar ég léttþeyttan rjóma með til hliðar.

After Eight pavlovur – uppskriftin gefur 12 litlar pavlovur

Botnar:

4 eggjahvítur við stofuhita
2 dl sykur
1/2 tsk balsamik edik
50 g After Eight

Yfir pavlovurnar

200 g After Eight
2 dl rjómi
fersk ber og kökuskraut til að setja yfir

Setjið eggjahvíturnar í skál og þeytið, fyrst hægt en aukið svo hraðan. Þegar eggjahvíturnar byrja að þykkna er sykrinum bætt út í smátt og smátt á meðan hrærivélin gengur. Þeytið áfram þar til marensinn er orðinn glansandi og vel stífur. Bætið balsamik ediki út í undir lokin. Bræðið nú After Eight og blandið varlega saman við marensinn. Látið helst súkkulaðirendurnar sjást.

Hitið ofninn í 150°. Setjið bökunarpappír og ofnplötu og setjið marensinn í sprautupoka (eða mótið pavlovurnar með tveim skeiðum). Sprautið 12 pavlovur á bökunarpappírinn og látið vera smá dæld í miðjunni á þeim. Bakið í neðri hluta ofnsins í um 60 mínútur. Látið kólna alveg áður en fyllingin er sett yfir.

Hitið rjóma að suðu, takið pottinn af hitanum og leggið After Eight plöturnar í pottinn. Hrærið saman þar til súkkulaðið er alveg bráðnað. Látið After Eigth rjómann kólna alveg í ísskáp (það er sniðugt að gera þetta kvöldið áður svo rjóminn geti kólnað yfir nóttu). Þeytið Afteri Eight rjómann upp og setjið yfir pavlovurnar. Skreytið með ferskum berjum, After Eight plötum og kökuskrauti.

SaveSave

Humar með eplarjómasósu

janúar 5, 2018október 1, 2020 ~ Svava ~ 2 athugasemd

Eins og fram hefur komið var ég með humarforrétt á gamlárskvöld. Þennan rétt smakkaði ég fyrst hjá Ernu vinkonu minni fyrir mörgum árum og kolféll fyrir honum. Sósan er himnesk! Uppskriftin kemur úr Veislubók Hagkaups (eftir matreiðslumeistara Argentínu-steikhúss) og ég hef greinilega eldað þennan rétt oftar en ég vil kannast við, því bókin hangir saman á lyginni og blaðsíðan með humaruppskriftinni er laus í henni.

Í uppskriftinni er talað um að nota súputening frá Maggi (eru þeir ennþá til?) en ég nota grænmetistening frá Knorr í staðin. Síðan á að bera réttinn fram með grófu brauði en ég hef alltaf borið hann fram á ristuðu fransbrauði, eins og Erna gerir. Þá rista ég brauðið, sker það i tvennt þannig að brauðsneiðin myndi tvo þríhyrninga og set svo réttinn yfir brauðsneiðina. Ég skreyti síðan réttinn með steinselju en ég hafi hreinlega gleymt að kaupa hana núna. Það kom þó ekki að sök. Þetta er svo brjálæðislega gott að það fengu sér allir aftur á diskinn og Jakob matgæðingurinn minn fékk sér þrjá diska og bræðurnir fengu sér síðan afganginn í morgunmat daginn eftir. Það er ekki lélegt að byrja árið með humarmorgunverði!

Humar með eplarjómasósu (fyrir 6)

500 g skelflettur humar
2 gul epli
50 g smjör

Sósa:

2 skalottlaukar, litlir
1 dl hvítvín
2,5 dl rjómi
1 tsk dijon sinnep
1/2 stk fiskikraftur (teningur frá Knorr)
1/2 – 1 grænmetisteningur frá Knorr
salt og pipar
sósujafnari

Byrjið á sósunni. Saxið laukinn og steikið glæran í olíu á pönnu (passið að hafa hitann ekki of háan, ég nota stillingu 5 af 9). Bætið hvítvíni og rjóma saman við og sjóðið við vægan hita í 5 mínútur. Þykkið ögn með sósujafnara. Bragðbætið með súputeningi, salti, pipar og sinnepi.

Afhýðið og kjarnhreinsið eplin og skerið í smáa teninga. Bræðið smjörið á pönnu og steikið humarinn ásamt eplunum í 1-2 mínútur. Hellið sósunni á pönnuna og látið sjóða í 1 mínútu. Berið strax fram.

SaveSave

Vinsælustu uppskriftirnar árið 2017

janúar 2, 2018október 1, 2020 ~ Svava ~ Skrifa athugasemd

Það er orðin hefð fyrir því hér á blogginu um áramót að birta vinsælustu uppskriftir ársins sem leið. Það er svolítið gaman að sjá sömu uppskriftir ár eftir ár á listanum og margar þeirra eru einmitt þær uppskriftir sem ég nota sjálf hvað oftast. Við þessa samantekt fékk ég óstjórnanlega löngun í skúffukökuna sem er í öðru sæti á listanum og ef ég þekki mig rétt verð ég ekki róleg fyrr en ég verð komin með kökuna fyrir framan mig. Það stefnir því í notalegt kvöldkaffi hér heima.

10 vinsælustu uppskriftirnar á árinu 2017

Tíunda vinsælasta uppskrift ársins var Rice Krispies kaka með bananarjóma og karamellu. Þessi kaka vekur lukku hjá öllum aldurshópum og það tekur enga stund að útbúa hana. Það er því ekki skrítið að kakan sé vinsæl.

Í níunda sæti er uppskrift sem hefur verið í uppáhaldi hjá mér til fjölda ára, mexíkóskt kjúklingalasagna. Ég hef boðið upp á þennan rétt í veislum, matarboðum og haft hann oftar í kvöldmat en ég get talið. Súpergott!

Ofnbakaðar kjötbollur eru áttunda vinsælasta uppskriftin. Þær klikka aldrei og hafa verið með vinsælustu uppskriftum hér á blogginu síðan uppskriftin kom inn.

Í sjöunda sæti eru heimsins bestu súkkulaðibitakökur. Ég myndi vilja eiga þær alltaf í frystinum til að geta nælt mér í þegar löngunin kemur yfir mig.

Sjötta vinsælasta uppskriftin er þykk og góð mexíkósk kjúklingasúpa. Þessi uppskrift er dásamleg en einhverja hluta vegna elda ég hana sjaldan. Það er hins vegar aðra sögu að segja um kjúklingasúpuna sem er í fimmta sæti á listanum.

Fimmta vinsælasta uppskriftin er nefnilega sú uppskrift sem ég elda hvað oftast, mexíkósk kjúklingasúpa. Ég er fyrir lifandis löngu hætt að fylgja uppskriftinni enda gæti ég eldaði þessa súpu í svefni. Hún er í algjöru uppáhaldi hér heima.

Í fjórða sæti á listanum er pizzabotninn sem klikkar aldrei. Það er fátt sem toppar heimagerða pizzu og þessi uppskrift, eins og nafnið gefur til kynna, klikkar aldrei.

Kjúklingur með sætum kartöflum, spínati og fetaosti hefur verið ein vinsælasta uppskriftin á blogginu síðan hún var birt og er núna í þriðja sæti yfir vinsælustu uppskriftir ársins. Mér þykir þessi réttur æðislegur og skil því vel vinsældir hans.

Í öðru sæti á listanum er einföld og góð skúffukaka. Þessi kaka er gjörsamlega ómótstæðileg með köldu mjólkurglasi.

Vinsælasta uppskrift ársins var uppáhalds bananabrauðið. Ég hef heyrt frá lesendum sem segja þetta bananabrauð vera það besta sem þeir hafa bakað og ég tek undir hvert orð. Ég geri alltaf orðið tvöfalda uppskrift því það hverfur eins og dögg fyrir sólu hér heima.

SaveSaveSaveSaveSaveSave

SaveSave

SaveSaveSaveSave

Nýtt ár og nýtt útlit á blogginu!

janúar 1, 2018 ~ Svava ~ 2 athugasemd

Gleðilegt nýtt ár! Eins og glöggir lesendur taka kannski eftir þá hefur bloggið fengið andlislyftingu og það ekki degi of seint. Ég var farin að hálf skammast mín fyrir að vera með margra ára mynd á forsíðunni og fannst kominn tími á breytingu. Ég ákvað því að byrja nýtt ár með nýju útliti hér á blogginu og vona að þið séuð jafn ánægð með breytinguna og ég. Núna eru myndirnar orðnar stærri og textinn líka. Það þarf eflaust að fínpússa eitthvað og allar ábendingar eru vel þegnar.

Við erum að skríða saman eftir gærkvöldið og það mun eflaust enginn fara úr náttfötunum hér í dag. Ég ætla að taka saman vinsælustu uppskriftirnar á blogginu árið 2017 og birta hér að því loknu. Þangað til langaði mig bara til að kíkja inn með nokkrum myndum frá áramótunum okkar.

Ég held að ég hafi aldrei átt jafn afslappaðan gamlársdag. Dagurinn hófst í göngu um Öskjuhlíðina með vinkonum, í tilefni af afmæli einnar úr vinkonuhópnum, þar sem boðið var upp á heitt súkkulaði og mjúkar kringlur í miðri göngu. Veðrið var kalt en fallegt og loftið brakandi ferskt. Svo ólýsanlega hressandi og góð byrjun á deginum.

Eftir gönguna hófst undirbúningurinn fyrir kvöldið. Við vorum með humar í forrétt (uppskriftin er væntanleg), hægeldaðar nautalundir í aðalrétt og litlar pavlovur í eftirrétt. Allt var svo gott! Yfir skaupinu vorum við með snakk og nammi og eftir að búið var að sprengja upp vorum við með ostabakka.

Gunnar strengdi það áramótaheit í fyrra að borða ekkert nammi árið 2017. Það stóð hann við! Ég dáist að honum, þvílíkur sjálfsagi! Þau systkinin fóru svo saman á nammibarinn á gamlársdag og eftir miðnætti í gær, þegar hann var búinn að vera nammilaus í heilt ár og staðist áramótaheitið, var nammipokinn loksins opnaður.

Nú tekur nýtt ár við sem ég vona að verði það besta hingað til!

SaveSave

Síðasti dagur ársins…

desember 31, 2017febrúar 3, 2019 ~ Svava ~ 2 athugasemd

Ég er vön að eyða þessum degi í eldhúsinu frá morgni til kvölds en ákvað að breyta aðeins til þetta árið. Þannig að í staðin fyrir að elda kalkún með öllu tilheyrandi, eins og ég hef gert svo lengi sem minnið nær, þá ætlum við að vera með humar og nautalund í kvöld. Það var því engin vekjaraklukka sem hringdi í morgun þar sem það lá ekkert á að komast í eldhúsið. Lúxus!

Það er varla hægt að fara í gegnum þennan síðasta dag ársins án þess að líta yfir árið sem leið. 2017 var alls konar ár sem bauð upp á óteljandi gleðistundir en lífið minnti líka á sig með alvarlegum veikindum, sem fóru vel að lokum. Það sem stendur þó upp úr eru allar góðu stundirnar. Það var hellingur af þeim! Við kveðjum árið uppfull af þakklæti fyrir góða heilsu og allar þær skemmtilegu minningar sem urðu til á árinu.

Við ferðuðumst svolítið á árinu. Við fórum strax í byrjun árs til Stokkhólms þar sem við áttum svo yndislega daga að daginn sem við komum heim bókuðum við aðra ferð að ári (sem býður okkar núna eftir áramót). Það er lúxus að framlengja jólafríinu svona.

Í mars fórum við til Boston. Við nutum þess að rölta um borgina og þegar leið á daginn settumst við á Eataly yfir ostum og rauðvínsglasi áður en við rötlum áfram. Kvöldunum eyddum við ýmist í boðum eða á veitingastöðum. Dásamlegt í alla staði.

Við fögnuðum sumardeginum fyrsta í París með vinnunni minni. Ég hafði verið í París haustið áður og núna var gaman að upplifa vorið þar. Við fórum í vínsmökkun, hjólaferð, borðuðum æðislegan mat og röltum um borgina. Frábær ferð!

Í júní tókum við skyndiákvörðun og bókuðum aðra Stokkhólmsferð með dags fyrirvara. Veðrið lék við okkur og borgin sýndi sínar bestu hliðar.

Í ágúst héldum við svo á vit ævintýrana og flugum til Balí. Þar eyddum við ævintýralegum vikum en veikindi og spítaladvöl settu öll ferðaplön á hliðina. Ég endaði á að eyða 13 dögum af ferðinni ein á þvælingi um Balí og upplifið margt og mikið. Þrátt fyrir allt get ég ekki annað sagt en að Balí er yndisleg!

Við ferðuðumst lítið innanlands þetta árið en áttum þó yndislega helgi í Vestmannaeyjum í júní. Síðar um sumarið fórum við í dagsferð um suðurlandið með mömmu. Við komum víða við, fengum okkur hádegisverð í Friðheimum og enduðum daginn í kaffi í sveitinni. Ferðaárinu lauk svo með vinafólki í bústað í nóvember.

Í haust hófu strákarnir sitt síðasta grunnskólaár og ég get ekki vanist þeirri tilhugsun að eiga bara menntaskólabörn næsta haust. Það verður stórskrítið. Ef allt gengur eftir mun Malín klára stúentinn á árinu en ég er svo hjátrúarfull að ég þori varla að hugsa út í það…

Mig langar til að þakka ykkur samfylgdina á árinu. Ég er svo þakklát fyrir hvað þið eruð mörg sem lesið hér á hverjum degi og hvað ég fæ oft fallegar kveðjur frá ykkur. Þær eru ómetanlegar. Frá dýpstu hjartarótum óska ég ykkur gleðilegs árs og vona að 2018 muni dekra við okkur!

SaveSave

Fimm tillögur að áramótaeftirréttum

desember 30, 2017október 1, 2020 ~ Svava ~ Skrifa athugasemd

Það styttist óðum í gamlárskvöld og eflaust flestir búnir að negla matseðilinn niður. Ef einhver er að vandræðast yfir eftirréttnum þá koma hér fimm stórgóðar tillögur!

Súkkulaðibaka með sætum rjóma og berjum

Pannacotta með hvítu súkkulaði og ástaraldin

Sítrónumús með lakkrísskífu

Nutelladip

Djúpsteikt Oreo með súkkulaðisósu og ís

SaveSave

Gleðileg jól

desember 27, 2017október 1, 2020 ~ Svava ~ Skrifa athugasemd

Gleðilega hátíð kæru lesendur. Bloggið fór óvænt í smá jólafrí vegna veikinda og anna fyrir jól og síðan datt ég í heimsins mesta letikast yfir jólin og fór bara úr náttfötunum rétt til að mæta í jólaboð. Annars hef ég bara legið í sófanum og lesið á milli þess sem ég hef borðað jólamat og súkkulaði. Ég áttaði mig á því í dag að ég hef ekki einu sinni kveikt á sjónvarpinu öll jólin (það hefur samt verið í stöðugri Playstation notkun hjá strákunum). Ég hef þó verið nokkuð öflug á Instastories yfir jólin, eins og kannski einhverjir hafa orðið varir við.

Jólin voru í einu orði sagt yndisleg. Ég eldaði tvo hamborgarahryggi á aðfangadag sem við borðuðum í þrjá daga en í gærkvöldi fengum við nóg og drógum fram osta og rauðvín í kvöldmatinn. Krakkarnir voru í jólaboði og við vorum bara tvö heima þannig að það var upplagt að sleppa eldamennskunni. Þegar ég segist vera með osta og rauðvín í kvöldmatinn fæ ég stundum spurningar um hvort ég fái mér bara osta í kvöldmat. Stundum höfum við skinkur og salami eða annað plokk með en mín vegna má sleppa því. Við höfum þó oftast snittubrauð eða kex og einhverja góða sultu með. Ég er botnlaus þegar kemur að ostum og þegar við erum bara tvö í mat þá höfum við oftar en ekki osta eða sushi í matinn. Nýjasta æðið er salami með sterka sinnepinu sem er á myndinni og primadonna (skellt í hálfgerða samloku með sinnepinu á milli). Það er brjálæðislega góð blanda.

Það er hefð hjá okkur að vera með möndlugrautinn í hádeginu á aðfangadag. Gunnar er nánast ósigrandi þegar kemur að möndlugjöfum (og bingói, hann mokar alltaf til sín vinningum þar) og í ár ákvað Malín að prófa að stela sætinu við eldhúsborðið af honum, ef ske kynni að lukkan fylgdi því. Það virkaði og Malín fékk loksins möndluna. Mig grunar að það verði barist harkalega um þennan lukkustól um næstu jól…

Ég er í löngu jólafríi þetta árið sem ég ætla að njóta til hins ýtrasta. Við erum farin að huga að áramótamatnum en ég ætla að hvíla kalkúninn þetta árið. Planið er að hafa humar í forrétt og nautalund í aðalrétt. Ég hlakka til!

Ég ætla að slá botninn í þetta í bili og enda á uppskriftinni að jólaísnum okkar. Ég sýndi á Instastories hversu einfalt er að gera ísinn en það tekur grínlaust 5 mínútur að græja hann. Þessi ís er svo mjúkur og góður og það er hægt að bragðbæta hann hvernig sem er. Við vorum líka með súkkulaðimús (Gunnar óskar alltaf eftir súkkulaðimús þegar eitthvað stendur til) og þessi blanda fer svakalega vel saman á eftirréttaborðinu.

Bismark ís

5 dl rjómi
1 dós sæt niðursoðin mjólk
1 poki bismark brjóstsykur (mulinn í matvinnsluvél eða með kökukefli/buffhamri)

Rjóminn er þeyttur þar til hann byrjar að mynda mjúka toppa. Hrærið áfram á lágum hraða og bætið niðursoðnu mjólkinni út í í mjórri bunu. Blandið vel saman. Hrærið brjóstsykrinum saman við og frystið í minnst 6 klukkutíma.

SaveSave

SaveSaveSaveSave

SaveSave

Súkkulaðikökur með bismark brjóstsykri

desember 12, 2017október 1, 2020 ~ Svava ~ 1 athugasemd

Ég ætlaði að setja þessa uppskrift hingað inn í gær en kvöldið tók óvænta stefnu þegar við ákváðum að setja jólatréið upp. Krakkarnir eru í prófum og stóru „börnin“ að vinna þau kvöld sem þau eru ekki að læra og því erfitt að ná öllum saman. Í gærkvöldi voru hins vegar allir heima og enginn að læra undir próf þannig að við gripum gæsina og vorum með hálfgerð litlu jól hér heima. Undir jólaplötu Michael Bublé var jólatréið skreytt á milli þess sem við gæddum okkur á nýbökuðum eplaskífum, flatkökum með hangikjöti, súkkulaðismákökum og heitu súkkulaði með rjóma. Dásamlegt í alla staði.

Helginni var eytt í jólaundirbúning. Það voru keypt jólaföt, við horfðum á jólamynd, keyptum gjafir frá mömmu til strákanna og ég bakaði æðislegar súkkulaðismákökur sem krakkarnir hafa notið þess að gæða sér á í próflestrinum. Ég stóð mig að því að hugsa að vonandi væru þær ekki búnar, þegar ég var á leiðinni heim úr vinnunni í dag, því þær eru æðislegar með kaffibollanum. Heppnin var með mér og nú sit hér hér með kaffibolla og smáköku við tölvuna. Elska svona notalegheit!

Súkkulaðikökur með bismark brjóstsykri

2 1/2 bolli hveiti
1 tsk matarsódi
1/2 tsk sjávarsalt
3/4 bolli kakó
1 bolli ósaltað smjör, við stofuhita
1 bolli sykur
1 bolli púðursykur
2 stór egg, við stofuhita
1 tsk vanilludropar
1 bolli suðusúkkulaðidropar eða grófhakkað suðusúkkulaði

Súkkulaðihjúpur

200 g suðusúkkulaði
1 dl rjómi
1 bolli mulinn bismark brjóstsykur eða jólastafabrjóstsykur

Hitið ofninn í 175° og setjið bökunarpappír á bökunarplötu.

Hrærið saman hveiti, matarsóda, sjávarsalt og kakó. Setjið til hliðar.

Hrærið saman smjöri, sykri og púðursykri í hrærivél (eða með handþeytara). Hrærið eggjunum, einu í einu, saman við. Hrærið vanilludropum í deigið. Bætið þurrefnunum varlega smátt og smátt út í og hrærið saman í deig. Hrærið að lokum súkkulaðinu í deigið.

Mótið litlar kúlur úr deiginu (notið um msk af deigi í hverja kúlu) og raðið á bökunarplötuna. Þrýstið örlítið á kúlurnar og bakið í um 10 mínútur, eða þar til kökurnar hafa fengið stökkan hjúp en eru mjúkar að innan. Passið að ofbaka þær ekki. Takið úr ofninum og látið standa á plötunni í smá stund áður en þær eru færðar yfir á grind og látnar kólna alveg.

Á meðan kökurnar kólna er súkkulaðihjúpurinn útbúinn. Hakkið súkkulaðið og setjið í skál. Hitið rjómann að suðu og hellið yfir súkkulaðið. Látið blönduna standa í 30-45 sekúndur og hrærið síðan í henni þar til blandan er slétt. Dífið helmingnum af kökunum í súkkulaðið, setjið á grind (eða bökunarpappír) og stráið muldum brjóstsykri yfir. Látið kökurnar standa í 1-2 klst eða þar til súkkulaðið er orðið hart. Það má flýta fyrir með því að setja kökurnar í ísskáp.

Smákökubakstur

desember 10, 2017október 1, 2020 ~ Svava ~ Skrifa athugasemd

Gleðilega aðra aðventu kæru lesendur. Aðventan þetta árið er stutt þar sem fjórði sunnudagurinn er aðfangadagur og mér finnst hún vera að hlaupa frá mér. Gunnar var að keppa í gær og eftir leikinn fórum við í Smáralindina og keyptum jólaföt á hann. Í dag ætlum við Jakob í leiðangur og síðan ætla ég að baka smákökur til að eiga. Hér hafa lakkrístoppar verið bakaðir á færibandi síðustu vikur (Malín á heiðurinn af þeirri framleiðslu) og alltaf klárast þeir samdægurs. Ef fleiri eru í baksturhugleiðingum þá koma hér fimm góðar tillögur að marenstoppum!

Piparlakkrístoppar

Marengstoppar með piparfylltum lakkrísreimum og súkkulaði

Lakkrístoppar með karamellukurli

Marengstoppar með frönsku núggati

Karamellutoppar

Nutellafylltar blondies

desember 6, 2017október 1, 2020 ~ Svava ~ Skrifa athugasemd

Ég held að ég hafi aldrei verið eins sein í jólabakstrinum og þetta árið. Ég bakaði piparlakkrístoppana í nóvember sem kláruðust samstundis og síðan hefur tíminn bara flogið. Ég sem vil alltaf eiga sörur og saffransnúða í frystinum áður en aðventan byrjar klikkaði algjörlega þetta árið.

Þó ég hafi ekki staðið mig í smákökubakstrinum hef ég þó bakað ýmislegt annað. Þessar nutellafylltu blondies bauð ég upp á hér heima eitt kvöldið og daginn eftir kláruðum við þær. Okkur þóttu þær dásamlega góðar og ekki síðri daginn eftir.

Nutellafylltar blondies (uppskrift frá Ambitious Kitchen)

1 bolli smjör
2 bollar púðursykur
2 egg
1 msk vanilludropar
2 bollar hveiti
1 ½ tsk lyftiduft
¼ tsk salt
2 bollar dökkt súkkulaði, grófhakkað (ég notaði suðusúkkulaðidropana frá Síríus)
1 bolli Nutella (16 msk)
sjávarsalt til að strá yfir

Hitið ofn í 175° og klæðið skúffukökuform (í sirka stærðinni 23 x 33 cm, má líka vera aðeins minna) með smjörpappir.

Bræðið smjör í potti yfir miðlungsháum hita. Þegar smjörið byrjar að freyða er byrjað að hræra í pottinum. Eftir nokkrar mínútur byrjar smjörið að brúnast í botninum á pottinum, haldið þá áfram að hræra og takið af hitanum um leið og smjörið er komið með gylltan lit og farið að gefa frá sér hnetulykt. Takið smjörið strax úr pottinum og setjið í skál til að koma í veg fyrir að það haldi áfram að brúnast. Látið smjörið kólna áður en lengra er haldið.

Hrærið saman smjör og sykur þar til hefur blandast vel. Bætið eggjum og vanilludropum saman við og hrærið þar til blandan er mjúk og létt. Bætið þurrefnunum varlega saman við og endið á að hræra varlega súkkulaðinu saman við deigið.

Skiptið deiginu í tvennt. Setjið helminginn í botninn á kökuforminu (deigið kann að virðast of lítið til að fylla út í formið en hafið ekki áhyggjur af því þótt það verði bara þunnt lag, það á eftir að hækka!). Setjið Nutella jafnt yfir (það getur verið gott að setja matskeiðar af Nutella með jöfnu millibili yfir deigið og dreifa svo úr því með sleif eða hníf). Endið á að setja seinni helminginn af deiginu yfir og passið að það hylji alveg Nutellafyllinguna. Bakið í 23-27 mínútur eða þar til kanntarnir á kökunni eru orðnir gylltir á lit. Það er betra að baka hana aðeins styttra en lengur, svo hún verði frekar blaut í sér en ekki þurr. Stráið sjávarsalti yfir kökuna þegar hún kemur úr ofninum og látið hana síðan standa í 20 mínútur áður en hún er skorin í bita.